Napali mu 1983. Ndili mwanache naliji jwambonembonepe. Nambo panaliji ni yaka 10 natandite kupikana kupweteka chilu chosope. Pali pagambile kumala yaka yiŵili, lisiku line panajimwiche kundaŵi yasimanikwe kuti ngangukombola kwenda. Nalinjile amu ni amumu kutenganya ngongolo syangu nambope nganiyikomboleka. Kutandila palisikuli, nganingombolasoni kwenda mpaka lelo. Ulwelewu wandendekasisye kuti ngakulaga. Mpaka panguŵecheta pano ngusawonekape mpela mwanache.

Ulwelewu wuli wutandite, papitile miyesi ndili ngangutyoka panyumba. Lisiku line kwayiche ŵa Mboni sya Yehofa ŵaŵili. Pandaŵiji achalendo payiche kunyumba najuŵaga, nambo palisiku lyeleli nakundile kuti mbechetane nawo ŵamboniŵa. Jemanjaji ŵasalile ngani jakwamba ya Paladaiso. Yeleyi yandendekasisye kuti ngumbuchile yanapikene pandaŵi janaliji ni yaka msano. Pandaŵi jelejo mmishonale jwine lina lyakwe Jethro jwaŵatamaga ku Suriname, jwayikaga kukulalichila m’musi wetu kampepe pamwesi soni kukwajiganya Baibulo baba ŵangu. Jethro ŵatendaga yindu mwakulosya kuti akusanonyela, mwamti nombene namnonyelaga kwabasi. Nombe anganga ŵangu ŵanjigalaga ku kumisongano ja Mboni sya Yehofa jajatendekwaga m’musi wetu. Jumo mwa ŵamboni ŵaŵayiche kunyumba ŵala lina lyakwe ŵaliji Florence. Jwalakwe paŵambusisye naga mpaka sache kulijiganya Baibulo, nakundile.

Kaneko Florence jwayiche kunyumba lisiku line ali ni ŵamkwakwe lina lyawo Justus, mwamti twatandite kulijiganya Baibulo. Jemanjaji paŵamanyilile kuti une jwangakombola kuŵalanga, ŵanjiganyisye, soni pali papatile ndaŵi natandite kukombola kuŵalanga. Lisiku line liŵasali lyasalile kuti asalilidwe yakuti akatumichileje ku Suriname. Nadandawile ligongo lyakuti paliji pangali mundu jwine m’musi wa Orealla jwakapitilisye kunjiganya Baibulo. Nambope chakusangalasya chaliji chakuti Yehofa ŵangumbuchilagape.

Yili yigambile kutendekwa yeleyi, mpayiniya jwine lina lyakwe Floyd jwasimene kunyumba pandaŵi jaŵalalichilaga nyumba ni nyumba. Paŵagambile kumbusya naga mpaka sache kulijiganya Baibulo, nasechelele. Kaneko ni ŵambusisye kuti, “Ligongo chichi mkusechelela?” Nagambile kumjanga kuti, mundune nalijiganyisye kabuku kakuti Ana M’lungu Akisasosaga Chichi Kwetuwe? soni twatandite buku jakuti Chidziŵitso Chotsogolera ku Moyo Wosatha. * Namsalile ligongo lyakwe twalesile kulijiganya. Floyd jwamalisisye kunjiganya buku ja Chidziŵitso, nambo kaneko Floyd ŵasalilidwe kuti akatumichileje kudela jine. Yeleyi yatendekasisyesoni kuti pakaŵa mundu jwakunjiganya Baibulo.

 Mu 2004, apayiniya ŵaŵili Granville ni Joshua, ŵatumisye kuti akalalichileje kudela jakumangwetu. Jemanjaji ŵasimene pandaŵi jaŵalalichilaga nyumba ni nyumba. Ali ambusisye naga mpaka sache kulijiganya Baibulo, nasechelelesoni. Kaneko naŵendile jemanjaji kuti naga mpaka yiŵe yakomboleka tulijiganyeje buku ja Chidziwitso kutandila mtwe wandanda. Nagambaga kusaka kulola naga mpaka anjiganye yakulandana ni yaŵanjiganyisye achitachala ŵandanda ŵala. Granville ŵasalile kuti pana malo gakusatendelaga misongano m’musi mwetumo. Atamose kuti naliji chitamile panyumba kwa yaka chiŵandika 10, nambope mtimawu wasachilile kuti ngasongane nawo. Myoyo Granville ŵayiche kukunjigala panjinga ja ŵalemale ni kundutaga mpaka ku Nyumba ja Uchimwene.

Mkupita kwandaŵi, Granville ŵalimbikasisye kuti lembesye nawo Sukulu ja Undumetume. Jwalakwe ŵatite, “Atamose kuti mli ŵalemale, nambope mkusakombola kuŵecheta, mwamti lisiku line chimchiŵecheta ngani ja wosope. Nditu ngusamlila, yeleyi yichitendekwa.” Maloŵe gelega gangamuchisye kuti ngalikayichilaga.

Natandite kulalichila yimpepe ni Granville. Nambope misewu jatwapitaga patukulalichila jaliji jesolechesoleche mwamti yaliji yakusawusya kwenda mwelemu ni njinga. Myoyo, namŵendile Granville kuti bola andamicheje mu wilibala ni kundutaga. Kusala yisyene yeleyi yangamuchisye mnope. Mu Epulo 2005, nabatisidwe. Kaneko abale ŵanjiganyisye mwampaka samalileje mabuku ga ku Nyumba ja Uchimwene soni yampaka ndende pakamulichisya masengo yida yakwechesya maloŵe ni yakulochesya mafidiyo.

Chakutesya chanasa chili chakuti, mu 2007 baba ŵangu ŵawile pangosi. Liŵasa lyetu lyatengwiche mnope ni yeleyi. Granville jwayikaga ni kupopelaga yimpepe ni uweji soni ŵatuŵalanjilaga malemba gakulimbikasya. Pali pamasile yaka yiŵili chiwile baba ŵangu, nombe najo Granville jwawile pangosi. Yeleyi yatupweteche mnope.

Chiwa cha Granville chatendekasisye kuti mumpingo mwetu mukaŵa jwamkulungwa jwa mumpingo soni atamose jwakutumichila jwakamuchisya. Chiwachi chambweteche mnope ligongo Granville jwaliji mjangu jwapamtima. Jwalakwe jwangamuchisye kuti mbe paunasi ni Yehofa, soni ŵambaga yindu yejinji yakusosechela. Ali ajasiche napochele upile wakuŵalanga Sanja ja Mlonda pa misongano. Nambo ndili mbalasile ndime siŵilipe natandite kulila mwamti natyosile papulatifomu.

Natandite kupikana chenene pandaŵi jele abale ŵa kumpingo wine ŵayiche kukutukamuchisya. Nambosoni abale ku ofesi ja nyambi ŵatutumichisye M’bale Kojo juŵaliji mpayiniya jwapadela. Naliji jwakusangalala mnope kwawona mama ŵangu soni mpwanga ali mkulijiganya Baibulo soni kubatisidwa. Mu Malichi 2015 naŵele mtumiki jwakamuchisya. Pali papite ndaŵi, naŵechete ngani ja wosope. Kaliji kandanda kuŵecheta nganiji. Lisiku lyeleli nalisile mnope ligongo lya kukumbuchila yaŵasalile Granville. Paja jwalakwe jwasalile kuti, “Lisiku line chimchiŵecheta ngani ja wosope. Nditu ngumsalila, yeleyi yichitendekwa.”

Pa mapologalamu ga JW Broadcasting^® gakusalosyasoni ŵandu ŵane ŵali mu ndamo mpela janguji. Atamose kuti jemanjaji ali ŵalemale nambope akusasangalala ligongo lya kumtumichila Yehofa. Une ngusakombolape kutenda yindu yine. Pakuŵa naliji jwakusachilila kumtumichila Yehofa mwampaka ngombolele natandite upayiniya ŵakutamilichika. Mu Sepetemba 2019 napochele utenga wakusangalasya mnope. Mwesi welewu abale ŵasalile kuti sambano ndili jwamkulungwa jwa mumpingo. Mpingo wetuwu wakwete ŵakulalichila ŵakwana 40.

Ngusayamichila mnope abale ni alongo ŵele ŵanjiganyisye Baibulo soni kungamuchisya kuti namtumichileje Yehofa. Chindu chakusangalasya mnope changusayamichila chili chakuti Yehofa ŵangumbuchilagape.