Nni gargelnageg ko duw ni 1983. Tin som’on e duw ko yafos rog e ba fel’ fithik’ i dowag. Machane nap’an ni gaman ragag e duw rog, ma aram me tabab ni nga i amith fithik’ i dowag nib gel. Sogonap’an l’agruw e duw nga tomuren, me yan i reb e kadbul nug od ma dabkiyog ni nggu mithmith. Demtrug gelngin nug be athamgil ni nggu mithmitheg eg, ma der yag ni nge mithmith. Ka aram e rofen ndaki yag nug un ko yan. M’ar rog e k’aringeg ni nge dab kug ga’. Ere ke mada’ ko chiney ma ka taab ga’ngig ngak bochi tir.

In e pul nga tomuren ni kug m’ar ndabkiyog ni nggu wan nga bang, ma aram me yib l’agruw e Pi Mich Rok Jehovah nga tabinaw rog. Nap’an nra yib be’ nga tabinaw rog mab ga’ nug ma mith, machane rofen nem e gu pag e gal ppin nem ni ngar nonow ngog. Nap’an ni yow be weliy murung’agen e Paradis, me yib ngan’ug e n’en nug rung’ag u nap’an ni ke gaman sogonap’an lal e duw rog. Ngiyal’ nem e bay ba missionary ni ka nog Jethro ngak ni ma par u Suriname ni ma yib ko binaw romad taab yay u reb e pul ni nge fil e Bible ko chitamag. Rib gol Jethro ngog, ma rug baadag daken. Ku ma fekeg e tutuw nge titaw rog nga boch e muulung ko Pi Mich ni un tay u lan e binaw rog. Ere nap’an ni fitheg bagayow fa gali ppin nra bow nga tabinaw rog e rofen nem ni ka nog Florence ngak ko kug baadag ni nggu fil boch ban’en u murung’agen e n’en ni kug weliyed, ma aram me m’agan’ug ngay.

I sul Florence nge Justus ni pumoon rok ni ngar guyew gag, ma aram mug tababgad ko fol Bible. Nap’an nra nangew nda gu nang e beeg babyor, ma aram mar ayuwegew gag ni nggu fil rogon e beeg babyor. Munmun, ma aram mug tabab ni ngaug beeg e babyor ni yigoo gag. Faani yan i reb e rran, ma rognew ngog ni aram e ngan pi’row nga Suriname ni ngar pigpiggow u rom. Ri kireban’ug ni bochan e dakuriy be’ u Orealla ni gamow ra ulul ko fol Bible. Machane rug felfelan’ ni bochan e ke ulul Jehovah ni nga i lemnageg.

De n’uw nap’an nga tomuren, ma aram miki yib reb e pioneer ni ka nog Floyd ngak nga Orealla, ma aram mu kug mada’gow u nap’an ni be machib u mit e tabinaw. Nap’an ni be weliy murung’agen e fol Bible ngog, ma aram mug siminmin. Ere fitheg ni gaar, “Mang fan ni ga be siminmin?” Ere gog ngak ni kug mu’ i fil fare ke babyor ni kenggin e Mang e Ba T’uf ni Ngad Rin’ed ku Got?, ma kug tabab i fil fare ke babyor ni Knowledge That Leads to Everlasting Life. * Gu weliy ngak fan ni kug tal ko fol Bible. Ere gu ululgow Floyd i fil fare ke babyor ni Knowledge ko gin nug mus riy, machane mu kun pi’ nge yan nga bang ni nge pigpig u rom. Ma aram mu kug par bayay ndakuriy be’ ni nggu filew e Bible.

Machane nap’an e duw ni 2004, min pi’ Granville nge Joshua ni yow l’agruw e special pioneer ni ngar pigpiggow u Orealla. Ere nap’an ni yow be machib u  mit e tabinaw mar piriegew gag. Nap’an nra fithew ko gu baadag ni nggu fil e Bible, ma aram mug siminmin. Gog ngorow ni ngar filew fare ke babyor ni Knowledge ngog ni nggu tababgad u tabolngin. Gu baadag ni ngguy ko taab n’en e yow ra fil ngog ko tin ug filed fa gali cha’ ni ur filew e Bible ngog, fa danga’. I yog Granville ngog ni yibe tay e muulung ko binaw rog. Yugu aram rogon ni ke chugur i gaman ragag e duw nug ma par u tabinaw nda gur ma yan nga bang, machane gu baadag ni nggu un ko muulung. Ere yib Granville nga tabinaw rog me fekeg nge teg nga wheelchair, ma aram me pi’pi’yeg ko gin bay e Tagil’ e Liyor riy.

Boch nga tomuren, me pi’ Granville e athamgil nga lanin’ug ni nggu un ko fare skul ni ka nog e Theocratic Ministry School ngay. I gaar ngog: “Yugu aram rogon ni gab m’ar ni bay boch ban’en ndabiyog ni ngam rin’, machane rayog ni ngam non. Ra yan i taw nga ba ngiyal’, mag ra pi’ reb e welthin ni fan ko yoor. Ra buch e re n’ey.” Pi thin ney ni yog ngog e ri pi’ e pagan’ ngog.

Gu tabab ni nggu un ngak Granville ko machib. Machane boor e kanawo’ nib mo’maw’ rogon ni ngan pi’pi’ e wheelchair rog riy. Ere gog ngak Granville ni nge teg nga wulbar nga i pi’pi’yeg, ma aram me yag ni ngaug warow ko machib. Nap’an e April ko duw ni 2005, ma aram mug un ko taufe. De n’uw nap’an nga tomuren, ma aram me skulnageg e pi walag ni pumoon u rogon ni ngaug yarmiy e babyor ko gin ma par e babyor ko ulung riy, nge rogon ni nggu maruweliy fare masin ni bay u Tagil’ e Liyor ni yima fanay ni fan ko musik, nge mic, nge ku boch ban’en.

Nap’an e duw ni 2007, mi ri kireban’ug ni bochan e aram e re duw ni yim’ e chitamag. I mul u bowoch me aw e parpala ko bowoch ngak nge maad’ad nib elmerin, ma in e rran nga tomuren me yim’. Ri kireban’ e tabinaw rog. Ere yib Granville i guymad nggu meybilgad u taabang, miki beeg boch e thin nu Bible ni nge pi’ e athamgil nga lanin’mad. L’agruw e duw nga tomuren miki kireban’mad nib gel ni bochan e ki yim’ Granville. I ligil e bowoch rok nga ar nnep’, ma l’agruw e rran nga tomuren mfin pirieg ni ke yim’.

Yan i par e chi ulung romad nem ndakuriy e piilal riy, ma kemus ni taareb e ministerial servant ni bay. Ri kireban’ug nib gel u nap’an ni yim’ Granville, ya ir reb e fager rog nrib t’uf rog. Gubin ngiyal’ ni ma ayuwegeg ni nggu chugur ngak Jehovah, maku ma ayuwegeg ko tin nib t’uf rog. Re muulung nni tay u tomuren ni yim’, me gag e gu beeg e paragraph u nap’an e Fol Wulyang ko Damit. Gu athamgil nggu beeg e gal nsom’on e paragraph nge m’ay, machane mug tabab ko meyor nib gel ndaki yag ni nggu tal. Ere thingar gu sul nggu par ko chiya rog.

Gu felfelan’ bayay u nap’an ni yib boch e walag ni pumoon u boch e ulung ni ngar pied e ayuw ngomad u Orealla. Ki pi’ e branch ofis reb e special pioneer ni ka nog Kojo ngak ni ngki yib i ayuwegmad. Ki felfelan’ug ni bochan e tabab reb e pagel ni walageg nib bitir ngog nge chitinag ko fol Bible, me munmun mar unew ko taufe. Nap’an e March ko duw ni 2015, ma aram min dugliyeg ni nggu mang reb e ministerial servant. Boch nga tomuren, ma aram mug pi’ e bin som’on e welthin rog ni fan ko yoor. Rofen nem e gu siminmin mu kug yor ni bochan e yib ngan’ug fapi thin ni yog Granville ngog ko fapi duw ni ke yan ni gaar: “Ra yan i taw nga ba ngiyal’, mag ra pi’ reb e welthin ni fan ko yoor. Ra buch e re n’ey.”

Kug fil murung’agen boch e Pi Mich ni taareb rogon e magawon ni gamad be mada’nag u daken e pi program ko JW Broadcasting^®. Yugu aram rogon ni yad ba m’ar ni bay boch ban’en ndabiyog rorad, machane boor ban’en ni ke yag ni ngar rin’ed maku yad be par ni yad ba felfelan’. Ere ku arrogog ni bay boch ban’en nrayog ni nggu rin’. Gu baadag ni nggu rin’ urngin ban’en nrayog rog ni fan ngak Jehovah. Aram fan nug tabab ko regular pioneer. Nap’an e September ko duw ni 2019, ma bay ban’en nrib manigil nnog ngog ndag lemnag nra buch! Aram e re pul nni dugliyeg ni nggu mang reb e piilal u lan e ulung romad nsogonap’an 40 e pi tamachib ni bay riy.

Rug be pining e magar ko pi walag nra filed e Bible ngog, mu kur ayuweged gag ni nggu pigpig ngak Jehovah. Bin th’abi ga’ fan riy e, rug be pining e magar ngak Jehovah ni ke ulul ni nga i lemnageg.