1-2. O midokoay ci Yihofaan a tamdaw iraay ko maanan makapahay hatokel?

PAKAYNI i tamdaw, kalimlaan ko hatokel. Tokel no roma tamdaw ira ko lipahakay a raramod, palahad to tanektekay ko tireng lipahakay a wawa, anca miliyas to pisemsem no adada, patikol a tanektek. Mihamhamay ko Krisciyang to malecaday a demak. Cowa ka hatini aca, mitokelayho kita tahadaˈoc maˈorip, mitokel pakaˈalaw to mapatayay salawina patikol maˈorip.

² Sowal no tarokos ci Pawlo, o pihamham to Kawas, ‘papatikol maˈorip ko moecelay tamdaw ato cowa ka moecel a tamdaw.’ (Dmak 24:15) Cowa ko saka cecay ci Pawlo milengo to patikol maˈorip, na mihadakay ci Yopu toniya hatokel, pakasoˈlin to mamaharateng no Kawas cingra, hanaca patikol a paˈorip cingraanan.—Yopu 14:7-10, 12-15.

3. O saka 15 fedengan no saka 1 Korinto pakayni kitaanan iraay ko maanan a haepoc?

³ “Patikol maˈorip ko mapatayay tamdaw” o ‘salakatay a sifanaˈ’ no pakasoˈlinan no Kristokiyo, o kalimlaan a ‘taˈeneran.’ (Hipray 6:1, 2) Milengo ci Pawlo i saka 1 Korinto 15 fedengan to patikol maˈorip a kimad, pakalalokay to saka 1 hahekalan a Krisciyang. Ano hakowato ko halafin ita a pakasoˈlin toniya kimad, o saka 15 fedengan no saka 1 Korinto o papakalalok kitaanan, padama kitaanan pakasoˈlin to mamalaˈosi ko hatokel patiokol maˈorip.

4. O maanan ko papadama kitaanan misaˈosi to papatikol maˈorip ko mapatayay tamdaw?

⁴ O pipatikol ni Yis Kristo a maˈorip o patenakan ni Pawlo i Korinto a ‘ngaˈayay lihaf.’ (1 Korinto 15:1, 2) Oniya ngaˈayay lihaf pakasoˈlinay kita, soˈlin mapatay ko salawina ita, iraay ko hatokel patikol maˈorip. Sowal ni Pawlo ano caka pakasoˈlin ko Krisciyang to patikolayto ci Yis maˈorip, awaayto ko kapo no pihakelong ningra. (1 Korinto 15:17) O papakasoˈlin kita toniya  kimad, ngaˈ masaˈosi to papatikol a maˈorip ko mapatayay a tamdaw.

5-6. O sowal no 1 Korinto 15:3, 4 pakayni kitanan iraay ko maanan a tatodong hani?

⁵ Milengo ci Pawlo to patikol maˈorip a demak i, satapang mihadakay to tolo a demak: (1) “Pakayniyay i raraw ita mapatay” ci Kristo. (2) “Mitademanto” cingra. (3) “Malecad o sowal no Fangcalay Cudad, saka tolo romiˈad patikolay maˈorip” cingra.—ˈOsien ko 1 Korinto 15:3, 4.

⁶ O kapatay ni Yis, pitadem ato patikol maˈorip pakayni kitaanan iraay ko maanan a tatodong hani? Pairasolay ci Isaya, ci Misiya wa ‘itini kaˈoripan no tamdaw a pala patayen,’ hanaca ‘malacafay to tatiihay tamdaw a tademen.’ Roma i, somowalayho ci Isaya wa ‘mitamorong to raraw no ˈalomanay’ ci Misiya, tiya patafang ci Yis to ˈorip malo sapatefoc i, matatodongayto koniya sapairasol. Kawra sapatafangaw ci Yis to sapatefoc i Kawas i, wa salakatho a patikol maˈorip tayra i kakarayan. (Isaya 53:8, 9, 12; Matay 20:28; Loma 5:8; Hipray 9:24) Mihaenay, o kapatay ni Yis, pitadem ato patikol maˈorip padamaay kitanan pakasoˈlin to iraay ko tokel noniyah miliyas to patay, hanaca ngaˈay malacafay to mapatayayto a salawina.

7-8. Hano pakasoˈlin ko Krisciyang to patikolayto ci Yis a maˈorip?

⁷ Salakatho a pakasoˈlin kita to patikolayto ci Yis maˈorip, ngaˈ pakasoˈlin to hatokel patikol maˈorip. Hano ngaˈay pakasoˈlin kita, maharekayto ci Yihofa patikol paˈorip ci Yisan hani?

⁸ ˈAlomanay ko pakaˈaraway a tamdaw to patikolayto maˈorip ci Yis. (1 Korinto 15:5-7) O saka cecay masowalay ni Pawlo mamisawacay a tamdaw ci Pitiro. Cecay ˈopo a nisawawaan mahaenay ko sowal, soˈlinay paˈarawen ni Yis ci Pitiro. (Luka 24:33, 34) Roma i, ‘12 tarokos’ pakaˈaraway to patikolay maˈorip a Yisan. Ikor kinacecayay, ci Yis ‘paˈaraway to 500 a salikaka,’ mapakalalokay ko ˈalomanay, o masowalay no Matay 28:16-20 a saˈopo i Kalili konini. Ci Yis ‘paˈaraway ci Yakopan,’ Oniya Yakop o safa ni Yis alatek. Salakat cowa pakasoˈlin cingra to ci Misiya ci Yis, kawra maˈaraw ningra ko patikolay maˈorip a Yis, pakasoˈlinayto. (Yohani 7:5) Sasinanoten i, itiniay ci Pawlo i Kongyin 55 miheca mitilid toniya tikami, itiya maˈoripayho ko pakaˈaraway to patikol ni Yis maˈorip. Mihaenay, ano cisasa ko tamdaw, ngaˈayay milicay toniya pakaˈaraway a tamdaw.

9. Mikitini Dmak 9:3-5, hano ngaˈay ci Pawlo misawacay to patikolayto maˈorip ci Yisan hani?

⁹ Ikor, paˈarawan ni Yis ci Pawlo. (1 Korinto 15:8) Ci Pawlo itini fatad no sakatayra i Tamaskus, matengilay ko sowal no patikolay maˈorip a Yisan, maˈarawayho ko ˈdil ato ˈodingar ni Yis i kakarayan. (ˈOsien ko Dmak 9:3-5.) O nalifetan ni Pawlo misawacayay, o pipatikol ni Yis maˈorip cowa ko tawcikel.—Dmak 26:12-15.

10. Pakasoˈlinay ci Pawlo patikolayto maˈorip ci Yis, ikor samanay ko demak hani?

¹⁰ O sasinanoten ko wacay ni Pawlo, samanen na mipalakay cingra to Krisciyang i salakat. Pakasoˈlin ci Pawlo to patikolayto maˈorip ci Yis i, misaˈicelay pasowal to tamdaw toniya kimad. Sapihaenaw to demak, kinapinaay masetiˈ cingra, mipalitan, tahalifaayho to pades i tamina. (1 Korinto 15:9-11; 2 Korinto 11:23-27) Samanen pakasoˈlinay ci Pawlo to patikolayto maˈorip ci Yis, mansa makahi kinafalah to ˈorip paˈading toniya kimad. Itini saka 1 hahekalan ˈalomanay ko misawacayay tamdaw, coko padamaay kisowanan pakasoˈlin to patikolayto maˈorip ci Yis, pakasoˈlinho to mamalaˈosi ko hatokel patikol maˈorip noikor hokira?

11. Itini i Korinto roma a Krisciyang iraay ko mararaway a harateng to patikol maˈorip, o maanan ko lalangian hani?

¹¹ Itini i Korinto roma a Krisciyang iraay  ko mararaway a harateng to patikol maˈorip, sowal nangra ‘awaay ko patikolay maˈorip a demak.’ Misamanay? (1 Korinto 15:12) Itini Kirisiya roma niyaroˈ Atin, citanengay tamdaw milalikafay to patikolay maˈorip ci Yis a demak. O hatiniay harateng mifiyoray to roma Korintoay a Krisciyang. (Dmak 17:18, 31, 32) Rom i, harateng no roma Krisciyang, o patikol maˈorip o sapatinako aca sanay, sakoniya sowal, o cecay ciraraway a tamdaw mahecaday o “mapatayay,” kawra malo Krisciyang cingra i, masodod ko raraw ikor, “patikolay maˈorip.” Ano samaanto, o Krisciyang ano eca pakasoˈlin to patikol maˈorip, o pihakelong ningra awaay ko epoc. Ano cowa ka patikolen ni Yihofa paˈorip ci Yis, wa awa ko sapatefoc ni Yis, o raraw ita cowa ko mamilifok to sasodod. Mihaenay, o cowa pakasoˈlin to patikol maˈorip a tamdaw awaay ko soˈlinay a hatokol.—1 Korinto 15:13-19; Hipray 9:12, 14.

12. Mikitini 1 Pitiro 3:18, 22 mahapinang ita, o pipatikol ni Yis maˈorip iraay ko maanan kasasiroma to salakatay a patikolay maˈorip hani?

¹² Mikitini nalifetan no niyah mafanaˈay ci Pawlo, ‘patikolayto maˈorip ci Kristo nai patay.’ O pipatikol ni Yis maˈorip ikakaay to salakatay a patikolay maˈorip, samanen o salakatay patikol maˈorip a tamdaw ikor miliyaway mapatay. Sowal ni Pawlo, ci Yis ‘itini mapatayay tamdaw o salakatay a lidongen,’ tatodong ningra: Ci Yis o saka cecay patikol maˈorip malo ˈadingo ko tireng a tamdaw, o saka cecay macokacokay tayra i kakarayan a tamdaw.—1 Korinto 15:20; Dmak 26:23; ˈosien ko 1 Pitiro 3:18, 22.

13. Pakayni ci Atam aci Yisan, palalinian ni Pawlo to maanan hani?

¹³ O kapatay no cecay tamdaw hano ngaˈay milidong to masacaˈolay efan tamdaw hani? Mihadakay ci Pawlo to matatodongay a caˈof, palaliniyan ningra ko pifiyor ni Atam aci Yis to tamdaw. Masowal ci Atam i, sanay ci Pawlo: ‘O patay . . . pakayniyay i cecay tamdaw ko sakaira.’ Ikor no mararaw ci Atam pairaay to patay no niyah ato polong tamdaw, no hatini pakayniyay pitowakang ningra a maroray kita. Kawra sanay ko dotoc a sowal ni Pawlo: ‘Patikol maˈorip ko mapatayay . . . pakayniay i cecay tamdaw ko sakaira.’ Oniya ‘cecay tamdaw’ ci Yis. Samanen patikolan no Kawas paˈorip ci Yis, hato iraay ko ˈodingaray tokel no tamdaw. Mansa mihaen ko sowal ni Pawlo: ‘Pakayni ci Ataman, mapatayay ko polong a tamdaw, pakayni ci Kristoan, mamaˈorip ko polong a tamdaw noikor.’—1 Korinto 15:21, 22.

14. Wa patikol maˈorip ci Ataman han? Tadtaden.

¹⁴ Sowal ni Pawlo: ‘Pakayni ci Ataman, mapatayay ko polong tamdaw no hatini.’ Tatodong ni Pawlo i, o teloteloc ni Atam mirocokay to raraw, cowa ka lefot ko tireng ato falocoˈ, saikor o mamapatay maemin. (Loma 5:12) Soˈlin o “papatikol maˈorip” ko mapatayay noikor, kawra cowa ka haop ci Atam. Misamanay? Ci Atam nao malefotay tamdaw, padeteng sanay mitowakang to Kawas, mansa caka ngaˈay mikitini sapatefoc milifok to haepoc. Noikor sasawkiten ni Yis ko roma tamdaw malo ‘lotok a siri,’ malecaday ci Atam cangranan, o ‘tatahadaˈoc a malaˈafo.’ —Matay 25:31-33, 46; Hipray 5:9.

15. Saka 1 Korinto 15:22 o “patikol maˈorip” a “polong a tamdaw” mahawpay ko cima hani?

¹⁵ Sinanoten hena, sowal ni Pawlo: ‘Pakayni ci Yisan, patikol maˈorip ko polong tamdaw noikor.’ (1 Korinto 15:22) O sapatikami ni Pawlo to Korintoay a Krisciyang, manilnilay no fangcalay saocor cangra, iraay ko hatokel patikol maˈorip tayra i kakarayan, mihaenay o patikolay maˈorip a ‘polong tamdaw’ mahawpay cangra. Sowal ni Pawlo cangra ‘o mapalacecay aci Kristo, malo fangcalayto, micadaay to satahidang a malo fangcalay finacadan.’  Roma i, o mitoroˈan ni Pawlo ‘pakayni ci Kristoan a mapatayay a tamdamdaw,’ mitoroˈan i o manilnilay no fangcalay saocor a Krisciyang. (1 Korinto 1:2; 15:18; 2 Korinto 5:17) Itini roma tikami i, sanay ko sowal ni Pawlo, ‘mapalacecayay aci Kristo a mapatay’ a tamdaw ‘wa milecad ci Kristoan a patikol maˈorip malacecay cingranan.’ (Loma 6:3-5) Ci Yis patikol maˈorip malo ˈadingo ko tireng ikor tayra i kakarayan, mihaenay mapalacecay ci Kristoan a tamdaw, o manilnilay no fangcalay saocor a Krisciyang, wa patikol maˈorip tayra i kakarayan.

16. Panganganen ni Pawlo ci Yis to ‘saˈayaway mipanayan,’ mifanaˈay konini to maanan hani?

¹⁶ Nolitengan, patafangan no Israil tamdaw i Kawas ko saˈayaway mipanayan. Patinakoan ni Pawlo, ci Kristo o ‘saˈayaway a mipanayan i lalomaˈ no mafotiˈayto a tamdaw.’ Haratengen, soˈlin itini ˈayaw ni Yis iraay ko patikolay maˈorip a tamdaw, tinakoen ci Lacarus, kawra edengan ci Yis ko saˈayaway patikol maˈorip malo ˈadingo hanaca tahadaˈoc ko ˈorip. Roma i, panganganan ni Pawlo ci Yis o ‘saˈayaway mipanayan,’ mifanaˈay wa iraho noikor ko patikolay maˈorip malo ˈadingo ko tireng tayra i kakarayan. Malaod ko misaˈosian a toki, o tarokos ato malacecayay ci Kristoan a tamdaw wa tahalifa to mahaenay a pipatikol maˈorip.

17. Oya malacecayay ci Kristoan a tamdaw wa hacowa milifok to kakarayan a sapalifon?

¹⁷ Patikami ci Pawlo to Korintoay a tamdaw i, oya “malacecayay ci Kristoan” a tamdaw cowaho patikol maˈorip tayra i kakarayan. Masowal ko patikol maˈorip noikor, sanay ci Pawlo: ‘O mamitoor ko kahacecay tamdaw to matatodongay kadadoedo a patikol maˈorip. Ci Kristo o saˈayaway a panayen, dotoc ano patikol ci Kristo a tayni kitaanan a tatokian, oyato malacecayay cingranan a tamdaw.’ (1 Korinto 15:23; 1 Tisalonika 4:15, 16) Nohatini ‘o patikolanto ni Kristo a tayni kitaanan a tatokian.’ Toniya lintad, o mapatayay a tarokos ato roma manilnilay a Krisciyang wa milifok to kakarayan sapalifon, ‘malecad ci Kristoan a patikol maˈorip malacecay cingranan.’

18. (1) Hano mafanaˈ kita, cowa ko tayra aca i kakarayan patikol maˈorip, wa iraho ko maanan a patikolay maˈorip hani? (2) Mikitini saka 1 Korinto 15:24-26, wa samaan ko demak ni Yis hani?

¹⁸ O roma Krisciyang cowa ko tatayra i kakarayan kalacafay ci Yisan mikowan, iraay ko maanan hatokel nangra hani? Iraay ko hatokel nangra patikol maˈorip. Sowal no Fangcalay Cudad, ci Pawlo ato roma tatayra i kakarayan a Krisciyang wa ‘milifok to saˈayaway a patikol maˈorip.’ (Filipi 3:11) Sowal no sinael ikor wa  iraho ko roma papatikol maˈorip, malecad to sowal ni Yupo konini. (Yupo 14:15) Ikor papalahdaw to polong no mikowanay halo cifadangalay ato ciˈicelay a maemin, itiya o ‘malacecayay cingranan’ a tamdaw wa kalacafay cingranan tayra i kakarayan. Ikor, o ‘saikoray a ˈada o patay mamalahdaw.’ Oniya patikolay maˈorip i kakarayan a tamdaw cowato ko mamapatay tahadaˈoc, samaan ko roma tamdaw hani?—ˈOsien ko 1 Korinto 15:24-26.

19. Iraay ko tokel i fafekang no sera maˈorip a tamdaw mihamhamay to maanan a demak?

¹⁹ Iraay ko tokel i fafekang no sera maˈorip a tamdaw ngaˈayay mihamham mifekad ko maanan a demak hani? Sanay ci Pawlo, mihamhamay cingra to Kawas, ‘o moecelay tamdaw ato cowa ka moecel a tamdaw wa patikol maˈorip.’ (Dmak 24:15) Mahapinangay, ‘cowa kamoecel a tamdaw’ cowa ko ngangaˈay tayra i kakarayan, mihaenay o mitoroˈan no sinael o itiniay fafekang no sera a patikol maˈorip.

20. Hano matongal ko pakasoˈlin iso to hatokel patikol maˈorip hani?

²⁰ Ngaˈayay pakasoˈlin kiso, o mamalaˈosi ko hatokel patikol maˈorip. Itiniay fafekang no sera patikol maˈorip a tamdaw iraay ko hatokel tahadaˈoc maˈorip. Ano mapatayay ko salawina iso, o mamihinom koniya hatokel tisowanan. Wa itini cangra pikowan ni Kristo ato ‘144,000 tamdaw to 1,000 miheca a patikol maˈorip.’ (Paˈarawan 20:6) Ngaˈayho pakasoˈlin kiso, itini ˈayaw no misatapang ko pikowan ni Kristo to 1,000 miheca mapatay kiso, o papatikol a maˈorip. Sowal no Fangcalay Cudad, ‘oniya tokel cowa ko papatoled to tamdaw.’ (Loma 5:5) Anini, o hatokel patikol maˈorip o papatanektek tisowanan, lipahak a matayal saki Kawas. Dotoc a lalakaw wa milengo, wa ngaˈayho kita mikitini 1 Korinto saka 15 fedengan minanam to maanan.