1-2. Aha do na diharappon naposo ni Debata?

 MASSAI penting do molo adong na taharappon di parngoluan on. Piga-piga halak mangharappon keluargana marhasil, sehat akka gellengna, manang boi malum sahitna. Hita pe halak Kristen taharappon do sisongon i. Alai adong dope na uppenting sian i, taharappon do asa boi mangolu salelengna, jala asa mulak mangolu muse na tahaholongi.

² Apostel Paulus mandok, “Mangkirim do ahu tu Debata, na adong do haheheon tu halak na burju dohot halak na jahat.” (Ul. 24:15) Dang holan si Paulus na hea paboahon taringot haheheon. Si Job pe hea do paboahon taringot i. Pos do roha ni si Job, na diingot Debata do ibana jala paheheonna.​—Job 14:7-10, 12-15.

3. Aha do manfaatna molo taparsiajari 1 Korint 15?

³ Ajaran taringot tu “haheheon ni halak na mate” termasuk ma i “ajaran na parjolo” na dihaporseai halak Kristen. (Heb. 6:1, 2) Haheheon i ma na diulas si Paulus di 1 Korint 15. Na disurat ni si Paulus i boi patoguhon halak Kristen di abad na parjolo. Jala boi do tong paposson rohatta na lao masa do haheheon i. 

4. Aha do na mambahen pos rohatta na lao hehe do halak na tahaholongi?

⁴ Ikkon porsea do hita tu haheheon ni Jesus, asa pos rohatta na boi do mulak mangolu halak na tahaholongi naung mate. Haheheon ni Jesus on ma barita na uli na dibahas si Paulus tu halak Korint. (1 Kor. 15:1, 2) Sasittongna molo so porsea halak Kristen tu haheheon ni Jesus, sia-sia ma haporseaonna tu Debata. (1 Kor. 15:17) Jadi ikkon porsea do hita tu haheheon ni Jesus, asa porsea hita paheheonna do akka halak naung mate.

5-6. Aha do manfaatna molo taboto hasittongan na disurat di 1 Korint 15:3, 4?

 ⁵ Tikki dipaboa si Paulus taringot haheheon i, adong do tolu hasittongan na dipaboa ibana: (1) “Kristus na mate alani dosanta.” (2) “Nunga dikubur ibana.” (3) “Hehe do ibana di ari na patoluhon songon na tarsurat di Buku na Badia i.”​—Jaha 1 Korint 15:3, 4. 

⁶ Aha do manfaatna molo taboto tolu hasittongan on? Nungnga dipaboa si Jesaya hian, “na lao dipamate do [Messias] sian luat ni halak na mangolu” jala “dikuburhon rap dohot akka parjahat”. Alai didok si Jesaya do muse, mate pe Messias, alani “dosa ni godang halak” do. Songon i ma cara ni Jesus paradehon tobusan. (Jes. 53:8, 9, 12, NWT; Mat. 20:28; Rom 5:8) Tikki taboto tolu hasittongan on, gabe boi ma pos rohatta lao disesa dosatta jala dipalua hita sian hamatean. Dung i gabe pos ma rohatta mulak mangolu do muse halak na tahaholongi naung mate.

7-8. Aha do na paposson roha ni halak Kristen na tutu do Jesus i naung hehe?

⁷ Asa porsea hita na lao masa do haheheon, ikkon porsea do hita tu haheheon ni Jesus. Boasa boi pos rohatta naung dipahehe Jahowa do Jesus?

⁸ Pos do rohatta na tutu do Jesus dipahehe, ala godang do saksi na mamereng i. (1 Kor. 15:5-7) Saksi na parjolo na dipaboa si Paulus, i ma si Petrus (si Kepas), jala diparhatutu akka sisean na asing do i. (Luk. 24:33, 34) Akka apostel pe diida do Jesus naung dipahehe. Dipatuduhon Kristus do muse dirina tu lobi sian 500 halak dongan sahaporseaon na marpungu di sada inganan. Olo do ra di Galilea nasida marpungu songon na dipaboa di Mateus 28:16-20. Dung i “dipatuduhon ma muse dirina tu si Jakobus” adek tirina i. Gabe porsea ma ibana na Messias do Jesus i, hape andorang so i, dang porsea hian ibana. (Joh. 7:5) Tikki dibahen si Paulus surat on hira-hira taon 55 M, godang dope saksi mata na mangolu. Jadi molo adong na ragu na tutu do Jesus hehe, boi ma langsung disukkun nasida tu akka saksi na mangolu i dope.

9. Sesuai tu Ulaon ni Apostel 9:3-5, aha do na dialami si Paulus na paposson rohatta na tutu do Jesus dipahehe?

⁹ Di pudian ni ari dipatuduhon Jesus do dirina tu si Paulus. (1 Kor. 15:8) Tikki di pardalanan tu Damaskus, dibege si Paulus (si Saulus) ma soara ni Jesus naung dipahehe. Jala mandapot parnidaan do si Paulus boi mangida Jesus di surgo. (Jaha Ulaon ni Apostel 9:3-5.) On ma bukti na asing, na tutu do Jesus dipahehe.​—Ul. 26:12-15.

10. Aha do na diulahon si Paulus alani pos ni rohana tu haheheon ni Jesus?

¹⁰ Tarsonggot do piga-piga halak mambege pengalaman ni si Paulus on. Alana disiksa ibana do najolo halak Kristen. Dung pos roha ni si Paulus naung hehe Jesus, gabe diurupi ibana ma halak na asing asa porsea tu haheheon i. Sabar do ibana tikki dipukkuli, dipenjarahon, manang tikki karam kapal lao mambaritahon naung mulak mangolu Jesus sian hamatean. (1 Kor. 15:9-11; 2 Kor. 11:23-27) Massai pos do roha ni si Paulus tu haheheon ni Jesus, sappe rela do ibana mate mampartahatton haporseaonna i. Tottu gabe pos ma rohatta tu haheheon ni Jesus alani pengalaman ni akka halak Kristen di abad na parjolo. Jala gabe tamba  ma muse pos ni rohatta na lao mulak mangolu do sogot akka halak naung mate.

11. Aha do na mambahen sala pangattusion ni halak Korint tu haheheon?

¹¹ Piga-piga halak Kristen na di Korint, sala do pangattusionna tu haheheon. Jala na deba mandok “so adong haheheon tu halak na mate”. Boasa songon i? (1 Kor. 15:12) Alana adong do akka halak na malo di Atena mangarehei ajaran taringot haheheon ni Jesus. Ajaran ni akka halak na malo on nungnga mempengaruhi halak Korint. Jadi olo do ra akka halak Kristen na di Korint pe nungnga terpengaruh tu ajaran i. (Ul. 17:18, 31, 32) Gariada adong sian nasida na mandok molo lapatan ni haheheon i, i ma “mate” di bagasan dosa, alai “mulak mangolu” tikki gabe halak Kristen. Aha pe alasan ni nasida dang porsea tu haheheon, on patuduhon sia-sia do haporseaon ni nasida tu Debata. Molo dang dipahehe Debata dope Jesus, berarti dang digarar dope tobusan i jala toktong ma hita dang dipalua sian dosa. Alani i, dang adong harapan ni halak na so porsea tu haheheon.​—1 Kor. 15:13-19; Heb. 9:12, 14.

12. Songon na didok di 1 Petrus 3:18, 22, boasa dumenggan haheheon ni Jesus?

¹² Takkas do diboto si Paulus “nunga dipahehe Kristus sian na mate”. Dumenggan do haheheon ni Jesus on sian sude haheheon na hea masa najolo. Ai mate do ujungna akka halak na dipahehe i. Didok si Paulus do molo Jesus i “na parjolo dipahehe sian sude halak na mate”. Boasa songon i? Ala ibana do na parjolo dipahehe lao mangolu di surgo.​—1 Kor. 15:20; Ul. 26:23; jaha 1 Petrus 3:18, 22.

13. Songon dia do si Paulus mambandingkon si Adam dohot Jesus?

¹³ Songon dia hamatean ni sahalak jolma boi mambahen marjuta halak mangolu? Dibahen si Paulus do alus na masuk akkal. Dibandingkon ibana ma si Adam dohot Kristus. Taringot si Adam didok si Paulus, “Hamatean i ro sian sahalak jolma.” Tikki mardosa si Adam, gabe mate ma ibana dohot sude pinopparna. Jala songon i dope na masa sahat tu saonari. Alai ala dipahehe Debata do anakna, boi ma lam denggan ngolutta di ari na naeng ro. “Haheheon ni halak na mate ro do i sian sahalak jolma”, i ma Jesus. Didok si Paulus do, “Songon sude jolma mate alani si Adam, suang songon i ma sude jolma mulak mangolu alani Kristus.”​—1 Kor. 15:21, 22.

14. Paheheonna do si Adam? Patorang ma.

¹⁴ Aha do maksud ni si Paulus tikki didok ibana “sude jolma mate alani si Adam”? Sude jolma na didok si Paulus dison, i ma pinoppar ni si Adam na gabe mardosa alani si Adam. Alani dosa i, gabe mate ma nasida. (Rom 5:12) Jadi tikki didok si Paulus na lao “mulak mangolu” halak na mate, dang termasuk si Adam disi. Tobusan ni Jesus, dang marlakku tu si Adam. Ai sengaja do ibana mangalo Debata tikki sempurna dope ibana. Alani i, na masa tu si Adam sarupa do tu na lao masa tu akka halak na dos songon “hambing”. Na lao diuhumi “Anak ni jolma” i ma nasida “tu hamatean saleleng ni lelengna”.​—Mat. 25:31-33, 46; Heb. 5:9.

15. Aha do maksud ni si Paulus tikki didok ibana, “sude jolma mulak mangolu alani Kristus”?

¹⁵ Aha do maksud ni si Paulus tikki didok ibana, “sude jolma mulak mangolu  alani Kristus”? (1 Kor. 15:22) Surat ni si Paulus on, dibahen tu halak Kristen di Korint na dipillit lao mangolu tu surgo. Na lao dipahehe do nasida tu surgo. Nasida ma akka halak “naung dipabadia asa marsada dohot Kristus Jesus”. Didok si Paulus do muse nasida “halak naung mate na mangihuthon Kristus i”. (1 Kor. 1:2; 15:18; 2 Kor. 5:17) Jala didok si Paulus do muse di suratna na asing, ‘mate do nasida songon [Jesus]’ jala ‘dipahehe songon ibana’. (Rom 6:3-5) Songon Jesus naung dipahehe lao mangolu di surgo, songon i ma na lao masa tu akka halak na “marsada dohot [Kristus]”, i ma sude halak Kristen na dipillit lao tu surgo.

16. Boasa didok si Paulus molo Jesus i “na parjolo dipahehe”?

¹⁶ Didok si Paulus do molo Kristus i “na parjolo dipahehe sian sude halak na mate”. Memang andorang so haheheon ni Jesus, nungnga hea adong dipahehe di tano on, songon si Lasarus. Alai Jesus do na parjolo dipahehe tu surgo jala mandapot hangoluan na saleleng ni lelengna. Jadi molo didokkon si Paulus do Jesus i na parjolo dipahehe, berarti adong dope halak na asing na lao dipahehe tu surgo. Akka apostel dohot akka halak na asing na marsada dohot Kristus ma na lao dipahehe tu surgo.

17. Tikki sadihari do akka na marsada dohot Kristus dipahehe tu surgo?

¹⁷ Tikki disurat si Paulus surat on tu halak Korint, dang mulai dope haheheon lao tu surgo tu akka halak na “marsada dohot [Kristus]”. Didok si Paulus, di ari na naeng ro do masa i. Didok ibana, “Dipahehe do ganup halak mangihuthon urutanna: Kristus ma na parjolo, dung i saleleng ari harorona i, dipahehe ma angka na di ibana.” (1 Kor. 15:23; 1 Tes. 4:15, 16) Saonari do tikki ‘haroro’ ni Kristus. Jadi akka apostel dohot akka halak na naeng mangolu tu surgo, ikkon jolo paimahon sappe haroro ni Kristus, dung i pe asa mandapot upa nasida lao tu surgo. Dipahehe ma nasida songon Jesus jala marsada dohot ibana.

18. (a) Sian dia do taboto adong dope haheheon asing ni tu surgo? (b) Aha do na lao masa di surgo songon na disurat di 1 Korint 15:24-26?

¹⁸ Aha do na lao masa tu akka halak Kristen na setia na so dipahehe tu surgo? Tong do dipahehe nasida. Bibel mandok, si Paulus  dohot akka halak na asing na lao tu surgo “mandapot haheheon na parjolo sian angka na mate”. (Plp. 3:11) Alani i, asing ni haheheon na tu surgo, adong dope haheheon na asing. Haheheon on, sarupa do tu haheheon na dipaima-ima si Job di ari na naeng ro. (Job 14:15) “Saleleng ari harorona i, dipahehe ma angka na di [Kristus]” tu surgo. Dung i, rap ma nasida dohot Jesus manghancurhon sude pamarettaon dohot akka parhuaso. Jala dang na lao adong be hamatean, i ma “musu na parpudi”. Sude na lao dipahehe tu surgo dang na lao mate be. Alai songon dia do na masa tu akka halak na naeng mangolu di tano on?​—Jaha 1 Korint 15:24-26.

19. Aha do harapan ni akka halak na naeng mangolu di tano on?

¹⁹ Aha do harapan ni akka halak na naeng mangolu di tano on? Didok si Paulus, “Mangkirim do ahu . . . na adong do haheheon tu halak na burju dohot halak na jahat.” (Ul. 24:15) Dang adong halak na jahat dipahehe tu surgo, berarti tu akka halak na naeng mangolu di tano on do marlakku hata on.

20. Boasa pos rohamuna na lao masa do haheheon i?

²⁰ Pos ma rohatta “adong do haheheon”! Sude halak na lao dipahehe di tano on, boi do mangolu saleleng ni lelengna. Pos ma rohamuna na lao saut do janjina i. Boi ma gabe tarapul rohatta, ala pasti do hehe halak na tahaholongi naung mate. Masa ma i tikki mamaretta Jesus dohot akka halak na dipillit lao tu surgo “saleleng 1.000 taon”. (Pgk. 20:6) Pos ma rohamuna, molo tung pe mate hamu andorang so mamaretta Jesus di pamarettaonna di 1.000 taon i, paheheonna do hamu. Alani i, “ndang gabe mandele hita dibahen pangkirimon i”. (Rom 5:5) Janji ni Debata i, boi mambahen hamu margogo jala marlas ni roha manomba Jahowa. Alai adong dope parsiajaran na asing sian 1 Korint 15. Taida ma i di parsiajaran na mangihut.