1-2. Aha ma na niarapkon ni ganup juakjuak ni Naibata?

GANUP do halak dong pangarapanni. Dong na sihol ase martuah parhajabuanni, sehat niombahni, atap malum naboritni. Ai do homa na niarapkon ni juakjuak ni Naibata. Tapi dong na sidearan humbani ganupan ai. Sihol tumang do uhurta ase boi manggoluh sadokah ni dokahni. Anjaha sihol do homa uhurta ase ipapuho halak na hinaholonganta.

² Apostel Paulus mangkatahon, “Marpangarapan do ahu bani Naibata, paboa mulak manggoluh parpintor ampa pargeduk.” (Lah. 24:15) Sedo si Paulus na parlobei patugahkon pasal ai. Ongga do homa si Job mangkatahon ai. Porsaya do ia anggo matei ia idingat Naibata do holi ia janah ipapuho.​—Job 14:7-10, 12-15.

3. Aha do gunani anggo iulas hita 1 Korint bindu 15?

³ Porsaya do halak Kristen bani ajaran dasar pasal “parpuhoon ni halak na dob matei”. (Heb. 6:1, 2) Bani 1 Korint bindu 15, iulas si Paulus do pasal ajaran ai. Tontu gabe toguh ma haporsayaon ni halak Kristen ijia dob mambasa surat ni si Paulus. Sonai homa hita, sanggah iulas hita 1 Korint bindu 15 tontu lambin porsaya ma hita saud do holi parpuhoon ai.

4. Mase porsaya hita ipapuho do holi halak na dob matei?

⁴ Parpuhoon ni Jesus mambahen pos uhurta anggo na hinaholonganta, dong do holi parpuhoon. Ai do homa “ambilan na madear” na ipadas si Paulus hubani halak i Korint hinan. (1 Kor. 15:1, 2) Si Paulus mangkatahon anggo lang porsaya halak Kristen bani parpuhoon ni Kristus, soya-soya ma haporsayaon ni sidea. (1 Kor. 15:17) Halani ai ma, tontu porsaya do hita bani parpuhoon ni Kristus.

5-6. Aha do artini na ihatahon bani 1 Korint 15:3, 4?

 ⁵ Sanggah si Paulus manurat pasal parpuhoon, dong tolu hasintongan na iajarhon ia: (1) “Matei do Kristus halani dousanta.” (2) ‘Itanom do ia.’ (3) ‘Ipapuho do ia bani ari na patoluhon, domu bani na tarsurat in.’​—Basa 1 Korint 15:3, 4.

⁶ Aha do artini ai hubanta? Hinan domma ipatugah si Jesaya, “imasabkon do [Mesias] hun tanoh ni halak na manggoluh”, anjaha “rapkon halak parjahat do ibahen tanomanni”. Leganni ai, ihatahon si Jesaya use iporsan Mesias do “dousa ni buei halak”. Saud do ai sanggah ibere Jesus dirini gabe tobusan. (Jes. 53:8, 9, 12; Mat. 20:28; Rom 5:8) Halani ai ma marpangarapan do hita ipaluah do holi hita humbani dousa ampa hamatean. Janah boi ma hita pajumpah use pakon na hinaholonganta na dob matei.

7-8. Mase halak Kristen porsaya anggo Jesus domma ipapuho?

⁷ Ase porsaya hita saud do holi parpuhoon ai, maningon porsaya do hita anggo Jesus domma ipapuho. Aha ma buktini anggo Jahowa domma papuhohon Jesus?

⁸ Bahat do halak na manaksihon anggo Jesus domma ipapuho. Janah isaritahon sidea do homa ai hubani na legan. (1 Kor. 15:5-7) Umpamani, susian ni Jesus mangkatahon anggo si Petrus domma mangidah Jesus na dob ipapuho. (Luk. 24:33, 34) Sanggah ipatugah si Paulus ise do na manaksihon anggo Jesus domma ipapuho, goran ni si Kepas atap si Petrus do na parlobei isobut ia. Dob ai, “na 12” apostelni ai pe mangidah Jesus dob ipapuho. Leganni ai, “ipataridahkon [Jesus] do dirini sahali bani lobih 500 sanina”. Ra do na imaksud si Paulus ai sanggah Jesus manjumpahi ganup susianni i Galilea songon na ipatugah bani Mateus 28:16-20. Nini si Paulus use, ‘ipataridahkon Jesus do dirini bani si Jakobus’ anggini ai. Sanggah ai lape porsaya si Jakobus anggo Jesus ai Mesias. (Joh. 7:5) Tapi dob ipataridah Jesus dirini, gabe porsaya ma ia. Bahat do saksi na ipatugah si Paulus nongkan ai manggoluh ope sanggah ia manuratkon suratni bani tahun 55 M. Halani ai porini dong ope na bungbang anggo Jesus domma ipapuho, boi ma isungkun sidea bani na manaksihon ai.

9. Bukti aha ma na ipatugah bani Lahoan 9:3-5 na patuduhkon anggo Jesus domma ipapuho?

⁹ Dob ai, ipataridah Jesus do dirini hubani si Paulus. (1 Kor. 15:8) Sanggah ai, si Saul ope goranni. Sanggah ia ibagas pardalanan hu Damaskus, marsinalsal ma sondang i langit janah itangar ma sora ni Jesus na dob ipapuho. (Basa Lahoan 9:3-5.) Humbani pangalaman ni si Paulus ai, tangkas ma tongon do Jesus domma ipapuho. Jadi lang turi-turian ai.​—Lah. 26:12-15.

10. Aha ma na ibahen si Paulus dob porsaya ia anggo Jesus domma ipapuho?

¹⁰ Tontu bahat ma na marosuh manangar hasaksian ni si Paulus ai, halani hinan iparburu ia do halak Kristen. Dob porsaya si Paulus anggo Jesus domma ipapuho, marusaha ma ia patugahkon ai hubani na legan ase porsaya homa sidea anggo Jesus domma ipapuho. Sanggah si Paulus mambaritahon hasintongan pasal parpuhoon ni Jesus, bahat do sitarononni. Umpamani, ibogbogi do ia, ipenjarahon, janah harom do kapalni. (1 Kor. 15:9-11; 2 Kor. 11:23-27) Lang mabiar ia matei halani mambaritahon hasintongan pasal parpuhoon ni Jesus. Tangkas  ma, porsaya tumang do ia anggo Jesus domma ipapuho. Ai lang sonai do homa pangahapta dob mambasa surat ni si Paulus on? Tontu porsaya do homa hita anggo Jesus domma ipapuho janah saud do holi parpuhoon ai bani ari simagira.

11. Aha do ra na mambahen piga-piga halak i Korint lang mangarusi ajaran pasal parpuhoon?

¹¹ Dong piga-piga sanina botou i Korint i Junani na lang mangarusi ajaran pasal parpuhoon. Dong homa na mangkatahon ‘lang adong parpuhoon humbani na matei’. Mase sonai pingkiran ni sidea? (1 Kor. 15:12) Halani itartawai parpilsapat i Aten do halak na porsaya bani parpuhoon ni Jesus. Ra do ai na mambahen ase sonai pingkiran ni halak i Korint. (Lah. 17:18, 31, 32) Ra do adong na mangahap songon limbaga dassa parpuhoon ai. Nini sidea “hamatean” mangartihon halak na mardousa. Janah “parpuhoon” mangartihon halak na domma isalpuhon dousani. Atap aha pe alasan ni sidea, anggo lang porsaya sidea bani parpuhoon, soya-soya ma haporsayaon ni sidea. Anggo lang tongon ipapuho Naibata Jesus, tontu lang dong tobusan laho manggalar dousanta. Jadi, totap ma hita ibagas dousa. Halani ai, soya-soya ma hagoluhan ni halak na lang porsaya bani parpuhoon.​—1 Kor. 15:13-19; Heb. 9:12, 14.

12. Domu bani 1 Petrus 3:18, 22, mase dearan parpuhoon ni Jesus marimbangkon parpuhoon na legan?

¹² Si Paulus mambotoh “domma puho Kristus humbani na matei”. Sasintongni dearan do parpuhoon ni Jesus humbani parpuhoon na ongga masa. Mase? Halani sidea na puho ai matei do ujungni, tapi anggo Jesus lang. Si Paulus mangkatahon “ia do parlobei ni sagala na dob modom in”. Aha do artini ai? Ia do na parlobei ipapuho ibagas partonduyon. Janah ia do homa na parlobei naik hu surga.​—1 Kor. 15:20; Lah. 26:23; basa 1 Petrus 3:18, 22.

13. Domu bani na ipatugah si Paulus aha ma bedani na ibahen Jesus pakon si Adam?

¹³ Tapi sonaha boi hamatean ni sada jolma parohkon hagoluhan hubani marjuta halak? Ibalosi si Paulus do sungkun-sungkun ai. Ipatorang ia ma sonaha do ujungni halani mardousa si Adam, anjaha aha ma hasilni halani matei Jesus. Ia mangkatahon, “Marhitei sada jolma [ai ma si Adam] roh hamatean.” Halani mardousa si Adam, gabe dihut ma ginomparni manaron hamatean. Halani ai ma gabe marsik hagoluhanta ronsi sonari. Tapi, halani ipapuho Naibata Jesus, gabe marpangarapan ma hita. “Marhitei sada jolma [ai ma Jesus] adong parpuhoon humbani na matei.” Ipatorang si Paulus use, “Songon ibagas si Adam haganup matei, sonai do ibagas Kristus haganup ipagoluh.”​—1 Kor. 15:21, 22.

14. Ai ipagoluh do holi si Adam? Patorang.

¹⁴ Aha do maksudni sanggah si Paulus mangkatahon “ibagas si Adam haganup matei”? Ginompar ni si Adam do na imaksud si Paulus ijon. Halani manean dousa humbani si Adam, gabe lang sempurna sidea, janah ujungni matei. (Rom 5:12) Tapi sanggah ihatahon si Paulus “ibagas Kristus haganup ipagoluh”, lang dihut si Adam ijai. Mase? Halani jolma na sempurna do ia. Tapi ipilih do manlawan Naibata. Jadi, lang mandapot guna si Adam humbani tobusan ni Jesus. Aha na masa hubani si Adam dos do holi pakon aha na laho masa hubani ganup halak na isobut  “biribiri tunggal” atap hambing, sanggah roh “Anak ni jolma” manguhumi sidea. “Misir ma sidea hu [hamatean] sadokah ni dokahni.”​—Mat. 25:31-33, 46; Heb. 5:9.

15. Ise do na tarmasuk “haganup” halak na laho “ipagoluh”?

¹⁵ Sanggah si Paulus manulis suratni hu kuria Korint, hubani halak na iminaki do ai. Marpangarapan laho manggoluh hu surga do sidea. Ihatahon do anggo sidea ‘domma ipapansing ibagas Kristus Jesus’. (1 Kor. 1:2; 2 Kor. 5:17) Tapi si Paulus mangkatahon ‘ipagoluh do sidea haganup ibagas Kristus’. (1 Kor. 15:22) Mase? Halani sanggah “matei pe ibagas Kristus” do homa sidea. (1 Kor. 15:18) Bani suratni na legan si Paulus mangkatahon halani ‘songon parmatei ni Kristus’ do homa parmatei ni sidea, gabe ‘sada ma holi sidea pakonsi sanggah ipapuho’. (Rom 6:3-5) Ibagas tonduy do Jesus ipapuho janah naik do ia hu surga. Jadi, ai do homa na masa hubani ganup halak Kristen na iminaki.

16. Aha do maksudni si Paulus sanggah ia mangkatahon Jesus do na “parlobei”?

¹⁶ Si Paulus mangkatahon Kristus do na ‘parlobei puho humbani sagala na dob modom’. Sasintongni, paima ai domma dong halak na ipapuho, umpamani si Lasarus. Tapi sanggah ipapuho, manggoluh i tanoh on do ia. Legan do anggo Jesus, ia do na parlobei ipapuho ibagas tonduy janah mandapot hagoluhan sadokah ni dokahni. Sanggah ihatahon si Paulus Jesus do na “parlobei” ipapuho, on patuduhkon dong ope halak na laho ipapuho hu surga. Jadi haganup apostel ampa haganup halak na marsada pakon Kristus ipapuho do holi songon Jesus, ase boi sidea manggoluh i surga.

17. Attigan do sidea na “ibagas Kristus” ai ipapuho hu surga?

¹⁷ Sanggah si Paulus manuratkon ai, lape masa parpuhoon na hu surga ai. Bani ari simagira do masa ai. Songon na ihatahon si Paulus “ganup ma mangihutkon parjojorni; parlobei Kristus, dob ai na bani Kristus bani parrohni ai”. (1 Kor. 15:23; 1 Tes. 4:15, 16) Jadi ganup apostel ampa halak Kristen na iminaki mandapot hagoluhan hu surga sadokah panorang “parrohni” Kristus. Songon na ibotoh hita sonari ma panorang parrohni Kristus ai.

18. (a) Domu bani 1 Korint 15:24-26, aha ma na laho masa i surga? (b) Hunja ibotoh hita dong ope parpuhoon na legan sobali parpuhoon hu surga?

¹⁸ Bibel mangkatahon “bani parrohni”  Kristus, ganup halak na iminaki domma ipapuho hu surga sanggah ia manripaskon ganup pamarentahan i dunia on. Gari “munsuh na parpudi”, ai ma hamatean, lang adong be. (Basa 1 Korint 15:24-26.) Jadi ganup na ipapuho hu surga ai lang be matei. Tapi, aha ma na laho masa hubani halak Kristen na setia na lang marpangarapan manggoluh hu surga? Dong do homa parpuhoon bani sidea. Hunja ibotoh hita ai? Ihatahon do bani Bibel anggo si Paulus pakon halak na legan na laho hu surga mandapot “parpuhoon na parlobei”. (Pangk. 20:6) On patuduhkon dong ope parpuhoon na legan. Janah parpuhoon ai ma na iarapkon si Job bani ari simagira.​—Job 14:15.

19. Pangarapan aha do na dong bani halak i tanoh on?

¹⁹ Pangarapan aha do na dong bani halak na i tanoh on? Songon na ihatahon si Paulus, “Marpangarapan do ahu . . . mulak manggoluh parpintor ampa pargeduk.” (Lah. 24:15) Tontu lang mungkin halak pargeduk boi masuk hu surga. Hunjon tangkas ma dong do holi parpuhoon i tanoh on bani ari simagira.

20. Mase porsaya ham saud do holi parpuhoon ai?

²⁰ Tangkas ma “mulak manggoluh” do holi halak na matei. Sidea na ipapuho laho manggoluh i tanoh on, boi mandapot hagoluhan sadokah ni dokahni. Porsaya ma ham saud do holi pangarapan ai. Tontu gabe tarapoh ma uhurta anggo idingat hita use halak na hinaholonganta na dob matei. Ipapuho ma holi sidea sanggah Jesus Kristus pakon na leganni ‘mamarentah sadokah 1.000 tahun’. (Pangk. 20:6) Porini matei pe hita paima roh Pamarentahan Saribu Tahun ai, tontu ipapuho do homa hita. ‘Seng parohkon habadoron pangarapanta ai.’ (Rom 5:5) Anggo irimangi hita ai, gabe toguh ma uhurta janah lambin tambah ma malas ni uhurta ibagas pangidangion. Tapi sobali ai, dong ope na boi iparlajari hita humbani 1 Korint bindu 15. Bani artikel na mangihut iulas ma hita ai.