1-2. Kai arapen si luar biasa si itimai kalak Kristen?

SEH KEL pentingna arapen. Kai biasana si iarapken kalak? Lit si erpengarapen gelah berhasil perjabunna, gelah sehat anak-anakna, ntah pe gelah malem pinakitna. Kita selaku kalak Kristen pe bage ka nge arapenta. Tapi lit arapen si deban si lebihen asangken si e si sangana sitimai. Kai e? Banci kita nggeluh si rasa lalap janah kalak si keleng ateta si enggo mate pe banci ipekeke mulihi.

² Nina Rasul Paulus, “Pengarapenku man Dibata . . . maka lit kekeken i bas si mate nari, eme kekeken kalak si benar, bage pe kalak si la benar.” (Perb. 24:15) Labo Paulus si tangtangna nuriken arapen kekeken. Jop pe pernah iturikenna kerna arapen e. Tek Jop maka inget Dibata nge ia janah pasti ipekeke Dibata ia pagi.​—Jop 14:7-10, 12-15.

3. Engkai maka 1 Korinti pasal 15 erguna man banta?

³ Arapen “kekeken” eme salah sada “ajaren dasar” si iteki kalak Kristen. (Heb. 6:1, 2) Bas 1 Korinti pasal 15, pernah ijelasken Paulus kerna kekeken. Kai si itulisna e pasti mpegegehi kalak Kristen bas abad pertama. Kita pe terpegegehi ka la soal asa dekahna kita enggo tek man arapen e.

4. Engkai kita banci tek adi kalak si keleng ateta si enggo mate banci ipekeke?

⁴ Kekeken Jesus Kristus erban kita tek maka kalak si keleng ateta si enggo mate banci ipekeke. Kekeken Jesus eme bagin arah “berita si meriah” si ipeseh Paulus man kalak Kristen i Korinti. (1 Kor. 15:1, 2) Ikataken Paulus ka adi kalak Kristen la tek man kekeken Jesus, sia-sia me kinitekenna. (1 Kor. 15:17) Jelas me, si jadi dasar kinitekenta man kekeken eme kekeken Jesus.

5-6. Engkai maka penting kel telu kebenaren si lit bas 1 Korinti 15:3, 4 man banta?

⁵ Sanga tangtangna ijelasken Paulus kerna kekeken, lit telu kebenaren si iturikenna: (1) “Kristus nggo mate guna  dosa-dosata.” (2) Ia “nggo ikuburken.” (3) Ia “ipekeke i bas wari si peteluken, bali bagi si itulisken i bas Kitap si Badia.”​—Baca 1 Korinti 15:3, 4.

⁶ Kai ertina kematen, penguburen, ras kekeken Jesus man banta? Inubuatken Nabi Jesaya kerna Mesias, nina, “Ikernepken ia arah negri kalak si nggeluh” janah “kuburenna lit i tengah-tengah kalak jahat.” Tapi labo e saja. Inubuatken Jesaya ka maka ibaba Mesias pagi “dosa enterem jelma.” Ilakoken Jesus e alu mereken geluhna guna jadi tebusen. (Jes. 53:8, 9, 12, Terjemahan Dunia Baru; Mat. 20:28; Rom. 5:8) Emaka, perban Jesus enggo mate, ikuburken, ras ipekeke, lit arapenta ibebasken arah dosa ras kematen janah jumpa ras kalak si keleng ateta si enggo mate.

7-8. Kai si erbanca kalak Kristen tek maka Jesus enggo ipekeke?

⁷ Arapenta kerna kekeken lit hubungenna ras kekeken Jesus. Emaka, arus kita tek adi Jesus e enggo ipekeke. Engkai kita banci tek adi Jesus enggo ipekeke Jahwe?

⁸ Lit piga-piga kalak si ngidah Jesus ipekeke janah iceritaken kalak e man kalak si deban. (1 Kor. 15:5-7) Misalna, ikataken Paulus maka Rasul Petrus (Kepas) jumpa ras Jesus kenca Jesus ipekeke. Piga-piga murid Jesus si debanna pe ngataken kerna si e. (Luk. 24:33, 34) Selain si e, rasul-rasul pe jumpa ras Jesus kenca ia ipekeke. Kenca si e, “icidahkenna dirina man lebih 500 pengikutna si sangana radu pulung i bas sada ingan.” Banci saja enda kejadin bas Galilea si icatat bas Matius 28:16-20. ‘Icidahken Jesus ka dirina man Jakup.’ Banci saja Jakup si imaksud i jenda eme agi tiri Jesus, si sebelumna la tek adi Jesus e Mesias. (Joh. 7:5) Perjumpan e me si erbanca maka ia erkiniteken. Sanga itulis Paulus suratna man kalak i Korinti kira-kira bas tahun 55 Masehi, enterem kalak si pernah ngidah Jesus ipekeke nggeluh denga. Emaka, adi lit kalak si sangsi denga kerna si e, banci langsung isungkunna man kalak e.

9. Menurut Perbahanen Rasul-Rasul 9:3-5, kai si terjadi man Paulus si jadi bukti maka Jesus tuhu-tuhu enggo ipekeke?

⁹ Bas pudi wari icidahken Jesus dirina man Paulus si sangana bas perdalanen muat ku Damaskus. (1 Kor. 15:8) Paulus si paksa si e igelari Saul, megi sora Jesus si enggo ipekeke janah idahna ka kemulian Jesus i surga. (Baca Perbahanen Rasul-Rasul 9:3-5.) Pengalamen Paulus e pe jadi bukti maka Jesus enggo tuhu-tuhu ipekeke.​—Perb. 26:12-15.

10. Kai si ilakoken Paulus perban tek kel ia maka Jesus tuhu-tuhu enggo ipekeke?

¹⁰ Tertarik kalak man kai si ikataken Paulus perban sebelumna pernah isiksana kalak Kristen. Tapi, kenca tek ia maka Jesus enggo ipekeke, iusahakenna asa ngasupna gelah kalak si deban pe tek man kebenaren e. Aminna pe ia ipekpeki, ipenjaraken, ras ngadapi karam kapal, terus iberitakenna kebenaren maka Jesus enggo mate janah ipekeke. (1 Kor. 15:9-11; 2 Kor. 11:23-27) Perban tek kel Paulus maka Jesus enggo tuhu-tuhu ipekeke, nggit ia mate guna mberitaken kerna si e. Kerina bukti arah kalak Kristen si pertama enda, pasti erban kita tek maka Jesus memang enggo tuhu-tuhu ipekeke. Janah enda pe erban kita tek maka bas wari si pepagi kekeken pasti terjadi.  

11. Kai si banci saja erban salah pendapat piga-piga kalak i Korinti kerna kekeken?

¹¹ Salah pendapat piga-piga kalak bas kota Korinti kerna kekeken. Lit ka si ngataken maka “la lit kekeken man kalak mate.” Engkai? (1 Kor. 15:12) Kalak si meganjang sekolahna bas kota Aten la tek maka Jesus enggo ipekeke, itokoh-tokohi kalak e ajaren e. Cara rukur si bage banci saja mpengaruhi cara rukur piga-piga kalak i Korinti, termasuk kalak Kristen. (Perb. 17:18, 31, 32) Selain si e, banci saja lit si erpengakap maka kerina kalak si erdosa e tempa-tempa “mate,” tapi sanga ia jadi kalak Kristen tempa-tempa ia “ipegeluh mulihi” perban dosa-dosana enggo iampuni. Kai pe alasenna, adi ikataken kalak Kristen la lit kekeken, e ertina la kalak e tek maka Jesus enggo ipekeke. Sia-sia me kiniteken kalak e. Adi Jesus la ipekeke Dibata, tebusen la pernah igalari janah dosata pe la banci iampuni. Emaka kalak si la tek man kekeken, situhuna la lit arapenna si pasti.​—1 Kor. 15:13-19; Heb. 9:12, 14.

12. Menurut 1 Petrus 3:18, 22, engkai kekeken Jesus beda ras kekeken kalak si sebelumna?

¹² Pengalamen Paulus erban ia tek maka “Kristus nggo ipekeke i bas si mate nari.” Kekeken Kristus e ndauh ulin asangken kekeken kalak si enggo ipekeke sebelumna, perban kalak e banci denga mate. Ikataken Paulus maka Jesus “jadi si pertama ipekeke arah kalak si nggo medem i bas kematen.” Kai maksudna Jesus si pertama? Ia me si pertama si ipekeke jadi mahluk roh janah ia me manusia si pertama si nangkih ku surga.​—1 Kor. 15:20; Perb. 26:23; baca 1 Petrus 3:18, 22.

13. Kai si ikataken Paulus kerna Adam ras Jesus?

¹³ Engkai maka kematen sada kalak banci erban jutan kalak ndatken kegeluhen? Ibereken Paulus jawapen si jelas. Ibandingkenna akibat si enggo sigejapken perban dosa Adam ras manpaat si banci sidatken perban pengorbanen Kristus. Kerna Adam, itulis Paulus, “Kematen reh arah sekalak jelma.” Perban Adam enggo erdosa, mate me Adam janah kerina keturunenna pe mate. Seh asa gundari, sigejapken denga akibat arah dosa Adam e. Tapi perban Jesus enggo mate janah ipekeke Dibata, lit arapenta si luar biasa bas wari si pepagi. Jelas me, “kekeken man kalak si mate reh arah sekalak jelma” eme Jesus. Tapi, “kerina manusia mate erkiteken Adam.” Ijelasken Paulus ka maka “kerina manusia ipegeluh mulihi erkiteken Kristus.”​—1 Kor. 15:21, 22.

14. Ipekeke nge pagi Adam? Jelasken.

¹⁴ Kai maksudna sanga ikataken Paulus “kerina manusia mate erkiteken Adam”? Maksudna kerina keturunen Adam erdosa janah la sempurna, emaka dungna mate. (Rom. 5:12) Adam la termasuk i bas kalak si “ipegeluh mulihi.” Tebusen Kristus la berlaku man Adam perban ia manusia si sempurna si sengaja la patuh man Dibata. Ukumen si ibereken man Adam eme “mate si rasa lalap,” bali bagi ukumen si ibereken man kalak si ihakimi “Anak manusia” selaku “kambing” bas wari si pepagi.​—Mat. 25:31-33, 46; Heb. 5:9.

15. Ise si termasuk “kerina” kalak si ‘nggeluh pagi mulihi’?

¹⁵ Perdiateken maka ikataken Paulus “kerina manusia ipegeluh mulihi  erkiteken Kristus.” (1 Kor. 15:22) Surat Paulus itulis man kalak Kristen i Korinti si erpengarapen guna nggeluh i surga. Kalak e “nggo ipebadiaken guna ersada ras Kristus Jesus, janah ilebuh jadi kalak si badia.” Ikataken Paulus ka kalak e eme “kalak si nggo medem i bas kematen selaku kalak si ersada ras Kristus.” (1 Kor. 1:2; 15:18; 2 Kor. 5:17) Bas suratna si deban, itulis Paulus maka kalak e enggo mate bali bagi Jesus. Emaka kalak e pe ‘ipekeke bali bagi Jesus janah alu cara-cara si bage me kalak e ersada ras Kristus.’ (Rom. 6:3-5) Jesus ipekeke jadi mahluk roh janah nangkih ku surga. Bage ka me si terjadi man kerina kalak si ‘ipersada ras Kristus’ eme kerina kalak si nggeluh pagi i surga.

16. Engkai ikataken Paulus Jesus “si pertama ipekeke”?

¹⁶ Itulis Paulus maka Kristus “si pertama ipekeke arah kalak si nggo medem i bas kematen.” Situhuna, enggo lit kalak si pernah ipekeke, misalna Lasarus. Tapi kenca ipekeke, kalak e tetap nggeluh bas doni. Jesus eme kalak si pertama si ipekeke jadi mahluk roh janah nggeluh si rasa lalap i surga. Selain si e, alu ngataken Jesus “si pertama ipekeke,” icidahken Paulus maka lit kalak si deban si ipekeke guna nggeluh i surga. Rasul-rasul ras kerina kalak si “ersada ras Kristus,” ipekeke pagi guna nggeluh i surga, bali bagi Jesus.

17. Ndigan kalak si “ersada ras Kristus” ngaloken kegeluhen i surga?

¹⁷ Sanga itulis Paulus suratna man kalak Kristen i Korinti, kalak si “ersada ras Kristus” lenga ipekeke ku surga. Ijelasken Paulus ndigan e terjadi. Nina, “Tiap kalak ipekeke menurut gilirenna: Si pertama eme Kristus, kenca si e ipekeke me kalak si jadi jang Kristus i bas paksa kerehenna.” (1 Kor. 15:23; 1 Tes. 4:15, 16) Gundari, kita nggeluh bas masa ‘kerehen’ Kristus. Rasul-rasul ras kalak Kristen si debanna si erpengarapen ku surga la mis ipekeke sope lenga masa kerehen Kristus. Arus kalak e nimai seh asa masa kerehen e guna ndatken kegeluhen i surga janah ‘ipersada ras Jesus sanga ipekeke bali bagi ia.’

18. (a) Engkai maka banci sikataken lit kekeken si deban selain ku surga? (b) Menurut 1 Korinti 15:24-26, kai pagi si terjadi bas surga?

¹⁸ Uga kerna kalak Kristen si setia si  arapenna la nggeluh i surga ras Kristus? Kalak e pe lit nge arapenna guna ipekeke. Ikataken Pustaka maka Paulus ras kalak si erpengarapen nggeluh ku surga “ipekeke i bas kekeken si pertama i bas si mate nari.” (Pil. 3:11) Enda ncidahken maka lit kekeken si deban selain kekeken kalak e. Kekeken enda me si iarapken Jop. (Jop 14:15) “Kalak si jadi jang Kristus” ras Jesus pagi i surga sanga ikernepken Jesus kerina pemerentahen ras kuasa. Janah ‘musuh si terakhir eme kematen’ pe ikernepken. Kerina kalak si ipekeke ku surga lanai pagi pernah mate. Tapi uga kerna kalak si arapenna labo ku surga?​—Baca 1 Korinti 15:24-26.

19. Kai si banci iarapken kalak si nggeluh pagi i doni?

¹⁹ Kai si banci iarapken kalak si nggeluh pagi i doni? Perdiateken kata-kata Paulus enda, nina, “Pengarapenku . . . maka lit kekeken i bas si mate nari, eme kekeken kalak si benar, bage pe kalak si la benar.” (Perb. 24:15) Kalak si la benar la banci masuk ku surga. Emaka, kekeken si imaksud Paulus i jenda eme kekeken si terjadi pagi i doni.

20. Kai si erbanca maka reh paguhna arapenndu kerna kekeken?

²⁰ Kekeken pasti terjadi! Kalak si ipekeke pagi bas doni banci nggeluh si rasa lalap. Banci kam tek man janji enda. Arapen e banci ngapuli kam sanga tedeh atendu kalak si ikelengindu si enggo mate. Kalak e ipekeke sanga Jesus ras kalak si nggeluh bas surga ‘merentah jadi raja sedekah 1.000 tahun.’ (Ket. 20:6) Kam pe banci tek maka kam pe pasti ipekeke bicara mate kam ope pemerentahen 1.000 tahun e imulai. ‘Arapen e labo erban kam kecewa.’ (Rom. 5:5) Arapen e banci erban kam tetap megegeh janah terus ermeriah ukur i bas ngelayani Jahwe. Tapi lit denga si banci sipelajari arah 1 Korinti pasal 15. E ibahas kari bas artikel seterusna.