1-2. Wat da wahn wandaful hoap weh Jehoava peepl gat?

IH VERI impoatant dat aala wi ga sohnting fi hoap fa. Som peepl foakos pahn di hoap fi ga wahn hapi marij, fi rayz helti pikni, er fi get oava wahn seeryos siknis. Ahn wee az Kristyanz hoap fi dehndeh sayhn tingz. Bot fi wee bigis hoap da fi liv fareva ahn dat wi famili ahn frenz weh ded wahn geh rayz op bak tu laif.

² Di apasl Paal mi seh: “Ai ga di saym hoap . . . dat Gaad wahn rayz op bak fahn di ded di peepl weh mi raichos ahn di peepl weh neva raichos.” (Aks 24:15) Paal da neva di fers persn fi taak bowt wahn rezorekshan hoap. Joab mi aalso taak bowt it. Ahn hihn mi noa fi shoar dat Jehoava neva mi wahn ferget bowt ahn, an dat ih mi wahn bring ahn bak tu laif.—Job 14:7-10, 12-15.

3. Wai 1 Korintyanz chapta 15 ku help wi?

³ Di teechin a “di rezorekshan a di ded” da wan a di “baysik teechinz” weh aal chroo Kristyanz bileev. (Heeb. 6:1, 2) Paal diskoshan bowt di rezorekshan deh eena 1 Korintyanz chapta 15. Di tingz weh hihn mi rait mosi mi reeli inkorij di Kristyanz weh mi liv rong fi hihn taim. Noh mata how lang agoa wi mi staat tu bileev eena di rezorekshan hoap, 1 Korintyanz chapta 15 wahn bil wi op ahn help wi fi bee kanfident dat ih wahn hapm.

4. Wai wi ku bee kanfident dat wi famili ahn frenz weh ded wahn kohn bak tu laif?

⁴ Jeezas Krais rezorekshan help wi fi bee kanfident dat if wi famili er frenz ded, dehn ga di hoap fi geh rayz op bak tu laif. Ahn Jeezas Krais rezorekshan da paat a di “gud nyooz” weh Paal mi preech tu di Korintyanz. (1 Kor. 15:1, 2) In fak, Paal mi seh dat if wahn Kristyan neva bileev eena Jeezas Krais rezorekshan, den ih  fayt wuda bee gud fi notn. (1 Kor. 15:17) Soh Jeezas Krais rezorekshan da di reezn wai wee ku bileev dat wi ga wahn rezorekshan hoap.

5-6. Weh hoap 1 Korintyanz 15:3, 4 gi wi?

⁵ Wen Paal mi jos staat tu rait bowt di rezorekshan, ih mi menshan chree tingz weh mi hapm fi chroo: (1) “Krais mi ded fi fi wee sin dehn.” (2) “Dehn mi beri ahn.” (3) “Ih geh rayz op bak pahn di terd day, jos laik weh di Skripchaz seh.”—Reed 1 Korintyanz 15:3, 4.

⁶ Weh hoap wi ga now sins Jeezas mi ded, geh beri, ahn geh rayz op bak fahn di ded? Di prafit Aizaiya mi prafesai dat di Mesaiya mi wahn “geh kot aaf fahn di ert wehpaat peepl di liv” an ih mi wahn “geh wahn grayv lang wid wikid peepl.” Bot sohnting els mi wahn hapm doh. Aizaiya mi aalso seh dat di Mesaiya mi wahn tek weh “di sin a wahn lata peepl.” Ahn Jeezas mi du dat wen ih giv op fi hihn laif az wahn ransom sakrifais. (Isa. 53:8, 9, 12; Mach. 20:28; Roam. 5:8) Soh sins Jeezas mi ded, geh beri, ahn geh rayz op bak fahn di ded, wi ga gud reezn fi bileev dat wi ga di hoap fi bee free fahn sin ahn det ahn dat wi ku get bak tugeda wid wi famili ahn frenz weh ded.

7-8. How Kristyanz noa fi shoar dat Jeezas mi geh rayz op bak fahn di ded?

⁷ Fi bileev dat di rezorekshan wahn hapm, wi haftu bileev eena Jeezas Krais rezorekshan. Bot how wi ku noa fi shoar dat Jehoava mi bring Jeezas bak tu laif?

⁸ Wahn lata peepl mi si Jeezas afta ih geh rayz op bak fahn di ded, ahn den dehn tel ada peepl bowt it. (1 Kor. 15:5-7) Di fers persn pahn Paal lis a peepl weh mi si Jeezas afta ih geh rayz op bak fahn di ded da-mi di apasl Peeta (Seefas). Ahn wahn groop a disaipl mi aalso seh dat Peeta mi si Jeezas afta ih geh rayz op bak fahn di ded. (Look 24:33, 34) Pahn tap a dat, di apasl dehn mi aalso si Jeezas afta ih mi geh rayz op bak fahn di ded. Ahn den Krais “mi apyaa tu moa dan 500 bradaz ahn sistaz saym taim,” maybi joorin di hapi ivent da Gyalilee weh Machyu 28:16-20 taak bowt. Jeezas mi aalso “apyaa tu Jaymz.” Ahn di Jaymz weh hihn mi apyaa tu da praabli Jeezas haaf-breda hoo neva bileev dat Jeezas da-mi di Mesaiya. (Jan 7:5) Bot wen Jaymz mi si Jeezas afta ih kohn bak tu laif, hihn mi noa fi shoar dat Jeezas da di Mesaiya. An ih inchrestin dat rong 55 C.E. wen Paal mi rait 1 Korintyanz, di peepl weh mi si Jeezas afta ih mi geh rayz op bak fahn di ded mi stil alaiv. Soh enibadi weh mi-di kweschan weda er nat Jeezas mi reeli geh rayz op bak fahn di ded kuda mi chek wid dehndeh peepl fi geh reel proof dat ih mi hapm fi chroo.

9. Wen wi reed Aks 9:3-5, weh shoa wi dat Paal mi ga moa proof dat Jeezas mi geh rayz op bak fahn di ded?

⁹ Laytaraan, Jeezas mi apyaa tu Paal. (1 Kor. 15:8) Wen Paal (Saal) mi deh pan ih way tu Damaskos, ih hyaa Jeezas vais afta ih mi don geh rayz op bak fahn di ded, ahn Paal si wahn vizhan a hihn da hevn. (Reed Aks 9:3-5.) Weh mi hapm tu Paal da-mi moa proof dat Jeezas mi reeli geh rayz op bak fahn di ded, ahn dat da neva wahn stoari weh enibadi mek op.—Aks 26:12-15.

10. Weh Paal mi du sins hihn mi noa fi shoar dat Jeezas mi geh rayz op bak fahn di ded?

¹⁰ Sohn peepl mi wahn inchrestid eena weh Paal mi ga fi seh bikaaz bifoa Jeezas mi apyaa tu hihn, Paal yoostu persikyoot di Kristyanz. Afta Paal mi reeli bileev dat Jeezas geh rayz op bak fahn di ded, hihn mi werk haad fi kanvins adaz bowt dat tu. Ahn wail Paal mi-di du dis, ih gaahn chroo lata ting. Dehn mi beet ahn, put ahn da prizn, an ih mi eevn gaahn chroo shiprek. Bot Paal neva giv op! (1 Kor. 15:9-11; 2 Kor. 11:23-27) Paal mi soh shoar dat Jeezas mi geh rayz op bak fahn di ded dat ih kantinyu fi preech bowt weh ih bileev eevn doa ih kuda mi looz ih laif. Di  proof weh wi get fahn di fers-senchri Kristyanz weh mi noa dat Jeezas mi geh rayz op bak fahn di ded help wee fi bileev it tu, noh chroo? Ahn da proof schrentn wi bileef dat di rezorekshan wahn hapm eena di fyoocha.

11. Wat kuda mi bee di reezn wai som a di Korintyanz mi ga faals bileef bowt di rezorekshan?

¹¹ Som a di peepl weh mi-di liv da di Greek siti a Korint mi ga sohn rang bileef bowt di rezorekshan. Dehn mi eevn seh dat “di ded noh wahn geh rayz op bak.” Wai? (1 Kor. 15:12) Wel da Atenz, wahn nada Greek siti, di peepl weh teech hyooman aidyaaz mi laaf aata di aidyaa dat Jeezas mi geh rayz op bak fahn di ded. Ahn soh dats wai som a di peepl da Korint mi feel di saym way bowt di rezorekshan. (Aks 17:18, 31, 32) Ada peepl mi tink dat da mi jos wahn ekspreshan. Dehn mi tink dat wans peepl da-mi sinaz, da mi laik dehn “ded,” bot wans dehn mi en op fi bee Kristyanz, dehn mi “kohn bak tu laif” bikaaz Gaad fergiv dehn sinz. Bot ih reeli noh mata wai dehnya peepl neva bileev eena di rezorekshan, ih bail dong tu dis: dehn neva bileev eena di rezorekshan, soh dehn fayt neva gud fi notn. Bikaaz if Gaad neva rezorek Jeezas, den dat meenz dat Jeezas neva pay fi wi sin dehn an evribadi mi wahn kantinyu fi bee sinaz. Soh enibadi weh neva bileev eena di rezorekshan neva ga wahn reel hoap.—1 Kor. 15:13-19; Heeb. 9:12, 14.

12. How 1 Peeta 3:18, 22 help wi fi si dat Jeezas rezorekshan difrent fahn di ada rezorekshan dehn weh mi tek plays bifoa fi hihn wan?

¹² Paal mi noa dat “Krais mi did geh rayz op bak fahn di ded.” Ahn da rezorekshan mi beta dan evri ada rezorekshan weh mi tek plays bifoa da wan. Wai? Bikaaz di peepl weh mi geh rayz op bak fahn di ded mi ded agen laytaraan. Paal mi seh dat Jeezas da “di fers wan [Lit., “fersfroot,” ftn.] weh geh rezorek fahn monks aala di peepl weh don ded.” Eena weh way Jeezas da-mi di fers wan? Hihn da-mi di fers persn fi geh rayz op bak fahn di ded az wahn spirit, ahn di fers wan fi geh rayz op bak tu laif ahn goh da hevn.—1 Kor. 15:20; Aks 26:23; reed 1 Peeta 3:18, 22.

13. Akaadn tu Paal, wat da di difrens bitween Adam ahn Jeezas?

¹³ How ih pasabl dat Jeezas det ku sayv milyanz a peepl? Paal gi wi wahn klyaa ansa tu da kweschan. Hihn mi eksplayn weh hapm tu hyoomanz sayka weh Adam mi du ahn di hoap weh wi gat sayka weh Krais mi giv op ih laif fi wi. Paal mi rait dis bowt Adam: “Det kohn chroo wan man.” Soh wen Adam mi sin, ih mi en op di ded. Ahn sayka dat, hihn paas aan sin ahn det tu aala wi. Ahn tudeh, wee stil di sofa bikaaz hihn neva obeedyant tu Jehoava. Bot bikaaz Jehoava mi rezorek ih Son, Jeezas, wee ku ga wahn brait fyoocha. Di Baibl seh: “Rezorekshan a di ded kohn chroo wan man,” ahn da man da Jeezas. Soh dat da wai Paal mi seh: “Jos laik how evribadi di ded sayka Adam, saym way soh, evribadi wahn liv sayka Krais.”—1 Kor. 15:21, 22.

14. Wai Adam noh wahn geh rayz op bak fahn di ded?

¹⁴ Weh Paal mi meen wen ih seh dat “evribadi di ded sayka Adam”? Paal mi-di rifaa tu aala Adam chiljren bikaaz Adam mi paas aan sin tu aala wi, ahn now aala wi sin ahn kyaahn liv fareva. (Roam. 5:12) Wen Paal mi seh “evribadi wahn liv” dat neva inklood Adam. Adam noh wahn benifit fahn Krais ransom sakrifais, bikaaz Adam da-mi wahn perfek man, ahn hihn mi chooz fi disobay Gaad. Adam wahn geh di saym ponishment az di wan dehn weh “di Son a man” wahn joj az “di goat dehn,” ahn da ponishment da “evalastin det.”—Mach. 25:31-33, 46; Heeb. 5:9.

15. Hoo aal Paal di rifaa tu wen ih seh dat “evribadi wahn liv”?

¹⁵ Noatis dat Paal mi seh dat “evribadi wahn liv sayka Krais.” (1 Kor. 15:22) Paal mi rait da  leta tu di anointid Kristyanz eena Korint weh mi wahn geh rayz op bak tu laif fi liv da hevn. Gaad mi “set [dehn] apaat fi bee wan wid Krais Jeezas,” ahn Gaad “kaal [dehn] fi bee ih hoali peepl.” Paal mi aalso menshan “aala Krais falowaz weh don ded.” (1 Kor. 1:2; 15:18; 2 Kor. 5:17) Eena wahn nada leta weh Paal mi rait, ih mi seh dat di wan dehn weh ‘yoonaitid wid Jeezas wen dehn ded laik hihnʼ wahn aalso bee ‘yoonaitid wid Jeezas wen dehn geh rayz op bak tu laif jos laik hihn.ʼ (Roam. 6:3-5) Jeezas mi geh rayz op bak tu laif az wahn spirit ahn gaahn da hevn. Soh dat da di saym ting weh wahn hapm tu aala “Krais falowaz” hoo da di anointid Kristyanz.

16. Weh Paal mi meen wen ih kaal Jeezas “di fers wan [Lit., “fersfroot,” ftn.]”?

¹⁶ Paal mi rait dat Krais mi geh rayz op bak fahn di ded az “di fers wan [Lit., “fersfroot,” ftn.] weh geh rezorek fahn monks aala di peepl weh don ded.” Memba dat ada peepl, laik Lazaros, mi geh rayz op bak tu laif pahn di ert, bot Jeezas da-mi di fers wan fi eva geh rayz op bak fahn di ded az wahn spirit ahn fi geh evalastin laif. Wi ku kompyaa Jeezas tu di fersfroot a di haavis weh di Izrelait dehn mi aafa op tu Gaad. Soh wen Paal mi rifaa tu Jeezas az “di fers wan [Lit., “fersfroot,” ftn.],” hihn mi-di seh dat ada hyoomanz weh mi ded afta Jeezas mi wahn geh rayz op bak tu laif fi goh liv da hevn. Di apasl dehn an ada anointid Kristyanz mi wahn fala Jeezas. Soon, dehn mi wahn geh rayz op bak tu laif fi liv da hevn, jos laik Jeezas.

17. Da wen “Krais falowaz” mi wahn geh rayz op bak tu laif fi liv da hevn?

¹⁷ Wen Paal mi rait di leta tu di Korintyanz, “Krais falowaz” neva mi-di geh rayz op bak tu laif fi liv da hevn az yet. An akaadn tu Paal, dat mi wahn tek plays som taim eena di fyoocha. Hihn mi rait: “Eech wan wahn rezorek eena dis aada: di fers wan weh geh rezorek da di Krais. Den, di peepl weh bilangz tu di Krais wahn geh rezorek joorin di taim wen ih kohn bak fi deh wid ih peepl.” (1 Kor. 15:23; 1 Tes. 4:15, 16) Tudeh, wi di liv joorin da taim deh. Yes, di apasl dehn an ada anointid Kristyanz weh ded mi haftu wayt fi geh dehn riwaad fi liv da hevn ahn bee ‘yoonaitid wid Jeezas wen dehn geh rayz op bak tu laif jos laik hihn.ʼ

18. (a) Wai wi ku seh dat wahn nada rezorekshan wahn tek plays afta aala di anointid wan dehn geh rayz op bak tu laif fi liv da hevn? (b) Akaadn tu 1 Korintyanz 15:24-26, weh aal wahn hapm da hevn?

¹⁸ Weh wahn hapm tu aala di laayal Kristyanz weh noh ga di hoap fi liv da hevn wid Krais? Dehn ga di hoap a wahn rezorekshan tu. Di Baibl  seh dat Paal an evribadi els weh goh da hevn da “paat a di fers rezorekshan fahn di ded.” (Fil. 3:11) Yu noh tink dat meenz dat wahn nada rezorekshan wahn tek plays afta dat? Dat da weh Joab mi seh mi wahn hapm tu hihn eena di fyoocha. (Job 14:15) Paal mi seh: “Di peepl weh bilangz tu di Krais wahn geh rezorek joorin di taim wen ih kohn bak fi deh wid ih peepl.” Ahn dehn wahn deh wid Jeezas da hevn wen ih dischrai aala di govament dehn an aal atariti ahn powa. Ahn “det wahn bee di laas enimi weh wahn geh dischrai.” Wi noa fi shoar dat di wan dehn weh geh rayz op bak tu laif fi liv da hevn wahn neva ded. Bot how bowt di wan dehn weh wahn geh rayz op bak tu laif fi liv pahn di ert?—Reed 1 Korintyanz 15:24-26.

19. Weh di wan dehn weh ga di hoap fi liv pahn di ert ku luk faawod tu?

¹⁹ Weh di wan dehn weh ga di hoap fi liv pahn di ert ku luk faawod tu? Fahn weh Paal mi seh, ih klyaa fi si dat dehn wahn ga wahn lat fi luk faawod tu; hihn mi seh: “Ai ga di saym hoap . . . dat Gaad wahn rayz op bak fahn di ded di peepl weh mi raichos ahn di peepl weh neva raichos.” (Aks 24:15) Wi noa dat enibadi weh noh raichos kuda neva goh da hevn, soh di tingz weh Paal mi seh shoa wi dat eena di fyoocha wi ku luk faawod tu wahn rezorekshan rait ya pahn di ert.

20. How dis aatikl schrentn yu hoap eena di rezorekshan?

²⁰ Wi noa fi shoar dat “Gaad wahn rayz op [peepl] bak fahn di ded”! Di wan dehn weh geh rayz op bak fahn di ded fi liv pahn di ert ga di hoap fi liv rait ya fareva. Yu noh haftu wanda weda er nat da pramis wahn kohn chroo. Ahn da hoap ku komfert yu weneva yu looz sohnbadi weh yu lov eena det. Dehn ku geh rayz op bak fahn di ded joorin di taim wen Krais ahn di anointid wan dehn wahn “rool az kingz . . . fi 1,000 yaaz.” (Rev. 20:6) Ahn yoo ku aalso bee kanfident dat if yu ded bifoa Krais staat tu rool fi di 1,000 yaaz, yu wahn geh rayz op bak tu laif tu. Fi wee “hoap wahn neva let wi dong”! (Roam. 5:5) Da hoap ku help yu fi bee schrang now, an ih ku aalso help yu fi bee hapiya wail yu serv Jehoava. Bot di aatikl afta dis wan wahn help wi fi si wat els wi ku laan fahn 1 Korintyanz chapta 15.