1-2. Unsay nindot nga paglaom sa mga alagad ni Jehova?

ANG paglaom importante kaayo. Ang pipila ka tawo naglaom nga makabaton ug malipayong kaminyoon ug maayog panglawas nga mga anak, o kaha maulian sa grabeng sakit. Kitang mga Kristohanon naglaom sab tingali niana. Pero duna pa tay gilaoman nga mas labaw pa niana. Naglaom ta nga mabuhi sa walay kataposan ug nga mabanhaw ang atong mga minahal nga nangamatay na.

² Si apostol Pablo miingon: “Duna koy paglaom diha sa Diyos . . . nga duna unyay pagkabanhaw sa mga matarong ug sa mga dili matarong.” (Buh. 24:15) Dili si Pablo ang unang naghisgot bahin sa paglaom sa pagkabanhaw. Naghisgot pod niana ang patriarkang si Job. Masaligon siya nga hinumdoman ug banhawon siya sa Diyos.​—Job 14:7-10, 12-15.

3. Nganong makabenepisyo ta sa 1 Corinto kapitulo 15?

³ “Ang pagbanhaw sa mga patay” maoy bahin sa “pundasyon,” o pangunang doktrina, sa tanang Kristohanong pagtulon-an. (Heb. 6:1, 2) Gihisgotan ni Pablo ang pagkabanhaw diha sa 1 Corinto kapitulo 15. Seguradong nadasig ang unang siglong mga Kristohanon sa iyang gisulat. Ug ang maong kapitulo makapadasig nato ug makapalig-on sa atong paglaom nga mahitabo gyod ang pagkabanhaw.

4. Nganong makaseguro ta nga mabanhaw ang atong mga minahal nga nangamatay na?

⁴ Ang pagkabanhaw ni Jesu-Kristo nagpasalig nato nga kon mamatay ang atong mga minahal, dunay pagkabanhaw. Apil ni sa “maayong balita” nga gipahayag ni Pablo sa mga taga-Corinto. (1 Cor. 15:1, 2) Gani, miingon siya nga kon ang usa ka Kristohanon dili motuo sa pagkabanhaw, ang iyang pagtuo walay  kapuslanan. (1 Cor. 15:17) Ang pagtuo sa pagkabanhaw ni Jesus maoy basehanan sa atong paglaom sa pagkabanhaw.

5-6. Unsay kahulogan alang kanato sa giingon sa 1 Corinto 15:3, 4?

⁵ Dihang si Pablo nagsugod pagsulat bahin sa pagkabanhaw, gihisgotan niya ang tulo ka kamatuoran: (1) “Ang Kristo namatay alang sa atong mga sala.” (2) Siya “gilubong.” (3) Siya “gibanhaw sa ikatulong adlaw sumala sa Balaang Kasulatan.”​—Basaha ang 1 Corinto 15:3, 4.

⁶ Unsay kahulogan alang kanato sa kamatayon, paglubong, ug pagkabanhaw ni Jesus? Si propetang Isaias nagtagna nga ang Mesiyas ‘wagtangon gikan sa yuta sa mga buhi’ ug ‘hatagag lubnganan taliwala sa mga daotan.’ Pero, duna pay laing mahitabo. Si Isaias midugang nga ang Mesiyas ‘magpas-an sa sala sa daghang tawo.’ Gihimo kini ni Jesus pinaagi sa pagtagana sa lukat. (Isa. 53:8, 9, 12; Mat. 20:28; Roma 5:8) Busa ang kamatayon, paglubong, ug pagkabanhaw ni Jesus naghatag ug lig-ong basehanan sa atong paglaom nga mapahigawas sa sala ug kamatayon ug makauban pag-usab ang atong mga minahal nga nangamatay.

7-8. Unsay makatabang sa mga Kristohanon nga makombinsir nga nabanhaw si Jesus?

⁷ Ang atong paglaom sa pagkabanhaw konektado sa pagkabanhaw ni Jesus, busa kinahanglang kombinsido ta nga nabanhaw si Jesus. Nganong makaseguro ta nga gibanhaw ni Jehova si Jesus?

⁸ Dihay daghang nakakita nga nabanhaw si Jesus, ug ila nang gisulti sa uban. (1 Cor. 15:5-7) Ang unang saksi nga gihisgotan ni Pablo mao si apostol Pedro (Cefas). Ang usa ka grupo sa mga tinun-an nagpamatuod nga nakita ni Pedro ang nabanhawng si Jesus. (Luc. 24:33, 34) Dugang pa, ‘ang Dose,’ ang mga apostoles, nakakita kang Jesus human siya mabanhaw. Dayon ang Kristo “nagpakita sa kapin sa 500 ka igsoon sa usa ka higayon,” tingali diha sa malipayong okasyon sa Galilea nga gihisgotan sa Mateo 28:16-20. Si Jesus “nagpakita [sab] kang Santiago,” posible ang igsoon ni Jesus sa inahan, kinsa kaniadto wala motuo nga si Jesus ang Mesiyas. (Juan 7:5) Human makita ni Santiago ang nabanhawng si Jesus, siya nakombinsir. Makapainteres, sa mga 55 C.E. dihang gisulatan ni Pablo ang mga taga-Corinto, daghan niadtong nakakita sa pagkabanhaw ni Jesus ang buhi pa. Busa kon dunay magduhaduha, puwede nilang pangutan-on ang kasaligan ug buhi pa nga mga saksi.

9. Sumala sa Buhat 9:3-5, sa unsang paagi nakahatag si Pablo ug dugang pamatuod nga nabanhaw si Jesus?

⁹ Sa ulahi, si Jesus nagpakita kang Pablo mismo. (1 Cor. 15:8) Si Pablo (Saulo) nagpaingon sa Damasco dihang nadungog niya ang tingog sa nabanhawng si Jesus ug, pinaagi sa panan-awon, nakita niya si Jesus didto sa langit. (Basaha ang Buhat 9:3-5.) Ang eksperyensiya ni Pablo nakadugang sa ebidensiya nga nabanhaw gyod si Jesus.​—Buh. 26:12-15.

10. Unsay gibuhat ni Pablo tungod sa iyang pagtuo nga nabanhaw si Jesus?

¹⁰ Ang giingon ni Pablo makapainteres gyod sa pipila kay kaniadto gilutos niya ang mga Kristohanon. Dihang nakombinsir si Pablo nga nabanhaw si Jesus, naningkamot siya pag-ayo nga makombinsir ang uban bahin niana. Siya gibunalan, gipriso, ug nakasinatig pagkalunod samtang siya nagsangyaw nga si Jesus namatay pero nabuhi pag-usab. (1 Cor. 15:9-11; 2 Cor. 11:23-27) Segurado kaayo si Pablo nga nabanhaw si Jesus mao nga andam siyang mamatay aron depensahan ang iyang pagtuo.  Dili ba kini nga pamatuod makapakombinsir pod nato nga si Jesus nabanhaw? Ug dili ba makapalig-on ni sa atong pagtuo sa pagkabanhaw?

11. Ngano kahang ang pipila ka taga-Corinto sayop ug panglantaw sa pagkabanhaw?

¹¹ Ang pipila didto sa Gregong siyudad sa Corinto may sayop nga mga panglantaw bahin sa pagkabanhaw. Miingon pa gani sila nga “walay pagkabanhaw sa mga patay.” Ngano? (1 Cor. 15:12) Ang mga pilosopo sa laing Gregong siyudad, sa Atenas, nagyagayaga sa ideya nga nabanhaw si Jesus. Ug posibleng naimpluwensiyahan ang pipila ka taga-Corinto sa maong panghunahuna. (Buh. 17:18, 31, 32) Ang uban tingali naghunahuna nga ang pagkabanhaw simboliko, nga nagpasabot nga ang usa ka tawo nga “patay” kaniadto tungod sa sala nahimong “buhi” ingong Kristohanon. Bisag unsa pay ilang rason, ang ilang pagsalikway sa pagkabanhaw nagpasabot nga ang ilang pagtuo walay pulos. Kon wala banhawa sa Diyos si Jesus, walay lukat nga gibayran ug ang tanan makasasala gihapon. Busa kadtong nagsalikway sa pagkabanhaw walay tinuod nga paglaom.​—1 Cor. 15:13-19; Heb. 9:12, 14.

12. Base sa 1 Pedro 3:18, 22, sa unsang paagi ang pagkabanhaw ni Jesus lahi sa mga pagkabanhaw nga nahitabo sa nangagi?

¹² Si Pablo mismo nahibalo nga “ang Kristo gibanhaw.” Ang maong pagkabanhaw mas maayo kay sa pagkabanhaw nga nahitabo sa nangagi, kay ang mga tawong gibanhaw namatay ra gihapon sa ulahi. Si Pablo miingon nga si Jesus ang “unang bunga niadtong mga nangatulog sa kamatayon.” Sa unsang paagi nga si Jesus ang una? Siya ang unang tawo nga gibanhaw ingong espiritu ug ang unang tawo nga misaka sa langit.​—1 Cor. 15:20; Buh. 26:23; basaha ang 1 Pedro 3:18, 22.

13. Sumala kang Pablo, unsay kalainan ni Adan ug Jesus?

¹³ Sa unsang paagi ang kamatayon sa usa ka tawo maghatag ug kinabuhi sa minilyon? Klarong gitubag ni Pablo ang maong pangutana. Iyang gipatin-aw ang kalainan sa nahitabo sa katawhan tungod kang Adan ug sa posibleng mahitabo kanato tungod sa Kristo. Maylabot kang Adan, si Pablo misulat nga nahitabo ‘ang kamatayon pinaagi sa usa ka tawo.’ Dihang nakasala si Adan, nagpahinabo siyag kamatayon sa iyang kaugalingon ug sa iyang mga kaliwat. Giantos gihapon nato ang makapaguol nga mga epekto sa iyang pagkamasinupakon. Pero kay gibanhaw sa Diyos ang iyang Anak, duna tay nindot nga kaugmaon! “Ang pagkabanhaw sa mga patay pinaagi usab sa usa ka tawo,” si Jesus. “Kay ingon nga diha kang Adan ang tanan nangamatay,” si Pablo mipatin-aw, “sa ingon usab diha sa Kristo ang tanan pagabuhion.”​—1 Cor. 15:21, 22.

14. Banhawon ba si Adan? Ipatin-aw.

¹⁴ Unsay gipasabot ni Pablo dihang siya miingon nga “diha kang Adan ang tanan nangamatay”? Diha sa hunahuna ni Pablo ang mga kaliwat ni Adan, kinsa nakapanunod ug sala ug pagkadili-hingpit gikan kang Adan ug busa mangamatay. (Roma 5:12) Si Adan dili apil niadtong “pagabuhion.” Dili makabenepisyo si Adan sa lukat sa Kristo, kay siya hingpit nga tawo kinsa tinuyong misupak sa Diyos. Ang nahitabo kang Adan parehas sa mahitabo niadtong hukman “sa Anak sa tawo” ingong “kanding,” nga mao, ‘kamatayon hangtod sa hangtod.’​—Mat. 25:31-33, 46; Heb. 5:9.

15. Kinsay apil sa “tanan” nga “pagabuhion”?

¹⁵ Matikdi nga si Pablo miingon nga “diha sa Kristo ang tanan pagabuhion.” (1 Cor. 15:22) Ang sulat ni Pablo maoy para sa dinihogang  mga Kristohanon sa Corinto, kinsa banhawon ngadto sa langit. Ang maong mga Kristohanon “nabalaan ug nahiusa kang Kristo Jesus, nga gitawag aron mahimong mga balaan.” Ug gihisgotan ni Pablo “kadtong nangatulog sa kamatayon nga nahiusa sa Kristo.” (1 Cor. 1:2; 15:18; 2 Cor. 5:17) Sa laing sulat, si Pablo miingon nga kadtong “namatay sama [kang Jesus] . . . banhawon sama niya, ug niining mga paagiha [sila] nahiusa kaniya.” (Roma 6:3-5) Si Jesus gibanhaw ingong espiritu ug miadto sa langit. Busa mao nay mahitabo sa tanan nga “nahiusa sa Kristo,” sa ato pa, sa tanang dinihogan sa espiritu nga mga Kristohanon.

16. Unsay gipasabot ni Pablo dihang gitawag niya si Jesus nga “unang bunga”?

¹⁶ Si Pablo misulat nga ang Kristo gibanhaw ingong “unang bunga niadtong mga nangatulog sa kamatayon.” Hinumdomi nga ang uban, sama kang Lazaro, gibanhaw dinhi sa yuta, pero si Jesus ang unang gibanhaw ingong espiritu ug ang unang nakadawat ug walay kataposang kinabuhi. Sama siya sa unang bunga sa ani nga gihalad sa mga Israelinhon ngadto sa Diyos. Dugang pa, sa pagtawag kang Jesus nga “unang bunga,” gipasabot ni Pablo nga duna pay ubang tawo nga banhawon ngadto sa langit human kang Jesus, nga mao, ang mga apostoles ug ang uban nga “nahiusa sa Kristo.” Sa ngadtongadto, maeksperyensiyahan nila ang pagkabanhaw nga sama nianang kang Jesus.

17. Kanus-a madawat niadtong “nahiusa sa Kristo” ang ilang langitnong ganti?

¹⁷ Ang pagkabanhaw ngadto sa langit niadtong “nahiusa sa Kristo” wala pa magsugod dihang misulat si Pablo sa mga taga-Corinto. Gipakita ni Pablo nga sa umaabot pa ni mahitabo: “Ang matag usa banhawon diha sa iyang kaugalingong turno: ang Kristo ang unang bunga, pagkahuman kadtong mga iya sa Kristo panahon sa iyang presensiya.” (1 Cor. 15:23; 1 Tes. 4:15, 16) Karon nagkinabuhi ta nianang gitagna nga “presensiya” sa Kristo. Ang mga apostoles ug ang ubang dinihogan sa espiritu nga mga Kristohanon nga nangamatay kinahanglang maghulat niana nga presensiya aron madawat ang langitnong ganti ug ‘mabanhaw sama [kang Jesus] ug mahiusa kaniya.’

18. (a) Nganong makaingon ta nga human sa langitnong pagkabanhaw dunay laing pagkabanhaw nga mosunod? (b) Base sa 1 Corinto 15:24-26, unsay mahitabo didto sa langit?

¹⁸ Pero unsay mahitabo sa tanang maunongong Kristohanon nga walay paglaom nga  mabuhi sa langit uban sa Kristo? Sila sab dunay paglaom nga mabanhaw. Ang Bibliya nag-ingon nga si Pablo ug ang uban nga moadto sa langit apil niadtong makadawat ug “mas sayo nga pagkabanhaw.” (Filip. 3:11) Dili ba nagpakita kana nga dunay laing pagkabanhaw nga mosunod? Nahiuyon kana sa giingon ni Job nga mahitabo kaniya sa umaabot. (Job 14:15) “Kadtong mga iya sa Kristo panahon sa iyang presensiya” makauban ni Jesus sa langit dihang iyang wagtangon ang tanang gobyerno, awtoridad, ug gahom. Bisan “ang kataposang kaaway, ang kamatayon,” pagawagtangon. Kadtong banhawon ngadto sa langit dili na gyod mamatay. Pero, unsay mahitabo sa uban?​—Basaha ang 1 Corinto 15:24-26.

19. Unsay madahom niadtong dunay yutan-ong paglaom?

¹⁹ Unsay madahom niadtong dunay yutan-ong paglaom? Makalaom sila sa giingon ni Pablo: “Duna koy paglaom . . . nga duna unyay pagkabanhaw sa mga matarong ug sa mga dili matarong.” (Buh. 24:15) Klaro nga walay dili matarong nga makasulod sa langit, busa ang maong mga pulong nagpakita nga dunay umaabot nga pagkabanhaw dinhi sa yuta.

20. Sa unsang paagi napalig-on ang imong paglaom nga duna gyoy pagkabanhaw?

²⁰ Segurado nga “duna unyay pagkabanhaw”! Kadtong banhawon dinhi sa yuta dunay paglaom nga mabuhi sa walay kataposan. Makasalig ka nianang saara. Ang maong paglaom makahupay nimo dihang maghunahuna ka sa imong mga minahal nga nangamatay. May paglaom sila nga mabanhaw dihang ang Kristo ug ang uban “magmando ingong mga hari . . . sulod sa 1,000 ka tuig.” (Pin. 20:6) Makasalig ka nga kon ugaling mamatay ka sa dili pa magsugod ang Usa ka Libo ka Tuig nga pagmando sa Kristo, ikaw pagabanhawon. Kini nga “paglaom dili moresultag kahigawad.” (Roma 5:5) Kini makapalig-on nimo karon ug makadugang sa imong kalipay sa pag-alagad sa Diyos. Pero, duna pa tay makat-onan sa 1 Corinto kapitulo 15, ingon sa ipakita sa sunod nga artikulo.