1-2. Jehovah salle cu zei a ṭha tukmi ruahchannak dah an ngeih?

RUAHCHANNAK cu a biapi tukmi a si. Mi cheukhat nih a nuammi chungkhar kan ngei lai, fale kan zohkhenh hna lai i a zual tukmi zawtnak in kan dam lai timi ruahchannak an ngei. Khrihfa a simi kannih zong cu bantuk ruahchannak kan ngei kho men. Asinain kannih kan i ruahchanmi cu mah lawng a si lo. Kannih cu hmailei zungzal nunnak le kan dawtmi a thimi hna an tho ṭhan lai timi ruahchannak zong kan ngei.

² Lamkaltu Paul nih hitin a ti: “Minung hi miṭha he miṭhalo he thihnak in kan tho ṭhan dih lai ti hi kaa ruahchanmi a si ve.” (Lam. 24:15) Paul cu thawhṭhannak ruahchannak kong a chim hmasa bikmi a si lo. Pupa Job zong nih a rak chim ve. Job nih Pathian nih a ka philh lai lo i ka nung ṭhan lai ti kha a zumh.—Job 14:7-10, 12-15.

3. Kuatkhat Korin dal 15 in zeicah ṭhatnak kan hmuh khawh?

³ “Mithi thawhṭhannak kong” cu Khrihfa hna i ‘a hrampi cawnpiaknak’ asiloah “a hram kan i domhnak” a si. (Heb. 6:1, 2) Paul nih a chimmi thawhṭhannak kong cu 1 Korin dal 15 ah ṭial a si. Mah a ṭialmi nih kumzabu pakhatnak i Khrihfa hna kha thazaang a rak pek tuk hna lai. Thawhṭhannak kong na zumhnak cu zei can a si cang hmanhah 1 Korin dal 15 nih thazaang aan pek lai i naa ruahchanmi cu a cang taktak lai ti kha aan zumhter lai.

4. Kan dawtmi hna an tho ṭhan lai ti kan zumhnak a hrampi cu zeidah a si?

⁴ Jesuh thawhṭhannak cu kan dawtmi a thimi hna an tho ṭhan lai ti kan zumhnak a hrampi a si. Mah cu Paul nih Korin khuami hna sin a rak thanhmi “thawngṭha” ah aa tel. (1 Kor. 15:1, 2) Cun Khrihfa hna nih thawhṭhannak kong kha an zumh lo ahcun  a zumhnak cu pakpalawng a si lai tiah a ti. (1 Kor. 15:17) Cucaah Jesuh thawhṭhannak kong zumhnak cu Khrihfa kan caah ruahchannak hrampi a si.

5-6. Kuatkhat Korin 15:3, 4 ah kan hmuhmi bia cu kan caah zei sullam dah a ngeih?

⁵ Paul nih a hmasa i thawhṭhannak kong a chim lioah mah a kong pathum hi a langhter: Mah hna cu (1) “Khrih cu kan sualnak caah a thi.” (2) “An vui.” (3) Cathiang chungah aa ṭial bantukin “ni thumnak ni ah a tho ṭhan” timi an si.—1 Korin 15:3, 4 rel.

⁶ Jesuh a thihmi, an vuimi le a thawhṭhanmi cu kan caah zei sullam dah a ngeih? Profet Isaiah nih Messiah cu “thah awkah an kalpi” lai i “misual mi hna he khan thlankhat ah an vuiṭi” lai tiah a chimchung. Asinain a dang a cang dingmi a um rih. Messiah nih “mi tampi sualnak” kha a kalpi lai ti zongin a ti. Tlanhnak man a peknak thawngin Jesuh nih cutin a rak tuah. (Isa. 53:8, 9, 12; Matt. 20:28; Rom 5:8) Cucaah Jesuh a thihmi, an vuimi le a thawhṭhanmi nih sualnak le thihnak in kan luat kho i kan dawtmi a thimi hna he kan i tong ṭhan kho ti kha zumh awkah a ruang ṭha a kan ngeihter.

7-8. Jesuh cu a thoṭhan ti kha an zumh khawh nakhnga Khrihfa hna kha zeinihdah a bawmh hna?

⁷ Thihnak in kan tho ṭhan lai ti kha kan zumh khawh nakhnga Jesuh cu a tho ṭhan ti kha kan zumh hmasa a hau. Jehovah nih Jesuh a thawhter ṭhan ti kha zeicah kan zumh khawh?

⁸ Jesuh cu a tho ṭhan ti kha mit in a hmumi mi tampi an rak um. (1 Kor. 15:5-7) Paul nih hmasa bik a hmutu cu lamkaltu Peter a si tiah a ti. Zultu phu pakhat zong nih Jesuh a thawhṭhanmi kha Peter nih a hmuh hmasa bik tiah an rak ti ve. (Luka 24:33, 34) Mah lengah a thawhṭhan hnuah lamkaltu “Hleihnih” zong nih an rak hmuh. Cun Khrih cu “a zultu zanga ring lo sinah khan voikhatte ah a lang.” Mah cu Matthai 28:16-20 ah langhtermi Galilee ah nuam tein aa pummi hna sinah a si kho men. Cun a hmasa ah Jesuh kha Messiah in a zum lomi a unau si dawh a simi “Jeim sin zongah a rak lang.” (Johan 7:5) A thawhṭhanmi a hmuh hnuah Jeim nih Jesuh kha a rak zumh. Hngalh duh awk ngai a simi cu Paul nih mah cakuat a ṭial lio AD 55 hrawng ah Jesuh a thawhṭhanmi a rak hmutu mi tampi cu an rak nung rih. Cucaah lunghrinhnak a ngeimi paoh nih Jesuh thawhṭhannak kong he aa tlaiin mit in a hmutu hna sinah an hal khawh hna.

9. Lamkaltu 9:3-5 ah kan hmuh bantukin Paul nih Jesuh cu thihnak in a tho ṭhan ti kha zeitindah a chim khawh?

⁹ A hnuah Jesuh cu amah Paul sin zongah a rak lang. (1 Kor. 15:8) Paul (Saul) nih Damaskas a kal lioah a tho ṭhanmi Jesuh aw kha a theih i sunparnak he vancung ah a um lio kha langhnak in a hmuh. (Lamkaltu 9:3-5 rel.) Mah a hmuhtonnak nih Paul kha Jesuh cu thihnak in a tho ṭhan taktak ti kha a zumhter chinchin.—Lam. 26:12-15.

10. Jesuh cu thihnak in a tho ṭhan ti kha a zumh caah Paul nih zeidah a rak tuah?

¹⁰ Jesuh a sin a langh hlanah Paul cu Khrihfa hremtu a rak si caah Paul chimmi bia cu mi cheukhat nih hngalh an rak duh tuk ko lai. Mah hnuah Paul nih Jesuh cu a tho ṭhan ti kha a hun zumh i mah biatak kong kha midang nih an zumh khawh nakhnga fakpi in a rak i zuam. Tuknak, thongthlaknak le tilawng rawhnak a ton lio hmanhah Jesuh cu a thi i a tho ṭhan timi biatak kong kha a rak chim. (1 Kor. 15:9-11; 2 Kor. 11:23-27) Paul nih Jesuh cu thihnak in a tho ṭhan ti kha a zumh caah anih zong a zumhnak kilven awkah a nunnak pek kha a rak duh. Kumzabu pakhatnak i Khrihfa hna nih Jesuh cu thihnak in a tho ṭhan ti kha an in zumhter ko lo maw? Mah nih  thawhṭhannak kong he aa tlaiin na zumhnak a fehter a si ko lo maw?

11. Korin khuami cheukhat nih thawhṭhannak kong he aa tlaiin zeicah a hmaan lomi hmuhnak an ngeih?

¹¹ Greek ram ah a ummi Korin khuami cheukhat cu thawhṭhannak kong he aa tlaiin a hmaan lomi hmuhnak an ngei. Cucaah mi cheukhat nih “mithi cu nunnak ah thawhter an si lai lo” ti hmanh in an rak ti. Zeicah? (1 Kor. 15:12) Greek ram ah a ummi Athen khua i mifim hna nih Jesuh cu a tho ṭhan timi cawnpiaknak kha an rak nihsawh caah a si. Cu bantuk ruahnak cu Korin khua i mi cheukhat cung zongah huham a ngei men lai. (Lam. 17:18, 31, 32) Mi cheukhat nih cun thawhṭhannak cu langhterhtu thil sawhsawh a si, mi pakhat cu a sual i voikhat cu “a thi” asinain Khrihfa pakhat in a hung “nung” ṭhan tiah an ruah men lai. Mah mi hna nih thawhṭhannak kong an zumh lonak a ruang cu zei a si hmanhah an zumhnak cu pakpalawng a si. Pathian nih Jesuh kha a thawhter lo ahcun mi sual kan si rih lai i kan sualnak cu ngaihthiam kan si lai lo. Cucaah thawhṭhannak a zum lomi hna cu ruahchannak an ngei taktak lo.—1 Kor. 15:13-19; Heb. 9:12, 14.

12. Jesuh thawhṭhannak cu 1 Peter 3:18, 22 ningin hlanah a tho ṭhanmi hna he zeitindah aa lawh lo?

¹² Amah Paul theng zong nih “Khrih cu thihnak in thawhter a si” ti kha a hngalh. Mah thawhṭhannak cu hlanah a rak cangmi thawhṭhannak nakin a ṭha deuh. Zeicahtiah vawlei ah thawhter ṭhan a rak simi pawl cu a hnuah an thi ṭhan. Paul nih Jesuh cu “thihnak in thawhter hmasa bikmi a si” tiah a ti. Zeiti lam in dah Jesuh cu hmasa bik a si? Jesuh cu thlarau pum in a tho hmasa bikmi le minung pakhat in vancung ah a kai hmasa bikmi a si.—1 Kor. 15:20, NW; Lam. 26:23; 1 Peter 3:18, 22 rel.

13. Paul chimmi Adam le Jesuh an i dannak cu zeidah a si?

¹³ Mi pakhat thihnak nih mi nuai tampi kha zeitindah nunnak a pek khawh hna? Paul nih mah biahalnak a phi kha fiang tein a langhter. Adam nih minung cungah zeidah a chuahter timi kong le Khrih thawngin zeidah a si kho timi an i dannak kong kha a fianter. Adam kong he aa tlaiin Paul nih “thihnak cu mi pakhat thawngin” a si tiah a ti. Adam nih sualnak a tuah tikah amah le a tefa cungah thihnak a chuahter. A nawlngaih lonak ruangah atu tiang harnak kan tong rih. Asinain Pathian nih a Fapa a thawhter caah a ṭha tukmi hmailei ruahchannak kan ngei kho. “Thihnak in thawhṭhannak zong cu mi pakhat thawngin” a si ve i anih cu Jesuh a si. Cucaah Paul nih “Adam he an i pehtlaihnak thawngin mi vialte cu an thih bantukin, Khrih he an i pehtlaihnak thawngin mi vialte cu nunnak ah thawhter an si lai” tiah a ti.—1 Kor. 15:21, 22.

14. Adam cu thawhter ṭhan a si lai maw? Fianter.

¹⁴ Paul nih ‘Adam thawngin mi vialte cu an thi’ tiah a ti tikah zeidah a chim duhmi a si? Adam sinin sualnak le tlinlonak ro an co caah an thih lainak kong kha a chim duhmi a si. (Rom 5:12) Adam cu “nunnak ah thawhter” a simi hna lakah aa tel lai lo. Adam cu mitling a si nain Pathian nawl a ngaih lo caah Khrih tlanhnak man in ṭhathnemhnak a hmu kho lai lo. Adam nih a tonmi cu “mi Fapa” nih “meheh” in bia a ceih dingmi hna nih an ton laimi he aa khat, mah cu “zungzal hrawhnak” kha a si.—Matt. 25:31-33, 46, NW ; Heb. 5:9.

15. “Nunnak ah thawhter” a si dingmi “vialte” ah ahote dah an i tel?

¹⁵ Paul nih “Khrih he an i pehtlaihnak thawngin mi vialte cu nunnak ah thawhter an si lai” tiah a timi kha i cinken. (1 Kor. 15:22)  Mah cakuat cu vancung nunnak in thawhter a si dingmi Korin khua i chiti thuhmi Khrihfa hna sinah a ṭialmi a si. Annih cu ‘Khrih Jesuh he an i pehtlaihnak thawngin mi thiang si awkah kawh an si.’ Cun anih kha Paul nih “Khrih a zummi a thi cangmi” ti zongin a ti hna. (1 Kor. 1:2; 15:18; 2 Kor. 5:17) A dang cakuat ah Paul nih ‘a thihnak ah amah he an thihṭi ahcun, nunnak i thawhter a sinak ah annih zong thawhṭiter an si ve lai’ tiah a ti. (Rom 6:3-5) Jesuh cu thlarau pum in a tho i vancung ah a kai. Cucaah ‘Khrih he an i pehtlaihnak thawngin’ chiti thuhmi Khrihfa dihlak zong cutin an si ve lai.

16. Paul nih Jesuh kha ‘theitlai hmasa bik’ tiah a auh tikah zeidah a chim duhmi a si?

¹⁶ Paul nih Khrih cu “thihnak in thawhter hmasa bikmi a si” tiah a ti. Lazaruh ti bantuk vawleicung ah thawhter a si ṭhanmi hna kong kha philhhlah. Asinain Jesuh cu zungzal nunnak hmuh awkah thlarau pum in thawhter hmasa bikmi a si. Paul nih Jesuh kha Israel mi hna nih Pathian sinah an pekchanh hmasa bikmi theitlai he a tahchunh. Cun Jesuh kha ‘theitlai hmasa bik’ tiah a auhnak thawngin Jesuh hnu in midang zong vancung nunnak ah thawhter an si ve lai ti kha a chim duhnak a si. Lamkaltu pawl le ‘Khrih he an i pehtlaihnak thawngin’ midang zong nih Jesuh hnu kha an zulh lai. Cun a caan a phanh tikah annih zong Jesuh bantukin thawhter ṭhan an si ve lai.

17. ‘Khrih he aa pehtlaimi’ hna nih vancung laksawng kha zeitikah dah an hmuh lai?

¹⁷ Paul nih Korin khuami hna sin cakuat a ṭial lioah “Khrih he an i pehtlaihnak thawngin” vancung nunnak a hmu hnga dingmi hna cu thawhter an si rih lo. Mah canah Paul nih hmailei caan kong he aa tlaiin hitin a ti: “Asinain a ningcang tein a si lai: a hmasa bik ah Khrih, cun a rat caan ah Khrih ta a simi.” (1 Kor. 15:23; 1 Thes. 4:15, 16) Kannih cu Khrih “a rat caan” ah kan nung. Lamkaltu pawl le vancung laksawng hmuh dingin Khrih a rat caan a hngakmi, a thi cangmi thlarau chiti thuhmi hna cu ‘[Jesuh] he thawhṭiter an si ve lai.’

18. Vancung thawhṭhannak hnuah a dang thawhṭhannak a um lai ti kha zeicah kan hngalh khawh? (b) Vancung ah a cang dingmi kong he aa tlaiin 1 Korin 15:24-26 in zeidah kan cawn khawh?

¹⁸ Asinain Khrih he vancung ruahchannak a ngei lomi zumhfekmi Khrihfa hna tah zeitin? Annih zong thawhṭhannak ruahchannak an ngei ve. Baibal nih vancung ah a tho ṭhan  hnga dingmi pawl kha “mithi thawhter an si a pakhatnak” tiah a ti hna. (Biat. 20:6) Mah nih anmah hnuah a dang thawhṭhannak zong a um lai ti kha a langhter. Mah cu Job nih a hmailei kong he aa tlaiin a chimmi he zong aa tlak. (Job 14:15) Jesuh nih cozah, nawlngeitu le ṭhawnnak vialte a ke tang i a chiah hna tikah “a rat caan ah Khrih ta a simi” hna cu vancung ah amah he an umṭi lai. “Tei hmanung bik ding ral cu thihnak a si.” Vancung ah a tho ṭhanmi dihlak cu zeitikhmanh ah an thi ti lai lo. Asinain midang kong he aa tlaiin tah zeitin?—1 Korin 15:24-26 rel.

19. Vawlei ruahchannak a ngeimi hna nih zeidah an i ruahchan khawh?

¹⁹ Vawlei ruahchannak a ngeimi hna nih zeidah an i ruahchan khawh? Mah Paul bia in ruahchannak an ngei kho: “Minung hi miṭha he miṭhalo he thihnak in kan tho ṭhan dih lai ti hi kaa ruahchanmi a si ve.” (Lam. 24:15) Miṭhalo cu van ah an kai lai lo ti cu a fiang ko, cucaah mah bia cu hmailei vawlei ah a tho ṭhan dingmi hna caah a si.

20. Naa ruahchannak kha zeitindah na fehter khawh?

²⁰ “Thihnak in kan tho ṭhan dih lai” ti cu lunghrin awk a um lo. Vawlei i a tho ṭhanmi hna nih vawlei ah zungzal in nun awkah an i ruahchan khawh. Mah biakam cu a tling lai ti kha na zumh khawh. Mah ruahchannak nih na dawtmi a thimi hna kong na ruah tikah hnemhnak aan pek khawh. Annih cu Khrih le a dang “tlangbawi . . . kum thongkhat chung uktu bawi” an si tikah an tho ṭhan lai. (Biat. 20:6) Nang zong Khrih kum thongkhat uknak aa thawk hlanah na thih ahcun na tho ṭhan lai ti kha na zumh khawh. Mah “ruahchannak cu pakpalawng men a si lo.” (Rom 5:5) Mah nih atu ah thazaang aan ngeihter chin i Pathian rian na ṭuannak ah lawmhnak aan hmuhter chinchin. Asinain 1 Korin dal 15 in kan cawn khawhmi kong kha a hnu capar ah tam deuh in a langhter lai.