1-2. Ki lespwar bann serviter Zeova i annan?

I VREMAN enportan pour annan lespwar. Serten dimoun i annan lespwar ki en zour zot pou annan en bon lavi maryaz, ki zot pou elve bann zanfan ki an bonn sante oubyen ki zot pou nepli soufer avek en maladi grav. Konman bann Kretyen, nou osi nou kapab anvi sa bann menm keksoz. Me nou pe esper en keksoz ki pli merveye ki sa. Nou annan sa lespwar pour viv pour touzour e pour nou bann defen reviv ankor.

² Zapot Pol ti dir: “Mon annan konfyans dan Bondye e nou annan lespwar ki dimoun bon konman move pou resisite.” (Akt 24:15) Pol pa ti premye dimoun pour koz lo sa lespwar ki bann mor pou resisite. Zob osi ti koz lo la. I ti asire ki Bondye ti pou mazin li e redonn li lavi.​—Zob 14:7-10, 12-15, NWT.

3. Ki mannyer 1 Korentyen sapit 15 i kapab ed nou?

³ Sa lansennyman konsernan “rezireksyon” i form parti “fondasyon” oubyen “bann lansennyman de baz” ki tou Kretyen i krwar ladan. (Ebr. 6:1, 2) Sa ki Pol ti dir konsernan rezireksyon i dan 1 Korentyen sapit 15. Nou asire ki sa ki Pol ti dir ti ankouraz bann Kretyen dan premye syek. Nenport ki kantite letan ki nou’n krwar dan rezireksyon, 1 Korentyen sapit 15 pou ankouraz e ranforsi nou lespwar ki bann mor pour resisite.

4. Akoz nou asire ki nou bann defen pou resisite?

⁴ Rezireksyon Zezi Kri i donn nou sa lespwar ki si en dimoun ki nou kontan i mor, i pou annan en rezireksyon. Rezireksyon Zezi Kri i form parti “sa bon nouvel” ki Pol  ti koz lo la avek bann Kretyen Korent. (1 Kor. 15:1, 2) Anfet, Pol ti dir ki si en Kretyen pa krwar dan rezireksyon, son lafwa i anven. (1 Kor. 15:17) Nou lafwa dan rezireksyon Zezi i rezon akoz nou krwar ki lezot dimoun pou ganny resisite.

5-6. Ki sa bann parol dan 1 Korentyen 15:3, 4 i vedir pour nou?

⁵ Ler Pol ti konmans koz lo rezireksyon, i ti mansyonn trwa laverite. Sa i ki (1) “Kris in mor pour nou pese.” (2) “I ti ganny antere.” (3) “Dapre Lekritir, trwazyenm zour, i ti ganny resisite.”​—Lir 1 Korentyen 15:3, 4.

⁶ Pol ti dir ki Zezi ti mor, ganny antere e ganny resisite. Ki sa trwa keksoz i vedir pour nou? Profet Izai ti predir ki Mesi ti pou “ganny tire lo later parmi bann vivan” e zot ti pou fer “son latonm parmi bann malfeter.” Me i annan en lot keksoz ki ti pou arive. Izai ti osi dir ki Mesi ti pou “anmenn pese bokou dimoun.” Zezi ti fer sa ler i ti donn son lavi konman en ranson. (Iza. 53:8, 9, 12, NWT; Mat. 20:28; Rom. 5:8) Lefet ki Zezi ti mor, ganny antere e resisite, sa i fer nou annan lespwar ki nou pou ganny libere avek pese ek lanmor e ki nou pou vwar nou bann defen ankor.

7-8. Kwa ki ed bann Kretyen asire ki Zezi ti resisite?

⁷ Pour nou kapab annan lafwa dan rezireksyon, nou bezwen konvenki ki Zezi ti resisite. Akoz nou asire ki Zeova ti resisit Zezi?

⁸ I annan plizyer dimoun ki ti vwar Zezi apre ki i ti’n resisite e zot ti koz lo la avek lezot. (1 Kor. 15:5-7) Premye dimoun ki Pol i mansyonnen i zapot Pyer (Sefas). En group disip ti konfirmen ki Pyer ti’n vwar Zezi apre ki i ti’n resisite. (Lik 24:33, 34) Apre, Pol ti dir ki “sa 12 zapot” ti osi vwar Zezi apre ki i ti’n resisite. Apre sa, Kris “ti aparet avek plis ki 500 frer an menm tan,” petet sa ti ariv Galile pandan sa levennman ki ganny mansyonnen dan Matye 28:16-20. Zezi ti osi “aparet avek Zak” e i tre probab ki Zak ti son demi frer, ki oparavan pa ti’n krwar ki Zezi ti Mesi. (Zan 7:5) Apre ki Zak ti’n vwar Zezi, i ti konvenki ki Zezi ti Mesi. I enteresan pour note ki apepre lannen 55, ler Pol ti ekri son let, en kantite dimoun ki ti’n vwar Zezi apre ki i ti’n resisite ti ankor vivan. Alor okenn dimoun ki ti annan dout ki Zezi ti’n resisite ti’n kapab koz avek sa bann ki ti’n vwar Zezi.

9. Dapre Akt 9:3-5, ki levidans Pol ti donnen ki Zezi ti resisite?

⁹ Pli tar, Zezi ti aparet avek Pol. (1 Kor. 15:8) Pol (Sol) ti pe al Damas ler i ti tann lavwa Zezi, i ti ganny en vizyon e i ti vwar Zezi dan lesyel. (Lir Akt 9:3-5.) Leksperyans Pol i donn plis laprev ki Zezi ti vreman resisite.​—Akt 26:12-15.

10. Vi ki Pol ti konvenki ki Zezi ti’n resisite, ki sa ti motiv li pour fer?

¹⁰ Sa ki Pol ti dir konsernan Zezi ti pou enteres serten dimoun parski avan ki Zezi ti aparet avek Pol, Pol ti persekit bann Kretyen. Apre ki Pol ti’n konvenki ki Zezi ti’n resisite, Pol ti travay dir pour konvenk lezot osi. Anmezir ki Pol ti anonse ki Zezi ti’n mor e resisite, i ti ganny bate, ganny met dan prizon e eksperyans nofraz. (1 Kor. 15:9-11; 2 Kor. 11:23-27) Pol ti sitan asire ki Zezi ti’n ganny resisite ki i ti pare pour mor pour  defann son krwayans. Pa leksperyans bann Kretyen dan premye syek i konvenk ou ki Zezi ti vreman ganny resisite? Pa sa i osi ranforsi ou lafwa ki bann dimoun mor pou resisite?

11. Akoz serten dimoun dan lavil Korent pa ti krwar dan rezireksyon?

¹¹ Serten Kretyen ki ti reste Lagres dan lavil Korent, ti annan bann move lopinyon konsernan rezireksyon. Zot ti menm dir ki “bann mor pa pou ganny resisite.” Akoz zot ti dir sa? (1 Kor. 15:12) Bann filozof ki ti reste Atenn, en lot lavil Grek, ti vwar sa nide ki Zezi ti’n ganny resisite konman bet. I kapab ki serten dimoun Korent ti annan menm fason panse.(Akt 17:18, 31, 32) I kapab ki serten ti panse ki rezireksyon pa ti en keksoz ki vre. O kontrer, zot ti krwar ki dimoun ti ganny konsidere “mor” parski zot fer pese e ki ler en dimoun i vin en Kretyen i vin “vivan” parski son pese in ganny pardonnen. Nenport rezon akoz zot pa ti krwar dan rezireksyon, sa ti vedir ki zot lafwa ti anven. Si Bondye pa ti’n resisit Zezi, i ti pou napa okenn ranson ki ti pou’n ganny peye e i ti pou napa personn ki son pese ti pou ganny pardonnen. Alor, bann ki pa ti krwar dan rezireksyon ti napa en vre lespwar.​—1 Kor. 15:13-19; Ebr. 9:12, 14.

12. Anliny avek 1 Pyer 3:18, 22, ki mannyer rezireksyon Zezi i diferan avek lezot rezireksyon ki’n arive avan?

¹² Pol ti konn tre byen ki Kris ti’n ganny resisite. Rezireksyon Zezi ti pli siperyer ki bann lezot rezireksyon ki’n arive avan parski sa bann dimoun ki ti ganny resisite ti mor pli tar. Pol ti dir ki “parmi bann ki’n mor, Kris in ganny resisite premye.” Dan ki fason Zezi ti premye? Zezi ti premye dimoun pour ganny resisite konman en lespri e i ti premye parmi bann imen pour ganny resisite pour al dan lesyel.​—1 Kor. 15:20; Akt 26:23; lir 1 Pyer 3:18, 22.

13. Ki konparezon Pol ti fer ant Adan ek Zezi?

¹³ Ki mannyer lanmor en sel zonm i kapab donn lavi plizyer milyon dimoun? Pol ti donn en larepons ki fer sans. I ti fer konparezon ant sa ki ti arive avek bann imen akoz Adan e sa ki nou kapab gannyen atraver sakrifis Zezi. Konsernan Adan, Pol ti dir: “Lanmor in vin par en sel zonm.” Ler Adan ti fer pese, i ti anmenn maler lo son lekor ek son desandans. Nou ankor pe kontinyen soufer akoz son dezobeisans. Me vi ki Bondye in resisit son Garson, nou kapab annan en lavenir pli meyer. Pol ti dir: “Rezireksyon osi i vin par en sel zonm. Parski zis parey tou i mor dan Adan, tou pou revin vivan dan Kris.”​—1 Kor. 15:21, 22.

14. Eski Adan pou ganny resisite? Eksplike.

¹⁴ Ki Pol ti pe esey dir ler i ti dir “tou i mor dan Adan”? Pol ti pe koz lo bann imen. Zot tou zot in erit pese, zot enparfe e alor zot pou mor. (Rom. 5:12) Adan pa form parti bann ki “pou revin vivan.” Sakrifis Zezi pa aplik pour Adan parski Adan ti en zonm parfe ki ti swazir pour dezobei Bondye. Sa ki ti arive avek Adan i sanmenm ki pou arive avek bann ki “Garson zonm” pou ziz konman “kabri.” Sa i vedir ki zot pou “ganny lanmor eternel.”​—Mat. 25:31-33, 46; Ebr. 5:9.

15. Lekel ‘tou ki pou revin vivan’?

¹⁵ Remarke ki Pol ti dir ki “tou pou revin vivan dan Kris.” (1 Kor. 15:22) Sa  let ki Pol ti ekri ti pou bann Kretyen swazir dan lavil Korent ki ti pou ganny resisite pour al viv dan lesyel. Sa bann Kretyen ti’n “ganny sanktifye,” zot “ini avek Kris Zezi” e zot in “ganny swazir pour vin bann sen.” Pol ti osi mansyonn “bann disip Kris ki’n mor.” (1 Kor. 1:2; 15:18; 2 Kor. 5:17) Dan en lot liv Labib, Pol ti osi ekri ki bann ki’n “mor parey” Zezi pou “ganny resisite parey li e dan sa fason [zot] pou ini avek li.” (Rom. 6:3-5) Zezi ti ganny resisite konman en lespri e i ti al dan lesyel. Sanmenm ki pou arive avek tou bann ki “ini avek Kris,” setadir tou bann Kretyen swazir.

16. Ki Pol ti pe esey dir ler i ti dir ki “Kris in ganny resisite premye”?

¹⁶ Pol ti dir ki “parmi bann ki’n mor, Kris in ganny resisite premye.” Rapel ki i annan lezot dimoun ki ti ganny resisite lo later, tel parey Lazar me Zezi ti premye pour ganny resisite konman en lespri e pour ganny lavi eternel. Zezi i kapab ganny konpare avek bann premye fri rekolt ki bann Izraelit ti ofer Bondye. Lefet ki Pol ti dir ki Zezi ti ganny resisite premye, sa i vedir ki apre Zezi i ti pou annan lezot dimoun ki ti pou ganny resisite pour al viv dan lesyel. Avek letan bann zapot ek lezot ki “ini avek Kris” pou osi ganny resisite pour al viv dan lesyel, parey Zezi.

17. Kan ki bann ki “ini avek Kris” pou ganny resisite pour al dan lesyel?

¹⁷ Ler Pol ti ekri son let pour bann Kretyen Korent, bann Kretyen ki “ini avek Kris” pa ti ankor konmans ganny resisite pour al dan lesyel. Plito, Pol ti dir ki sa ti pou arive dan lavenir, “sakenn dan son prop lord: Kris premye, apre sa, sa bann ki pour Kris pandan ki Kris i la.” (1 Kor. 15:23; 1 Tesa. 4:15, 16) Ozordi, nou pe viv dan sa letan ki Labib ti predir ki “Kris i la.” Bann zapot ek lezot Kretyen swazir ki’n mor, ti bezwen espere ziska “Kris i la” pour zot kapab al dan lesyel e “ganny resisite parey li e dan sa fason [zot] pou ini avek li.”

18. (a) Akoz nou kapab dir ki i pou annan en lot rezireksyon apre rezireksyon bann Kretyen swazir? (b) Dapre 1 Korentyen 15:24-26, ki pou arive dan lesyel?

¹⁸ Me ki pou arive avek tou sa bann Kretyen fidel ki napa lespwar pour al viv dan lesyel ansanm avek Zezi? Zot osi  zot annan lespwar pour ganny resisite. Labib i dir ki Pol ek lezot ki al dan lesyel i “ganny sa premye rezireksyon.” (Fili. 3:11) Sa i montre ki i pou annan en lot rezireksyon apre sa enn. Sa i an armoni avek sa ki Zob ti dir konsernan son lavenir. (Zob 14:15) “Bann ki pour Kris pandan ki Kris i la” pou dan lesyel avek Zezi ler i detri tou bann gouvernman, lotorite ek pouvwar. Osi, “dernyen lennmi, lanmor, pou ganny detrir.” Tou bann ki resisite pour al dan lesyel pa pou zanmen mor. Me ki pou arive avek bann lezot Kretyen?​—Lir 1 Korentyen 15:24-26.

19. Ki pou arive avek bann ki annan lespwar pour viv lo later?

¹⁹ Ki pou arive avek bann ki annan lespwar pour viv lo later? Sa ki Pol ti dir i kapab donn zot lespwar: “Mon annan lespwar . . . ki dimoun bon konman move pou resisite.” (Akt 24:15, not) I kler ki bann dimoun ki move pa kapab al dan lesyel alor sa bann parol i montre ki a lavenir i pou annan en rezireksyon lo later.

20. Ki mannyer ou lespwar dan rezireksyon in vin pli for?

²⁰ Nou asire ki dimoun pou resisite! Bann ki pou ganny resisite pour viv lo later, i annan sa lespwar pour viv pour touzour lo later. Ou kapab asire ki sa promes pou vin vre. Sa lespwar i kapab rekonfort ou ler ou mazin bann dimoun ki ou kontan ki’n mor. Zot pou ganny resisite ler Kris ek bann Kretyen swazir pou dirize “konman lerwa . . . pour sa 1,000 an.” (Rev. 20:6) Ou osi ou kapab asire ki si ou mor avan Renny Mil an Kris i konmanse, ou pou ganny resisite. Sa “lespwar pa pou dezapwent nou.” (Rom. 5:5) I kapab ed ou reste for e fer ou zwaye anmezir ki ou pe servi Bondye. Parey nou pou vwar dan sa lartik ki swiv, i annan plis keksoz nou kapab aprann dan 1 Korentyen sapit 15.