1, 2. ¿Baqui bʌ jiñi utsʼatax bʌ pijtaya an i chaʼan jiñi i wiñicob Jehová?

WEN ñucʌch i cʼʌjñibal lac chaʼan cheʼ bʌ an chuqui mi lac pijtan chaʼan miʼ yujtel. Jumpʼejl ejemplo, an yomoʼ bʌ chaʼan tijicña miʼ yajñelob tiʼ ñujpuñijel, chaʼan cʼocʼ miʼ colel i yalobilob, o chaʼan miʼ cʼocʼañob ti jumpʼejl cʼamʌjel. Jiñʌch com bʌ la jaʼel jiñi xñoptʼañonbʌla. Pero jiñi pijtaya chaʼan mi lac chumtʌl tiʼ pejtelel ora yicʼot cheʼ mi lac chaʼ qʼuel miʼ tejchelob chʼojyel jiñi laj cʌñʌyoʼ bʌ jiñʌch ñumen ñuc bʌ i cʼʌjñibal lac chaʼan.

² Jiñi apóstol Pablo tsiʼ yʌlʌ: «Añʌch c pijtaya ti Dios [...] come tal i yorajlel cheʼ mi caj i chʼojyelob jini chʌmeñoʼ bʌ, jini tojoʼ bʌ yicʼot jini mach bʌ tojobic» (Hch. 24:15). Pero jiñi tsaʼ bʌ i ñaxan taja ti tʼan jiñi chaʼ chʼojyel jiñʌch Job come tsiʼ yʌlʌ chaʼan Dios mi caj i cʼajtesan yicʼot mi caj i chaʼ chʼojyesan (Job 14:7-10, 12-15).

3. ¿Bajcheʼ miʼ coltañonla cheʼ mi lac pejcan 1 Corintios capítulo 15?

³ Jiñi i chaʼ «chʼojyel chʌmeñoʼ bʌ» jiñʌch ‹i tejchibal laj cʌntesa› o «i cajibal i sujmlel» lac chaʼan (He. 6:1, 2). Iliyi tsiʼ ñumen taja ti tʼan Pablo yaʼ ti 1 Corintios capítulo 15. I miʼ mejlel la cʌl chaʼan tsaʼʌch i wen colta jiñi xñoptʼañob tsaʼ bʌ chumleyob ti ñaxam bʌ siglo, cheʼ jaʼel joñonla miʼ mejlel i coltañonla anquese añix cabʌl jab cajel lac pijtan jiñi chaʼ chʼojyel.

4. ¿Chuqui miʼ yʌqʼueñonla lac ñop chaʼan jiñi yambʌlob mucʼʌch caj i chaʼ chʼojyelob?

⁴ Cheʼ bʌ Jesús tsaʼ chaʼ chʼojyi tsiʼ yʌqʼueyonla lac pijtaya chaʼan mi caj i chaʼ chʼojyel jiñi laj cʌñʌyoʼ bʌ. Ili pijtaya «jiñʌch jini wen tʼan» jaʼel tsaʼ bʌ i sube Pablo jiñi corintiojob (1 Co. 15:1, 2). Tsiʼ yʌlʌ chaʼan mi maʼañic miʼ ñopob chaʼan Cristo tsaʼʌch chaʼ tejchi, maʼañobic i cʼʌjñibal jiñi i ñopoñel (1 Co. 15:17).  Come Jesús tsaʼʌch chaʼ chʼojyi, jiñʌch muʼ bʌ i yʌqʼueñonla lac ñop chaʼan jiñi yambʌlob mucʼʌch caj i chaʼ chʼojyelob jaʼel.

5, 6. ¿Chuqui i sujmlel chaʼañonla jiñi tʼan tac am bʌ ti 1 Corintios 15:3, 4?

⁵ Pablo an chuqui ñaxan uxchajp tsiʼ taja ti tʼan: «Tsaʼ chʌmi Cristo chaʼan lac mul», «tsaʼ mujqui» yicʼot «ti yuxpʼejlel qʼuin tsaʼ chaʼ chʼojyi cheʼ bajcheʼ mi yʌl tiʼ Tsʼijbujel Dios» (pejcan 1 Corintios 15:3, 4).

⁶ ¿Chuqui i sujmlel chaʼañonla cheʼ tsaʼ chʌmi Jesús, tsaʼ mujqui yicʼot chaʼ chʼojyi? Jiñi xʼaltʼan Isaías tsiʼ yʌlʌ chaʼan Jesús mi caj i «tsʌnsʌntel» yicʼot chaʼan mi caj i ‹mujquel cheʼ bajcheʼ xjontolil›. I tsiʼ bej alʌ chaʼan mi caj ‹i cuchbeñob i mul cabʌlob›. ¿Bajcheʼ tsiʼ mele Jesús iliyi? Jiñʌch cheʼ tsiʼ yʌcʼʌ i cuxtʌlel chaʼan miʼ coltañonla (Is. 53:8, 9, 12; Mt. 20:28; Ro. 5:8). Jin chaʼan, cheʼ tsaʼ chʌmi (sajti) Jesús, tsaʼ mujqui yicʼot chaʼ chʼojyi miʼ yʌqʼueñonla lac ñaʼtan chaʼan mi caj la cʌjqʼuel ti libre tiʼ pʼʌtʌlel jiñi mulil yicʼot jiñi chʌmel yicʼot chaʼan mi caj lac chaʼ qʼuel jiñi laj cʌñʌyoʼ bʌ tsaʼ bʌ chʌmiyob.

7, 8. ¿Chuqui miʼ coltañonla lac ñaʼtan chaʼan Jesús tsaʼʌch chaʼ chʼojyi?

⁷ Chaʼan an lac ñopoñel chaʼan jiñi chaʼ tejchel, yomʌch mi lac ñop chaʼan Jesús tsaʼʌch chaʼ tejchi. ¿Chucoch mucʼʌch mejlel lac ñop chaʼan Jehová tsaʼʌch i chaʼ aqʼue i cuxtʌlel Jesús?

⁸ Cabʌl wiñicob xʼixicob tsiʼ qʼueleyob Jesús cheʼ bʌ chaʼ tejchemix (1 Co. 15:5-7). Pablo tsiʼ yʌlʌ chaʼan jiñi ñaxam bʌ tsiʼ qʼuele chaʼan chaʼ tejchemix Jesús jiñʌch jiñi apóstol Pedro. An xcʌntʼañob tsaʼ bʌ i yʌlʌyob jaʼel chaʼan Pedro tsaʼʌch i qʼuele Jesús cheʼ bʌ chaʼ tejchemix (Lc. 24:33, 34). Cheʼ jaʼel, tsiʼ qʼueleyob jiñi 12 apóstolob. Ti wiʼil «tsaʼ tsictiyi tiʼ wut ñumen ti joʼcʼal i chaʼbajcʼ [500] hermanojob cheʼ temel añob», tajol yaʼ ti Galilea i muʼ bʌ i yʌl Mateo 28:16-20. Cheʼ jaʼel tsaʼ tsictiyi tiʼ wut Santiago, tajol jiñʌch i yijtsʼin Jesús, maʼañic bʌ tsiʼ ñaxan ñopo chaʼan Jesús jiñʌch jiñi Mesías (Jn. 7:5). Pero cheʼ bʌ tsiʼ qʼuele chaʼan tsaʼʌch chaʼ tejchi, tsiʼ ñopo chaʼan jiñʌch jiñi Mesías. Cheʼ bʌ Pablo tiʼ tsʼijbu ili carta, lʌcʼʌl ti jiñi jabil 55, an cabʌl cuxulobto bʌ tsaʼ bʌ i qʼueleyob Jesús cheʼ bʌ chaʼ tejchemix. Jin chaʼan, jiñi maʼañic bʌ miʼ ñopob chaʼan Jesús tsaʼʌch chaʼ chʼojyi miʼ mejlel i pejcañob jiñi tsaʼʌch bʌ i qʼueleyob.

9. Cheʼ bajcheʼ miʼ yʌl Hechos 9:3-5, ¿chuqui miʼ mejlel i taj ti tʼan jaʼel Pablo chaʼan miʼ yʌl chaʼan Jesús tsaʼʌch chaʼ tejchi?

⁹ Jesús tsaʼʌch i pʌsʌ i bʌ jaʼel tiʼ tojlel Pablo (1 Co. 15:8). Pablo, am bʌ i cʼabaʼ jaʼel bajcheʼ Saulo, woli (choncol) i majlel ti jiñi bij i chaʼan Damasco cheʼ bʌ tsiʼ yubibe i tʼan Jesús cheʼ bʌ chaʼ tejchemix yicʼot tsiʼ qʼuele cheʼ bʌ yaʼix an ti panchan (pejcan Hechos 9:3-5). Iliyi jiñʌch tsaʼ bʌ i pʌsʌ jaʼel chaʼan Jesús tsaʼʌch chaʼ tejchi (Hch. 26:12-15).

10. Cheʼ bʌ Pablo tsiʼ ñopo chaʼan Jesús tsaʼʌch chaʼ tejchi, ¿chuqui maʼañic tsiʼ bʌcʼña?

¹⁰ An wiñicob xʼixicob (quixtañujob) tsaʼʌch bʌ i yʌcʼʌyob ti toj sajtel i pusicʼal cheʼ bʌ Pablo tsiʼ yʌlʌ chaʼan tsiʼ qʼuele Jesús come ti ñaxan Pablo tsiʼ wen ticʼla jiñi xñoptʼañob. Pero cheʼ bʌ tsiʼ ñopo chaʼan Jesús tsaʼʌch chaʼ tejchi, tsiʼ chaʼle wersa i cʌntesañob jiñi yambʌlob chaʼan miʼ ñopob jaʼel. Cheʼ bʌ Pablo tsaʼ caji i sub chaʼan Jesús tsaʼʌch chaʼ tejchi tsaʼ wen jajtsʼi, tsaʼ otsʌnti ti cárcel yicʼot tsiʼ taja wocol tac cheʼ bʌ an ti barco (1 Co. 15:9-11; 2 Co. 11:23-27). Pablo yujil chaʼan Jesús tsaʼʌch chaʼ tejchi, jin chaʼan tsiʼ chaʼle wersa i sub i maʼañic tsiʼ bʌcʼña chʌmel. Ili tac miʼ pʌsbeñonla ili ora chaʼan Jesús tsaʼʌch chaʼ chʼojyi. I miʼ yʌqʼueñonla lac wen ñop chaʼan  mucʼʌch caj i chaʼ tejchelob jiñi tsaʼix bʌ chʌmiyob.

11. ¿Chucoch an xñoptʼañob yaʼ ti Corinto tsaʼ bʌ i ñopoyob mach bʌ i sujmic chaʼan jiñi chaʼ chʼojyel?

¹¹ Yaʼ ti tejclum Corinto, an xñoptʼañob tsaʼ bʌ i ñopoyob mach bʌ i sujmic chaʼan jiñi chaʼ chʼojyel, i cheʼto jaʼel tsiʼ yʌlʌyob chaʼan jiñi chʌmeñoʼ bʌ maʼañic miʼ cajelob ti chaʼ chʼojyel (1 Co. 15:12). ¿Chucoch? Come yaʼ ti tejclum Atenas, an filósofojob tsaʼ bʌ i chaʼleyob wajal chaʼan Jesús tsaʼ chaʼ tejchi, i tajol ili pensar tsiʼ toyoyob jiñi xñoptʼañob añoʼ bʌ ti Corinto (Hch. 17:18, 31, 32). Tajol an tsaʼ bʌ caji i qʼuelob jiñi chaʼ tejchel bajcheʼ jumpʼejl lajiya tʼan. Miʼ ñaʼtañob chaʼan lajal bajcheʼ chʌmeñobto cheʼ bʌ maxto xñoptʼañobic come xmulilobto, pero cheʼ bʌ tsaʼ sujtiyob ti xñoptʼañob, tsaʼ ñusʌbentiyob i mul i lajal bajcheʼ tsaʼ chaʼ chʼojyiyob. Maʼañobic i cʼʌjñibal i ñopoñel mi maʼañic miʼ ñopob jiñi chaʼ chʼojyel. Mi Dios maʼañic tsiʼ tejchesa chʼojyel Jesús, maʼañic tsaʼ tojle jiñi mulil yicʼot maʼañic tsaʼ ñusʌbentiyob i mul jiñi xñoptʼañob. Jin chaʼan, maʼañobic i sujm bʌ i pijtaya jiñi maʼañic bʌ miʼ ñopob jiñi chaʼ chʼojyel (1 Co. 15:13-19; He. 9:12, 14).

12. Cheʼ bajcheʼ miʼ yʌl 1 Pedro 3:18, 22, ¿chucoch qʼuexelʌch jiñi i chaʼ tejchel Jesús yicʼot i chaʼan yañoʼ bʌ?

¹² Pablo tsiʼ qʼuele chaʼan tsaʼʌch chaʼ «tejchi chʼojyel Cristo baʼan chʌmeñoʼ bʌ». Jiñi tsaʼ bʌ chaʼ chʼojyiyob cheʼ bʌ Jesús maxto chʌmeñic tsaʼʌch chaʼ chʌmiyob, jin chaʼan ñumen wen jiñi chaʼ chʼojyel i chaʼan Jesús. Pablo tsiʼ yʌlʌ chaʼan Jesús «jiñʌch ñaxan bʌ tsaʼ bʌ chʼojyi». ¿Chuqui yom i yʌl iliyi? Chaʼan jiñʌch jiñi ñaxam bʌ wiñic tsaʼ bʌ tejchi bajcheʼ espíritu yicʼot jiñi ñaxam bʌ tsaʼ bʌ majli ti panchan (1 Co. 15:20; Hch. 26:23; pejcan 1 Pedro 3:18, 22).

13. ¿Bajcheʼ tiʼ tsictesa Pablo chaʼan mach lajalic tsaʼ bʌ i mele Adán yicʼot tsaʼ bʌ i mele Jesús?

¹³ ¿Chucoch yonlel mi caj i chaʼ cuxtʌyelob come tsaʼ chʌmi juntiquil wiñic? Pablo tsiʼ yʌcʼʌ wem bʌ i jacʼbal. Tiʼ tsictesa chuqui ti wocol tsiʼ teche Adán yicʼot bajcheʼ tsiʼ coltayonla Cristo cheʼ bʌ tsiʼ yʌcʼʌ i bʌ ti chʌmel. Tsiʼ yʌlʌ chaʼan «tiʼ caj juntiquil winic [Adán] miʼ chʌmelob pejtelel winicob». Cheʼ bʌ Adán tsiʼ chaʼle mulil, lajal bajcheʼ tsiʼ bajñel tsʌnsa i bʌ yicʼot tsiʼ tsʌnsa jiñi i pʼolbalob. Ti ili ora, mi lac bej ñusan wocol tiʼ caj chaʼan tsiʼ ñusatʼan Adán. Pero an wem bʌ lac pijtaya come Dios tsiʼ chaʼ chʼojyesa jiñi i Yalobil. Pablo tsiʼ yʌlʌ: «Cheʼ jaʼel chaʼan tiʼ caj juntiquil winic [Jesús] miʼ tejchelob chʼojyel jini chʌmeñoʼ bʌ. Come cheʼ bajcheʼ miʼ chʌmelob pejtelel i pʼolbal Adán, cheʼ jaʼel mi caj i chaʼ cuxtʌyelob pejtelel añoʼ bʌ tiʼ Cristo» (1 Co. 15:21, 22).

14. ¿Bajcheʼ la cujil chaʼan Adán maʼañic mi caj i chaʼ cuxtʌyel?

¹⁴ ¿Majqui woliʼ taj ti tʼan Pablo cheʼ bʌ tsiʼ yʌlʌ chaʼan woliʼ «chʌmelob pejtelel i pʼolbal Adán»? Woli (yʌquel) i tajonla ti tʼan ti lac pejtelel come tsaʼ lac toybe i mul Adán yicʼot mi lac chʌmel (Ro. 5:12). Adán maʼañic ‹mi caj i chaʼ cuxtʌyel›. Maʼañic miʼ mejlel i coltan jiñi i cuxtʌlel tsaʼ bʌ i yʌcʼʌ Jesús come juntiquil toj bʌ wiñic cheʼ bʌ tsiʼ yilo ñusatʼan. Jiñi tsaʼ bʌ ujti tiʼ tojlel Adán jiñʌch muʼ bʌ caj i yujtel tiʼ tojlelob jiñi muʼ bʌ caj i yʌl jiñi «i Yalobil Winic» chaʼan lajalob bajcheʼ «chivo», yom bʌ i yʌl, chaʼan miʼ cajel i junyajl jisʌntelob (Mt. 25:31-33, 46; He. 5:9).

15. ¿Majqui woliʼ taj ti tʼan Pablo cheʼ bʌ tsiʼ yʌlʌ chaʼan «mi caj i chaʼ cuxtʌyelob pejtelel añoʼ bʌ tiʼ Cristo»?

¹⁵ Pablo tsiʼ yʌlʌ chaʼan «mi caj i chaʼ cuxtʌyelob pejtelel añoʼ bʌ tiʼ Cristo» (1 Co. 15:22). Pablo tiʼ tsʼijbube majlel jiñi carta jiñi xñoptʼañob añoʼ bʌ ti Corinto come yajcʌbilob yicʼot  yaʼ mi caj i chaʼ chʼojyelob ti panchan. Tsaʼ ‹pʌjyiyob chaʼan miʼ yochelob ti Cristo Jesús› yicʼot tsaʼ ‹ajqʼuiyob tiʼ wenta Dios›. Pablo tsiʼ taja ti tʼan jaʼel «jini chʌmeñoʼ bʌ tsaʼ bʌ i ñopoyob Cristo» (1 Co. 1:2; 15:18; 2 Co. 5:17). I ti jiñi yambʌ carta tiʼ tsʼijbu: «Mi temel tsaʼ chʌmiyonla yicʼot Cristo cheʼ bajcheʼ tsaʼ chʌmi, cheʼ jaʼel temel mi lac tejchel chʼojyel cheʼ bajcheʼ tsaʼ tejchi chʼojyel» (Ro. 6:3-5). Jesús tsaʼ chaʼ tejchi bajcheʼ juntiquil espíritu i tsaʼ majli ti panchan. Iliyi jiñʌch jiñi pijtaya añoʼ bʌ i chaʼan pejtelel jiñi muʼ bʌ i ‹ñopob Cristo›, yom bʌ i yʌl, pejtelel jiñi yajcʌbiloʼ bʌ.

16. ¿Chuqui yom i yʌqʼueñonla lac ñaʼtan Pablo cheʼ bʌ tsiʼ yʌlʌ chaʼan Jesús jiñʌch jiñi ñaxam bʌ tsaʼ bʌ tejchi?

¹⁶ Pablo tiʼ tsʼijbu chaʼan Cristo «jiñʌch ñaxan bʌ tsaʼ bʌ chʼojyi». Laʼ laj cʼajtesan chaʼan an quixtañujob, cheʼ bajcheʼ Lázaro, tsaʼ bʌ tejchiyob ila ti Lum, pero Jesús jiñʌch jiñi ñaxam bʌ tsaʼ bʌ tejchi bajcheʼ espíritu i tsaʼ aqʼuenti i cuxtʌlel mach bʌ añic miʼ jilel. Ili lajalʌch bajcheʼ jiñi ñaxam bʌ i wut i pʌcʼʌb jiñi israelitajob muʼ bʌ i yʌqʼueñob Dios. Cheʼ jaʼel, cheʼ bʌ Pablo tsiʼ yʌlʌ chaʼan Jesús jiñʌch jiñi ñaxam bʌ tsaʼ bʌ chʼojyi, miʼ yʌqʼueñonla lac ñaʼtan chaʼan añʌch yambʌ muʼ bʌ caj i chaʼ chʼojyelob chaʼan miʼ majlelob ti chumtʌl ti panchan. Ti wiʼil, pejtelel añoʼ bʌ ti Cristo, i yaʼ ochemob jaʼel jiñi apóstolob, mi caj i tejchelob chʼojyel chaʼan miʼ chumtʌlob ti panchan cheʼ bajcheʼ Jesús.

17. ¿Jala mi caj i yʌqʼuentelob i majtan ti panchan jiñi muʼ bʌ i ‹ñopob Cristo›?

¹⁷ Cheʼ bʌ Pablo tiʼ tsʼijbube jiñi añoʼ bʌ ti Corinto, maxto añic tejchem jiñi chaʼ chʼojyel chaʼan jiñi muʼ bʌ caj i majlelob ti panchan. Pablo tsiʼ yʌcʼʌ ti ñaʼtʌntel jala miʼ cajel iliyi. Tsiʼ yʌlʌ: «Jujuntiquil miʼ chaʼ tejchelob cheʼ bajcheʼ yom. Ñaxan tsaʼ chʼojyi Cristo, ti wiʼil miʼ chaʼ chʼojyel i chaʼañoʼ bʌ Cristo cheʼ miʼ chaʼ tilel [«miʼ pʌs i bʌ», TNM]» (1 Co. 15:23; 1 Ts. 4:15, 16). Cheʼ bajcheʼ tsaʼix laj qʼuele, jiñi apóstolob yicʼot jiñi yambʌ yajcʌbiloʼ bʌ yom miʼ pijtañob cheʼ baʼ ora miʼ pʌs i bʌ Cristo chaʼan miʼ yʌqʼuentelob jiñi i majtan ti panchan i cheʼ bajcheʼ jiñi, temel mi caj i yajñelob yicʼot Cristo cheʼ bʌ miʼ yʌqʼuentelob i bʌcʼtal cheʼ bajcheʼ Jesús. Ili ora wolix laj qʼuel chaʼan Cristo wolix i pʌs i bʌ.

18. a) ¿Bajcheʼ la cujil chaʼan mucʼʌch i cajel yambʌ chaʼ tejchel cheʼ bʌ tsaʼix laj tejchiyob jiñi muʼ bʌ caj i majlelob ti panchan? b) Cheʼ bajcheʼ miʼ yʌl 1 Corintios 15:24-26, ¿chuqui mi caj i yujtel ti panchan?

¹⁸ ¿Chuqui mi caj i yujtel tiʼ tojlelob jiñi xñoptʼañob mach bʌ añobic i pijtaya chaʼan  miʼ chumtʌlob ti panchan yicʼot Cristo? Añobʌch i pijtaya jaʼel chaʼan mucʼʌch caj i chaʼ tejchelob. Mucʼʌch lac ñop chaʼan cheʼʌch mi caj i yujtel come jiñi Biblia miʼ yʌl chaʼan Pablo yicʼot jiñi yañoʼ bʌ muʼ bʌ caj i majlelob ti panchan miʼ tajob i wenlel ti jiñi ñaxan tac bʌ chaʼ chʼojyel (Fil. 3:11). Ili miʼ yʌqʼueñonla lac ñaʼtan chaʼan miʼ cajel yambʌ chaʼ chʼojyel. I mucʼʌch i taj i bʌ yicʼot tsaʼ bʌ i yʌlʌ Job chaʼan muʼ bʌ i cajel ti talto bʌ qʼuin (Job 14:15). Jiñi «i chaʼañoʼ bʌ Cristo» mi caj i yajñelob ti panchan yicʼot Jesús cheʼ bʌ mi laj jisan pejtelel «yumʌntel yicʼot i pʼʌtʌlel pejtelel i contrajob». I cheʼ jaʼel, mi caj i jisan jiñi chʌmel, «jini cojix bʌ laj contra». Wen tsiquilʌch chaʼan jiñi muʼ bʌ caj i chaʼ tejchelob ti panchan, maʼañix miʼ cajelob ti chʌmel. ¿I chuqui mi caj i yujtel tiʼ tojlelob jiñi añoʼ bʌ i pijtaya ila ti Lum? (Pejcan 1 Corintios 15:24-26).

19. ¿Baqui bʌ i pijtaya an i chaʼan jiñi woli bʌ i pijtañob chumtʌl ila ti Lum?

¹⁹ Jiñi woli bʌ i pijtañob chumtʌl ila ti Lum, miʼ mejlel i yʌlob cheʼ bajcheʼ Pablo: «Añʌch c pijtaya ti Dios [...] come tal i yorajlel cheʼ mi caj i chʼojyelob jini chʌmeñoʼ bʌ, jini tojoʼ bʌ yicʼot jini mach bʌ tojobic» (Hch. 24:15). Ili tʼan tac miʼ yʌqʼueñonla lac ñaʼtan chaʼan mucʼʌch caj i yujtel chaʼ tejchel ila ti Lum come yaʼ ti panchan maʼañic miʼ mejlel i yochel juntiquil quixtañu mach bʌ tojic.

20. ¿Bajcheʼ tsiʼ coltayet ili estudio chaʼan jiñi pijtaya chaʼan chaʼ chʼojyel?

²⁰ Jin chaʼan mucʼʌch i cajel jiñi chaʼ tejchel. Jiñi muʼ bʌ caj i chaʼ aqʼuentelob i cuxtʌlel ila ti Lum mi caj i chumtʌlob tiʼ pejtelel ora. I mucʼʌch lac ñop chaʼan mucʼʌch caj i tsʼʌctiyel iliyi. Mi an juntiquil laj cʌñʌ bʌ tsaʼ bʌ chʌmi, miʼ ñuqʼuesan lac pusicʼal cheʼ bʌ mi caj i chaʼ tejchelob cheʼ baʼ ora Cristo yicʼot jiñi yajcʌbiloʼ bʌ miʼ chaʼleñob yumʌntel ti jiñi Mil jab (Ap. 20:6). Cheʼ jaʼel, mucʼʌch lac wen ñop chaʼan mucʼʌch caj lac chaʼ tejchel mi tsaʼ chʌmiyonla cheʼ bʌ maxto tejchi jiñi Mil jab. ‹Mach lolomic jach jiñi lac pijtaya›, miʼ coltañonla ili ora chaʼan tijicña mi lac melben i yeʼtel (troñel) Dios (Ro. 5:5). Ti jiñi yambʌ estudio, mi caj lac ñumen cʌn chuqui muʼ bʌ i yʌl 1 Corintios capítulo 15.