1-2. Nemene la mejiunene la itre hlue i Iehova?

 NYIPIEWEKË tro sa hetre mejiun. Ame itre xan, angatr a mejiune troa madrin ngöne la faipoipo maine troa hetre nekönatr, maine aloine pena la itre sine meci angatr. Maine jë, celë fe hi la hne së hna ajan. Ngo ame easë itre Keresiano, hetre itre xaa hne së hna mejiun kow. Easa mejiune troa hetreny la mele ka pë pun me iöhnyi hmaca memine la itre sinee së ka mec.

² Hnei Paulo aposetolo hna cinyihan ka hape: “Eni fe a mejiune koi Akötresie laka, tro kö Nyidrëti a amelene la itre atr ka meköt, me ka tha meköti kö.” (Itre hu. 24:15) Tha Paulo hmekuje kö la ka qaja la melehmaca. Hnei Iobu mina fe hna hane qaja lai. Xecie hnyawa koi Paulo laka, tha tro kö a thëthëhmi angeic hnei Akötresie, nge tro kö Nyidrëti a amele angeic hmaca.—Iobu 14:7-10, 12-15.

3. Troa xatua së tune kaa hnene la hna qaja hnei Paulo ngöne 1 Korinito mekene 15?

³ “Ame la melehmaca” tre, ketre ini ka “nyitrepene” la lapaune së. (Heb. 6:1, 2) Ame ngöne 1 Korinito mekene 15, Paulo a qejepengöne hnyawa la ini cili me ithuecatre kowe la itre pane Keresiano. Nge ketre tu së fe enehila, kola ithuecatre koi së. Ngacama ekö hë së ngöne la nyipici, ngo kolo palahi a acatrene la mejiune së hnene la itre trengewekë i Paulo.

4. Pine nemene matre xecie koi së laka, troa hetre melehmaca?

⁴ Xecie hnyawa koi së laka, jëne la melehmaca i Iesu, tro sa iöhnyi hmaca memine la itre sinee së ka mec. Celë hi ketre “maca ka loi” hna tro fë hnei Paulo koi angetre Korinito. (1 Kor. 15:1, 2) Öni Paulo, ame la Keresiano ka tha mejiune kö kowe la melehmaca, tre, ka gufa la lapaune i  angeic. (1 Kor. 15:17) Eje hi, melehmaca i Iesu la ka nyitrepene la mejiune së.

5-6. Nemene la hne së hna kapa qa ngöne la hna qaja hnei Paulo ngöne 1 Korinito 15:3, 4?

⁵ Ame la Paulo a qejepengöne la melehmaca, hnei angeic hna qaja la köni mekun ka tru. (1) “Hnei Keriso hna meci pine la itre ngazo së.” (2) Hna “kelemi nyidrë.” (3) “Hna amele nyidrëti hmaca tune lo hna Cinyihan.”—E jë la 1 Korinito 15:3, 4.

⁶ Nemene la hne së hna kapa qa ngöne la köni mekun celë? Hnei Isaia hna perofetan ka hape, tro ha “thupa tiji la [Mesia] qa ngöne la nöje ne la ite ka mel,” nge troa ‘hnëkëne la hua i nyidrë thene la itre ka ngazo.’ Öni Isaia ka hape, tro la Mesia a “ajöne la ngazo ne la ka ala nyimu.” Celë hi la hna kuca hnei Iesu, jëne la thupene mel. (Is. 53:8, 9, 12; Mat. 20:28; Rom. 5:8) Kola acatrene la mejiune së hnene la meci Iesu, me aqane kelemi nyidrë, me aqane amele nyidrëti hmaca. Kola amamane koi së laka, ijije hi troa thepe së qa ngöne la ngazo me mec. Nge ijije fe tro sa iöhnyi hmaca memine la itre sinee së ka mec.

7-8. Nemene la ka anyipicine kowe la itre Keresiano laka, hna amele Iesu hmaca?

⁷ Maine easa ajane troa catre mejiune kowe la melehmaca, nyipiewekë tro sa pane mejiune laka, hnei Iehova hna amele Iesu hmaca. Nemene la ka anyipicine lai?

⁸ Alanyimu la itre ka öhnyi Iesu thupene la kola amele nyidrëti hmaca. (1 Kor. 15:5-7) Hnei Paulo hna qaja ka hape, Peteru (Kepa) la ka pane öhnyi Iesu. Nge hna jelenyipicine lai hnei itre xan. (Luka 24:33, 34) Ketre, hnene la ala “Truelof” lao aposetolo hna öhnyi Iesu thupene la kola amele nyidrëti hmaca. Nge tune la hna qaja ngöne Mataio 28:16-20, hnei Keriso hna “mama kowe la ala 500 nge hetre munëne lao trejin” e Galilaia. Ketre, hnei Iesu hna “mama koi Iakobo” jini nyidrë, ngacama tha mejiune kö angeic laka, Iesu la Mesia. (Ioane 7:5) Ame hë e thupen, hnei Iakobo hna lapaune koi Iesu. Ame la Paulo a cinyihane la hnaaluene tusi angeic koi angetre Korinito ngöne la macatre 55 M.K. ke, mele palakö la itre ka öhnyi Iesu thupene lo kola amele nyidrëti hmaca. Celë hi matre, maine itre xan a luelu göne la melehmaca, ijije hi tro angatr a hnying kowe la itre ka öhnyi Iesu.

9. Thenge la Itre Huliwa 9:3-5, pine nemene matre xecie koi Paulo laka, melehmaca ha Iesu?

⁹ Thupene lai, hnei Iesu hna mama koi Paulo. (1 Kor. 15:8) Ame lo Paulo (Saulo) a tro Damaseko, hnei angeic hna dreng la aqane ithanata i Iesu me meköle goeëne la elolo i nyidrë. (E jë la Itre Huliwa 9:3-5.) Kolo hi lai a anyipicine laka, melehmaca ha Iesu.—Itre hu. 26:12-15.

10. Pine laka hnei Paulo hna mejiune kowe la melehmaca i Iesu, nemene la hnei angeic hna kuca?

¹⁰ Nyipici laka, hnei Paulo ekö hna qanangazone la itre pane Keresiano. Ngo ame e thupen, hnei angeic hna cainöj kowe la itre atr, nge nyimutre la itre ka drei angeic. Xecie hnyawa koi Paulo laka, hna amele Iesu hmaca, matre hnei angeic hna catre cainöjëne la nyipici cili. Ngo nyimutre la itre jol hna cile kow hnei Paulo. Hna lepi angeic me akalabusi angeic, nge hna anyimua lö la he e kuhu hnagejë. (1 Kor. 15:9-11; 2 Kor. 11:23-27) Ame pe, atre hi Paulo laka, hna amele Iesu hmaca. Celë hi matre, tha hnei angeice kö hna xou troa mec me cilëgöline la nyipici. Hapeu, easë kö a mejiun tune la itre pane  Keresiano laka, hna amele Iesu hmaca? Kolo kö lai a acatrene la mejiune së kowe la melehmaca?

11. Pine nemene matre itre xaa Keresiano a mejiune kowe la itre ini ka thoi göne la melehmaca?

¹¹ Ame la itre xaa Keresiano ne Korinito, tre, hnei angatre hna mejiune kowe la itre ini ka thoi göne la melehmaca. Öni angatre fe, “pëkö melehmaca.” Pine nemen? (1 Kor. 15:12) Pine laka hnene la itre ka inamacan e Athenai hna hnyima fë la ini göne la melehmaca i Iesu. E cili, hnei angetre Korinito hna mejiune kowe la itre ini ka thoi. (Itre hu. 17:18, 31, 32) Ame koi itre xan, ka “meci” la atr ka kuca la ngazo. Ngo maine tro angeic a kapa la hmi Keresiano, tro ha “amele” angeic hmaca me nue la itre ngazo i angeic. Ame pe, maine tha mejiune kö ketre kowe la melehmaca ke, kolo lai a hape, tha mejiune kö angeic kowe la melehmaca i Iesu. E cili, ka gufa la lapaune i angeic. Eje hi, maine tha amele Iesu ju hnei Akötresie ke, pëkö thupene mel, matre thatreine kö troa nue la ngazo ne la itre atr. Celë hi matre, ame la itre atr ka tha kapa kö la ini göi melehmaca ke, pëkö mejiune i angatr.—1 Kor. 15:13-19; Heb. 9:12, 14.

12. Thenge la 1 Peteru 3:18 me 22, pine nemene matre sisitria catre kö la melehmaca i Iesu?

¹² Atre hnyawa hi Paulo laka, “ase hë amele Keriso hmaca qa hna mec.” Sisitria catre kö la melehmaca i Iesu hune la itre hna amelene hmaca nge ka meci e thupen. Öni Paulo, Iesu la “pane wene ne la itre ka meköl ngöne la mec.” Haawe, Iesu la pane atr hna amelene hmaca nge ketre u hë nyidrëti e hnengödrai.—1 Kor. 15:20; Itre hu. 26:23; e jë la 1 Peteru 3:18, 22.

13. Nemene la hnei Paulo hna qaja göi Adramu me Iesu?

¹³ Tune kaa la aqane tro la meci ne la ala caasi a amelene la nöjei atr? Hnei Paulo hna sa la hnyinge celë. Hnei angeic hna qaja la itre ethane la ngazo i Adramu memine la itre eloine la meci Keriso. Öni Paulo göi Adramu: “Hna xulu la mec qaathene la trahmany.” Pine la ngazo i Adramu, akötr me hleuhleu la pun koi angeic me itre matra i angeic, nge uti hë enehila. Eloine pe, hnei Iehova hna amelene hmaca la Nekö i Nyidrë. Xecie koi së laka, tro sa hane mele madrin elany! Eje hi, “kola traqa la iamele jëne la trahmany,” ene Iesu. Öni Paulo mina fe: “Kola meci la nöjei atr asë hnei Adramu, nge tune fe, jëne Keriso, tro ha mele la nöjei atr.”—1 Kor. 15:21, 22.

14. Hapeu, tro kö a amele Adramu hmaca? Qejepengöne jë.

¹⁴ Nemene la aliene la hna hape, “kola meci la nöjei atr asë hnei Adramu”? Paulo a qaja la itre matra i Adramu. Pine laka, hnei Adramu hna tha idrei, matre itre atr ka ngazo hë la itre matra i angeic, nge meci la pun koi angatr. (Rom. 5:12) Celë hi matre, tha tro kö a “amele [Adramu] hmaca” elany. Ngacama ketre atr ka pexeje angeic ekö, ngo tha hnei angeice kö hna drengethenge Akötresie. Celë hi matre, caasi la pune koi Adramu memine la itre hna amekötin hnene la “Nekö i Atr” ka hape, itre “nani.” Ame Adramu, angeic a “tro kowe la meci ka epine palua.”—Mat. 25:31-33, 46; Heb. 5:9.

15. Drei la hna qaja hnei Paulo ngöne la angeice a hape, “tro ha mele la nöjei atr”?

¹⁵ Hnei Paulo mina fe hna qaja ka hape, “jëne Keriso, tro ha mele la nöjei atr.” (1 Kor. 15:22) Paulo e celë a ithanata kowe la itre Keresiano hna iën e Korinito,  itre hna troa amelen e hnengödrai. Angatr la “itre hna ahmitrötrën me ka casi me Iesu Keriso, itre hna ce iëne troa hmitrötr.” Nge hnei Paulo hna qaja la “itre Keresiano ka meci hë.” (1 Kor. 1:2; 15:18; 2 Kor. 5:17) Ame ngöne la ketre tus, hnei Paulo hna qaja ka hape, tro la itre ka “meci tui [Iesu]” a “hane melehmaca tui nyidrë.” (Rom. 6:3-5) Eje hi, hna amele Iesu hmaca nge ketre u hë nyidrëti e hnengödrai. Celë hi lai ka troa traqa elany kowe la itre ka “casi me Keriso,” ene la itre Keresiano hna iën.

16. Nemene la aliene la Paulo a qaja ka hape, Iesu la “pane wene”?

¹⁶ Hnei Paulo hna cinyihan ka hape, hna amele Keriso hmaca qa hna mec, nge nyidrëti la “pane wene ne la itre ka meköl ngöne la mec.” Nyipici laka, hna amelene hmaca la itre xan e celë fen tui Lazaro. Ngo ame Iesu, nyidrëti hi la hna pane amelene matre troa mele palua e hnengödrai. Celë hi matre, ijije hi troa aceitunë Iesu me itre pane wene sinöe hna huujëne hnei angetre Isaraela koi Akötresie. Ketre, ame la Paulo a qaja ka hape, Iesu la “pane wene,” angeice hi lai a amamane laka, hetre itre xane thupei nyidrë hna troa amelen e hnengödrai. Celë hi lai ka traqa koi itretre aposetolo me itre xan ka “casi me Keriso.”

17. Eu la ijine tro la itre ka “casi me Keriso” a kapa la edrö i angatr e hnengödrai?

¹⁷ Ame ngöne la Paulo a cinyanyi koi angetre Korinito, tha hna amelene palakö la itre ka “casi me Keriso.” Ngo hnei angeice hna qaja ka hape, troa traqa lai e thupen. Öni angeic: “Hane hi la aqane trongen: Keriso la hna pane amelen, nge thupene lai, tro ha amelene la itre atre i nyidrë ngöne la ijine laka, celë hë nyidrë.” (1 Kor. 15:23; 1 Thes. 4:15, 16) Eje hi, easa melëne “la ijine laka, celë hë” Keriso. Celë hi matre, ame la itre aposetolo me itre hna iën ka mec qëmekene la ijine cili, tha angatre kö a canga kapa la edrö i angatr e hnengödrai. Angatre pe a treqen qëmekene troa “amele angatr hmaca tui [Iesu].”

18. (a) Nemene la ka amamane laka, hetre ketre melehmaca? (b) Thenge la 1 Korinito 15:24-26, nemene la ka troa traqa thupene la melehmaca ne la itre hna iën?

¹⁸ Tune kaa la itre Keresiano ka tha mejiune kö troa mel e koho hnengödrai? Angatre fe a hane mejiune kowe la melehmaca. Kola qaja hnei Tusi Hmitrötr ka  hape, ame la itre ka troa mel e koho hnengödrai, tro angatr a “sine la pane mele hmaca.” (Fil. 3:11) Kolo hi lai a hape, hetre ketre melehmaca. Nge celë hi lai hna qaja hnei Iobu. (Iobu 14:15) Ketre, ame la “itre atre i [Keriso] ngöne la ijine laka, celë hë nyidrë,” tro angatr a ceme Iesu a hnengödrai, ngöne la nyidrëti a troa lepe apatrene la itre mus me trene mus. Nge tro ha apatrene “la mec, lo ithupëjia tixenuë.” Eje hi, ame la itre hna troa amelene hmaca e hnengödrai ke, tha tro hmaca kö angatr a mec. Ngo tune kaa la itre xan?—E jë la 1 Korinito 15:24-26.

19. Nemene la hna lapa treqene hnene la itre ka mejiune troa mel e celë fen?

¹⁹ Nge tune kaa la itre ka mejiune troa mel e celë fen? Öni Paulo: “Eni a mejiune . . . laka, tro kö nyidrëti a amelene la itre atr ka meköt, me ka tha meköti kö.” (Itre hu. 24:15) Nyipici laka, tha ijije kö tro la itre atr ka tha meköti kö a elë e koho hnengödrai. Ngo kola mama hnyawa jëne la itre trengewekë i Paulo laka, hetre melehmaca e celë fen.

20. Tune kaa la aqane acatrene la mejiune së hnene la tane mekun celë? Qejepengöne jë.

²⁰ Eje hi, “tro kö a hetre melehmaca”! Ame la itre hna troa amelen e celë fen ke, tro angatr a mel epine palua. Loi e tro sa catre mejiune kowe la hna thingehnaean celë ke, kola akeukawanyi së, e traqa ju meci la ketre sinee së. Atre hi së laka, troa amele angeice hmaca ngöne la “1 000 lao macatre” ne musi Keriso memine la ala 144 000. (Hna ama. 20:6) Nge maine tro sa mec qëmekene troa musi hnei Iesu, tro kö nyidrëti a amele së hmaca. Eje hi, “xecie hë koi së la mejiune cili.” (Rom. 5:5) Drei la ketre manathithi ka tru ka amadrinë së me xatua së troa catre huliwa i Akötresie! Tune la hne së hna troa ce wang ngöne la ketre tane mekun, hetre itre xaa ini nyine tro palakö sa xom qa ngöne la tusi 1 Korinito 15.