1-2. Sowtu howpu den sama di e dini Yehofa abi?

HOWPU a wan pelensipali sani. Son sama e howpu taki den osulibi waka bun, taawan e howpu taki sani go bun anga den pikin fu den. Sama di siki e howpu taki den o betee. Useefi wani den sani ya tu. Ma a sani di moo pelensipali gi u, a den sani di Yehofa paamisi u. A paamisi u taki wi o libi fu teego. A paamisi u tu taki den sama fu u di dede o weki baka.

² Apostel Pawlesi be taki: ‘Mi e biibi taki Gadu o weki den dedesama baka, den sama di be libi a wan letifasi anga den sama di á be libi a wan letifasi’ (Toli 24:15). A ná Pawlesi a be a fosi sama di taki fu a weki di Gadu o weki dedesama baka. A osufamii edeman Yopu seefi be e biibi taki di a be o dede, Gadu be o weki en baka di a yuu be o doo.​—Yopu 14:7-10, 12-15.

3. Sowtu wini wi o fende te wi e leisi 1 Korentesama kapitel 15?

³ A weki di den sama di dede o weki baka, a wan fu den moo pelensipali leli di Kelesten e biibi (Heb. 6:1, 2). Pawlesi e taki fu a toli ya a 1 Korentesama kapitel 15. Den sani di a sikiifi be musu taanga a biibi fu den fosi Kelesten. Winsi yu e biibi kaba taki Gadu o weki den sama di dede baka, toku den sani di Pawlesi taki o moo taanga a biibi fi i.

4. San o yeepi u fu biibi taki den sama fu u di dede o weki baka?

⁴ Pawlesi be taigi den Korentesama taki den be mu biibi taki Yesesi weki baka (1 Kor. 15:1, 2). A taigi den tu taki  efu wan Kelesten nai biibi taki Yesesi weki baka, da a fu soso ai dini Yehofa (1 Kor. 15:17). Bika na a biibi di wan sama e biibi taki Yesesi weki baka o meke a biibi taki Gadu o weki den taa sama di dede tu.

5-6. Enke fa 1 Korentesama 15:3, 4 e soi, da sowtu wini wi e fende fu a dede fu Yesesi?

⁵ Di Pawlesi bigin taki, a kai dii sani di e soi saide u sa biibi taki Gadu o weki den sama fu u di dede. A fosiwan, ‘Kelestesi dede fu pai gi den sondu fu u.’ Du fu tu, ‘den be beli en.’ Du fu dii, ‘baka dii dei Gadu weki en baka enke fa a sikiifi aini Gadu buku.’​—Leisi 1 Korentesama 15:3, 4.

⁶ Saide a pelensipali fu fusutan den dii sani ya? Fosi Yesesi kon a goontapu, polofeiti Yesaya be taki den be o ‘kii a Mesiyas’, da den be o beli en ‘a pe den e beli ogiiman’. Ma wan taa sani be o pasa tu. Yesaya taki a Mesiyas be o ‘tyai den sondu fu tyaipi sama’. Yesesi du a sani ya di a dede gi u fu u sa fende paadon fu sondu (Yes. 53:8, 9, 12; Mat. 20:28; Rom. 5:8). Neen meke a dede di Yesesi dede gi wi o meke u fii u fu sondu. Wi abi a howpu tu fu si den sama fu u di dede baka.

7-8. San e yeepi Kelesten fu biibi taki Yesesi weki baka tuu?

⁷ Enke fa u be luku kaba, da efu u nai biibi taki Yesesi weki baka, u ná o poi biibi taki taa sama o weki baka tu. Saide u sa biibi taki Yehofa weki Yesesi baka?

⁸ A omen sama be si Yesesi di a weki baka (1 Kor. 15:5-7). Wan fu den fosi sama di Pawlesi taki si Yesesi, a Peitilisi (Seifas). Wantu taa bakaman fu Yesesi seefi be piki taki Peitilisi si Yesesi tuu (Luk. 24:33, 34). Pawlesi taki den twalufu apostel be si Yesesi baka di a weki. ‘Bakaten a meke moo enke 500 baala di be de makandii si en tu.’ Kande a fu a sani ya Mateyesi be e taki a Mateyesi 28:16-20. Yakowbesi, a afu baala fu Yesesi di á be e biibi taki Yesesi na Mesiyas, be si en tu (Yoh. 7:5). Baka di Yakowbesi si taki Yesesi weki baka, a bigin biibi taki neen a be a Mesiyas tuu. A pisiten fu a yali 55, di Pawlesi be e sikiifi den sani ya, omen fu den sama di be si Yesesi be de a libi ete. Neen meke den sama di á be e biibi taki Yesesi weki baka, be sa taki anga wan fu den sama di be si Yesesi libilibi.

9. Enke fa Toli fu den apostel 9:3-5 e soi, da fa Pawlesi be du sabi taki Yesesi weki baka?

⁹ Bakaten, Pawlesi seefi si Yesesi (1 Kor. 15:8). Pawlesi (Sawlesi) be de a pasi e go a Damaskus di a yee Yesesi e taki anga en. Di a opo en ede luku neen a si wan fisyun fu Yesesi aini hemel. (Leisi Toli fu den apostel 9:3-5.) A toli fu Pawlesi ya e soi kiin taki Yesesi weki baka tuu.​—Toli 26:12-15.

10. San Pawlesi du baka di a kon si kiin taki Yesesi weki baka?

¹⁰ A omen sama be wani sabi san Pawlesi e denki fu a toli ya, bika fosi a be toon wan Kelesten a be e du ogii anga den bakaman fu Kelestesi. Baka di Pawlesi si kiin taki Yesesi weki baka, a du ala san a be poi fu taigi taa sama den sani di ai biibi. Ná pikin sani be e miti Pawlesi te a be e paati a nyunsu taki Yesesi weki baka. Sama be e fon mi en, a omen leisi den sooto en, a omen leisi a be de fu dede a wataa tu (1 Kor. 15:9-11; 2 Kor. 11:23-27). Pawlesi be e biibi anga en hii ati  taki Yesesi weki baka, neen meke a be wani taigi ala sama a sani ya, winsi a be sa dede seefi. Den toli fu sama di be si Yesesi di a weki baka e taanga u biibi. Den e yeepi u fu biibi taki Yehofa o weki den sama fu u di dede baka.

11. Saide son sama aini Korente á be e biibi taki den sama di dede o weki baka?

¹¹ Korente anga Ateine a be tu foto aini Giikikondee. Son sama aini Korente á be e biibi taki ‘dedesama o weki baka’. Saide? (1 Kor. 15:12) Wantu koniman aini Ateine be e soso den sama di e biibi taki Yesesi be weki baka. Kande na a sani ya meke son sama aini Korente be e denki so tu (Toli 17:18, 31, 32). Ma i be abi sama tu di be e denki taki sama á be o weki baka tuutuu. Den be e biibi taki te wan sama toon Kelesten da ai fende paadon fu den sondu fi en, leti enke a kon a libi baka. Ma efu den sama ya á be e biibi taki Yesesi be weki baka, da a fu soso den be e dini Gadu. Bika efu Gadu á be weki Yesesi baka, da a á be o poi gi u paadon fu den sondu fu u. Den sama di á be e biibi a sani ya, á be abi howpu gi a ten di e kon.​—1 Kor. 15:13-19; Heb. 9:12, 14.

12. Enke fa 1 Peitilisi 3:18, 22 e soi, da saide a weki di Yesesi be weki baka á be de aseefi enke a weki Gadu be weki taa sama baka?

¹² Pawlesi be sabi taki ‘Kelestesi kon a libi baka tuu’. Fosi Yesesi kon a goontapu, Gadu be weki wantu sama di be dede, ma bakaten den sama ya be dede baka. Ma Yesesi á be o dede noiti moo. Pawlesi taki: ‘Fu den sama di dede neen na a fosiwan di kon a libi baka.’ San a sani ya wani taki? A Yesesi a be a fosi libisama di weki baka fu go a hemel enke wan yeye.​—1 Kor. 15:20; Toli 26:23; leisi 1 Peitilisi 3:18, 22.

13. San Pawlesi taki fu Adan anga Yesesi?

¹³ Fa a dede fu wan kodo sama sa meke miliyunmiliyun sama kon a libi baka? Pawlesi taki: ‘A wan sama meke dede kon a goontapu.’ Di Adan sondu, a tyai dede gi enseefi anga ala den bakapikin fi en. Te anga a dei fu tide wi e pina fu di Adan taanga-yesi Gadu. Ma a weki di Gadu weki en Manpikin baka, opo a pasi gi u fu fende a libi di Adan lasi. Pawlesi taki: ‘A wan sama o meke dedesama weki baka. Leti enke fa Adan meke ala sama e dede, a so Yesesi o meke ala den sama di dede kon a libi baka.’​—1 Kor. 15:21, 22.

14. Saide Adan ná o weki baka?

¹⁴ San Pawlesi be wani taki di a taki ‘Adan meke ala sama e dede’? We, ala den bakapikin fu Adan meke anga a sondu di Adan fika gi den, neen meke denseefi o dede leti enke en (Rom. 5:12). Adan á be abi sondu, a fu seefi a be taangayesi Gadu. Neen meke a ná o ‘kon a libi baka’, bika a sama di meke anga sondu Yesesi kon dede gi. Na aseefi sani di pasa anga Adan o pasa anga den sama di ‘a Manpikin fu libisama’ o kuutu enke kaabita. Den ‘o dede fu teego’.​—Mat. 25:31-33, 46; Heb. 5:9.

15. Sama na ‘ala den sama di dede’ di o weki baka?

¹⁵ Pawlesi taki aini a biifi fi en taki ‘Kelestesi o meke ala den sama di dede kon a libi baka’ (1 Kor. 15:22). Den sama di Pawlesi sikiifi a biifi ya gi, a be salufu Kelesten di be abi a howpu fu go a hemel. Pawlesi taki: ‘Gadu meke u santa.  Nownow wi anga Kelestesi Yesesi a wan.’ Pawlesi taki tu fu wantu sama di dede enke ‘bakaman fu Kelestesi’ (1 Kor. 1:2; 15:18; 2 Kor. 5:17). Pawlesi be taki aini wan taa biifi taki den sama di ‘dede enke Yesesi, o weki baka enke en tu’ (Rom. 6:3-5). Yesesi be weki baka enke wan yeye neen a go a hemel. Neen meke ala den bakaman fi en di abi a howpu fu go a hemel o weki enke wan yeye a hemel tu.

16. San Pawlesi be wani taki di a taki Yesesi na a ‘fosiwan di kon a libi baka’?

¹⁶ Pawlesi taki ‘a Kelestesi na a fosiwan’ fu ala den sama di kon a libi baka. U sabi taki a ná Yesesi a be a fosi sama di Gadu weki baka a goontapu ya, taa sama be de neen fesi. Lasalesi a be wan fu den sama ya. Ma a Yesesi a be a fosi sama di be kon a libi baka enke wan yeye di á be o dede noiti moo. Yesesi de enke den fosi goon nyanyan di den Islayelisama be e gi Gadu. Pawlesi taki Yesesi a be a fosi sama di weki baka fu go a hemel. Dati wani taki taa sama be o fende a gaandi ya tu. Den sama ya a den apostel anga den taa salufu Kelesten. Di a yuu be o doo, denseefi be o weki baka enke yeye a hemel.

17. On ten den salufu Kelesten bigin go a hemel?

¹⁷ A ten di Pawlesi be e sikiifi a biifi ya gi den Kelesten fu Korente, den salufu Kelesten á be bigin go a hemel ete. Pawlesi be e taki fu wan sani di be mu pasa ete. A be taki: ‘Ibii sama o kon a libi baka te en yuu doo. Kelestesi fosi weki baka. Baka dati den sama di de fu Kelestesi o weki te a daai kon baka’ (1 Kor. 15:23; 1 Tes. 4:15, 16). Nownow wi e libi na a ten di ‘Kelestesi daai kon baka’. Den apostel anga den taa salufu Kelesten be mu wakiti te enke a yuu ya doo fosi Gadu be weki den baka.

18. (a) San e soi taki wan taa kulu sama o weki baka, boiti den salufu Kelesten? (b) Enke fa 1 Korentesama 15:24-26 e soi, da san o pasa a hemel?

¹⁸ Fa fu den Kelesten di na abi a howpu fu go a hemel? We denseefi abi a howpu fu weki baka. Beibel taki Pawlesi anga den taa salufu Kelesten di dede, a den fosi sama di weki baka (Filip. 3:11). A sani ya e soi taki wan taa kulu sama be o weki tu. Na a sani ya Yopu be e biibi (Yopu 14:15). Ala den salufu Kelesten o  de a hemel kaba anga Yesesi te a o puu ala den tiiman fu a goontapu ya. Den o puu dede tu, a ‘lasiti feyanti fu u’. Nawan fu den sama di weki baka fu go a hemel o dede moo. Ma fa sani o waka anga den taa sama?​—Leisi 1 Korentesama 15:24-26.

19. Sowtu howpu den sama di ná o go a hemel abi?

¹⁹ Sowtu howpu den sama di o libi a goontapu abi? Pawlesi be taki: ‘Miseefi e biibi taki Gadu o weki den dedesama baka, den sama di be libi a wan letifasi anga den sama di á be libi a wan letifasi’ (Toli 24:15). U sabi taki sama di á be libi a wan letifasi á poi go a hemel, neen meke u sa biibi taki a sani di a tekisi e taki a goontapu ya a o pasa.

20. Fa a artikel ya yeepi i fi i biibi kon moo taanga?

²⁰ A ná abi misi, ‘den sama di dede o weki baka’! Den sama ya o abi a howpu fu libi fu teego a goontapu. I sa biibi taki a sani ya o pasa tuu. A sani ya e toosutu u, te u pakisei den sama fu u di dede. Den sama ya o weki baka te Yesesi anga den sama di o tii makandaa anga en o tii a goontapu ya 1000 yali langa (Openb. 20:6). I sa biibi taki efi i dede fosi Yesesi bigin tii, yu o weki baka. A sani ya o pasa tuutuu (Rom. 5:5). A howpu ya e taanga u biibi. Ai yeepi u fu dini Yehofa anga piisii. Ma a omen sani u sa leli ete aini 1 Korentesama 15. Wi o luku den sani ya aini a taa artikel.