1-2. Jehova sagokɛlaw be ni jigiya ɲuman juman lo ye?

JIGIYA kɔrɔtanin lo kosɔbɛ. Dɔw jigi b’a la ka ninsɔndiya sɔrɔ u ka furu kɔnɔ, ka deenw sɔrɔ minw ka kɛnɛ wala olu yɛrɛ ka kɛnɛya ka bɔ bana jugu dɔ la. An minw ye kerecɛnw ye, n’a sɔrɔ an fana jigi b’a la k’o fɛɛnw sɔrɔ. Nka, an jigi be fɛɛn dɔw la minw nafa ka bon ka tɛmɛ olu kan. An jigi b’a la ka ɲɛnamaya banbali kɛ ani an ka mɔgɔ kanulen minw sara, k’olu ye tugun.

² Ciden Pol ko: “Ne jigi dalen bɛ Ala kan . . . ko mɔgɔw bɛɛ suw na kunun, mɔgɔ tilennenw ni mɔgɔ tilenbaliw bɛɛ.” (Kɛw. 24:15, Bible senuma). Pol ma kɛ mɔgɔ fɔlɔ ye ka kuma sukununi jigiya koo la. Zɔbu fana kumana sukununi koo la. A tun lanin b’a la ko Ala bena a hakili to ale la ani k’a suu kunu.—Zɔbu 14:7-10, 12-15.

3. Mun na Korɛntikaw fɔlɔ sapitiri 15nan kɔnɔna kumaw be se k’an nafa?

³ “Suuw kununko” ye kerecɛnw ka lannako jɔnjɔn dɔ ye (Eburuw 6:1, 2). Pol ye min fɔ sukununi koo la, o be sɔrɔ Korɛntikaw fɔlɔ sapitiri 15nan kɔnɔ. A ye min sɛbɛ, siga t’a la o ye kerecɛn fɔlɔw jija. An lanin lo sukununi koo la a mɛɛnna wo, a ma mɛɛn wo, Pol ye min sɛbɛ Korɛntikaw fɔlɔ sapitiri 15nan kɔnɔ, o be se k’an jija ani k’a to an be la a la kosɔbɛ ko sukununi bena kɛ.

4. Mun na an be se ka la a la ko an ka mɔgɔ kanulen minw sara, u bena kunu?

⁴ Yezu suu kununa minkɛ, o b’a to an lanin b’a la ko an ka mɔgɔ kanulen minw sara, u suu bena kunu. O ye “kibaru diman” dɔ ye Pol ye min fɔ Korɛntikaw ye (1 Kor. 15:1, 2). Pol yɛrɛ y’a fɔ ko kerecɛn min lanin tɛ sukununi koo la, o tigi ka  limaniya kɛra fuu ye (1 Kor. 15:17). Yezu suu kununa minkɛ, o b’a to an lanin b’a la ko mɔgɔ wɛrɛw suu bena kunu.

5-6. Min fɔra 1 Korɛntikaw 15:3, 4 kɔnɔ, o ɲɛsinna an ma cogo di?

⁵ Pol ka kumaw daminɛ na, a ye tiɲɛnko saba dɔw bɔ kɛnɛ kan: 1) “Krista sara an ka hakɛw kosɔn.” 2) “U y’a suu don.” 3) “A tile sabanan loon, a kununna, ka kɛɲɛ ni Ala ka kuma ye.”—1 Korɛntikaw 15:3, 4 kalan.

⁶ Yezu sara, u y’a suu don ani a kununa. O koow ɲɛsinna an ma cogo di? Kira Ezayi tun kɔnna k’a fɔ ko u bena Masiya “niin bɔ diɲɛ mɔgɔw la” ani ko u bena a “suu don ni mɔgɔjuguw ye.” Nka koo wɛrɛ tun bena kɛ fana. Ezayi tun y’a fɔ fana ko Masiya tun bena “jama ka kojugu” ɲun a kuun na. Yezu y’o kɛ tuma min na a y’a niin di k’a kɛ kunmabɔsara ye (Ezayi 53:8, 9, 12; Mat. 20:28; Ɔrɔm. 5:8). Yezu saya, a sutarali ani a sukununi ye dalilu barikamanw ye. O b’a to an jigi b’a la ka hɔɔrɔnya ka bɔ jurumu ni saya la ani an ka mɔgɔ kanulen minw sara, k’olu ye tugun.

7-8. Mun lo y’a to kerecɛnw lanin b’a la ko Yezu suu kununa?

⁷ Walisa ka la a la ko sukununi bena kɛ, fɔɔ an ka la a la fɔlɔ ko Yezu suu kununa. Mun na an be se ka la a la ko Jehova ye Yezu suu kunu?

⁸ Mɔgɔ caaman ye Yezu ye a suu kununin kɔ ani u y’o koo lakali mɔgɔ wɛrɛw ye (1 Kor. 15:5-7). Pol ye u la fɔlɔ min kofɔ, o ye ciden Piyɛri ye min be weele fana ko Sefasi. Yezu ka kalanden dɔw fana y’a fɔ ko Piyɛri ye Yezu ye a lakununin kɔ (Luka 24:33, 34). Pol y’a fɔ fana ko Yezu ka ciden “tan ni fila” y’a ye a suu kununin kɔ. O kɔ, o “yɔrɔnin kelen a y’a yɛrɛ yira an balimaw na minw tun be tɛmɛ mɔgɔ kɛmɛ duuru kan.” N’a sɔrɔ a y’a yɛrɛ yira o mɔgɔw la lajɛn dɔ lo la min kɛra Galile ani a kofɔra Matiyo 28:16-20 kɔnɔ. Yezu “y’a yɛrɛ yira Zaki la” fana. N’a sɔrɔ ale tun ye Yezu baden ye ani a daminɛ na, a tun ma la a la ko Yezu lo ye Masiya ye (Zan 7:5). Komi Zaki ye Yezu ye a suu kununin kɔ, a lara a la. Tuma min na Pol tun b’a ka bataki sɛbɛra saan 55 fan fɛ Krista tile la, mɔgɔ minw ɲɛɛ tun lara Yezu kan a suu kununin kɔ, u caaman bele tun be sii la. O la, mɔgɔ o mɔgɔ tun lanin t’a la ko Krista suu kununa, o tigi tun be se k’o mɔgɔw dɔ ɲininga.

9. Ka kɛɲɛ ni Kɛwaliw 9:3-5 ye, mun na Pol tun be se k’a fɔ ko Yezu suu kununa?

⁹ Kɔfɛ, Yezu y’a yɛrɛ yira Pol yɛrɛ la (1 Kor. 15:8). Pol tun be weele fana ko Sayuli. K’a to Damasi sira kan, a ye Yezu kaan mɛn a suu kununin kɔ. Ani, a ye yelifɛn dɔ ye o min na Yezu tun b’a ka nɔɔrɔ la sankolo la (Kɛwaliw 9:3-5 kalan). Pol ye min ye ani a ye min mɛn, o fana ye dalilu ye min b’a yira ko Yezu suu kununa tiɲɛn na.—Kɛw. 26:12-15.

10. Komi Pol tun lanin b’a la ko Yezu suu kununa, o y’a lasun ka mun lo kɛ?

¹⁰ Pol ye min fɔ, mɔgɔ dɔw y’u mako don o la sabu a tun be kerecɛnw tɔɔrɔ fɔlɔ la. Tuma min na Pol lara a la ko Yezu suu kununa, a y’a jija kosɔbɛ ka tɔɔw dɛmɛ u ka la o tiɲɛnko la. A ye gwɛlɛya caaman sɔrɔ sabu a tun be waajuli kɛ ko Yezu suu kununa. Ɲɛyirali fɛ, u ye Pol bugɔ, k’a don kaso la ani kurun tiɲɛna n’a ye fana. Nka a y’o bɛɛ muɲu (1 Kor. 15:9-11; 2 Kor. 11:23-27). Pol tun lanin b’a la kosɔbɛ ko Yezu suu kununa, fɔɔ a tun labɛnnin lo ka waajuli kɛ o koo la hali n’u tun bena a faga o kosɔn. Kerecɛn fɔlɔw ye seereya min kɛ Yezu suu kununin koo la, yala o t’a to i ka la a la ko Yezu suu kununa wa? Yala o t’a to fana i ka la a la kosɔbɛ ko sukununi bena kɛ wa?

11. Mun na Korɛntika dɔw tun tɛ ni miiriya ɲuman ye sukununi koo la?

¹¹ Korɛnti tun ye Grɛkiw ka dugu dɔ ye. O dugu la, mɔgɔ dɔw tun tɛ ni miiriya ɲuman ye sukununi koo la. U yɛrɛ tun b’a fɔ ko ‘suuw tena kunun.’ Mun na do? (1 Kor. 15:12). Atɛni fana tun ye Grɛkiw ka dugu dɔ ye. O yɔrɔ la, lɔnnikɛla dɔw tun be kerecɛnw lɔgɔbɔ ko Yezu suu ma kunu. N’a sɔrɔ o lo y’a to Korɛntika dɔw tun tɛ ni miiriya ɲuman ye sukununi koo la (Kɛw. 17:18, 31, 32). N’a sɔrɔ u dɔw tun b’a miiri ko sukununi tɛ kɛ yɛrɛ yɛrɛ la. U tun b’a jati ko jurumukɛlaw sanin lo ani ko n’u kɛra kerecɛnw ye, a be kɛ komi u segira ka kunu. A mana kɛ min o min ye, u kɛtɔ ka miiri ko suuw tɛna kunu, u ka limaniya tun ye fuu ye. Ni Ala tun ma Yezu suu kunu, o kɔrɔ ko kunmabɔsara ma di ani an si ka jurumu ma yafa. O la, minw lanin tɛ sukununi koo la, olu tɛ ni jigiya sɔbɛ ye.—1 Kor. 15:13-19; Eburuw 9:12, 14.

12. Ka kɛɲɛ ni 1 Piyɛri 3:18, 22 ye, cogo juman na Yezu sukununi be dan na sukununi tɔɔw la minw kɛra ka kɔn Yezu ta ɲɛ?

¹² Pol tun b’a lɔn ko “Krista kununna” ka bɔ saya la. O sukununi kɔrɔtanin lo ka tɛmɛ sukununi tɔɔw kan minw kɛra ka kɔn o ɲɛ. Mun na do? Sabu minw suu tun kununa, olu labanna ka sa. Pol ko “minnu sara, [Yezu] ye olu la kununnen fɔlɔ de ye.” Kɔrɔ juman na Yezu kɛra u la fɔlɔ ye? Ale lo kɛra mɔgɔ fɔlɔ ye ka kunu ka kɛ mɛlɛkɛ ye ani ale lo kɛra fɔlɔ ye ka taga sankolo la.—1 Kor. 15:20, Bible senuma; Kɛw. 26:23; 1 Piyɛri 3:18, 22 * kalan.

13. Pol ka fɔta la, faranfasi juman lo be Adama ni Yezu cɛ?

¹³ Cogo juman na mɔgɔ kelen saya be se k’a to mɔgɔ miliyɔn caaman suu be kunu? Pol y’o ɲiningali jaabi ka gwɛ. Adama ye min lase an ma a ka jurumu kosɔn ani Krista be min lase an ma a ka kunmabɔsara sababu la, Pol y’a ɲɛfɔ faranfasi min b’o fila cɛ. A y’a sɛbɛ Adama koo la ko: “Saya sera an ma mɔgɔ kelen barika la.” Tuma min na Adama ye jurumu kɛ, a ye bɔnɛ lase a yɛrɛ ani a bɔnsɔnw ma. An bele be tɔɔrɔla bi o jurumu nɔfɛkow kosɔn. Nka komi Ala y’a Dencɛ lakunu, an be se ka siniɲasigi ɲuman sɔrɔ! Pol y’a fɔ ko: “[Yezu] kelen barika la, suuw bena kunun. Mɔgɔ bɛɛ be sa Adama barika la cogo min na, o cogo kelen na, mɔgɔ bɛɛ fana bena kunun Krista barika la.”—1 Kor. 15:21, 22.

14. Yala Adama bena lakunu wa? A ɲɛfɔ.

¹⁴ Pol tun b’a fɛ ka mun lo fɔ tuma min na a ko Adama kosɔn, “mɔgɔ bɛɛ be sa”? Pol tun kaan be Adama bɔnsɔnw lo ma, olu minw ye jurumu ni dafabaliya sɔrɔ cɛɛn ye Adama fɛ ani o kama, u be sa (Ɔrɔm. 5:12). Mɔgɔ minw “suuw bena kunun,” Adama tɛ olu cɛma. A tɛna Krista ka kunmabɔsara nafa sɔrɔ sabu ale tun ye mɔgɔ dafanin ye ani a y’a latigɛ ka ban ka mɛnni kɛ Ala fɛ. “Mɔgɔ Dencɛ” bena minw jati “baaw” ye, olu ni Adama ka koo bena kɛ kelen ye. U “niin bena bɔ yen” pewu.—Mat. 25:31-33; Zab. 37:9, 10; Eburuw 5:9.

15. Minw “bɛɛ fana bena kunun,” jɔnw lo b’u cɛma?

¹⁵ A kɔrɔsi ko Pol ko “mɔgɔ bɛɛ fana bena kunun Krista barika la.” (1 Kor. 15:22). Pol tun y’a ka bataki sɛbɛ kerecɛn  mɔlenw lo ma Korɛnti, olu minw suu tun bena kunu ka taga ɲɛnamaya kɛ sankolo la. “Yezu Krista ye minw wele k’u saniya k’u kɛ Ala ta ye,” o kerecɛnw tun ye olu dɔw ye. “Minw sara k’u jigi lanin to Krista kan,” Pol kumana olu fana koo la (1 Kor. 1:2; 15:18; 2 Kor. 5:17). Bibulu ka kitabu wɛrɛ kɔnɔ, Pol y’a sɛbɛ ko minw “jɛnna [ni Krista] ye sɔbɛ la a ka saya la,” olu “fana bena kunun n’a ye.” (Ɔrɔm. 6:3-5). Yezu kununa ka bɔ suuw cɛma ka kɛ mɛlɛkɛ ye ani a tagara sankolo la. Minw bɛɛ “jɛnna [ni Krista] ye,” o kɔrɔ kerecɛn mɔlenw bɛɛ, olu fana suu bena kunu o cogo la.

16. Pol ko minw sara, Yezu ye olu “la kununnen fɔlɔ de ye.” O kuma kɔrɔ ko di?

¹⁶ Pol y’a sɛbɛ ko “minnu sara, [Krista] ye olu la kununnen fɔlɔ de ye.” A to i hakili la ko mɔgɔ wɛrɛw kununa ka bɔ saya la ka ɲɛnamaya kɛ dugukolo kan i n’a fɔ Lazari. Nka Yezu lo kɛra fɔlɔ ye ka kunu ka bɔ saya la ka kɛ mɛlɛkɛ ye ani ka ɲɛnamaya banbali sɔrɔ. Pol kɛtɔ k’a fɔ ko Yezu ye “kununnen fɔlɔ” ye, o kɔrɔ ko mɔgɔ wɛrɛw tun bena kunu ka bɔ saya la ani ka taga ɲɛnamaya kɛ sankolo la. Cidenw ani mɔgɔ wɛrɛ minw “jɛnna [ni Krista] ye,” olu laban tun bena kunu ka bɔ saya la ka taga ɲɛnamaya kɛ sankolo la i ko Yezu.

17. Minw “jɛnna [ni Krista] ye,” tuma juman lo olu tun bena kunu ka bɔ saya la ka taga sankolo la?

¹⁷ Minw “jɛnna [ni Krista] ye,” olu bena kunu ka bɔ saya la ka taga sankolo la. Tuma min na Pol tun y’a ka bataki ci Korɛnti kerecɛnw ma, o sukununi tun ma daminɛ fɔlɔ. Nka Pol y’a yira k’o tun bena kɛ loon nataw la. A ko: “O bena kɛ bɛɛ n’a lɔyɔrɔ: Krista le kɛra fɔlɔ ye, o kɔ, mɔgɔ minw kɛra a ta ye. A be kɛ ten a natuma na.” (1 Kor. 15:23; 1 Tes. 4:15, 16). “Natuma” min kofɔra yan, an b’o wagati lo la, o kɔrɔ, wagati min na Krista be masaya la. Cidenw ani kerecɛn mɔlen wɛrɛ minw sara, olu ye kɔnɔni kɛ fɔɔ wagati min na Krista ye masaya daminɛ. O wagati lo la minw “jɛnna ni [Yezu] ye,” olu y’a daminɛ ka kunu ka bɔ saya la i ko Yezu suu kununa cogo min na, ani u y’u ka sara sɔrɔ sankolo la.

18. a) Mun lo b’an dɛmɛ k’a faamu ko kerecɛn mɔlenw ka sukununi kɔ, sukununi wɛrɛ bena kɛ? b) Ka kɛɲɛ ni 1 Korɛntikaw 15:24-26 ye, mun lo bena kɛ sankolo la?

¹⁸ Nka kerecɛn kantigi minw bɛɛ tɛ ni jigiya ye ka taga sankolo la, olu be  ni jigiya juman lo ye? Olu fana be ni sukununi jigiya ye. Bibulu b’a fɔ ko ciden Pol ani mɔgɔ wɛrɛ minw bena taga sankolo la, olu ye “suuw kununko fɔlɔ” mɔgɔw ye (Yir. 20:5). Yala o t’a yira ko sukununi wɛrɛ bena kɛ wa? O bɛnnin lo ni Zɔbu ka kuma ye, a tun ye min fɔ a ka siniɲasigi koo la (Zɔbu 14:15). ‘Mɔgɔ minw ye [Krista] ta ye,’ a ka Masaya wagati la, olu bena kɛ n’a ye sankolo la tuma min na a bena kuntigiw ni fangatigiw halaki. Hali saya yɛrɛ, o min y’an “jugu laban” ye, o “bena cɛn.” Siga t’a la, minw be kunu ka taga sankolo la, olu tɛna sa tugun abada. Nka mɔgɔ tɔɔw do?—1 Korɛntikaw 15:24-26 kalan.

19. Minw jigi b’a la ka ɲɛnamaya kɛ dugukolo kan, olu be se ka la a la ko mun lo bena kɛ?

¹⁹ Minw jigi b’a la ka ɲɛnamaya kɛ dugukolo kan, olu be se ka la a la ko mun lo bena kɛ? Pol ka kuma nunu b’a yira ko u be ni jigiya ye: “Ne jigi dalen bɛ Ala kan . . . ko mɔgɔw bɛɛ suw na kunun, mɔgɔ tilennenw ni mɔgɔ tilenbaliw bɛɛ.” (Kɛw. 24:15, Bible senuma). A gwɛnin lo ko mɔgɔ tilenbaliw tɛ se ka taga sankolo la. O la, o kumaw b’a yira ko sukununi dɔ bena kɛ dugukolo kan.

20. Barokun nin y’i ka jigiya sabati cogo di sukununi koo la?

²⁰ Siga t’a la, “suw na kunun”! Minw suu bena kunu dugukolo kan, olu bena jigiya sɔrɔ ka ɲɛnamaya kɛ fɔɔ abada. I be se ka la a la k’o layidu bena dafa. O jigiya be se k’i dusu saalo i ka mɔgɔ kanulenw koo la minw sara. U bena kunu ka bɔ saya la Krista ni mɔgɔ wɛrɛw ka “saan waa kelen” mara tuma na (Yir. 20:6). Ele fana be se ka la a la ko n’i sara ka kɔn Krista ka saan waa kelen mara ɲɛ, i suu bena kunu. An be ni jigiya min ye, o “jigi tɛ mɔgɔ janfa.” (Ɔrɔm. 5:5, Biblu Ala ta Kuma). A be se ka barika don i la sisan yɛrɛ ani ka dɔ fara i ka ninsɔndiya kan Ala sago kɛli la. An be se ka kalan caaman wɛrɛw sɔrɔ Korɛntikaw fɔlɔ sapitiri 15nan kɔnɔ. An bena o lo ye barokun nata la.