1-2. Na inuinui totoka cava era vakanamata kina na dausokalou yalodina?

E BIBI na noda inuinui. Eso era nuitaka me vinaka nodra bula vakawati, mera susugi luvedra mera bulabula, eso tale era vakanuinui tu mera bula mai na tauvimate. Qori tale ga na ka eda nuitaka na lotu vaKarisito. Ia e tiko na inuinui eda mareqeta sara vakalevu. Qori na inuinui meda bula tawamudu, na inuinui tale ga me baleti ira na wekada lomani era sa mate.

² E kaya na yapositolo o Paula: “Au nuitaka na Kalou . . . nira na vakaturi mai na yalododonu kei ira na sega ni yalododonu.” (Caka. 24:15) Eso tale era vakamacalataka tale ga na inuinui ni veivakaturi. Kena ivakaraitaki na peteriaki o Jope. E nuidei ni Kalou ena sega ni guilecavi koya, ena vakaturi koya tale ga me bula tale.—Jope 14:7-10, 12-15.

3. Ena yaga vakacava noda vulica na 1 Korinica wase 15?

³ “Na nodra vakaturi na mate” e dua vei ira “na yavu” ni “ivakavuvuli rawarawa” eda vakabauta na lotu vaKarisito. (Iper. 6:1, 2) Na ka e vakamacalataka o Paula me baleta na veivakaturi, e volatukutukutaki ena 1 Korinica wase 15. E macala ga ni ka e vola qori, e uqeti ira sara ga na lotu vaKarisito ena imatai ni senitiuri. Na wase ni ivola qo ena uqeti keda tale ga, qai vaqaqacotaka na inuinui eda vakanamata tu kina.

4. Na cava na ivakadei ni nodra inuinui na wekada lomani era sa mate?

⁴ Na nona vakaturi o Jisu Karisito, e ivakadei ni nodra inuinui na wekada lomani era sa mate. Qori e okati ena “itukutuku vinaka” e vunautaka o Paula vei ira e Korinica. (1 Kor. 15:1, 2) E kaya mada ga ni na tawayaga nona vakabauta na lotu vaKarisito ke sega ni vakabauta ni vakaturi o  Jisu. (1 Kor. 15:17) Na nona vakaturi gona o Jisu e ivakadei ni noda inuinui na lotu vaKarisito.

5-6. Na cava meda kauaitaka kina na ka e tukuni ena 1 Korinica 15:3, 4?

⁵ Ena itekitekivu ni nona ivakamacala o Paula me baleta na veivakaturi, e tukuna e tolu na ka dina: (1) “Ni mate na Karisito ena vuku ni noda ivalavala ca.” (2) E “bulu.” (3) E “vakaturi ena ikatolu ni siga me vaka e kaya na iVolatabu.”—Wilika 1 Korinica 15:3, 4.

⁶ Na cava meda kauaitaka kina nona mate o Jisu, nona bulu, kei na nona vakaturi? Ni parofisaitaka o Aisea na itukutuku me baleta na Mesaia, e kaya ni na “muduki tani mai na nodra vanua na bula” qai “bulu vata kei ira na tamata ca.” E dua tale na ka e tukuna ni na yaco. E kaya o Aisea ni na colata na Mesaia “na nodra ivalavala ca e levu.” E cakava qori o Jisu ni solia nona bula me keda ivoli. (Aisea 53:8, 9, 12; Maciu 20:28; Roma 5:8) Na nona mate gona o Jisu, nona bulu kei na nona vakaturi, e ivakadei ni noda inuinui meda sereki mai na ivalavala ca kei na mate.

7-8. Era vakadeitaka vakacava na lotu vaKarisito ni vakaturi dina o Jisu?

⁷ Me rawa nida vakabauta na veivakaturi, e bibi meda vakabauta mada e liu ni a vakaturi o Jisu. Eda vakadeitaka vakacava ni a vakaturi Jisu o Jiova?

⁸ E levu era vakadinadinataka nona vakaturi o Jisu. (1 Kor. 15:5-7) Na imatai ni ivakadinadina e vola o Paula, ya na yapositolo o Pita (Kifa). Era vakadeitaka e vica na tisaipeli ni a raici Jisu o Pita ni sa vakaturi. (Luke 24:33, 34) Eratou raici Jisu tale ga “na Tinikarua” na yapositolo ni sa vakaturi oti. Oti e “rairai vei ira na 500 vakacaca na veitacini ena dua ga na gauna,” de dua na nodra sota ena marau e Kalili me vaka e tukuni ena Maciu 28:16-20. E ‘rairai tale ga o Jisu vei Jemesa,’ kena irairai na taci Jisu vakacabecabe, a sega ni vakabauta tu e liu ni Mesaia. (Joni 7:5) Nona raici Jisu gona ni sa vakaturi oti, e sega tale ni vakatitiqa. Era bula tiko e levu na ivakadinadina qori ni vola na ivola qo o Paula ena rauta na 55 G.V. Ke dua gona e vakatitiqataka ena gauna ya nona vakaturi o Jisu, e rawa sara ga nira tarogi ira na ivakadinadina nuitaki qori.

9. Nida wilika na Cakacaka 9:3-5, e vakadinadinataka vakacava o Paula nona vakaturi o Jisu?

⁹ Dua na gauna e muri, e qai rairai o Jisu vei Paula. (1 Kor. 15:8) Ni gole tiko i Tamasiko o Paula (Saula), e rogoci Jisu qai raivotutaki koya ni sa tiko mai lomalagi. (Wilika Cakacaka 9:3-5.) Na ka e yacovi Paula e ivakadinadina ni sa vakaturi o Jisu, e sega gona ni italanoa buli.—Caka. 26:12-15.

10. E uqeti Paula vakacava nona vakadeitaka ni sa vakaturi o Jisu?

¹⁰ Era na kauai sara ga eso ena ka e vakadinadinataka o Paula, ni a dautusaqati ira na lotu vaKarisito e liu. Ni vakadeitaka o Paula ni sa vakaturi o Jisu, e gumatua sara me wasea na ka dina qori vei ira e levu. E mokulaki, vesu, e voca ena waqa. Na vuna? Me rawa ni wasea na ka dina me baleta nona mate o Jisu kei na nona vakaturi. (1 Kor. 15:9-11; 2 Kor. 11:23-27) E sega tale ni qai vakatitiqataka o Paula ni sa vakaturi o Jisu mai na mate, e bolemate kina me wasea na ka e vakabauta. Na ka era vakadinadinataka na lotu vaKarisito ena imatai ni senitiuri, e vakadeitaka vei keda ni a vakaturi dina o Jisu.  Ena vaqaqacotaka tale ga noda vakabauta na veivakaturi ena gauna se bera mai.

11. Na cava e rairai cala kina nodra rai eso e Korinica me baleta na veivakaturi?

¹¹ Eso e cala nodra rai me baleta na veivakaturi ena koro vaKirisi o Korinica, era kaya mada ga “nira sega ni vakaturi na mate.” Na vuna? (1 Kor. 15:12) E ka ni veiwali na itukutuku me baleta nona vakaturi o Jisu vei ira na vuku ena dua tale na koro vaKirisi o Aceni. Era rairai vakabauta gona na raicala qori eso e Korinica. (Caka. 17:18, 31, 32) Eso tale era rairai nanuma ni veivakaturi e ivakatakarakara ga, me dusia nona “mate” tu e dua ena ivalavala ca qai “bula” ni mai lotu vaKarisito. Se mani cava era nanuma, ena tawayaga nodra vakabauta ke ra sega ni vakadeitaka ni sa vakaturi o Jisu. Ke sega ni vakaturi Jisu na Kalou, ena sega ni saumi na ivoli, ena sega tale ga ni vosoti na ivalavala ca. E sega gona na nodra inuinui o ira na beca na veivakaturi.—1 Kor. 15:13-19; Iper. 9:12, 14.

12. Me vaka e tukuni ena 1 Pita 3:18, 22, e duatani vakacava nona vakaturi o Jisu vei ira na vakaturi e liu vua?

¹² E vakadinadinataka sara ga o Paula ni “sa vakaturi mai na mate na Karisito.” E uasivi nona vakaturi o Jisu. Na vuna? Ni so era vakaturi e liu vua e vuravura era sa mate tale. E kaya o Paula ni o Jisu e “kedra isevu na moce tu, oya o ira na mate.” Ena sala cava e isevu kina o Jisu? O koya na imatai ni tamata me vakaturi me dua na kabula vakayalo, e imatai tale ga me vakaturi me lai bula i lomalagi.—1 Kor. 15:20; Caka. 26:23; wilika 1 Pita 3:18, 22.

13. E vakatauvatani Atama kei Jisu vakacava o Paula?

¹³ E rawa vakacava nira vakabulai e levu ena nona mate e le dua ga? E matata na isaunitaro e tukuna o Paula. E vakatauvatana na ka e vakavuna o Atama kei na ka e rawati ena ka e cakava o Karisito. Me baleti Atama, e vola o Paula: “Ni vakavuna na mate e dua na tamata.” Nona valavala ca o Atama e mate kina, era mate tale ga na nona kawa. Eda se vakila tiko nikua na revurevu ni nona talaidredre. Ia e duatani sara na ka e rawati ena nona vakaturi Jisu na Kalou! Na ‘nodra vakaturi na mate e rawati ena vuku ni dua na tamata,’ ya o Jisu. E vakamacalataka o Paula nira “mate tiko na tamata kece ena vuku i Atama,” ena “bula vaka kina na tamata kece ena vuku i Karisito.”—1 Kor. 15:21, 22.

14. Ena vakaturi o Atama? Vakamacalataka.

¹⁴ Na cava e vakaibalebaletaka o Paula ni tukuna “nira mate tiko na tamata kece ena vuku i Atama”? Qori e dusi ira nona kawa, e vakadewa vei ira na ivalavala ca kei na mate. Ya na vuna era mate tiko kina. (Roma 5:12) E sega ni wili o Atama kei ira na “bula,” ni sega ni yaga vua na ivoli i Karisito. Na vuna? E uasivi o Atama, ia e talaidredre vua na Kalou. Na kena itotogi e tautauvata kei ira ena lewa “na Luve ni tamata” mera “me,” ya mera “muduki vakadua.”—Maciu 25:31-33, 46; Iper. 5:9.

15. O cei o ira “kece” era na “bula”?

¹⁵ Dikeva ni kaya o Paula nira na “bula vaka kina na tamata kece ena vuku i Karisito.” (1 Kor. 15:22) A volavola tiko o Paula vei ira na lotu vaKarisito lumuti e Korinica, era na vakaturi mera bula  i lomalagi. Era sa “vakasavasavataki” na lotu vaKarisito qori mera ‘tisaipeli i Karisito Jisu, era kacivi mera yalosavasava.’ O Paula e tukuni ira tale ga na tisaipeli i Karisito “era moce tu, oya nira sa mate” ena “duavata kei Karisito.” (1 Kor. 1:2; 15:18; 2 Kor. 5:17) Ena dua tale na nona ivola, e vakamacalataka ni o ira na ‘duavata kei Jisu ena nodra mate vakataki koya,’ era “na duavata tale ga kei koya ena [nodra] vakaturi me vakataki koya.” (Roma 6:3-5) E vakaturi o Jisu me kabula vakayalo qai lako i lomalagi. Era na vakaturi tale ga va qori o ira “na duavata kei Karisito,” ya o ira na lotu vaKarisito lumuti.

16. Na cava e vakaibalebaletaka o Paula ni tukuna ni o Jisu na “isevu”?

¹⁶ E vola o Paula ni o Karisito e “kedra isevu na moce tu,” ya o ira na mate. Meda nanuma tiko nira vakaturi tale ga e vuravura eso me vakataki Lasarusa. Ia o Jisu na imatai me vakaturi mai na mate me kabula vakayalo, me bula tawamudu tale ga. O Jisu e vaka na isevu ni vuata era cabora na Isireli vua na Kalou. Ni vakatokai Jisu o Paula me “isevu,” e dusia ni so tale era na vakaturi tale ga mera bula i lomalagi me vakataki Jisu. Eratou na muri Karisito na yapositolo kei na so tale era ‘duavata kei koya.’ Io, ena yaco na gauna era na vakaturi tale ga me vakataki Jisu.

17. Na gauna cava era qai vakaturi kina mera bula i lomalagi o ira na “duavata kei Karisito”?

¹⁷ Ni volavola tiko o Paula vei ira e Korinica, e se bera ni tekivu nodra vakaturi na “duavata kei Karisito” mera bula i lomalagi. E tukuna o Paula ni na qai yaco qori ena dua na gauna e muri: E kaya, “Ena veitaravi ga: E isevu o Karisito, ra qai tarava yani o ira era nona ena gauna e sa tiko kina.” (1 Kor. 15:23; 1 Ces. 4:15, 16) Eda donuya sara tu ga qo na gauna ni nona “tiko” o Karisito. Koya gona, sa oti toka e dua na gauna eratou sa qai vakaturi na yapositolo kei na so tale na lotu vaKarisito lumuti era sa mate. Era rawata ena gauna qori nodra inuinui ni bula i lomalagi mera ‘duavata kei Karisito ena nodra vakaturi me vakataki koya.’

18. (a) Eda kila vakacava ni na dua tale na veivakaturi ni oti na veivakaturi i lomalagi? (b) Me vaka e tukuni ena 1 Korinica 15:24-26, na cava ena yaco mai lomalagi?

¹⁸ Vakacava o ira na lotu vaKarisito  yalodina e sega ni nodra inuinui mera bula i lomalagi kei Karisito? E tiko tale ga nodra inuinui ni veivakaturi. E kaya na iVolatabu ni o Paula kei na so tale era vakaturi i lomalagi era wili ena “veivakaturi taumada mai na mate.” (Fpai. 3:11) Ni tukuni gona na veivakaturi taumada, e dusia ni na dua tale na veivakaturi ena tarava mai. E veisemati vinaka qori kei na ka e tukuna o Jope me baleta na nona inuinui. (Jope 14:15) “O ira na nei Karisito era vakaturi ena gauna e sa tiko kina” era sa na tu i lomalagi ena gauna e vakamalumalumutaka kina o Jisu na veimatanitu kece, lewa kece kei na kaukaua kece. Ena vakamalumalumutaki mada ga na “iotioti ni meca . . . o mate.” E macala gona nira na sega tale ni mate o ira na bula i lomalagi. Ia vakacava o ira na kena vo?—Wilika 1 Korinica 15:24-26.

19. Na cava mera namaka o ira na nuitaka na bula e vuravura?

¹⁹ Na cava mera namaka o ira na nuitaka na bula e vuravura? E veivakadeitaki na ka e tukuna o Paula: “Au nuitaka . . . nira na vakaturi mai na yalododonu kei ira na sega ni yalododonu.” (Caka. 24:15) E matata vinaka tu nira sega ni rawa ni lai bula i lomalagi na sega ni yalododonu. E macala gona ni qo e dusia tiko na veivakaturi e vuravura ena gauna se bera mai.

20. E vaqaqacotaki vakacava na nomu inuinui?

²⁰ Eda sega tale ni vakatitiqa ni ‘na yaco dina na veivakaturi’! O ira na vakaturi mera bula tale e vuravura e rawa nira nuitaka mera bula tawamudu kina. O rawa ni nuidei ni na yaco dina na vosa ni yalayala qori. Ena vakacegui iko tale ga ni o vakasamataki ira na wekamu lomani era sa mate. Ena rawa nira vakaturi ena gauna sa ‘veiliutaki kina vakatui o Karisito kei na so tale me 1,000 na yabaki.’ (Vkta. 20:6) Ke o mani mate mada ga ni bera ni tekivu na Duanaudolu na yabaki ni veiliutaki qori, o rawa ni nuidei ni o na vakaturi. Na “inuinui [qo] ena sega ni veivakamaduataki.” (Roma 5:5) Ena rawa ni vakayaloqaqataki iko ena gauna qo, o na marautaka tale ga nomu qaravi Jiova. Ia e levu tale na ka eda rawa ni vulica ena 1 Korinica wase 15. Na cava ya? Eda na qai dikeva qori ena ulutaga tarava.