1-2. Gbò gyóòlo Jìhóvà íe mókà lé ból dẽe sĩ́é?

BÓL dẽe sĩ́ palàge dú bíi. Ból dẽe sĩ́ sìgà gbò dú gè ia dóm àbèè ge ilí va ea é náa kọ bàá íe ẹ́ẹ́-ẹẹ̀ nyíe, ge láá bumá gbò pá nvín leevè, àbèè ge ié válá kpá ló. Àé láá leemá nágé beele e dúù gbò níí Kráìst ge ié nágé tẽ̀ènè íb ból dẽe sĩ́á. Sõò ból dẽe sĩ́ e beele palàge nvèè ka ló bọọ èlmà gbò níá; è ẹb dẽe sĩ́ gè ié dùm e bè náa tá vaá kpáá mòn gbò e beè vùlè e ba beè ù.

² Neǹ tóm Pọ́ọ̀l beè kọọ̀: “Nda ié tẽ̀ènè íb ból dẽe sĩ́ . . . m Bàrìa, gè kọ kọ̀láá gbò nen, gbò lé nè gbò pọ́lọ́, é kẽeà aa ke mà ú.” (Tóm 24:15) Pọ́ọ̀l níì túá nen ea gé ló bel boo ból dẽe sĩ́ ge kẽ̀èà aa kemà ú é nì. Jóòb beè ló nágé bel ea kil ló. A beè àgala boo kọọ̀ Bàrì é kẽeàè é boo vaá kẽenìèe nvee mm̀ dùm.—Jóòb 14:7-10, 12-15.

3. Éé ní ea náa vaá 1 Kọ́rìnt 15 togó é láá dọ̀ bélè nèi ẽ́?

³ “Kẽ̀èà aa ke mà ú” dṹùnà “túá kpãa nò nu,” ea di mm̀ dò bá nuù Kráìst. (Híb. 6:1, 2) Gbò bel e Pọ́ọ̀l ló kilma ló kẽ̀èà aa kemà ú di mm̀ 1 Kọ́rìnt 15 togó. Nú ea beè emí beè siè kpóó ló gbò níí Kráìst e ba beè di mm̀ túá gbò gbááá. Kọ̀láá bé eo palàge ziga ló kẽ̀èà aa kemà ú naa, nú ea di mm̀ 1 Kọ́rìnt 15 é síè ni kpóó ló vaá agẹlẹ ló o ból dẽe sĩ́ kọ àé nááá.

4. Éé ní ea náa èé láá àgala boo kọọ̀ gbò e ba beè ù é kẽ̀èà aa kemà ú é?

⁴ Kẽ̀èà aa kemà ú Jíízọ̀s náa kọ é àgala boo kọọ̀ beè gbò e beè vùlè ú, èé láá kpáá mòn va. Kẽ̀èà aa kemà ú Jíízọ̀s dṹùnà “Lé Kpẹa” e Pọ́ọ̀l beè vee nè pá Kọ́rìnt. (1 Kọ́r. 15:1, 2) Kàsĩ́, a beè kọọ̀ beè nen ea gé nyoone nvéè Kráìst náa zigà kọọ̀ kẽ̀èà aa kemà ú dì, a zìgà dú zọ̀là pọ́ì. (1 Kọ́r. 15:17) Ge dẹlẹ nyíé boo kẽ̀èà aa kemà ú Jíízọ̀s ní ea dú kpò kúm ból dẽe sĩ́ gbò níí Kráìst e.

5-6. Éé ní e gbò moǹ bel ea di mm̀ 1 Kọ́rìnt 15:3, 4 kọlà kilma ló beele é?

 ⁵ Dààmà togó tṍó e Pọ́ọ̀l géè ló bel boo kẽ̀èà aa kemà ú, a beè ló bel boo taà kà nú ea beè naaá. Vaá níà (1) “Kráìst beè ú boo bẹẹ pọ́lọ́.” (2) Ba “beè lìe.” (3) “Vaá ní e a égè taà dee, à kẽ̀èà aa ke mà ú, dì belí bé e ba è émí m Kpá Káí naa.”—Bugi 1 Kọ́rìnt 15:3, 4.

⁶ Éé ní e ú Jíízọ̀s, ge lìe, nè a kẽ̀èà aa kemà ú kọlà kilma ló beele é? Neǹ kọ́ọ̀ bùlà Bàrì Àìzáíà beè kọ́ gbẹẹ́ sĩ́ kọọ̀ àé beè dú gè fẹ́ Mèsáíà “lọl zẹ̀ẹ̀ gbò e bà di dùm” vaá “lìé gbàà gbò pọ́lọ́.” Sõò dõòna kà nu é nááá nágé. Àìzáíà beè kpáá kọ nágé kọọ̀ Mèsáíà é tóólá “náà kyọ̀ gã́bug nen.” Jíízọ̀s beè naa níí tení dú ló gè tú a dùm aamái. (Àìz. 53:8, 9, 12; Máát. 20:28; Róm̀ 5:8) Ge kọọ̀ Jíízọ̀s beè ù, bà lìe, vaá à kẽ̀èà aa kemà ú náa kọ é àgala boo kọọ̀ èé beè di pọ́ì aa bá náà kyọ̀ nè ú vaá kpáá gbaá ló gbò e beè vùlè e bàé kẽeà aa kemà ú.

7-8. Éé ní ea beè nvèè bá nè gbò níí Kráìst kọ bàá àgala boo kọọ̀ Jíízọ̀s beè kẽ̀èà aa kemà ú é?

⁷ Besĩ́ è kálá zìgà kọọ̀ kẽ̀èà aa kemà ú é nááá, èé íè ge zẹ́ẹ́ zìgà kọọ̀ Jíízọ̀s beè ù vaá à kẽ̀èà aa kemà ú. Éé ní ea naa èé láá àgala boo kọọ̀ Jìhóvà beè kẽee Jíízọ̀s lọl kemà ú é?

⁸ Gã́bug nen beè sí neǹ ditõ̀ò kọọ̀ Jíízọ̀s beè kẽ̀èà aa kemà ú. (1 Kọ́r. 15:5-7) Túá neǹ ditõ̀ò e Pọ́ọ̀l beè kolí bée dú neǹ tóm Pítà ea beè kọ̀là nàgé Sífàs. Gã́bug gbò e bà géè nyoone nvéè Jíízọ̀s beè kọ nágé kọọ̀ Pítà beè mòn Jíízọ̀s tṍó ea ni kẽeà aa kemà ú. (Lúùk 24:33, 34) Gbáló vó, “òb nè bàà nen,” ea dú gbò tómá beè mòn nàgé tṍó ea kẽeà aa kemà ú. Tṍóá sõò, “gã́ bug nen e a é téní zelí bóó nè vòò tub (500) nen e bà ólò nyoonée nvée beè gboó gbá mònìè tẽ̀ènè tóm,” be à sẹlẹ gbẹá kè sẹ̀lẹ̀nù ẹ́ẹ́-ẹẹ̀ nyíe ea beè sẹ̀ẹ̀à gbẹá Gálilì e bà ló bel kilma ló mm̀ kpá Máátìù 28:16-20. Jíízọ̀s beè sìlà nàgé ló “Jém̀z,” e bà gbá duá gbàà e náa beè dẹlẹ́ẹ nyíé boo kọ ẹ̀ẹ̀ Mésáíàa. (Jọ́ọ̀n 7:5) Tṍó e Jém̀z mon kọọ̀ Jíízọ̀s kẽeà aa kemà ú, a beè gbóó palàge àgala boo. À palàge kpe ló gè nyimá kọọ̀ gbán mm̀ gbáá 55 C.E. e Pọ́ọ̀l beè emí kpá lẹ̀ẹ̀la tómí, gã́bug gbò e ba beè mònmà dẽe tṍó e Jíízọ̀s kẽeà aa kemà ú beè di dí dùm, ea gbóó naa kọọ̀ be a beè ié nen ea íe bàà-bàà bùlà ea kil ló, àé láá bĩiná gbò e ba beè mònmà dẽe e baẹ̀ di dí dùma.

9. Éé ní e kpá Tóm 9:3-5 kọ́ ea zógè kọọ̀ Pọ́ọ̀l beè palàge àgala boo kọọ̀ Jíízọ̀s beè kẽ̀èà aa kemà ú é?

⁹ Tṍó e tṍó téní, Jíízọ̀s beè sila ló Pọ́ọ̀l. (1 Kọ́r. 15:8) Pọ́ọ̀l ea beè zẹ́ẹ́ kọ̀là Sọ́ọ̀l beè di èèlè ea géè kil Dàmáskọ̀s tṍó ea dã́ moǹ Jíízọ̀s ea beè kẽeà aa kemà úá vaá mòà nuù dẽe monìe tṍó ea di káála mm̀ a ka. (Bugi Tóm 9:3-5.) Nú ea beè naaá ló Pọ́ọ̀la beè kpáá palàge tẹlẹ bàlà kẽ kọọ̀ Jíízọ̀s beè kẽ̀èà aa kemà ú.—Tóm 26:12-15.

10. Éé ní e Pọ́ọ̀l beè naa boo béè kọ à agàla boo kọọ̀ Jíízọ̀s beè kẽ̀èà aa kemà ú é?

¹⁰ Sìgà gbò é palàge ié lèèma mm̀ nú e Pọ́ọ̀l kọ́ boo béè kọọ̀ besĩ́ Jíízọ̀s à kalá sìlàẹ́ ló, Pọ́ọ̀l géè biigè ló gbò níí Kráìst. Tṍó e Pọ́ọ̀l agàla boo kọọ̀ Jíízọ̀s beè kẽ̀èà aa kemà ú, a beè gbóó sí tóm agẹlẹ bá mm̀ ge nvèè bá nè dõòna gbò kọ bàá zìgà nakà kà kà belí. A beè ĩ̀ìmà bom, sí kpọ́gọ́lọ́, vaá mìà ló beè èèàẹ́ ló tṍó ea géè vee kà kà bel ea kil ló gè kọọ̀ Jíízọ̀s beè ù vaá kpáá tõó dùm. (1 Kọ́r. 15:9-11; 2 Kọ́r. 11:23-27) Pọ́ọ̀l beè palàge àgala boo kọọ̀ Jíízọ̀s beè kẽ̀èà aa kemà ú naa ní ea beè di kpènà ló gè ú boo béè ge kọ́ nu ea kilíé ló. É kọọ̀ bel ea aa gã́ gbò e bà géè nyoone nvéè Kráìst e ba beè sí neǹ ditõ̀ò ló kẽ̀èà aa kemà ú  Jíízọ̀s mm̀ túá gbò gbááá, náa nveè bá nè beele kọ é zìgà nàgé ló? Vaá é kọ níá náa náa kọọ̀ beele é kpáá palàge àgala boo kọọ̀ kẽ̀èà aa kemà ú é nááá dì deè sĩ́?

11. Éé ní ea beè naa kọ sìgà gbò e bà di Kọ́rìnt á ié lọ̀ bug ea kil ló kẽ̀èà aa kemà ú é?

¹¹ Sìgà gbò e ba beè di mm̀ boǹ Gríìs ea di bálá sĩ́ Kọ́rint beè ié lọ̀ bug ea kil ló kẽ̀èà aa kemà ú, naa ní e ba beè kọ nágé kọọ̀ “gbò e ba è ù náa é kẽeà aa ke mà ú.” Ló éé? (1 Kọ́r. 15:12) Gbò nyìma kpá e bà dú Átẹ̀nz ea dì nàgé mm̀ dó Gríìs beè nvèèmà lẹ́ nòòmànù ge kọọ̀ Jíízọ̀s beè kẽ̀èà aa kemà ú. Vó beè naa kọ sìgà gbò e bà di Kọ́rìnt á bugi nagé togó naa vó. (Tóm 17:18, 31, 32) Sìgà gbò beè láá bugi nagé togó kọọ̀ kẽ̀èà aa kemà úá náa dú kà lèlà sĩ́ nú ea beè naaá. Tãa vó ba beè láá bugi togó kọọ̀ nen ú boo béè kọọ̀ à dú neǹ náà kyọ̀, vaá gbò e bà dú gbò níí Kráìst di dùm boo béè kọọ̀ Bàrì a ia ló ba pọ́lọ́ nè va. Kọ̀láá nú ea náa vaá gbòí náa beè ziga ló kẽ̀èà aa kemà ú, náa kọọ̀ ba zìgà á dú zọ̀là pọ́ì. Be Bàrì náa beè kẽee Jíízọ̀s lọl kemà ú, náa gáẹ̀ beè dú gè ia ló pọ́lọ́ nè tọ́ọ̀ nen. Vóà naa, gbò e bà náa ziga ló kẽ̀èà aa kemà ú náa íe kà kà ból dẽe sĩ́.—1 Kọ́r. 15:13-19; Híb. 9:12, 14.

12. Dẹ̀ẹ̀a boo nú ea di mm̀ 1 Pítà 3:18, 22, mósĩ́ deè ní e kẽ̀èà aa kemà ú Jíízọ̀s dú kele ló níí gbò e ba beè zẹ́ẹ́ kẽ̀èà besĩ́ì tṍóá ẽ́?

¹² Pọ́ọ̀l beè nyimá kọ “Bàrì beè zẹ́ẹ́ kẽee [Kráìst] lọl ke mà ú.” Kẽ̀èà aa kemà úá beè lee èl níí gbò e ba beè kẽ̀èà vaá tṍó ea lée bà ùa. Pọ́ọ̀l beè kọọ̀ Jíízọ̀s ní ea dú “túá nen e Bàrì beè zẹ́ẹ́ kẽee lọl ke mà ú é.” Mósĩ́ deè ní e Jíízọ̀s beè dú túá nen ẽ́? Ẹlẹ ní ea dú túá nen e Bàrì beè kẽe lọl kemà ú nvee mm̀ nyómá vaá du nágé túá nen ea beè kẽ̀èà aa kemà ú kil káála ẹ́.—1 Kọ́r. 15:20; Tóm 26:23; bugi 1 Pítà 3:18, 22.

13. Pọ́ọ̀l kọ́ọ̀ mókà kele ní ea di zẹ̀ẹ̀ Ádàm nè Jíízọ̀s e?

¹³ Mósĩ́ deè ní e ú enè nen é láá naa kọọ̀ gã́bug gãà nen á kpáá ié dùm ẽ? Pọ́ọ̀l palàge aalá nakà bíbvá. À baatẽ́ kelé ea di zẹ̀ẹ̀ nú ea beè naaá ló gbò nen boo béè nú e Ádàm beè naa nè nú ea é láá naaáí ló boo béè vààa gyọ́ọ̀ Kráìst. Pọ́ọ̀l beè emí kilma ló Ádàm kọọ̀: “Ú tulà dénè nen tení dú ló pọ́lọ́ e ene nen beè sì.” Pọ́lọ́ e Ádàm beè sìa, náa kọ á tú ú tẹẹá boóe nè dénè gbò nvín ea aàẹ́ m. È dì é gé mon tã̀àgã̀ boo béè kọọ̀ a beè lọ̀l togó kèbá Bàrì. Sõò boo béè kọọ̀ Bàrì beè kẽe a Sã́áná lọl kemà ú, è gbóò ẹ̀b dẽe sĩ́ lé dì deè sĩ́! “Kẽ̀èà aa ke mà ú é tulànà gé dénè nen tení dú ló lé e ene nen” ea Jíízọ̀s náa. Pọ́ọ̀l beè baatẽ́ kọọ̀: “Dì belí bé e ú tulà dénè nen tení dú ló gè kọ bà aa m mii Ádàma naaá, vóá bé e kẽ̀èà aa ke mà ú é tulànà gé dénè nen tení dú ló gè gbaa ló Kráìst naa é.”—1 Kọ́r. 15:21, 22.

14. É kọọ̀ Ádàm é kẽeà aa kemà ú? Baatẽ́.

¹⁴ Éé ní e Pọ́ọ̀l géè kọ̀ẹ tṍó ea kọ́ọ̀ “ú tulà dénè nen tení dú ló gè kọ bà aa m mii Ádàma” ẽ? Pọ́ọ̀l géè ló belí kilma ló dénè nen, ea náámá gbò e bà náa gbõoma boo béè kọọ̀ bà meà aa mm̀ Ádàm, kọọ̀ bàé ú. (Róm̀ 5:12) Ádàm á gé zẹ̀ẹ̀ gbò e bàé “kẽ̀èà aa ke mà ú.” Ú Kráìst náa é dọ bélè nè Ádàm boo béè kọọ̀ ẹlẹ beè gbõoma vaá a beè sẹlẹ lọ̀l togó kèbá Bàrì. Tẽ̀ènè kà nú ea beè tùlà Ádàm ní ea é tulà nàgé gbò e “Sã́áná Nen” é béélá va bel ló naamá “kà ból” e bàé ié “kpọ̀ té e bè náa é íé kùbmà” ẽ.—Máát. 25:31-33, 46; Híb. 5:9.

15. Bà mée ní e bà dṹùnà “dénè” gbò e “kẽ̀èà aa ke mà ú” é tulà ẹ?

¹⁵ Nvèè kpíí ló kọ Pọ́ọ̀l beè kọọ̀ “kẽ̀èà aa  ke mà ú é tulànà gé dénè nen tení dú ló gè gbaa ló Kráìst.” (1 Kọ́r. 15:22) Pọ́ọ̀l géè emí a kpá lẹ̀ẹ̀la tómí má gbò níí Kráìst e ba beè tṍ nóo ból e bà di Kọ́rìnt, e bà íe nèà deè ge kẽ̀èà aa kemà ú kil káála. Baala dú “gbò nvín Bàrì e a beè kolí naamá pá ńlẹ gbò tení dú ló gè gbaa ló Kráìst Jíìzọ̀s.” Vaá Pọ́ọ̀l beè kòl béè “gbò vígà m Kráìst e ba è ù.” (1 Kọ́r. 1:2; 15:18; 2 Kọ́r. 5:17) Mm̀ dõòna kà a kpá lẹ̀ẹ̀la tóm, Pọ́ọ̀l beè emí kọọ̀ “bé e beè gbá [zọ̀ Kráìst] ú naaá, vóá bé e Bàrì é kẽenai gé lọl kè mà ú, dì belí bé e a è kẽe Kráìst lọl kè mà ú naa é.” (Róm̀ 6:3-5) Jíízọ̀s beè kẽ̀èa bã mm̀ nyómá vaá kil káála. Níà nú ea é nááá ló dénè gbò e bà “gbáá ló Kráìst,” ea dú gbò e Bàrì beè tṍ va nóo ból é.

16. Éé ní e Pọ́ọ̀l géè kọ̀ tṍó ea kólí Jíízọ̀s kolíe “túá nen” ẽ́?

¹⁶ Pọ́ọ̀l beè emí kọọ̀ Kráìst ní “túá nen e Bàrì beè zẹ́ẹ́ kẽee lọl ke mà ú é.” Kẽ̀èa boo kọọ̀ dõòna gbò ea dì belí Lázarọ̀s, beè kẽ̀èà aa kemà ú vaá tõó dùm boo kunukẽ̀í, sõò Jíízọ̀s ní ea beè dú túá nen ea beè kẽ̀èà aa kemà ú bã mm̀ nyómá vaá ié dùm e bè náa tá ẹ́. Àé láá dú gè túe doolé ló túá ból súú ea dú ló nú e ba beè fò e pá Ízràẹ̀l beè olòó nè Bàrìa. Vaá tení dú ló gè kolí Jíízọ̀s kolíe “túá nen,” Pọ́ọ̀l géè naa kọ é nyimá kọọ̀ dõòna gbò é kẽeà nàgé kil káála tṍó e tṍó ni téní. Gbò tómá nè dõòna gbò e bà “gbáá ló Kráìst” é kẽeà kil káála. Tṍó e ba tṍó ni lée, bàé ié íb kẽ̀èà aa kemà ú e Jíízọ̀s beè iéá.

17. Mó tṍó ní e gbò e bà “gbáá ló Kráìst” é íe ba kpẽ́ gè kil káála ẹ́?

¹⁷ Ge kẽ̀èà aa kemà ú kil káála ea dì nè gbò e bà “gbáá ló Kráìst” gáà beè naaá tṍó e Pọ́ọ̀l beè emí kpáí má pá Kọ́rìnt. Tãa vó, Pọ́ọ̀l géè kọ́ nú ea é nááá dì deè sĩ́ kọọ̀: “Ní e a dì íe ńlẹ tṍó e a lelà ló ẹlẹ gè kẽ̀èà: Kráìst ní túá nen e a beè zẹ́ẹ́ kẽ̀èà e. Tṍó e a é dú, gbò e bà dẹlẹe nyíe boo é gbóó kẽ̀èà.” (1 Kọ́r. 15:23; 1 Tẹ̀s. 4:15, 16) Deè nieí e íná mm̀ “tṍó” e sĩ́ Kráìst ni íná kẽ e ba beè ló bel kilma lóá. Ẽei, gbò tómá nè dõòna gbò e Bàrì beè tṍ va nóo ból e ba beè ù, é élá dọ̀ọ̀mà tṍó e sĩ́ Kráìst é íná kẽ besĩ́ bà kálá ié ba kpẽ́ gè kil káála vaá Bàrì ‘kẽeé va lọl ke mà ú, dì belí bé e a è kẽe Kráìst lọl kè mà ú’ naaá.

18. (a) Éé ní ea nveè bá nèi kọ é dã́tẽ́ ló kọọ̀ dõòna kà kẽ̀èà aa kemà ú é nááá bẽene níí gbò e bàé kil káála ẹ́? (b) Éé ní e nóò lọl mm̀ 1 Kọ́rìnt 15:24-26 ea kil ló nu ea é nááá káála ẹ́?

¹⁸ Èé kọ́ vàẹ kilma ló gbò níí Kráìst e bà bọ́ló dẹ̀lẹ̀ nyíé boo e bà náa íe ẹ̀b dẽe sĩ́ gè  zọ̀ Kráìst kil káála ẹ́? Baala íe nagé ẹ̀b dẽe sĩ́ gè kẽ̀èà aa kemà ú. Kpá Káí kọ́ọ̀ gbò e bà kẽeà kil káála, “di gbàà túá gbò e a kẽeà aa ke mà ú.” (Kùùà 20:6) É kọ níá náa zógè kọọ̀ dõòna kà kẽ̀èà aa kemà ú é nááá bẽene? Níá gbááá ló bel e Jóòb beè kọ́ kilma ló a dì deè sĩ́á. (Jóòb 14:15) “Tṍó e a é dú, gbò e bà dẹlẹe nyíe boo é gboó kẽ̀èà” vaá bàé dí káála tṍó e Jíízọ̀s é tú kyọ̀à sĩ́ tẹlẹ boo kọ̀láá kà kpóó bẹbẹ̀l. “Dee dee nvée nen ọ́b gè kyọ̀ sĩ́ é dú ú.” Kọ̀láá gbò e bàé kil káála náa gé ú ná. Éé ní ea é nááá ló na gbòa ẹ?—Bugi 1 Kọ́rìnt 15:24-26.

19. Éé ní e gbò e bà íe ẹ̀b dẽe sĩ́ gè tõó boo kunukẽ̀í é ẹbmà dẽe gè ié é?

¹⁹ Éé ní e gbò e bà ból dẽe sĩ́ gè tõó boo kunukẽ̀í é ẹbmà dẽe gè ié é? Bàé láá ié ẹ̀b dẽe sĩ́ dẹẹ̀a boo moǹ bel Pọ́ọ̀l ea kọ́ọ̀: “Nda ié tẽ̀ènè íb ból dẽe sĩ́ . . . m Bàrìa, gè kọ kọ̀láá gbò nen, gbò lé nè gbò pọ́lọ́, é kẽeà aa ke mà ú.” (Tóm 24:15) À dú kà kà kọọ̀, tọ́ọ̀ kà neǹ pọ́lọ́ lab dògò náa é kil káála, vóà naa, gbò belá géè loá bel kilma ló kẽ̀èà aa kemà ú ea é nááá boo kunukẽ̀í.

20. Mósĩ́ deè ní e kẽ̀èà aa kemà ú ni síè kpóó ló o ból dẽe sĩ́é?

²⁰ Tọ́ọ̀ kà bàà-bàà bùlà á gé ló, “kẽeà aa ke mà ú” é di! Gbò e bà kẽeé va nveè mm̀ dùm boo kunukẽ̀í é íe ẹ̀b dẽe sĩ́ gè tõó dùm dọ̀ọ̀mà dè-dè. Òó láá àgala boo kọọ̀ nakà zìgà nùá é íè ge mm-má. Ból dẽe sĩ́á é láá nvèè ni nyíé gbàà tṍó eo kẽeà boo gbò eo beè vùlè e ba beè ù. Baala é láá kẽ̀èà aa kemà ú tṍó e Kráìst nè gbò ea dṹùnàe é “lẹ̀ẹ̀là bel m bàà bóó nè òb tub gbáá (1,000).” (Kùùà 20:6) Òó láá palàge àgala boo kọọ̀ be ò ú besĩ́ Kráìst à kalá dààmà togó ge bẹ̀l mm̀ Enè Tõ̀ò Gbááá, òé kẽ̀èà aa kemà ú. Nakà “ból dẽe sĩ́í náa é kẹ̀lẹ̀i.” (Róm̀ 5:5) Àé láá agẹ́lẹ́ ni ló kátogóí vaá naa kọ ó kilsĩ́ gè ié ẹ́ẹ́-ẹẹ̀ nyíe mm̀ ge sí tóm nè Bàrì. Sõò à íe gã́bug nú eé láá nó lọl ló nú ea di mm̀ 1 Kọ́rìnt 15 togó, belí bé eé beè nó mm̀ togó bel ea bẽene níí naa.