1-2. Iehova ena hesiai taudia edia helaro be dahaka?

ISEDA helaro be mai anina bada. Haida edia helaro be idia ura headava namona idia moalelaia, natudia do idia gorere lasi, eiava gorere badana ta amo idia namo. Ita Keristani taudia danu be unai bamona mauri ita ura henia. To, iseda helaro be unai sibona lasi. Iseda ura be tanobada ai do ita mauri hanaihanai bona eda mase lalokau taudia ita hedavari henia lou.

² Aposetolo Paulo ia gwau: “Lau be mai egu abidadama Dirava dekenai, . . . kara maoromaoro taudia bona kara maoromaoro lasi taudia be do idia toreisi lou.” (Kara 24:15) Paulo sibona ese toreisi lou ia gwauraia lasi, bese kwarana tauna Iobu danu be unai ia herevalaia. Iobu ia abia dae momokani Dirava ese ia do ia laloatao bona ia hatorea isi lou.​—Iobu 14:7-10, 12-15.

3. Dahaka dainai ita abia dae 1 Korinto karoa 15 ese ita do hagoadaia?

³ “Mase taudia idia toreisi lou” herevana be Keristani taudia ibounai ese idia abidadama henia gaudia edia “badina” eiava “hahediba hereva ginigunadia” ta. (Heb. 6:1, 2) Paulo ese ia herevalaia toreisi lou herevana be 1 Korinto karoa 15 ai ia noho. Ia torea herevana ese reana Keristani taudia ginigunadia ia hagoadaia bada. Ena be nega daudau lalonai toreisi lou herevana oi abidadama henia, to unai karoa ese oi do ia durua bona emu helaro do ia hagoadaia.

4. Dahaka ese ia hamomokania eda lalokau mase taudia be do idia toreisi lou?

⁴ Iesu Keriso ena toreisi lou karana ese ia hamomokania eda lalokau mase taudia be do idia toreisi lou. Unai be Paulo ese Korinto taudia dekenai ia harorolaia “sivarai namona” ena kahana ta. (1 Kor. 15:1, 2) Paulo ia gwau, bema Keristani tauna ta be toreisi lou herevana ia abia dae lasi, ena abidadama be anina  lasi. (1 Kor. 15:17) Unai dainai, ita abia dae momokani idia mase vadaeni taudia be do idia toreisi lou.

5-6. Ita dekenai Korinto Ginigunana 15:3, 4 ena anina be dahaka?

⁵ Paulo be toreisi lou ia herevalaia neganai, inai mai anina bada herevadia toi ia gwauraia: (1) “Keriso be iseda kara dika dainai ia mase.” (2) “Ia idia guria.” (3) “Dina ihatoina ai ia toreisi lou, Toretore Helagadia lalonai ia torea hegeregerena.”​—1 Korinto 15:3, 4 duahia.

⁶ Iesu ia mase, idia guria bona ia toreisi lou karana ena anina be dahaka ita dekenai? Peroveta tauna Isaia ia gwau, Mesia be “haida ese [do] idia alaia mase” bona kara dika taudia ida do “idia guria.” To gau ma ta do ia vara. Isaia ma ia gwau, Mesia be “taunimanima momo edia kara dika” do ia huaia. Iesu be mauri davana ia henia neganai unai bamona ia karaia. (Isa. 53:8, 9, 12; Mat. 20:28; Roma 5:8) Unai dainai, Iesu ia mase, idia guria bona ia toreisi lou karana dainai, ita diba momokani ita be kara dika bona mase ena igui hesiai amo do ia ruhaia, bona iseda lalokau mase taudia do ita itaia lou.

7-8. Dahaka ese Keristani taudia dekenai ia hamomokania Iesu be mase amo ia toreisi lou?

⁷ Toreisi lou karana ita abia dae momokani totona, namona be Iesu be mase amo ia toreisi lou karana ita abidadama henia. Dahaka dainai ita abia dae momokani Iehova ese Iesu be mase amo ia hatorea isi lou?

⁸ Iesu be mase amo ia toreisi lou neganai, momo ese idia itaia bona ma haida idia hamaoroa. (1 Kor. 15:5-7) Hegeregere, Paulo ia gwau aposetolo Petero (Kepa) be Iesu ia itaia tauna ginigunana ta. Hahediba taudia haida idia hamomokania Petero danu ese Iesu ia itaia. (Luka 24:33, 34) Danu, “aposetolo 12” ese Iesu idia itaia. Bena Mataio 28:16-20 ia hereva bamona, Galilea ai Iesu be hebou ta ai “tadikaka 500 mai kahana dekenai nega tamona ia hedinarai.” Iesu be iena tadina “Iamesi dekenai ia hedinarai” danu. Guna Iamesi ia abia dae lasi Iesu be Mesia, to Iesu ia itaia lou murinai, ia abidadama henia. (Ioa. 7:5) Lagani 55 C.E. ai, Paulo be unai revareva ia torea neganai, Iesu ia toreisi lou idia itaia taudia momo idia do mauri noho, unai dainai bema ta be ia daradara idia dekenai ia henanadai diba.

9. Edena dala ai Kara 9:3-5 dekenai Paulo ia hamomokania Iesu ia toreisi lou?

⁹ Gabeai, Iesu be Paulo dekenai ia hedinarai. (1 Kor. 15:8) Paulo (Saulo) be Damaseko dekenai ia lao noho lalonai, ia toreisi lou vadaeni tauna Iesu ena gadona ia kamonai bona matahanai ta amo guba ai Iesu ia itaia. (Kara 9:3-5 duahia.) Paulo ena sivarai ese ia hamomokania Iesu ia toreisi lou sivaraina be gori ta sibona lasi.​—Kara 26:12-15.

10. Paulo ia abia dae Iesu be mase amo ia toreisi lou dainai dahaka ia karaia?

¹⁰ Reana momo idia ura Paulo ena hereva idia kamonai, badina guna ia be Keristani taudia ia dagedage henia. Gabeai ia abia dae Iesu be ia toreisi lou neganai, ia gaukara goada ma haida ia durudia totona. Paulo be Iesu ia mase bona ia toreisi lou ena sivarai momokani ia harorolaia lalonai, ia idia kwadia, dibura ruma ai idia atoa, bona davara ai dika bada ia haheaukalaia. (1 Kor. 15:9-11; 2 Kor. 11:23-27) Paulo ia abia dae momokani, Iesu be mase amo ia toreisi lou, bona mai ura bada ida unai sivarai ia harorolaia ena be ia diba do ia mase. Keristani taudia ginigunadia edia hereva ese ia hamomokania Iesu be mase amo ia toreisi lou, ita danu be unai ita abia dae, a? Bona unai ese iseda abidadama toreisi lou dekenai ia hagoadaia, ani?

11. Dahaka dainai Korinto Keristani taudia haida be toreisi lou herevana idia dadaraia?

¹¹ Korinto, Grik ena siti ta ai, Keristani taudia haida be toreisi lou herevana idia dadaraia. Idia gwau “mase taudia be do idia toreisi lou lasi.” Dahaka dainai? (1 Kor. 15:12) Atena, Grik ena siti ma ta ai, aonega taudia haida idia gwau Iesu be ia toreisi lou lasi bona idia kirikirilaia. Korinto taudia bona Keristani kongrigeisen lalonai danu haida be unai idia abia dae. (Kara 17:18, 31, 32) Reana haida idia laloa toreisi lou be laulau herevana sibona. Badina idia gwau kara dika ia karaia tauna be ia “mase,” to Keristani ta ai ia lao tauna be ia “mauri” badina ia helalo-kerehai. Herevana dahaka dainai toreisi lou herevana idia dadaraia, to ia hahedinaraia edia abidadama be anina lasi. Bema Dirava be Iesu ia hatorea isi lou lasi, bona mauri davana ia karaia lasi, ita ibounai eda kara dika ia gwauatao dalana be lasi. Unai dainai toreisi lou idia dadaraia taudia be helaro lasi.​—1 Kor. 15:13-19; Heb. 9:12, 14.

12. Petero Ginigunana 3:18, 22 ena hereva bamona, edena dala ai Iesu ena toreisi lou be idau?

¹² Paulo ia abia dae momokani “Keriso be mase amo ia toreisi lou” vadaeni. Iesu ena toreisi lou karana ese guna tanobada ai idia vara toreisi lou ma haida ia hereaia, badina idia toreisi lou taudia be gabeai idia mase lou. Paulo ia gwau Iesu be “mase lalonai idia mahuta taudia amo ia toreisi lou tauna ginigunana.” Edena dala ai Iesu be toreisi lou tauna ginigunana? Ia be lauma ai ia toreisi lou tauna ginigunana bona tanobada amo guba dekenai ia daekau tauna ginigunana.​—1 Kor. 15:20; Kara 26:23; 1 Petero 3:18, 22 duahia.

13. Paulo ese Adamu bona Iesu edia idau be edena bamona ia herevalaia?

¹³ Edena dala ai tau tamona ena mase amo taunimanima milioni momo be mauri do idia abia? Paulo ese unai henanadai ia haerelaia. Paulo be Adamu ese taunimanima dekenai ia havaraia gauna, bona Keriso ena boubou ese do ia havaraia gauna edia idau ia gwauraia hedinarai. Paulo ese Adamu be inai bamona ia herevalaia, ia gwau: “Tau tamona amo mase ia vara.” Adamu ia kara dika neganai, ia bona ena natudia dekenai mase ia mailaia. Iena gwau-edeede karana dainai hisihisi ita mamia noho. To, Dirava ese ena Natuna ia hatorea isi lou dainai, vaira nega ai ita be mai eda helaro namona! “Tau tamona amo mase taudia do idia toreisi lou,” unai tauna be Iesu. Paulo ma ia gwau: “Adamu amo taunimanima ibounai idia mase noho, unai hegeregerena Keriso amo taunimanima ibounai be mauri do idia abia.”​—1 Kor. 15:21, 22.

14. Adamu be do ia toreisi lou, a?

¹⁴ Paulo ia gwau, “Adamu amo taunimanima ibounai idia mase noho” ena anina be dahaka? Paulo be Adamu ena natudia ibounai ia herevalaia, idia be Adamu amo kara dika idia abia bona idia mase noho. (Roma 5:12) “Taunimanima ibounai be mauri do idia abia” to Adamu be do ia mauri lasi. Keriso ena mauri davana ese Adamu do ia hamauria lasi, badina ia be goevadae tauna to mai ura ida Dirava ia gwau-edeede henia. Vaira negai, “taunimanima ena Natuna” ese hahemaoro ia karaia neganai, taunimanima haida do ia gwauraia “nanigosi” bona “do idia mase ela bona hanaihanai,” Adamu danu be unai hahemaoro ia abia.​—Mat. 25:31-33, 46; Heb. 5:9.

15. Korinto Ginigunana 15:22 ese toreisi lou be edena bamona ia herevalaia?

¹⁵ Ita itaia Paulo ia gwau, “Keriso amo taunimanima ibounai be mauri do idia  abia.” (1 Kor. 15:22) Paulo ena revareva be Korinto ai idia noho horoa Keristani taudia dekenai ia torea, idia be do idia toreisi lou bona guba dekenai do idia noho. Unai Keristani taudia be Dirava ese ‘ia hahelagaia bona Keriso Iesu ida idia hakapua.’ Paulo ese horoa taudia ia herevalaia, ia gwau, idia be “Keriso ida idia hakapua bona mase lalonai idia mahuta taudia.” (1 Kor. 1:2; 15:18; 2 Kor. 5:17) Paulo be lauma helaga ena siahu amo ia gwau, idia be ‘Iesu ia mase hegeregerena idia mase, vadaeni idia be ia toreisi lou hegeregerena do idia toreisi lou, bona unai dala ai idia be ia ida idia hakapua.’ (Roma 6:3-5) Iesu be lauma tauanina ai ia toreisi lou bona guba dekenai ia daekau. “Keriso ida idia hakapua” taudia, lauma helaga ese ia horoa Keristani taudia ibounai dekenai, unai bamona do ia vara danu.

16. Paulo ese Iesu ia gwauraia huahua ginigunana ena anina be dahaka?

¹⁶ Paulo ia gwau Keriso “be mase lalonai idia mahuta taudia amo ia toreisi lou tauna ginigunana.” Namona be ita laloatao tanobada ai taunimanima haida idia toreisi lou, hegeregere Lasaro, to Iesu be idau. Ia be lauma tauanina ai ia toreisi lou tauna ginigunana bona mase diba lasi maurina ia abia. Unai dainai, Paulo ese Iesu ia gwauraia huahua ginigunana neganai, ia hahedinaraia ma haida be mase amo do idia toreisi lou bona guba ai do idia noho. “Keriso ida idia hakapua” aposetolo taudia bona ma haida be gabeai Iesu bamona do idia toreisi lou.

17. “Keriso ida idia hakapua” taudia edia guba ahuna be edena negai idia abia?

¹⁷ Paulo ese Korinto Keristani taudia dekenai revareva ia torea neganai, “Keriso ida idia hakapua” taudia edia toreisi lou karana be ia do vara lasi. To, Paulo be vaira negana ia herevalaia: “Idia ta ta be edia nega ta ta ai mauri do idia abia: Keriso be ia toreisi lou guna, unai murinai Keriso idia badinaia taudia be iena noho negana lalonai do idia toreisi lou.” (1 Kor. 15:23; 1 Tes. 4:15, 16) Hari, ita be Keriso ena “noho negana lalonai” ita noho. Guna idia mase aposetolo taudia bona horoa Keristani taudia ma haida be idia naria ela bona Keriso ena “noho negana lalonai” edia guba ahuna idia abia. Unai nega ai ‘Iesu ia toreisi lou hegeregerena idia toreisi lou bona ia ida idia hakapua.’

18. (a) Dahaka dainai ita gwau diba guba lao taudia edia toreisi lou murinai, toreisi lou ma ta do ia vara? (b) Korinto Ginigunana 15:24-26 ena hereva bamona, guba ai dahaka do ia vara?

¹⁸ To abidadama Keristani taudia ma haida,  Keriso ida guba dekenai do idia noho lasi taudia, be edena bamona? Idia danu be do idia toreisi lou. Baibel ia gwau Paulo bona ma haida be “mase amo toreisi lou ginigunana” do idia abia. (Fili. 3:11) Unai ese ia hahedinaraia toreisi lou ma ta do ia vara. Unai be Iobu ese sibona ena vaira nega totona ia gwauraia herevana ida ia hegeregere. (Iobu 14:15) To “Keriso idia badinaia taudia be iena noho negana lalonai do idia toreisi lou,” bona ia ida guba dekenai do idia noho negana lalonai Iesu ese gavamani ibounai, lohia taudia ibounai, bona siahu taudia ibounai do ia haorea vaitani. Bona “mase, iseda inai tauna ginigabena” be do ia ore momokani. Oibe, guba dekenai do idia lao taudia ibounai be do idia mase lou lasi. To, taunimanima ma haida be edena bamona?​—1 Korinto 15:24-26 duahia.

19. Tanobada ai do idia noho taudia be dahaka idia naria noho?

¹⁹ Tanobada ai do idia noho taudia be dahaka idia naria noho? Paulo ena hereva idia abidadama henia diba, ia gwau: “Lau be mai egu abidadama . . . kara maoromaoro taudia bona kara maoromaoro lasi taudia be do idia toreisi lou.” (Kara 24:15) Ita diba, kara dika tauna ta be guba ai do ia vareai diba lasi, unai dainai unai hereva ese tanobada ai do ia vara toreisi lou karana ia herevalaia.

20. Inai stadi ese edena dala ai emu helaro ia hagoadaia?

²⁰ Ita diba momokani, mase taudia be do “idia toreisi lou”! Tanobada ai idia toreisi lou taudia be iniseniai do idia mauri hanaihanai diba. Oi abia dae diba unai helaro be do ia guguru. Bema emu lalokau taudia haida idia mase vadaeni, unai helaro ese oi do ia hagoadaia. Idia be Keriso bona 144,000 taudia edia lagani 1,000 lohia negana lalonai do idia toreisi lou. (Apok. 20:6) Bema Keriso ena lagani 1,000 lohia negana ia do ginidae lasi lalonai oi mase, namona be oi abia dae oi danu be do oi toreisi lou. Unai “helaro ese lalohisihisi ia havaraia lasi.” (Roma 5:5) Hari inai negai oi do ia hagoadaia bona Dirava hesiai henia gaukarana do oi moalelaia. To, 1 Korinto karoa 15 amo gau momo do ita dibaia, atikol 50 ese unai do ia hahedinaraia.