1-2. Was fer wunerlich hofnung hon Yeehoowa sayn tiiner?

HOFNUNG hon is seer wichtich. Welche layt hofe tas se tuun een froo hayrat hon, tas se tuun kesunte khiner tsiie orer tas se tuun fon een xroo krankheet keheelt wëre. Wii kriste, fiilaycht hofe mer ti selwiche tinge. Awer unser hofnung keet fiil wayter wii tas. Meyer hofe fer imer se leepe un tas unser keliipte woo kextorep sin, tuun noch mool leepe kriin.

² Te aphostel Phaul hot kesaat: “Ich hon hofnung tsu Kot . . . tas es een ufxtaye fom toot kept fon te kerechter soo wii fon te unkerechter.” (Atos 24:15) Phaul waar net te eyerste woo iwer ti hofnung fon tëm ufxtaye fom toot kexproch hot. Yoop hot aach too triwer kexproch. Eyer waar sich sicher tas Kot teet sich fon tëm erinere un tëm noch mool tsurik tsum leepe pringe. (Jó 14:7-10, 12-15)

3. Warom khan 1 Coríntios kapitel 15 nutslich fer uns sin?

³ “Tas ufxtaye fon te toote” is teel fon tëm “funtament” orer “ti eyerste inlërnunge” fon te kriste sayn klaape. (Heb. 6:1, 2) Was Phaul iwer tas ufxtaye fom toot kexproch hot, xteet in 1 Coríntios kapitel 15. Was eyer kexrip hot, hot sicher ti kriste fon sayn tsayt uf kemuut. Een tuun wii lang host tuu xon in tëm ufxtaye fom toot keklaapt, 1 Coríntios kapitel 15 tuut tich uf muute un tayn hofnung ferxtërke tas es pasiire tuut.

4. Warom khene mer uns sicher sin tas unser keliipte woo kextorep sin, uf xtaye tuun?

⁴ Tas ufxtaye fon Yeesus Kristus lost uns sicher tas wën yemant woo mer liipe xtërpt, es tuut een ufxtaye kepe. Yeesus Kristus sayn ufxtaye waar teel fon te “kuute oter” woo Phaul fer ti korinter aus kexproch hot. (1 Cor. 15:1, 2) In woerheet, tee hot kesaat tas wën een krist khee klaape aan tiise ufxtaye hët, weyer sayn klaape unutslich. (1 Cor. 15:17) Te funtament fon  unser hofnung is se klaape tas Yeesus fom toot uf kextii is.

5-6. Was tuun ti wërter woo in 1 Coríntios 15:3, 4 xteen fer uns petayte?

⁵ Wii Phaul aan kefang hot iwer tas ufxtaye se xraype, hot eyer tray woerheete foer keprung: (1) “Kristus is fer unser sinte kextorep”, (2) eyer ‘waar pekraapt’ un (3) eyer ‘waar in tëm trite taach fom toot uf keruuft, tëm noo te Xrifte’. (Lees 1 Coríntios 15:3, 4.) *

⁶ Was tuun Yeesus sayn toot, pekreepnis un ufxtaye fer uns petayte? Te profeet Isaiias hot foer heyer kesaat tas te Mesias teet “fom lant fon te lepeentiche ap kexnit” wëre, un tas eyer teet ‘eene kraap tswixich te xlechter kriin’. Awer mee waar too tepay. Isaiias hot aach kesaat tas te Mesias “ti sinte fon fiile” layt traae teet. Yeesus hot tas kemacht wii eyer sayn leepe wii fray khaaf opfer kep hot. (Isa. 53:8, 9, 12; Mat. 20:28; Rom. 5:8) Tan, Yeesus sayn toot, pekreepnis un ufxtaye kepe uns een fest funtament fer unser hofnung tas mer fon te sint un fom toot pefrayt wëre; un tas mer unser keliipte woo xon kextorep sin noch mool siin tuun.

7-8. Was tuut ti kriste helfe sich sicher sin tas Yeesus waar fom toot uf keruuft?

⁷ Unser hofnung in tëm ufxtaye fom toot ferpiint sich mit tëm ufxtaye fon Yeesus. Tes weeche, prayche mer sicher sin tas Yeesus fom toot uf kextii is. Warom khene mer uns sicher sin tas Yeehoowa hot Yeesus tsurik tsum leepe keprung?

⁸ Fiile hon mit sayn aychne aue Yeesus kesiin noo tas eyer uf kextii is un tii hon tas fer anere fertseelt. (1 Cor. 15:5-7) Te eyerste tsayer aan Phaul sayn list waar te aphostel Pheeter (Sefas). Een krup fon tisipele hot aach kesaat tas Pheeter hat Yeesus kesiin noo tëm sayn ufxtaye fom toot. (Luc. 24:33, 34) Ti aphostele hon aach Yeesus kesiin, noo tas eyer uf kextii is. Noo heyer, is Kristus ‘foer mee wii 500 priiter uf een mool tsum foer xayn khom’, fiilaycht in te froo fersamlung in Kalilëa, woo is in Mateus 28:16-20 pexrip. Yeesus is aach “fer Tyako tsum foer xayn khom”, tsiimlich sicher, Yeesus sayn xtif pruuter, woo hat friier net keklaapt tas Yeesus te Mesias waar. (João 7:5) Tyako hot ploos aan tas keklaapt noo tas eyer Yeesus kesiin hot. Es is interesant tas unkefeer im yoer 55 N.K., wën Phaul tiise priif kexrip hot, fiile woo hate Yeesus mit sayn aychne aue kesiin noo sayn ufxtaye fom toot, waare noch am leepe. Tan, wën yemant tswayfele hët tas Yeesus waar fom toot uf keruuft, khont eyer mit tiise tsayer xpreche, layt aan woo eyer traue khont.

9. Tëm noo Atos 9:3-5, was fer een aner pewaysung khont Phaul kepe tas Yeesus uf keruuft waar?

⁹ Xpeeter, is Yeesus fer te aychne Phaul tsum foer xayn khom. (1 Cor. 15:8) Phaul (Saulus) waar pis Tamaskus am reese, wën eyer hot ti xtim fon Yeesus keheert — woo xon uf keruuft waar — un hot een wisyoon fon tëm im himel kriit. (Lees Atos 9:3-5.) * Was mit Phaul pasiirt is, waar noch een pewaysung tas Yeesus sayn ufxtaye fom toot waar net een lii. (Atos 26:12-15)

10. Was hot Phaul kemacht weeche sayn klaape tas Yeesus is fom toot uf kextii?

¹⁰ Was Phaul kesaat hot teet welche noch tiifer petrefe, wayl fer een tsayt, hot eyer  ti kriste keyacht. Noo tas eyer kans sicher waar tas Yeesus is fom toot uf kextii, hot Phaul xtram kexaft fer anere fon tiise woerheet in reete. Eyer hot fiiles kephakt — tee waar ferhau, in kexpërt un sayn xif is unerkang — wii eyer ti woerheet kepreeticht hot tas Yeesus kextorep is, awer yets, waar eyer noch mool am leepe. (1 Cor. 15:9-11; 2 Cor. 11:23-27) Phaul waar sich soo sicher tas Yeesus waar fom toot uf keruuft, tas eyer fërtich waar fer se xtërpe weeche sayn klaape. Tuut tas tsaye fon te eyerste kriste tich net sicher lose tas Yeesus is fom toot uf kextii? Un tuut tas net tayn klaape aan tëm ufxtaye ferxtërke?

11. Weeche was fiilaycht hon welche in Korinto ferkheerte aanunge iwer tas ufxtaye kehat?

¹¹ Welche in te kreekix xtat fon Korinto hate ferkheerte aanunge iwer tas ufxtaye fom toot; etliche hon soo kaar kesaat tas “es khee ufxtaye fom toot kept”. Weeche was? (1 Cor. 15:12) Filosofer in een aner kreekix xtat, Atenas, hon xpooteray kemacht fon te aanung tas Yeesus uf kextii is. Weeche tas, fiilaycht welche in Korinto hon aach soo ketenkt. (Atos 17:18, 31, 32) Anere fiilaycht hon ketenkt tas tas ufxtaye simpoolix waar, es wil saan, tas een persoon woo “toot” in te sint waar khont noch mool “leepe” wii een krist kriin. Ekaal weeche was hon tiise layt net aan tëm ufxtaye keklaapt, sayn klaape waar umsonst kewees. Wën Kot hot Yeesus net uf keruuft, khee fray khaaf opfer waar petsaalt un nimant waar fertsayt. Tes weeche, tii woo tas ufxtaye ap kextos hon, hate khee woere hofnung. (1 Cor. 15:13-19; Heb. 9:12, 14)

12. Tëm noo 1 Pedro 3:18, 22, was is ti unerxiit tswixich Yeesus sayn ufxtaye un ti ufxtaye woo friier pasiirt sin?

¹² Phaul selepst wust tas “Kristus is fon te toote uf kextii”. Tiise ufxtaye waar fiil peser wii ti ufxtaye woo friier pasiirt sin, wayl ti layt woo friier uf keruuft waare sin noch mool kextorep. Phaul hot kesaat tas Yeesus waar “te eyerst woo uf keruuft waar fon tëne woo im toot in kexloof sin”. In was fer aat waar Yeesus te eyerst? Tee waar ti eyerst persoon woo is wii een kaystlich kriatuer uf kextii; un waar te eyerste mënx woo uf kextii is fer tsum himel keen. (1 Cor. 15:20; Atos 26:23; lees 1 Pedro 3:18, * 22. *)

13. Was fer unerxiit macht Phaul tswixich Aatam un Yeesus?

¹³ Wii khent te toot fon eene man leepe tsu milyoone layt pringe? Phaul hot tas taytlich keantwort. Tee hot ti unerxiit aus keleet tswixich was Aatam fer ti mënxheet keprung hat un was is meechlich torich Kristus. Iwer Aatam, Phaul hot kexrip: “Te toot is torich eene man khom.” Wën Aatam kesint hot, hot eyer toot fer sich selepst un fer al sayn nookhomer keprung. Meyer layte noch fiil weeche sayn unfolichkheet. Awer, wayl Kot hot sayn Soon uf keruuft, khene mer eene xeen tsukhunft hon! “Tas ufxtaye fom toot khomt aach torich eene man” — Yeesus. Un Phaul hot noch kesaat: “Wayl, soo wii in Aatam ale am xtërpe sin, soo aach in Kristus tuun ale leepe kriin.” (1 Cor. 15:21, 22)

14. Wërt Aatam fom toot uf keruuft? Lee tas aus.

¹⁴ Was wolt Phaul saan wën eyer kesaat hot tas “in Aatam ale am xtërpe sin”? Phaul waar am xpreche iwer al ti mënxe, woo hon ti sint un ti imperfektsyoon fon Aatam keërpt, un tes weeche, tuun xtërpe. (Rom. 5:12) Aatam is net tswixich tëne woo tuun “leepe kriin”. Kristus sayn fray khaaf opfer tuut net tsu  tëm kile, wayl Aatam waar eene perfekte man woo, ferkërn, hot Kot net aan keheert. Was mit Aatam pasiirt is, is tas selwiche woo pasiire tuut mit tëne woo “te Soon fom Mënx” wii “kaprite” richte tuut, es wil saan: “eewich fernichtung”. (Mat. 25:31-33, 46; Heb. 5:9)

15. Weer is tepay tswixich “ale” woo ‘tuun leepe kriin’?

¹⁵ Mërk tas Phaul hot kesaat tas “in Kristus tuun ale leepe kriin”. (1 Cor. 15:22) Phaul hot sayn priif kexrip fer ti kesalpte kriste in Korinto, woo weyere uf keruuft fer im himel leepe. Tiise kriste sin “kehaylicht kep in eenichkheet mit Yeesus Kristus” un sin “keruuft kep fer hayliche se wëre”. Un Phaul hot aach kexproch iwer tii woo “im toot in kexloof sin in eenichkheet mit Kristus”. (1 Cor. 1:2; 15:18; 2 Cor. 5:17) In een aner inspiriirte priif, Phaul hot kexrip tas tii woo “eenich mit [Yeesus] waare in te eenlichkheet fon tëm sayn toot” tuun “eenich mit tëm wëre in te eenlichkheet fon tëm sayn ufxtaye”. (Rom. 6:3-5) Yeesus is wii een kayst uf kextii un is tsum himel kang. Kraat tas tuut pasiire mit al woo “in eenichkheet mit Kristus” sin — al ti kesalpte kriste.

16. Was wolt Phaul saan wën eyer Yeesus wii “ti eyerste friichte” keruuft hot?

¹⁶ Phaul hot kexrip tas Kristus waar “te eyerst woo uf keruuft waar fon tëne woo im toot in kexloof sin”. Eriner tich tas anere layt, soo wii Lasaro, sin uf te eyert tsurik tsum leepe keprung; awer Yeesus waar te eyerst kewees woo is fom toot wii een kayst uf keruuft un woo hot eewiche leepe kriit. Meyer khene tëm ferklayche mit te eyerste friichte fon te ërntung woo ti israelite hon tsu Kot keopfert. Un wii Phaul kesaat hot tas Yeesus waar “te eyerst woo uf keruuft waar” — ti eyerste friichte —, eyer wolt saan tas anere mënxe teete noo Yeesus uf keruuft wëre fer im himel se leepe. Ti aphostele un anere “in eenichkheet mit Kristus” teete, mit te tsayt, uf keruuft wëre fer im himel se leepe, soo wii Kristus waar.

17. Wanee teete tii woo “in eenichkheet mit Kristus” sin, sayn himlix peloonung kriin?

¹⁷ Tas himlix ufxtaye, fer tii woo “in eenichkheet mit Kristus” sin, hat noch net aan kefang in te tsayt tas Phaul sayn priif fer ti korinter kexrip hot. Xtats tas, Phaul hot kesaat tas es teet in te futuer pasiire: “Awer yeete eene wën sayn mool in te ray is: Kristus, te eyerste woo uf keruuft is; noo heyer tii woo tsu Kristus keheere, torich sayn presëns.” (1 Cor. 15:23; 1 Tes. 4:15, 16) Hayt, leepe mer in Kristus sayn “presëns”, woo foer heyer raus kesaat waar. Ti aphostele un anere kesalpte kriste woo kextorep sin, prauchte waarte pis tiise  presëns fer sayn himlix peloonung kriin un fer “eenich mit [Yeesus] wëre in te eenlichkheet fon tëm sayn ufxtaye”.

18. (a) Warom khene mer saan tas es tuut een aner ufxtaye kepe noom himlix ufxtaye? (b) Tëm noo 1 Coríntios 15:24-26, was tuut im himel pasiire?

¹⁸ Awer, was tuut pasiire mit al ti troye kriste woo net ti hofnung hon fer im himel mit Kristus leepe? Tii hon aach ti hofnung fon tëm ufxtaye. Ti Piipel saat tas Phaul un anere woo tsum himel keen, sin ‘tepay aan tëm ufxtaye fom toot woo eente pasiire tuut’. (Fil. 3:11) Tas tsaycht tas een aner ufxtaye tuut xpeeter pasiire. Tas xtimt aach mit was Yoop iwer sayn tsukhunft kesaat hot. (Jó 14:15) “Tii woo tsu Kristus keheere, torich sayn presëns”, wëre mit Yeesus im himel sin wën eyer al ti rechiirunge, autoriteete un macht fernicht. Soo kaar “te letste faynt, te toot”, wërt fernicht. Kewis, tii woo uf kextii sin fer im himel leepe tuun nii mee xtërpe. Awer was tuut mit te anere pasiire? (Lees 1 Coríntios 15:24-26.) *

19. Was khene tii, woo een eyertlich hofnung hon, waarte?

¹⁹ Was khene tii, woo een eyertlich hofnung hon, waarte? Tii khene hofnung kriin fon Phaul sayn wërter: “Ich hon hofnung . . . tas es een ufxtaye fom toot kept fon te kerechter soo wii fon te unkerechter.” (Atos 24:15) Sicher, khee unkerecht persoon khan in tëm himel rin keen. Tan, tiise wërter tsayche tas, in te futuer, es tuut een ufxtaye uf te eyert kepe.

20. Wii is tayn hofnung ferxtërkt kep?

²⁰ Meyer khene uns sicher sin “tas es een ufxtaye fom toot kept”! Tii woo uf te eyert tsurik tsum leepe keprung wëre, khene ti hofnung hon fer too hiir fer imer leepe. Tuu khanst aan tas mit tayn kans hërts traue! Tiise hofnung khan tich treeste wëns tuu tenkst aan tayn keliipte woo xon kextorep sin. Tii khene fom toot uf keruuft wëre in te tsayt wën Yeesus un anere tuun “torich tausent yoore rechiire”. (Apo. 20:6) Tuu khanst tich aach sicher sin tas wëns tuu xtërpst foer tiise tsayt, wërst tuu uf keruuft. “Meyer khene wërklich traue aan te hofnung woo mer hon.” (Rom. 5:5) Tii khan tich xon yets xtark hale un tayn frayt ferkreese wëns tuu Yeehoowa tiinst. Awer meyer khene noch fiil lërne fon 1 Coríntios kapitel 15, un te neekste artikel tuut too triwer xpreche.