1-2. Nama pengadang ti ngagaka ati nembiak Jehovah?

PENGADANG amat beguna. Mayuh orang arapka tikah ti mujur, gerai ari penyakit ti balat tauka bisi pengerai ba bala anak. Taja pan kitai ngarapka utai ti sama, tang kitai deka ngarapka lebih agi ari nya. Kitai bisi pengadang idup belama iya lalu betemu baru enggau orang ke dikesayau ke udah mati.

² Rasul Paul madah: “Aku bisi siti pengadang . . . iya nya semua orang ke lurus enggau ke enda lurus deka diangkatka ari mati.” (SKR. 24:15) Paul ukai orang keterubah madahka pasal pengangkat ari mati. Jop mega bisi nyebut pasal pengadang tu. Iya pechaya Petara ingatka iya, lalu deka ngangkatka iya idup baru.—Jop 14:7-10, 12-15.

3. Baka ni 1 Korint bagi 15 nulung kitai?

³ “Pengangkat ari mati” nya siti ari batang ajar pengarap Kristian. (Heb. 6:1, 2) Paul nulis pasal pengangkat ari mati ba 1 Korint bagi 15. Utai ke ditulis iya tentu udah meransang orang Kristian ba kurun keterubah. Lalu tu ulih meransang kitai sereta ngeringka pengadang kitai pasal pengangkat ari mati.

4. Baka ni kitai nemu pengangkat ari mati ulih nyadi?

⁴ Ketegal pengangkat Jesus ari mati, kitai ulih pechaya orang ke dikesayau kitai ke udah mati deka diangkatka  idup baru. Tu sebagi ari ‘berita manah’ ke ditusui Paul ngagai orang Kristian ba Korint. (1 Kor. 15:1, 2) Enti sida enda pechaya pengangkat Jesus ari mati, pengarap sida nadai guna.—1 Kor. 15:17.

5-6. Nama kaul 1 Korint 15:3, 4 enggau kitai?

⁵ Lebuh Paul berengkah nulis pasal pengangkat ari mati, iya nyebut pasal tiga iti pekara: (1) “Kristus mati ketegal dosa kitai.” (2) Iya “dikuburka.” (3) Iya “diangkatka idup baru ba hari ti ketiga, munyi ti ditulis dalam Bup Kudus.”—Bacha 1 Korint 15:3, 4.

⁶ Nama kaul tiga iti pekara tu enggau kitai? Nabi Isaiah madahka Messiah deka “dibunuh” lalu “dikuburka begulai enggau orang ke jai.” Tang, bisi utai bukai ke deka nyadi. Isaiah madah Messiah deka nanggung “dosa orang mayuh.” Nya kebuah Jesus meri nyawa iya nyadika tebus. (Isa. 53:8, 9, 12; Mat. 20:28; Rom. 5:8) Nya alai, pemati Jesus, iya dikubur sereta pengangkat iya ari mati meri kitai pengelepas ari dosa enggau pemati, lalu ulih begulai baru enggau orang ke dikesayau ke udah mati.

7-8. Nama nulung orang Kristian pechaya Jesus udah diangkatka idup baru?

⁷ Ngambika kitai pechaya pengangkat ari mati amat deka nyadi, kitai enda tau enda pechaya Jesus udah diangkatka idup baru. Nama kebuah kitai ulih pechaya Jehovah udah ngangkatka Jesus idup baru?

⁸ Pengudah Jesus diangkatka idup baru, iya ngayanka diri ngagai bala murid iya. (1 Kor. 15:5-7) Saksi keterubah ke disebut Paul iya nya Peter. Bala murid ke bukai mega madahka Peter bisi meda Jesus ke udah idup baru. (Luk. 24:33, 34) Pia mega, bala rasul meda Jesus pengudah iya angkat idup baru. Jesus mega ‘pegari di mua lebih lima ratus iku murid iya sereta sekali.’ Udah nya iya “pegari di mua James,” menyadi tiri iya ke terubah enda arapka iya Messiah. (Jhn. 7:5) Pengudah iya meda Jesus, nya baru iya pechaya. Lebuh Paul nulis surat tu ba taun 55 Masihi, mayuh ari saksi ke udah meda Jesus agi idup. Nya alai, enti bisi orang ke enda pechaya pengangkat Jesus ari mati, sida ulih ngiga bala saksi tu.

9. Nitihka Kereja Rasul 9:3-5, baka ni utai ti nyadi ba Paul nunjukka Jesus udah diangkatka idup baru?

⁹ Pengudah nya, Jesus ngayanka diri ngagai Paul. (1 Kor. 15:8) Lebuh Paul (Saul) mansang ngagai Damaskus, iya ninga nyawa Jesus lalu meda genera Jesus ba serega. (Bacha Kereja Rasul 9:3-5.) Utai ke nyadi ba Paul endang terang nunjukka Jesus udah diangkatka idup baru.—SKR. 26:12-15.

10. Nama utai ke digaga Paul ketegal iya pechaya Jesus udah diangkat idup baru?

¹⁰ Sebedau Jesus pegari ba mua Paul, Paul balat merinsaka eklisia Kristian. Pengudah iya meda Jesus ke udah angkat idup baru, iya bebendar madahka pekara nya nyentukka iya sanggup disipat, ditutup dalam rumah jil sereta ditabanka kapal karam. (1 Kor. 15:9-11; 2 Kor. 11:23-27) Indah, Paul sanggup mati ketegal ngetanka utai ke dipechayaka iya pasal pengangkat Jesus ari mati. Endaka tu nulung nuan andal Jesus udah diangkatka idup baru? Endaka tu negapka pengarap nuan pasal pengangkat ari mati jemah ila?

11. Nama kebuah orang ba Korint bisi runding ti salah pasal pengangkat ari mati?

¹¹ Sekeda orang ari Korint bisi runding ti salah pasal pengangkat ari mati. Sida indah ngumbai “orang nadai diangkatka ari mati.” Nama kebuah? (1 Kor. 15:12) Orang ke bepenemu ari Atens ngeleseka pasal penemu Jesus ke diangkatka ari mati, lalu runding tu ngachau sekeda orang ba Korint. (SKR. 17:18, 31, 32) Sida ke bukai bisi penemu pengangkat ari mati reti nya orang “mati” ketegal bedosa lalu “idup” baru lebuh sida nyadi orang Kristian. Ketegal sida enda pechaya pengangkat ari mati, pengarap sida nadai guna. Enti Petara enda ngangkatka Jesus ari mati, reti nya tebus bedau dibayar lalu semua agi bedosa. Nya alai, enti sida enda pechaya pengangkat ari mati, sida nadai pengadang.—1 Kor. 15:13-19; Heb. 9:12, 14.

12. Nitihka 1 Peter 3:18, 22, baka ni kitai nemu pengangkat Jesus ari mati jauh manah agi ari pengangkat orang ke sebedau iya?

¹² Paul nemu “Kristus udah diangkatka ari mati.” Pengangkat Jesus ari mati jauh manah agi ari pengangkat orang ke sebedau iya laban sida ulih mati baru. Paul madah Jesus “orang ke terubah diangkatka idup baru ari bala orang ke udah mati.” Nama reti nya? Iya orang ke terubah diidupka dalam roh lalu niki ke serega.—1 Kor. 15:20; SKR. 26:23; bacha 1 Peter 3:18, 22.

13. Nitih ku Paul, nama bida entara Adam enggau Jesus?

¹³ Baka ni pemati seiku orang ulih meri pengidup ngagai bejuta iku orang? Kena nyaut tanya tu, Paul nerangka bida entara Adam enggau Jesus. Ku Paul, “Pemati datai ulih siku mensia,” iya nya Adam. Ketegal Adam enda ngasi, kitai mega bedosa baka iya. Tang ketegal Petara ngangkatka Anak Iya, kitai bulih pengadang! Nya kebuah, “pengangkat ari mati mega datai ulih siku mensia,” iya nya Jesus. Ku Paul: “Laban semua mensia mati dibai Adam, nya alai semua mensia deka idup dibai Kristus.”—1 Kor. 15:21, 22.

14. Kati Adam deka diangkatka idup baru? Terangka.

¹⁴ Nama reti ku Paul lebuh iya madah “semua mensia mati dibai Adam”? Tu ditujuka ngagai peturun Adam, ke bela udah bedosa lalu deka mati. (Rom. 5:12) Adam nadai pengadang deka diangkatka idup baru. Iya enda bulih penguntung ari tebus Kristus. Taja pan iya mensia ti sempurna, tang iya sengaja enda ngasika Petara. Lebuh “Anak Mensia” ngakim, sida ke dikumbai “kambin” deka “diukum belama iya” baka Adam.—Mat. 25:31-33, 46; Heb. 5:9.

15. Sapa “semua mensia” ke “deka idup”?

¹⁵ Ku Paul madah, “semua mensia deka idup dibai Kristus.” (1 Kor. 15:22) Surat Paul ditujuka ngagai orang Kristian ke dipilih ke serega ba Korint. Sida “dikuduska dalam Jesus Kristus, ke dikangauka nyadi nembiak Tuhan” lalu “ke udah mati dalam Kristus.” (1 Kor. 1:2; 15:18; 2 Kor. 5:17) Dalam siti agi surat ke ditulis Paul, iya madah sida ke ‘udah begempung enggau [Jesus] dalam pemati iya’ deka mega ‘begempung enggau [Jesus] dalam pengangkat iya ari mati.’ (Rom. 6:3-5) Baka Jesus ke udah diangkatka nyadi roh lalu niki ke serega, baka nya mega sida ke dipilih ke serega.

16. Nama reti ku Paul lebuh iya madah Jesus “orang ke terubah”?

 ¹⁶ Paul madah Kristus “orang ke terubah diangkatka idup baru ari bala orang ke udah mati.” Taja pan bisi orang bukai ke udah diangkat idup baru sebedau Jesus, tang iya orang ke terubah diangkatka idup baru dalam tubuh roh sereta nerima pengidup belama iya. Iya baka buah bungas maya musin ngetau ke diberi orang Israel ngagai Petara. Pia mega, lebuh Paul madahka Jesus “orang ke terubah,” tu reti iya bisi orang bukai pengudah Jesus ke deka diangkat idup baru lalu niki ke serega. Sapa sida nya? Iya nya bala rasul enggau sida ke bukai ke dipilih ngena roh kudus.

17. Kemaya sida ke dipilih ngena roh kudus diangkatka idup baru ba serega?

¹⁷ Bala rasul enggau sida ke dipilih bedau diangkat ke serega lebuh Paul nulis surat ngagai orang Kristian ba Korint. Tang Paul madah tu deka nyadi jemah ila. Ku iya: “Tang genap iku deka diangkatka begintir-gintir: keterubah, Kristus ke buah bungas, lalu lebuh Kristus datai baru, nya baru bala nembiak Kristus.” (1 Kor. 15:23; 1 Tes. 4:15, 16) Kemayaharitu, kitai diau ba maya Kristus “datai baru.” Nya alai, bala rasul enggau sida ke dipilih ke serega patut nganti maya penatai Kristus sebedau sida ulih diangkatka idup baru lalu ‘begempung enggau [Jesus] dalam pengangkat iya ari mati.’

18. (a) Nama kebuah kitai ulih ngumbai siti agi pengangkat ari mati deka nyadi pengudah pengangkat sida ke dipilih ke serega? (b) Nama dipelajarka kitai ari 1 Korint 15:24-26 pasal utai ke deka nyadi ba serega?

¹⁸ Baka ni enggau orang Kristian ke enda dipilih idup enggau Jesus ba serega? Sida mega deka diangkatka idup baru. Bup Kudus madahka Paul enggau sida ke dipilih ngagai serega “orang ke diangkatka ari mati ti keterubah.” (Pem. 20:6) Reti nya, bisi siti agi pengangkat ari mati pengudah nya. Tu sejalai enggau utai ke diandalka Jop. (Jop 14:15) “Lebuh Kristus datai baru, nya baru bala nembiak Kristus” udah enggau Jesus ba serega lebuh iya ngerusak  semua pemerintah, perintah enggau kuasa. Indah, “munsuh ti pemadu dudi,” iya nya pemati, deka dirusak. Nya alai, pemati nadai nyadi agi ba sida. Tang baka ni enggau sida ke bukai?—Bacha 1 Korint 15:24-26.

19. Nama ulih dikearapka sida ke bisi pengadang idup ba dunya?

¹⁹ Baka ni enggau sida ke bisi pengadang idup ba dunya? Ku Paul: “Aku bisi siti pengadang . . . , iya nya semua orang ke lurus enggau ke enda lurus deka diangkatka ari mati.” (SKR. 24:15) Kati orang ke enda lurus ulih tama ke serega? Tentu enda! Nya alai, jaku Paul nya ditujuka ngagai pengangkat ari mati ba dunya.

20. Nama kebuah nuan pechaya pengangkat ari mati ulih nyadi?

²⁰ Endang amat, pengangkat ari mati deka nyadi! Sida ke diangkat idup baru bisi peluang idup belama iya ba dunya. Nuan ulih arapka semaya tu. Enti diri sebilik nuan udah nadai, pengadang tu ulih ngelantangka ati nuan. Sida deka diangkatka idup baru lebuh Kristus enggau sida ke dipilih deka ‘merintah enggau iya seribu taun.’ (Pem. 20:6) Nuan mega ulih arap, enti sema nuan mati sebedau Seribu Taun Kristus Merintah, nuan ulih diangkatka idup baru. “Pengadang [tu] enda ngelebuka kitai.” (Rom. 5:5) Iya ulih ngeringka kitai lalu ngelantangka ati kitai lebuh nyembah Jehovah. Tang mayuh agi ulih dipelajarka kitai ari 1 Korint bagi 15. Kitai deka berandauka nya pengudah artikel tu.