1-2. Ẹhị ọrịrịị-rịrị ọnyịịla oyina anchẹ nya iJihova à tị́ la?

ẸHỊ ọrịrịị-rịrị baba nyịlẹhị-ịlẹhị. Angịhyẹ la ẹhị ọrịrịị-rịrị nyori awụlẹ oyeye nyaa ka ju ọkẹkẹnị, ị ka ma anyị ịlẹ kị ka la ogogo, lee o-ye uda ọhọhọ nya ẹdụrụ ọnyọọngịrị ọlẹ kọ jwáa. Ahị angịnyị nya Ohe Oluhye ka la ẹhị ọrịrịị-rịrị u-uhye nya ang ịlịịwẹ ịnyịnyị myị́. Ma, ahị la ẹhị ọrịrịị-rịrị u-uhye nya ang ọlẹ kọ gụ ọwẹ wẹẹ. O ri ẹla u-uhye nya ọhịhị ọmyịmyị-ka ọlịlahị bala angịlikẹjẹ nyahị ịlẹ kị gbu ọ-ka wuleji bwula igu.

² Ọlẹrụ ịPọlụ yẹkẹẹ: “Ẹhị ọrịrịị-rịrị ọnyịịla ọlẹ kam la ẹ-ẹga nya Ohe Oluhye . . . ri yẹkẹẹ, owuleji bwula igu ka juwa ha angịnyị wuu tụ alabwẹla ọnyịịla bala alabwẹla onyobyi ịnyịnyị.” (Ụkụr. 24:15) Ị-ịPọlụ à ri ọngọ ọhọhẹ ọlẹ kọ ya ẹla u-uhye nya owuleji bwula igu ka. IJobu ọlụka onyogo ya ẹla u-uhye nyamwụ ịnyịnyị. Ọ jẹ́ myị̀myị̀ nyori Ohe Oluhye ka kpịtịya nyamwụ bala o-wuloo eji ka la ọhịhị myị́myị́.​—Job 14:7-10, 12-15.

3. Ịyẹ tị́ du ká ụpwụ nya 1 Ala ịKọrịntị egbeju 15 ka jẹ́-ẹ dahị ụbwọ?

³ “Owuleji bwula igu nya angị gbugbu” juwa ẹ-ẹpwụ nya ang ịlẹ kị ri “itiwe” lee “ang ịmẹjẹ nya ọgbanyẹ-ọgbanyẹ” ịlẹ wuu ká angịnyị nya ịKịrayịsị myị la. (Hib. 6:1, 2) Ẹla ọlẹ ká ịPọlụ ya u-uhye nya owuleji bwula igu juwa ụ-ụpwụ nya 1 Ala ịKọrịntị egbeju 15. Ẹla ọlẹ kọ da ka ju angịnyị nya ịKịrayịsị ịlụka nyamwụ ọhụ nyịlẹhị-ịlẹhị. Jaabwọ myị́ abwọ kọ tata ka ba kahị myị la ẹla nya owuleji bwula igu lẹ, egbeju nya ụpwụ ọwẹ ka juhi ọhụ bala o-ju ẹhị ọrịrịị-rịrị nyahị ọngịrị nyori ọ ka lịnyị ịnyịlẹhị.

4. Ịyẹ tị́ du kahị ka jẹ́ myị̀myị̀ nyori alikẹjẹ nyahị ịlẹ kị gbu ka wuleji bwula igu?

⁴ Owuleji bwula igu nya iJisọsị ịKịrayịsị du kahị jẹ́ myị̀myị̀ nyori kori ká alikẹjẹ nyahị-ị́ gbu wẹwẹ, ị ka wuleji bwula igu myị́. Owuleji bwula igu nya ịKịrayịsị juwa ẹ-ẹpwụ nya “ẹrụ ọnyịịla” ọlẹ ká ịPọlụ kpa pyẹ ya je ala ịKọrịntị. (1 Kọr. 15:1, 2) Ọ dọmwụ ya nyori kori ká ọngịnyị nya ịKịrayịsị nyị myị ju ẹla nya owuleji bwula igu ka aalẹ, ọmyịmyị nyamwụ nyị ka ri ang ododu. (1 Kọr. 15:17) Ọ-la  ọmyịmyị u-uhye nya owuleji bwula igu nya iJisọsị à du kahị ka jẹ́-ẹ myị nyori angịkịla ka wuleji bwula igu ịnyịnyị lẹ.

5-6. Apyobwuna oyina ahị tị́ ka ye bwu ẹla ọlụpwụ nya 1 Ala ịKọrịntị 15:3, 4?

⁵ Ụka ọlẹ ká ịPọlụ dọmwụ nya ọ-da ụpwụ u-uhye nya owuleji bwula igu, ọ gu ẹnyị nya ẹlịlẹhị ịta. Ẹlịlẹhị ịịwa ri (1) “ỊKịrayịsị gbu chajị nya ịhọbịrị nyahị.” (2) Ị “jwoo eji.” (3) “Ọ wuleji bwula igu la ẹnụtụrụ ọhata, juwa hịhị myịmyị, jaabwọ kị da kpehe ẹ-ẹpwụ nya Ụpwụ Ịgọgọ.”​—Wa 1 Ala ịKọrịntị 15:3, 4.

⁶ Apyobwuna oyina ahị tị́ ka ye bwu igu ogbugbu, o-ju eji bala owuleji bwula igu nya iJisọsị? Ọlọmwụ Ayịsaya ya ẹla u-uhye nya iMesaya neeji nyori nyị ka “nwọọ” bala o-ri nyị ka “ju iworu nyamwụ ẹ-ẹga nya angịnyị inyibyi.” Ọ́ tị ba ọọwẹ kem ka. Ayịsaya myị́myị́ yẹ ọmwụ nyori iMesaya nyị ka “ye ịhọbịrị nya iru nya angịnyị lụmẹ kpa.” IJisọsị họ ẹla ọwẹ jịra bwula iya ọkịlaa-kịla nyamwụ. (Ayị. 53:8, 9, 12; Mat. 20:28; Rom. 5:8) Lẹ igu ogbugbu, o-ju eji, bala owuleji bwula igu nya iJisọsị ịKịrayịsị ri ang ịkpọnchị ịlẹ kị du kahị ka la ẹhị ọrịrị nyori ahị ka jẹ́-ẹ ye ọ-gba kpehe bwu ẹpwụ nya ọhọbịrị bala igu myị́ bala ọ-yẹjula alikẹjẹ nyahị ịlẹ kị gbu myị́myị́ wẹẹ.

7-8. Ẹlịyẹ à tị́ da angịnyị nya ịKịrayịsị ụbwọ nyọka myị nyori iJisọsị wuleji bwula igu ịnyịlẹhị?

⁷ Ahị baba nyọka myị nyori iJisọsị wuleji bwula igu ịnyịlẹhị ene kahị ka jẹ́-ẹ la ahị ọdahile nyori owuleji bwula igu ka ji ị-ịlahị. Ịyẹ tị́ du kahị ka jẹ́ myị̀myị̀ nyori iJihova tịrị iJisọsị ẹkpẹ wẹ ọhịhị?

⁸ Alibeenu lụmẹ-lụmẹ ịlẹ kị kpẹhị nyịlaa yẹ iJisọsị nyọlẹ kọ wuleji bwula igu kpá ya dodehe je angịkịla. (1 Kọr. 15:5-7) Olibeenu ọhọhẹ ọlẹ ká ịPọlụ gu ẹnyị ri ọlẹrụ iPita (ịSẹfasị). Ebwo nya angịjụgbẹyị ịhyẹ ya nyori iPita nyị yẹ iJisọsị nyọlẹ kọ wuleji bwula igu kpá ịnyịlẹhị. (Luk. 24:33, 34) Myị́myị́, alẹrụ yẹ iJisọsị ụka ọlẹ kọ wuleji bwula igu kpá ịnyịnyị. “ỊKịrayịsị myịmyị chị ịlọmwụ ehe mẹjẹ iru nya angịnyị ịlẹ kị lụmẹ gụ . . . angị ohu ịrụ chiriri, lụka ọlẹ kịịwa wuu juwa ẹ-ẹga ookpokpo.” Ọ chịkpẹẹ myị́ kọ ka ri ọjịra-jịra ọkpịpyọ-kpịpyọ ọlẹ kị la ị-ịGalili ọlẹ kị gu ẹnyị ụ-ụpwụ nya ịMatiyu 28:16-20. IJisọsị myị́myị́ “chị ịlọmwụ ehe mẹjẹ iJemsi” kọ ka ri ọnyadamwụ ọlẹ kọ myị ene-ene nyori iJisọsị nya-à ri iMesaya lẹ ka myị́. (Jọn. 7:5) IJemsi wẹ ka la ọmyịmyị nyọlẹ kọ yẹ iJisọsị kọ wuleji bwula igu kpá. Ọ kpịpyọ lụmẹ nyori, lala ẹka iwo ịrụ kụrụ ịrụ nyọlẹ kị ma ịKịrayịsị kpá (55 C.E.), ụka ọlẹ ká ịPọlụ da ụpwụ ọwẹ, iru nya angịlẹ kị kpẹhị nyịlaa yẹ ịkịrayịsị nyọlẹ kọ wuleji bwula igu kpá juwa la ọhịhị wẹẹ. Lẹ, ọngọngọhẹ ọlẹ kọ la ịwẹẹ ọdada u-uhye nya owuleji bwula igu nya iJisọsị ka jẹ́-ẹ tọ angịlẹ kị kpẹhị nyịlaa ri ibeenu wo.

9. Ẹlịyẹ ụpwụ nya Ụkụrwọ nya Alẹrụ 9:3-5 à tị́ ya kọ mẹjẹ nyori ịPọlụ ka jẹ́-ẹ ri ibeenu nya owuleji bwula igu nya iJisọsị yẹẹyẹẹ?

⁹ Ị-ịlahị, iJisọsị chịlọmwụ ehe mẹjẹ ịPọlụ ayịdang. (1 Kọr. 15:8) ỊPọlụ (ịSọlụ) wẹẹ jẹ ka ịDamasịkọsị ụka ọlẹ kọ wo omyi nya iJisọsị ku ẹkpẹ nyọlẹ kọ wuleji bwula igu kpá bala ọ-yọọ a-arụrụ kọ juwa e-epwoohe. (Wa Ụkụrwọ nya Alẹrụ 9:3-5.) Ẹla ọlẹ kọ họ ta ịPọlụ wẹ mẹjẹ nyori owuleji bwula igu nya iJisọsị á ri ẹla nya ujwo ka.​—Ụkụr. 26:12-15.

10. Ẹlịyẹ ịPọlụ à tị́ họ nyọlẹ kọ myị nyori iJisọsị wuleji bwula igu ịnyịlẹhị?

¹⁰ Ẹla ọlẹ ká ịPọlụ ya ka há angịhyẹ yẹẹyẹẹ chajị ene ká iJisọsị chịlọmwụ ehe mẹjọ́ọ, ọ kaa tụ́ angịnyị nya ịKịrayịsị pyịpyị. Nyọlẹ ká ịPọlụ myị nyori iJisọsị nyị wuleji bwula igu ịnyịlẹhị, ọ họ ụkụrwọ la ọngịrị-ọngịrị nyọka da angịkịla ụbwọ myị ju ẹlịlẹhị ọwẹ. Ọ bọhụ ẹ-ẹpwụ nya enyiri, ube nya agba, ụgbọ nya enyi ọ-bịrị lọọ ụka ọlẹ kọ wẹẹ kpa ẹlịlẹhị ọwẹ pyẹ nyori iJisọsị gbu, ọ tị juwa hịhị myị́myị́. (1 Kọr. 15:9-11; 2 Kọr. 11:23-27) ỊPọlụ jẹ́ myị̀myị̀ nyori iJisọsị wuleji bwula igu ịnyịlẹhị, ịnyị à dudu kọ nwụlanọ nyọka  dọmwụ ya ịlọmwụ gbu u-uhye nya o-ya ọmyịmyị nyamwụ ọwẹ dodehe lẹ. Ang ẹjẹẹ i-bwu ẹga nya angịnyị nya ịKịrayịsị ịla oyi ọhọhẹ ịlẹ kị jẹ́ nyori iJisọsị nyị wuleji bwula igu dahị ụbwọ nyọka myị ịnyịnyị, lee ịnyị tị́ ka? Ọọwa á ju ọmyịmyị nyang ọngịrị ẹ-ẹga nya owuleji bwula igu ịnyịnyị ka?

11. Ịyẹ tị́ ka du myị́ ká angịnyị nya ịKịrayịsị ịhyẹ ị-ịKọrịntị ka la irya ọ-la kpakpa-ka u-uhye nya owuleji bwula igu?

¹¹ Angịnyị nya ịKịrayịsị ịhyẹ ilepweji nya ịKọrịntị ụ-ụwa i-iGiriki la irya ọ-la kpakpa-ka u-uhye nya owuleji bwula igu. Angịhyẹ nyaa dọmwụ ya nyori “owuleji bwula igu ọhẹ-lọhẹ nyị́ ji ha angị gbugbu kaka.” Ịyẹ tị́ du? (1 Kọr. 15:12) Ẹla nya owuleji bwula igu nya iJisọsị kaa kpa angịmẹjẹ ịla Atẹnsị kọ ri epweji ọkịla i-iGiriki ẹlẹhụ. Lẹ, angịhyẹ ị-ịKọrịntị tụ́ alọjịra-jịra ọlụwa ka la irya ọlịịwẹ myị́. (Ụkụr. 17:18, 31, 32) Angịkịla tị ka kụ irya myị́ nyori owuleji bwula igu nyị́ ri ẹla nya igu ogbugbu ọlam ọwẹ ka. Ọkọkọ nyọọwa, ị ka yọọ myị́ nyori ala ịhọbịrị nya-à ri angị gbugbu lẹ. Ụka kị tị wẹ ka ri angịnyị nya ịKịrayịsị, ị ka ya nyị tịrẹkpẹ wẹ ọhịhị lẹ, chajị ị ka ye ọ-hịnyọhi nya ọhọbịrị nyaa. Jaabwọ myị́ abwọ kọ ri irya nyaa, ọ-pwa ẹla nya owuleji bwula igu mẹjẹ nyori ọmyịmyị nyaa ri ang ododu. Kori ká Ohe-é wule iJisọsị eji bwula igu ka, aalẹ ọ́ kiliya wọnụ nyahị ju ka, áhị tị ka ye ọhịnyọhi nya ọhọbịrị nyahị ka ịnyịnyị. Lẹ, angịlẹ kị pwa ẹla nya owuleji bwula igu á la ẹhị ọrirịị-rịrị ọlam-ọlam ka.​—1 Kọr. 15:13-19; Hib. 9:12, 14.

12. Ányị ụpwụ nya 1 iPita 3:18, 22, à tị́ dahị ụbwọ nyọka jẹ́ nyori owuleji bwula igu nya iJisọsị datị hi ịkịla ịlẹ kị họ ene nya ụka ọwẹ?

¹² ỊPọlụ jẹ́ lịlọmwụ nyori, “ịKịrayịsị ayịdang wuleji bwula igu.” Owuleji bwula igu ọọwa há gụ ịkịla ịlẹ kị họ ene nya ụka ọwẹ chajị angịlẹ kị wuleji bwula igu gbu myị́myị́ wẹẹ. ỊPọlụ ya nyori, “ịKịrayịsị a ri ugbe nya ọgbanyẹ [nya] angị ka wuleji bwula igu” lẹ. Ányị ịKịrayịsị à tị́ bwu ri ịnya ọgbanyẹ? Ọwa à ri ọngọ ọhọhẹ ọlẹ kọ tịrẹkpẹ wẹ ọhịhị la abwụma nya olegu lẹ, ọwa à tị myị́myị́ ri ọngọ ọhọhẹ ọlẹ kọ wuleji bwula igu rụ ka epwoohe ịnyịnyị lẹ.​—1 Kọr. 15:20; Ụkụr. 26:23; wa 1 iPita 3:18, 22.

13. Ịyẹ à tị́ ri ang ọdatị ẹ-ẹga nya Adam bala iJisọsị ká ịPọlụ ya?

¹³ Ányị igu nya ọlẹng okpokpo à tị́ ka jẹ́-ẹ kpa ọhịhị wẹ uku-uku nya angịnyị? ỊPọlụ wẹ ịtọ ẹla ọwẹ gbagbịla. Ọ da ẹla wụlẹ u-uhye nya ọdatị ọlẹ kọ juwa ẹ-ẹga nya ang ọlẹ kọ họ ta angịnyị ehe chajị nya ẹla ọlẹ ká Adam họ bala ang ọlẹ kọ chịkpẹẹ hahị chajị nya iya ọkịlaakịla nya ịKịrayịsị. Ẹ-ẹga nya Adam, ịPọlụ da ụpwụ yẹkẹẹ: “Ọlẹng ookpokpo a ri ọngọ kpa igu ogbugbu warị wẹ alodehe ọlẹ wuu” lẹ. Ụka ọlẹ ká Adam họ ọhọbịrị, ọ kpa igu ogbugbu wẹ ịlọmwụ bala anyị ịtụma nyamwụ. Ahị wẹẹ kịnyaa la ọ-yẹ akama nyịlẹhị-ịlẹhị daalẹ ọọlajị nya egbeju ọnyọọngrị nyamwụ. Ma, chajị nyọlẹ ká Ohe Oluhye wule Ọnyị nyamwụ eji, ahị ka jẹ́-ẹ la ijuju ọnyịịla! ‘Owuleji bwula igu tị bwu ẹga nya ọlẹng ọkịla’ ko ri iJisọsị. ỊPọlụ yẹkẹẹ: ‘Jaabwọ kaahị angịnyị ehe wuu ye igu ogbugbu ọọwa bwu ẹpwụtụbwọ nya Adam, ịnyịnyị ahị wuu a ka wuleji bwula igu, juwa hịhị pyịyọọ bwula ịKịrayịsị lẹlẹ.’​—1 Kọr. 15:21, 22.

14. Adam ka wuleji bwula igu? Ịyẹ tị́ du?

¹⁴ Ịyẹ à tị́ ri etu nya ẹla ọlẹ ká ịPọlụ ya nyori ‘angịnyị ehe wuu ye igu ogbugbu bwu ẹpwụtụbwọ nya Adam’? ỊPọlụ wẹẹ ya ẹla rụ́ angịnyị ehe wuu ịlẹ kị ri ugu nya ọhọbịrị bala ọkpẹẹkpẹẹ ọlala-ka bwu ẹga nya Adam ká ocheju nyamwụ tị ri igu ogbugbu. (Rom. 5:12) Adam á juwa ẹ-ẹpwụ nya angịlẹ kị ka “juwa hịhị pịyọọ” ka. ỊKịrayịsị-ị́ kiliya wọnụ nyamwụ ju ka, chajị o ri ọngịnyị ọlẹ kọ la kpẹẹkpẹẹ kọ tị tọchị-tọchị pwa la o-ju ihi nya Ohe Oluhye. Ẹla ọlẹ kọ họ tọ Adam la okpokpo bala ẹla ọlẹ kọ ka họ ta angịlẹ ká “Ọnyị nya ọngịnyị ehe” yẹ lala “ịmwụ embiri,” ị ka “ka ẹpwụ nya akama o-gbe oyi myị́ oyi” [“ta ayịreji gboyi myị́ oyi,” NW ].​—Mat. 25:31-33, 46; Hib. 5:9.

15. Owo anyị à tị́ ji ẹpwụ nya “angịnyị ehe wuu” ịlẹ kị ka “juwa hịhị pyịyọọ”?

 ¹⁵ ỊPọlụ ya nyori ‘angịnyị ehe wuu ka juwa hịhị pyịyọọ bwula ịKịrayịsị.’ (1 Kọr. 15:22) Ọ da ụpwụ ọwẹ kịla angịnyị nya ịKịrayịsị ịla ịKọrịntị ịlẹ ká Ohe ya ida wụ́ kị tị ka wuleji bwula igu kaka hịhị e-epwoohe. Angịnyị nya ịKịrayịsị ịwẹ ri angịlẹ ka ‘Ohe Oluhye rụ́ cheri-cheri bwula ịKịrayịsị iJisọsị. Ọ wụrwaa ka ri angịnyị ịlịgọgọ nyamwụ.’ ỊPọlụ tị gu ẹnyị nya “angịlẹ wuu kị myị la ịKịrayịsị [“la ookpokpo bala ịKịrayịsị,” NW] ene kịị gbu.” (1 Kọr. 1:2; 15:18; 2 Kọr. 5:17) ỊPọlụ myị́myị́ da ụ-ụpwụ ọkịla nya ịBayịbụụ nyori angịlẹ kị “bá igu nya ịKịrayịsị bá gbu tọọ . . . tịtị ka bá ọhịhị nya owuleji bwula igu nyamwụ bá la tọọ ịnyịnyị.” (Rom. 6:3-5) IJisọsị wuleji bwula igu la abwụma nya olegu bala ọ-rụ ka epwoohe. Ịnyịnyị ọ ka la ẹ-ẹga nya angịlẹ wuu kị “la ookpokpo bala ịKịrayịsị,” kị ri angịnyị nya ịKịrayịsị ịlẹ ká Ohe Oluhye ya ida wụ́ lẹ.

16. Ẹlịyẹ ịPọlụ à tị́ wẹẹ ya ụka kọ wụrụ iJisọsị nya “ugbe nya ọgbanyẹ”?

¹⁶ ỊPọlụ da ụpwụ nyori ịKịrayịsị wuleji bwula igu lala “ugbe nya ọgbanyẹ [nya] angị ka wuleji bwula igu.” Kpịtịya nyori angịnyị lala ịLasarọsị tịrẹkpẹ ka hịhị myị́myị́ odehe ọlẹ, ma iJisọsị à ri ọngọ ọhọhẹ-họhẹ ọlẹ kọ wuleji bwula igu la abwụma nya olegu kaka la ọhịhị ọmyịmyị-ka lẹ. Ị ka jẹ́-ẹ chwọọ kaka pwokwu ugbe nya ọgbanyẹ nya ang ẹrụ ọlẹ ká ala Isirẹlụ kaa hu ha Ohe. Ịnyịnyị, bwula ọ-wụrụ iJisọsị nya “ugbe nya ọgbanyẹ,” ịPọlụ wẹẹ ya nyori angịkịla juwa kị ka wuleji bwula igu ka hịhị e-epwoohe ịnyịnyị. Alẹrụ bala angịkịla ịlẹ kị wẹ ka “la ookpokpo bala ịKịrayịsị” ka ba iJisọsị ịnyịnyị. Ị-ịlahị, ị ka wuleji bwula igu kaka hịhị e-epwoohe jaabwọ kọ la ẹ-ẹga nya iJisọsị ịnyịnyị.

17. Ụka oyina angịlẹ kị “la ookpokpo bala ịKịrayịsị” à tị́ ka wuleji bwula igu ka hịhị e-epwoohe?

¹⁷ Owuleji bwula igu ka epwoohe nya angịlẹ kị “la ookpokpo bala ịKịrayịsị” á dọmwụ lụka ọlẹ ká ịPọlụ da ụpwụ du kịla ala ịKọrịntị lẹka. Ọkọkọ nyọọwa, ịPọlụ wẹẹ ya nyori ẹla ọwẹ ka họ ị-ịlahị: “Ọng myị́ ọng lẹpwụ nyahị wuu ka wuleji bwula igu lụka ọlẹ kị hu nọ ha alogu nyamwụ. ỊKịrayịsị ayịdang ọlẹ ko ri ugbe nya ọgbanyẹ [nya] angị ka wuleji bwula igu wuu a jene-jene wuleji bwula igu lẹ. Ọọwa lẹ, angịlẹ wuu kị myị la ịKịrayịsị ene kịị gbu a ka wuleji bwula igu ụka ọlẹ ká ịKịrayịsị ka mwẹẹkpẹ warị [“ụka nya ijata ojiji nya ịKịrayịsị,” NW] lẹlẹ.” (1 Kọr. 15:23; 1 Tẹs. 4:15, 16) Lẹẹlẹẹ, ahị jam hịhị lụka nya “ijata ojiji” nya ịKịrayịsị ọlẹ kị yọmwụ neeji lẹ. Lẹ, alẹrụ bala angịnyị nya ịKịrayịsị ịkịla ịlẹ ká Ohe ya ida wụ́ kị tị gbu lẹ, ka godayị gbe ụka nya ijata ojiji nya ịKịrayịsị nyọka ye uri nyaa olepwoohe bala ọ-ka “bá ọhịhị nya owuleji bwula igu [nya iJisọsị] bá la tọọ ịnyịnyị.”

18. (a) Ịyẹ tị́ du kahị ka jẹ́-ẹ ya nyori owuleji bwula igu ọkịla ka ji datị hi owuleji bwula igu ka epwoohe? (b) Ẹlịyẹ ahị tị́ jẹ́ bwu ụpwụ nya 1 Ala ịKọrịntị 15:24-26 u-uhye nya ang ọlẹ kọ ka họ e-epwoohe?

¹⁸ Ẹlịyẹ à tị́ ka họ ta angịnyị nya ịKịrayịsị ịkịla wuu ịlẹ kị godayị giri-giri kị tị la ahị ọdahile nyọka hịhị bala ịKịrayịsị e-epwoohe ka? Ịwa ịnyịnyị la ẹhị ọrịrịị-rịrị nyọka wuleji bwula igu. ỊBayịbụụ ya nyori ịPọlụ bala angịkịla ịlẹ kị ka ka epwoohe nyị juwa ẹ-ẹpwụ nya “eji owule bwula igu nya ọgbanyẹ-ọgbanyẹ.” (Ọwụr. 20:6) Ọọwa á mẹjẹ nyori owuleji bwula igu ọkịla juwa kori ká ọwẹ á họ kpá ka? Ọwẹ myị ọnụ ju ẹla ọlẹ ká iJobu myị nyori nyị ka họ tọwa ị-ịlahị. (Job 14:15) Angịlẹ wuu kị la ookpokpo bala ịKịrayịsị lụka nya ijata ojiji nyamwụ ka juwa e-epwoohe bala iJisọsị ụka kọ ka ta igomenti bala ịngịrị ụma ịnyị myị́ ịnyị wuu ayịreji gbanggbang. “Igu ọlẹ kọ . . . ri oluji ohyẹẹkpẹ-ẹkpẹ” ka dọmwụ tayịreji ịnyịnyị. Angịlẹ wuu kị wuleji bwula igu ka epwoohe-é ka gbu ẹnẹnẹhẹ kaka. Ma, angịkịla tị bẹ?​—Wa 1 Ala ịKọrịntị 15:24-26.

19. Ẹlịyẹ angịlẹ kị ka hịhị ám̀ odehe à tị́ ka yahị guru gbe?

¹⁹ Ẹlịyẹ angị ka hịhị odehe à tị́ ka yahị guru gbe? Ị ka la ahị ọdahile bwu ẹla ọlẹ ká ịPọlụ ya yẹkẹẹ: “Ehị ọrịrịị-rịrị ọnyịịla ọlẹ kam la ẹ-ẹga nya Ohe Oluhye . . . ri yẹkẹẹ, owuleji bwula igu ka juwa ha angịnyị wuu tụ alabwẹla ọnyịịla bala alabwẹla onyobyi ịnyịnyị.” (Ụkụr. 24:15) Ọ la gede-gede nyori ọlabwẹla onyobyi ọhẹ-lọhẹ á ka jẹ́-ẹ ka epwoohe ka. Lẹ, ẹla ọwẹ mẹjẹ nyori owuleji bwula igu ka ji ám̀ odehe ọlẹ ị-ịlahị.

20. Ányị ẹhị ọrịrịị-rịrị nyang u-uhye nya owuleji bwula igu à tị́ bwu lọngịrị gụ́ ọwọwa?

²⁰ Ọ la gbagbịla nyori, “owuleji bwula igu ka ji ha angịnyị” ịnyịlẹhị! Angịlẹ kị ka tịrẹkpẹ wẹ ka la ọhịhị odehe ọlẹ ka yahị guru gbe ọ-ka hịhị gboyi myị́ oyi ẹ-ẹpwụ nyamwụ. A ka jẹ́-ẹ dahịhle ọnụ ọmyịmyị ọwẹ. Ẹhị ọrịrịị-rịrị ọwẹ ka ya ẹjẹ ọkpụ́kpụ́ hang ụka ka kụ irya nya alikẹjẹ nyang ịlẹ kị gbu lẹ. Ị ka wuleji bwula igu myị́ ụka ká ịKịrayịsị bala angịkịla “ka juwa gbeji . . . ẹ-ẹpwụ nya ẹka ụnọ lẹpwụ-lẹpwụ.” (Ọwụr. 20:6) Ahụ ịnyịnyị ka jẹ́-ẹ la ahị ọdahile nyori kori ka gbu ene nya eji ọkpakpa nya ịKịrayịsị ọlẹpwụ nya ẹka ụnọ wẹwẹ, a ka jẹ́-ẹ wuleji bwula igu. “Ẹhị ọrịrịị-rịrị . . . ọọwa, á tị kaa dahị lugbaa kpong-kpong ka.” (Rom. 5:5) Ọ ka jung ọngịrị lẹẹlẹẹ bala ọ-ya ọkẹkẹnị hang ẹ-ẹpwụ nya ịgba ọgbagba nya Ohe Oluhye. Ma, ang ịkịla ji kahị ka jẹ́-ẹ jẹ́ bwu ụpwụ nya 1 Ala ịKọrịntị egbeju 15 wẹẹ, jaabwọ kahị ka yẹ a-ang ọjẹ́jẹ ọ-ba ọlẹ ba.