1-2. Ehuguvaro musinke va kara nalyo vakareli vaJehova?

AYO mulyo tu kare nehuguvaro. Vamwe kwa kara nehuguvaro lyokukara nononkwara doruhafo ndi kurera vanona wovakanguki ndi kuveruka kouvera. Nose Vakriste kuvhura tu hare yininke oyo. Nye ehuguvaro eli twa kara nalyo lya pitakana yininke oyo, ehuguvaro lyetu kwa kwatera mo eparu lyanarunye ntani lyokukamona vemepata lyetu ava va fa kuna kuvapindura koufe.

² Mupositoli Paurusa kwa tente asi: “Ehuguvaro lyomwaKarunga eli na kara nalyo, . . . va kare vawa ndi vadona, ngava va pindura koufe.” (Yirug. 24:15) Paurusa kapisi yige ga hovere kuuyunga kuhamena evhumbuko, esimbi Joba nage ga uyungire kuhamena evhumbuko. Age ga kere nehuguvaro asi Jehova nga ka mu diworoka noku ka mu pindura koufe.—Joba 14:7-10, 12-15.

3. Ngapi omu Vakolinte wokuhova egaununo 15 nali tu vatera?

³ ‘Evhumbuko lyovafe’ kuna kara ruha ‘rwetameko’ ndi ‘etateko lyerongo’ eli va pura Vakriste navenye. (Heb. 6:1, 2) Paurusa kwa tjenge kuhamena evhumbuko moVakolinte wokuhova egaununo 15. Eyi ga tjenge ya korangedere Vakriste womosiruwo sendi. Egaununo eli ngali tu korangeda, ntani nokupameka ehuguvaro lyetu kuhamena evhumbuko.

4. Morwasinke natu karera nehuguvaro asi vafe ngava ka va pindura?

⁴ Evhumbuko lyaJesus Kristusa kutupa ehuguvaro asi vafe ngava ka va pindura, nose nsene tu fa ngava ka tu vhumbura. Alyo kwa kere ruha ‘rombudi zongwa’ ezi Paurusa ga tanterere Vakolinte. (1 Kol. 15:1, 2) Age kwa uyungire asi nsene Mukriste a dira kupura mevhumbuko, epuro lyendi kutupu sikwafo. (1 Kol. 15:17) Kupura mevhumbuko lyaJesus kupameka ehuguvaro lyetu mevhumbuko.

5-6. Yisinke adi tanta nonkango da kara mo-1 Vakolinte 15:3, 4 kwetu?

 ⁵ Apa Paurusa ga uyungire kuhamena evhumbuko, age kwa tumbwire yininke yitatu: Ayo kuna kara (1) “Kristusa kwa fira nonzo detu.” (2) “Kwa mu vhumbika.” (3) Age kwa mu “pindura koufe mezuva lyautatu, moomu ga tanta matjangwa.”—Resa 1 Vakolinte 15:3, 4.

⁶ Nomfa nevhumbiko ntani nevhumbuko lyaJesus, ngapi ya tu kundama? Muporofete Jesaya kwa pumbire kuhamena Mesiyasa asi “kwa mu gusire mo mosirongo sovanamwenyo” ntani “ntoko zendi ezi va mu pere, zopovadinikarunga.” Nye yinzi ya hamenene mo. Age kwa gwedere ko hena asi Mesiyasa “kwa gusa evega lyovananzo wovanzi.” Jesus kwa yi rugene oyo apa ga geve eparu lyendi ngosizoweseso. (Jes. 53:8, 9, 12; Mat. 20:28; Rom. 5:8) Yipo nye, nomfa nevhumbiko ntani nevhumbuko lyaJesus kutupa ehuguvaro asi nose ngatu ka manguruka mo mononzo nomonomfa ntani ngatu ka mona ava va fa.

7-8. Yisinke ayi vatere Vakriste va yi pure asi Jesus va mu vhumbwire sili?

⁷ Mokuninka asi tu yi pure asi evhumbuko yiko ngali ka kara, pomuhowo twa hepa kupura asi Jesus va mu vhumbwire. Morwasinke natu yi pulira asi Jehova ga pindwire Jesus koufe?

⁸ Vantu vanzi va mwene Jesus konyima zapa va mu pindwire koufe. (1 Kol. 15:5-7) Muntu gokuhova ga tumbwire Paurusa ogu ga monekerere Jesus kuna kara mupositoli Peturusa (Kefasa). Mbunga zovarongwa nawo kwa uyungire asi Peturusa ana mono Jesus va mu vhumbura. (Ruk. 24:33, 34) Ntani vapositoli nawo va mwene Jesus konyima zokumuvhumbura. Ano konyima ta ya “monekere sikando simwe vantu wokupitakana 500,” nampo pepongo eli va tumbura mwaMateusa 28:16-20 eli lya karere moGalireya. Ana kuyaninka “ta ya monekere Jakopo” mumbyendi gositumbwena, ogu ga dilire pomuhowo kupura mwaJesus ngaMesiyasa. (Joh. 7:5) Jakopo kwa tulire epuro mwaJesus konyima zapa Jesus va mu pindwire koufe. Ayo kulikida asi koyiha yomvhura 55, apa mupositoli Paurusa ga tjenge mbilive ezi, sinzi sava va mwene Jesus konyima zapa va mu vhumbwire kwa kere simpe vazuni. Yipo nye nkenye ogu ga kere nomasinganyeko ga hepere kupura owo va mu mwene.

9. Kuliza noYirugana 9:3-5, ngapi Paurusa ga gwederere ko koumbangi ou asi Jesus va mu vhumbura?

⁹ Moruhura, Jesus kwa ya monekerere Paurusa. (1 Kol. 15:8) Paurusa (ndi Sauru) kwa kere monzira zendi zokuza koDamasikusi apa ga zuvhire ezwi lyaJesus ntani ga mwene emoneko lyouyerere wendi meguru. (Resa Yirugana 9:3-5.) Eyi ya horokerere Paurusa kwa gwederere ko koumbangi ou asi Jesus sili va mu vhumbura.—Yirug. 26:12-15.

10. Yisinke ga rugene Paurusa konyima zapa ga yi pulire asi Jesus va mu pindura?

¹⁰ Eyi ya horokerere Paurusa ya geve umbangi kwavamwe morwa age nga hepeke Vakriste. Apa ga yi pulire Paurusa asi Jesus yosili va mu vhumbura koufe, age kwa ya tanterere ko wopeke usili owo. Age nga lididimikire apa ngava mu toona nokumutura modorongo ntani sikepa kwa mu tekerere, nye nampili ngoso ga twikilire kuzuvhisa asi Jesus va mu pindura koufe. (1 Kol. 15:9-11; 2 Kol. 11:23-27) Paurusa ga yi pulire nawa-nawa asi Jesus va mu pindura koufe ano eyi ya mu ninkisire a twikire kupopera epuro lyendi nampili monomfa. Maumbangi nagenye ogo aga likida asi Jesus va mu vhumbwire nose kutuvatera tu yi  pure, ndi ngapi? Ayo kuna kunkondopeka ehuguvaro lyoge mevhumbuko ndi?

11. Yisinke nampo ya ninkisire vamwe womoKolinte va kare nomagano gepuko kuhamena evhumbuko?

¹¹ Vamwe ava va kere moGereka sitata somoKolinte kwa kere nomagano gepuko kuhamena evhumbuko, ano vamwe ngava tanta asi “evhumbuko lyovafe kutupu.” Morwasinke? (1 Kol. 15:12) Valirongi vamwe ava va kere mositata saGereka moAtena kwa zorere egano lyokuhamena evhumbuko lyaJesus. Magazaro gangoso kwa kundamene vamwe ava va kere moKolinte. (Yirug. 17:18, 31, 32) Vamwe nampo kwa gazarere asi evhumbuko kwa kere pasifanekeso, kutanta asi munanzo yige ngava tumbura asi ‘muntu gokufa,’ ano nsene ana ya kara Mukriste ngoso vana mu ‘vhumbura.’ Yi kare asi magano musinke va kere nago, morwa kudira kupura mevhumbuko epuro lyawo kapi lya kere nomulyo. Nsene asi Karunga kapi ga vhumbwire Jesus, sizoweseso ngano kwato ntani ngano kapi va tu dongwenena po nonzo detu. Yipo nye, navenye ava va dilire kupura mevhumbuko kapi va kere nehuguvaro lyousili.—1 Kol. 15:13-19; Heb. 9:12, 14.

12. Kuliza na-1 Peturusa 3:18, 22, ngapi evhumbuko lyaJesus lya lisiga neli lyava va hovere kuvhumbura?

¹² Paurusa ga yi divire asi ‘Kristusa va mu pindura koufe.’ Evhumbuko olyo lya pitakanene lyava va hovere kuvhumbura koufe, morwa awo va ya fire simpe. Paurusa kwa tente asi Jesus “yige va hova kupindura koufe, mwava navenye va fa.” Monkedi musinke Jesus ga kere gokuhova? Age yige va hovere kuvhumbura ngosisitwa sopampepo ntani yige gokuhova movantu ogu va vhumbwira keparu lyemeguru.—1 Kol. 15:20; Yirug. 26:23; resa 1 Peturusa 3:18, 22.

13. Malisigo musinke ga uyungire Paurusa aga kara pokatji kaAdamu naJesus?

¹³ Ngapi omu nomfa domuntu gumwe nadi retera mwenyo vantu mamiliyona? Paurusa ga geve elimbururo kepuro olyo. Age kwa fatwilire eyi Adamu ga retera vantu navenye ntani neyi ngatu ka gwana morwa nzambo zaKristusa. Kuhamena Adamu, Paurusa kwa tjenge asi: ‘Nomfa kwa karera po mouzuni morwa muntu gumwe.’ Apa Adamu ga zonene, age kwa liretere mwene nomfa ntani noruvharo rwendi. Ose simpe kuna kumona yitundwamo eyi ga reta morwa kudira kulimburukwa. Morwa Karunga ga vhumbwire munendi, ose ngatu ka gwana meho zongwa. Paurusa kwa tente hena asi: ‘Nevhumbuko lyovafe nalyo kwa kara po morwamuntu gumwe,’ Jesus. ‘Ano moomu ava fu vantu navenye morwa yiwo ruvharo rwaAdamu, yimo ngorooro hena ngava va tura navenye mwenyo morwa Kristusa.’—1 Kol. 15:21, 22.

14. Adamu ngava ka mu vhumbura ndi? Faturura.

¹⁴ Yisinke ga tembe Paurusa apa ga uyungire asi ‘navenye ku fa morwa Adamu’? Paurusa kwa tembe koruvharo rwaAdamu oru rwa pinga nonzo ntani nokudira kusikilira mo. (Rom. 5:12) Adamu kapi ngava ka mu “tura mwenyo.” Adamu kapi nga ka gwanena mo uwa monzambo zaKristusa zosizoweseso, morwa age kwa kere muntu gokusikilira mo ogu ga nyokere kulimburukwa Karunga mowina. Eyi ya horokera Adamu yiyo ngayi ka horokera vantu ava nga ‘pangwira Jesus koyikombo,’ kutanta asi kapi ngava ka ‘gwana mwenyo gwanarunye.’—Mat. 25:31-33, 46; Heb. 5:9.

15. Wolye va hamena mo ‘mwanavenye’ ava ‘ngava tura mwenyo’?

¹⁵ Koneka eyi ga tente Paurusa asi “ngava  va tura navenye mwenyo morwa yeeyi awo kwa likwatakana naKristusa.” (1 Kol. 15:22) Mbilive ezi zaPaurusa kwa zi tjangerere Vakriste wovagwavekwa womoKolinte, ava va ya vhumbwilire keparu lyemeguru. Vakriste ava kwa “va horowora va kare vantu vaKarunga, ava va mu hamena mwaJesus Kristusa.” Ntani age kwa tumbwire nava “va fira mokupura Kristusa.” (1 Kol. 1:2; 15:18; 2 Kol. 5:17) Mombilive zimwe hena, Paurusa kwa tjenge asi ava va “kere gumwe tupu nendi [Jesus] monomfa ngwendi dendi, yimo ngava kara ngorooro gumwe tupu nendi pevhumbuko moomu ga vhumbuka age a kare nomwenyo.” (Rom. 6:3-5) Jesus kwa mu vhumbwire norutu ropampepo ntani kwa zire meguru. Eyi yiyo ngayi horokera navenye ava va “kara mwaKristusa,” kutanta asi Vakriste navenye wovagwavekwa.

16. Yisinke ga tembe Paurusa pokutumbura Jesus asi “yige va hova”?

¹⁶ Paurusa kwa tjenge asi “Kristusa yige va hova kupindura koufe, mwava navenye va fa.” Diworoka asi vamwe, ngwendi Rasarusa kwava pindwire koufe keparu lyepevhu, nye Jesus yige gokuhova va pindwire norutu ropampepo noku ka gwana mwenyo gwanarunye. Age kuvhura kumuhetakanesa komuzangu gokuhova ogu ngava zambere Vaisraeli Karunga. Ntani, pokutumbura Jesus asi “yige va hova,” Paurusa kwa tembe asi koveli vamwe ava ngava pindwira keparu lyemeguru. Vapositoli ntani navamwe ava va “kara mwaKristusa” nawo ngava kwama Jesus. Ntaantani nawo ngava va vhumbwire keparu lyemeguru ngwendi Jesus.

17. Siruwoke ava va “kara mwaKristusa” va gwene mfeto zawo zokuza meguru?

¹⁷ Evhumbuko lyeparu lyemeguru lyava va “kara mwaKristusa” kapi lya tamekere posiruwo esi Paurusa ga tjangerere Vakolinte. Yipo nye, Paurusa kwa tembe kosiruwo sokomeho asi: “Nkenye ogu porufo rwendi: gomuhoverera va pindura koufe Kristusa, ntani vava va hama kwaKristusa, apa nga wiza” ndi pekaropo lyendi. (1 Kol. 15:23; 1 Tes. 4:15, 16) Naina ose kwa kuparuka posiruwo esi ga pumbire ‘sewizo’ ndi sekaropo lyaKristusa. Yipo nye, vapositoli novagwavekwa vakwawo ava va fire va hepere kundindira siruwo sekaropo lyaKristusa yipo va gwene mfeto zawo zokuza meguru ntani nokukakara ‘gumwe tupu naJesus pevhumbuko moomu ga vhumbuka age.’

18. (a) Yisinke ayi likida asi kolili evhumbuko eli ngali kwama ko kevhumbuko lyemeguru? (b) Kuliza 1 Vakolinte 15:24-26, yisinke ngayi ka horoka meguru?

¹⁸ Ngapi kuhamena Vakriste wovalimburukwi  ava va dira kukara nehuguvaro lyokukaparukira meguru? Nawo va kara nehuguvaro lyevhumbuko. Bibeli kuuyunga asi Paurusa ntani navamwe ava ngava za meguru nawo kwa “hamena kevhumbuko lyomuhowo.” (Ehor. 20:6) Eyi kulikida asi ngaku ka kara evhumbuko limwe hena konyima zevhumbuko olyo. Ntani ya liza neyi ga uyungire Joba kuhamena eyi ngayi mu horokera komeho. (Joba 14:15) “Ava va hama kwaKristusa, apa nga wiza” ngava kara meguru kumwe nendi apa nga ya zonagura po mapangero nagenye novapangeli ntani nononkondo nadinye donompepo donondona. Nampili “nkore zokuhulilira nomfa,” nazo ngava zi zonagura po. Yosili, ava ngava ka pindwira keparu lyemeguru kapi ngava ka fa. Yisinke ngayi horokera vamwe?—Resa 1 Vakolinte 15:24-26.

19. Yisinke vana kundindira ava va kara nehuguvaro lyepevhu?

¹⁹ Yisinke vana kundindira ava va kara nehuguvaro lyepevhu? Awo kuvhura kugwana ehuguvaro mononkango edi ga uyungire Paurusa asi: “Ehuguvaro lyomwaKarunga eli na kara nalyo, . . . va kare vawa ndi vadona, ngava va pindura koufe.” (Yirug. 24:15) Yosili, kwato mudona gokuza meguru, yipo nye nonkango odo kwa tamba kevhumbuko lyepevhu.

20. Ngapi eyi tuna zogere mosirongwa esi yina kundama ehuguvaro lyoge?

²⁰ Yosili, vafe “ngava va pindura koufe.” Ava ngava ka vhumbwira keparu lyepevhu ngava ka paruka narunye. Kara nehuguvaro asi etumbwidiro eli ngali ka sika mo. Ehuguvaro eli kutuhengagwida nampili ngomu twa zumbanesa vamwe monomfa. Awo ngava ka va pindura koufe apa Jesus navamwe ava ngava kara vahompa ngava ka ‘pangera kumwe nendi nomumvho eyovi.’ (Ehor. 20:6) Nose kuvhura tu kare nehuguvaro asi nampili tu fe komeho Jesus a tameke kupangera nomvhura 1 000, ngava ka tu vhumbura. “Ehuguvaro eli kapi ali tu fisa nomuga.” (Rom. 5:5) Alyo kuvhura li ku nkondopeke ngesi ntani nokugwederera ko koruhafo roge mokukarera Karunga. Nye yinzi yokuvhura kulirongera mo moVakolinte wokuhova egaununo 15, ngomu natu ka yi zogera mosirongwa sokukwama ko.