1-2. Gʼuiˬ sha ve kanˉ te ve chaw daꞈ jaˇ ve dawˇ law kuiˬ aˬ htoꞈ ma cawˬ ve le?

 Dawˇ law kuiˬ lehˬ a yeˇ uiˍ jaˇ ve awˬ ceuˬ hpehꞈ ve yoˬ. Chaw teˇ hpaˍ awˬ ca geh ha lehˬ tuˬ dawˇ law taˍ ve yoˬ. Yaˇ cawˬ ve chaw kʼo yaˇ uiˍ la htaˇ, awˬ to hpawˇ chehˇ sha cawˬ sha tuˬ dawˇ law taˍ ve yoˬ. A naˍ cawˬ ve chaw kʼo, na˗e la tuˬ dawˇ law taˍ ve yoˬ. Ngaˬ hui Hkriꞈ yaˇ hpehꞈ ve chaw kaꞈ chi hkʼa shuˍ dawˇ law taˍ ve yoˬ. Yaꞈ hkʼaˇ, ngaˬ hui chi hkʼe ceh tiˉ dawˇ law ve maˇ heˆ. Co co taiˍ taiˍ ve a shaꞈ leh ngaˬ hui haꞈ ve chaw kʼawꞈ teꞈ tu la tuˬ ve htaꞈ dawˇ law taˍ ve yoˬ.

² Pawˇluꞈ kʼoˆ ve, ‘hteˇ ve chaw kaꞈ maˇ hteˇ ve chaw kaꞈ kʼawꞈ teꞈ tu la tuˬ yoˬ tehꞈ ngaˬ htawˇ Gʼuiˬ sha htaꞈ cuˇ leh dawˇ law ve yoˬ.’ (Tcuh yaˇ 24:15) Kʼawꞈ teꞈ tu la ve awˬ lawn htaꞈ Pawˇluꞈ awˉ lawˉ teˇ gʼaˇ kʼoˆ taˍ ve maˇ heˆ. Awˬ lawn chi hkʼe ve Yawˇbaˆ kaꞈ kʼoˆ jaw ve yoˬ. Yaˬhoˉvaˬ yawˇ htaꞈ maˇ leunˇ leh kʼawꞈ teꞈ tu la tcuh laˇ tuˬ yoˬ tehꞈ yawˇ yonˍ ve yoˬ.—Yawˇbaˆ 14:7-10, 12-15.

3. Aˬ htoꞈ ma te 1 Kawˇreuˍhtuˆ liꞈ kaˇ nanˉ uiˍ 15 hkʼaw ngaˬ hui awˬ pon awˬ bon cawˬ ve le?

³ “Kʼawꞈ teꞈ tu la ve” lehˬ, “awˬ hkuiˉ puiˍ” teˇ ceuˬ hpehꞈ ve maˇ heˆ leh “kawˍ” ve chi ve hkʼa peu˗eˬ Hkriꞈ yaˇ maˍ ve tawˇ hkawˇ hpehꞈ ve yoˬ. (Heˍbrehˇ 6:1, 2) Kʼawꞈ teꞈ tu la ve awˬ lawn 1 kawˇreuˍhtuˆ liꞈ kaˇ nanˉ uiˍ 15 hkʼaw Pawˇluꞈ kʼoˆ ve yoˬ. Yawˇ bvuhꞈ ve awˬ ceuˬ oˇ htaˇ teˇ co˗e ve Hkriꞈ yaˇ htaꞈ awˬ gʼaˇ piˇ jaˇ ve yoˬ. Leh kaˇ nanˉ uiˍ 15 hkʼaw ngaˬ hui htaꞈ kaꞈ awˬ gʼaˇ peꞈ laˇ jaˇ ve yoˬ. Dawˇ law kuiˬ ngaˬ hui law maw jaˇ˗oˬ ve, awˬ tehˬ hpehꞈ la tuˬ yoˬ tehꞈ yonˍ gʼa tuˬ ga laˇ ve yoˬ.

4. Ngaˬ hui haꞈ ve chaw kʼawꞈ teꞈ tu la tuˬ tehꞈ aˬ htoꞈ ma te ngaˬ hui yonˍ gʼa ve le?

⁴ Ngaˬ hui haꞈ ve chaw kʼawꞈ teꞈ tu la tuˬ yoˬ tehꞈ, Yeˍsuˆ kʼawꞈ teꞈ tu la ve lehˬ ngaˬ hui yonˍ gʼa tuˬ te laˇ ve yoˬ. Ngaˬ hui aˬ htoꞈ ma hpehꞈ leh suh˗e ve htawˇ, kʼawꞈ teꞈ tu la tuˬ yo tehꞈ yonˍ gʼa ve yoˬ. Pawˇluꞈ Kawˇreuˍhtuˆ chaw htaꞈ “ha lehˬ ve bon hkawˇ” maˍ piˇ ve chi daꞈ jaˇ ve teˇ lawn hpehꞈ ve yoˬ. (1 Kawˇrenˍhtuˆ 15:1, 2) Yeˍsuˆ kʼawꞈ teꞈ tu la ve htaꞈ Hkriꞈ yaˇ hkʼaˬ  ve teˇ gʼaˇ maˇ yonˍ ve kʼo, yawˇ yonˍ ve lehˬ teꞈ chiˉ awˬ bon maˇ cawˬ. (1 Kawˇrenˍhtuˆ 15:17) Awˬ nu ve chaw kaꞈ kʼawꞈ teꞈ tu la tuˬ yoˬ tehꞈ Yeˍsuˆ kʼawꞈ teꞈ tu la ve ngaˬ hui yonˍ gʼa tuˬ te laˇ ve yoˬ.

5-6. 1 Kawˇrenˍhtuˆ liꞈ 15:3, 4 hkʼaw kʼoˆ taˍ ve awˬ lawn ngaˬ hui awˬ pon a yeˇ hkʼaˬ hkʼe taw uiˍ ve le?

⁵ Pawˇluꞈ kʼawꞈ teꞈ tu la ve awˬ lawn htaꞈ caˉ daꞈ ve liꞈ tanˬ bvuhꞈ htaˇ, yawˇ awˬ tehˬ ve 3 ceuˬ htaꞈ kʼoˆ ve yoˬ. Awˬ tehˬ ve chi teˇ hpaˍ lehˬ (1) “Hkriꞈ lehˬ ngaˬ hui ve venˇ baˆ awˬ pon hkanˍ suh peuˬ.” (2) Yawˇ “tuˍ hpfuh hkʼaw tuˍ peuˬ.” (3) “Liꞈ hpu hkʼaw bvuhꞈ taˍ ve hkʼe, 3 nyi teˇ nyi gaˬ htaˇ yawˇ kʼawꞈ teꞈ tu la ve yoˬ.”—1 Kawˇrenˍhtuˆ 15:3, 4 gʼaw sheˍ.

⁶ Iˉsaˍyaˆ tcuh kaˍ paˍ ve tawˇ hkawˇ kʼoˆ taˍ ve, Meˍsiˉyaꞈ lehˬ “ngaˬ hui ve venˇ baˆ awˬ pon yawˇ lehˬ tiˇ pehˍ ve htaꞈ gʼa hkanˍ” leh “shu yawˇ htaꞈ haiˬ ve chaw hui geh teˇ geh tuˍ piˇ ve yoˬ.” Chi hkʼoˆ kaꞈ, Meˍsiˉyaꞈ lehˬ “chaw yaˇ hui ve venˇ baˆ htaꞈ hkanˍ pfuhˇ” ve yoˬ. Yeˍsuˆ chi hkʼe te ve lehˬ yawˇ ve a shaꞈ hkʼe leˇ tanˇ laˇ leh htaiˍ hkʼawꞈ laˇ ve yoˬ. (Iˉsaˍyaˆ 53:8, 9, 12; Maꞈhtehˍ 20:28; Roˉmaꞈ 5:8) Suh ve, tuˍ ve, leh Yeˍsuˆ kʼawꞈ teꞈ tu la ve ngaˬ hui awˬ pon a yeˇ hkʼaˬ hkʼe taw uiˍ ve le? Chi ve 3 ceuˬ lehˬ ngaˬ hui ve venˇ baˆ leh suh ve htaꞈ ponˬ tuˬ awˬ hkuiˉ pui ve dawˇ law kuiˬ hpehꞈ ve yoˬ. Ngaˬ hui haꞈ ve chaw suh˗oˬ ve kʼawꞈ teꞈ tu la ve htaꞈ gʼa mawˬ daꞈ tuˬ yoˬ.

7-8. Yeˍsuˆ kʼawꞈ teꞈ tu la˗oˬ ve tehꞈ Hkriꞈ yaˇ yonˍ tuˬ aˬ htoꞈ ma ga piˇ ve le?

⁷ Ngaˬ hui kʼawꞈ teꞈ tu la ve dawˇ law kuiˬ lehˬ, Yeˍsuˆ kʼawꞈ teꞈ tu la ve htaꞈ caˉ daꞈ ve yoˬ. Chi htaꞈ pa taw Yeˍsuˆ awˬ tehˬ awˬ na kʼawꞈ teꞈ tu la˗oˬ ve tehꞈ ngaˬ hui yonˍ gʼa ve yoˬ. Yaꞈ hkʼaˇ, Yaˬhoˉvaˬ Yeˍsuˆ htaꞈ kʼawꞈ teꞈ tu la piˇ˗oˬ ve tehꞈ, ngaˬ hui hkʼaˬ hkʼe te yonˍ gʼa tuˬ le?

⁸ Laiˉ gʼaˇ Yeˍsuˆ htaꞈ mawˬ leh yawˇ kʼawꞈ teꞈ tu la˗oˬ ve tehꞈ kʼoˆ ve yoˬ. (1 Kawˇrenˍhtuˆ 15:5-7) Tcuh yaˇ Peˍtruˆ (Keˍhpaˆ) Yeˍsuˆ kʼawꞈ teꞈ tu la ve htaꞈ mawˬ ve tehꞈ, Pawˇluꞈ awˉ lawˉ kʼoˆ ve yoˬ. Leh awˬ nu ve tcuh yaˇ hui kaꞈ hkʼa shuˍ kʼoˆ ve yoˬ. (Luˉkaꞈ 24:33, 34) Chi hkʼoˆ kaꞈ, “tcuh yaˇ 12 gʼaˇ” Yeˍsuˆ kʼawꞈ teꞈ tu la ve htaꞈ gʼa mawˬ ve yoˬ. Leh peuˬ hkʼawꞈ nawˉ “awˬ viˉ awˬ nyi 500 gʼaˇ hpaˆ htaꞈ kaꞈ yawˇ awˬ to kʼawꞈ maw piˇ ve yoˬ.” Maꞈhtehˍ liꞈ 28: 16-20 hkʼaw kʼoˆ taˍ ve hkʼe, Gaˍliˍlehˇ mvuhˇ miˬ lo yawˇ awˬ laꞈ gʼawˇ hui htaꞈ ca mawˬ daꞈ˗e ve hkʼe hpehꞈ ve yoˬ. Yeˍsuˆ “Yaˍkoˆ htaꞈ kaꞈ yawˇ maw piˇ” ve yoˬ. Chi awˬ gʼuˇ suhˍ htaˇ Yaˍkoˆ lehˬ Yeˍsuˆ htaꞈ maˇ yonˍ ve yawˇ ve awˬ nyi paˍ hpehꞈ ve yoˬ. (Yoˇhanˬ 7:5) Yaꞈ hkʼaˇ, chi teˇ pawˆ peuˬ hkʼawꞈ nawˉ Yaˍkoˆ lehˬ Yeˍsuˆ Meˍsiˉyaꞈ hpehꞈ ve tehꞈ yonˍ ve yoˬ. Aˬ laˬ hkʼe 55 hkʼawꞈ C.E. htaˇ, Pawˇluꞈ 1 Kawˇrenˍhtuˆ liꞈ kaˇ nanˉ uiˍ 15 bvuhꞈ htaˇ lehˬ, laiˉ gʼaˇ Yeˍsuˆ kʼawꞈ teꞈ tu la ve htaꞈ mawˬ jaw ve chaw a shaꞈ teꞈ chehˇ sheˍ ve yoˬ. Chi htaꞈ pa taw, Yeˍsuˆ awˬ tehˬ kʼawꞈ teꞈ tu la ve htaꞈ htawˇ dawˇ nawˬ dawˇ cawˬ ve chaw kʼo, mawˬ jaw ve chaw htaꞈ ca na nyi hpehꞈ ve yoˬ.

9. Tcuh yaˇ liꞈ 9:3-5 hkʼaw kʼoˆ taˍ ve hkʼe, Yeˍsuˆ kʼawꞈ teꞈ tu la˗oˬ ve tehꞈ Pawˇluꞈ gʼa hpuˇ ve awˬ lawn hkʼaˬ hkʼe hpeuꞈ maw laˇ ve le?

⁹ Peuˬ leh Yeˍsuˆ yawˇ awˬ to Pawˇluꞈ htaꞈ maw piˇ ve yoˬ. (1 Kawˇrenˍhtuˆ 15:8) Oˇ ve teˇ yanˇ Yeˍsuˆ kʼawꞈ teꞈ tu la˗oˬ. Pawˇluꞈ (Sawˉluꞈ) Daˍmaˍsehˆ venˇ lo kʼai chehˇ htaˇ, Yeˍsuˆ ve awˬ hkawˇ gʼa kaˇ ve yoˬ. Leh mvuhˇ naw ma hkʼoˆ Yeˍsuˆ ve awˬ meꞈ awˬ hponˇ htaꞈ Pawˇluꞈ zuhꞈ maˆ gʼa mawˬ ve yoˬ. (Tcuh yaˇ 9:3-5 gʼaw sheˍ.) Pawˇluꞈ gʼa hpuˇ ve awˬ lawn awˬ tehˬ hpehꞈ ve yoˬ. Yeˍsuˆ kʼawꞈ teꞈ tu la ve lehˬ, kaˇ puiˇ kaˇ lao ceh kʼoˆ ve maˇ heˆ. Awˬ tehˬ hpehꞈ ve yoˬ.—Tcuh yaˇ 26:12-15.

10. Yeˍsuˆ kʼawꞈ teꞈ tu la˗oˬ ve tehꞈ Pawˇluꞈ yonˍ leh yawˇ aˬ htoꞈ ma te gaˇ tuˬ te piˇ ve le?

¹⁰ Pawˇluꞈ Yeˍsuˆ kʼawꞈ teꞈ tu la ve htaꞈ caˉ daꞈ ve kʼoˆ ve, laiˉ gʼaˇ awˬ pon shaˉ hkiˆ hpehꞈ ve yoˬ. Peuˬ laˬ htaˇ yawˇ Hkriꞈ yaˇ htaꞈ fawˉ mehˍ jaw ve yoˬ. Yaꞈ hkʼaˇ, Yeˍsuˆ kʼawꞈ teꞈ tu la˗oˬ ve tehꞈ Pawˇluꞈ yonˍ leh, shu kaꞈ awˬ lawn chi htaꞈ yonˍ tuˬ yawˇ ga piˇ ve awˬ yanˇ yuˬ tanˇ jaˇ. Peuˬ laˬ htaˇ Yeˍsuˆ suh˗oˬ leh chi teˇ hkui yawˇ kʼawꞈ teꞈ tu la˗oˬ ve tehꞈ, Pawˇluꞈ bon maˍ toˇ htaˇ, yawˇ shu jawꞈ piˇ ve, htawnˍ hkʼaw yuˬ keu piˇ ve gʼa hkanˍ leh haw loꞈ kʼoˍ luˬ kʼai ve kaꞈ gʼa hpuˇ ve yoˬ. (1 Kawˇrenˍhtuˆ 15:9-11; 2 Kawˇrenˍhtuˆ 11:23-27)  Pawˇluꞈ Yeˍsuˆ kʼawꞈ teꞈ tu la ve htaꞈ yonˍ jaˇ ve pa taw, yawˇ bon maˍ leh yawˇ awˬ to kaꞈ yuˬ tanˇ ve yoˬ. Awˉ lawˉ peuˇ ve Hkriꞈ yaˇ Yeˍsuˆ kʼawꞈ teꞈ tu la˗oˬ ve tehꞈ htawˆ hkanˍ laˇ ve lehˬ, nawˬ yonˍ gʼa tuˬ te laˇ ve maˇ heˆ laˇ? Leh chi ve lehˬ awˬ gʼuˇ suhˍ hpawˇ kʼawꞈ teꞈ tu la ve dawˇ law kuiˬ htaꞈ, nawˬ awˬ tehˬ yonˍ gʼa tuˬ te laˇ ve maˇ heˆ laˇ?

11. Kawˇrenˍhtuˆ venˇ hkʼaw ve chaw teˇ hpaˍ hpaˍ kʼawꞈ teꞈ tu la ve awˬ lawn htaꞈ aˬ htoꞈ ma te maˇ daꞈ ve dawˇ hkʼaˇ cawˬ ve le?

¹¹ Kawˇrenˍhtuˆ venˇ hkʼaw Heˍlaˍsaˆ chaw teˇ hpaˍ kʼawꞈ teꞈ tu la ve awˬ lawn htaꞈ maˇ daꞈ ve dawˇ hkʼaˇ cawˬ ve yoˬ. Yawˇ hui awˬ hkʼaw lo chaw teˇ hpaˍ kʼoˆ ve, “suh ve chaw hui kʼawꞈ teꞈ tu la ve maˇ cawˬ.” (1 Kawˇrenˍhtuˆ 15:12) Aˬ htoꞈ ma te yawˇ hui chi hkʼe kʼoˆ ve le? Aˍhtenˍ venˇ hkʼaw chehˇ ve Heˍlaˍsaˆ chaw cuˇ yiˍ cawˬ paˍ, Yeˍsuˆ kʼawꞈ teꞈ tu la ve htaꞈ kʼoˆ guiˇ gʼuiˬ guiˇ ve yoˬ. Chi ve Kawˇrenˍhtuˆ venˇ hkʼaw ve chaw teˇ hpaˍ htaꞈ heuˆ la kuiˬ cawˬ ve yoˬ. (Tcuh yaˇ 17:18, 31, 32) Chaw teˇ hpaˍ dawˇ ve, Yeˍsuˆ kʼawꞈ teꞈ tu la ve awˬ tehˬ maˇ cawˬ. Chaw yaˇ gʼa “suh ve” lehˬ venˇ baˆ htaꞈ pa taw yoˬ. Gʼuiˬ sha venˇ baˆ hpehˇ laˇ leh Hkriꞈ yaˇ hpehꞈ la htaˇ, “kʼawꞈ teꞈ tu la ve” tehꞈ yawˇ hui dawˇ ve yoˬ. Yawˇ hui kʼawꞈ teꞈ tu la ve htaꞈ maˇ yonˍ ve kʼo, yawˇ hui yonˍ ve lehˬ teꞈ chiˉ awˬ bon maˇ cawˬ. Yaˬhoˉvaˬ Yeˍsuˆ htaꞈ maˇ kʼawꞈ teꞈ tu la tcuh ve kʼo, htaiˍ hkʼawꞈ ve maˇ cawˬ. Htaiˍ hkʼawꞈ ve maˇ cawˬ ve kʼo, chaw yaˇ teˇ gʼaˇ le le venˇ baˆ maˇ gʼa ponˬ. Awˬ lawn chi htaꞈ maˇ yonˍ ve kʼo, teꞈ chiˉ awˬ bon maˇ cawˬ.—1 Kawˇrenˍhtuˆ 15:13-19; Heˍbrehˇ 9:12, 14.

12. 1 Peˍtruˆ liꞈ 3:18, 22 hkʼaw kʼoˆ taˍ ve hkʼe, Yeˍsuˆ kʼawꞈ teꞈ tu la ve leh peuˬ laˬ htaˇ kʼawꞈ teꞈ tu la ve hkʼaˬ hkʼe te maˇ shuˍ daꞈ ve le?

¹² Pawˇluꞈ yawˇ gʼa hpuˇ ve pa taw chi hkʼe na gʼa ve, “Hkriꞈ lehˬ suh kuiˬ lo awˬ tehˬ awˬ na kʼawꞈ teꞈ tu la peuˬ.” Yeˍsuˆ kʼawꞈ teꞈ tu la ve lehˬ peuˬ laˬ htaˇ kʼawꞈ teꞈ tu la ve hkʼa peu˗eˬ aꞈ kehˉ a yeˇ uiˍ jaˇ. Yawˇ hui htaꞈ kʼawꞈ teꞈ tu la piˇ ve htawˇ, yawˇ hui gʼa kʼawꞈ suh˗e sheˍ ve yoˬ. Pawˇluꞈ kʼoˆ ve, Yeˍsuˆ lehˬ “suh peuˬ ve chaw hui awˬ hkʼaw lo awˉ lawˉ nawꞈ la ve awˬ shiˍ hpehꞈ ve yoˬ.” Aˬ htoꞈ ma te yawˇ chi hkʼe kʼoˆ ve le? Yeˍsuˆ kʼawꞈ teꞈ tu la leh mvuhˇ naw ma hkʼoˆ taˆ˗e ve awˉ lawˉ teˇ gʼaˇ hpehꞈ leh, mvuhˇ naw ma hkʼoˆ taˆ˗e ve chaw yaˇ awˉ lawˉ teˇ gʼaˇ hpehꞈ ve yoˬ.—1 Kawˇrenˍhtuˆ 15:20; Tcuh yaˇ 26:23; 1 Peˍtruˆ 3:18, 22 gʼaw sheˍ.

13. Aˍ danˍ leh Yeˍsuˆ peun daꞈ ve tehꞈ Pawˇluꞈ hkʼaˬ hkʼe tehˆ daꞈ ve le?

¹³ Chaw teˇ gʼaˇ suh˗e ve pa taw, chaw laiˉ lanˬ gʼaˇ a shaꞈ kʼawꞈ gʼa tuˬ hkʼaˬ hkʼe te hpehꞈ kʼai gʼa ve le? Awˬ lawn chi Pawˇluꞈ hkʼa dehꞈ kʼoˆ maˍ laˇ gʼa ve yoˬ. Aˍdanˍ te ve awˬ ceuˬ leh Yeˍsuˆ te ve awˬ ceuˬ peun daꞈ ve tehꞈ Pawˇluꞈ tehˆ daꞈ ve yoˬ. Pawˇluꞈ Aˍdanˍ htaꞈ kʼoˆ ve, “awˬ lawn kʼo, chaw teˇ gʼaˇ htaꞈ pa taw suh ve teˇ ceuˬ cawˬ la ve” yoˬ. Aˍdanˍ venˇ baˆ te ve pa taw yawˇ leh yawˇ ve awˬ yaˇ awˬ duˬ gʼa suh˗e ve yoˬ. Aˍdanˍ maˇ na yuˬ ve pa taw, chi beuꞈ ngaˬ hui kaꞈ haiˬ ve gʼa hpuˇ chehˇ sheˍ ve yoˬ. Yaꞈ hkʼaˇ, Gʼuiˬ sha yawˇ ve Yaˇ htaꞈ kʼawꞈ teꞈ tu la piˇ ve lehˬ, awˬ bon maˇ maˇ cawˬ ve yoˬ. Pawˇluꞈ kʼoˆ ve, “chaw teˇ gʼaˇ htaꞈ pa taw suh ve chaw hui kʼawꞈ teꞈ tu la ve teˇ ceuˬ cawˬ la ve yoˬ.” Leh yawˇ kʼawꞈ kʼoˆ ve, “Aˍdanˍ awˬ hkʼaw lo chaw hkʼa peu˗eˬ suh ve” yoˬ. Chi htaꞈ pa taw, “Hkriꞈ awˬ hkʼaw lo chaw hkʼa peu˗eˬ kʼawꞈ teꞈ tu la tuˬ yoˬ.”—1 Kawˇrenˍhtuˆ 15:21, 22.

14. Aˍdanˍ lehˬ kʼawꞈ teꞈ tu la tuˬ laˇ? Kʼoˆ maˍ laˇ sheˍ.

¹⁴ Pawˇluꞈ kʼoˆ gaˇ ve tcuhˉ kuiˬ lehˬ “Aˍdanˍ awˬ hkʼaw lo chaw hkʼa peu˗eˬ suh ve” yoˬ. Aˍdanˍ maˇ biˇ ve pa taw chaw yaˇ teˇ gʼaˇ le le venˇ baˆ gʼa leh gʼa suh˗e ve tehꞈ Pawˇluꞈ kʼoˆ gaˇ ve yoˬ. (Roˉmaꞈ 5:12) Aˍdanˍ lehˬ “kʼawꞈ teꞈ tu la tuˬ” ve awˬ moˍ hkʼaw maˇ gʼa chehˇ. Aˍdanˍ biˇ ve chaw hpehꞈ leh Gʼuiˬ sha hkawˇ maˇ na yuˬ tuˬ leuˆ yuˬ ve pa taw, Yeˍsuˆ htaiˍ hkʼawꞈ laˇ ve awˬ hpfuhˇ yawˇ awˬ pon yehˇ maˇ gʼa. “Chaw yaˇ ve Yaˇ hpu” lehˬ chaw yaˇ htaꞈ “aˉ cheꞈ” hpehꞈ ve hkʼe dawˇ cheˆ piˇ ve hkʼa shuˍ, Aˍdanˍ ve a shaꞈ htaꞈ “co co taiˍ taiˍ” te luˬ ve yoˬ.—Maꞈhtehˍ 25:31-33, 46; Heˍbrehˇ 5:9.

15. “Kʼawꞈ teꞈ tu la tuˬ ve” chaw “hkʼa peu˗eˬ” awˬ moˍ hkʼaw a shu chehˇ tuˬ ve le?

¹⁵ Pawˇluꞈ kʼoˆ ve, “Hkriꞈ awˬ hkʼaw lo chaw hkʼa peu˗eˬ kʼawꞈ teꞈ tu la tuˬ yoˬ.” (1 Kawˇrenˍhtuˆ 15:22) Liꞈ chi teˇ kʼoˆ Pawˇluꞈ a shu htaꞈ bvuhꞈ piˇ ve chaˬ nyi  sheˍ. Kawˇrenˍhtuˆ venˇ hkʼaw chehˇ ve leuˆ yuˬ taˍ ve chaw kʼawꞈ teꞈ tu la leh mvuhˇ naw ma hkʼoˆ taˆ˗e tuˬ ve htaꞈ Pawˇluꞈ liꞈ bvuhꞈ piˇ ve yoˬ. Yawˇ hui ‘Yeˍsuˆ Hkriꞈ htaꞈ pa taw daꞈ la kehˬ la peuˬ. Yeˍsuˆ Hkriꞈ ve awˬ meh htaꞈ hkʼa kuˬ ve chaw hkʼa peu˗eˬ geh teˇ geh Hkriꞈ yaˇ hpehꞈ la tuˬ yoˬ.’ Pawˇluꞈ kʼoˆ piˇ ve, yawˇ hui lehˬ “Hkriꞈ awˬ hkʼaw lo suh peuˬ ve chaw hui” hpehꞈ ve yoˬ. (1 Kawˇrenˍhtuˆ 1:2; 15:18; 2 Kawˇrenˍhtuˆ 5:17) Pawˇluꞈ awˬ nu ve liꞈ teˇ kʼoˆ kʼawꞈ bvuhꞈ sheˍ ve, “ngaˬ hui yawˇ geh teˇ geh suh ve kʼo, ngaˬ hui yawˇ geh teˇ geh kʼawꞈ teꞈ tu la tuˬ yoˬ.” (Roˉmaꞈ 6:3-5) Yeˍsuˆ kʼawꞈ teꞈ tu la leh mvuhˇ naw ma hkʼoˆ taˆ˗e ve yoˬ. Chi htaꞈ pa taw, Yeˍsuˆ Hkriꞈ ve awˬ laꞈ gʼawˇ daꞈ kehˬ ve awˬ ha hpu leuˆ yuˬ piˇ taˍ ve chaw hkʼa peu˗eˬ lehˬ mvuhˇ naw ma hkʼoˆ gʼa taˆ˗e tuˬ yoˬ.

16. Aˬ htoꞈ ma te Pawˇluꞈ Yeˍsuˆ htaꞈ “awˉ lawˉ” tehꞈ kʼoˆ ve le?

¹⁶ Yeˍsuˆ Hkriꞈ lehˬ “suh peuˬ ve chaw hui awˬ hkʼaw lo awˉ lawˉ nawꞈ la ve awˬ shiˍ hpehꞈ ve” tehꞈ Pawˇluꞈ kʼoˆ ve yoˬ. Yeˍsuˆ lehˬ Iˉsaˍreˍlaˆ chaw awˬ shiˍ awˬ nu awˉ lawˉ ve gʼeuꞈ leh Gʼuiˬ sha htaꞈ tanˇ piˇ ve hkʼe hpehꞈ ve yoˬ. Yeˍsuˆ awˬ gʼuˇ suhˍ kʼawꞈ teꞈ tu la ve chaw laiˉ gʼaˇ cawˬ ve yoˬ. Tawˇ pa haˉ te kʼo, Laˍzaˍruˆ kaꞈ teˇ gʼaˇ yoˬ. Yaꞈ hkʼaˇ, Yeˍsuˆ mvuhˇ naw ma hkʼoˆ chehˇ tuˬ kʼawꞈ teꞈ tu la leh co co taiˍ taiˍ ve a shaꞈ gʼa ve awˉ lawˉ teˇ gʼaˇ hpehꞈ ve yoˬ. Pawˇluꞈ Yeˍsuˆ htaꞈ “awˉ lawˉ” tehꞈ kʼoˆ ve lehˬ, Yeˍsuˆ awˬ hkʼawꞈ nawˉ kʼawꞈ teꞈ tu la leh mvuhˇ naw ma hkʼoˆ taˆ˗e tuˬ ve chaw cawˬ sheˍ tehꞈ hpeuꞈ maw laˇ ve yoˬ. Yawˇ hui lehˬ, tcuh yaˇ hui leh Yeˍsuˆ Hkriꞈ ve awˬ laꞈ gʼawˇ hui leh daꞈ kehˬ ve awˬ ha hpu leuˆ yuˬ taˍ ve yoˬ.

17. Yeˍsuˆ Hkriꞈ ve awˬ laꞈ gʼawˇ hui daꞈ kehˬ ve awˬ ha hpu leuˆ yuˬ taˍ ve mvuhˇ naw ma hkʼoˆ laꞈ shawnˍ hkʼaˬ htaˆ gʼa tuˬ ve le?

¹⁷ Pawˇluꞈ Kawˇrenˍhtuˆ venˇ hkʼaw Hkriꞈ yaˇ htaꞈ liꞈ bvuhꞈ piˇ htaˇ, Yeˍsuˆ Hkriꞈ ve awˬ laꞈ gʼawˇ daꞈ kehˬ ve awˬ ha hpu leuˆ yuˬ piˇ taˍ ve chaw lehˬ mvuhˇ naw ma hkʼoˆ maˇ gʼa taˆ˗e sheˍ. Awˬ lawn chi lehˬ awˬ gʼuˇ suhˍ hpawˇ hpehꞈ la tuˬ yoˬ tehꞈ Pawˇluꞈ kʼoˆ ve yoˬ. Yawˇ kʼoˆ ve, “chaw teˇ gʼaˇ le le a shu yawˇ ve awˬ yanˇ cawˇ ve hkʼe kʼawꞈ teꞈ tu la tuˬ yoˬ. Hkriꞈ lehˬ awˉ lawˉ nawꞈ ve awˬ shiˍ hpehꞈ ve yoˬ. Awˬ hkʼawꞈ nawˉ Hkriꞈ kʼawꞈ yaꞈ la ve teˇ yanˇ, yawˇ htaꞈ hkʼa caˉ daꞈ ve chaw teˇ hpaˍ kʼawꞈ teꞈ tu la tuˬ yoˬ.” (1 Kawˇrenˍhtuˆ 15:23; 1 Hteˇsaˍlawˇniˆ 4:15, 16) Tcuh yaˇ hui leh Yeˍsuˆ Hkriꞈ ve awˬ laꞈ gʼawˇ hui daꞈ kehˬ ve awˬ ha hpu leuˆ yuˬ piˇ taˍ ve chaw suh˗oˬ ve htawˇ, Yeˍsuˆ Hkriꞈ jawˇ mawˇ te htaˇ hkʼa gaˬ gʼa law taˍ ve yoˬ. Mvuhˇ naw ma hkʼoˆ laꞈ shawnˍ gʼa tuˬ ve chaw htawˇ, “[Yeˍsuˆ] geh teˇ geh kʼawꞈ teꞈ tu la tuˬ yoˬ.” Chi teˇ hkui ngaˬ hui awˬ yanˇ chi ve hkʼaw chehˇ taˍ ve yoˬ.

18. (a) Kʼawꞈ teꞈ tu la leh mvuhˇ naw ma hkʼoˆ taˆ˗e ve awˬ hkʼoˆ kaꞈ, kʼawꞈ teꞈ tu la ve awˬ nu ve teˇ ceuˬ cawˬ ve tehꞈ aˬ htoꞈ ma te ngaˬ hui kʼoˆ gʼa ve le? (b) 1 Kawˇrenˍhtuˆ liꞈ 15:24-26 hkʼaw kʼoˆ taˍ ve hkʼe, mvuhˇ naw ma hkʼoˆ aˬ htoꞈ ma hpehꞈ la tuˬ le?

¹⁸ Ka tiꞈ yeˬ ve Hkriꞈ yaˇ awˬ nu ve chaw mvuhˇ naw ma hkʼoˆ Yeˍsuˆ Hkriꞈ geh taˆ˗e tuˬ maˇ dawˇ law ve  chaw kʼo˗ehꞈ? Yawˇ hui kaꞈ kʼawꞈ teꞈ tu la ve dawˇ law kuiˬ hkʼa shuˍ cawˬ ve yoˬ. Liꞈ hpu hkʼaw kʼoˆ ve, Pawˇluꞈ leh awˬ nu ve chaw teˇ hpaˍ mvuhˇ naw ma hkʼoˆ taˆ˗e tuˬ ve lehˬ, kʼawꞈ teꞈ tu la ve awˉ lawˉ teˇ moˍ hkʼaw chehˇ ve yoˬ. (Hpiˇliˇpiˆ 3:11) Chi kʼoˆ gaˇ ve lehˬ, awˬ nu ve teˇ moˍ kaꞈ kʼawꞈ teꞈ tu la tuˬ yoˬ. Awˬ lawn chi Yawˇbaˆ yonˍ ve htaꞈ hawˍ daꞈ ve yoˬ. (Yawˇbaˆ 14:15) “[Yeˍsuˆ] htaꞈ hkʼa caˉ daꞈ ve chaw teˇ hpaˍ kʼawꞈ teꞈ tu la tuˬ yoˬ.” Yeˍsuˆ lehˬ mvuhˇ miˬ teˇ hpaˍ leh kanˇ paˆ cawˬ ve chaw hkʼa peu˗eˬ htaꞈ te luˬ htaˇ, yawˇ hui mvuhˇ naw ma hkʼoˆ Yeˍsuˆ geh teˇ geh chehˇ tuˬ yoˬ. “Awˬ leh meuˇ te luˬ piˇ tuˬ ve canˇ paˍ lehˬ, suh ve teˇ ceuˬ htaꞈ yoˬ.” Kʼawꞈ teꞈ tu la leh mvuhˇ naw ma hkʼoˆ taˆ˗e ve chaw lehˬ maˇ kʼawꞈ gʼa suh˗o. Hkʼe kʼo awˬ nu ve chaw˗ehꞈ?—1 Kawˇrenˍhtuˆ 15:24-26 gʼaw sheˍ.

19. Miˬ guiˬ hkʼoˆ lo dawˇ law kuiˬ cawˬ ve chaw aˬ htoꞈ ma gʼa tuˬ le?

¹⁹ Miˬ guiˬ hkʼoˆ chehˇ tuˬ dawˇ law kuiˬ cawˬ ve chaw kʼo˗ehꞈ? Yawˇ hui Pawˇluꞈ kʼoˆ taˍ ve hkʼe dawˇ law ve yoˬ. Yawˇ kʼoˆ ve, ‘hteˇ ve chaw kaꞈ maˇ hteˇ ve chaw kaꞈ kʼawꞈ teꞈ tu la tuˬ yoˬ tehꞈ, ngaˬ htawˇ Gʼuiˬ sha htaꞈ cuˇ leh dawˇ law ve yoˬ.’ (Tcuh yaˇ 24:15) Haiˬ ve chaw mvuhˇ naw ma hkʼoˆ gʼa taˆ˗e tuˬ awˬ hkʼaˇ maˇ cawˬ. Chi teˇ tawn lehˬ, awˬ gʼuˇ suhˍ hpawˇ miˬ guiˬ hkʼoˆ kʼawꞈ teꞈ tu la ve htaꞈ kʼoˆ gaˇ ve yoˬ.

20. Kʼawꞈ teꞈ tu la ve dawˇ law kuiˬ htaꞈ aˬ htoꞈ ma te nawˬ hkʼa dehꞈ yonˍ gʼa ve le?

²⁰ “Kʼawꞈ teꞈ tu la ve” lehˬ awˬ tehˬ cawˬ tuˬ yoˬ! Miˬ guiˬ hkʼoˆ lo kʼawꞈ teꞈ tu la ve chaw lehˬ co co taiˍ taiˍ ve a shaꞈ gʼa tuˬ awˬ hkʼaˇ cawˬ ve yoˬ. Ka tiꞈ chi awˬ tehˬ hpehꞈ tuˬ yoˬ tehꞈ nawˬ yonˍ gʼa ve yoˬ. Nawˬ haꞈ ve chaw suh˗e ve htaꞈ dawˇ nawˇ htaˇ, dawˇ law kuiˬ chi ve nawˬ htaꞈ awˬ gʼaˇ peꞈ laˇ jaˇ ve yoˬ hehˉ. Yeˍsuˆ Hkriꞈ leh awˬ nu ve chaw jawˇ mawˇ te leh ‘teˇ hinˉ hkʼawꞈ uˉ peunˍ’ htaˇ, yawˇ hui kʼawꞈ teꞈ tu la tuˬ yoˬ. (Hpeuꞈ maˍ ve 20:6) Yeˍsuˆ Hkriꞈ 1,000 hkʼawꞈ maˇ gʼa uˉ peunˍ sheˍ htaˇ nawˬ suh˗e ve kʼo, nawˬ kʼawꞈ teꞈ tu la tuˬ yoˬ tehˬ yonˍ gʼa ve yoˬ. Dawˇ law kuiˬ chi ve lehˬ, awˬ tehˬ hpehꞈ la tuˬ yoˬ tehꞈ ngaˬ hui yonˍ gʼa ve yoˬ. (Roˉmaꞈ 5:5) Dawˇ law kuiˬ chi ve lehˬ, nawˬ chi teˇ hkui Gʼuiˬ sha ve kanˉ ha lehˬ ha kʼa ve hkʼaw te gʼa tuˬ awˬ gʼaˇ gʼa ve yoˬ. Yaꞈ hkʼaˇ, chi hkʼe ceh maˇ heˆ. Awˬ gʼuˇ suhˍ teˇ lawn hkʼaw 1 Kawˇrenˍhtuˆ liꞈ kaˇ nanˉ uiˍ 15 hkʼaw ve ngaˬ hui htaꞈ aˬ htoꞈ ma maˍ laˇ gʼa sheˍ ve teˇ geh henˇ tuˬ yoˬ.