1-2. Akwakudifukula alala akweti kuchiñejanyi?

KUCHIÑEJA kwalema nankashi. Antu amakwawu achiñejaña kwikala nawulu wawuwahi, nanyana yakola kumujimba nikuyuuka chikatu chikwetiwu. Ninetu akwaKristu tunateli kufwila yuma yoyimu. Ilaña kuchiñeja kutwalemesha kwabadika iyi yuma; hikuchiñeja kwakwikala nawumi wahaya nyaaka nikwakudimona nawantaña jetu afwa dehi.

² Kapostolu Pawulu wahosheli nindi: “Nachiñejaña mudi Nzambi . . . nami kwamba kekala kusañuka kwawantu aloña niabula kuloña.” (Yilw. 24:15) Pawulu diyi wadiña watachi kuhosha hansañu yakusañuka wanyi. Ilaña nkakululula Yoba niyena wahoshelihu. Wakuhweleleli nindi Nzambi wakamwanuka nawa wakamusañula.—Yoba 14:7-10, 12-15.

3. Mukanda wa 1 Akorinda 15 wunateli kutukwasha ñahi?

³ “Kusañuka kwawafu” ‘hichikuku’ hela “[hi]ntañishilu yatachi,” yakuhwelelawu akwaKristu ejima. (Heb. 6:1, 2) Nsañu yahosheliyi Pawulu hakusañuka yekala ha 1 Akorinda 15. Nsañu yasonekeliyi yatela yayikolesheli akwaKristu akusambila. Nawa aka kapetulu kakuyikwasha kukuhwelela chikupu nenu kukekala kusañuka.

4. Chumanyi chinateli kutuletesha kukuhwelela netu antu afwa dehi akayisañula?

⁴ Kusañuka kwaYesu Kristu kwatukwashaña kukuhwelela netu antaña jetu afwa dehi akasañuka. Iyi nsañu yadiña hakachi ‘kansañu yayiwahi’ yayishimwininiyi Pawulu Akorinda. (1 Kor. 15:1, 2) Dichi wahosheli nindi neyi mukwaKristu wakuhwelela wanyi mukusañuka dikwila nawu chikuhwelelu chindi chamukunkulwayi. (1 Kor. 15:17) Kusañuka kwaYesu dikunateli  kutukwasha kukuhwelela netu antu afwa dehi akayisañula.

5-6. Indi mazu ekala ha 1 Akorinda 15:3, 4 atukwashaña ñahi?

⁵ Pawulu chatachikiliyi kuhosha hansañu yakusañuka wahosheli yuma yisatu yalala. (1) “Kristu wafwili kukoola nshidi jetu.” (2) “Amujiikili.” (3) “Amusañwili hefuku damuchisatu kwesekeja nachahosha Nsona.”—Tañenu 1 Akorinda 15:3, 4.

⁶ Kufwa kwaYesu, chamujiikiliwu nikusañuka kwindi kwatukwashaña ñahi? Kaprofwetu Isaya washimwineñahu dehi nindi Mesiya “[aka]mufumisha hetuña dawamomi” nawa ‘akamujiika nawantu atama.’ Ilaña kwadiña yuma yenjileña nakumwekana. Isaya wabombelelihu nindi Mesiya ‘wakasenda nshidi yawantu amavulu.’ Yesu welili mwenimu kuhitila mukuhana ifutu danyiloña. (Isa. 53:8, 9, 12; Mat. 20:28; Rom. 5:8) Dichi kufwa kwaYesu, kumujiika nikusañuka kwindi kwatukwashaña kukuhwelela netu akatusubula kunshidi nikukufwa nawa twakadimona cheñi nawantaña jetu afwa dehi.

7-8. Chumanyi chayikwashaña akwaKristu kukuhwelela nawu Yesu amusañwili?

⁷ Hakwila tukuhweleli netu kwakekala kusañuka, chatachi twatela kukuhwelela netu Yesu amusañwili. Muloñadi chitwatela kukuhwelela netu Yehova wamusañwili Yesu?

⁸ Kwadiña antu amavulu amumweni Yesu hanyima yakumusañula nawa alejeliku amakwawu. (1 Kor. 15:5-7) Muntu watachi wateneniyi Pawulu nindi wamumweni Yesu wadiña Petulu (Kefwasi). Izanvu dawatumbanji dahosheli nawu Petulu wamumweni Yesu asañwiliwu. (Luka 24:33, 34) Kubombelahu, “apostolu 12,” amumweni Yesu hanyima yakumusañula. Kuhiñahu Kristu “wamwekeni kudi anakwetu akubadika ha 500 hampinji yoyimu,” hadaha hakubulakana kwadiña muÑaliliya, kwashimunawu haMatewu 28:16-20. Cheñi, Yesu “wamwekeni kudi Yakoba” manakwindi wakuwanamu, wabulili kumukuhwelela Yesu hakusambila nindi diyi Mesiya. (Yow. 7:5) Hanyima yakwila namumoni dehi Yesu asañwiliwu, Yakoba wamukuhweleleli. Kwakwihi na 55 C.E. hampinji yasonekeleñayi Pawulu iwu mukanda, antu amavulu amweni nawu Yesu amusañwili achidiña kwoku, dichi muntu wejima wajinokeleña nindi Yesu amusañwili wanyi wayileña nakuyihula.

9. Yilwilu 9:3-5, yahoshaña hawunsahwinyi wukwawu wamwekeshaña nawu mwalala Yesu amusañwili?

⁹ Nkumininaku, Yesu wamwekeni kudi Pawulu yomweni. (1 Kor. 15:8) Pawulu (Sawulu) wayileña kuDamakasa hampinji yatiyiliyi izu daYesu asañwiliwu nawa hamweniyi chimwenu chaYesu iku wudi mwiwulu. (Tañenu Yilwilu 9:3-5.) Chuma chamumwekeneni Pawulu chadiña hiwunsahu wukwawu wamwekesheleña nawu mwalala Yesu amusañwili.—Yilw. 26:12-15.

10. Pawulu welilidi chelili yeluki nindi Yesu amusañwili kufuma mudi afu?

¹⁰ Antu amakwawu anateli kukeña kwiluka mazu aPawulu muloña mpinji yimu wadiña nakukabisha akwaKristu. Hanyima yakwila Pawulu nakuhweleli dehi nindi Yesu amusañwili, wazatili nañovu kulonda yakwashi antu kwiluka ichi chalala. Hampinji yashimwinineñayi ichi chalala nindi Yesu wafwili nawa amusañwili cheñi, Pawulu wamweni yihuñu yayivulu, amweteli, amukasili mukaleya nawa matu akandaminiyi akisikili. (1 Kor. 15:9-11; 2 Kor. 11:23-27) Pawulu welukili nindi Yesu amusañwili kufuma mudi afu nawa wafwilileña kufwa muloña wakuhakwilaku yuma yakuhweleleliyi. Komana wunsahu washimwiniwu akwaKristu akusambila hiwunayikwashi  kwiluka chikupu nenu Yesu amusañwili kufuma mudi afuku? Nawa hiwayileteshaña kukuhwelela chikupu nenu kumbidi kwakekala kusañukaku?

11. Muloñadi aKorinda amakwawu chadiñileñawu nayitoñojoka yaheña kutalisha hakusañuka?

¹¹ Antu amakwawu ashakamineña mumusumba waKorinda wawaGiriki adiña nayitoñojoka yaluwa kutalisha hakusañuka chakwila ahosheleña nawu “kwosi kusañuka kwawafu.” Muloñadi? (1 Kor. 15:12) Antu adiza maana awantu mumusumba wukwawu wawaGiriki waAtenisi, akanineña yitoñojoka yakwila nawu Yesu amusañwili. Yitoñojoka yamuchidiwu yatela yaluwañesheli antu amakwawu muKorinda. (Yilw. 17:18, 31, 32) Hadaha amakwawu atoñojokeleña nawu kwadiña kusañuka kwachifwikija, dikwila nawu muntu “wafwili” munshidi, ilaña wekalili cheñi “wamumi” chekaliliyi mukwaKristu. Hichikweti muloña nawunsahu wahanineñawuku, ilaña neyi muntu yakaana kukuhwelela mukusañuka, dikwila nawu chikuhwelelu chindi chafwa. Neyi chakwila Nzambi hamusañwili Yesuku, dikwila nawu kwosi ifutu danyiloña dahaniniyi nawa nshidi jawantu hiyajanakeneniku. Dichi antu abulili kukuhwelela mukusañuka hiyadiña nakuchiñejaku.—1 Kor. 15:13-19; Heb. 9:12, 14.

12. Kwesekeja na 1 Petulu 3:18, 22, kusañuka kwaYesu kunambuki ñahi nakwawantu asañwiliwu hakusambila?

¹² Pawulu welukili nindi “Kristu amusañwili kufuma mudi afu.” Iku kusañuka kwadiña kwalema nankashi kubadika kwawantu ejima asañwiliwu hamaseki nawa afwa cheñi. Pawulu wahosheli nindi Yesu diyi wadiña “mukabu watachi wanowu anaholokeli mutulu twakufwa.” Yesu wadiña watachi munjilanyi? Diyi wadiña muntu watachi kumusañula namujimba wakuspiritu nawa diyi wadiña watachi kuya mwiwulu.—1 Kor. 15:20; Yilw. 26:23; tañenu 1 Petulu 3:18, 22.

13. Pawulu washimwini chaambwinyi chidi hakachi kaAdama naYesu?

¹³ Kufwa kwamuntu wumu kunateli kuhandisha ñahi antu amavulu? Ilu lwihu alwakwili kudi Pawulu. Walumbulwili chaambu chidi hakachi kayuma yayimwekeneni antu hamuloña wachuma cheliliyi Adama nakuwaha kwafumañamu muloña wamulambu waKristu. Pawulu wasonekeli kutalisha hadi Adama nindi: “Kufwa kwenjili kuhitila mudi muntu wumu.” Chelili Adama yavulumuni wadileteleli kukala kushilahu tuhu nianyanindi. Tuchidi kukabakana muloña wakudikaña kwindi. Ilaña hamuloña wakwila Nzambi wasañwili Mwanindi, tukweti kuchiñeja kwakumbidi. “Kusañuka kwawafu nikwena kwenza kuhitila mudi muntu wumu,” Yesu. Pawulu wahosheli nindi: “Neyi chochinakufwawu antu ejima kuhitila mudi Adama, chochimu nawa antu ejima akekala nawumi kuhitila mudi Kristu.”—1 Kor. 15:21, 22.

14. Komana Adama akamusañula? Lumbululenu.

¹⁴ Pawulu watalishili mudihi chahosheliyi nindi “chochinakufwawu antu ejima kuhitila mudi Adama”? Pawulu wahosheleña hadi antu ejima aswana nshidi nikubula kuwanina kuhitila mudi Adama nawa anakufwa. (Rom. 5:12) Adama wudi wanyi hakachi kawantu “akekala nawumi.” Ifutu danyiloña daKristu hidamukuulaku muloña wadiña wawanina wadikañili naNzambi mumushikila. Yuma yamumwekeneni Adama diyi yakamwekena antu akasompeshawu kudi “Mwana kamuntu” nawu “ampembi,” dikwila nawu “akayijilumuna haya nyaaka.”—Mat. 25:31-33, 46; Heb. 5:9.

15. Anyi anabombelimu mudi antu “ejima” akekala nawumi”?

¹⁵ Pawulu wahosheli nindi “antu ejima akekala nawumi kuhitila mudi Kristu.” (1 Kor. 15:22)  Pawulu wayisonekeleli mukanda akwaKristu awayishewa amuKorinda akasañulawu nawumi wamwiwulu. Awa akwaKristu ‘ayijilikili kwikala atumbanji twaKristu Yesu, atenañawu kwikala akwakujila.’ Nawa wateneni “ninowu aholokela dehi mutulu twakufwa mudi Kristu.” (1 Kor. 1:2; 15:18; 2 Kor. 5:17) Mumukanda wukwawu wamuBayibolu, Pawulu wasonekeli nindi ana ‘afwili neyi chafwiliyi [Yesu] niwena ‘akayisañula neyi chamusañwiliwu yena.’ (Rom. 6:3-5) Yesu amusañwili namujimba wakuspiritu nawa wayili mwiwulu. Dichuma chikayimwekena ejima “adi mudi Kristu,” dikwila nawu akwaKristu awayishewa.

16. Pawulu watalishili mudihi hakumutena Yesu nindi “nyikabu yatachi”?

¹⁶ Pawulu wasonekeli nindi Kristu amusañwili neyi “mukabu watachi wanowu anaholokeli mutulu twakufwa.” Ilukenu nenu antu amakwawu chidi neyi Lazaru niwena ayisañwili, ilaña Yesu diyi wadiña watachi kusañula kufuma mudi afu namujimba wakuspiritu nawa watambwilili wumi wahaya nyaaka. Amwesekejeli nanyikabu yatachi yahanineñawu aIsarela kudi Nzambi. Kubombelahu, Pawulu chamuteneniyi Yesu nindi “nyikaabu yatachi,” watalishili mukwila nindi kudi antu amakwawu akasañulawu nakuya mwiwulu. Apostolu niantu amakwawu “adi mudi Kristu” akamulondela Yesu. Hampinji yatelela niwena akayisañula neyi chamusañwiliwu Yesu.

17. Mpinjinyi yakatambwilawu antu “adi mudi Kristu” wuloku wawu wakuya mwiwulu?

¹⁷ Kusañuka kwakuya mwiwulu kwawantu “adi mudi Kristu” kwadiña kanda kutachiki hampinji yayisonekeleliyi Pawulu aKorinda. Hela chochu, Pawulu wateneneña hampinji yakumbidi nindi: “Muntu-himuntu akamusañula kwesekeja nandonda yindi: Kristu diyi nyikabu yatachi, kuhiñahu antu jaKristu akayisañula hampinji yakwikalahu kwindi.” (1 Kor. 15:23; 1 Tes. 4:15, 16) Makonu tunakushakama mumpinji yateneniwu nawu “mpinji yakwikalahu” kwaKristu. Apostolu niakwaKristu amakwawu awayishewa afwili ahembeleleli kwikalahu kwaKristu kulonda akatambwili wuloku wawu wamwiwulu “nikudinuña hamu [naYesu] neyi chamusañwiliwu.”

18. (a) Muloñadi chitukuhoshela netu kwakekala kusañuka kukwawu hanyima yakusañuka kwakuya mwiwulu? (b) Kwesekeja na 1 Akorinda 15:24-26, yumanyi yakamwekana mwiwulu?

¹⁸ Indi akwaKristu ashinshika abula kwikala nakuchiñeja kwakuya nakushakama hamu naKristu mwiwulu? Niwena akweti kuchiñeja  kwakusañuka. Bayibolu yahosha nayu Pawulu niantu amakwawu ayaña mwiwulu ‘ekala mukusañuka kwatachi kufuma mudi afu.’ (Fwi. 3:11) Komana chumichi chamwekeshaña nawu kwakekala kusañuka kukwawu hanyima yaniku kusañuka? Chumichi chinakwendela hamu nachahosheliyi Yoba kutalisha hayuma yikamwekana kumbidi. (Yoba 14:15) “Antu jaKristu hampinji yakwikalahu kwindi” akekala mwiwulu hamu naYesu hampinji yakela najilumuni dehi nfulumendi jejima, niwuswa wejima niñovu jejima. ‘Nichilumbu wakukumishaku, kufwa,’ akamujilumuna. Dichi antu ejima akasañulawu nakuya mwiwulu, hiyakafwa cheñiku. Indi antu amakwawu?—Tañenu 1 Akorinda 15:24-26.

19. Chumanyi chatela kukuhwelelawu antu akweti kuchiñeja kwakushakama hamaseki?

¹⁹ Chumanyi chatela kukuhwelelawu antu akweti kuchiñeja kwakushakama hamaseki? Atela kukuhwelela mazu ahosheliyi Pawulu nindi: “Nachiñejaña . . , nami kwamba kekala kusañuka kwawantu aloña niabula kuloña.” (Yilw. 24:15) Hela chochu, kwosi muntu wabula kuwanina watela kuya mwiwulu, dichi awa mazu amwekeshaña nawu kwakekala kusañuka kumbidi hanu hamaseki.

20. Chikuhwelelu chenu chinakoleliku ñahi?

²⁰ Chakadi nikujina, “kwakekala kusañuka.” Antu akasañulawu hamaseki akekala nakuchiñeja kwakushakama nawumi wahaya nyaaka hanu hamaseki. Mwatela kukuhwelela nenu ichi chikaninu chikashikijewa. Iku kuchiñeja kunateli kuyikundeja neyi mwanuka antaña jenu afwa dehi. Akayisañula kufuma mudi afu hampinji yakayuulañayi Kristu kushilahu niantu “akayuula neyi anyanta . . . hadi yaaka 1,000.” (Chim. 20:6) Ninenu mwatela kukuhwelela nenu neyi mufwa henohu Yaaka Ikombakaji kanda, akayisañula. “Iku kuchiñeja kwaletaña nsonyi wanyi.” (Rom. 5:5) Kunateli kuyikwasha kwikala akola chayinu mpinji nikwikala namuzañalu hampinji yimunakumukalakela Nzambi. Neyi chinahoshi chibaaba chinalondelihu, kudi yuma yayivulu yitwatela kudizila kumukanda wa 1 Akorinda kapetulu 15.