1-2. Jehovaba ra ǃoaba khoena tae-i ǃâubasensa ūhâ?

ǃÂUBASENSA ūhâs ge kaise a ǂhâǂhâsa. ǂGui khoen ge ǂkhîsa ǃgammeb tsî ǂuru ǀgôana kaikais tsîna ra ǃâubasen. Tamas ka io ǀae-e xu ǂgausa ra ǃâubasen. Sida tsîn ge Xristeǁîn ase nēti ī ǃâubasende ūhâ. Xawe sida di ǃâubasens ge nēs xa a ǃnāsa. Nēs ge sida di ǀamo ûib tsî sida di ǀnamǀnamsa khoen hîna ge ǁōna mûsa ǃkhōǂgā hâ.

² Apsostel Paulub ge ge mî: “Tsî ta ge ǃâubasensa Elob ai ūhâ, . . . ǁō hâna xu khâi-i nîra hâ ti, ǂhanu-ain tsî ǂhanuoǃnân tsîn di-e.” (ǃNǃkh. 24:15) Apostel Paulub ge ge ǂguro tama hâ i, khâis xa ge ǃhoaba. Kai ǁgûb Jobi tsîn ge khâis xa gere ǃhoa. Jobi ge gere ǂgom Elob khâisa nî mā bi ǃkhaisa, ǁōb ga ra o.—Job 14:7-10, 12-15.

3. 1 Korinteǁîn 15ǁî danaǃâsa mati ra hui da?

³ ‘ǁŌ hân di khâis’ di ‘ǁkhāǁkhās’ ge hoa Xristeǁîn ra ǂgom xū-e. (Heb. 6:1, 2) Paulub ra ǃhoa khâis ge 1 Korinteǁîn 15ǁî danaǃâs ǃnâ ra hōhe. ǁÎb ge xoa xūn ge ǂguroǁaeb Xristeǁîna ge omkhâi. Matikō gaxuse du ga khâis ǃnâ ga ra ǂgom xawes ge nē danaǃâsa omkhâi tsî nî ǀgaiǀgai du.

4. Tae-i ǃaroma da a ǂgom ǁkhā, sida ǀnamǀnamsa khoen hîna ge ǁōn khâisa nî hōsa?

⁴ Jesub Xristub di khâis ge ǂgomǃgâsiba ra mā da, ǁnān  hîna ge ǁōn nî khâisa. Jesub di khâis ge Paulub ge Korinteǁîna gere mîba “ǃgâiǂhôasa.” (1Kor. 15:1, 2) ǁÎb ge ge mî, Xristeǁî-i ga khâis ǃnâ ǂgom tama io, o i ge ǁî-i di ǂgomsa hui tama hâ. (1Kor. 15:17) Jesub Xristub ǃnâ ǂgoms ge Xristeǁîn di ǃgaoǃgao.

5-6. 1 Korinteǁîn 15:3, 4 sa tae-e sida ra ǂâibasenba?

⁵ Paulub ge khâis xa a xoa o, ob ge ǃnona xūna ge mî. Ne ǃnona xūn ge (1) ‘Xristub ge sada ǁoren ǃaroma ge ǁō.’ (2) ‘ǁKhōheb’ ge ge. (3) ‘Tsîb ge ǃnonaǁî tsēs ai ge khâi, xoadi ǃoagu.’—Khomai re 1 Korinteǁîn 15:3, 4.

⁶ Jesub ǁōb, ǁkhōs tsî khâis tsîna tae-e ra ǂâibasen nētsē? Jesajab ge ge kēbo, Jesub ge ‘ûitsamana xu nî ǃgaoǁnâhe.’ Tsî ‘ǁgai khoen ǀkha nî ǁkhōhe.’ ǀNî hâ xū-i tsîn ge ge ǃkhōǂgāsa i. Jesajab ge ra mî, Mesiab ge ‘ǂguin di ǁorena nî tani.’ Jesub ge nēsa ge dī, xoremarib ase ǁîb ûiba mās ǃnâ-ū. (Jes. 53:8, 9, 12; Mat. 20:28; Rom. 5:8) Jesub di ǁōb, ǁkhōs tsî khâis tsîn ge ǃgâi ǃâubasensa ra mā da. Î da ǁōb tsî ǁorena xu ǀûbahe. Tsî sida di ǀnamǀnamsa khoena da ǁkhawa nî mûsa, khâin ga ra o.

7-8. Tae-e Xristeǁîna ra hui în Jesub di khâis ǃnâ ǂgom?

⁷ Sida khâis ǃnâ ūhâ ǃâubasens ge Jesuba xu hâ. ǁNā-amaga da ge nî ǂgom Jesub ge ǁōba xu a khâisa. Mati io da ra ǂgom Jehovab ge Jesuba ûi-ûi ǃkhaisa?

⁸ ǂGui khoen ge ge mû, Jesub ge a khâisa. Tsîn ge ǁnās xa khoena gere mîba. (1Kor. 15:5-7) ǂGuro khoeb nēsa ge mûb ge ge Petru i. ǁKhāǁkhāsabegu tsîn ge ge mî, Petrub ge Jesuba khâib hâs khaosi a mûsa. (Luk. 24:33, 34) Tsîb ge ra mî, “disiǀgamǀagu” tsîn ge Jesuba a mûsa. ‘ǁNās khaoǃgâb ge ǀgui ǃnās ai 500sa ǃnā hâ ǃgâsan xa ge mûhe.’ Nēs ge Galileab ǀhaos tawa ge ī Mateub 28:16-20 ǃoagu. ǁNās khaoǃgâb ge Jakobub xa ge mûhe. ǁÎb ge Jesub di ǃgâb hîna ge Jesub a Mesia ǃkhaisa ǂgom tama hâ iba. (Jhn. 7:5) Jesubab ge khâis khaoǃgâ a mû o, ob ge Jakobuba ge ǂgom. ǁAubexa, 55ǁî kurib ge Pauluba, ǁîb sîǂkhanide a xoa o, on ge ǂguin hîna ge Jesuba khâis khaoǃgâ a mûna ge ûitsama i. ǁNās ǀkhan ge nē ǃgâsan tsîna ga dî-e hâ.

9. ǃNaeǃkhaidi 9:3-5 sa tae-e ra mî, Paulub ge ǁōba xu khâi hâ Jesuba a mûsa?

⁹ Egab ge Paulub tsîna Jesuba ge mû. (1Kor. 15:8) Paulub (Saul) ge Damaskusa ǃoa ge gau i, tsî ǁōba xu khâi hâ Jesub domma ge ǁnâu ǀhomma xu. (Khomai re ǃNaeǃkhaidi 9:3-5.) Paulub ǀkha ge ī xū-i ge ra ǁgau, Jesub ge amabes ǃnâ khâisa.—ǃNǃkh. 26:12-15.

10. Pauluba tae-e ge a dī, Jesub ge ǁōba xu khâisab ge ǂgom o?

¹⁰ ǀNî khoen ge Paulub ge mî, xū-i ǃnâ ǃgâiǃgâibasensa nî ūhâ. ǁÎb gere Xristeǁîna mâǃoa amaga. Paulub ge Jesub khâisab ge mû o, o ǃgarise gere sîsen. Tsî khoena amaba gere ǁkhāǁkhā. ǁÎb ge ǂnauhe, tronkes ǃnâ ǂgāhe tsî ǂgau-i xas tsîna ge khôa xuhe hâ i. Tsî nēn hoan ge Jesub ge ǁō xawe, ûitsama dib gere ǁkhāǁkhā amaga, ǁîb ǀkha gere ī. (1Kor. 15:9-11; 2Kor. 11:23-27) Paulub ge gere ǂgom Jesub ge ǁōba xu a khâisa. Tsîb ge gere māsen ǁnās xa aoǁnâ tsî ǁîb ǃgao ǁōsa. ǂGurokamǁaeb Xristeǁîn ge,  Jesub ge ǁōba xu a khâisa a mû ǃkhais ge ra hui da, î da khâis ǃnâ ǂgom. Sida di ǂgoms ge nēs xa ra ǀgaiǀgaihe.

11. Tae-i ǃaroman ge ǁnān hîna Korintes ǃnâ ge hâ îna, ǃgâi tama ǂâi ǀgauba khâis xa ūhâ i?

¹¹ ǀNîn hîna Korintes ǃnâ gere hân ge ǃgâi tama ǂâi ǀgauba ge ūhâ i. ǁÎn ge gere mî, “ǁō hân khâis hâ tama” di. Tae-i ǃaroma? (1Kor. 15:12) Elobmîs ǂansaben ge Jesub di khâis ǃnâ ge ǂgom tama hâ i. Tsî ǀnîn hîna ge Korintes ǃnâ hâ în tsîn ge ǁnā ǂâi ǀgauba ge ūhâ i. (ǃNǃkh. 17:18, 31, 32) ǀNîn ge gere ǂâi khoe-i ge ǀgui ǁae ǁoreb ǃnâ ge hâ i. Xawe Xristeǁî kai i ga o, o khâisa ra hō. Nē khoen ge khâis ǃnâ ǂgom tama hâ is ge gere ǁgau, ǁîn ǂgoms ge ǂkhabusa isa. Elob ga Jesuba khâisa mā tama hâ o, ob ge xoremariba matare-e tama. Tsî da ge ǁoren ǀûbasa ūhâ tide. ǁNā-amagan ge ǁnān hîna ge khâis ǃnâ ǂgom tama hâ-ina, ama ǃâubasen-e ge ūhâ tama hâ i.—1Kor. 15:13-19; Heb. 9:12, 14.

12. 1 Petrub 3:18, 22 ǃoagus ge Jesub khâisa mati ǀkhara i?

¹² Paulub ge aitsama ge ǂanǃgâ ‘Xristub ge ǁō hâna xu khâi ǃkhaisa.’ Nē khâis ge ais ai ge hâ i khâidi xa ge kai i. ǁNān hîna ge khâisa mā-e hâ în ge ǁkhawa ǁō amaga. Paulub ge ra mî, Jesub ge “ǁō gen di ǂguro kai” ǃkhaisa. Mâ ǀgaub ǃnâb ge Jesuba ǂguro i? ǁÎb ge ge ǂguro i, gagasi khâisa ge hōba. Tsîb ge ge ǂguro i, ǀhomma ǃoa ge ība.—1Kor. 15:20; ǃNǃkh. 26:23; khomai re 1 Petrub 3:18, 22 sa.

13. Tae-i ǃkharagagusiba Adammi tsî Jesub ǁaegu hâ dib ge Pauluba mî?

¹³ Matib ǀgui khoeb ǁōba ǂgui khoena ûiba nî mā? Paulub ge ǁnā dîsa ǃgāsase ge ǃeream. Adammi xa ǃaromahe hâsen ge khoen ǀkha tae-e a īsa. Tsî Xristub ǁguibas tae-e sida īǁkhāba kais tsînab ge ge mî. Adammi xab ge ge mî: ‘ǀGui khoeba xub ge ǁōba ge hâ.’ Adammi ge ǁore o, ob ge ǃgomsina ǁîb ǀgôan hoana ge hauba. Nētsē da ge ǁîb ǃgao ǃgomma ra tsâ. Xawe Elob ge ǁîb ôaba khâisa mā, amaga da ge ǃgâi ǃâubasensa ūhâ. ‘ǁŌ hân khâis ge ǀgui khoeba xu ge hâ’ Jesub ǃnâ-ū. “Adammi ǃnân ra hoana ǁō khamin ge ǁkhāti hoana Xristub ǃnâ nîra ûi-ûihe,” dib ge Pauluba ge mî.—1 Kor. 15:21, 22.

14. Adamma khâisa hō i nî? ǁGuiǃā re.

¹⁴ Pauluba tae-e gere ǂâibasen “Adammi ǃnân hoana ra ǁō” dib ge mî o? Paulub ge Adammi surib hoab xa gere ǃhoa. Hîna ge ǁoreb tsî ǀoasaoǃnâsib tsîna ǁîba xu hōna. Tsî ǁnās xa ǃaromahe hâse ra ǁōsa. (Rom. 5:12) Adammi ge ǁnān hîna ‘khâisa’ hō tiden di ǀgui. ǁÎb ge Xristub di xoremariba xu ǃgâiba hō tide. Adammi ge ǀoasa kurusa ge ūhâ i, tsî māsenxase Eloba ge ǁnâuǀnam tama hâ-i. Adammi ǀkha ge ī, xū-i ge ǁnān hînab ‘Khoen Ôaba’ ‘pirin’ ase ǀgoraǃgâ hân ǀkha nî ī. ǁÎn ge ǀamo ûiba hō tide.—Mat. 25:31-33, 46; Heb. 5:9.

15. Haman “hoana” ǃkhōǂgāsa “ûi-ûihe” nîn ǃnâ?

¹⁵ ǃGaoǃgâ re, Paulub ge ge mî: ‘Hoan ge Xristub ǃnâ nîra ûi-ûihe.’ (1Kor. 15:22) Paulub ge ǁîb di sîǂkhanisa Korintes ǃnâ ge hâ i, ǂkhauhesa Xristeǁîna ǃoa ge  a xoa. Hîna ǀhommi di khâisa nî hōna. ǁNā Xristeǁîn ge ‘Xristub Jesub ǃnâ ǃanuǃanuhe hân, ǂgaihesa ǃanun hoana.’ Tsî Paulub ge “Xristub ǀkha ge ǁōn” xa ge ǃhoa. (1Kor. 1:2; 15:18; 2Kor. 5:17) Paulub ge ǀnî sîǂkhanis ǃnâ ge xoa, “Xristub ge ǁō hâna xu ǂkhaiǂkhaihe khami ǁGûb di ǂkhaisiba xu, ǁnāti da nî ǁkhāti ǀasasib ûib dib ǃnâ ûiga.” (Rom. 6:3-5) Jesub ge gagasi soros ǃnâ khâisa hō tsî ǀhommi ǃoa ge ī. Tsî ǁnās khamin ge “Jesub Xristub” ǀkha nî sī ǀhommi ǃnâ ǂgaeǂguina gagasi khâisa nî hō.

16. Pauluba tae-e gere ǂâibasen Jesub a “ǂguro kai” dib ge mî o?

¹⁶ Paulub ge ge xoa, Xristub ge ‘ǁō gen’ di ǂguro khâi. ǂÂis ǃnâ ūhâ re, Lasarub tsîn ge khâisa ge hō. Xawe Jesub ge ge ǂguro i, gagasi khâisa ge a hōba. Tsî ǀamo ûib tsîna. ǁÎb ge Israelǁaes ge Eloba mā ǃgâi xūn ǀkha gere ǀgopeǀnōhe. Paulub gere mî o, Jesub ge ǁō hân di “ǂguro kai” di, ob ge gere ǂâibasen Jesub khaoǃgâs tsînan ǀnîna ǀhommi khâisa nî hōsa. Apostelgu tsî nau khoen hîna “Xristub ǃnâ ge ǁōna” ǃkhōǂgā hâse. ǁÎgu tsîn ge ǁnā khâisa nî hō.

17. Mâǁaen “Xristub ǃnâ ge ǁōna” ǀhommi ǃnâ sī nî ûi?

¹⁷ “Xristub ǃnâ” ge ǁōn di khâis ge Paulub ge ǁîb sîǂkhanisa a xoa ǁaeb ai noxoba ge ī tama hâ i. Paulub ge nēs hānîǁae nî īsa gere ǂâibasen, tsî nēb ge ī-i nî ǀgauba. “ǂGurob ge Xristuba, ǁnās khaoǃgâ Xristub dina, hās âb ǃnâ.” (1Kor. 15:23; 1Tes. 4:15, 16) Nētsē da ge Jesub di “hās” ǁaeb ǃnâ hâ. Apostelgu tsî nau ǂkhauhesa Xristeǁîn hîna ge ǁōn ge Jesub di ǀkhaeba ǃâu hâ, ‘ǁîb ǀkha sī ǀhommi ǃnâ ûis’ diba.

18. (a) Tae-i ǃaroma da a mî ǁkhā, ǀhommi khâis khaoǃgâ, i ǀnî hâ khâisa nî hâsa? (b) 1 Korinteǁîn 15:24-26 ǃoagu i tae-e ǀhommi ǃnâ nî ī?

¹⁸ Tae-e nî hā, ǂgomǂgomsa Xristeǁîn hîna, Jesub ǀkha ǀhommi ǃnâ, sī hâ tiden ǀkha? ǁÎn tsîn ge khâisa nî hō. Elobmîs ge ra mî, Paulub tsî nau ǂkhauhesan tsîn ge ǀhommi khâisa ‘ǁō hâna’ xu ǂgurose nî hō. (Fil. 3:11) Nēs ge ra ǁgau ǀnî khâis nî hâsa. Nēs ge Jobi ge hānîǁae i ǁîb ûib ǀkha tae-e nî īsa a mîs ǀkha a ǀgui. (Job 14:15) ‘Xristub hās ǃnân’ ge ǁîb dina, ǁîb ǀkha  ǀhommi ǃnâ sī nî hâ. Hoa khoesi ǂhanugu tsî ǁîgu ūhâ ǀgaibab ga dīkākā toa o. Tsî “ǀUni khākhoeb, hîkākāhe nîb ge ǁōba.” ǀHommi khâisa nî hōn ge ǁkhawa ǁō tide. Xawe tae-e nau khoen ǀkha nî ī?—Khomai re 1 Korinteǁîn 15:24-26 sa.

19. ǃHūbaib ǃâubasensa ūhâna tae-e a ǃâubasen ǁkhā?

¹⁹ ǃHūbaib di khâisa ūhâna tae-e a ǃâubasen ǁkhā? ǁÎn ge saora mîdi Paulub dide xu ǃâubasensa a hōǁkhā: “Tsî ta ge ǃâubasensa Elob ai ūhâ . . . ǁō hâna xu khâi-i nîra hâ ti, ǂhanu-ain tsî ǂhanuoǃnân tsîn di-e.” (ǃNǃkh. 24:15) Nē xoasa xu a ǃgāsas ge ǂhanu-ai khoe-i ge ǀhommi ǃoa ī tide. Xawe ǃhūbaib ai khâisa nî hō.

20. Sadu ǃâubasensa mati ra ǀgaiǀgaihe?

²⁰ Mâ hâ ǃkhais ge ‘ǁō hâna xu i khâi-e nîra hâsa.’ ǁNān hîna ǃhūbaib ai khâisa nî hōn ge ǀamosib kōse nî ûi. ǁNā mîde da ge a ǂgom ǁkhā. ǁNā ǃâubasens ge nî ǁkhaeǂgao du. Sadu khoen hîna ge ǁōn xa du ga ǂâi o. ǁÎn ge ǁōba xu khâisa nî hō, ‘ǀoadisi [1000] kurigu’ Xristub tsî ǂkhauhesan ǂgaeǂguis ǁaeb ǃnâ. (J.ǂHa. 20:6) Sadu tsîn ge a ǂgom ǁkhā, ǁnā 1000 kurigu aiǃâ du ga ǁō o, o du khâisa nî hōsa. Tsî nē “ǃâubasens ge tao kai” da tide. (Rom. 5:5) Nēs ge nî ǀgaiǀgai du tsî ǂkhîba nî mā du. Eloba du ra ǃoaba hîna. Nēs xa da ge ǃnāsase nî ǁkhāǁkhāsen, 1 Korinteǁîn 15ǁî danaǃâs ǃnâ, saora ǁkhāǁkhāǃâs ǃnâ.