1, 2. ¿Tlen kineltokaj itekipanojkauan Jehová panos?

MONEKI ma tikneltokakan satepan itlaj kuali panos. Miakej kinekij yolpakiskej iuan inamik, kinekij nochipa kuali ma yetokan inkoneuan noso ma pajtikan tla mokokouaj. Akinmej tikchiuaj ken Cristo noijki ijkon tiknekij tiyetoskej. Pero onka okse tlamantli tlen okachi ipati, ajsis tonal ijkuak nochipa tiyoltoskej uan oksepa tikinmitaskej akinmej yoixpolikej.

² Apóstol Pablo okijto tlen okineltokaya: “Ne nikchia inawak Dios [...] non yomikkeh moyolitiskeh, [akinmej yolmelauakej uan akinmej amo yolmelauakej]” (Hech. 24:15). Amo san apóstol Pablo ijkon okineltokaya, noijki Job okineltokaya toTajtsin Dios amo kilkauaskia uan noijki kiyolitiskia (Job 14:7-10, 12-15).

3. ¿Ken techpaleuis timomachtiskej tlen kijtoua 1 Corintios capítulo 15?

³ Akinmej tikchiuaj ken Cristo tikneltokaj “moyolitiskeh n mikemeh” uan poui itech tlen “otechmachtijkeh de Cristo”, kijtosneki tlen opejki timomachtiaj (Heb. 6:1, 2). Pablo okiyekijto non itech 1 Corintios capítulo 15. Tlen okijkuilo okinyolchika tokniuan. Tejuan noijki uelis techyolchikauas maski yimiak xiuitl noso amo tikchixtokej ijkon ma pano.

4. ¿Tleka tikneltokaj toTajtsin Dios kinyolitis akinmej yoixpolikej?

⁴ Jehová okiyoliti Jesús, non techititia melauak kinyolitis akinmej yoixpolikej. Non “kualitlájtoli” Pablo okinmatilti tokniuan tlen ochantiayaj ompa Corinto (1 Cor. 15:1, 2). Okinmilui san nenka tlaneltokaskiaj tla amo kineltokaskiaj  toTajtsin Dios okiyoliti Cristo (1 Cor. 15:17). Tikneltokaj Jehová kinyolitis akinmej yoixpolikej porque achto okiyoliti Jesús.

5, 6. ¿Ken techpaleuia tlen ijkuilitok itech 1 Corintios 15:3, 4?

⁵ Ijkuak Pablo okijto kinyolitiskej akinmej yoixpolikej, achto okijto eyi tlamantli: “Cristo omikki topatka”, “okitookakeh” uan “ipan eyi tonati omoyoliti, ijkó kemi noiwa yokijtojka n tiotlajkuíloli” (xiktlajtolti 1 Corintios 15:3, 4).

⁶ ¿Ken techpaleuia tikmatiskej Jesús omikik, okitokakej uan Jehová okiyoliti? Profeta Isaías okijto Mesías kixpoloskiaj nikan tlaltikpak uan kitokaskiaj iuan amo yolkualmej. ¿Ken techpaleuia tlen okipanok? Isaías noijki okijto imikilis Jesús kipojpoloskia totlajtlakol. Ijkon okichi porque topatka omotemakak (Is. 53:8, 9, 12; Mat. 20:28; Rom. 5:8). Ken Jesús oixpoliuik, okitokakej uan Jehová okiyoliti, techpaleuia ma tikneltokakan ajsis tonal ijkuak ayakmo titlajtlakolchiuaskej nion tiixpoliuiskej uan oksepa tikinmitaskej akinmej tikintlasojtlaj uan yoixpolikej.

7, 8. ¿Tleka tikneltokaj toTajtsin Dios okiyoliti Jesús?

⁷ Moneki tikneltokaskej ika nochi toyolo Jehová okiyoliti Jesús para uelis tikneltokaskej noijki kinyolitis akinmej yoixpolikej. ¿Ken tikmatij Jehová okiyoliti Jesús?

⁸ Miakej okitakej ijkuak Jehová yokiyoliti Jesús (1 Cor. 15:5-7). Apóstol Pablo achto okijto Pedro noso Cefas okitak Jesús ijkuak Jehová yokiyoliti. Sekimej imachtijkauan Jesús noijki okijtojkej Pedro okitak (Luc. 24:33, 34). Noijki doce apóstoles okitakej. Satepan “okinmonextili mákuili siento tokniwah”. Xamo non opanok ompa Galilea ijkon ken kijtoua Mateo 28:16-20. Jesús noijki okimonextili Santiago, xamo okatka itlakpaikni uan amo okineltokaya Jesús okatka Mesías (Juan 7:5). Pero otlaneltokak ijkuak okitak omoyoliti. Kanaj itech xiuitl 55 ijkuak Pablo okintlajkuilili tokniuan tlen ochantiayaj Corinto, miakej tlen okitakej Jesús, ok oyoltokaj. Tla ikaj amo kineltokaskia toTajtsin Dios okiyoliti Jesús, uelis motlapouiskia iuan akin okitak.

9. Ijkon ken kijtoua Hechos 9:3-5, ¿ken okimatki Pablo Jehová okiyoliti Jesús?

⁹ Satepan Jesús okimonextili Pablo (1 Cor. 15:8). Ye noijki omotokayotiaya Saulo uan ijkuak oyaya Damasco, okitak itech se visión (xiktlajtolti Hechos 9:3-5). Tlen Pablo okitak noijki okiteititi Jehová okiyoliti Jesús (Hech. 26:12-15).

10. ¿Tlen okichi Pablo ijkuak okineltokak toTajtsin Dios okiyoliti Jesús?

¹⁰ Sekimej kinekiskiaj kimatiskej tlen okijto Pablo porque ye achto okintlajyouilti akinmej okichiuayaj ken Cristo. Pero ijkuak okineltokak toTajtsin okiyoliti Jesús, okineltokak uan okinpaleui oksekimej noijki ma kineltokakan. Ijkuak okitematilti non, sapanoua okiuitekej, okitsakej uan ijkuak oksekan oyaya itech barco oapolakiaya (1 Cor. 15:9-11; 2 Cor. 11:23-27). Pablo okineltokak toTajtsin Dios okiyoliti Jesús uan okitematilti maski kimiktiskiaj. Tlen okijtojkej akinmej okitakej Jesús ijkuak yomoyoliti, techpaleuia noijki  ma tikneltokakan. Techyolchikaua tikmatiskej toTajtsin Dios kinyolitis akinmej yoixpolikej.

11. ¿Tleka tokniuan tlen ochantiayaj Corinto amo okineltokayaj toTajtsin Dios kinyolitiskiaj akinmej yoixpolikej?

¹¹ Ompa Grecia itech altepetl Corinto, sekimej tokniuan amo okineltokayaj kinyolitiskej akinmej yoixpolikej uan oksekimej okse tlamantli okineltokayaj (1 Cor. 15:12). ¿Tleka? Porque ompa Atenas okatkaj ixtlamatkej tlen amo okineltokayaj toTajtsin Dios okiyoliti Jesús. Xamo sekimej tokniuan tlen ochantiayaj Corinto noijki omokuayejyekojkej ken yejuan (Hech. 17:18, 31, 32). Oksekimej okijtojkej itlaj okineskayoti. Okineltokayaj yetoskia ken omiktokaj porque otlajtlakolchiuayaj uan yetoskia ken omoyolitijkej ijkuak opejki kichiuaj ken Cristo porque toTajtsin Dios okintlapojpolui. San nenka kijtoskiaj otlaneltokayaj tla amo kineltokaskiaj toTajtsin Dios okiyoliti Jesús. Tla amo ijkon okichi, amitlaj motlaxtlauaskia uan amo kintlapojpoluiskia. Ik non, akinmej okijtouayaj Jesús amo omoyoliti amo uelis kipiaskiaj tlen toTajtsin Dios okijto techmakas (1 Cor. 15:13-19; Heb. 9:12, 14).

12. ¿Tlen techmachtia tlen kijtoua 1 Pedro 3:18, 22?

¹² Pablo okitak Jesús, ik non, okineltokak toTajtsin Dios okiyoliti. Akinmej yiuejkika toTajtsin okinyoliti oksepa oixpolikej pero ijkuak okiyoliti Jesús amo keman oixpoliuik. Pablo noijki okijto: “Ye omochi Akin achto omoyoliti para ayakmó mikkis”. ¿Tleka ijkon okijto? Porque toTajtsin Dios achto okiyoliti ken se espíritu uan oyajki iluikak (1 Cor. 15:20; Hech. 26:23; xiktlajtolti 1 Pedro 3:18, 22).

13. ¿Tleka Pablo okijto Jesús amo okatka ken Adán?

¹³ ¿Tleka miakej yoltoskej tla san se tlakatl oixpoliuik? Tlen okijto Pablo techpaleuia ma tikajsikamatikan. Ye okijto tlen otechpanok porque Adán otlajtlakolchi uan noijki ken techpaleuia imikilis Jesús. Okijto: “Mikílistli owala por se tlakatl (Adán)”. Ijkuak Adán otlajtlakolchi, okimotemoli imikilis uan noijki okichi ma mikikan ikoneuan. Ik non, axkan ok titlajyouiaj. Pero ken toTajtsin Dios okiyoliti Jesús, non techpaleuia. Pablo okijto: “Por se tlakatl (Jesús) moyolitiskeh non yomikkeh. Ijkó kemi nochteh n tlaltikpaktlakah mikkih porke walewatokeh de Adán, ijkó noiwa nochteh akimeh tiktlakitah Cristo, nochipa yolitoskeh por Ye” (1 Cor. 15:21, 22).

14. ¿Ken tikmatij Jehová amo kiyolitis Adán?

¹⁴ ¿Tlen kijtosneki ijkuak Pablo okijto “nochteh n tlaltikpaktlakah mikkih porke walewatokeh de Adán”? Kijtosneki Adán tinochtin otechpanoltili tlajtlakoli, ik non, tinochtin tiixpoliuij (Rom. 5:12). Jehová amo kiyolitis Adán. Imikilis Jesús amo kipaleuis porque ye amo okatka tlajtlakole uan amo okinek kitlakamatis Jehová. Ye noijki okipanok ken kinpanos akinmej amo yolkualmej tlen kinmixkomakas Jesús uan amo keman moyolitiskej (Mat. 25:31-33, 46, TNM; Heb. 5:9).

15. ¿Akinmej “nochteh” tlen okijto Pablo “nochipa yolitoskeh”?

¹⁵ Pablo okijto: “Nochteh akimeh tiktlakitah Cristo, nochipa yolitoskeh por  Ye”. (1 Cor. 15:22). Ijkon okinmijkuilili tokniuan tlen okatkaj Corinto. Yejuan okatkaj tlapejpenalmej uan yaskiaj iluikak. Pablo okijto yejuan ‘oseititokah iwan Cristo Jesúsʼ uan ‘Dios okinnotski mayetokah iaxkawahʼ. Pablo noijki otlajto itech “non yomikkeh iwa okineltokakeh Cristo” (1 Cor. 1:2; 15:18; 2 Cor. 5:17). Itech okseki cartas tlen okijkuilo, okijto: ‘Tla tejwah timoseitiliskeh iwan Cristo itech imikilis, noiwa timoseitiliskeh [ijkon ken ye okiyolitijkej]ʼ (Rom. 6:3-5). Jesús omoyoliti ken se espíritu uan oyajki iluikak. Noijki ijkon kinpanos nochtin tlapejpenalmej akinmej ‘seititokeh iwan Cristo Jesúsʼ.

16. ¿Tlen kijtosneki ijkuak Pablo okijkuilo Cristo ye “Akin achto omoyoliti”?

¹⁶ Pablo okijkuilo Cristo ye “Akin achto omoyoliti”. Ma tikilnamikikan toTajtsin Dios noijki okinyoliti oksekimej ken Lázaro, pero ye Jesús akin achto okiyoliti ken se espíritu uan nochipa yoltos. Ijkuak Pablo okijto Jesús ye akin “achto omoyoliti”, kijtosneki yetoskiaj oksekimej tlen moyolitiskiaj uan yetoskiaj iluikak. Satepan nochtin tlen ‘seititoskiah iwan Cristoʼ, ken apóstoles, toTajtsin Dios kinyolitiskia uan yetoskiaj iluikak ijkon ken Jesús.

17. ¿Keman kinyolitiskiaj akinmej yetoskej iluikak iuan Cristo?

¹⁷ Ijkuak Pablo okintlajkuilili tokniuan tlen ochantiayaj Corinto, ayamo okinyolitiayaj akinmej yetoskiaj ompa iluikak iuan Jesús. Okiteititi non satepan panoskia. Ye okijto: “Nochteh motojtokatiaskeh kemi Dios kineki: Achto Cristo omoyoliti, satepa, ijkuak Ye [yitlanauatijtoskia], nochteh iaxkawah, moyolitiskeh” (1 Cor. 15:23; 1 Tes. 4:15, 16). Non techmachtia apóstoles uan tlapejpenalmej mochiaskiaj hasta ijkuak Cristo yitlanauatijtoskia, ijkuakon kinyolitiskiaj uan yetoskiaj espíritus ijkon ken ye. Uan axkan Cristo yitlanauatijtok.

18. (1) ¿Ken tikmatij amo san kinyolitiskej akinmej yaskej iluikak? (2) ¿Tlen panos iluikak ijkon ken kiteititia 1 Corintios 15:24-26?

¹⁸ ¿Tlen kinpanos oksekimej tlen kichiuaj ken Cristo uan amo yaskej iluikak? Yejuan noijki kineltokaj toTajtsin Dios kinyolitis tla ixpoliuij. ¿Ken tikmatij? Porque Biblia kiyekijtoua Pablo  uan oksekimej tlen yaskiaj iluikak ‘achto kinyolitiskiáhʼ (Filip. 3:11). Tlen okijto techpaleuia ma tikajsikamatikan oksekimej kinyolitiskej. Job noijki okineltokayaj satepan toTajtsin Dios kiyolitiskia (Job 14:15). Akinmej “iaxkawah” Cristo moyolitiaj ijkuak ye yitlanauatijtok iuan yetoskej ompa iluikak ijkuak Cristo kinpojpolos nochtin “tekiwajkeh iwan chikawálisteh”. Ijkuakon “kipojpolos ye n mikílistli”. Non kijtosneki akinmej kinyolitiskej uan yaskej iluikak amo keman ixpoliuiskej. ¿Uan tlen kinpanos akinmej kineltokaj nochipa chantiskej nikan tlaltikpak? (xiktlajtolti 1 Corintios 15:24-26).

19. ¿Tlen kineltokaj akinmej chantiskej nikan tlaltikpak?

¹⁹ Akinmej kineltokaj chantiskej nikan tlaltikpak uelis kijtoskej ken Pablo: “Ne nikchia [...] non yomikkeh moyolitiskeh, [akinmej yolmelauakej uan akinmej amo yolmelauakej]” (Hech. 24:15). Amikaj uelis yetos iluikak tla amo yolmelauak, ik non, uelis tikijtoskej ok poliui kinyolitiskej akinmej mokauaskej nikan tlaltikpak.

20. ¿Ken techpaleuia tlen otimomachtijkej?

²⁰ Ika nochi toyolo tikneltokaj “non yomikkeh moyolitiskeh”. Akinmej kinyolitiskej uelis nochipa yoltoskej itech tlaltikpak. Tikneltokaj ijkon panos. Tla oixpoliuik akin otiktlasojtlayaj, techyolchikaua porque tikmatij Jehová kiyolitis ijkuak Cristo uan tlapejpenalmej tlanauatiskej mil xiuitl (Apoc. 20:6). Noijki tikneltokaj tla tiixpoliuij ijkuak Cristo ayamo peua tlanauatia mil xiuitl, toTajtsin Dios techyolitis. Ye kichiuas tlen yokijto, non techyolchikaua uan techpaleuia ma tiktekichiuilikan ika pakilistli (Rom. 5:5). Itech okse tlamachtil tikitaskej okseki tlamantli tlen kijtoua 1 Corintios capítulo 15.