1-2. Alapeli oororomeleya a Yehova ewehereryo taani yoohakalaliha aryaayano?

HIYO nookhalano ewehereryo yoochuneyaxa. Achu akina anaweherya okhalano othela waphaama, waaphuwa anamwane arino ekumi yaphaama, naari openuwa mu ereca yawoopiha. Nyenya hiyo ninnaweherya ichu ikina opwaha seiha. Ninnaweherya okhalano okumi waphaama okhala wookhala ni okookela okhala vamoha ni oosiveliwa ahu yaale akhwile.

² Murummwa Paulo ooloca: “Kinnawehererya wi Muluku onarwa aaviiha wookhwani awookololowa murima vamoha ni oonanara murima.” (Saw. 24:15) Paulo haari muchu oopacerya oloca sa ovinya mookhwani. Yobi aahiloca tho. Owo aahiroromela wi Muluku aahaala omuupuwelela ni omviiha yoowo wi akhaleno okumi wanaawiili.—Yobi 14:7-10, 12-15.

3. Ntakhara heeni nnanwerya ophura orweela mu 1 Korinto ekapitulu 15?

³ “Ovinya wookhwani” onnapaka makupa a “mathipelo,” a “mahusiheryo oopacerya,” wa Akristu oothene. (Ahe. 6:1, 2) Mwaha wa Paulo vooloca sa ovinya wookhwani woorempwa mu 1 Korinto ekapitulu 15. Yeeyo aalonceiye woonaru yaahaalipiha Akristu a mu nsana noopacerya. Nave ekapitulu yeela enanwerya olipiha nroromelo nahu vooloca sa ovinya mookhwani.

4. Ntakhara heeni nnanwerya ororomela wi oosiveliwa ahu yaawo akhwile anamviihiwa mookhwani?

⁴ Ovinya mookhwani wa Yesu onnaneeriha ororomela wi wakhala wi hiyo nookhwa naari oosiveliwa ahu aakhwa, anahaala oviihiwa mookhwani. Ela ennapaka makupa a “michaka yaphaama” yeeyo Paulo aalaleeryeiye wa Akorinto. (1 Kor. 15:1, 2) Mweeparipari, Paulo aahiloca wi wakhala wi Mukristu haneemererya sa ovinya mookhwani, nroromelo nawe ti nasiiyo. (1 Kor. 15:17) Ororomela wi Yesu aaviihiwa mookhwani onnaneeriha tho  ororomela wi alipa ookhwa enahaala oviihiwa mookhwani.

5-6. Masu anaphwanyeya mu 1 Korinto 15:3, 4 anataphulela eheeni wa hiyo?

⁵ Vaavaa Paulo aapacenryeiye orepa vooloca sa ovinya mookhwani, owo aahiromola iparipari raru: (1) “Kristu aakhwa wanthowa na soocheka sahu.” (2) “Avithiwa mmahiyeni.” Nave (3) “Aviihiwa wookhwani nihiku na neeraru naya, ntoko mwa soorempwa.”—Mwaalakhanye 1 Korinto 15:3, 4.

⁶ Okhwa wa Yesu, ovithiwa mmahiyeni, ni oviihiwa mookhwani onataphulela eheeni wa hiyo? Mulipa a miririmu Yesaya aahilaiherya wi Mesiya aahaala “okwasiwa aviihiwamo mweelapo ya achu akumi” nave tho “ovithiwa vamoha ni aweera soonanara.” Ela yaanavolowela ichu sincipale. Yesaya aahaaceererya wi Mesiya aahaala “oteesha yoowo ene soocheka sa ancipale.” Yesu aaheerano eyo moorweela wa ovaha mukucho wa woopola. (Isa. 53:8, 9, 12; Mat. 20:28; Aro. 5:8) Mwawiihiiha, okhwa, ovithiwa mmahiye, ni oviihiwa mookhwani wa Yesu, woonivaha mathipelo oolipa a ewehereryo ahu ya okhala ootaphuwa wa yoocheka ni okhwa, ni okookela okhala vamoha ni oosiveliwa ahu yaawo akhwile.

7-8. Tiheeni enaakhaviherya Akristu ororomela wi Yesu ooviihiwa mookhwani?

⁷ Wi nroromele wi ovinya mookhwani onahaala weereya, yoopacerya, nnaphwanela ororomela wi Yesu ooviihiwa mookhwani. Nni nroromele hai wi Yehova omviiha Yesu wookhwani?

⁸ Yaahikhalavo achu ancipale yaawo yeerenle onamoona wi Yesu ooviihiwa mookhwani. (1 Kor. 15:5-7) Muchu oopacerya Paulo omuromonleiye ti murummwa Petru (Sefa). Nikhuuru na arummwa naaheerela onamoona wi Petru oomoona Yesu amanle oviihiwa mookhwani. (Luka 24:33, 34) Mwawaaceererya, arummwa “yaahimoona” Yesu amanle oviihiwa mookhwani. Voocharela Kristu “aahooneya wa asinna opwaha masana mathanu, elukuluku emoha yeeyo,” woonaru va muthukumano yoowo weeren’ye o Kalileya onalociwa mu Mateu 28:16-20. Yesu “aahooneya tho wa Yakopo,” woonaru munnawe oomaayi, yoowo woopaceryani ahaamuroromenle Yesu ntoko Mesiya. (Yoh. 7:5) Yakopo, amanle omoona Yesu, yoowo aaviihiwe mookhwani owo aahilekecheya. Ti yoohakalaliha osuwela wi mu eyaakha ya 55 E.K., vaavaa Paulo aarempeiye ekaarata awe, achu ancipale yeerenle onamoona sa ovinya wawe mookhwani yiiha eri akumi. Mwawiihiiha, yaawo yaakhwa minikwa vooloca sa ovinya mookhwani wa Yesu yanwerya oleeliwa yeeparipari.

9. Hiihaa ntoko nnaalakhanyaahu mu Saweriwa T’arummwa 9:3-5, Paulo aacerenrye hai onamoona vooloca sa oviihiwa mookhwani wa Yesu?

⁹ Ohoolo waya Yesu aahooneya tho wa Paulo mwaneene. (1 Kor. 15:8) Paulo naari wi (Sawulu) iiha ari vamukwahani wooya o Tamasko vaavaa iiwaleiye nsu na Yesu yoowo aaviihiwe mookhwani nave aahoona ncicimiho na Yesu wirimu. (Mwaalakhanye Saweriwa T’arummwa 9:3-5.) Yaweereya ya Paulo yaahaaceererya onamoona wa wi ovinya mookhwani wa Yesu hiyaari yawootha.—Saw. 26:12-15.

10. Tiheeni Paulo aapankeiye amanle ororomela wi Yesu ooviihiwa wa alipa ookhwa?

¹⁰ Woonaru achu ancipale yaahitannyeya murima ni yeeyo Paulo aaloceiye woona wi Yesu ahaakumve wooneya wa yoowo Paulo aanawiikara Akristu. Amanle ororomela wi Yesu ooviihiwa mookhwani, Paulo aahilapa mwakuru wi aalekeche akina ntakhara eparipari yeela. Paulo aahivilela ni omaniwa, owaleliwa mukariposo, ni ohoolela ipahu mphareya vaavaa aamwaramwaxeiye eparipari yawi Yesu aakhwa nave aaviihiwa mookhwani. (1 Kor. 15:9-11; 2 Kor. 11:23-27) Paulo aahitepa ororomela wi Yesu aaviihiwa wa alipa ookhwa, ophiyerya wi owo aari oolakelela okhwa nthowa na  waakiha soororomela sawe. Orweela wa Akristu yaala oopacerya yaawo yeerenle onamoona apwanne nyuwo hamunaroromela wi Yesu ooviihiwa mookhwani? Nave ela henalipiha nroromelo nanyu vooloca sa ovinya mookhwani?

11. Ntakhara heeni achu akina o Korinto yaaryaayano moonelo wooheseya vooloca sa ovinya mookhwani?

¹¹ Achu akina mu epooma yo Kresiya, o Korinto, yaahikhalano moonelo wooheseya vooloca sa ovinya mookhwani, ophiyerya wi akina yaanaloca wi: “Ovinya wookhwani hiwiiwowo.” Ntakhara heeni? (1 Kor. 15:12) Alipa oohuserya mu epooma ekina yo Kresiya, o Atena, hiyaasiveliwa ni muchaka wa wi Yesu aaviihiwa mookhwani. Muupuwelo ntoko yoola, waahaavolowela achu akina o Korinto. (Saw. 17:18, 31, 32) Akina yuupuwela wi ovinya mookhwani ti woosiphela, etaphulelaka wi muchu ‘aakhwa’ mu yoocheka nave aanakookela okhala ‘mukumi’ vaavaa aakhaleiye Mukristu. Moohipwacha nthowa nene, naaweeriha achu ohiroromela ovinya mookhwani, nroromelo naya naari nasiiyo. Waakhanle wi Muluku hamviihale Yesu mookhwani, mukucho wa woopola holiviwe nave nlelo nri mu yoocheka. Mwawiihiiha, oothene yaale ahineemererya ovinya mookhwani hiyaanono ewehereryo yeeparipari.—1 Kor. 15:13-19; Ahe. 9:12, 14.

12. Mwawiiwanana ni 1 Pedro 3:18, 22, ovinya mookhwani wa Yesu onahiyana hai ni wa akina?

¹² Paulo mwaneene aahisuwela wi “Kristu ooviihiwa wookhwani.” Ovinya mookhwani wa Yesu waari woohiyana ni wa akina, woona wi awo ohoolo waya yaahikhwa wanaawiili. Paulo aahiloca wi Yesu ‘tori mulepulo wa yaale anarupa mookhwani.’ Mmukhalelo taani Yesu aareiye mulepulo? Owo aari muchu oopacerya oviihiwa ntoko yoopatuxiwa yoomunepani nave tho taari oopacerya oya wirimu.—1 Kor. 15:20; Saw. 26:23; mwaalakhanye 1 Pedro 3:18, 22.

13. Ohiyaniha taani Paulo opankeiye variyari va Atamu ni Yesu?

¹³ Okhwa wa muchu mmoha oruuhale hai okumi ntakhara achu ancipale? Paulo oovaha naakhulo nookwakwaleya na nikoho nenla. Paulo oothariha ohiyana orivovo variyari va yeeyo yeeren’ye ni achu nthowa na yeeyo Atamu opankeiye ni yeeyo eri yooweryeya wa hiyo, nthowa na mukucho wa woopola wa Yesu. Alocaka sa Atamu, Paulo oorepa: “Okhwa waaruule mwa muchu mmoha.” Vaavaa aachenkeiye, aahiiruuhela okhwa yoowo mwaneene vamoha ni muyareriwo awe. Nlelo ninnahooxeya ni sookhumelela sa ohiiwelela wawe. Nyenya woona wi Muluku omviiha mookhwani mwanawe nnanwerya okhalano omwaahiyu woohakalaliha! “Ovinya wookhwani oruule tho mwa muchu mmoha,” Yesu. Paulo oriye: “Ntoko mwa Aatamu achu oothene anookhwaaya, hiihaa mwa Kristu, oothene anarwa evahiwa okumi.”—1 Kor. 15:21, 22.

14. Apwanne Atamu onahaala oviihiwa mookhwani? Mutharihe.

¹⁴ Tiheeni Paulo aachuneiye oloca ni masu awi “Mwa Aatamu oothene annakhwa”? Paulo aaloca sa muyareriwo wa Atamu, yoowo oramve yoocheka ni ohiphaameya yoowo onaweeriha achu okhwa. (Aro. 5:12) Atamu hari mu nikhuuru na achu yaale anahaala “ovahiwa okumi.” Mukucho wa Kristu honamvolowela yoowo, woona wi owo aari muchu oophaameya yoowo aalakelenle mwaayiini ohimwiiwelela Muluku. Yeeyo emweerenle Atamu ti yeeyo tho enahaala oweereela yaale anahaala othorihiwa ni “Mwaana a muchu” ntoko “ipuri,” eyo tiwi “anamuya weekoyini.”—Mat. 25:31-33, 46; Ahe. 5:9.

15. Taani enaphitaanyeryiwa “oothene” yaale anahaala “ovahiwa wookumi”?

¹⁵ Moone wi Paulo olonce wi “mwa Kristu oothene anarwa evahiwa okumi.” (1 Kor. 15:22) Paulo ekaarata awe aarepela Akristu o Korinto  oothanliwa ni munepa waweela, yaawo yaahaala oviihiwa mookhwani ni oya wirimu. Akristu ale yaari “awelihiwa mwa Kristu Yesu ni awitxhaneliwa okhala awela.” Nave tho Paulo aahaaromola “yaale anarupa naari akhwile mwa Kristu.” (1 Kor. 1:2; 15:18; 2 Kor. 5:17) Mu ekaarata awe ekina yooveereliwa, Paulo olonce wi yaale ‘aphitaanyiwe mwa Yesu mu okhwa woolikana ni wawawe’ anahaala tho ‘ophitaanyiwa mwa Yesu mu ovinya mookhwani woolikana ni wawawe.’ (Aro. 6:3-5) Yesu aaviihiwa mookhwani ntoko munepa nave aya wirimu. Ela tho ti yeeyo enahaala weereya ni oothene yaale “aphitaanyiwe mwa Kristu,” eyo tiwi Akristu oothene yaawo athanliwe ni munepa waweela.

16. Tiheeni Paulo aachuneiye oloca ni masu awi Yesu “tori mulepulo”?

¹⁶ Paulo oorepa wi Kristu ooviihiwa ntoko ‘mulepulo wa yaale anarupa mookhwani.’ Muupuwele wi akina, ntoko Lasaro, yaahiviihiwa mookhwani, nyenya Yesu taari oopacerya oviihiwa mookhwani ntoko munepa ni waakhela ekumi yoohimala. Owo aanwerya olikanyihiwa ni mulepulo naari yawiima yoopacerya yeeyo Aisarayeli yaahephaaya wi emvahe Muluku. Moorweela wa omwiichana Yesu ntoko “mulepulo” Paulo aataphulela wi akina ohoolo waya yaahaala oviihiwa mookhwani ni waakhela okumi wirimu. Arummwa ni akina yaawo “aphitaanyiwe mwa Kristu” yaahaala omuchara Yesu. Mu elukuluku yoophwanelela, awo yaahaala olawiha ovinya wookhwani woolikana ni wa Yesu.

17. Yaale “aphitaanyiwe mwa Kristu” ti liini anahaalaaya waakhela nchuwelo naya wirimu?

¹⁷ Ovinya mookhwani wa yaale “aphitaanyiwe mwa Kristu” tahi wi waapacenrye elukuluku Paulo aarepenleiye ekaarata awe o Korinto. Ohiya yeeyo, Paulo aahooniherya wi eyo yaahaala weereya muhoolo vaavaa aalonceiye ariki: “Mutxhu ti mutxhu ntoko onaphwaneleiye: òpatxerya Kristu, otxuli wawe ale ari a Kristu nihiku norwa nawe.” (1 Kor. 15:23; 1 Tes. 4:15, 16) Olelo nnakhala mu elukuluku yeeyo yaalaiheryiwe ya “orwa” wa Kristu. Arummwa vamoha ni Akristu oothanliwa ni munepa waweela yaawo yaakhwile yaaphwanela oweherya ophiyerya elukuluku ya orwa wa Kristu wi yaakhele nchuwelo naya na wirimu ni “ophitaanyiwa vamoha ni Yesu mu ovinya wookhwani woolikana ni wawawe.”

18. (1) Ntakhara heeni nnamphiyera makuchuwelo wi akina yaawo anahaala oviihiwa mookhwani anahaala tho oya wirimu? (2) Tiheeni nnahuseryaahu orweela mu 1 Korinto 15:24-26, vooloca sa yeeyo enahaala weereya wirimu?

¹⁸ Hanka vooloca sa Akristu oororomeleya yaawo ahirino ewehereryo ya okhala vamoha ni Kristu wirimu? Awo tho aakhalano ewehereryo  ya ovinya mookhwani. Piipiliya onaloca wi Paulo ni akina yaawo anahaala oya wirimu annaakhela “ovinya mookhwani woopacerya.” (Fil. 3:11, TNM.) Ela enooniherya wi akina anahaala tho oviihiwa mookhwani. Ela tho enniiwanana ni yeeyo Yupu aalonceiye vooloca sa omwaahiyu awe. (Yobi 14:15) ‘Yaale ari a Kristu nihiku na orwa wawe’ anahaala okhala vamoha ni Yesu wirimu vaavaa owo onahaaleiye waamaliha mamwene oolamula ni oowerya oothene. Ophiyerya wi “mwiicani ookuchulela okhwa,” onahaala omalihiwa. Mweeparipari, oothene yaale anahaala oviihiwa mookhwani ni oya wirimu herwa ekhwa. Hanka vooloca sa akina?—Mwaalakhanye 1 Korinto 15:24-26.

19. Tiheeni enahaala weereya ni yaale arino ewehereryo ya okhala ni okumi veelaponi yavathi?

¹⁹ Tiheeni enahaala weereya ni yaale arino ewehereryo ya okhala ni okumi veelaponi yavathi? Awo tho ananwerya okhalano ewehereryo yeeyo enathipeleya mmasu a Paulo: “Kinnawehererya wi Muluku onarwa aaviiha wookhwani awookololowa murima vamoha ni oonanara murima.” (Saw. 24:15) Tiyawooneya wi haavo, oonanara murima onahaala oya wirimu, mwawiihiiha masu ala anooniherya wi onamukhalavo ovinya mookhwani veelaponi yeela yavathi.

20. Ewehereryo anyu vooloca sa ovinya mookhwani elipihiwe hai?

²⁰ Moohikhwa minikwa, ‘onamukhalavo ovinya mookhwani’! Yaale anahaala oviihiwa mookhwani ni waakhela ekumi veelaponi yavathi anamukhalano okumi okhala wookhala. Nyuwo munaphwanela ororomela yoolaiherya yeela. Ewehereryo yeela enanwerya woohakaryaryani vaavaa munuupuwelaanyu sa oosiveliwa anyu yaawo akhwile. Awo ananwerya oviihiwa mookhwani vaavaa Kristu ni akina enahaalaaya ‘olamulelaka ntoko mamwene mu iyaakha seiye miili.’ (Wup. 20:6) Nyuwo tho munaphwanela ororomela wi wakhala wi mookhwa Kristu ahaakumve opacerya olamulela mu iyaakha miili, munahaala oviihiwa mookhwani. “Owehererya weiwo, honanlamwiha.” (Aro. 5:5) Ela enanweerihani otitelela okhala oolipa ni wooruhelaani ohakalala vaavaa munamurumeelaanyu Muluku. Nyenya sookhalavo ichu ikina seiho nnaphwanelaahu ohuserya orweela mu 1 Korinto ekapitulu 15, hiiha ntoko enahaalaaya wooniheryiwa mmwaha onacharela.