1, 2. Хуцауи лӕггадгӕнгутӕн цӕхуӕн нифс ес?

АЛЛИ адӕймагӕн дӕр ӕхсидзгӕ ӕй, цӕмӕй естӕбӕл ӕ нифс дара. Кедӕрти фӕффӕндуй, цӕмӕй сӕ бийнонти цард федар уа кенӕ, цӕмӕй сӕ сувӕллӕнттӕ ӕнӕнез уонцӕ. Уӕззау незӕй ка сӕйуй, уонӕн ба нифс фӕууй, ке радзӕбӕх уодзӕнцӕ. Фал киристӕнттӕн ци нифс ес, уой ба рабарӕн дӕр нецӕй хӕццӕ ес. Мах ӕнгъӕлмӕ кӕсӕн, нӕуӕг дуйней нӕ хеуӕнттӕ кӕд райгас уодзӕнцӕ, еци рӕстӕгмӕ.

² Апостол Павел загъта: «Ӕз мӕ нифс дарун Хуцаубӕл... ке райгас уодзӕнцӕ рӕстгӕнгутӕ дӕр ӕма фудгӕнгутӕ дӕр» (Гъуд. 24:15). Ӕма райгасдзийнади туххӕй айдагъ Павел нӕ дзурдта. Ӕностӕ раздӕр ма ибӕл Иов дӕр дзурдта. Е ӕй федарӕй зудта, Хуцау ӕй ке ӕргъуди кӕндзӕй ӕма ’й цардмӕ ке раздахдзӕй (Иов 14:7–10, 12–15).

3. 1 Коринфӕгтӕмӕ 15 сӕри ци финст ес, е нин ци пайда хӕссуй?

³ Райгасдзийнади ахурадӕ «Киристей туххӕй сӕйраг ахурӕдтӕй» сӕ еу ӕй, удта, зӕгъӕн ес, ӕма не ’ууӕндундзийнади бундор ӕй (Дзиуит. 6:1, 2). Павел 1 Коринфӕгтӕмӕ 15 сӕри дзурдта райгасдзийнади туххӕй. Ӕвӕдзи, ӕ дзурдтӕ фиццаг ӕноси киристӕнтти хъӕбӕр бафедар кодтонцӕ. Ӕма мах дӕр абони уотӕ федар кӕнунцӕ, кӕд райгасдзийнадӕбӕл ӕнӕуойдӕр ӕууӕндӕн, уӕддӕр.

4. Нӕ хеуӕнттӕ ке райгас уодзӕнцӕ, уобӕл федарӕй ӕууӕндун нӕ бон цӕмӕн ӕй?

⁴ Киристе ке райгас ӕй, уой фӕрци нин нифс ес, ка нӕбал ӕй, еци хеуӕнттӕ дӕр нин ке райгас уодзӕнцӕ. Е дӕр хауй, Павел коринфӕгтӕн ци «хуарз хабар» игъосун кодта, уомӕ (1 Кор. 15:1, 2). Павел куд загъта, уотемӕй адӕймаг, Йесо ке  райгас ӕй, уобӕл ку не ’ууӕнда, уӕд е ’ууӕндундзийнадӕй неци пайда ес (1 Кор. 15:17). Мадта Киристе ке райгас ӕй, е нӕ нифсӕн ӕ бундор ӕй.

5, 6. 1 Коринфӕгтӕмӕ 15:3, 4 финст дзурдтӕ махӕн цӕбӕл дзорӕг ӕнцӕ?

⁵ Павел Киристей райгасдзийнади туххӕй ку дзурдта, уӕд коринфӕгтӕн се ’ргом раздахта ӕртӕ гъуддагемӕ: 1) «Киристе рамардӕй нӕ тӕрегъӕдти туххӕй», 2) «байвардтонцӕ ’й» ӕма 3) «ӕртиккаг бон райгас ӕй, Финстади куд загъд адтӕй, уотӕ». (Бакӕсӕ 1 Коринфӕгтӕмӕ 15:3, 4.)

⁶ Аци ӕртӕ гъуддаги махӕн цӕбӕл дзорӕг ӕнцӕ? Пахампар Исай Мессийи туххӕй ниффинста, уодӕгӕсти зӕнхӕй, дан, ӕй райесдзӕнцӕ ӕма, дан, ӕй «байвӕрдзӕнцӕ фудгӕнгути хӕццӕ». Удта ма уотӕ дӕр загъта, «берети тӕрегъӕдтӕ», дан, фӕххӕсдзӕй. Аци дзурдтӕ исӕнхӕст ӕнцӕ, Йесо ӕ цард нивонди ку ӕрхаста, уӕд (Ис. 53:8, 9, 12; Матф. 20:28; Ром. 5:8). Мадта Киристе ке рамардӕй, ке ’й байвардтонцӕ ӕма ке райгас ӕй, уой фӕрци нӕ бон ӕй федарӕй ӕууӕндун, тӕрегъӕд ӕма мӕлӕтӕй ке исуӕгъдӕ уодзиан ӕма нин ка рамардӕй, уони нӕуӕгӕй ке фӕууиндзиан.

7, 8. Киристе ке райгас ӕй, уомӕн цӕхуӕн бӕлвурдгӕнӕнтӕ ес?

⁷ Куд ӕй фӕууидтан, уотемӕй райгасдзийнади нифс баст ӕй, Киристе ке райгас ӕй, уой хӕццӕ. Мадта гъӕуама федарӕй ӕууӕндӕн, Йеговӕ Киристей ӕцӕгӕйдӕр ке райгас кодта, уобӕл. Уомӕн цӕхуӕн бӕлвурдгӕнӕнтӕ ес?

⁸ Киристе ку райгас ӕй, уӕд ӕй беретӕ фӕууидтонцӕ (1 Кор. 15:5–7). Павели дзурдтӕмӕ гӕсгӕ апостол Петур (Кифӕ) сӕ фиццӕгтӕй адтӕй (Лук. 24:33, 34). Уой фӕсте ба Йесо ӕ апостолтӕмӕ дӕр фӕззиндтӕй. Фӕстӕдӕр ба «фӕззиндтӕй фондзсӕдӕ ӕнсувӕрӕй фулдӕрмӕ». Матфеййи 28:16–20 ци фембӕлди туххӕй финст ес, Павел дӕр, ӕвӕдзи, еци фӕмбӕлди кой кодта. Уомӕй уӕлдай ма Йесо фӕззиндтӕй Иаковмӕ дӕр, ӕвӕдзи, е ’нсувӕр ка адтӕй, уомӕ. Раздӕр Иаков не ’ууӕндтӕй, Йесо Мессийӕ ке ӕй, уобӕл, фал ке райгас ӕй, уой ку фӕууидта, удта ибӕл нӕбал гурусхӕ кодта (Иоан. 7:5). Павел ӕ финстӕг ниффинста нӕ эри еу 55 анзи. Уӕд ма, Йесо куд райгас ӕй, уой ка фӕууидта, уонӕй беретӕ игас адтӕнцӕ. Ӕма еци хабарбӕл ка дузӕрдуг кодта, уони бон адтӕй, ӕхе цӕститӕй ӕй ка фӕууидта, уони бафӕрсун.

9. Гъуддӕгти 9:3–5 куд финст ӕй, уомӕ гӕсгӕ ма Павели бон цӕхуӕн бӕлвурдгӕнӕн адтӕй ӕрхӕссун, Йесо ке райгас ӕй, уомӕн?

⁹ Фӕстӕдӕр Йесо Павелӕн ӕхемӕ дӕр фӕззиндтӕй (1 Кор. 15:8). Павел (уӕд ма ӕй Савлӕй зудтонцӕ) Дамаскмӕ ку цудӕй, уӕд ӕвваст ӕ алливарс ниррохс ӕй ӕма имӕ Йесо ӕхуӕдӕг исдзурдта. (Бакӕсӕ Гъуддӕгтӕ 9:3–5.) Аци хабарӕй дӕр бӕрӕг ӕй, Йесо ӕцӕгӕйдӕр ке райгас ӕй, е (Гъуд. 26:12–15).

10. Йесо ке райгас ӕй, уобӕл Павел ку баууӕндтӕй, уӕд идарддӕр куд архайдта?

¹⁰ Киристей райгасдзийнади туххӕй Павели дзурдтӕ уӕлдай ӕхсидзгӕдӕр ӕнцӕ, уомӕн ӕма раздӕр ӕхуӕдӕг киристӕнтти фӕдбӕл зилдӕй. Фал Киристе ке райгас ӕй, уобӕл ку баууӕндтӕй, уӕдта архайун райдӕдта, цӕмӕй иннетӕ дӕр баууӕндтайуонцӕ. Еци хабар ке игъосун кодта, уой туххӕй Павели нӕмгӕ дӕр фӕккӕниуонцӕ, ахӕстдонӕмӕ дӕр ӕй багӕлдзиуонцӕ, удта науӕбӕл цӕугӕй дӕр цалдӕр хатти бӕллӕхи бахаудтӕй (1 Кор. 15:9–11; 2 Кор. 11:23–27). Фал Павел Киристей райгасдзийнадӕбӕл  гъе уотӕ федарӕй ӕууӕндтӕй, ӕма мӕлӕтӕй дӕр нӕ тарстӕй. Фиццаг ӕноси киристӕнттӕ, Йесо ке райгас ӕй, уобӕл уотӕ федарӕй ке ӕууӕндтӕнцӕ, е махӕн дӕр уобӕл дзорӕг ӕй, ӕма еци хабар ӕцӕгӕй ӕрцудӕй. Уотӕ нӕй? Удта ма уой фӕрци никки федардӕрӕй ӕууӕндӕн, ка рамардӕй, етӕ ӕцӕгӕйдӕр ке райгас уодзӕнцӕ.

11. Коринфи киристӕнттӕй еуӕй-еуетӕмӕ райгасдзийнади туххӕй рӕдуд гъудитӕ цӕмӕн адтӕй?

¹¹ Грекъаг горӕт Коринфи киристӕнттӕй еуӕй-еуетӕмӕ райгасдзийнади туххӕй рӕдуд гъудитӕ адтӕй. Кадӕртӕ ма си уотӕ дӕр дзурдтонцӕ, мӕрдтӕ, дан, нӕ райгас уодзӕнцӕ (1 Кор. 15:12). Цума цӕмӕн? Уомӕн ӕма, ӕвӕдзи, афинаг философтӕ ци дзурдтонцӕ, уомӕ игъустонцӕ. Етӕ ба Киристей райгасдзийнади хабарбӕл ходгӕ кодтонцӕ (Гъуд. 17:18, 31, 32). Иннетӕмӕ ба уотӕ кастӕй, ӕма райгасдзийнадӕ рахӕсгӕ хузи лӕдӕргӕ ’й, гъома, дан, адӕймаг ӕ тӕрегъӕдти туххӕй «мард» фӕууй, киристон ку исуй, удта «райгас уй». Кудфӕнди ма уа, уӕддӕр Павели дзурдтӕмӕ гӕсгӕ уӕхӕн киристӕнтти ӕууӕндундзийнадӕй неци пайда адтӕй. Уомӕн ӕма кӕд Хуцау Киристей нӕ райгас кодта, уӕд нивонди аргъ дӕр фист не ’рцудӕй ӕма нӕ тӕрегъӕдтӕ дӕр хатиргонд не ’рцудӕнцӕ. Уомӕ гӕсгӕ райгасдзийнадӕбӕл ка не ’ууӕндтӕй, уонӕн нифс дӕр н’ адтӕй (1 Кор. 15:13–19; Дзиуит. 9:12, 14).

12. 1 Петури 3:18, 22 финст дзурдтӕмӕ гӕсгӕ Киристей райгасдзийнади хабар цӕмӕй хецӕн кодта?

¹² Павел ӕй зудта, «Киристе ӕцӕгӕйдӕр ке райгас ӕй». Кӕд Хуцау раздӕр дӕр адӕни райгас кӕнидӕ, уӕддӕр еу афони ба фӕстӕмӕ рамӕлиуонцӕ. Йесой хабар ба ӕндӕрхузи адтӕй. Павел си уотӕ загъта, ка рамардӕй, уонӕй, дан, «е райгас ӕй фиццаг». Цума ӕ дзурдтӕ куд лӕдӕргӕ ’нцӕ? Гъома, уӕлӕрвтӕмӕ ка райгас ӕй, уонӕй Йесо фиццаг адтӕй (1 Кор. 15:20; Гъуд. 26:23; бакӕсӕ 1 Петури 3:18, 22).

13. Адам ӕма Йесо цӕмӕй хецӕн кӕнунцӕ, уой Павел куд балӕдӕрун кодта?

¹³ Еу адӕймаг ке рамардӕй, уой фӕрци милиуангай адӕнӕн цӕрунмӕ нифс кутемӕй фӕззиндтӕй? Павел хуарз балӕдӕрун кодта, Адами туххӕй адӕн цӕхуӕн уавӕрмӕ ӕрцудӕнцӕ ӕма син Киристей фӕрци ба цӕхуӕн нифс фӕззиндтӕй, уой. Адами туххӕй Павел загъта: «Мӕлӕт адӕймаги фудӕй фӕззиндтӕй». Адам тӕрегъӕд ке искодта, уомӕй айдагъ ӕхецӕн не ’рхаста зиан, фал ма е ’гас байзӕддӕгтӕн дӕр. Абони уӕнгӕ дӕр ма ’й нӕхебӕл лӕдӕрӕн. Фал Хуцау ӕ Фурти ке райгас кодта, уой фӕрци нин фӕззиндтӕй нифс дессаги федӕнӕй. Фӕстагмӕ ма Павел загъта: «Адами фудӕй адӕн еугурӕйдӕр куд мӕлунцӕ, уотӕ Киристей фӕрци ба еугурӕйдӕр райгас уодзӕнцӕ» (1 Кор. 15:21, 22).

14. Цума Хуцау Адами райгас кӕндзӕй? Ба ’й лӕдӕрун кӕнӕ.

¹⁴ Павели дзурдтӕ, «Адами фудӕй адӕн еугурӕйдӕр мӕлунцӕ», зӕгъгӕ, куд лӕдӕргӕ ’нцӕ? Адами байзӕддӕгтӕ еугурӕйдӕр сӕ тоги тӕрегъӕд ке рахастонцӕ, мӕлгӕ дӕр уой туххӕй кӕнунцӕ, ӕма Павел дӕр гъе уой кой кодта (Ром. 5:12). Хуцау Адами нӕбал райгас кӕндзӕй, уомӕн ӕма Адам ӕнхӕст адӕймаг адтӕй, ӕма Хуцауи нихмӕ зонгӕ-зонгӕй рацудӕй. Уомӕ гӕсгӕ Йесой нивонд уомӕн неци пайда хӕссуй. Адам ӕносмӕ исӕфт ӕрцудӕй, Матфеййи ци «сӕгъти» туххӕй финст ӕй, етӕ ӕносмӕ исӕфт куд ӕрцӕудзӕнцӕ, уотӕ (Матф. 25:31–33, 46; Дзиуит. 5:9).

15. Павел уотӕ ку загъта, «еугурӕйдӕр» райгас уодзӕнцӕ, зӕгъгӕ, уӕд ке кой кодта?

 ¹⁵ Павел ма ниффинста, «Киристей фӕрци ба еугурӕйдӕр райгас уодзӕнцӕ», зӕгъгӕ (1 Кор. 15:22). Павел ӕ финстӕг Коринфи киристӕнттӕмӕ ниффинста, уӕларвон цардмӕ ка гъӕуама райгас адтайдӕ, уонӕмӕ. Павел сӕ исхудта, «Хуцау ке искӕдзос кодта» ӕма «сугъдӕгутӕбӕл» ке банимадта, уӕхӕн адӕн. Удта ма «Киристебӕл ӕууӕндгӕй ка рамардӕй», уони кой дӕр искодта (1 Кор. 1:2; 15:18; 2 Кор. 5:17). Ӕ иннӕ финстӕги ба Павел ниффинста: «Мадта кӕд уой хузӕн рамардан ӕма ӕ хӕццӕ байеу ан, уӕд, е куд райгас ӕй, уотӕ мах дӕр райгас уодзиан ӕма ӕ хӕццӕ байеу уодзиан» (Ром. 6:3–5). Йесо уӕларвон цардмӕ райгас ӕй, ӕма ӕ хӕццӕ «еудзийнади ка ӕй», еци исӕрст киристӕнттӕ дӕр гъе уотӕ райгас уодзӕнцӕ.

16. Павел уотӕ цӕмӕн загъта, ӕма Киристе, ка райгас ӕй, уонӕй «фиццаг» адтӕй?

¹⁶ Павел ниффинста: «Ка рамардӕй, уонӕй [Киристе] райгас ӕй фиццаг». Уой размӕ ка райгас уидӕ, етӕ зӕнхӕбӕл цардӕнцӕ, зӕгъӕн, Лазӕр. Фал Йеговӕ уӕлӕрвти цӕрунмӕ ке райгас кодта, уонӕй ба фиццаг адтӕй Йесо. Йесой ӕнгъезуй рабарун, израилӕгтӕ сӕ фиццаг тиллӕгӕй ци нивӕндтӕ ӕрхӕссиуонцӕ, уой хӕццӕ. Удта ма Павел Йесой «фиццаг» ке исхудта, уомӕй бавдиста, уӕларвон цардмӕ ма никкидӕр кадӕртӕ ке райгас уодзӕнцӕ, уой, гъома апостолтӕ ӕма иннӕ исӕрст киристӕнттӕ.

17. «Киристей хӕццӕ еудзийнади ка адтӕй», етӕ сӕ хуӕрзеуӕг кӕд гъӕуама райстайуонцӕ?

¹⁷ Павел коринфӕгтӕмӕ ӕ финстӕг ку финста, уӕд, «Киристей хӕццӕ еудзийнади ка адтӕй», етӕ игас кӕнун нӕма райдӕдтонцӕ. Павел загъта, еци хабар федӕни ке гъӕуама ӕрцудайдӕ: «Ӕрмӕст алкедӕр ӕхе афони: фиццаг – Киристе, уой фӕсте ба, Киристей ка ӕй, етӕ, ку ’рцӕуа, уӕд» (1 Кор. 15:23; 1 Фес. 4:15, 16). Киристе ци рӕстӕг гъӕуама ӕрцудайдӕ, е ӕй мах ци рӕстӕг цӕрӕн, е. Мадта апостолтӕ ӕма иннӕ исӕрст киристӕнттӕн сӕ бон н’ адтӕй сӕ уӕларвон хуӕрзеуӕг райсун, цалинмӕ Киристе не ’рцудайдӕ, уӕдмӕ.

18. а) Цӕмӕн ес уотӕ зӕгъӕн, ӕма ма ӕндӕр райгасдзийнадӕ дӕр уодзӕй? б) 1 Коринфӕгтӕмӕ 15:24–26 финст дзурдтӕй куд зиннуй, уӕлӕрвти ци хабӕрттӕ цӕудзӕй, е?

¹⁸ Библий куд финст ӕй, уомӕ гӕсгӕ фиццаг игас кӕндзӕнцӕ исӕрст киристӕнттӕ,  уӕлӕрвти цӕрунмӕ (Фил. 3:11). Е уобӕл дзорӕг ӕй, ӕма ма ӕндӕр райгасдзийнадӕ дӕр уодзӕй. Иов дӕр еци райгасдзийнади кой кодта (Иов 14:15). Киристе «ӕгас хецаудзийнӕдтӕ, хецауӕдтӕ ӕма баргинти дӕр ку фесафа», уӕд исӕрст киристӕнттӕ дӕр ӕ хӕццӕ уодзӕнцӕ. Еци рӕстӕг, «фӕстаг знаг – мӕлӕт» дӕр исӕфт ӕрцӕудзӕй. Уӕларвон цардмӕ ка райгас уа, етӕ некӕдбал рамӕлдзӕнцӕ. Фал уӕларвон нифс кӕмӕн нӕййес, еци еузӕрдон киристӕнттӕй ба ци ес зӕгъӕн? (Бакӕсӕ 1 Коринфӕгтӕмӕ 15:24–26.)

19. Зӕнхӕбӕл цӕруни нифс кӕмӕн ес, етӕ цӕмӕ ӕнгъӕлмӕ кӕсунцӕ?

¹⁹ Ӕносмӕ зӕнхӕбӕл цӕруни нифс кӕмӕн ес, уони федар кӕнунцӕ Павели дзурдтӕ: «Ӕз мӕ нифс дарун Хуцаубӕл... ке райгас уодзӕнцӕ рӕстгӕнгутӕ дӕр ӕма фудгӕнгутӕ дӕр» (Гъуд. 24:15). Бӕрӕг ӕй, ами Павел, зӕнхӕбӕл цӕрунмӕ ка райгас уодзӕй, уони кой ке кодта, уомӕн ӕма уомӕн гӕнӕн нӕййес, цӕмӕй фудгӕнгутӕ уӕларвон цардмӕ райгас уонцӕ.

20. Аци статья дин дӕ нифс куд бафедар кодта?

²⁰ Ка рамардӕй, етӕ ке райгас уодзӕнцӕ, уобӕл мах федарӕй ӕууӕндӕн. Хуцау зӕнхӕбӕл цӕрунмӕ ке райгас кӕна, уонӕн дӕр уодзӕй фадуат ӕносмӕ цӕрунмӕ. Е нин устур уодӕнцойнӕ хӕссуй, уомӕн ӕма ’й зонӕн, ка нин рамардӕй, уони Йеговӕ Минанзон хецаудзийнади рӕстӕг ке райгас кӕндзӕй (Рарг. 20:6). Удта нӕхебӕл дӕр ести ку ’рцӕуа, уӕд мах дӕр Йеговӕ нӕ феронх кӕндзӕй. Еци нифсӕй фудӕнгъӕл нӕ фӕууодзиан (Ром. 5:5). Райгасдзийнади нифс нин ке ес, уой фӕрци нӕмӕ хъауритӕ дӕр фулдӕр ес, удта нӕ бон ӕй Йеговӕн цийнӕгӕнгӕй лӕггадӕ кӕнун. Иннӕ статьяй ба ӕркӕсдзиан, 1 Коринфӕгтӕмӕ 15 сӕри ма никкидӕр цӕхуӕн гъудитӕ ес, уонӕмӕ.