1-2. Felela ditshi diabonga akombeledi a giamatshidia akhalele nadio?

FELELA diakhala nu ndando yavula. Felela dia athu ako diakhala dia guheta ulo wabonga, guvuala ana adi nu sante yabonga nga dia guvua muabonga gula akata misongo yakola. Aklisto ajiya nji gukhala nu mafelela a luholo lumoshi. Uvi tuana khala nu felela diko diabalega mafelela awa. Felela diene didi dia guheta monyo wa ivo nu ivo mu masugu adi muza nu gumona athu tuakhalele muzumba anyi afile gale.

² Mupostolo Phaula wazuelele egi: “Ngudi nu felela gudi Nzambi . . . egi, gufuzumuga gua athu abonga nu abola mbagukhala.” (Makal. 24:15, NWT) Phaula gakhalelego muthu wa thomo ha guzuelela felela dia gufuzumuga. Yobo nji wazuelele ndaga yene handaga wakhalele musha mutshima egi Nzambi mbawumuwunguluga nu mbawumufuzumuna.—Yobo 14:7-10, 12-15.

3. Luholo lutshi mukanda wa 1Kolinto mukhapho 15 wajiya gutukuatesa?

³ “Gufuzumuga gua athu” gudi “fondasio,” nga “longo dia gisendeselo,” dia malongo a Aklisto agasue. (Heb. 6:1, 2) Phaula wazuelele muavula ndaga yatadila gufuzumuga mu mukanda wa 1 Kolinto mukhapho 15. Yajiya gukhala egi ndaga jiasonegele muene jiakolesele Aklisto a mu siekle ya thomo. Mukanda wa 1 Kolinto mukhapho 15 uza gutuhana gikhesa nu gukolesa felela dietu dia gufuzumuga.

4. Mukunda natshi tudi naye gukhala nu gutshigina egi athu tuana zumba anyi afile gale mbaafuzumuga?

⁴ Gufuzumuga gua Yesu Klisto guana gututshiginyisa egi gula athu tuana zumba afua mbaafuzumuga gu gufua. Luakhalele diago “lukuma luabonga” Phaula wa wambelele enya gu Kolinto. (1 Kol. 15:1, 2) Wazuelele egi, gula Muklisto gashigo nu gutshigina mu felela dia gufuzumuga, gutshigina guenji gudi gua gituhu.  (1 Kol. 15:17) Gishina giene tudi naye gukhala nu gutshigina egi gufuzumuga mbagukhala guene.

5-6. Mbimbi jidi mu 1 Kolinto 15:3, 4 jidi mukotelesa itshi mukunda nu esue?

⁵ Tangua Phaula wasendesele gusonega ndaga jiatadila gufuzumuga, watangele ndaga thathu jia ndando: (1) “Klisto wafuile mukunda nu gubola guetu.” (2)  “Wafundiwe.” (3) Muene ‘wafuzumugile mu lusugu lua thathu gifua mudi muzuela Mbimbi ya Nzambi.’—Tanga 1 Kolinto 15:3, 4.

⁶ Gufua gua Yesu, gufundiwa nu gufuzumuga guenji gudi mukotelesa itshi mukunda nu esue? Profete Yeshaya wazuelele gutuama egi Masiya ‘mbawukatudiwa mu mavu a athu a monyo’ nu ‘mbawufundiwa mukatshi dia athu abola.’ Uvi guakhalele nu ndaga iko yakhalele naye gutagenesewa. Yeshaya wazuelele luko egi Masiya wabatele ‘gubola gua athu avula.’ Ndaga yene yatagenesewe tangua Yesu wahanele monyo wenji gifua gibawu. (Yesh. 53:8, 9, 12; Mat. 20:28; Lomo 5:8) Hene, gufua, gufundiwa nu gufuzumuga gua Yesu guana gutuhana felela egi tuajiya gukatudiwa mu gubola nu mu gufua. Tuajiya nji gumona luko aphangi’etu a guzumba anyi afile gale.

7-8. Ndaga jitshi jiakuatesele Aklisto ha gutshigina egi Yesu wafuzumugile?

⁷ Felela dietu dia gufuzumuga didi mukatuga mu gufuzumuga gua Yesu, hene tudi nu funu ya gujiya ndaga jidi mumonesa egi Yesu wafuzumugile. Mukunda natshi tuajiya gutshigina egi Yehowa wafuzumuine Yesu?

⁸ Gudi nu athu avula amonele Yesu ha fuzumugile muene nu awambelele nji athu ako ndaga yene. (1 Kol. 15:5-7) Phaula udi muzuela egi muthu wa thomo wamonele Yesu tangua afuzumugile udi mupostolo Phetelo (Sefase). Alandudi avula azuelele egi Phetelo wamonele Yesu tangua afuzumugile. (Luka 24:33, 34) Apostolo agasue ‘kumi nu muyadi’ amonele Yesu ha fuzumugile muene. Gungima, Klisto ‘wamonegele gudi athu gubalega 500 mutangua dimoshi’ yajiya gukhala yakhalele mu gudibungisa gua gusuanguluga gunu guakalegewe gu Galile gudi muzuelewa mu Matayo 28:16-20. Yesu ‘wamonegele nji gudi Yakoba.’ Idi mumonega gifua Yakoba muene wakhalele phangi wa Yesu, uvi ha thomo wakhalelego mutshigina egi Yesu udi Masiya. (Yone 7:5) Uvi tangua Yakoba wamonele gufuzumuga gua Yesu, watshiginyile egi Yesu udi Masiya. Ndaga ya gusuanguluga idi egi, tangua Phaula wasonegele mukanda wenji mu givo 55 gia Tangua Dietu, athu avula anyi monele gufuzumuga gua Yesu akhalele nu monyo. Uvi guakhalelego nga muthu mumoshi wakhalele nu ba dute mukunda nu ndaga yene.

9. Ha gutadila Makalegelo 9:3-5, luholo lutshi Phaula adi gututshiginyisa egi Yesu wafuzumugile?

⁹ Gungima Yesu wamonegele gudi Phaula hakhenji. (1 Kol. 15:8) Phaula (Saula) wakhalele muya gu Damase tangua avile dijui dia Yesu yonu wafuzumugile nu wamumonele mu vizio mu dilu. (Tanga Makalegelo 9:3-5.) Ndaga jiamonele Phaula jidi gututshiginyisa egi Yesu wafuzumugile diago.—Makal. 26:12-15.

10. Ndaga itshi yatshitshile Phaula hajiyile muene egi Yesu wafuzumugile gu gufua?

¹⁰ Athu avula akambele gujiya ndaga jiazuelele Phaula handaga wakhalele thomo musagesa Aklisto. Tangua Phaula wajiyile egi Yesu wafuzumugile, wakalegele ngolo ha gulongesa athu ako giamatshidia giene. Watagenele nu malamba akola. Wabetewe, wambiwe mu bologo nu wabundugile mu muta mukunda nu gulongesa athu giamatshidia egi Yesu wafuile nu wafuzumugile. (1 Kol. 15:9-11; 2 Kol. 11:23-27) Phaula wakhalele nu gutshigina egi Yesu wafuzumugile gu gufua. Wakhalele nji hehi ha gufua mukunda nu gulongesa athu ako ndaga yene. Ndaga eyi ishigo gugutshiginyisa egi Yesu wafuzumugile  gu gufua ba? Ishigo nji mukolesa gutshigina guaye mu felela diaye dia gufuzumuga ba?

11. Mukunda natshi athu ako gu Kolinto akhalele nu matangi abola mukunda nu gufuzumuga?

¹¹ Enya Greki ako akhalele mu dimbo dia Kolinto, akhalele nu matangi abola mukunda nu gufuzumuga. Ako akhalele muzuela egi ‘gufuzumuga gua athu guakhalago guene.’ Mukunda natshi? (1 Kol. 15:12) Enya Filozofi ako a gu Atene akhalele mulela gula athu azuela egi Yesu wafuzumugile gu gufua. Yajiya gukhala egi enya gu Kolinto ako akhalele nji nu matangi a luholo lumoshi. (Makal. 17:18, 31, 32) Yajiya nji gukhala egi athu ako akhalele mutangiza ndaga yatadila gufuzumuga mu luholo luko. Akhalele mutangiza egi, gula muthu udi mukalagala gubola udi gifua muthu wa “gufua” uvi gula wabua Muklisto wajiya gutamegewa egi muthu wa “monyo” handaga gubola guenji guatotesewa. Yadiago athu awa akhalelego nu gutshigina mu gufuzumuga. Gula nga Nzambi wafuzumuinego Yesu nga gibawu giakhalelego naye guhanewa, gubola guetu nji guakhalelego naye gutotesewa. Hene, athu anyi ana tuna egi gufuzumuga mbagukhadigo guene ana khalago nu felela dia giamatshidia.—1 Kol. 15:13-19; Heb. 9:12, 14.

12. Hagutadila 1 Phetelo 3:18, 22, luholo lutshi gufuzumuga gua Yesu guakhalele gua gudisha nu gua athu ako afuzumugile gutuama dienji?

¹² Phaula wajiyile hakhenji egi “Klisto wafuzumugile gu gufua.” Gufuzumuga gua Yesu guabalegele gua athu agasue afuzumugile gutuama dienji, handaga athu ene afile luko. Phaula wazuelele egi Yesu wakhalele “mbuto jia thomo gudi athu agasue afile gale.” Mu luholo lutshi Yesu wakhalele muthu wa thomo? Wakhalele muthu wa thomo wafuzumugile mu nyuma nu wakhalele muthu wa thomo wayile mu dilu.—1 Kol. 15:20; Makal. 26:23; tanga 1 Phetelo 3:18, 22.

13. Ndaga itshi ya gudisha Phaula wazuelele mukunda nu Adama nu Yesu?

¹³ Mu luholo lutshi gufua gua muthu mumoshi mbaguhana monyo gudi athu avula? Phaula udi muhana mvutu ya giamatshidia gu muhu owu. Udi mumonesa gudisha gudi mukatshi dia ndaga jianabuila athu mukunda nu gubola guakalegele Adama nu gubonga athu mbaheta mukunda nu mulambu wahanele Klisto. Phaula wasonegele mukunda nu Adama egi: ‘Gufua guajile munjila ya muthu mumoshi.’ Tangua Adama watshitshile gubola, wabatele malamba gudi an’enji nu gudi muene hakhenji. Uu nu mangino, tuana mona malamba mukunda nu gubola guenji. Uvi luholo Nzambi wafuzumuine Mun’enji, tudi nu felela diabonga mukunda nu masugu adi muza! ‘Gufuzumuga gua athu a gufua gudi muza nji munjila ya muthu mumoshi,’ muthu muene udi Yesu. ‘Luholo mu njila ya Adama athu agasue ana gufua,’ Phaula udi muzuela egi ‘luholo lumoshi nji mu njila ya Klisto athu agasue mbaafuzumuga.’—1 Kol. 15:21, 22.

14. Adama mbawufuzumuga ba? Kotelesa.

¹⁴ Itshi Phaula watshiginyile guzuela ha zuelele muene egi ‘mu njila ya Adama athu agasue ana gufua’? Phaula wakhalele muzuelela athu agasue anyi ahetele gubola munjila ya Adama nu luholo ana gufua. (Lomo 5:12) Adama gashigo mukatshi dia athu anyi “mbaafuzumuiwa.” Adama mbagashigo muheta gubonga gua mulambu wa Klisto, handaga muene wakhalele muthu watagana nu watunyile gutumagela Nzambi nu mutshima wagasue. Ndaga jiabuidile Adama jidi luholo lumoshi nu ndaga mbajibuila athu anyi ‘Muna muthu’ mbaasophesa gifua ‘khombo,’ yakotelesa egi, ‘mbaafua gufua gua mayilago.’—Mat. 25:31-33, 46; Heb. 5:9.

15. Akhuatshi adi mukatshi dia athu agasue anyi ‘mbaafuzumuga’?

¹⁵ Jiya egi Phaula wazuelele egi ‘mu njila ya Klisto athu agasue mbaafuzumuga.’  (1 Kol. 15:22) Phaula wasonegele mukanda wenji gudi Aklisto a gu Kolinto anyi ambiwe maji mu nyuma. Aklisto ene akhalele naye gufuzumuga ha guya mu dilu. Aklisto ene ‘abuishiwe a gijila mu gudivua nu Klisto Yesu, atamegewe hagukhala athu a gijila.’ Phaula watangele nji ‘athu agasue afuile gale mu gudivua nu Klisto.’ (1 Kol. 1:2; 15:18; 2 Kol. 5:17) Phaula wasonegele mu mukanda wenji uko egi athu anyi ‘abungishiwe nu [Yesu] mu gudivua nu gufua guenji’ ‘mbaabungishiwa nenji hangoshi mu gudivua nu gufuzumuga guenji.’ (Lomo 6:3-5) Yesu wafuzumugile mu nyuma nu wayile mu dilu. Eji ndaga mbajibuila athu adi mu ‘gudibungisa nu Klisto.’ Yakotelesa egi Aklisto agasue ambiwe maji mu nyuma.

16. Phaula watshiginyile guzuela itshi ha tamegene muene Yesu egi ‘mbuto jia thomo’?

¹⁶ Phaula wasonegele egi Klisto wafuzumugile gifua ‘mbuto jia thomo gudi athu agasue afile gale.’ Jiya egi athu ako afuzumuiwe gu gufua ha mavu gifua Lazalo, uvi Yesu wakhalele muthu wa thomo ha gufuzumuga mu nyuma nu wahetele monyo wa mayilago. Tuajijya gumufuanesa nu mbuto jia thomo enya Isalele akhalele muhana Nzambi. Tangua Phaula watamegene Yesu egi ‘mbuto jia thomo,’ wakhalele mutshigina guzuelela athu ako anyi akhalele naye gufuzumuga gu gufua gungima dia Yesu ha guya mu dilu. Apostolo nu athu ako adi ‘mu gudivua nu Klisto’ akhalele naye gufuzumuga ha guya mu dilu gifua Yesu.

17. Tangua ditshi athu adi mu ‘gudivua nu Klisto’ afuzumuiwe ha guya mujinga mu dilu?

¹⁷ Gufuzumuga gua athu anyi adi mu ‘gudivua nu Klisto’ guasendeselego mu tangua Phaula wasonegele enya gu Kolinto mukanda. Uvi Phaula wamonesele egi ndaga yene mbayitagenesewa mu masugu adi muza. Wazuelele egi: ‘Muthu nu muthu udi nu mulongo wenji: Klisto udi mbuto jia thomo, gungima athu anyi adi gukhanda ya Klisto mu sungi ya gukhala guenji.’ (1 Kol. 15:23; 1 Tes. 4:15, 16) Mangino tudi mujinga mu sungi yatamegewe egi “gukhala” gua Klisto. Yadiago, apostolo nu Aklisto ako ambiwe maji mu nyuma anyi afile, akhalele naye gunengena sungi yene ha guheta monyo wa mayilago mu dilu nu gunengenena tangua akhalele naye ‘gubungishiwa nenji hamoshi mu gudivua nu gufuzumuga guenji.’

18. (a) Mukunda natshi tudi muzuela egi gungima dia gufuzumuga gua athu anyi ana guya mu dilu gufuzumuga guko mbagukhala guene? (b) Luholo 1 Kolinto 15:24-26, idi guyimonesa, ndaga tshi mbajikalegewa mu dilu?

¹⁸ Itshi mbayibuila Aklisto a gujinginyina anyi  anago gukhala nu felela dia gujinga mu dilu nu Klisto? Ene nji adi nu felela dia gufuzumuga. Biblia idi muzuela egi Phaula nu athu ako anyi ana fuzumuga ha guya mu dilu, ana fuzumuga mu ‘gufuzumuguga gua thomo gua athu a gufua’ (Fili. 3:11) Ndaga yene idi mukotelesa egi gufuzumuga guko mbagukhala guene. Ndaga yene idi gudivua nu ndaga jiazuelele Yobo mukunda nu ndaga mbajimubuila mu masugu adi muza. (Yobo 14:15) ‘Athu anyi adi gukhanda ya Klisto mu sungi ya gukhala guenji,’ mbaakhala nu Yesu mu dilu tangua muene mbaashiya ufumu wagasue, uhinyinyi wagasue nu ngolo jiagasue. Ikhale ‘mbalagaji wa gisugishilo, gufua,’ mbawukatudiwa. Athu agasue anyi mbaafuzumuga haguya mujinga mu dilu mbaafuigo luko nga hazonda. Uvi athu ako giwa?—Tanga 1 Kolinto 15:24-26.

19. Athu mbaajinga ha mavu adi nu felela ditshi?

¹⁹ Athu mbaajinga ha mavu adi nu felela ditshi? Felela diawo didi mu mbimbi jiazuelele Phaula egi: “Ngudi nu felela gudi Nzambi . . . egi, gufuzumuga gua athu abonga nu abola mbagukhala.” (Makal. 24:15) Yadiago, gushigo nga muthu wabola wajiya guya mu dilu. Hene, mbimbi eji jidi mumonesa gufuzumuga ha mavu mu masugu adi muza.

20. Luholo lutshi felela diaye diatadila gufuzumuga didi guguhana ngolo?

²⁰ Yadiago! ‘Gufuzumuga mbagukhala guene.’ Athu mbaafuzumuga ha gujinga ha mavu mbaakhala nu luendu lua gujinga mayilago. Khala nu gutshigina egi laji edi mbaditagenesewa. Felela edi diajiya guguhana ngolo gula wafuisa muthu wakhalele muzumba. Ajiya gufuzumuga tangua Klisto nu athu ako ‘mbaahinyina gifua mafumu . . . mu uhinyinyi wa ivo 1000.’ (Yat. 20:6) Aye nji khala nu gutshigina egi gula wafua gutuama egi Yesu asendese uhinyinyi wenji wa ivo 1000, mbawufuzumuga. “Felela [edi] dishigo mutukuatesa musonyi.” (Lomo 5:5) Diajiya gu guhana ngolo mangino nu guguhana gusuanguluga mu mudimo wa Yehowa. Mu longo dialandula, mbatumona ndaga jiko jiavula tuajiya gulonguga mu mukanda wa 1 Kolinto mukhapho 15.