1-2. Koapworopwor kaselel dahieu me sapwellimen Siohwa ladu kan ahneki?

EN AHNEKI koapworopwor kin uhdahn kesempwal. Ekei aramas kin koapworopworki me arail mouren pwopwoud pahn pweida, me neirail seri kan pahn ahneki roson mwahu, de re pahn mwahula sang soumwahu laud ehu. Kitail Kristian kan pil ahneki soangen koapworopwor pwukat. Ahpw kitail ahneki koapworopwor ehu me mwahusang mepwukat. Kitail koapworopworki me kitail pahn mour kohkohlahte oh me irail kan me kitail poakohng me melahr pahn iasada.

² Wahnpoaron Pohl nda: “I kin koapworopworki Koht . . . me e pahn mie kaiasada ong me pwung kan oh me sapwung kan.” (Wiewia 24:15) Kaidehn Pohl me tepin koasoia duwen koapworopwor en kaiasada. Sohp pil wia met. E uhdahn kamehlele me Koht pahn ketin taman ih oh kaiasada ih sang mehla.​—Sohp 14:7-10, 12-15.

3. Dahme kahrehda 1 Korint irelaud 15 kak sewese kitail?

³ “Kaiasadahn me melahr akan” wia kisehn “poahsoan,” de “tepin padahk kan” me Kristian koaros kin kamehlele. (Ipru 6:1, 2) Dahme Pohl ndahki duwen kaiasada kileldi nan 1 Korint irelaud 15. Dahme e ntingihedi ele kangoange Kristian ko ni eh ahnsowo. Sohte lipilipil ia uwen werei omw kin kamehlele duwen kaiasada, 1 Korint irelaud 15 pahn kangoange oh kakehlakahda omw koapworopwor me met pahn wiawi.

4. Dahme kahrehda kitail kak kamehlele me me melahr kan pahn iasada?

⁴ Kaiasadahn Sises Krais kamehlelehiong kitail me ma irail kan me kitail poakohng mehla, e pahn mie kaiasada. Met wia kisehn “rongamwahu” me Pohl lohkiong mehn Korint kan. (1 Kor. 15:1, 2) Ni mehlel, e nda me ma Kristian men sohte kin  kamehlele duwen kaiasada, eh pwoson sohte katepe. (1 Kor. 15:17) Atail kamehlele me Sises ketin iasada iei kahrepen atail kak kamehlele me meteikan pahn pil iasada.

5-6. Ia wehwehn mahsen ko nan 1 Korint 15:3, 4 ong kitail?

⁵ Ni Pohl eh tepida ntingihedi duwen kaiasada, e koasoia duwen ire mehlel siluh. Ire mehlel pwukat iei (1) “Krais pwoukilahr dipatail.” (2) E “ketin seridier.” (3) E “ketin iasadahr ni kesiluhwen rahn nin duwen eh ntingdier nan Nting Sarawi kan.”​—Wadek 1 Korint 15:3, 4.

⁶ Ia wehwehn sapwellimen Sises pwoula, seridi, oh iasada ong kitail? Aiseia kohpada me Mesaia pahn ketin “kamakamala pwehki dipen neitail aramas akan” oh pahn “nekinekdiong nan sousou ehu iang me dipan akan.” Ahpw mie mehkot me pil pahn wiawi. Aiseia pil kapatahiong me Mesaiao pahn ketin “wilianla me dipan ngeder.” Sises ketin wia met ni eh ketikihda pweinen pweipwei sapahlo. (Ais. 53:8, 9, 12; Mad. 20:28; Rom 5:8) Eri, sapwellime pwoula, seridi, oh iasada kin kihda poahsoan kehlail ehu ong atail koapworopwor en saledeksang dihp oh mehla oh pwurehng tuhwong me melahr kan me kitail poakohng.

7-8. Dahme sewese Kristian kan en kamehlele me Sises ketin iasada?

⁷ Pwe kitail en kamehlele me kaiasada pahn wiawi, kitail anahne kamehlele mahs me Sises ketin iasada. Dahme kahrehda kitail kak uhdahn kamehlele me Siohwa ketin kaiasada Sises?

⁸ Me tohto kilang Sises mwurin eh ketin iasada oh re padahkihong meteikan. (1 Kor. 15:5-7) Tepin sounkadehde me Pohl koasoia iei wahnpoaron Piter (Kepas). Pwihn en tohnpadahk kei pil nda me Piter kilang Sises me iasadahr. (Luk 24:33, 34) Patehng met, wahnpoaron “Ehk Riemeno” kilang Sises mwurin eh ketin iasada. Mwuhr, Krais “ketin pwarohng riatail kan me daulih meh 500 ni ahnsoutehkis,” ele ni ahnsou kapereno me irail pokonpene nan Kalili nin duwen me Madiu 28:16-20 kasalehda. Sises pil ketin “pwarohng Seims,” mwein rie ohlo me nin tapio sohte pwoson me Sises iei Mesaiao. (Sohn 7:5) Mwurin Seims kilang Sises me ketin iasadahr, e kamehlelehla. Oh e pil kesempwal en ese me mpen pahr 55, ni ahnsou me Pohl ntingihedi kisinlikou wet, sounkadehde tohto me kilang Sises mwurin eh ketin iasada wie momourte, eri mehmen me sohte kamehlele me Sises ketin iasada kak koasoiong sounkadehde pwukat.

9. Dahme Wiewia 9:3-5 mahsanih me kasalehda me Pohl kak kadehdehda laud me Sises ketin iasada?

⁹ Mwuhr, Sises ketin pwarohng Pohl. (1 Kor. 15:8) Pohl (Sohl) kohkohlahng Damaskus ni eh rongada ngilen Sises me ketin iasadahro oh pil kilang ih nanleng. (Wadek Wiewia 9:3-5.) Dahme wiawihong Pohl kadehdehda laud me Sises uhdahn ketin iasada.​—Wiewia 26:12-15.

10. Dahme Pohl wia pwehki e kamehlele me Sises ketin iasada sang mehla?

¹⁰ Ekei pahn uhdahn men ese dahme Pohl nda pwehki mwohn Sises ketin pwarohng ih, Pohl kin kaloke Kristian ko. Mwurin Pohl kamehlelehla me Sises ketin iasada, e doadoahk laud pwehn kadehdehiong meteikan duwen mehlelpen met. Aramas akan keme ih, salihedi, oh e pil iang sohp me ohla nin doken eh kalokalohki mehlelpen me Sises ketin pwoula ahpw iasadahr. (1 Kor. 15:9-11; 2 Kor. 11:23-27) Pohl uhdahn kamehlele me Sises ketin iasada sang mehla me kahrehda e pilada en tounmeteikihla eh mour pwehn kalohki  duwen dahme e kamehlele. Mehn kadehde kan sang tepin Kristian ko me ese me Sises ketin iasada kin sewese kitail en pil kamehlele duwen met, kaidehn? Oh met pil kalaudehla atail kamehlele me kaiasada pahn wiawi ni ahnsou kohkohdo.

11. Dahme kahrehda ekei nan Korint ahneki madamadau sapwung duwen kaiasada?

¹¹ Ekei nan Korint, kahnimw en mehn Krihs, ahneki madamadau sapwung duwen kaiasada. Ekei pil nda me “sohte kaiasadahn me melahr akan.” Dahme kahrehda? (1 Kor. 15:12) Me loalokong kan nan Adens, pil ehu kahnimw en mehn Krihs, kin kouruhrki madamadauo me Sises ketin iasada. Eri, ekei me mi Korint ele pil ahneki soangen madamadauo. (Wiewia 17:18, 31, 32) Ekei irail ele medewe me kaiasadao sohte uhdahn mehlel. Irail ele medewe me kaiasada kin karasaraskihong aramas emen eh “mehla” pwehki e dipan, oh “mourda” ni eh wiahla Kristian. Sohte lipilipil dahme kahrehda aramas pwukat sohte kamehlelehki kaiasada, arail pwoson sohte katepe. Ma Koht sohte ketin kaiasada Sises, pweinen pweipwei sapahlo sohte pahn wiawi oh aramas koaros pahn wiahte aramas dipan kei. Eri irail kan me soikala mehlelpen kaiasada sohte ahneki koapworopwor mehlel.​—1 Kor. 15:13-19; Ipru 9:12, 14.

12. Nin duwen me 1 Piter 3:18, 22 kasalehda, ia duwen kaiasadahn Sises eh weksang kaiasada kan me wiawi mwoweo?

¹² Pein Pohl ese me “Krais ketin iasadasangehr rehn me melahr akan.” Kaiasada wet mwahusang kaiasada kan me wiawi mwoweo, pwehki irail kan me iasada mwoweo, re pwurehng mehla. Pohl nda me Sises iei “tepin wahn irail kan me melahr.” Ia wehwehn met? Sises iei tepin aramas me ketin iasada nin duwen ngehn emen oh ketidahla nanleng.​—1 Kor. 15:20; Wiewia 26:23; wadek 1 Piter 3:18, 22.

13. Wekpeseng dahieu nanpwungen Adam oh Sises me Pohl kawehwehda?

¹³ Ia duwen mehlahn aramastehmen eh kak kahrehda aramas rar rar kei en pwurehng mourda? Pohl sapengala peidek wet ni sansal. E kawehwehda wekpeseng en dahme kin wiawihong aramas pwehki dahme Adam wiahda, oh dahme kak wiawihong kitail pwehki sapwellimen Krais meirongo. Me pid Adam, Pohl ntingihedi: “Mehla . . . miehla sang rehn aramastehmen.” Ni Adam eh dipada, e kahrehda mehla ong pein ih oh kadaudoke kan. Kitail kin pousehlahte lokolongki imwilahn eh sapeik. Ahpw pwehki Koht ketin kaiasada sapwellime Ohlo, kitail kak ahneki koapworopwor ong ahnsou kohkohdo. “Kaiasadahn me melahr akan pil pahn mie sang rehn aramastehmen,” Sises. Pohl kawehwehda: “Pwe duwen koaros ar kin mehla pwehki Adam, ih pil duwen koaros ar pahn iasada pwehki Krais.”​—1 Kor. 15:21, 22.

14. Adam pahn iang iasada? Menlau kawehwehda.

¹⁴ Ia wehwehn en Pohl eh nda “koaros ar kin mehla pwehki Adam”? Pohl kin koasoakoasoia duwen aramas koaros me sohsohki dihp oh soh unsek sang Adam oh pahn mehla. (Rom 5:12) Adam sohte iang irail kan me “pahn iasada.” Adam sohte paiekihda sapwellimen Krais pweipwei sapahlo, pwehki ih ohl unsek men me pein pilada en sapeikiong Koht. Dahme wiawihong Adam pahn pil wiawihong irail kan me “Nein-aramas” pahn ketin kadeikada nin duwen “kuht kan.” Irail pahn “lopla soutuk.”​—Mad. 25:31-33, 46; Ipru 5:9.

15. Ihs irail kan “koaros” me “pahn iasada”?

¹⁵ Tehk me Pohl nda me “koaros . . . pahn  iasada pwehki Krais.” (1 Kor. 15:22) Pohl ntingihada kisinlikou wet ong Kristian keidi kan nan Korint me pahn iasada ong mour nanleng. Kristian pwukat ‘sarawihkilahr arail miniminiong Krais Sises, irail me adaneki me sarawi kan.’ Pohl pil koasoia “irail me melahr ni arail miniminiong Krais.” (1 Kor. 1:2; 15:18; 2 Kor. 5:17) Pil nan ehu nah kisinlikou ko, Pohl ntingihedi me irail ko me “miniminiong [Sises] ni mwohmw me duwehte sapwellime pwoula” pahn “miniminiong ih ni mwohmw me duwehte sapwellime iasada.” (Rom 6:3-5) Sises ketin iasada nin duwen ngehn emen oh ketidahla nanleng. Eri met pahn pil wiawihong koaros me kin “miniminiong Krais,” me iei Kristian keidi kan koaros.

16. Ia wehwehn en Pohl eh kahdaneki Sises “tepin wahn” irail kan me melahr?

¹⁶ Pohl ntingihedi me Krais ketin iasada nin duwen “tepin wahn irail kan me melahr.” Tamataman me meteikan, duwehte Lasarus, iasada ong mour nin sampah, ahpw Sises iei me tepin iasada nin duwen ngehn emen oh alehdi mour soutuk. E kak ketin pahrekiong tepin wahn wahnsahpw kan me mehn Israel kan kin meirongkihong Koht. Oh ni Pohl eh kahdaneki Sises “tepin wahn” irail kan me melahr, met wehwehki me mie irail kan mwurin Sises me pahn iasada ong mour nanleng. Wahnpoaron ko oh pil meteikan me kin “miniminiong Krais” pahn mwuhr iasada ong mour nanleng, duwehte Sises.

17. Iahd me irail kan me kin “miniminiong Krais” pahn alehdi ketingparail nanleng?

¹⁷ Iasadahng nanleng ong irail kan me kin “miniminiong Krais” saikinte wiawi ni ahnsou me Pohl ntinglahng Kristian ko nan Korint. Pohl kin koasoakoasoia duwen ahnsou ehu me kohkohdo. E nda: “Ahpw emenemen nin duwen kairekdi wet: Krais me tepin wah, mwuri irail kan me sapwellimen Krais erein eh ketier.” (1 Kor. 15:23; 1 Des. 4:15, 16) Rahnpwukat kitail mihmiher erein “ketier” en Krais me kokohpda. Ei, wahnpoaron ko oh Kristian keidi teikan me melahr anahne awih lao lel ketier en Krais pwe ren alehdi ketingparail nanleng oh “miniminiong [Sises] ni mwohmw me duwehte sapwellime iasada.”

18. (a) Dahme kahrehda kitail kak nda me e pahn mie ehu kaiasada mwurin kaiasadao ong mour nanleng? (b) Nin duwen me 1 Korint 15:24-26 kasalehda, dahme pahn wiawi nanleng?

¹⁸ Ahpw dahme pahn wiawihong Kristian loalopwoat kan me sohte ahneki koapworopwor en mi nanleng rehn Sises? Irail pil  ahneki koapworopwor en iasada sang mehla. Paipel mahsanih me Pohl oh irail teikan me kohla nanleng alehdi “kaiasada keieu sang rehn me melahr akan.” (Pil. 3:11) Met kasalehda me e pahn pil mie ehu kaiasada mwurin mwo. E pahn pahrekiong dahme Sohp kamehlele me pahn wiawihong ih ni ahnsou kohkohdo. (Sohp 14:15) “Irail kan me sapwellimen Krais erein eh ketier” pahn mi nanleng rehn Sises ahnsou me e pahn ketin kasohrehla koperment kan koaros, pwuhng en kaunda koaros oh manaman koaros. “Imwintihti me keieu mwuhr, iei mehla” pil pahn kasohrala. Koaros me iasadahng mour nanleng solahr pahn mehla. Ahpw dahme pahn wiawihong meteikan?​—Wadek 1 Korint 15:24-26.

19. Dahme irail kan me ahneki koapworopwor en mour nin sampah kak kasik?

¹⁹ Dahme irail kan me ahneki koapworopwor en mour nin sampah kak kasik? Irail kak ahneki koapworopwor pwehki dahme Pohl nda: “I kin koapworopworki . . . me e pahn mie kaiasada ong me pwung kan oh me sapwung kan.” (Wiewia 24:15) E sansal me sohte aramas sapwung men kak kohdahla nanleng, eri mahsen pwukat koasoakoasoia me mie ehu kaiasada me pahn wiawi nin sampah.

20. Ia duwen omw koapworopwor en kaiasada eh kehlailla?

²⁰ E uhdahn mehlel, “e pahn mie kaiasada”! Irail kan me pahn iasada nin sampah pahn ahneki koapworopwor en mour wasao kohkohlahte. Ke kak kamehlele me inou wet pahn pweida. Koapworopwor wet kak kansenamwahwihukala ni omw kin medewe duwen irail me melahr kan me ke poakohng. Irail kak iasada sang mehla erein ahnsowo me Krais oh meteikan pahn “kakaun nin duwen nanmwarki kei erein sounpar 1,000.” (Kaud. 20:6) Ke pil kak kamehlele me ma ke mehla mwohn Krais tepida ketin kakaun sounpar kido, ke pahn iasada. “Koapworopwor wet sohte kin kansensuwedih kitail.” (Rom 5:5) E kak kakehlakaiuk ahnsou wet oh kalaudehla omw peren ni omw papah Koht. Ahpw miehte soahng teikan me kitail kak sukuhlki sang 1 Korint irelaud 15. Iren onop en mwuhr pahn kasalehda duwen met.