1, 2. ¿Ima suyakuymi kan Jehová Diosta serviqninkunapaq?

IMAKUNATAPAS suyakuyqa allinmi. Wakinmi munanku casarakuspa kusisqa kausayta, wawankupas allin kananta, otaq onqoyninkumanta jampisqa kayta. Cristianokunapas chaykunatan suyakusunman. Chaykunamanta kanmi juj aswan allin suyakuy, ¿iman kanman? Wiñaypaq kausay suyakuyninchismi, wañupuq familianchiskunawan jujmanta tupay ima.

² Apóstol Pablon chaymanta niran: “Noqapas Diospi suyakuni allin runakunatapas mana allin runakunatapas wañusqa kasqankumanta kausarichimpunanta”, nispa (Hech. 24:15). Jobpas ñaupaqtaraqmi kausarimpuypi iñiran, yacharanmi Jehová Dios payta yuyarispa kausarichinanta (Job 14:7-10, 12-15).

3. ¿Imaynatan yanapawasunchis 1 Corintios capítulo 15 nisqan?

³ ‘Wañusqakunaq kausarimpunanmanta yachachikuyqa’ ancha importanten llapa cristianokunapaq (Heb. 6:1, 2). Apóstol Pablon kausarimpuymanta astawan yachachiran 1 Corintios capítulo 15 textopi. Kausarimpuymanta yachachisqanqa anchatachá kallpacharan ñaupa tiempopi cristianokunataqa. Noqanchistapas maytan kallpachawanchis.

4. ¿Imaraykun wañuqninchiskunaq kausarimpunanpi iñinchis?

⁴ Jesuspa kausarimpusqanraykun wañupuqninchiskuna kausarimpunqaku. Chay “allin willakuykunatan” apóstol Pabloqa Corinto llaqtapi iñiqmasikunaman willaran (1 Cor. 15:1, 2). Paymi niran: “Manataq Cristo kausarichisqachu karan chayqa, yanqachá riki iñiyniykichisqa”, nispa (1 Cor. 15:17). Chhaynaqa, Jesuspa kausarimpusqanpi iñiymi yanapawanchis kausarimpuypi iñinanchispaq.

5, 6. ¿Imaynatan kausarimpuypi iñinanchispaq yanapawanchis 1 Corintios 15: 3, 4 nisqan?

⁵ Pablo kausarimpuymanta yachachishaspaqa kaykunamantan rimaran: ‘Cristo juchanchiskunarayku wañusqanmanta,  chaymantataq p’ampasqa kasqanmanta, kinsa p’unchaymanta kausarichisqa kasqanmanta’ ima (leey 1 Corintios 15:3, 4).

⁶ ¿Imatan yachasunman Cristo juchanchiskunarayku wañusqanmanta, p’ampasqa kasqanmanta, kinsa p’unchaymanta kausarichisqa kasqanmantapas? Profeta Isaiasmi ñaupaqmantaña Mesiasmanta rimaran wañuchisqa kananmanta, ‘juchasapakunawan p’ampasqa kananmantapas’. Nillarantaqmi ‘askha runaq juchanta q’episqanta’. ¿Imaynatan chayta Jesús ruwaran? Kausayninta noqanchisrayku qospan (Isa. 53:8, 9, 12; Mat. 20:28; Rom. 5:8). Chhaynaqa, Jesuspa wañusqanmi, p’ampasqa kasqanmanta kausarimpusqanmi, yanapawanchis juchamanta wañuymanta librasqa kananchispaq, chaymantapas wañupuqninchiskunawan jujmanta tupananchispaq.

7, 8. ¿Iman yanapawasunman Jesuspa kausarimpusqanmanta mana iskayananchispaq?

⁷ Wañusqakunaq kausarimpunanpi iñinapaqqa ñaupaqtan Jesuspa kausarimpusqanpi iñinanchis. ¿Imaynapin yachanchis Jehová Dios Jesusta kausarichisqanta?

⁸ Askha runakunan Jesuspa kausarimpusqanta rikuranku (1 Cor. 15:5-7). Apóstol Pabloq nisqan jina, Jesusqa apóstol Pedromanmi ñaupaqta rijuriran. Wakin apostolkunapas nirankun ‘Pedromanpas rijurimusqan’ nispa (Luc. 24:33, 34). Chaymantapas chunka iskayniyoq apostolninkunamanmi rijuriran. ‘Juj kutinpas pisqa pachaj más iñiqmasikunamanmi rijuriran’, Mateo 28:16-20 nisqan jina, yaqapaschá Galileapi apostolninkunawan tupasqanpi. “Chaymantataq rijuriran Santiagoman”, payqa Jesusta rikusparaqmi kausarimpusqanpi iñiran (Juan 7:5). 55 watapi apóstol Pablo cartanta qelqashaqtinqa Jesusta kausarimpusqanta rikuqkunaqa kausasharankuraqmi, paykunaqa maytachá yanaparanku Jesuspaq kausarimpusqanpi jujkunapas iñinankupaq.

9. Hechos 9:3-5 nisqan jina, ¿imatan yachasunman Pablo Jesuspa kausarimpusqanta rikusqanwan?

⁹ Tiempowanmi apóstol Pabloman Jesusqa rijuriran (1 Cor. 15:8). Damascoman rishaspan Jesuspa rimapayamusqanta uyariran, chaypin Jesustaqa juj rijuriypi janaq pachapi rikuran (leey Hechos 9:3-5). Chaypin sut’ita yachakullarantaq Jesuspa kausarimpusqanta (Hech. 26:12-15).

10. ¿Ima ruwananpaqmi Apóstol Pablota kallpacharan Jesuspa kausarimpusqanta yachasqan?

¹⁰ Ñaupa tiempopin apóstol Pabloqa cristianokunata qatiykachaq, chayta yachaspaqa astawanchá runakuna uyariyta munaranku. Chaymi apóstol Pabloqa Jesuspa kausarimpusqanta yachaspa kallpachakuran Jesusmanta runakunaman yachachinanpaq. Jesuspa kausarimpusqanmanta yachachisqanraykun Pablotaqa q’asuranku, carcelmanpas wisq’aranku, viajasqan barcopas t’ijrakuran (1 Cor. 15:9-11; 2 Cor. 11:23-27). Pabloqa manan iskayaranchu Jesuspa kausarimpusqanmantaqa chaymi runakunamanpas yachachishallaran. Noqanchispas Jesuspa kausarimpusqanmantaqa manan iskayananchischu, chaymi kallpachawanchis astawan kausarimpuypi iñinanchispaq.

11. ¿Imaraykun kausarimpuymanta pantasqata creeqku Corinto llaqtamanta cristianokuna?

¹¹ Corinto llaqtapi wakin cristianokunaqa kausarimpuymanta pantasqa yachachikuykunapin creeqku, wakinqa manan iñiqkupaschu (1 Cor. 15:12). ¿Imarayku? Atenas  llaqtapi yachayniyoq runakunan Jesuspa kausarimpusqan yachachikuykunata mana allinpaq qhawarisqankurayku, chaymi wakin Corinto llaqtamanta cristianokunaqa paykuna jina piensaranku (Hech. 17:18, 31, 32). Yaqapaschá paykunaqa piensaranku manaraq cristiano kashaspa juchankurayku wañusqa kashasqankuta, cristiano kapuspataqmi ichaqa juchankumanta perdonasqa kaspa kausarimpusqankuta. Imaynaña kaqtinpas manataq kausarimpuypi iñirankuchu chayqa manan iñiyninku valeranchu. Sichus Jesús mana kausarinmanchu karan chayqa manan juchankumanta kacharichisqachu kankuman nitaqmi juchankumantapas perdonasqachu kankuman. Kausarimpuypi mana iñiqkunaqa yanqa suyakuyniyoqmi kanku (1 Cor. 15:13-19; Heb. 9:12, 14).

12. 1 Pedro 3:18, 22 nisqan jina, ¿imaraykun Jesuspa kausarisqan jujniray karan?

¹² Pabloqa yacharanmi Jesusqa ‘kausarichisqapuni kasqanta’. Jesuspa kausarimpusqanqa aswan allinmi karan ñaupaqta kausarimpuqkunamantaqa, paykunaqa chaymantan wañupuranku. Pablon Jesusmanta niran: “Paymi wañusqakunamanta ñaupaq kausarimpuq kashan”, nispa. ¿Imaraykun Jesús ñaupaq kausarimpuq karan? Paymi ñaupaqta espíritu jina kausarimuran, chaymantapas ñaupaqtan janaq pachaman ripuran (1 Cor. 15:20; Hech. 26:23; leey 1 Pedro 3:18, 22).

13. ¿Imaynatan Pablo yachachiran Adanwan Jesuswan jujniray kasqankuta?

¹³ ¿Imaraykun juj runaq wañusqanrayku askha runa kausarichisqa kanman? Pablon yachachiran, Adanpa ruwasqanqa jujniraymi karan Jesuspa runakunapaq wañusqanmanta. Chaymi Pablo niran: ‘Wañuyqa juj runallawanmi kay pachapi qallariran’, nispa. Adanqa juchallikusqanraykun wañuran chaymi noqanchispas wañunchis, imaymana sasachakuykunapipas tarikunchis. Ichaqa Jesusta Jehová Dios kausarichisqanraykun juj suyakuyniyoq kanchis, chayqa may kusikunapaqmi. Pablon nillarantaq: “Wañusqakunaq kausarimpuyninpas juj runallawanmi kanqa. Imaynan Adanpa causanpi lliu runa wañushanku, chhaynatan Cristorayku lliu runa kausarichisqa kanqaku”, nispa (1 Cor. 15:21, 22).

14. ¿Imanaqtinmi Adán mana kausarimunqachu?

¹⁴ ¿Pikunamantan apóstol Pablo rimashanman karan “Adanpa causanpi lliu runa wañushanku” nisqanwan? Adanpa mirayninmantan rimasharan, paypa miraynin kasqanchisraykun juchallikunchis wañunchispas (Rom. 5:12). Adanqa ch’uya runa kashaspan mana Diosta kasukuranchu chaymi payqa mana kausarimunqachu, runakunaraykuña Jesús wañuran chaypas. Adanqa cabra jinañan Jesuspa juzgasqan kapun chhaynallataqmi wakin runakunapas “wiñay wañuyman rinqaku” (Mat. 25:31-33, 46; Heb. 5:9).

15. ¿Pikunan kausarinqaku “Cristorayku lliu runa kausarichisqa kanqaku” nikusqanwan?

¹⁵ Pablon rimaran“Cristorayku lliu runa”  kausarichisqa kanankumanta (1 Cor. 15:22). Paymi Corinto llaqtapi ajllasqa iñiqmasikunaman cartata qelqaran. Paykunaqa ‘Diospa ajllasqan kaspa Cristo Jesuswan jujllachasqa kaspan’ ‘ch’uya kanankupaq wajasqa karanku’. Pabloqa rimallarantaqmi ‘Cristoq discipulon kashaspa wañupuqkunamantapas’ (1 Cor. 1:2; 15:18; 2 Cor. 5:17). Chaymantan nillarantaq: “Paypa imaynachus wañusqanta jinataq wañupunchis chayqa, paypa imaynachus kausarimpusqanta jinallataqmi kausarimpusunchispas; chhaynapin paywanqa jujllachasqa kashanchis”, nispa (Rom. 6:3-5).  Jesusqa espíritu jina kausarispan janaq pachaman ripuran. Chhaynallatataqmi ajllasqa cristianokunapas janaq pachaman ripunqaku.

16. ¿Imatan Pablo nisharan Jesusqa “ñaupaq kaq” nisqanwan?

¹⁶ Pablon Cristoq kausarimpusqanmanta qelqaran: “Paymi wañusqakunamanta ñaupaq kausarimpuq kashan”, nispa. Yachasqanchis jina karanmi Lázaro jina jujmanta kausarimpuqkuna, Jesusmi ichaqa ñaupaq kaq espíritu jina kausarimuqqa wiñay kausaytataqmi chaskiranpas. Chhaynapin payqa Israel runakuna ñaupaq kaq mijuykunata Jehová Diosman jaywasqanku jina karan. Chaymi “ñaupaq kaq” nispa Jesusta nikuran chaywanmi Pabloqa nisharan juj runakunapas janaq pachapi kausarinankuta. Tiempowanmi llapa “Jesuswan jujllachasqa” kaqkuna janaq pachapi Jesús jina kausarinqaku, chaykunamantan wakin kashanku Jesuspa apostolninkuna.

17. ¿Jayk’aqmi “Jesuswan jujllachasqa kaqkuna” premionkuta chaskinqaku?

¹⁷ Pablo Corinto iñiq t’aqaman cartata qelqashaqtinqa manaraqmi pipas ‘Jesuswan jujllachasqa kaqkunamantaqa’ kausarirankuraqchu. Chaymi Pabloqa niran: “Ichaqa ordenpin kanqa: Ñaupaq kausarimpuqmi Cristo kashan, chaymantataq paypa chayamusqan tiempopi paypa kaqninkuna kausarimpunqaku”, nispa (1 Cor. 15:23; 1 Tes. 4:15, 16). Chhaynaqa, apostolkunapas wakin ajllasqa cristianokunapas janaq pachapi kausarichisqa kanankutaqa suyakunankun karan Jesús chayamunan tiempokama, chhaynapi pay jina kausarichisqa kanankupaq ‘paywanpas jujllachasqa kanankupaq’. Kunanqa Jesuspa chayamunan tiempopin kashanchis.

18. a) ¿Imaraykun yachanchis janaq pachapi kausariymanta qhepaman juj kausarimpuy kananta? b) 1 Corintios 15:24-26 nisqan jina, ¿iman pasanqa janaq pachapi?

¹⁸ ¿Iman kanqa janaq pachaman mana riyta atiqkunawan? Paykunapas kausarichisqa kanankutan suyakushanku. Bibliaq nisqan jina Pablopas wakin ajllasqa cristianokunapas ‘ñaupaq kaq kausarimpuypin kausarimpunqaku’ (Filip. 3:11). Chhaynaqa, kanqan qhepaman kausarimpuypas. Chaytan Jobpas suyakushan (Job 14:15). Jesuspa tiemponpi ajllasqa cristianokuna kausarimpuqtinkuqa paywan kuskan janaq pachamanta “llapa gobiernokunata, llapa autoridadkunata, llapa atiyniyoq kaqkunata ch’usaqyachinqaku”.  Chaymantapas “último kaq enemigonchis wañuypas ch’usaqyachisqan kapunqa”. Chaymi janaq pachapaq kausarimpuqkunaqa manaña jayk’aqpas wañunqakuñachu. Chhaynaqa, ¿imataq kanqa kay pachapi suyakuyniyoq kaqkunawanri? (Leey 1 Corintios 15:24-26.)

19. ¿Ima suyakuyniyoqmi kanku janaq pachaman mana riqkuna?

¹⁹ Kay pachapaq suyakuyniyoqkunaqa apóstol Pablo jinan ninku: “Kay runakuna jinan noqapas Diospi suyakuni allin runakunatapas mana allin runakunatapas wañusqa kasqankumanta kausarichimpunanta”, nispa (Hech. 24:15). Yachasqanchisman jina manan mana allin runakunaqa janaq pachamanqa riyta atinkuchu, chhaynaqa kay pachapi kausarimpuy kananmantan rimashan.

20. ¿Imaynatan kaypi yachasqayki yanaparasunki suyakuyniykimanta ama iskayanaykipaq?

²⁰ Kaypi yachamusqanchis jina, “wañusqa kaqkunaqa kausarimpunqakun”. Kay pachapi kausarimpuqkunaqa wiñay wiñaypaqmi kay pachapi tiyanqaku. Chaymi mana iskayananchischu kay suyakuyninchismantaqa. Señorninchis Jesús ajllasqa cristianokunawan waranqa wata kay pachata kamachiqtinkun, wañupuqninchiskunaqa kausarimpunqaku (Apo. 20:6). Chaymantapas sichus manaraq waranqa wata Jesús kamachikushaqtin wañupusun chayqa suyakuyninchisqa kanqapunin. “Chay suyakuyqa manataqmi yanqachu”, chayta yachayqa maytan yanapawanchis kusisqalla Jehová Diosta servishanallanchispaq (Rom. 5:5). Qatimuq yachachikuypin astawan yachasun, 1 Corintios 15 capitulomanta.