1-2. Сави шужи надеж иси е Јеховаскере слуген?

БУТ тано важно те овел амен надеж ко нешто. Несаве мануша надинена пе те овел лен успешно брако, ленгере чхаве те бајровен састе или ола те сасљовен таро несаво насвалипе. Амен да шај надинаја амен ко иста буќа. Ама, амен надинаја амен ко нешто панда пошужо — кај ка живина вечно хем кај амаре мангле со муле палем ка шај те живинен.

² О апостол Павле вакерѓа: „Иси ман надеж... кај о Девел ка воскреснинел околен сој праведна хем околен со нане праведна“ (Дела 24:15). О Павле на сине единствено со керѓа лафи баши надеж ко воскресение. Е Девлескоро верно слуга о Јов исто аѓаар керѓа лафи башо адава. Ов сине сигурно кај о Девел ка сетинел пе ки лесте хем палем ка ваздел ле ко живото (Јов 14:7-10, 12-15).

3. Сар шај те поможинел аменге о 1. Коринќаните 15 поглавје?

³ О воскресение е муленгоро тано јекх „основно сикљојбе“ колесте со верујнена о христијања (Евр. 6:1, 2). О Павле подетално керѓа лафи башо воскресение ко 1. Коринќаните, 15 поглавје. Адава со пишинѓа сигурно охрабринѓа е христијанен ко адава време. Бизи разлика кобор време верујнеа ко воскресение, акава поглавје ка охрабринел тут хем ка бајрарел тли надеж кај о воскресение сигурно ка овел.

4. Соске шај те ова сигурна кај амаре мангле ка овен воскресниме?

⁴ О воскресение е Исусескоро дела амен гаранција кај ако некој таро амаре мангле мерела, ка воскреснинел. О воскресение е Исусескоро сине дело таро „шукар хабери“  со објавинѓа ле о Павле е христијаненге таро Коринт (1. Кор. 15:1, 2). Уствари, ов вакерѓа кај ако јекх христијани на верујнела ко адава воскресение, тегани џабе иси ле вера (1. Кор. 15:17). Ако верујнаја ко е Исусескоро воскресение тегани шај те верујна кај јавера да ка овен воскресниме.

5-6. Со значинена аменге о лафија таро 1. Коринќаните 15:3, 4?

⁵ Кеда о Павле пишинѓа башо воскресение, ов спомнинѓа трин чачипа. Адала тане: 1) „О Христос муло башо амаре гревија“. 2) Ов „сине парумо“. 3) „Воскреснинѓа ко трито диве сар со пишинела ко Писмија“. (Читин 1. Коринќаните 15:3, 4.)

⁶ Со значинела аменге е Исусескоро мерибе, парујбе хем о воскресение? О пророко Исаија англедер вакерѓа кај о Месија ка овел „цидимо таро џивде“ хем кај „о гробо лескоро ка овел машкар о лошна“. Ама панда нешто ваљани сине те случинел пе. О Исаија исто аѓаар вакерѓа кај о Месија ка лел „о гревија буте манушенгере“. О Исус керѓа акава адалеа со денѓа пло живото сар откупнина (Иса. 53:8, 9, 12; Мат. 20:28; Рим. 5:8). Аѓаар е Исусескоро мерибе, парујбе хем о воскресение тане аменге гаранција кај ка ова ослободиме таро грево хем таро мерибе хем кај ка ова палем заедно амаре мангленцар со муле.

7-8. Со поможинела е христијаненге те верујнен кај о Исус воскреснинѓа?

⁷ Сар со вакерѓем англедер, амари надеж ко воскресение тани поврзими е Исусескере воскреснибаја. Адалеске, те шај те верујна кај ка овел воскресение, прво мора те верујна кај о Исус воскреснинѓа. Соске шај те ова сигурна кај о Јехова воскреснинѓа е Исусе?

⁸ Сине бут џене со дикхле е Исусе пало лескоро воскресение, хем ола вакерѓе башо адава е јаверенге (1. Кор. 15:5-7). О прво сведоко со спомнинѓа ле о Павле сине о Петар (Кифа). Исто аѓаар, јекх група ученикија вакерѓа кај о Петар дикхља е Исусе пало лескоро воскресение (Лука 24:33, 34). Освен адава, о дешудуј апостолија да, дикхле е Исусе откеда воскреснинѓа. Пало адава о Исус појавинѓа пе повише таро 500 џененге со сине заедно ко јекх состанок ки Галилеја сар сој спомнимо ко Матеј 28:16-20. О Исус исто аѓаар најверојатно појавинѓа пе пле пхралеске, е Јаковеске, кова со порано на верујнела сине кај о Исус тано о Месија (Јован 7:5). Откеда дикхља кај о Исус воскреснинѓа, о Јаков уверинѓа пе. Интересно кај, ко 55 берш а.е. кеда о Павле пишинѓа акава писмо, бут џене со дикхле е Исусе пало лескоро воскресение сине панда џивде, хем секој со сумнинела пе сине кај о Исус воскреснинѓа шај сине ленцар те керел лафи.

9. Сар со читинаја ко Дела 9:3-5, сар о Павле сине сведоко кај о Исус воскреснинѓа?

⁹ Покасно, о Исус појавинѓа пе лично е Павлеске (1. Кор. 15:8). О Павле (Савле) џала сине ко Дамаск кеда шунѓа о гласо е Исусескоро кова со више сине воскреснимо хем дикхља ле ки визија сар тано ко небо. (Читин Дела 9:3-5.) Адава со случинѓа пе е Павлеске тано панда јекх доказ кај о Исус чаче воскреснинѓа (Дела 26:12-15).

10. Со сине спремно те керел о Павле адалеске со сине сигурно кај о Исус воскреснинѓа?

¹⁰ Е Павлескоро сведоштво сине посебно значајно соске ов јекх време прогонинела сине е христијанен. Откеда уверинѓа пе кај о Исус воскреснинѓа, о Павле бут трудинѓа пе е јаверен да те уверинел ко акава чачипе. Ов трпинѓа марибе, затвор хем бродолом џикоте проповединела сине о чачипе кај о Исус уштило таро муле хем кај сине џивдо (1. Кор. 15:9-11; 2. Кор. 11:23-27). О Павле сине добором сигурно кај о Исус воскреснинѓа, со  сине спремно те мерел адалеске со проповединела сине башо адава ко со верујнела. Адава со бут христијања таро прво веко сине сведокија кај о Исус воскреснинѓа сигурно поможинела аменге да те верујна кај адава чаче уло. Зарем акава на бајрарела повише тли вера ко воскресение?

11. Соске шај несаве христијања таро Коринт дикхена сине погрешно ко воскресение?

¹¹ Несаве христијања ки грчко диз Коринт на дикхена сине ко исправно начин ко воскресение. Несаве чак вакерѓе кај „нане воскресение е муленге“. Соске? (1. Кор. 15:12). О филозофија ки јавер грчко диз, ки Атина, асана сине баши идеја кај о Исус воскреснинѓа. Асавко размислибе шај влијајнѓа упро несаве мануша ко Коринт, па чак упро несаве ко христијанско собрание (Дела 17:18, 31, 32). Јавера мислинена сине кај о воскресение на сине дословно. Наместо адава, ола мислинена сине кај окола сој тане грешникија тане сар те пхене „муле“, а окола мануша со овена христијања вакерела пе сине ленге кај тане „џивде“ адалеске сој тане простиме ленгере гревија. Бизи разлика која тани и причина, кеда некој на верујнела ко е Исусескоро воскресение тегани лескири вера тани џабе. Ако о Девел на воскреснинѓа е Исусе, нане сине те важинел и откупнина хем нане сине те овен простиме о гревија. Адалеске, адала со на верујнена сине ко воскресение на сине лен чачутни надеж (1. Кор. 15:13-19; Евр. 9:12, 14).

12. Сар о 1. Петрово 3:18, 22 поможинела аменге те хаљова кај е Исусескоро воскресение сине појавер таро јавера воскресенија со сине поангле?

¹² О Павле лично џанља кај „о Христос воскреснинѓа таро муле“. Акава воскресение сине пошукар таро воскресенија со сине поангле, адалеске со адала мануша со сине воскресниме, палем муле. О Павле вакерѓа кај о Исус сине „о прво таро адала со муле“. Ки која смисла о Исус сине о прво? Ов сине о прво со воскреснинѓа сар духовно суштество хем сине о прво мануш со воскреснинѓа те џал ко небо. (1. Кор. 15:20; Дела 26:23; читин 1. Петрово 3:18, 22.)

13. Која разлика керѓа о Павле машкар о Адам хем о Исус?

¹³ Сар шај о мерибе јекхе манушескоро те анел живото буте џененге? О Павле дела логично одговор ко акава пучибе. Ов објаснинела и разлика машкар адава со уло е манушенге адалеске со о Адам на сине послушно хем со шај те добина адалеске со о Исус денѓа пе сар жртва. Башо Адам о Павле пишинѓа: „О мерибе ало преку јекх мануш“. Кеда о Адам грешинѓа, ов анѓа мерибе песке хем са е манушенге. Амен панда осетинаја о лошна последице тари лескири непослушност. Ама, адалеске со о Јехова воскреснинѓа пле Чхаве, о муле ка шај палем те живинен! Исто аѓаар „о воскресение да е муленгоро авела преку јекх мануш“, о Исус. О Павле вакерѓа: „Соске, сар преку о Адам сарине со мерена, аѓаар преку о Исус сарине ка овен џивде“ (1. Кор. 15:21, 22).

14. Дали о Адам ка овел воскреснимо? Објаснин.

¹⁴ Ки касте мислинѓа о Павле кеда вакерѓа кај преку о Адам сарине мерена? О Павле мислинѓа ко са о мануша со наслединѓе о грево хем и несовршеност таро Адам, хем адалеске мерена (Рим. 5:12). О Адам нане те овел машкар адала со палем „ка овен џивде“. Е Адамеске на важинела е Исусескири откупно жртва, соске о Адам сине совршено мануш со одлучинѓа те на шунел е Јехова. Адава со уло е Адамеске — „вечно мерибе“ — ка овел адаленге да со „о манушикано  Чхаво“ ка осудинел лен сар „бузња“ (Мат. 25:31-33, 46; Евр. 5:9).

15. Кој тане вклучиме ко „сарине“ со палем „ка овен џивде“?

¹⁵ Дикх кај о Павле вакерѓа кај „преку о Исус сарине ка овен џивде“ (1. Кор. 15:22). О писмо со пишинѓа ле о Павле сине џи ко помазиме христијања ко Коринт, со ка воскреснинен сине те живинен ко небо. Адала христијања сине „бириме таро Девел те овен ко јекхипе е Христос Исусеа, викиме те овен света“. Исто аѓаар, о Павле спомнинѓа „околен со муле ко јекхипе е Христосеа“ (1. Кор. 1:2; 15:18; 2. Кор. 5:17). Ко јекх јавер писмо, о Павле пишинѓа кај окола сој тане „ко јекхипе [е Исусеа] ко лескоро мерибе“ ка овен „ко јекхипе леа ко воскресение слично сар лескоро“ (Рим. 6:3-5). О Исус воскреснинѓа сар духовно личност хем гело ко небо. Аѓаар ка овел са околенцар сој тане „ко јекхипе е Христосеа“, а адала тане са о помазиме христијања.

16. Со мислинѓа о Павле кеда вакерѓа кај о Исус тано „о прво“?

¹⁶ О Павле пишинѓа кај о Христос сине воскреснимо сар „о прво таро адала со муле“. Ма бистре кај јавера, сар сој о Лазар, сине воскресниме те живинен ки Пхув. Ама, о Исус сине о прво со сине воскреснимо таро муле сар духовно личност хем добинѓа вечно живото. Ов шај те спорединел пе сар о прва плодија тари жетва со о Израелција дена сине сар жртва е Девлеске. Освен адава, адалеа со о Исус тано „о прво“, о Павле мангља те вакерел кај јавера да мануша пало Исус ка воскреснинен те живинен ко небо. О апостолија хем о јавера сој тане „ко јекхипе е Христосеа“ ка овен воскресниме те живинен ко небо сар о Исус.

17. Кеда ка воскреснинен ко небо окола сој тане ко јекхипе е Исусеа?

¹⁷ Кеда о Павле пишинѓа е Коринќаненге, о воскресение ко небо околенге сој „ко јекхипе е Христосеа“ панда на почминѓа. Наместо адава, о Павле откринела кај адава ка исполнинел пе ки иднина. Ов вакерѓа: „Секој ко пло редо: О Христос сар прво, а пало адава адала со припадинена е Христосеске џикоте трајнела лескири присутност“ (1. Кор. 15:23; 1. Сол. 4:15, 16). Авдиве амен живинаја ки адаја пророкујми „присутност“ е Христосескири. О апостолија хем о јавера помазиме христијања кола со муле мора сине те аџикерен џи е Христосескири присутност те шај те добинен и небесно награда хем те овен ко „јекхипе [е Исусеа] ко воскресение слично сар лескоро“.

18. а) Соске шај те вакера кај ка овел панда јекх воскресение пало адава сој ко небо? б) Спрема 1. Коринќаните 15:24-26, со ка случинел пе ко небо?

¹⁸ Со ка овел са е верна христијаненцар со нане лен надеж те живинен ко небо е Христосеа? Лен да иси лен надеж ко воскресение. И Библија вакерела кај о Павле хем о јавера кола со џана ко небо тане окола со иси лен дело ко прво воскресение (Отк. 20:6). Акава сикавела кај ка овел панда јекх воскресение. Адава тано ко склад адалеа ко со верујнела сине о Јов (Јов 14:15). „Адала со припадинена е Христосеске џикоте трајнела лескири присутност“ ка овен ко небо е Исусеа кеда ка уништинел са о владе хем саринен со иси лен авторитети хем моќ. Чак „о последно душмани, о мерибе“ ка овел уништимо. Сигурно, сарине окола со ка воскреснинен ко небо никогаш нане те мерен. Ама, со ка овел околенцар со нане лен надеж те живинен ко небо? (Читин 1. Коринќаните 15:24-26.)

19. Со шај те очекујнен адала со иси лен надеж те живинен ки Пхув?

¹⁹ Со шај те очекујнен адала со иси лен надеж те живинен ки Пхув? Олен шај те овел лен надеж темелими ко адава со вакерѓа о Павле: „Хем иси ман надеж... кај о Девел ка воскреснинел околен сој праведна хем околен со нане праведна“ (Дела 24:15). Џанѓола пе кај нијекх неправедно мануш нашти те џал ко небо, адалеске акала лафија сикавена кај ки иднина ка овел воскресение ки Пхув.

20. Сар акаја статија керѓа позорали тли надеж ко воскресение?

²⁰ Сигурно ка овел воскресение! Адала со ка воскреснинен ки Пхув ка овел лен надеж те живинен вечно. Шај те овел тут доверба кај акава ветување ка исполнинел пе. Акаја надеж шај те дел тут утеха кеда размислинеа башо тле мангле со муле. Ола шај те овен воскресниме џикоте о Христос хем о јавера ка владинен „сар царија... 1.000 берша“ (Отк. 20:6). Туте да шај те овел тут надеж кај ако муљан англедер те почминел акава време, ка воскреснине. Акаја „надеж нане те разочаринел амен“ (Рим. 5:5). Акаја надеж ка икерел тут те ачхове зорало хем ка керел тут побахтало џикоте служинеа е Јеховаске. Ки следно статија ка дикха со шај панда те сикљова таро 1. Коринќаните 15 поглавје.