1-2. Koja šuži nada isi len e Jehovase sluge?

I NADA tani but važno. Disave manuša nadinena pe so ka ovel len bahtalo brako, so ka barjaćeren e ćhaven kola ka oven saste hem so ka saćon ando bare nabormipa. Amen šaj mangaja ista buća. Ama, amen nadinaja amen disose soj tano pobaro odolestar. Amen nadinaja amen so ka živina večno hem so amare mangle kola mulje ka uskrsninen.

² O apostol Pavle vaćerđa: „Isi man nada... so o Devel ka uskrsnini hem okolen soj tane pravedna hem okolen soj tane nepravedna“ (Dela 24:15). O Pavle na hine prvo kova vaćerđa ando uskrsenje. Hem o patrijarh Jov vaćerđa ando odova. Ov hine sigurno so o Devel ka setini pe upro leste hem so ka irini le palem ko životi (Jov 14:7-10, 12-15).

3. Sar o 15. poglavlje andi 1. Korinćanima šaj te ohrabrini amen?

³ „O uskrsenje kotar o mule“ tano deo ando „temelj“ ja „o osnovno sikljovibe“ ando odova ko so verujinena o hrišćanija (Jevr. 6:1, 2). O Pavle vaćerđa ando uskrsenje ko 15. poglavlje andi 1. Korinćanima. Odova so pisinđa, sigurno ohrabrinđa e hrišćanen ko prvo veko. Isto ađahar, odova poglavlje šaj hem amen te ohrabrini hem te zorjaćeri amari nada, bizo obzir kobor dugo verujinaja ko uskrsenje.

4. Sose šaj te ova uverime so amare mangle kola mulje ka uskrsninen?

⁴ O uskrsenje ando Isus Hrist, uverini amen so amare mangle kola mulje sigurno ka uskrsninen. O uskrsenje ando Isus Hrist hine deo andi „šukar vest“ kolatar o Pavle vaćerđa e hrišćanenđe ko Korint (1. Kor. 15:1, 2). U stvari, ov phenđa so ako jekh hrišćanin sumnjini ko e Hristeso uskrsenje, tegani olesi vera tani uzaludno (1. Kor. 15:17).  I vera ko e Isuseso uskrsenje tani temelj asi amari nada.

5-6. So značinena amenđe o lafija andi 1. Korinćanima 15:3, 4?

⁵ Ked pisinđa ando uskrsenje, o Pavle najangleder vaćerđa ando trin buća. Sar prvo, „o Hrist mulo aso amare grehija.“ Sar dujto, „ov hine parumo.“ Hem sar trito, „ov uskrsninđa ko trito dive, sar so pisini ko Lil.“ (Čitin 1. Korinćanima 15:3, 4.)

⁶ So e Isuseso meribe, parujbe hem uskrsenje značini amenđe? O prorok Isaija pisinđa so o Mesija ka ovel „silaja... ikaldo andi phuv e đivdengi“ hem so olese hine pripremimo „o grobo maškaro zločincija.“ Ama, ka desini pe pana diso. O Isaija pana phenđa so o Mesija ka akhari „o grehija ando but manuša.“ Odova o Isus ćerđa ađahar so dinđa po životi sar otkupnina (Is. 53:8, 9, 12; Mat. 20:28; Rimlj. 5:8). Odolese, e Isuseso meribe, parujbe hem uskrsenje dena amenđe zoralo temelji asi amari nada so ka ova oslobodime ando greh hem meribe hem so palem ka dikha amare manglen kola mulje.

7-8. Sose o hrišćanija šaj te oven uverime so o Isus uskrsninđa?

⁷ Amari nada ko uskrsenje temeljini pe ko e Isuseso uskrsenje. Odolese, mora te ova uverime so o Isus ćaće uskrsninđa. Sose šaj te ova sigurna so o Jehova ćaće irinđa e Isuse ko životi?

⁸ Odolese so hine but svedokija kola dikhlje odova hem kola šajinđe te potvrdinen so o Isus ćaće uskrsninđa (1. Kor. 15:5-7). O prvo svedoko kas o Pavle pominđa hine o apostol Petar (Kifa). I grupa ando učenikija potvrdinđe so o Petar dikhlja e Isuse kova uskrsninđa (Luka 24:33, 34). Isto ađahar, e Isuse dikhlje hem avera apostolija palo odova so uskrsninđa. Palo odova, o Hrist „pojavinđa pe anglo pobuter ando 500 phralja ko isto vreme“, šaj ki Galileja ked reslje pe ko radosno događaj, sar so pisini ko Matej 28:16-20. O Isus pojavinđa pe hem e Jakovese, pe poluphralese, kova angleder na verujinđa soj tano o Isus, o Mesija (Jov. 7:5). Ama ked dikhlja e Isuse kova uskrsninđa, tegani verujinđa. Zanimljivo tano so oko 55. berš ki nevi era, ked o Pavle pisinđa odova lil, but manuša kola dikhlje odova uskrsenje hine đivde, so značinđa so svako kova hine le sumnja so o Isus uskrsninđa, šajinđa te vaćeri nekasa ando odola svedokija odolestar.

9. Sar premalo Dela apostolska 9:3-5, hem o Pavle šajinđa te potvrdini so o Isus uskrsninđa?

⁹ Kasnije, o Isus pojavinđa pe hem e Pavlese (1. Kor. 15:8). O Pavle, tegani o Savle, hine ko drumo aso Damask ked šunđa o glaso ando Isus kova uskrsninđa hem ked dikhlja i vizija andi olesi nebesko slava. (Čitin Dela apostolska 9:3-5.) Odova so o Pavle doživinđa hine pana jekh dokaz so e Isuseso uskrsenje nane samo jekh izmislimi paramiz (Dela 26:12-15).

10. Ko so o Pavle hine podstaknimo sebepi so hine uverimo so o Isus uskrsninđa?

¹⁰ Disavenđe hine but važno so o Pavle potvrdinđa so o Isus uskrsninđa sose ov angleder progoninđa e hrišćanen. Ked uverinđa pe so o Isus uskrsninđa, o Pavle dinđa sa pestar te uverini hem averen ko odova. Ði propovedinđa averenđe ando odova so o Isus mulo hem so palem tano đivdo, ov nekobor putija hine mardo, hine ko phanlipe hem doživinđa brodolom (1. Kor. 15:9-11; 2. Kor. 11:23-27). Ov hine odobor uverimo so o Isus uskrsninđa, so hine spremno te  merel đi braninđa odova sikljovibe. Da li slažineja tut so odova tano pana jekh dokaz kova uverini amen so o Isus ćaće uskrsninđa hem so hem avera ka uskrsninen ki budućnost?

11. Sose disave hrišćanija ko Korint hine len pogrešna stavija ando uskrsenje?

¹¹ Disave hrišćanija ki grčko diz Korint hine len pogrešna stavija ando uskrsenje. Disave čak mislinđe so na postojini o „uskrsenje ando mule.“ Sose? (1. Kor. 15:12). O filozofija ki Atina asandilje ked šunđe odova sikljovibe so o Isus uskrsninđa. Olenge stavija šaj utičinđe ko disave manuša ko Korint (Dela 17:18, 31, 32). Avera mislinđe so o uskrsenje valjani te haljol pe ko simbolično način, so i osoba hine „muli“ ano greho ama „oživinđa“ ked ulji hrišćanin. Kova god razlog te ovel, odova so phenđe so uskrsenje nane moguće, mothovđa so olengi vera hine uzaludno. Ako o Devel na uskrsninđa e Isuse, i otkupnina nane platimi hem o grehija našti te oven oprostime. Odolese, okola kola odbacinđe o uskrsenje na hine len pravo nada (1. Kor. 15:13-19; Jevr. 9:12, 14).

12. Sar premali 1. Petrova 3:18, 22, e Isuseso uskrsenje hine averćhane ando avera uskrsenja kola hine angleder?

¹² O Pavle najšukar đanđa so o „Hrist uskrsninđa ando mule.“ Odova uskrsenje hine pošukar ando bilo kova uskrsenje kova hine angleder, sose sare kola uskrsninđe angleder, palem mulje. O Pavle vaćerđa so o Isus „prvo uskrsninđa ando okola kola mulje.“ Sar o Isus hine prvo? Ov hine prvo kova uskrsninđa sar duhovno osoba hem prvo kova đelo ko nebo. (1. Kor. 15:20; Dela 26:23; čitin 1. Petrova 3:18, 22.)

13. Andi koja razlika o Pavle vaćerđa maškaro Adam hem o Isus?

¹³ Sar o meribe ando jekh manuš šaj te omogućini o životi aso milionija manuša? O Pavle dinđa logično odgovor ko akava pućibe. Ov vaćerđa ando odova koja razlika isi maškaro odova so ćerđa o Adam hem odova so ćerđa o Hrist. Ked vaćerđa ando Adam, ov phenđa: „O meribe alo prekalo manuš.“ Ked grešinđa, o Adam kokri pes hem pe potomkonen osudinđa ko meribe. Hem avdije amen osetinaja o lošna posledice sebepi so o Adam na hine poslušno e Devlese. Ama, sebepi odova so o Devel uskrsninđa pe Ćhave, amen ađićeri but šuži budućnost. „O uskrsenje ando mule avela prekalo manuš“, prekalo Isus. O Pavle ko krajo phenđa: „Sar so sare merena sebepi o Adam, ađahar sebepi o Hrist sare ka uskrsninen“ (1. Kor. 15:21, 22).

14. Da li o Adam ka uskrsnini? Objasnin.

¹⁴ So o Pavle mislinđa ked phenđa so „sare merena sebepi o Adam?“ Verovatno vaćerđa ando e Adamese potomkija kola merena sose nasledinđe o greh hem i nesavršenost ando Adam (Rimlj. 5:12). O Adam nane maškaro okola kola „ka uskrsninen.“ E Isusesi otkupno žrtva na ućhari e Adameso greh, sose ov hine savršeno manuš kova svesno na hine poslušno e Devlese. E Adame ađićeri isto odova so ađićeri hem okolen kas o „manušikano Ćhavo“ ka prosudini sar „jarcija“, a odova ka ovel „večno meribe“ (Mat. 25:31-33, 46; Jevr. 5:9).

15. Upro kaste o Pavle mislinđa ked phenđa so „sebepi o Hrist sare ka uskrsninen?“

¹⁵ Zapazin so o Pavle phenđa so „sebepi o Hrist sare ka uskrsninen“ (1. Kor. 15:22). E  Pavleso lil hine pisimo e pomazano hrišćanenđe ko Korint kola ka uskrsninen ko životi ko nebo. On hine „posvetime ko jekhipe e Hristeja Isuseja, vićime te oven sveta.“ O Pavle vaćerđa hem ando okola „kola mulje ko Hrist“ (1. Kor. 1:2; 15:18; 2. Kor. 5:17). Ko jekh aver lil, o Pavle pisinđa so okola kola tane ko „jekhipe oleja ko meribe kova tano sar oleso“ ka oven ko „jekhipe oleja hem ko uskrsenje kova tano sar oleso“ (Rimlj. 6:3-5). O Isus uskrsninđa sar duhovno osoba hem đelo ko nebo. Ađahar ka ovel hem sarinencar kola tane „ko jekhipe e Hristeja“, okolencar kola tane pomazime.

16. Ko so o Pavle mislinđa ked phenđa so o Isus tano „prvina“?

¹⁶ O Pavle pisinđa so o Hrist „prvo uskrsninđa ando okola kola mulje.“ Valjani te ićera ki godi so avera, sar so hine o Lazar, hine uskrsnime ko životi ki phuv, ama o Isus hine prvo kova uskrsninđa sar duhovno osoba hem dobinđa večno životi. Odolese o Pavle uporedinđa e Isuse odoleja so o Izraelcija dinđe e Devlese, o prvine andi žetva. Odoleja so vićinđa e Isuse „prvina“, o Pavle mothovđa so palo Isus, hem avera ka uskrsninen ko životi ko nebo. Odola tane o apostolija hem avera kola tane „ko jekhipe e Hristeja.“ Ko vreme kova tano odredimo, on ka uskrsninen ko nebo sar o Isus.

17. Ked okola kola tane „ko jekhipe e Hristeja“ ka dobinen pi nebesko nagrada?

¹⁷ Ked o Pavle pisinđa e hrišćanenđe ko Korint, o uskrsenje ando okola kola tane „ko jekhipe e Hristeja“ pana na počminđa. Umesto odova, o Pavle mothovđa so odova ka ovel ki budućnost ked phenđa: „Ama svako premalo redo: prvo o Hrist, a palo odova, đi trajini olesi prisutnost hem okola kola tane e Hristese“ (1. Kor. 15:23; 1. Sol. 4:15, 16). Avdije, amen živinaja ko vreme andi e Hristesi prisutnost. O apostolija hem avera pomazime hrišćanija kola mulje dobinđe pi nebesko nagrada hem hine „ko jekhipe e [Isuseja] hem ko uskrsenje kova tano sar oleso.“

18. (a) So pomožini amen te haljova so ka ovel pana jekh uskrsenje palo odova so ka ovel o uskrsenje ko nebo? (b) Premali 1. Korinćanima 15:24-26, so ka ovel ko nebo?

¹⁸ Ama, so ka ovel okolencar kola aćhilje verna a kola na nadinena pe so ka živinen  e Hristeja ko nebo? Hem on nadinena pe so o uskrsenje ka ovel. I Biblija phenela so o Pavle hem avera kola đana ko nebo „prva ka uskrsninen“ (Fil. 3:11). Odova mothovi so ka ovel pana jekh uskrsenje kova tano povezimo odoleja so o Jov vaćerđa andi pi budućnost (Jov 14:15). „Okola kola tane e Hristese“ đi trajini olesi prisutnost ka oven e Isuseja ko nebo ked ov ka uništini svako vladavina, svako vlast hem sila. Tegani ka ovel uništimo hem „o poslednjo dušmani... o meribe.“ Sare kola uskrsninđe ko životi ko nebo niked na ka meren. Ama, so ka ovel averencar? (Čitin 1. Korinćanima 15:24-26.)

19. So ka ovel okolencar kola nadinena pe so ka živinen ki phuv?

¹⁹ So ka ovel okolencar kola nadinena pe so ka živinen ki phuv? Olengi nada temeljini pe ko e Pavlese lafija: „Isi man nada... so o Devel ka uskrsnini hem okolen soj tane pravedna hem okolen soj tane nepravedna“ (Dela 24:15). Jasno tano so o nepravednikija našti te đan ko nebo. Odolese akala lafija odnosinena pe ko uskrsenje ki phuv kova ka ovel ki budućnost.

20. Sar šaj te zorjaćera amari nada ko uskrsenje?

²⁰ Amen hijam sigurna „so o Devel ka uskrsnini hem okolen soj tane pravedna hem okolen soj tane nepravedna!“ Okola kola ka uskrsninen ko životi ki phuv ka ovel len mogućnost te živinen večno. Šaj te ove sigurno so odova ka ovel. Odija nada ka utešini tut ako našalđan nekas kas but mangljan. On ka uskrsninen đi o Hrist hem olese suvladarija „ka vladinen sar kraljija... 1 000 berš“ (Otkr. 20:6). Hem tu šaj te ove uverimo so ka uskrsnine ako ka mere angleder e Hristesi hiljadaberšengi vladavina. Akija „nada niked na ka razočarini amen“ (Rimlj. 5:5). Oj šaj te pomožini tuće te aćhove zoralo hem radosno đi služineja e Jehovase. Ama, isi pana diso so šaj te sikljova ando 15. poglavlje ki prva Korinćanima. Odolestar ka vaćera ko aver članko.