1-2. Yihowa soqqamaanora hiitti dhagge ikkitanno hexxo noonsa?

HEXXO lowo geeshsha hasiisanno coyeeti. Mitu manni dancha galte heedhansara, ooso danchu garinni lossiˈrate woy waadannonsa dhibbinni woyyimma afiˈrate hexxanno. Ninke Kiristaanuno kuri coye hexxineemmoha ikkara dandaanno. Ikkirono kawiichinni sainohu baalunku coyinni roore hexxineemmori no; kunino albillitte ninkeno ikko shiiˈnoommori reyotenni kaˈeenna hegerera heeˈrate hexxooti.

² Soqqamaasinchu Phaawuloosi, “Maganu cubbaataammanna keeraano reyotenni kayisanno hexxo afiˈroommo” yiino. (Soq. 24:15) Umo kaote hexxo daafira coyiˈrinohu Phaawuloosi calla diˈˈikkino. Iyyoobino coyiˈrino. Isi Maganu qaagannositanna wirro heeshsho aannosita addaxxino.—Iyo. 14:7-10, 12-15.

3. Umi Qorontoosi 15 kaaˈlitannonke yineemmohu mayiraati?

³ “Reyotenni kaˈˈa” Kiristaanu rosi baalaho ‘xintu’ woy ‘umi rosi’ widooti. (Ibi. 6:1, 2) Phaawuloosi 1 Qorontoosi 15 te kaote daafira borreessino. Isi borreessinori umi xibbi diri Kiristaana jawaachishinoti dihuluullissannote. Tini fooliishsho ninkeno jawaachishshannonke; hattono hexxonke kaajjishshanno.

4. Shiiˈnoommori kaˈannota huluullammeemmokkihu mayiraati?

⁴ Yesuusi Kiristoosi kao, shiiˈnoommori reyotenni kaˈannota addaxxineemmo gede assitannonke. Kiristoosi kao Phaawuloosi Qorontoosi mannira kulinohu ‘danchu duduwi’ widooti. (1 Qor. 15:1, 2) Isi Kiristaanu kao noota ammanannokkiha ikkiro, ammanansa waagu nookkita ikkitinota  coyiˈrino. (1 Qor. 15:17) Yesuusi kainota ammananke wolootuno kaˈannota ammanneemmo gede assitannonke.

5-6. Umi Qorontoosi 15:3, 4te noo hedo kaaˈlitannonkehu hiittoonniiti?

⁵ Phaawuloosi kaote daafira borreessi woyite sase halaale qummi assino; insano (1) “Kiristoosi ninke cubbi daafira [reyasi],” (2) ‘waamamasi,’ (3) “qullaawa borro giddo yinoonninte gede sayikki barra reyotenni” kaˈˈasiiti.—1 Qorontoosi 15:3, 4 nabbawi.

⁶ Yesuusi reyasi, waamamasi hattono reyotenni kaˈˈasi ninke kaaˈlitannohu hiittoonniiti? Masaalaanchu Isayaasi Mesihicha ‘shinannisitanna madaarrannisita’ masaalino. Hattono Mesihichu lowo manni cubbo duqqannota masaalino. Yesuusi hatto assinohu heeshshosi wodote kakkalo asseeti. (Isa. 53:8, 9, 12; Mat. 20:28; Rom. 5:8) Konnira Yesuusi reyo, waamamasinna kaˈˈasi cubbunna reyotenni keere fulatenna shiiˈnoommori ledo wirro heeˈrate hexxo heedhannonke gede assitinonke.

7-8. Kiristaanu Yesuusi reyotenni kainota ammananno gede kaaˈlannonsari maati?

⁷ Kaote hexxonke Yesuusi kao ledo xaado afidhino daafira, Yesuusi kainota ammana hasiissannonke. Yihowa Yesuusa reyotenni kayisinosita huluullammeemmokkihu mayiraati?

⁸ Yesuusi kainota illensanni laˈinorinna tenne wolootaho kultinori lowo naqaashshe no. (1 Qor. 15:5-7) Phaawuloosi kulinori giddo umi naqaashshe Pheexiroosiiti (Keefa). Soqqamaasine Yesuusi reyotenni kainota Pheexiroosi lainota coyidhino. (Luq. 24:33, 34) Hattono “tonaa lame rosaanosi” Yesuusi reyotenni kainota laˈino. “Hakkunni gedensaannino onte xibbe roortino rosaanora mitte hige leellino.” Insara leellinohu Maatewoosi 28:16-20te kulloonni garinni Galiilaho gamba yite heedheenna ikkara dandaanno. Hattono Yesuusi “Yaiqoobira leellino.” Isi Yesuusira maaˈne rodoo ikkikki digatino; hattono umi qara Yesuusi Mesihicha ikkinota diammanino. (Yoh. 7:5) Yaiqoobi Yesuusi reyotenni kainota laihu gedensaanni ammanino. Phaawuloosi 55 M.D. balla tenne sokka borreessi woyite, Yesuusi reyotenni kainota illensanni lainohu lowo manni lubbote no; konnira Yesuusi reyotenni kainota huluullamannohu heeˈriro, kainota laino manni kulansara dandaanno.

9. Phaawuloosi Soqqamaasinete Looso 9:3-5 coyiˈrinori, Yesuusi reyotenni kainota huluullammeemmokki gede assannonkehu hiittoonniiti?

⁹ Gedensaanni Yesuusi Phaawuloosirano leellino. (1 Qor. 15:8) Phaawuloosi (Saawuli) Demaasiqo haˈranni doogo heeˈre reyotenni kainohuta Yesuusi huuro macciishsino; hattono ajuujatenni Yesuusira iima noosi ayirrinye laino. (Soqqamaasinete Looso 9:3-5 nabbawi.) Tini Yesuusi kao maatto ikkitinokkita ledde buuxissanno tajeeti.—Soq. 26:12-15.

10. Phaawuloosi Yesuusi reyotenni kainota ammanasi ma assano gede assitinosi?

¹⁰ Phaawuloosi alba Kiristaana shorrannoha ikkino daafira, isi farciˈrannori mitu mannira dhagge ikkinonsa. Isi Yesuusi reyotenni kainota ammanihu gedensaanni, wolootuno konne halaale ammantanno gede diinaggaawe sabbakkino. Phaawuloosi gannonnisiha, usurroonnisiha, hattono markaawete dano iillitinosiha ikkirono, Yesuusi ree reyotenni kainota cince sabbakino. (1 Qor. 15:9-11; 2 Qor. 11:23-27) Phaawuloosi Yesuusi reyotenni kainota ammanino daafira, shinannisita nafa waajjikkinni sabbakino. Tini atino Yesuusi reyotenni kainota ammanatto gede  diassitannohe? Qoleno kaote hexxo albinni roore ammanatto gede diassitannohe?

11. Mitu Qorontoosi heeˈranno mannira kaote daafira, gara ikkitinokki lao noonsahu mayira ikkara dandaanno?

¹¹ Giriikete katamira Qorontoosi heeˈrannohu mitu mannira kaote daafira, gara ikkitinokki lao noonsa; mitu isinni “Reyotenni kaˈˈa dino” yitanno. Insa hatto yitannohu mayiraati? (1 Qor. 15:12) Wolu Giriikete katamira Ateensi heedhannoti mite fullahaasine, Yesuusi reyotenni dikaino yite qacifattanno. Tini Qorontoosi heeˈrannohu mitu mannira hattoo lao heedhannonsa gede assitukkinni digattino. (Soq. 17:18, 31, 32) Wolootu kao lawishshu yaattotilla, yaano mittu manchi cubbunni kainohunni “reyino,” Kirisataana ikkanno woyite kayinni “kaˈˈanno” yite heddannoha ikkara dandaanno. Kuni manni baxire coyiˈrirono kao noota ammanannokkiha ikkiro, ammanansa mulla daafurooti. Maganu Yesuusa reyotenni kayisinokkiha ikkiro, cubbinsara wodo baantoonnikki daafira insa cubbu giddo no. Konni daafira, kao ammantannokkirira addu hexxo dinonsa.—1 Qor. 15:13-19; Ibi. 9:12, 14.

12. Umi Pheexiroosi 3:18, 22 kultanno garinni, Yesuusi kao isi reyara albaanni reyotenni kaino manni kaonni baxxitannohu hiittoonniiti?

¹² Phaawuloosi umisi ‘Kiristoosi reyotenni kainota’ afino. Yesuusi kao alba uullate aana reyotenni kae wirro reyino manni kaonni baxxitinote. Phaawuloosi Yesuusi “reyitinorira reyotenni kaˈˈate umiha ikke” reyotenni kainota coyiˈrino. Yesuusi umiha ikkinohu hiitte doogonniiti? Umo reyotenni kae ayyaanunni heeshshonniha ikkinohu Yesuusaati; qoleno mannu ooso giddonni umo iimira haˈrinohu isooti.—1 Qor. 15:20; Soq. 26:23; 1 Pheexiroosi 3:18, 22 nabbawi.

13. Phaawuloosi Addami assinore Yesuusi assinori ledo heewisiisinohu hiittoonniiti?

¹³ Mittu manchi reyo lowo miliyoone ikkano manni heeshsho afiˈranno gede assitannohu hiittoonniiti? Phaawuloosi tenne xaˈmora ammansiissanno dawaro qolino. Isi, Addaami mannu oosora abbinore Kiristoosi mannu oosora assara dandaannori ledo heewisiisino. Phaawuloosi “Reyo dagginohu mittu manchi Addaami widoonni” ikkinota borreessino. Addaami cubbo loose umisiranna sirchisira reyo abbino. Xaa geeshsha buuto qarrammanni heeˈnoommohu Addaami Maganoho hajajama giwe abbinorinniiti. Ikkollana, Maganu Beettosi reyotenni kayisino daafira, albillitte kaajja hexxo noonke. Phaawuloosi “reyo dagginohu mittu manchi Addaami widoonni” ikkinonte gede, “Reyotenni kaˈˈano dagginohu mittu manchi Kiristoosi widoonniiti” yee coyiˈrino.—1 Qor. 15:21, 22.

14. Addaami reyotenni kaˈˈanno? Xawisi.

¹⁴ Phaawuloosi “Addaaminni kainohunni mannu baalunku reyanno” yiinohu mayyaateeti? Phaawuloosi hatto yiinohu Addaamiwiinni cubbonna guuntete xeˈne ragiˈrinoha Addaami sircho kulateeti; insa reyansa digattanno. (Rom. 5:12) Addaami “heeshsho” afidhannori wido diˈˈikkino. Addaami umo guuta manchooti; isi afanni heeˈre Maganoho hajajama giwino daafira Kiristoosi wodo Addaami cubbo dihayishshitanno. Manchi Beetti ‘meˈˈeho’ yee yoo yaannorino, Addaaminte gede “hegerera” baˈanno.—Mat. 25:31-33, 46; Ibi. 5:9.

15. Mannu “baalu” heeshsho afiˈranno yiniri giddo gamu ayeooti?

¹⁵ Phaawuloosi “Kiristoosi widoonni mannu baalu heeshsho afiˈranno” yiinota qaango. (1 Qor. 15:22) Phaawuloosi tenne sokka borreessinohu, Qorontoosi heeˈrannohu  buuramino Kiristaaniraati; insa iima heeˈrate kaˈanno. Kuni Kiristaani ‘Yesuusi Kiristoosinni qullaawootahonna qullaawoota ikkate woshshantinoreeti.’ Phaawuloosi kuni Kiristaani ‘Kiristoosa ammane heeˈre reyinota’ xawisino. (1 Qor. 1:2; 15:18; 2 Qor. 5:17) Isi wole qullaawu ayyaaninni borreessino sokkara, “Reyosinni [Yesuusi] ledo mitto” ikkitinori, “kaosinnino isi ledo mitto” ikkitannota coyirino. (Rom. 6:3-5) Yesuusi reyotenni ayyaanu biso ikke kae iimira haˈrino. Konnira, ‘Kiristoosi ledo mitto ikkitinori’ buurantino Kiristaani baalu reyotenni ayyaanu biso ikkite kaˈe iimira hadhanno.

16. Phaawuloosi Yesuusi ‘reyotenni kaˈˈate umiho’ yaasi mayyaate?

¹⁶ Phaawuloosi “Kiristoosi reyitinorira reyotenni kaˈˈate umiha” ikkinota borreessino. Hakkuyira albaanni Alaazaarinna wolootu reyotenni kaˈinoha ikkirono, ayyaana ikke kae umo hegere heeshsho afiˈrinohu Yesuusa ikkinota qaango. Phaawuloosi Yesuusi kao Israeele Maganoho shiqqishshannohu umi laalchi ledo heewisiisino. Qoleno Phaawuloosi Yesuusa reyotenni kaˈˈate ‘umiho’ yaasi, wolootuno hakkuyi gedensaanni iima heedhara reyotenni kaˈannori noota leellishshanno. Soqqamaasinenna ‘Kiristoosinni heeˈrinohu’ wolu manni Yesuusi gedensaanni reyotenni kaˈˈanno. Insa yanna iillituro, Yesuusi gede ayyaana ikkite iima heeˈrate kaˈanno.

17. ‘Kiristoosinni heedhinori’ iimi baˈlattonsa adhitannohu mamooteeti?

¹⁷ Phaawuloosi Qorontoosi heeˈranno Kiristaanira sokka boorreessi yannara ‘Kiristoosinni heedhinori’ iimi heeshsho afiˈrate kaˈˈa dihanaffino. Hatteentenni Phaawuloosi kuni coyi albillitte ikkannota coyiˈrino; isi togo yiino: “Kuni ikkannohuno bado badosinniiti: Umiha ikke Kiristoosi kaˈˈanno; isi daanno [“leellanno,” NW] woyite isire ikkitinori kaˈanno.” (1 Qor. 15:23; 1 Tes. 4:15, 16) Balanxe masaalloonni garinni xa Yesuusi leelle noo yannara heeˈnoommo. Soqqamaasinenna ayyaanunni buurante heedhe reyitino Kiristaani reyotenni kaˈe iimi baˈlattonsa adhatenna ‘kaosinni isi ledo mitto ikkate’ Yesuusi leellanno geeshsha agadha hasiissinonsa.

18. (a) Iimi kao gedensaanni wole kao no yineemmohu mayiraati? (b) Umi Qorontoosi 15:24-26 Kultanno garinni iima mayi ikkanno?

¹⁸ Iima Kiristoosi ledo heeˈrate hexxo noonsakkiri ammanamino Kiristaani baalunku  hexxo maati? Insarano kaote hexxo noonsa. Qullaawu Maxaafi Phaawuloosinna wolootu iima heeˈrate hexxo noonsari ‘reyotenni umo kaˈannota’ kulanno. (Aju. 20:6) Tini hakkunni gedensaanni wole kao noota leellishshanno. Tini Iyyoobi albillittete heeshshosi daafira coyiˈrino hedo ledo sumuu yitannote. (Iyo. 14:15) Kiristoosi roorroota, gashshaanonna wolqaataamma baala hunanno yannara “isire ikkitinori” ledosi iima heedhanno. ‘Goofimarchu diina ikktinoti reyo’ nafa baˈanno. Iima heeˈrate kaˈannori galagalte reyitannokkiti egennantinote. Wolootuna?—1 Qorontoosi 15:24-26 nabbawi.

19. Uullate aana heeˈrate hexxo noonsari maa hexxa dandiitanno?

¹⁹ Uullate aana heeˈrate hexxo noonsari maa hexxa dandiitanno? Insano Phaawuloosi togo yee coyiˈrinore hexxa dandiitanno: “Maganu cubbaataammanna keeraano reyotenni kayisanno hexxo afiˈroommo.” (Soq. 24:15) Cubbaataammu iimira haˈra dandiitannokkiti egennantinote; konnira Phaawuloosi kowiicho coyiˈranni noohu uullate aana heeˈrate kaˈˈanno manni daafiraati.

20. Kaote hexxo kaajjite heeˈratto gede kaaˈlitinohehu hiittoonniiti?

²⁰ ‘Reyino manni reyotenni kaˈˈannoti’ dihuluullissannote! Uullate aana heeˈrate reyotenni kaˈannorira kowiicho hegerera heeˈrate hexxo noonsa. Tini hexxo woˈmitannota addaxxa dandaatto. Shiirootto manna qaagatto woyite tini hexxo sheshifachishshahera dandiitanno. Kiristoosinna isi ledo gashshitannori wolootu ‘kume diro mookkanno’ yannara insa reyotenni kaˈara dandiitanno. (Aju. 20:6) Atino Kiristoosihu Kumu Diri Gashshooti hanafara albaanni reyittoro reyotenni kaˈˈattota addaxxa dandaatto. Tini “hexxo diˈˈirraawissannonke.” (Rom. 5:5) Tini hexxo xaa yannara kaajjite heeˈratto gedenna Maganoho albinni roore hagiirrunni soqqamatto gede kaaˈlitannohe. Umi Qorontoosi fooliishsho 15te noo hedonni ronseemmohu wolurino no; aananno birxichira tenne daafira ronseemmo.