1-2. Sortu moi howpu anbegiman fu Yehovah abi?

A PRENSPARI fu abi howpu. Son sma e howpu taki den o abi wan koloku trowlibi, taki den pikin fu den o gosontu noso taki den o kon betre fu wan seryusu siki di den abi. Kande wi wani den srefi sani disi tu. Ma toku wi e howpu tapu wan moro prenspari sani. Wi e howpu taki wi o libi fu têgo èn taki wi o si den lobiwan fu wi di dede, baka.

² Na apostel Paulus taki: „Mi abi a howpu taki Gado sa gi wan opobaka na den sma di du san reti èn na den sma di no du san reti” (Tori 24:15). Paulus no ben de a fosi sma di taki fu na opobaka. A famiri-edeman Yob ben taki fu na opobaka tu. A ben de seiker taki Gado ben o memre en èn taki a ben o tyari en kon na libi baka.​—Yob 14:7-10, 12-15.

3. Fa 1 Korentesma kapitel 15 kan yepi wi?

³ Wan fu den „fosi sani” di wi leri na taki „dede sma o kisi wan opobaka”. A leri disi na a „fondamenti” fu ala den sani di wi leki Kresten e bribi (Hebr. 6:1, 2). Na ini 1 Korentesma kapitel 15 Paulus e taki fu na opobaka. A ben musu fu de so taki den sani di a skrifi ben gi den Kresten fu a ten dati deki-ati. Awinsi o langa yu e bribi kaba na ini na opobaka, den sani di wi o luku na ini a kapitel dati o tranga yu bribi.

4. Fu san ede wi kan de seiker taki den lobiwan fu wi di dede o kisi wan opobaka?

⁴ Na opobaka fu Yesus e meki taki wi de seiker taki den lobiwan fu wi di dede o kisi wan opobaka. Dati ben de „a bun nyunsu” di Paulus ben fruteri den Korentesma  (1 Kor. 15:1, 2). Paulus ben taki srefi dati efu wan Kresten no ben bribi na ini na opobaka, dan a bribi fu en ben de fu soso (1 Kor. 15:17). Fu di Yesus kisi wan opobaka meki wi kan de seiker taki tra sma o kisi wan opobaka tu.

5-6. San wi kan leri fu 1 Korentesma 15:3, 4?

⁵ Di Paulus bigin taki fu na opobaka a ben taki fu dri prenspari sani. Den sani disi na (1) „Krestes dede gi den sondu fu wi.” (2) „Den beri en.” (3) A „kisi wan opobaka na a di fu dri dei soleki fa Gado Buku taki”.​—Leisi 1 Korentesma 15:3, 4.

⁶ Fu san ede a dede, a beri nanga na opobaka fu Yesus prenspari gi wi? A profeiti Yesaya ben taki dati sma ben o „kiri [a Mesias] puru na mindri libisma” èn taki den ben o „meki wan grebi gi en pe den e beri ogriman”. Ma wan tra sani ben o pasa tu. Yesaya ben taki dati a Mesias ben o tyari „den sondu fu furu sma”. Yesus du disi di a gi en libi leki wan lusu-paiman (Yes. 53:8, 9, 12; Mat. 20:28; Rom. 5:8). Sobun, a dede, a beri nanga na opobaka fu Yesus e meki taki wi abi a howpu fu kon fri fu sondu nanga dede èn fu si den lobiwan fu wi di dede, baka.

7-8. Fu san ede Kresten kan de seiker taki Yesus kisi wan opobaka?

⁷ Soleki fa wi si, dan efu wan sma no e bribi taki Yesus kisi wan opobaka, dan a no o bribi tu taki tra sma o kisi wan opobaka. Ma fu san ede wi kan de seiker taki Yehovah gi Yesus wan opobaka?

⁸ Furu sma si Yesus baka di a kisi wan opobaka èn den fruteri trawan taki den si en (1 Kor. 15:5-7). Paulus ben taki dati na apostel Petrus (Seifas) ben de a fosi sma di si Yesus. Wan grupu disipel ben taki tu dati Petrus ben si Yesus (Luk. 24:33, 34). Boiti dati, „den twarfu apostel” si Yesus baka di a kisi wan opobaka. Baka dati Yesus „sori ensrefi na moro leki feifi hondro brada na a srefi ten”. Kande dati ben pasa di den ben kon makandra na ini Galilea soleki fa skrifi na Mateyus 28:16-20. Yesus ben „sori ensrefi na Yakobus” tu. A sori leki en na a afu-brada fu Yesus di no ben bribi fosi taki Yesus na a Mesias (Yoh. 7:5). Di Yakobus si taki Yesus kisi wan opobaka, a ben de seiker taki en na a Mesias. Furu fu den sma di ben si Yesus baka di a kisi wan opobaka ben de na libi ete di Paulus skrifi a brifi disi na ini a yari 55. Sobun, efu wan sma no ben bribi taki Yesus kisi wan opobaka, dan a ben kan taki nanga wan fu den sma disi.

9. Soleki fa Tori fu den apostel 9:3-5 e sori, dan sortu buweisi Paulus ben abi taki Yesus kisi wan opobaka?

⁹ Bakaten Yesus sori ensrefi na Paulus (1 Kor. 15:8). Paulus (Saulus) ben de na pasi e go na Damaskus di a yere a sten fu Yesus di kisi wan opobaka. Na ini wan fisyun a si Yesus na ini hemel. (Leisi Tori fu den apostel 9:3-5.) A sani di miti Paulus ben buweisi tu taki Yesus ben kisi wan opobaka.​—Tori 26:12-15.

10. San Paulus ben du fu di a ben bribi taki Yesus kisi wan opobaka?

¹⁰ Paulus ben frufolgu den Kresten fosi. Sobun, sma ben o wani yere san Paulus ben abi fu taki fu Yesus. Fu di Paulus ben de seiker taki Yesus kisi wan opobaka, meki a ben du ala muiti fu yepi trawan fu bribi disi. A ben preiki fayafaya taki Yesus kisi wan opobaka aladi sma  ben fon en èn aladi den ben poti en na strafu-oso. Wan tu leisi a sipi pe a ben de na ini ben sungu tu (1 Kor. 15:9-11; 2 Kor. 11:23-27). Paulus ben de so seiker taki Yesus ben kisi wan opobaka, taki a ben du ala san a man fu fruteri sma a nyunsu disi, awinsi a ben kan lasi en libi srefi. Wi si taki furu sma si Yesus baka di a kisi wan opobaka. A sani disi no e tranga yu bribi taki Yesus kisi wan opobaka trutru? Wi kan de seiker taki sma o kisi wan opobaka na ini a ten di e kon.

11. Fu san ede son Kresten na ini Korente ben abi wan fowtu denki fu na opobaka?

¹¹ Son Kresten na ini a Griki foto Korente ben abi wan fowtu denki fu na opobaka. Sonwan ben taki srefi dati ’dede sma no o opo baka’ (1 Kor. 15:12). Fu san ede den ben taki dati? Fu di den filosofiaman fu Ateine, wan tra Griki foto, ben spotu den sma di ben bribi taki Yesus ben kisi wan opobaka. A sani disi ben abi krakti tapu den sma fu Korente. A kan taki brada nanga sisa na ini a gemeente ben bigin denki so tu (Tori 17:18, 31, 32). Kande son sma ben denki taki sma ben o kisi wan opobaka na wan agersifasi. A kan taki den ben bribi taki wan sma ben „dede” fu di a abi sondu èn taki a ben o „libi baka” te a ben tron wan Kresten. Awinsi san den ben bribi, efu den no ben bribi taki Yesus kisi wan opobaka, dan den bribi ben de fu soso. Efu Gado no gi Yesus wan opobaka, dan a lusu-paiman no pai èn sma no man kisi pardon fu den sondu. Dati meki den sma di no e bribi na ini na opobaka no abi howpu.​—1 Kor. 15:13-19; Hebr. 9:12, 14.

12. Soleki fa 1 Petrus 3:18, 22 e sori, dan san na a difrenti na mindri na opobaka fu Yesus nanga den tra sma di kon na libi baka fosi en?

¹² Paulus ben sabi taki „Krestes opo baka”. Na opobaka fu Yesus ben betre moro a di fu den tra sma di ben kon na libi baka fosi en. Bakaten den sma dati dede baka. Paulus ben taki dati Yesus na „a fosiwan di kisi wan opobaka”. Fu san ede a taki dati? Fu di Yesus ben de a fosi sma di opo baka leki wan yeye èn en na a fosi sma di kisi wan opobaka fu go libi na hemel.​—1 Kor. 15:20; Tori 26:23; leisi 1 Petrus 3:18, 22.

13. San na a difrenti na mindri Adam nanga Yesus?

¹³ Fa a dede fu wán man o tyari libi gi milyunmilyun sma? Paulus e piki na aksi disi. A sori san pasa nanga libisma fu di Adam sondu èn san na ofrandi fu Yesus du gi libisma. Paulus ben taki: „Na wan libisma tyari dede kon.” Di Adam sondu a tyari dede kon gi ensrefi nanga den bakapikin fu en. Te now ete wi e pina fu di Adam trangayesi Gado. Ma fu di Gado gi en Manpikin wan opobaka, meki wi kan abi wan bun libi na ini a ten di e kon. Dati meki Paulus taki: „Na wan libisma o meki taki dede sma opo baka tu.” A taki moro fara: „Neleki fa ala sma dede fu Adam ede, na so ala sma sa kon na libi baka tu fu Krestes ede.”​—1 Kor. 15:21, 22.

14. Adam o kisi wan opobaka? Fruklari disi.

¹⁴ Paulus taki dati „ala sma dede fu Adam ede”. San disi wani taki? Ala libisma kisi sondu fu Adam èn dati meki den e dede (Rom. 5:12). Adam no o „kon na libi baka”. Fu di Adam trangayesi Yehovah fu espresi, meki a lusu-paiman no  man yepi en. A srefi sani o pasa nanga den sma di „a Manpikin fu libisma” o krutu leki „bokoboko”. Den o „dede fu têgo”.​—Mat. 25:31-33, 46; Hebr. 5:9.

15. Fa wi musu frustan 1 Korentesma 15:22?

¹⁵ Luku taki Paulus taki dati „ala sma sa kon na libi baka tu fu Krestes ede” (1 Kor. 15:22). Paulus ben skrifi a brifi fu en gi den salfu Kresten na ini Korente di ben o kisi wan opobaka fu go libi na hemel. Sobun den srefi de na ini a grupu fu den sma di ’sa kon na libi baka fu Krestes ede’. ’Gado ben meki den kon santa èn den ben de wán nanga Krestes Yesus. Gado ben kari den fu de santa sma.’ Paulus ben taki tu fu den salfuwan „di dede leki disipel fu Krestes” (1 Kor. 1:2; 15:18; 2 Kor. 5:17). Na ini wan tra brifi Paulus ben taki dati den wan di ’dede neleki Yesus, kan de seiker taki den o kisi wan opobaka neleki en. Na a fasi disi den de wán nanga en’ (Rom. 6:3-5). Yesus kon na libi baka leki wan yeye èn a go na hemel. Na dati o pasa tu nanga den wan di „de wán nanga Krestes”. Dati na ala den salfu Kresten.

16. Fu san ede Paulus taki dati Yesus na „a fosiwan di kisi wan opobaka”?

¹⁶ Paulus ben taki: „Fu den wan di dede [Yesus] na a fosiwan di kisi wan opobaka”. Hori na prakseri taki tra sma soleki Lasarus ben kisi wan opobaka na grontapu. Ma Yesus ben de a fosiwan di ben kisi wan opobaka leki wan yeye èn di kisi têgo libi. Wi kan agersi en nanga a fosi nyanyan di den Israelsma ben koti èn di den ben tyari leki ofrandi gi Gado. Boiti dati, Paulus ben taki dati Yesus na „a fosiwan” fu di tra sma ben o kisi wan opobaka tu fu libi na hemel. Den apostel nanga den tra sma di ben „de wán nanga Krestes” ben o kisi wan opobaka fu go libi na hemel neleki Yesus.

17. O ten den sma di „de wán nanga Krestes” bigin kisi wan opobaka fu libi na hemel?

¹⁷ A pisi ten di Paulus skrifi a brifi gi den Korentesma, den sma di ben „de wán nanga Krestes” no ben kisi wan opobaka ete fu go libi na hemel. Paulus ben sori taki a sani disi no ben o pasa wantewante. A ben taki: „Ibri sma o kisi wan opobaka te en ten doro. Krestes kisi wan opobaka leki fosiwan, èn bakaten den wan di de fu Krestes o kisi wan opobaka te a kon baka” (1 Kor. 15:23; 1 Tes. 4:15, 16). Now wi e libi na ini a ten pe Krestes „kon baka”. Fu man ’kisi wan opobaka neleki  Yesus’ èn fu man go na hemel, den apostel nanga den tra salfu Kresten di ben dede ben abi fu wakti teleki a ten disi.

18. (a) Fa wi du sabi taki wan tra opobaka o de, boiti a wan di den salfuwan o kisi? (b) Soleki fa 1 Korentesma 15:24-26 e sori, dan san o pasa na hemel?

¹⁸ Bijbel e taki dati Paulus nanga den trawan di go na hemel „kisi a fosi opobaka” (Openb. 20:6). Disi e sori taki wan tra opobaka o de. Na dati Yob ben bribi (Yob 14:15). „Den wan di de fu Krestes” o de na hemel te Yesus o pori ala den regering na grontapu. Srefi ’dede, a lasti feanti’ a o puru na pasi. Den wan di kisi wan opobaka fu libi na hemel no o dede noiti. Ma fa a de nanga den sma di no abi a howpu fu go na hemel?​—Leisi 1 Korentesma 15:24-26.

19. San o pasa nanga den sma di no abi a howpu fu go na hemel?

¹⁹ Fa a de nanga den sma di no abi a howpu fu go na hemel? Paulus e taki: „Mi abi a howpu taki Gado sa gi wan opobaka na den sma di du san reti èn na den sma di no du san reti” (Tori 24:15). A de krin taki sma di no du san reti no man go na hemel, sobun den wortu disi e sori go na wan opobaka di o pasa na grontapu.

20. Fa na artikel disi tranga yu bribi na ini na opobaka?

²⁰ Wi kan de seiker taki ’Gado o gi sma wan opobaka’! Den sma di o kisi wan opobaka na grontapu o man libi fu têgo. Yu kan bribi a pramisi disi. A howpu disi kan trowstu yu te yu e prakseri den lobiwan fu yu di dede. Den o kisi wan opobaka te Krestes nanga den salfuwan o ’tiri leki kownu wán dusun yari’ (Openb. 20:6). Yu kan de seiker tu taki efu yu dede fosi Yesus bigin tiri den dusun yari disi, yu o kisi wan opobaka (Rom. 5:5). Na opobaka howpu e gi wi deki-ati èn a e meki taki wi kan dini Yehovah nanga prisiri. Ma wi kan leri moro sani fu 1 Korentesma kapitel 15. Wi o luku dati na ini a tra artikel.