1-2. Hal᷊ẹ̌ makạlaherang apa lẹ̌harapengu manga ělang i Yehuwa?

PĚLAHARAPẸ̌ ene sěbạe penting. Pirang katau mělẹ̌harapẹ̌ piạ pẹ̌kakawing maral᷊uasẹ̌, měhiking anạ masehatẹ̌, arau mapia bọu sakị mawěhạ. I kitẹ tau Kristen lai aramanung mělẹ̌harapẹ̌ hal᷊ẹ̌ ene. Katewe, piạ lai lẹ̌harapeng i kitẹ. I kitẹ mělẹ̌harapẹ̌ gunang měbiahẹ̌ kěkalẹ̌ kụ saụ mẹ̌sombang dingangu taumata ikẹ̌kěndagi kitẹ apang seng nate.

² Rasul Paulus naul᷊ị, ”Iạ lai piạ pělaharapẹ̌ su Mawu . . . ene kai taumata nate sarung saụ ipěbiahẹ̌, taumata nihino arau tawe nihino.” (Kis. 24:15) Paulus bal᷊inẹbe taumata humotong nẹ̌bisara soal u taumata nate saụ ipěbiahẹ̌. I Ayub lai bọu nẹ̌bisara hal᷊ẹ̌ ene. I sie mangimang Mawu sarung mẹ̌tahěndung si sie dingangu saụ mapakawiahẹ̌ si sie.​—Ayb. 14:7-10, 12-15.

3. Kawe nụe i kitẹ botonge makaěbạ gunane bọu 1 Korintus pasalẹ̌ 15?

³ Těntiro soal u ”taumata nate sarung saụ ipěbiahẹ̌” ene kai bageang bọu ”dasarẹ̌” arau ”těntiro dasarẹ̌” pẹ̌pangimangengu tau Kristen. (Ibr. 6:1, 2) Paulus nẹ̌bisara soal u pělaharapẹ̌ ini su 1 Korintus pasalẹ̌ 15. Apa niwohẹe ene tantu nakatoghasẹ̌ tau Kristen su abad humotong. Kụ, pasalẹ̌ ene lai sarung makatoghasẹ̌ si kitẹ dingangu makakoạ si kitẹ limembong mangimang su pělaharapẹ̌ seng marěngụ pẹ̌pangimangeng i kitẹ.

4. Kawe nụe i kitẹ botonge mangimang taumata ikẹ̌kěndagi kitẹ apang seng nate sarung saụ ipěbiahẹ̌?

⁴ Ual᷊ingu i Yesus Kristus saụ nipěbiahẹ̌ bọu papate, i kitẹ botonge mangimang taumata ikẹ̌kěndagi kitẹ apang seng nate sarung saụ ipěbiahẹ̌. Ene kai bageang bọu ”habarẹ̌ mapia” lẹ̌habareng i Paulus su tau Korintus. (1 Kor. 15:1, 2) I Paulus naul᷊ị mạeng sěngkatau Kristen tawe mangimang i Yesus saụ nipěbiahẹ̌, pangangimange ene sia-sia. (1 Kor. 15:17) Hakị u ene, mangimang i Yesus saụ nipěbiahẹ̌ bọu papate kai kakungsịu pělaharapu tau Kristen.

5-6. Apa gunane si kitẹ bawera su 1 Korintus 15:3, 4?

 ⁵ Su tětạu wisarane, i Paulus naul᷊ị tatělu fakta ini. Ene kai (1) ”Kristus nate gunang manga dosang i kitẹ.” (2) I sie ”nikubul᷊ẹ̌”. (3) I sie ”saụ nipěbiahẹ̌ su ěllo katělune kere niwohẹ su Binohẹ Susi”.​—Basa 1 Korintus 15:3, 4.

⁶ Apa gunane si kitẹ fakta i Yesus nate, nikubul᷊ẹ̌, bọu ene saụ nipěbiahẹ̌? Nabi Yesaya něněbal᷊ẹ̌ i Mesias sarung ’binasaěng bọu banuang taumata wiahẹ̌’ kụ ”kubul᷊ẹ̌ gunang i sie ene su tal᷊oarang taumata dal᷊akị”. Katewe, piạ hal᷊ẹ̌ wal᷊inẹ lai sarung mariadi. Yesaya naul᷊ị i Mesias sarung mẹ̌bawa ”dosang lawọ taumata”. Yesus někoạ ene su tempong něnadia tatěbusẹ̌. (Yes. 53:8, 9, 12; Mat. 20:28; Rm. 5:8) Hakị u ene, fakta i Yesus nate, nikubul᷊ẹ̌, bọu ene saụ nipěbiahẹ̌, ene nakoạ dasarẹ̌ matoghasẹ̌ gunang pělaharapi kitẹ mawebasẹ̌ bọu dosa dingangu papate kụ saụ mẹ̌sombang dingangu taumata ikẹ̌kěndagi kitẹ apang seng nate.

7-8. Apa nakatul᷊ung tau Kristen mangimang i Yesus kahěngang-hěngang saụ nipěbiahẹ̌?

⁷ Tadeạu mangimang taumata nate kahěngang-hěngang sarung saụ ipěbiahẹ̌, humotong i kitẹ harusẹ̌ mangimang i Yesus seng nipěbiahẹ̌. Kawe nụe i kitẹ botonge mangimang i Yehuwa saụ napakawiahẹ̌ si Yesus?

⁸ Lawọ sahidi nakasilo si Yesus su apang i sie bọu nipěbiahẹ̌. (1 Kor. 15:5-7) Sahidi humotong nisěbạ i Paulus ene kai i Rasul Petrus (Kefas). Pirang katau muritẹ̌ lai naul᷊ị i Petrus nakasilo si Yesus su apang i Yesus saụ nipěbiahẹ̌. (Luk. 24:33, 34) Bọu ene lai, ”12 rasulẹ̌” nakasilo si Yesus su apang i Yesus bọu nipěbiahẹ̌. Bọu ene, Yesus ”nẹ̌sombang dingangu nal᷊iu bọu 500 anạu sěmbaụ su tempo mẹ̌sul᷊ung”, aramanung su peristiwa su Galilea nisěbạ su Matius 28:16-20. Yesus lai ”nẹ̌sombang dingangi Yakobus”, aramanung tuari tiring i Yesus, kụ humotong tawe mangimang i Yesus kai Mesias. (Yoh. 7:5) Su apang bọu nakasilo si Yesus seng saụ nipěbiahẹ̌, Yakobus tantu nangimang. Kụ, su taung 55 M su tempong Paulus němohẹ suratẹ̌ ini, lawọ sahidi apang nakasilo i Yesus saụ nipěbiahẹ̌ bědang ene, hakị u ene taumata apang ragu botonge mẹ̌kiwal᷊o su manga sahidi ene.

9. Kere niwasang i kitẹ su Kisah 9:3-5, kerea pengalaman i Paulus nakoạ bukti i Yesus kahěngang-hěngang saụ nipěbiahẹ̌?

⁹ Bọu ene, Yesus nẹ̌těngkatodẹ si Paulus. (1 Kor. 15:8) I Paulus (Saul) su tempo ene su ral᷊eng sarang Damaskus kụ i sie nakaringihẹ̌ tingihi Yesus dingangu nakasilo i Yesus su sorga. (Basa Kisah 9:3-5.) Pengalaman i Paulus ene nakoạ bukti i Yesus kahěngang-hěngang seng saụ nipěbiahẹ̌.​—Kis. 26:12-15.

10. Apa nikoạ i Paulus ual᷊ingu mangimang i Yesus kahěngang-hěngang saụ nipěbiahẹ̌ bọu papate?

¹⁰ Apa niul᷊ị i Paulus tantu nakakoạ taumata wal᷊inẹ mapulu dumaringihẹ̌ ual᷊ingu humotong i sie kai měnděndariha tau Kristen. Su apang i Paulus nangimang i Yesus saụ nipěbiahẹ̌ bọu papate, i sie něhabarẹ̌ katěngadẹ̌ ene su taumata. I sie nẹ̌tatahang maning nirarihang, nipěnjara, dingangu nakahombang silakạ su laudẹ̌ gunang měhabarẹ̌ i Yesus kai seng nate kụ saụ nipěbiahẹ̌. (1 Kor. 15:9-11; 2 Kor. 11:23-27) I Paulus sěbạe mangimang i Yesus saụ nipěbiahẹ̌ bọu papate sarang i sie rela mate gunang tumatawang pangangimange ene. Kesaksian bọu lawọ sahidi su abad humotong tantu nakakoạ si kau limembong mangimang i Yesus seng nipěbiahẹ̌ bọu papate. Kụ, ene lai tantu nakatoghasẹ̌ pangangimangu soal u taumata nate sarung saụ ipěbiahẹ̌.

11. Aramanung, kawe nụe pirang katau tau Kristen su Korintus piạ tiněna nẹ̌sal᷊a soal u těntiro taumata nate saụ ipěbiahẹ̌?

¹¹ Pirang katau tau Kristen su Korintus piạ tiněna nẹ̌sal᷊a soal u těntiro taumata nate  saụ ipěbiahẹ̌, sarang lai piạ u naul᷊ị ”taumata nate tawe měbiahẹ̌”. Kawe nụe? (1 Kor. 15:12) Ual᷊ingu pirang katau filsuf su Athena něheghesẹ̌ katěngadẹ̌ i Yesus seng saụ nipěbiahẹ̌. Apa niul᷊ị i sire ene nakapěngaruh pirang katau tau Kristen su Korintus. (Kis. 17:18, 31, 32) Sěnggạ lai nẹ̌pikirẹ̌ taumata nate saụ ipěbiahẹ̌ ene mangal᷊ene su arti kiasan. I sire nẹ̌pikirẹ̌ taumata ”nate” su tempong i sie marosa, katewe ”saụ nipěbiahẹ̌” su tempong nakoạ tau Kristen. Tawẹ soale apa alasang i sire, mạeng i sire tawe mangimang i Yesus saụ nipěbiahẹ̌, pangangimang i sire ene sia-sia. Mạeng Mawu tawe napakawiahẹ̌ si Yesus, tawẹ apa tatěbusẹ̌ kụ taumata tatapẹ̌ marosa. Hakị u ene, mạeng taumata tawe mangimang i Yesus saụ nipěbiahẹ̌, i sie kai tawẹ apa pělaharapẹ̌.​—1 Kor. 15:13-19; Ibr. 9:12, 14.

12. Kere nilahẹ su 1 Petrus 3:18, 22, kerea kebangkitan i Yesus nẹ̌tatěntang dingangu kebangkitan taumata wal᷊inẹ?

¹² I Paulus masingkạ ”i Kristus seng nipěbiahẹ̌”. Kebangkitan i Yesus limembong penting sul᷊ungu kebangkitan wal᷊inẹ seng nariadi kal᷊imona, ual᷊ingu taumata apang saụ nipěbiahẹ̌ ene samurine saụ nate. Paulus naul᷊ị i Yesus kai ”nakoạ kahumotongange nipěbiahẹ̌ bọu tal᷊oarang taumata apang seng mětẹ̌tikị su ral᷊ungu papate”. Kawe nụe i Yesus nakoạ kahumotongange? I sie kai taumata kahumotongange nipěbiahẹ̌ nakoạ makhluk roh kụ i sie taumata kahumotongange naawị sarang sorga.​—1 Kor. 15:20; Kis. 26:23; basa 1 Petrus 3:18, 22.

13. Kerea i Paulus něnodẹ pẹ̌tatěntange i Adam dingangi Yesus?

¹³ Kerea papateng sěngkatau taumata sarung makarěntang pěbawiahẹ̌ gunang jutane taumata? Paulus něgělị sasimbahẹ̌ masuẹ̌ su akal᷊ẹ̌ gunang kakiwal᷊o ene. I sie něnodẹ pẹ̌tatěntange hasilu kakanoạ i Adam dingangu hasilu pengorbanan i Kristus. I Paulus němohẹ soal i Adam: ”Papate siměpụ ual᷊ingu sěngkatau taumata.” Su tempong i Adam někoạ dosa, i sie nakarěntang silakạ gunang watangenge dingangu manga hitene. Sarang orasẹ̌ ini, i kitẹ turusẹ̌ nakapěndang sigěsạ ual᷊ingu i Adam tawe timuhụ. Katewe, ual᷊ingu Mawu napakawiahẹ̌ Ahus’E, i kitẹ botonge nakaěbạ pělaharapẹ̌. ”Taumata nate botonge saụ ipěbiahẹ̌ ual᷊ingu sěngkatau taumata”, ene kai Yesus. Paulus nẹ̌bera, ”Kěbị nate ual᷊ingu i Adam” katewe ”kěbị sarung saụ ipěbiahẹ̌ ual᷊ingu i Kristus”.​—1 Kor. 15:21, 22.

14. Apa i Adam sarung saụ ipěbiahẹ̌? Lahẹko.

¹⁴ Apa mangal᷊ene bawerang i Paulus ”kěbị nate ual᷊ingu i Adam”? Paulus nẹ̌tiněna soal u manga hiteng i Adam. Manga hiteng i Adam nakoạ marosa dingangu tawe nasukụ ual᷊ingu i Adam, kụ samurine i sire sarung mate. (Rm. 5:12) I Adam tawe makoạ bageang bọu taumata apang ”sarung saụ ipěbiahẹ̌”. I sie tawe makaěbạ gunane bọu tatěbusi Kristus ual᷊ingu i sie kai taumata masukụ su tempong tawe timuhụ su Mawu. Apa sarung kahombangeng i Adam ene mẹ̌sul᷊ung dingangu apa sarung kahombangengu taumata apang nisěbạ ”kambing” karạu ”Ahusu taumata”, ene kai, ”kawawinasa kěkalẹ̌”.​—Mat. 25:31-33, 46; Ibr. 5:9.

15. I sai sarung makoạ bageang bọu ”kěbị” apang ”sarung saụ ipebiahẹ̌”?

¹⁵ Pěmanda i Paulus nẹ̌bera, ”Kěbị sarung saụ ipěbiahẹ̌ ual᷊ingu i Kristus.” (1 Kor. 15:22) Surati Paulus niwohẹ gunang tau Kristen su Korintus apang nilanisẹ̌, kụ sarung saụ ipěbiahẹ̌ gunang mẹ̌tanạ su sorga. Tau Kristen ene ”seng nipakasusi gunang masěmbaụ dingangi Kristus kụ nikui gunang makoạ taumata masusi”. Bọu ene, i Paulus lai nẹ̌sěbạ soal u taumata apang seng nate kụ ”nasěmbaụ dingangi Kristus”. (1 Kor. 1:2; 15:18; 2 Kor. 5:17) Su suratẹ̌ bal᷊inẹ, i Paulus  lai němohẹ taumata apang ”nipakasěmbaụ dingangi [Yesus] su tempong nate kere i sie” sarung ”ipakasěmbaụ lai dingangi sie su tempong saụ nipakawiahẹ̌ kere i sie”. (Rm. 6:3-5) Yesus saụ nipěbiahẹ̌ gunang makoạ makhluk roh kụ nakoạ sarang sorga. Hakị u ene, kěbị taumata apang ”nasěmbaụ dingangi Kristus”, ene kai kěbị tau Kristen apang nilanisẹ̌, sarung makahombang hal᷊ẹ̌ mẹ̌sul᷊ung.

16. Apa mangal᷊ene bawerang i Paulus su tempong nẹ̌sěbạ i Yesus kai ”nakoạ kahumotongange”?

¹⁶ Paulus němohẹ i Kristus ”nakoạ kahumotongange nipěbiahẹ̌ bọu tal᷊oarang taumata apang seng mětẹ̌tikị su ral᷊ungu papate”. Pẹ̌tahěndung, piạ lai taumata wal᷊inẹ saụ nipěbiahẹ̌, contone i Lazarus. Katewe, i Yesus, nakoạ kahumotongange nipěbiahẹ̌ gunang makoạ makhluk roh kụ nakatarimạ pěbawiahẹ̌ kěkalẹ̌. I sie mẹ̌sul᷊ungu buah kahumotongange bọu hasilu panen tau Israel kụ nisarakang su Mawu. Bọu ene lai, su tempong nẹ̌sěbạ i Yesus ”nakoạ kahumotongange”, Paulus něnodẹ piạ lai taumata wal᷊inẹ sarung saụ ipěbiahẹ̌ kụ mẹ̌tanạ su sorga. Manga rasulẹ̌ dingangu taumata wal᷊inẹ apang ”nasěmbaụ dingangi Kristus” samurine lai sarung saụ ipěbiahẹ̌ gunang makoạ sarang sorga kere i Yesus.

17. Kange taumata apang ”nasěmbaụ dingangi Kristus” botonge saụ ipěbiahẹ̌ gunang mẹ̌tanạ su sorga?

¹⁷ Su tempong Paulus němohẹ suratẹ̌ gunang tau Korintus, taumata apang ”nasěmbaụ dingangi Kristus” bědang tawe nipěbiahẹ̌ gunang makoạ sarang sorga. Paulus něnodẹ hal᷊ẹ̌ ene hědo mariadi su tempo mahi. I sie nẹ̌bera, ”Kěbị taumata ipěbiahẹ̌ ipětatuhụ: I Kristus kai kahumotongange, bọu ene su kanandụu i sie ene, taumata tataghuaneng i Kristus.” (1 Kor. 15:23; 1 Tes. 4:15, 16) Orasẹ̌ ini, i kitẹ seng měbẹ̌biahẹ̌ su kanandụu tempong i Kristus seng ene. Nal᷊ahẹ, manga rasulẹ̌ dingangu taumata wal᷊inẹ apang nilanisẹ̌ kụ seng nate harusẹ̌ měngampal᷊ẹ̌ sarang tempo ini gunang makaěbạ pěbawiahẹ̌ su sorga kụ ’nipakasěmbaụ dingangi [Yesus] su tempong saụ nipakawiahẹ̌ kere i sie’.

18. (a) Kawe nụe i kitẹ botonge maul᷊ị sarung piạ kebangkitan wal᷊inẹ bọu kebangkitan sarang sorga? (b) Kere nitodẹ su 1 Korintus 15:24-26, apa sarung mariadi su sorga?

¹⁸ Katewe, kerea dingangu tau Kristen masatia apang tawe nakaěbạ pělaharapẹ̌ gunang měbiahẹ̌ su sorga dingangi Kristus? I sire lai piạ pělaharapẹ̌ gunang saụ ipěbiahẹ̌. Alkitapẹ̌ naul᷊ị i Paulus dingangu taumata  wal᷊inẹ apang makoạ sarang sorga kai ”saụ nipěbiahẹ̌ limembong kal᷊imona bọu taumata apang seng nate”. (Flp. 3:11) Ini něnodẹ tuhụe sarung piạ lai taumata saụ ipěbiahẹ̌ bọu papate. Ini nẹ̌tatahino dingangu apa niul᷊ị i Ayub soal u apa sarung mariadi si sie su tempo mahi. (Ayb. 14:15) ”Taumata tataghuaneng i Kristus” sarung ene su sorga dingangi Yesus su tempong i Yesus mapakawinasa kěbị pěměrentang taumata. Sarang ”sědụ pěngěngsuenge . . . papate” lai sarung ipakailang. Kěbị taumata apang saụ nipěbiahẹ̌ gunang makoạ sarang sorga ene seng tawe mate. Katewe, kerea dingangu taumata wal᷊inẹ?​—Basa 1 Korintus 15:24-26.

19. Taumata apang piạ pělaharapẹ̌ gunang měbiahẹ̌ su dunia botonge měharapẹ̌ apa?

¹⁹ Taumata apang piạ pělaharapẹ̌ gunang měbiahẹ̌ su dunia botonge měharapẹ̌ apa? I sire botonge měharapẹ̌ apa niul᷊ị i Paulus ini: ”Iạ lai piạ pělaharapẹ̌ . . . ene kai taumata nate sarung saụ ipěbiahẹ̌, taumata nihino arau tawe nihino.” (Kis. 24:15) Nal᷊ahẹ, taumata tawe nihino tawe makasuẹ̌ su sorga, hakị u ene bawera ini něnodẹ su tempo mahi sarung piạ taumata saụ ipěbiahẹ̌ su dunia.

20. Kerea pělaharapẹ̌ botonge makatoghasẹ̌ si kau?

²⁰ Nal᷊ahẹ, ”taumata nate sarung saụ ipěbiahẹ̌”! Taumata apang saụ ipěbiahẹ̌ gunang mẹ̌tanạ su dunia botonge měbiahẹ̌ sarang karěngụe. I kau botonge mangimang su diandi ini. Pělaharapẹ̌ ini botonge makahiborẹ̌ si kau mạeng taumata ikẹ̌kěndagu seng nate. I sire botonge saụ ipěbiahẹ̌ su tempong i Kristus dingangu manga hapịe ”mẹ̌parenta makoạ datu . . . su kanandụu 1.000 su taunge”. (Why. 20:6) Kụ, mạeng i kau mate těntal᷊ang i Kristus bědang tawe nẹ̌parenta 1.000 su taunge, i kau botonge mangimang i kau sarung saụ ipěbiahẹ̌. ’Pělaharapẹ̌ ini tawe makakoạ [si kau] kecewa.’ (Rm. 5:5) Pělaharapẹ̌ ini botonge makatoghasẹ̌ si kau orasẹ̌ ini dingangu makakoạ si kau limembong mal᷊uasẹ̌ mẹ̌tahamawu si Yehuwa. Katewe, piạ lai botonge kaěndungang i kitẹ bọu 1 Korintus pasalẹ̌ 15, kere sarung lahẹkang su pěngangěndungang tuhụe.