1-2. Jeová nia atan sira iha esperansa saida?

IMPORTANTE tebes atu iha esperansa kona-ba futuru. Ema balu espera atu iha moris kaben neʼebé kontente, haboot oan ho saúde diʼak, ka sai diʼak fali husi moras todan. Ita ema Kristaun mós karik espera buat sira-neʼe. Maibé ita mós iha esperansa seluk neʼebé furak, neʼe mak moris rohan-laek iha futuru no hasoru fali ema sira neʼebé ita hadomi neʼebé mate ona.

² Apóstolu Paulo hatete: “Haʼu iha esperansa ba Maromak . . . katak Maromak sei fó moris-hiʼas ba ema neʼebé hatudu hahalok loos no mós ema neʼebé hatudu hahalok la loos.” (Após 24:15) Laʼós Paulo deʼit mak koʼalia kona-ba esperansa moris-hiʼas nian. Job mós koʼalia kona-ba esperansa neʼe. Nia fiar metin katak Maromak sei hanoin-hetan nia no fó moris-hiʼas ba nia.​—Job 14:7-10, 12-15.

3. Oinsá mak 1 Korinto kapítulu 15 bele ajuda ita?

³ Hanorin kona-ba “moris-hiʼas husi mate” mak parte ba “hanorin báziku” ka “fundasaun” ba ema Kristaun nia fiar sira seluk. (Ebr 6:1, 2) Paulo nia esplikasaun kona-ba moris-hiʼas hakerek iha 1 Korinto kapítulu 15. Ita bele fiar katak liafuan iha kapítulu neʼe hametin duni ema Kristaun iha tempu neʼebá. No ida-neʼe mós bele anima ita no hametin ita-nia esperansa kona-ba moris-hiʼas neʼebé karik ita hein kleur ona.

4. Tanbasá ita bele fiar katak ema mate sei moris hiʼas?

⁴ Jesus Kristu nia moris-hiʼas mak razaun importante atu ita fiar katak ema mate sei moris hiʼas. Jesus nia moris-hiʼas mak parte ba “liafuan diʼak” neʼebé Paulo fó sai ba ema Korinto. (1 Kor 15:1, 2) Nia hatete katak se ema Kristaun la fiar katak Jesus moris hiʼas, ema neʼe nia fiar mak saugati deʼit. (1 Kor 15:17) Jesus nia moris-hiʼas mak razaun tanbasá ita bele fiar katak ema mate sei moris hiʼas.

5-6. Oinsá liafuan iha 1 Korinto 15:3, 4 ajuda ita?

 ⁵ Bainhira Paulo komesa hakerek kona-ba moris-hiʼas, nia temi faktu tolu. Neʼe mak (1) “Kristu mate ba ita-nia sala.” (2) “Ema hakoi nia.” (3) “Iha loron terseiru nia moris hiʼas fali hodi tuir Eskritura sira.”​—Lee 1 Korinto 15:3, 4.

⁶ Tanbasá faktu tolu neʼe ajuda ita? Profeta Isaias fó-hatene nanis katak ‘ema sei oho Mesias husi ema moris nia leet’ no ‘ema sei fó hakoi-fatin ba nia iha ema aat sira-nia leet’. Maibé iha buat seluk tan neʼebé sei akontese. Isaias mós hatete katak Mesias sei “lori ema barak nia sala”. Jesus halo nuneʼe liuhusi fó ninia moris nuʼudar sakrifísiu. (Isa 53:8, 9, 12; Mt 20:28; Rom 5:8) Entaun faktu kona-ba Jesus nia mate, ema hakoi nia, no ninia moris-hiʼas fó razaun ba ita atu iha esperansa katak ita bele sai livre husi sala no mate, no mós bele hasoru fali ema sira neʼebé ita hadomi neʼebé mate ona.

7-8. Saida mak ajuda ema Kristaun sira atu fiar katak Jesus moris hiʼas duni?

⁷ Ita-nia esperansa kona-ba moris-hiʼas liga ho Jesus nia moris-hiʼas, tan neʼe ita presiza fiar duni katak Jesus moris hiʼas. Tanbasá ita bele fiar katak Jeová fó moris-hiʼas ba Jesus?

⁸ Iha ema barak mak haree Jesus neʼebé moris hiʼas ona. (1 Kor 15:5-7) Sasin-naʼin primeiru neʼebé Paulo temi mak apóstolu Pedro ka Cefas. Dixípulu balu mós dehan katak Pedro haree Jesus neʼebé moris hiʼas ona. (Lc 24:33, 34) Liután neʼe, Paulo hatete katak apóstolu sira mós haree Jesus neʼebé moris hiʼas ona. Tuirmai Kristu “mosu ba maun-alin naʼin-500 liu iha tempu ida”, karik neʼe akontese kuandu sira halibur hamutuk iha Galileia hanesan temi iha Mateus 28:16-20. Jesus mós “mosu ba Tiago”, karik nia mak Jesus nia alin-mane neʼebé uluk la fiar katak Jesus mak Mesias. (João 7:5) Depois haree tiha Jesus neʼebé moris hiʼas ona, Tiago sai fiar-naʼin. No maizumenus iha tinan 55 EC, bainhira Paulo hakerek karta ba ema Korinto, ema barak neʼebé uluk sai sasin-naʼin katak Jesus moris hiʼas ona sei moris hela. Entaun ema neʼebé duvida, bele husu ba sasin-naʼin sira-neʼe.

9. Tuir Apóstolu 9:3-5, Paulo fó sai evidénsia saida kona-ba Jesus nia moris-hiʼas?

⁹ Tuirmai, Jesus mós mosu ba Paulo. (1 Kor 15:8) Paulo ka Saul, laʼo daudaun ba Damasku bainhira nia rona lian husi Jesus neʼebé moris hiʼas ona no haree Jesus iha lalehan. (Lee Apóstolu 9:3-5.) Akontesimentu neʼe fó evidénsia liután katak Jesus moris hiʼas duni.​—Após 26:12-15.

10. Paulo nia fiar kona-ba Jesus nia moris-hiʼas book nia atu halo saida?

¹⁰ Ema balu interese tebes ho buat neʼebé Paulo fó sai kona-ba Jesus nia moris-hiʼas tanba uluk Paulo fó-terus ba ema Kristaun. Bainhira Paulo fiar katak Jesus moris hiʼas ona, Paulo hakaʼas an atu ajuda ema seluk fiar lia-loos neʼe. Bainhira nia haklaken lia-loos kona-ba Jesus nia moris-hiʼas, nia tenke tahan susar tanba ema baku, hatama nia ba komarka, no ró neʼebé nia saʼe sai aat. (1 Kor 15:9-11; 2 Kor 11:23-27) Paulo fiar metin katak Jesus moris hiʼas ona husi mate, tan neʼe nia prontu atu defende ninia fiar toʼo mate. Evidénsia husi sasin-naʼin sira-neʼe halo ita fiar metin katak Jesus moris hiʼas duni. Neʼe mós hametin ita-nia fiar kona-ba moris-hiʼas iha futuru.

11. Tanbasá ema Kristaun balu iha Korinto iha hanoin sala kona-ba moris-hiʼas?

¹¹ Ema Kristaun balu iha Korinto iha rai-Grésia, iha hanoin sala kona-ba moris-hiʼas. Ema sira-neʼe mós dehan katak “la iha moris-hiʼas husi mate”. Tanbasá? (1 Kor 15:12) Matenek-naʼin kona-ba filozofia iha Atenas iha rai-Grésia goza ema neʼebé fiar katak Jesus moris hiʼas ona. Karik ideia sira-neʼe afeta mós ema Kristaun balu iha Korinto. (Após 17:18, 31, 32) Ema balu hanoin katak moris-hiʼas mak buat simbóliku deʼit. Sira hanoin katak moris-hiʼas refere ba ema neʼebé “mate” tanba sala, maibé “moris-hiʼas” ona nuʼudar ema Kristaun. Se sira la fiar moris-hiʼas, sira-nia fiar mak saugati deʼit. Se Maromak la fó moris-hiʼas ba Jesus, Jesus labele selu folin atu sosa fali ema husi sala, no ema hotu mak sala-naʼin nafatin. Tan neʼe, ema neʼebé la fiar katak Jesus moris hiʼas ona, nia la iha esperansa.—1 Kor 15:13-19; Ebr 9:12, 14.

12. Tuir 1 Pedro 3:18, 22, oinsá Jesus nia moris-hiʼas la hanesan ho moris-hiʼas seluk antes neʼe?

¹² Paulo hatene katak “Kristu moris hiʼas ona husi mate”. Jesus nia moris-hiʼas mak diʼak liu fali moris-hiʼas seluk neʼebé akontese antes neʼe, tanba sira mate fali. Paulo hatete katak Jesus mak “hanesan ai-fuan primeiru husi ema hotu neʼebé mate ona”. Neʼe katak sá? Jesus mak ema primeiru neʼebé moris hiʼas ho isin espíritu no saʼe ba lalehan.—1 Kor 15:20; Após 26:23; lee 1 Pedro 3:18, 22.

13. Paulo koʼalia kona-ba diferensa saida entre Adão no Jesus?

¹³ Oinsá mak ema ida nia mate bele lori moris ba ema rihun ba rihun? Paulo fó resposta neʼebé klaru kona-ba neʼe. Nia koʼalia kona-ba diferensa entre buat neʼebé akontese ba ema tanba Adão nia sala no buat neʼebé ema bele hetan tanba Jesus nia sakrifísiu. Kona-ba Adão, Paulo hakerek: “Mate mai liuhusi ema ida.” Bainhira Adão halo sala, nia hetan kastigu-mate no lori mate ba ninia bei-oan sira. Ita kontinua hetan susar tanba ninia sala. Maibé tanba Maromak halo Jesus moris hiʼas, ita bele iha futuru kapás. “Moris-hiʼas husi mate mai liuhusi ema ida”, neʼe mak Jesus. Paulo hatete: “Ema hotu mate tanba Adão, nuneʼe mós ema hotu sei hetan moris tanba Kristu.”​—1 Kor 15:21, 22.

14. Adão sei hetan moris-hiʼas ka lae? Esplika toʼok.

¹⁴ Paulo nia liafuan “ema hotu mate tanba Adão” katak sá? Paulo koʼalia kona-ba ema hotu neʼebé sai sala-naʼin no la perfeitu tanba Adão, no tan neʼe sira sei mate. (Rom 5:12) Adão sei la hetan moris-hiʼas. Kristu nia sakrifísiu la taka Adão nia sala, tanba Adão mak ema perfeitu no nia rasik mak deside atu la halo tuir Maromak. Buat neʼebé sei akontese ba Adão no ema sira neʼebé sei hetan tesi-lia husi “Oan-Mane husi Ema” nuʼudar “bibi-timur” mak hanesan deʼit. Sira hotu sei “lakon ba nafatin”.​—Mt 25:31-33, 46; Ebr 5:9.

15. Saida mak 1 Korinto 15:22 hatete kona-ba moris-hiʼas?

¹⁵ Paulo hatete katak “ema hotu sei hetan moris tanba Kristu”. (1 Kor 15:22) Paulo hakerek karta neʼe ba ema Kristaun iha Korinto neʼebé iha esperansa atu hetan moris-hiʼas atu bá lalehan. Sira mak ema Kristaun neʼebé ‘Maromak haketak ona atu sai ida deʼit ho Kristu Jesus  no bolu atu sai nuʼudar ema santu’. No Paulo mós temi kona-ba ema “sira neʼebé mate ona nuʼudar Kristu nia dixípulu”. (1 Kor 1:2; 15:18; 2 Kor 5:17) Iha Paulo nia karta seluk, nia hakerek katak ema sira neʼebé “mate ona hanesan [Jesus]” sei “moris fali duni hanesan nia”. (Rom 6:3-5) Jesus moris hiʼas ho isin espíritu no saʼe ba lalehan. Ida-neʼe mós sei akontese ba ema neʼebé “sai ida deʼit ho Kristu”, katak ema Kristaun neʼebé Maromak hili atu bá lalehan.

16. Bainhira Paulo bolu Jesus nuʼudar “ai-fuan primeiru”, neʼe katak sá?

¹⁶ Paulo hakerek katak Kristu moris hiʼas nuʼudar “ai-fuan primeiru husi ema hotu neʼebé mate ona”. Hanoin-hetan katak iha ona ema seluk neʼebé hetan moris-hiʼas iha rai hanesan Lázaro, maibé Jesus mak ema primeiru neʼebé moris hiʼas ho isin espíritu no hetan moris ba nafatin. Ita bele kompara Jesus ho ai-fuan primeiru iha tempu koʼa nian neʼebé ema Izraél hasaʼe ba Maromak nuʼudar sakrifísiu. Liután neʼe, hodi bolu Jesus nuʼudar “ai-fuan primeiru”, Paulo hatudu katak sei iha mós ema seluk neʼebé sei hetan moris-hiʼas ba lalehan. Apóstolu sira no mós ema seluk neʼebé “ida deʼit ho Kristu” mós sei hetan moris-hiʼas ba lalehan hanesan ho Jesus.

17. Bainhira mak ema sira neʼebé “ida deʼit ho Kristu” simu sira-nia kolen atu bá lalehan?

¹⁷ Bainhira Paulo hakerek ba ema Kristaun iha Korinto, ema neʼebé “ida deʼit ho Kristu” seidauk hetan moris-hiʼas ba lalehan. Maibé, Paulo hatete katak neʼe sei akontese iha futuru. Nia dehan: “Ema ida-idak moris-hiʼas tuituir malu ho loloos: Kristu mak hanesan ai-fuan primeiru, depois neʼe mak sira neʼebé Kristu nian durante tempu neʼebé nia toʼo ona mai.” (1 Kor 15:23; 1 Tes 4:15, 16) Ohin loron, ita moris iha “tempu neʼebé [Kristu] toʼo ona mai”. Apóstolu sira no mós Kristu nia alin seluk neʼebé mate tenke hein toʼo tempu neʼebé Kristu toʼo ona mai mak sira foin simu kolen atu bá lalehan no ‘moris fali hanesan nia’.

18. (a) Tanbasá ita bele fiar katak sei iha moris-hiʼas seluk tan? (b) Tuir 1 Korinto 15:24-26, saida mak sei akontese iha lalehan?

¹⁸ Maibé oinsá ho ema Kristaun laran-metin sira neʼebé la iha esperansa atu bá lalehan? Sira mós iha esperansa atu hetan moris-hiʼas. Bíblia hatete katak Paulo no ema seluk neʼebé moris hiʼas ba  lalehan mak sira neʼebé “simu moris-hiʼas primeiru”. (Apok 20:6) Neʼe hatudu katak sei iha moris-hiʼas seluk tan. Neʼe hanesan ho buat neʼebé Job fiar katak sei akontese ba nia iha futuru. (Job 14:15) Jesus nia alin sira sei moris ona iha lalehan hamutuk ho nia bainhira nia halakon governu sira, no mós sira neʼebé iha podér no kbiit. No Jesus mós sei halakon “inimigu ikus” katak mate. Klaru katak, ema neʼebé moris hiʼas ba lalehan sei nunka mate tan. Maibé oinsá ho ema seluk?—Lee 1 Korinto 15:24-26.

19. Ema neʼebé la iha esperansa atu bá lalehan bele hein ba saida?

¹⁹ Ema neʼebé la iha esperansa atu bá lalehan bele hein ba saida? Sira bele hetan esperansa hanesan Paulo temi: “Haʼu iha esperansa . . . katak Maromak sei fó moris-hiʼas ba ema neʼebé hatudu hahalok loos no mós ema neʼebé hatudu hahalok la loos.” (Após 24:15) Klaru katak, ema neʼebé hatudu hahalok la loos labele tama lalehan, entaun liafuan sira-neʼe refere ba moris-hiʼas iha futuru iha rai.

20. Oinsá informasaun neʼe hametin ita-nia esperansa?

²⁰ Ita la duvida katak “Maromak sei fó moris-hiʼas ba ema”. Ema neʼebé hetan moris-hiʼas iha rai sei iha oportunidade atu moris ba nafatin. Ita bele fiar katak promesa neʼe sei sai loos. Ita-nia esperansa bele fó kmaan mai ita bainhira ema neʼebé ita hadomi mate. Sira bele hetan moris-hiʼas durante tempu neʼebé Kristu no ninia alin sira “ukun nuʼudar liurai . . . ba tinan 1.000”. (Apok 20:6) Ita mós bele fiar katak se ita mate antes Jesus nia Ukun ba Tinan Rihun Ida komesa, ita sei hetan moris-hiʼas. “Esperansa neʼe sei la halo ita laran-triste”. (Rom 5:5) Neʼe bele hametin ita agora no halo ita sente haksolok hodi serbí Maromak. Maibé ita bele aprende buat seluk tan husi 1 Korinto kapítulu 15. Ita sei koʼalia kona-ba neʼe iha lisaun tuirmai.