1-2. Gutumba muni nyo tsakise ogu sithumi sa Jehovha si gu nago?

GU MANEGA ni gutumba khya lisima ngudzu. Vambe va gu vireya gu mana wugadzi nyo tsakise, gu dandrisa sanana si gu na ni womi nya wadi mwendro gu hawuluga madwali nyo khaguri. Anethu maKristo hi ngu si vbweta silo sesi. Ganiolu, ethu hi na ni gutumba nyo vbindre ogu. Ethu ha gu vireya gu mana womi nyo pindruge hi bwe hi ta vbanya gumogo ni dzipari ni valongo va fudego.

² Mupostoli Pawulo a di khuye: ‘Nyi na ni gutumba ga Nungungulu . . . nya gu kheni gomo guwuga ga vale va fudego, va nya gululama ni va nya sighoho.’ (Mith. 24:15) Pawulo, khandruye nyo pheye a ganedego gu khuye ava va fudego va na wuga. Joba nuye a diri ni gutumba gogo. Uye a di gu tiyisega gu khuye Nungungulu a na mu dundruga nigu a na mu wusa khu gufani. — Joba 14:7-10, 12-15.

3. Khu ginani si gu na ni lisima gu hevbula 1 Vakorinto gipimo 15?

³ “Guwuga ga vafudego” gipandre nya “litshina” mwendro “sihevbulo nya guvbelele”, nya satshavbo sihevbudzo nya maKristo. (Hebh. 6:1, 2) Omu ga 1 Vakorinto gipimo 15, Pawulo a gu ganeya khu guwuga ga ava va fudego. Esi a ganedego si nga gira na si tiyiside maKristo ya matshiguni gwaye. Ambari wa gu ba uri ni myaga nya yingi na wu khodwa gu khuwe ava va fudego va na wuswa, gipimo gegi gi na gu kutsa gi bwe gi tiyisa gukhodwa gwago.

4. Khu ginani hi nga tiyisegago gu khethu sigodwa sathu si fudego si na wuswa?

⁴ Gu wuswa ga Jesu Kristo ga gu hi gira hi tiyisega gu khethu a gu tshuka muthu hi mu golago afa a na wuswa. Gu wuswa ga Jesu gu diri gipandre nya “mahungu nya yadi” aya Pawulo a tivisidego  Vakorinto. (1 Kor. 15:1, 2) Uye a di bwe a ganeya khuye, muKristo a si khodwigo avba nya gu wuswa ga ava va fudego, gukhodwa gwaye kha gu phasi gilo. (1 Kor. 15:17) Gukhodwa gu khethu Jesu wusidwe si na hi gira hi khodwa gu khethu ava va fudego va na wuswa.

5-6. Malito ma gomogo omu ga 1 Vakorinto 15:3, 4 ma gu tshamuseya ginani gwathu?

⁵ Tepo Pawulo a nga lova maningano ni ava va fudego, khumbugide silo siraru nya lisima: 1) “Kristo fude khu kotani nya sighoho sathu.” 2) Uye “dzingidwe.” 3) Uye ‘wusidwe khu litshigu nya wuraru, kha nga yi ganelago Milowo nya Guage.’ — Leri 1 Vakorinto 15:3, 4.

⁶ Gufa, gu dzingwa ni gu wuswa ga Jesu sa gu tshamuseya ginani gwathu? Muprofeti Isaya ganede gu khuye Mesiya a di hadzi “duswa tigoni nya vathu nya guvbanye” a bwe a ‘dzingwa gumogo ni va nya guvivbedwa khu myonyo.’ Ganiolu, khandri isoso basi Isaya a ganedego, engendzide gambe khuye Mesiya a di hadzi rwala “sighoho sa vathu nya vangi.” Jesu giride isoso khu gu ningeya womi waye kha nga muphaso nya gu dzegiswe. (Isa. 53:8, 9, 12; Mat. 20:28; Rom. 5:8) Khu kharato, gufa, gu dzingwa ni gu wuswa ga Jesu sa gu hi gira hi tiyisega gu khethu hi na tshudziswa gighohoni ni gufani nigu sigodwa sathu si fudego si na wuswa.

7-8. Ginani gi phasago maKristo gu khodwa gu khayo Jesu wusidwe khu gufani?

⁷ Gasi hi khodwa gu khethu gu na ba gu romo guwuga ga ava va fudego, hi yede gu khodwa gu khethu Jesu wusidwe khu gufani. Khu ginani hi ga tiyisegago gu khethu Jehovha wuside Jesu?

⁸ Hwane nyo ba Jesu a wusidwe, vathu nya vangi va mu wonide nigu va bhulede vambe khu isoso. (1 Kor. 15:5-7) Fakazi nyo pheye yi khumbugidwego khu Pawulo, khu mupostoli Pedro (Cefas). Tshawa nya vapizane wu seketede gu khuwo Pedro wonide Jesu na wusidwe khu gufani. (Luka 24:33, 34) Gu diga isoso, Pawulo a ganede gu khuye “ava nya doze,” a gu vapostoli, va wonide Jesu na wusidwe khu gufani. Khavbovbo, Kristo a di “dzi wonegisa gambe ga gikwata nya vathu nya tengo nya guvbindre livbandre mazana (500) vakhodwa khu gomogo.” Si nga gira nari ga tshangano wule nyo tsakise Galileya wu khumbugwago omu ga Matewu 28:16-20. Jesu ‘a di wonega gambe ga Jakobe.’ Jakobe khatsi a diri ndriye wa Jesu oyu gu pheyani a nga ba a si khodwi gu khuye Jesu khuye Mesiya. (Joh. 7:5) Hwane nya gu ba Jakobe a wonide Jesu a wusidwego khu gufani, uye a di khodwa. Si ngu hlamadzisa gu wona gu, tepo Pawulo a lovidego lidangaliya leli khu 55 matshiguni yathu, gutala nya vathu va wonidego Jesu a wusidwego khu gufani va di ngo vbanya. Khu kharato, a gu tshuka muthu nyo khaguri a manega ni gu kanakana a di hadzi guya bhula ni moyo nya vathu vava.

9. Kha nga hi si wonidego omu ga Mithumo 9:3-5, khu wevbini wumbe wufakazi owu Pawulo a nga hadzi ningeya maningano ni gu wuswa ga Jesu?

⁹ Khu hwane, Jesu a di wonega gambe ga Pawulo. (1 Kor. 15:8) Tepo Pawulo (Sawule) a nga ba a hongola Dhamasiko a dipwa lito la Jesu a bwe a wona giwoniso gya Kristo ndzadzini. (Leri Mithumo 9:3-5.) Esi si nga dugeleya Pawulo sa gu yeyedza gu khiso gu wuswa ga Jesu khandri malipha. — Mith. 26:12-15.

10. Ginani egi Pawulo a giridego khu kotani nya olu a nga ba a khodwa gu khuye Jesu wusidwe khu gufani?

¹⁰ Vambe va di hadzi ndrindrwa gupima khu wufakazi wa Pawulo kholu uye a di gu tshanisa maKristo. Tepo a nga tiyisega gu khuye Jesu wusidwe khu gufani, Pawulo a di dzigaradzeya gu phasa vambe gu khodwa lisine lolo. Uye timisede gu tshaniswa, gu khotedwa a bwe a vbweta gu dzama na dwaneya gu tivisa vambe gu khuye Jesu a di fude ganiolu wusidwe. (1 Kor. 15:9-11; 2 Kor. 11:23-27) Pawulo a di gu tiyisega gu  khuye Jesu wusidwe khu gufani. Nigu a di dzi emisede gufa khu gu vbweta gu tshumayela esi a nga ba a si khodwa. Khu lisine, wufakazi wa maKristo yaya nyo pheye wu ngu tiyisa gutumba gwathu nyo khethu Jesu wusidwe khu gufani. Nigu wu ngu engedzeya gukhodwa gwathu avba nya guwuga ga ava va fudego.

11. Khu ginani adzina vambe Korinto va manegidego ni mawonelo nyo hosege khu guwuga ga ava va fudego?

¹¹ Vambe dhoropani ga Korinto va diri ni mawonelo nyo hosege maningano ni guwuga ga ava va fudego. Avo va di gu khavo “va nya gufa kha va wugi.” Khu ginani? (1 Kor. 15:12) Vafilosofo va lidhoropa la Atena va di gu tshepeta mawonelo nya gu khayo Jesu wusidwe khu gufani. Nigu vathu nyo khaguri Korinto adzina va manegide ni mipimiso nyo fane. (Mith. 17:18, 31, 32) Vambe adzina va di gu pimisa gu khavo guwuga ga ava va fudego, ndziya nyo fananiseye basi. Avo va di gu khavo muthu a di “fude” khu kotani nya gighoho, ganiolu hwane nyo khale muKristo “wugide” a vbanya gambe kholu a divaledwe sighoho saye. Ni gevbini gighelo gi nga ba gi va gira va si khodwi avba nya guwuga ga ava va fudego, gukhodwa gwawe gu di si phasi gilo. Nari khatshi Nungungulu kha wusa Jesu, muphaso nya dzegiso na wa sa livbwa nigu vatshavbo na va simamide gighohoni. Khu kharato, vatshavbo va si khodwigo avba nya gu wuswe ga ava va fudego, va di hadzi gu mba manega ni gu tumba nya lisine. — 1 Kor. 15:13-19; Hebh. 9:12, 14.

12. Libhuku la 1 Pedro 3:18, 22, la gu hi phasa kharini gu wona gu khethu gu wuswa ga Jesu gu di hambanide ni ogu gu giregedego vambe vathu gupheyani?

¹² Pawulo a di gu dziti gu khuye ‘Kristo a di wusidwe khu gufani.’ Gu wuswa ga Jesu gu di gu vbindra gule gu nga pheya khugo gu girega, kholu, vathu vale va wusidwego va di bwe vafa gambe. Pawulo a di khuye Jesu a diri “matiwula nya guwuge ga vafudego.” Jesu a diri matiwula khu ndziya muni? Uye a diri nyo pheye gu wuswa kha nga muthu nya liphuvbo nigu khuye nyo pheye gu hongola ndzadzini. — 1 Kor. 15:20; Mith. 26:23; leri 1 Pedro 3:18, 22.

13. Pawulo tshamusede kharini gu hambana gu gomogo avba ga Adhamu ni Jesu?

¹³ Gufa ga muthu moyo gu na vbanyisa dzimiliyoni nya vathu khu ndziya muni? Pawulo a ngu ninga hlamulo nyo pwale nya giwudziso gegi. Uye tshamusede gu hambana gu gomogo avba nya esi Adhamu a hi vangedego ni esi Jesu a hi giredego. Maningano ni Adhamu, Pawulo lovide khuye ‘gufa gu manide wulanga tigoni khu kotani nya muthu moyo.’ Tepo Adhamu a nga ghoha vangede gufa situgulwana saye ni uye mune. Kala muhuno hi ngo simama gu tshaniseka khu kotani nya gu mba engisa gwaye. Ganiolu, khu kotani nya olu Nungungulu a wusidego gyanana gyaye, hi na ni gutumba nyo tsakise. Pawulo tshamusede khuye: “guwuga ga va nya gufa gu bede tigoni khu kota nya muthu moyo,” a gu Jesu. Uye ganede gambe khuye: “vathu vatshavbo va modwe khu gufa khu gu hengela ni Adhamu; olu khu gu hengela ni Kristo, vathu vatshavbo va na bweledzedwa gambe guvbanya.” — 1 Kor. 15:21, 22.

14. Ina Adhamu a na wuswa khu gufani? Tshamuseya.

¹⁴ Pawulo a di gu vbweta gu khuye ginani tepo a nga khuye “vathu vatshavbo va modwe khu gufa khu gu hengela ni Adhamu”? Pawulo a di gu ganeya khu vathu vatshavbo. Kholu, kha nga olu va thapedwego khu gighoho ni gu mba vbeleya ga Adhamu, avo va nafa. (Rom. 5:12) Adhamu kha kotarwi ga ava ‘va na bweledzwago gu vbanya.’ Muphaso nya dzegiso wa Kristo kha wu livbi gighoho gya Adhamu, kholu uye a diri muthu nyo vbeleye a nga hatha gu mba engisa Nungungulu. Esi si nga giregeya  Adhamu khiso si na giregeyago ava “Mwamana wa muthu” a na va lamulago kha nga “dziphongo,” a gu ‘gu fuviswa nyo vbeleye.’ — Mat. 25:31-33, 46; Hebh. 5:9.

15. Khu vamani “vatshavbo” vale ‘vana bweledzedwago gambe guvbanya’?

¹⁵ Nga dundrugeya esi Pawulo a ganedego: “Khu gu hengela ni Kristo, vathu vatshavbo va na bweledzedwa gambe guvbanya.” (1 Kor. 15:22) Lidangaliya leli, Pawulo a di gu loveya maKristo ma todzidwego ya Korinto aya ma nga hadzi wuswa gasi ma ya vbanya ndzadzini. Makristo yaya ma di ‘ranedwe gu khala sihathwa, ma agiswa khu gu tshanganiswa gumogo ni Kristo Jesu.’ Nigu Pawulo khumbugide “ava va fudego na va gu khodwa ga Kristo.” (1 Kor. 1:2; 15:18; 2 Kor. 5:17) Ga limbe lidangaliya, Pawulo lovide khuye ava va “tshanganisidwego ni Kristo khu gufa nya nga ogu gwaye”, va na “hengela naye guwuga khu ga vafudego.” (Rom. 6:3-5) Jesu a di wuswa kha nga muthu nya liphuvbo a hongola ndzadzini. Isoso khiso si na giregeyago vatshavbo vale ‘va tshanganiswago ni Kristo’ a gu yatshavbo maKristo ma todzidwego khu liphuvbo nya guage.

16. A di gu vbweta gu khuye ginani Pawulo tepo a nga khuye Jesu “matiwula”?

¹⁶ Pawulo lovide khuye Kristo wusidwe kha nga “matiwula nya guwuge ga vafudego.” Lisine gu vambe nya nga Lazaro va di wusidwe khu gufani. Ganiolu, Jesu khuye nyo pheye gu wuswa kha nga muthu nya liphuvbo a bwe a hakha womi nya pindrugedwa. Uye a nga fananiswa ni mihandro nyo pheye eyi vaIsrayeli va nga ba va ningeya Nungungulu. Gu diga isoso, khu gu ba Pawulo a ranide Jesu khuye “matiwula,” yeyedzide gu khuye vambe navo hwane nya gu wuswe ga Jesu, va di hadzi wuswa gasi va ya vbanya ndzadzini. Vapostoli ni vambe ‘va tshanganisidwego ni Kristo’ va di hadzi wuswa va ya vbanya ndzadzini kha nga si giregedego Jesu.

17. Lini ava ‘va tshanganisidwego ni Kristo’ va nga hadzi wuswa gasi va ya vbanya ndzadzini?

¹⁷ Tepo Pawulo a nga loveya vaKorinto, ava ‘va tshanganisidwego ni Kristo’ va di ngasi pheyi gu wuswa khu gufani. Pawulo yeyedzide gu khuye isoso si di hadzi girega mindru wa tshigu. Uye a di khuye: “muthu ni muthu a na hakha guvbanya khu gikhati gyaye. Matiwula khu Kristo a gu gitumbiso ga vatshavbo. Na wugide Kristo, gu na landrela vale va mu lumbago va hakha navo guvbanya,” ndrani nya gute gwaye. (1 Kor. 15:23; 1 Tes. 4:15, 16) Ethu ha gu vbanya ndrani nya tepo yoyo nya “gute” ga Kristo. Vapostoli ni mambe maKristo nyo todzwe si lombide gu va vireya kala gu vboha tepo yeyi, gasi va wuswa va ya vbanya ndzadzini va bwe va ya ‘tshanganiswa ni Jesu khu guwuga gu fanago ni ogu gwaye.’

18. a) Ginani gi hi phasago gu pwisisa gu khethu gu na ba gu romo gumbe guwuga vbavbandze nya ogu ga ndzadzini basi? b) Ginani hi gi hevbulago omu ga 1 Vakorinto 15:24-26, maningano ni esi si na dugeleyago ndzadzini?

¹⁸ Ahati ava va gu mwalo gutumba nyo vbanye ndzadzini ni Kristo? Anavo va ni gutumba nyo wuswe khu gufani. Bhibhiliya yari khiyo, Pawulo ni vambe va hongolago ndzadzini, va ngu patega avba nya “guwuga khu ga vafudego”, gu na pheyago khugo gu girega. (Filp. 3:11) Ndrimana yeyi ya gu yeyedza gu khiyo hwane nya guwuga gogu gu di hadzi girega gumbe. Esi si di hadzi fana ni esi Joba a ganedego maningano ni wumindru waye. (Joba 14:15) “Ava va lumbago Kristo” va na ba vari naye ndzadzini tepo a na fuvisago mifumo, dzitshivba ni valala vatshavbo. Gufa a gu “nala nya guhegise,” gu na fuviswa. Vatshavbo vale va na wuswago gasi gu ya vbanya ndzadzini kha va na ngafa gambe. Ganiolu, ava vambe ke? — Leri 1 Vakorinto 15:24-26.

19. Gutumba muni va nga manegago nago ava va na vbanyago mafuni?

¹⁹ Gutumba muni va nga manegago nago ava va na vbanyago mafuni? Khogu gu khumbugidwego khu Pawulo tepo a nga khuye: ‘Nyi na ni gutumba nya gu kheni gomo guwuga ga vale va fudego, va nya gululama ni va nya sighoho.’ (Mith. 24:15) Kha nga olu ndzadzini gu si beyigo muthu nya mba lulama, malito yaya mo yeyedza gu khayo guwuga gogu gu na girega mafuni.

20. Ndrima yeyi yi tiyiside kharini gutumba gwago?

²⁰ Khu lisine, gu na ba guromo “guwuga ga vale va fudego.” Ava va na wuswago gasi gu vbanya mafuni, va na mana lithomo nyo vbanye kala gupindruga. Tiyisega gu khuwe gitumbiso gegi gi na tadzisega. Gitumbiso gegi gi nga gu thaveleya wa gu dundrugeya khu valongo vago ni dzipari dzi fudego. Tepo Kristo ni ava va todzidwego ‘va na fumago . . . khu 1000 myaga,’ avo va na wuswa. (Gutu. 20:6) Anuwe u nga tiyisega gu khuye wa gufa na wu ngasi pheyi Mufumo nya 1000 myaga, u na ta wuswa. ‘Gitumbiso gegi kha gi hi phazamisi.’ (Rom. 5:5) Igyo gi na gu tiyisa olu gi bwe gi engedzeya gutsaka gwago thumoni wa Nungungulu. Ambari ulolo, hi nga hevbula nya singi avba ga 1 Vakorinto gipimo 15, kha nga hi na bhulago khiso avba nya ndrima yi landreyago.