1-2. Aseenzi a Djehovha ano kariro ipi yakanakisisa?

KARIRO ciro cakanaka maningi. Anhu amweni ano kariro yekugara ne mhuri inopfara, kurera ana ano uthongo wakanaka kana kutopora pa nhenda. Kana na isusu aKristu tinodawo zviro izvona. Asi tino kariro inotopinda izvona. Isusu tinokariro yekuzorarama nokusikaperi uye kuzosonganazve no shamwari uye anyaukama edu akafa.

² Mu phostori Pauro wakati: “Ndino kariro kuna Mwari . . . yekuti kucaoneka kumuka ke anhu anatsi uye no asiripi anatsi.” (Zvi. 24:15) Pauro andiepi wakatanga kureketa nge zve rumuko. Djobo waitendawo mu rumuko. Iyena waigondawo kuti Mwari aizomuedzurira uye aizomuhwirinzazve ku upenyu.—Djo. 14:7-10, 12-15.

3. Ngei zvakanaka kufundazve bhuku ra 1 Akorinti 15?

³ “Rumuko re anhu akafa” ndipona pakawakirhwa “fundação” kana kuti “fundiso yekutanga,” ku aKristu ese. (Ahe. 6:1, 2) Zvakareketa Pauro pana 1 Akorinti 15, zvinoita hingana kuti zvakabetsera maningi aKristu ekare. Kunyazi imwimwi maakutenda rumuko kubvira kare-kare, kapituro ii ingakwanisa kubetsera kuti mubambise kariro yenyu.

4. Ngacipi cinoita kuti titende mu rumuko?

⁴ Rumuko ra Djesu Kristu rinoita kuti tigare no rugondo rekuti, kana hama, kana shamwari ikafa, kucaoneka rumuko. Rumuko ra Djesu Kristu rainga dii rimweni re “masoko anopfadza” akaparidzwa na Pauro ku Akorinti. (1Ako. 15:1, 2) Iyena wakatobhuya kuti, kana mu Kristu asikatendi mu rumuko, kutenda kake kainga kusikazobetseri. (1Ako. 15:17) Kutenda  mu rumuko ra Djesu kunoita kuti titende kuti anhu amweni acazomutswa.

5-6. Masoko ari pana 1 Akorinti 15:3, 4 anoreyei katiri?

⁵ Pauro paakatara nge zve rumuko, iyena wakapanganidza zviro zvitatu zvinoteera: (1) “Kristu akafira zvitema zvedu.” (2) Ayena “akaigwa.” (3) Ayena “akamutswa pa zuwa recitatu, maererano no zvinoreketwa ne Bhaibheri.”—Erengai 1 Akorinti 15:3, 4.

⁶ Rufu ra Djesu, kuigwa, uye kumutswa kake zvinorei katiri? Mu phorofiti Isaya wakareketa kuti Mesiya ‘aizobviswa pa nyika ye apenyu’ uye aizopaswa “mbuto ye kuigirhwa pamwepo no anhu akashata.” Asi andizvopi zvega. Isaya wakatunhudzira eciti Mesiya aizothwara “zvitema zve anhu ajinji.” Djesu akaita izvona nge kupasa upenyu wake hingana rusudzunuro. (Isa. 53:8, 9, 12; Mt. 20:28; Aro. 5:8) Rufu, kuigwa, uye kumutswa ka Djesu, kunotipasa rugondo rekuti tinokwanisa kusudzunurhwa pa citema, pa rufu, uye hama dzedu dzakafa dzicamutswa kuti dziraramezve.

7-8. Cinyi cingabetsera aKristu kuti agare no rugondo rekuti Djesu akamutswa?

⁷ Kuti tigare no rugondo rekuti kucaoneka rumuko, tinodikana kutenda kuti Djesu akamutswa. Tingagara kudini no rugondo rekuti Djesu akamutswa?

⁸ Anhu akawanda akaona Djesu mu masure mekunge amutswa uye akazvitendadi. (1Ako. 15:5-7) Mupupuri we kutanga unoreketwa na Pauro ndi mu phostori Pedru (Kefasi). Grupu re afundi, rakatendera kuti Pedru wakaona Djesu mu masure mekumutswa. (Ru. 24:33, 34) Kupinda izvi, anhu anokwana kuita “gumi na airi,” kana kuti aphostori akaona Djesu mu aamutswa. Pedzepo, Kristu “akadzipangidza ku hama dzinodarika 500 pa nguwa imweyo,” pamweni pa musangano wiya unopfadza wakaizirhwa ku Garireya unoreketwa pana Mateu 28:16-20. Djesu ‘akadzipangidzawo kuna Tiyago’ pamweni Tiyago wainga ari hama ya Djesu ye kunyama, zvekuti pa kutanga ainga asikatendi kuti Djesu ainga ari Mesiya. (Ju. 7:5) Mu masure mekuona Djesu amutswa Tiyago wakazotenda. Zvinoshamisa kuti, mukati me gore ra 55 K.A. Pauro paakatara tsamba ii, anhu akawanda akaona Djesu mumsure me kumutswa, ainga aciri kurarama.

9. Zvatinoerenga pana Zviito 9:3-5, icokwadi cipizve caikwanisa kupangidzwa na Pauro kuti Djesu akamutswadi?

⁹ Nge kuhamba ke nguwa, Djesu akadzipangidza kuna mu phostori Pauro. (1Ako. 15:8) Pauro (Sauro) painga ecienda ku Damasco, wakazwa izwi ra Djesu uye akaona cipangidzo ca Kristu ari kudenga. (Erengai Zviito 9:3-5.) Zvakaitika kuna Pauro, zvinopangidza pamhene kuti kumutswa ka Djesu ainganopi ye kunyepa.—Zvi. 26:12-15.

10. Rugondo re rumuko rakabetsera Pauro kuti aitei?

¹⁰ Ku anhu amweni, kupupura kaiita Pauro kuti Djesu amutswa, kaishamisa. Ngei? Ngekuti iyena waitambudza aKristu. Asi paakagara no cokwadi cekuti Djesu ainga amutswa, Pauro wakaseenza no simba kuti abetsere amweni kuti aziyewo cokwadi ici. Iyena wakashingirira kupondwa, kupinzwa mu karaboso uye ngozi dzakakura kuti akwanise kuparidzira amweni nge zva Djesu. (1Ako. 15:9-11; 2Ako. 11:23-27) Pauro wainga anokutenda kese kuti Djesu ainga amutswa uye kuti ainga akashinga dakara pakufa kuti adziirire kutenda kake. Kupupurira kakaizwa no aKristu okutanga, akutunhudziri rugondo redu rekuti Djesu akamutswa here? Uye akutunhudziri kutenda kedu mu rumuko here?

11. Ngei amweni ku Akorinti amweni ainga ano maonero akashata akaringana no rumuko?

¹¹ Anhu amweni e mu thaundi re ku Grécia ainga ano marangariro akashata anocokuita no rumuko, aona aiti “apana kumuka ke akafa.” Ngei? (1Ako. 15:12) Mafirozofo e ma thaundi amweni e ku Grécia, Atenas, aiseka ndangariro idzona dzekuti Djesu ainga amutswa. Mushobo uu we kurangarira wakabata-batawo aKristu e ku Korinti. (Zvi. 17:18, 31, 32) Pamweni anhu aitorangarira kuti kumutswa ke akafa akuitiki, awona airangarira kuti munhu ainga “akafa” nge ndaa ye citema, asi “mupenyu” nge ndaa yekuti wa mu Kristu. Ngokudaro, munhu wese ainga asikatendi kuti Djesu akamutswa, kutenda ke munhu uu kainga kusina zvakunoreya. Kudai Mwari asikazi kumutsa Djesu, apana rusudzunuro rainga rariphwa uye ese akarumbwa ari mu citema. Ngokudaro, aya ainga asikatendi mu rumuko ainga asina kariro ye cokwadi.—1Ako. 15:13-19; Ahe. 9:12, 14.

12. Maererano na 1 Pedru 3:18, 22, ngei kumutswa ka Djesu kainga kakasiyana no kuya kaiitika kare?

¹² Pauro wainga ano rugondo rekuti “Kristu amutswa kubva ku akafa.” Rumuko ra Djesu rainga rakakura kupinda rakaitika kare; ngekuti aya ainga amutswa akazofazve. Pauro wakati Kristu ainga ari “cibereko cekutanga kune aya akawata mu rufu.” Nge gwanza ripi? Ngekuti ayena ainga ari munhu we kutanga we kumutswa hingana munhu we mwiya uye wokutanga pa kukwira kudenga.—1Ako. 15:20; Zvi. 26:23; erengai 1 Pedru 3:18, 22.

13. Pauro wakasiyanisa kudini Adhamu na Djesu?

¹³ Rufu re munhu umwe basi ricaunza upenyu ku anhu ese nge gwanza ripi? Pauro wakapasa mhinduro ino musoro we mubvunzo uu. Iyena wakapanganidza musiyano uri pano zvakashaishwa na Adhamu uye no zvakaizwa na Djesu. Nge ndaa ya Adhamu, Pauro wakatara eciti: “Rufu rakawiya no munhu umwe basi.” Adhamu paakaita citema, iyena wakaunzisa rufu kaari kamare uye no mubarirhwana wake. Dakara na nyamasi tirikuneseka nge zvishaishi zvake. Nge dii rimweni, Mwari paakamutsa Mwana wake, isusu takagara no kariro ye ramangwana yakanaka! “Kumutswa ke akafa kakawiyawo no munhu umwe basi,” Djesu. Pauro wakareketa eciti: “Ngekuti ese anofa nge ndaa ya Adhamu, nge ndaa ya Kristu esewo acaona upenyu.”—1Ako. 15:21, 22.

14. Adhamu acamutswa here? Panganidzai.

¹⁴ Pauro aida kureyei paakati “nge ndaa ya Adhamu ese anofa”? Pauro wairangarira nge zve mubarirhwana wa Adhamu. Nge kugara nhaka citema uye nokusama kukwana, aona akatemerhwa rufu. (Aro. 5:12) Adhamu aabatanidzwi pa anhu aya “acatambira upenyu.” Cibairo ca Kristu acipfudzi citema cake, ngekuti Adhamu wainga munhu wakakwana, uye wakasanangura kusazwira Mwari nge kuda. Zvakaitika na Adhamu ndizvona zvicaitikawo kune aya acatongwa no “Mwana we munhu” hingana “mbudzi,” ‘oparadzwa no kusikaperi.’—Mt. 25:31-33, 46; Ahe. 5:9.

15. Ndiyanani anozwi “ese” aya “acatambira upenyu”?

¹⁵ Onai zvakareketwa na Pauro, “nge ndaa ye aKristu ese acaonawo upenyu.” (1Ako. 15:22) Pauro wakatara tsamba yake ku aKristu akadzodzwa e mu Korinti awo aizomutswa kuti ararame kudenga. AKristu aya ainga “akaceneswa mukubatana na Kristu Djesu, makadaidzwa kuti mugare acena.” Uye Pauro wakatizve “aya akawata mu rufu pamepo  na Kristu.” (1Ako. 1:2; 15:18; 2Ako. 5:17) Mu tsamba imweni yakafemerhwa, Pauro wakatara eciti, “takabatana [na Djesu] mu rufu rakatodzana no rake” uye “ticabatanawo naye mu kumutswa kake.” (Aro. 6:3-5) Djesu akamutswa hingana munhu we mwiya uye akaenda kudenga. Uye ndizvonawo zvicaitika no anhu ese “akabatana na Kristu,” kana kuti, no aKristu ese akadzodzwa no mwiya mucena.

16. Pauro waida kureyei paakati “cibereko cekutanga”?

¹⁶ Pauro wakatara kuti Kristu wainga amutswa hingana “cibereko cekutanga kuno aya akawata mu rufu.” Amweni akadai hingana Razaro, ainga akambomutswa pa nyika, asi Djesu ndiyena we kutanga pa kumutswa hingana munhu we mwiya uye kutambira upenyu usikaperi. Ayena angakwanisa kuezaniswa no micero yekutanga yaipaswa Mwari nge aIsraeri. Kupinda izvi, nge kudaidza Djesu hingana “cibereko ce kutanga,” Pauro waida kureya kuti mumasure ma Djesu, amweni aizomutswawo kuti azoraramire kudenga. Aaphostori no amweniwo “akabatana na Kristu,” pakupedzesera, acamutswawo kuti ararame kudenga, hingana zvakaitika kuna Djesu.

17. Aya “akabatana na Kristu” aizomutswa riini kuti azoraramire kudenga?

¹⁷ Pauro paakatarira aKorinti, kumutswa ke aya “akabatana na Kristu” kainga kusati katanga. Pauro waipangidza kuti izvona zvaizoitika ku nguwa ye mberi. Iyena wakati: “Umwe na umwe pa mbuto yake: Kristu cibereko ce kutanga, Kozoteera aya ari a Kristu, munguwa yo kuwapo kake.” (1Ako. 15:23; 1 Ate. 4:15, 16) Nyamasi uno tiri kurarama mu nguwa inozwi “kuwapo” ka Kristu. Aaphostori no aKristu amweni akadzodzwa aidikana kuetsera dakara pa nguwa ii kuti azomutswe kuti ararame kudenga uye “abatanidzwewo [na Djesu] pa kumuka kakatodzana no kake.”

18. (a) Ngei tecikwanisa kuti pacaoneka rumuko rimweni haiwa rekudenga basi? (b) Maererano na 1 Akorinti 15:24-26, tinofundei no zvicaitika kudenga?

¹⁸ Hino zvakadini ne aya asina kariro ye kutonga na Kristu kudenga? Awona ano kariro ye kumutswawo. Bhaibheri rinoti, Pauro no amweni aizoenda kudenga anobatanidzwa pa “kumuka ke kutanga kubva ku akafa.” (Afi. 3:11) Kana kuti, tsamba ii inotibetsera kuziya kuti kucaonekazve rumuko rimweni pa kupedzesera. Izvi zvinobatanawo no masoko  akarekethwa na Djobo nge zve ramangwana rake. (Djo. 14:15) “Aya ari a Kristu, mu nguwa yo kuwapo kake” anonga ari kudenga na Djesu paacaparadza utongi wese no ano masimba. Kunyazi no “muzondi we kupedzesera, rufu,” ucaparadzwawo. Ese aya anonga amutswa kuti araramire kudenga aazofizve. Asi zvakadini no amweniwo?—Erengai 1 Akorinti 15:24-26.

19. Aya acagara pa nyika pano, angakwanisa kugara no kariro ipi?

¹⁹ Ikariro ipi ingakwanisa kugara no aya acararama pa nyika? Inooneka pa masoko akatarhwa na Pauro: “Inini ndino kariro . . . kuti kucaoneka kumuka ke anatsi no aya asiripi anatsi.” (Zvi. 24:15) Ngokuti kudenga akupindi munhu asikanatsi, masoko aya anopangidza rumuko ricaitika pasi pano mu nguwa ye mberi.

20. Fundo ii yabambisa kudini kariro yenyu?

²⁰ Zvezvirokwazvo, “kucaoneka rumuko”! Aya acamutswa kuti araramire pasi pano, acaona mukana we kurarama nokusikaperi. Mungakwanisa kugonda zvipikirhwa izvi! Kariro ii ingakwanisa kumunyaradzai paya pamunorangarira shamwari dzenyu no adiwa enyu akafa. Awona acamutswa pa nguwa yekuti Kristu no amweni ‘paacatonga ke makore anokwana 1000.’ (Zva. 20:6) Imwimwi mungakwanisa kugara no kariro yakacengeteka yekuti, kana mukafa makore 1000 asati atanga, mucamutswa. ‘Kariro yedu aiti kuti tiore mwoyo.’ (Aro. 5:5) Ingakwanisa kumubambisai uye ingatunhudzira mupfaro wenyu pa basa ramunoitira Mwari. Asi tingakwanisa kufunda zvakawanda mu tsamba ya 1 Akorinti kapituro 15. Ndizvona zvaticaona mu fundo inoteera.