1-2. Eaha te tiaturiraa faahiahia o te mau tavini a Iehova?

 MEA faufaa roa te tiaturiraa! Te tiaturi ra vetahi i te hoê faaipoiporaa oaoa, i te hoê oraraa maitai no ta ratou tamarii aore ra i te hoê ea maitai. Hoê â atoa no tatou, e ere râ tera anaˈe. Te tiaturi atoa ra hoi tatou e ora e a muri noa ˈtu e e tia faahou mai to tatou feia herehia tei pohe.

² Ua parau te aposetolo Paulo: “Ta ˈu tiaturiraa i te Atua, . . . oia hoi e tia-faahou-raa to te feia parau-tia e to te feia parau-tia ore.” (Ohi. 24:15) Ua tiaturi atoa te patereareha Ioba e tupu te hoê tia-faahou-raa. Ua papu ia ˈna e haamanaˈo e e faatia Iehova ia ˈna mai te pohe mai.—Ioba 14:7-10, 12-15.

3. E nafea tatou e faufaahia ˈi i te Korinetia 1 pene 15?

³ E tuhaa “te tia-faahou-raa o tei pohe” o te mau haapiiraa tumu a te mau Kerisetiano. (Heb. 6:1, 2) Ua papaihia ta Paulo mau faataaraa no nia i te tia-faahou-raa i roto i te Korinetia 1 pene 15. Ua faaitoito mau ta ˈna i papai i te mau Kerisetiano matamua e e nehenehe atoa te reira e haapuai i to tatou tiaturiraa no a muri aˈe.

4. Maoti te aha e nehenehe ai tatou e tiaturi e tia faahou mai te feia herehia tei pohe?

⁴ Maoti te tia-faahou-raa o Iesu Mesia e nehenehe ai tatou e tiaturi e tia faahou mai te feia herehia tei pohe. Tei roto atoa tera haapiiraa i “te parau apî oaoa” ta Paulo i faaite atu i to Korinetia. (Kor. 1, 15:1, 2) Ua faataa atoa oia mea titauhia ia tiaturi te mau Kerisetiano i te tia-faahou-raa o Iesu. Aita anaˈe, mea faufaa ore to ratou faaroo.—Kor. 1, 15:17.

5-6. Eaha te faufaaraa o te Korinetia 1, 15:3, 4 no tatou?

 ⁵ A haamata ˈi Paulo i ta ˈna faataaraa no nia i te tia-faahou-raa, ua faahiti oia e toru parau papu. A tahi, “ua pohe te Mesia no ta tatou mau hara.” A piti, “ua hunahia” oia. E a toru, “ua faatiahia mai oia ia au i te mau Papai” i te toru o te mahana.—A taio i te Korinetia 1, 15:3, 4.

⁶ Eaha te faufaaraa no tatou ia ite ua pohe, ua hunahia e ua tia faahou mai Iesu? Ua tohu te peropheta Isaia e “tâpû-ê-hia hoi [te Mesia] i te fenua o te feia e ora nei” e e “haapaohia to ˈna menema i rotopu i te taata ino ra.” Ua faaite atoa râ Isaia e hopoi te Mesia i “te hara a te taata atoa e rave rahi” e ua faatupu Iesu i tera mau parau a horoa ˈi i to ˈna ora ei tusia taraehara. (Isa. 53:8, 9, 12; Mat. 20:28; Roma 5:8) Ua riro ïa te pohe, te hunaraa e te tia-faahou-raa o Iesu ei niu papu no to tatou tiaturiraa e tiamâ mai tatou i te hara e te pohe e e farerei faahou tatou i te feia herehia tei pohe.

7-8. Eaha tei tauturu i te mau Kerisetiano ia papu ua tia faahou mai iho â Iesu?

⁷ No te tiaturi e tia-faahou-raa to te feia pohe, mea titauhia ia papu ia tatou ua tia faahou mai iho â Iesu. Eaha te haapapuraa ua faatia Iehova ia Iesu mai te pohe mai?

⁸ E rave rahi taata tei ite ia Iesu i muri aˈe i to ˈna tia-faahou-raa. (Kor. 1, 15:5-7) O Kepha, oia hoi te aposetolo Petero, te taata matamua ta Paulo i faahiti. E ua haapapu te tahi mau pǐpǐ i te reira. (Luka 24:33, 34) Ua ite atoa 12 aposetolo ia Iesu. I muri aˈe, ua fa ˈtu Iesu i mua “hau atu e 500 taeae i te hoê â vahi,” peneiaˈe i Galilea i te taime a faahiti ai o ˈna i tei papaihia i roto i te Mataio 28:16-20. I muri aˈe i to Iesu faraa ˈtu i to ˈna taeae ia “Iakobo,” tiaturi ihora oia o Iesu iho â te Mesia. (Ioa. 7:5) I te taime a papai ai Paulo i ta ˈna rata i to Korinetia i te matahiti 55, te ora noa ra â e rave rahi o tei ite ia Iesu i muri aˈe i to ˈna tia-faahou-raa. Ua nehenehe ïa ratou e haapapu ua tupu mau iho â te reira.

9. Ia au i te Ohipa 9:3-5, eaha te tahi atu haapapuraa ua tia faahou mai iho â Iesu?

⁹ I muri aˈe, ua fa atoa ˈtu Iesu ia Paulo. (Kor. 1, 15:8) A haere ai Paulo i Damaseko, faaroo ihora oia i te reo o Iesu e ite orama ˈtura ia ˈna i roto i to ˈna hanahana i te raˈi. (A taio i te Ohipa 9:3-5.) Tera te tahi atu haapapuraa ua faatia-mau-hia Iesu mai te pohe mai.—Ohi. 26:12-15.

10. No to ˈna papu ua faatiahia Iesu mai te pohe mai, eaha ta Paulo i rave?

¹⁰ No vetahi, mea faufaa roa ˈtu â paha ta Paulo faatiaraa no te mea i hamani ino na oia i te mau Kerisetiano. A papu ai ia ˈna ua tia faahou mai iho â Iesu, ua tutava Paulo i te haapapu i te reira ia vetahi ê. Ua faaoromai oia noa ˈtu ua tairihia e ua tapeahia o ˈna e noa ˈtu ua ati oia i te parariraa te pahi. No te aha? No to ˈna hinaaro ia ite te taata atoa i te parau no Iesu. (Kor. 1, 15:9-11; Kor. 2, 11:23-27) No to Paulo papu ua faatiahia mai Iesu mai te pohe mai, ua ineine oia i te faaite i ta ˈna e tiaturi ra noa ˈtu e haapohehia o ˈna. Aita anei teie mau haapapuraa e tauturu ra ia outou ia papu ua faatiahia mai Iesu mai te pohe mai? E aita anei te reira e haapuai ra i to outou tiaturiraa e tia faahou mai te feia pohe?

11. No te aha paha vetahi i Korinetia i faatupu ai i te manaˈo hape no nia i te tia-faahou-raa?

¹¹ I te oire Heleni o Korinetia, e manaˈo hape to vetahi no nia i te tia-faahou-raa. Ua tae roa ratou i te parau “aita e tia-faahou-raa to te feia pohe.” (Kor. 1, 15:12) No te aha? I te tahi atu oire Heleni o Ateno, ua vahavaha te mau philosopho i te parau ua tia faahou mai Iesu. No reira to Korinetia, oia atoa vetahi i roto i te amuiraa, i pee ai i to ratou manaˈo. (Ohi. 17:18, 31, 32) Ua tiaturi atoa paha vetahi te faahohoˈa ra te tia-faahou-raa i te hoê taata o tei pohe a rave ai i te ino e tei ora faahou mai a riro mai ai ei Kerisetiano. Noa ˈtu eaha te tumu i ore ai ratou i tiaturi i te tia-faahou-raa, mea faufaa ore to ratou faaroo. Ahani aita te Atua i faatia mai ia Iesu, aita ïa te hoo i aufauhia e eita tatou e faatiamâhia i te hara. Aita ïa e tiaturiraa papu to te feia i ore i tiaturi i te tia-faahou-raa!—Kor. 1, 15:13-19; Heb. 9:12, 14.

12. Ia au i te Petero 1, 3:18, 22, no te aha mea taa ê to Iesu tia-faahou-raa i to te feia i faatiahia na mua ˈtu ia ˈna?

¹² Ua papu maitai ia Paulo “ua faatiahia iho â te Mesia mai roto mai i tei pohe.” Mea taa ê roa to ˈna tia-faahou-raa i to te feia i faatiahia na mua ˈtu ia ˈna tei pohe faahou hoi i muri aˈe. Ua parau Paulo o Iesu “te hotu matamua no tei taoto i roto i te pohe.” O ˈna hoi te taata matamua tei faatiahia mai ei varua no te ora i te raˈi.—Kor. 1, 15:20; Ohi. 26:23; a taio i te Petero 1, 3:18, 22.

13. Mea nafea Paulo i te faaiteraa i te taa-ê-raa i rotopu ia Adamu e Iesu?

¹³ E nafea te pohe o te hoê taata e nehenehe ai e faaora e mirioni taata? No te pahono i tera uiraa, ua haaferuri Paulo i te feia e faaroo ra ia ˈna. Ua faahiti oia i ta Adamu e i ta te Mesia i faatupu no te huitaata. No Adamu, ua parau Paulo: “No te taata hoê ra i ô mai ai te pohe.” No ta Adamu hara, ua raea o ˈna iho, to ˈna huaai e tatou atoa i te pohe. Mea taa ê roa râ te tupu a muri aˈe no te mea ua faatia mai te Atua i ta ˈna Tamaiti, “no te taata hoê [oia hoi Iesu] e faatia-faahou-hia ˈi tei pohe.” Ua haaferuri Paulo, “no Adamu hoi te taata atoa e pohe ai,” tera râ “no te Mesia atoa e noaa ˈi i te taata atoa te ora.”—Kor. 1, 15:21, 22.

14. E faatia-faahou-hia anei Adamu? A faataa.

¹⁴ No te aha Paulo i parau ai “no Adamu hoi te taata atoa e pohe ai”? Te manaˈo ra oia i te huaai o Adamu tei raea i te hara e te huru tia ore e i te pohe atoa na roto ia Adamu. (Roma 5:12) Aita Adamu i rotopu i te feia e noaa ia ratou te ora. Eita te tusia taraehara o te Mesia e tapoˈi i ta ˈna hara no te mea e taata tia roa o ˈna tei maiti i te faaroo ore i te Atua. Hoê â hopearaa to Adamu e to te feia ta “te Tamaiti a te taata” e haava ei “puaaniho” o te roohia i “te pohe mure ore.”—Mat. 25:31-33, 46; Heb. 5:9.

15. O vai to rotopu i “te taata atoa” e noaa ˈi ia ratou te ora?

¹⁵ A tapao ua parau Paulo “no te Mesia atoa e noaa ˈi i te taata atoa te ora.” (Kor. 1, 15:22) Ua papai Paulo i ta ˈna rata i te mau Kerisetiano faatavaihia no Korinetia o te faatiahia mai no te ora i te raˈi e “tei haamoˈahia ia riro ei hoê e te Mesia ra o Iesu e tei titau-manihini-hia ei feia moˈa.” Ua faahiti atoa oia ia ratou mai “tei hoê e te Mesia i roto i te pohe.” (Kor. 1, 1:2; 15:18; Kor. 2, 5:17) I roto i te  tahi atu o ta ˈna mau rata, ua papai Paulo ua hoê teie feia e Iesu i “te huru o to ˈna pohe, mea papu e e hoê atoa ïa [ratou] e o ˈna i te huru o to ˈna tia-faahou-raa.” (Roma 6:3-5) Ua faatiahia mai Iesu ei varua e ua hoˈi oia i te raˈi. Tera atoa ïa te haamaitairaa a te feia atoa o “tei hoê e te Mesia,” oia hoi te mau Kerisetiano faatavaihia atoa.

16. Eaha ta Paulo i faaite ma te faahiti i te parau “hotu matamua” no Iesu?

¹⁶ Ua papai Paulo o te Mesia tei faatiahia mai ei “hotu matamua no tei taoto i roto i te pohe.” Ua faatiahia mai vetahi mai ia Lazaro i te ora i nia i te fenua, o Iesu râ te taata matamua tei faatiahia mai te pohe mai ei varua no te ora i te raˈi e a muri noa ˈtu. E nehenehe o ˈna e faahohoˈahia i te hotu matamua ta te mau Iseraela e pûpû i te Atua. Ma te faahiti i te parau “hotu matamua” no Iesu, te faaite ra ïa Paulo te vai ra te tahi atu mau taata o te faatiahia mai te pohe mai no te ora i te raˈi. E titauhia i te mau aposetolo e i te feia atoa “tei hoê e te Mesia” ia pee ia Iesu. I te taime faataahia, e fanaˈo ratou i te hoê â huru tia-faahou-raa e to Iesu.

17. Afea te feia “tei hoê e te Mesia” e fanaˈo ai i ta ratou haamaitairaa i te raˈi?

¹⁷ Aita â te tia-faahou-raa o te feia “tei hoê e te Mesia” i tupu atu ra i te taime a papai ai Paulo i to Korinetia. Teie râ ta ˈna i parau no te faaite e tupu te reira i muri aˈe: “Te taata tataitahi râ ia au i to ˈna iho tiaraa: te Mesia te hotu matamua, e i muri aˈe te feia no te Mesia i te tau o to ˈna hoˈiraa mai.” (Kor. 1, 15:23; Tes. 1, 4:15, 16) Te ora nei tatou i te tau o te “hoˈiraa mai” o te Mesia. Ua titauhia i te mau aposetolo e i te tahi atu mau Kerisetiano faatavaihia tei taoto i roto i te pohe ia tiai i to te Mesia hoˈiraa mai no te “hoê . . . e [o Iesu] i te huru o to ˈna tia-faahou-raa” a fanaˈo atu ai i ta ratou haamaitairaa i te raˈi.

18. (1) No te aha e nehenehe ai e parau e tupu te tahi atu tia-faahou-raa i muri aˈe i te tia-faahou-raa i te raˈi? (2) Ia au i te Korinetia 1, 15:24-26, eaha te mau ohipa ta te mau Kerisetiano e faatiahia i te raˈi e rave?

¹⁸ Eaha te nehenehe e parau no te mau Kerisetiano haapao maitai atoa aita e tiaturi ra e ora i te raˈi e te Mesia? Te tiaturi atoa nei ratou e tia-faahou-raa to te  feia pohe. Te faaite ra te Bibilia e fanaˈo Paulo e te tahi atu e tiaturi ra e ora i te raˈi i “te tia-faahou-raa matamua mai te pohe mai.” (Phil. 3:11) Te auraa, te vai ra te tahi atu tia-faahou-raa i muri mai e te tuati ra ïa te reira i ta Ioba i tiaturi. (Ioba 14:15) Tei te raˈi e o Iesu “te feia no te Mesia i te tau o to ˈna hoˈiraa mai” no te “haamou . . . i te mau faatereraa e mana e puai atoa.” E haamou-atoa-hia “te enemi hopea,” oia hoi te pohe. Eita te feia e faatiahia i te raˈi e pohe faahou. E te feia ïa e tiaturi ra e ora i nia i te fenua?—A taio i te Korinetia 1, 15:24-26.

19. Eaha te tiaturiraa o te feia e tiaturi ra e ora i nia i te fenua?

¹⁹ E nehenehe atoa te feia e tiaturi ra e ora i nia i te fenua e parau mai ia Paulo: “Ta ˈu tiaturiraa i te Atua, . . . oia hoi e tia-faahou-raa to te feia parau-tia e to te feia parau-tia ore.” (Ohi. 24:15) Eita iho â te hoê taata parau-tia ore e nehenehe e haere i te raˈi, te faahiti ra ïa Paulo i te hoê tia-faahou-raa i nia i te fenua.

20. Mea nafea ta tatou i haapii mai i te faaitoitoraa ia outou?

²⁰ Mea papu, “e tia-faahou-raa to te feia parau-tia e to te feia parau-tia ore.” E nehenehe teie feia o te faatiahia mai e tiaturi e ora e a muri noa ˈtu i nia i te fenua. E ere i te moemoeâ, e tupu iho â te reira! E tamahanahana tera tiaturiraa ia pohe tei herehia. E faatiahia ratou mai te pohe mai i te roaraa o te tau e faatere ai te mau Kerisetiano faatavaihia “ei arii e te Mesia 1 000 matahiti.” (Apo. 20:6) E mai te peu e pohe noa ˈtu tatou na mua ˈˈe e haamata ˈi na 1 000 matahiti faatereraa a Iesu, e faatiahia mai iho â tatou! Eita to tatou “tiaturiraa e faatupu i te haama.” (Roma 5:5) E tauturu te reira ia tatou ia mau papu e ia oaoa a tavini noa ˈi i te Atua. E haapiiraa ê atu râ ta te Korinetia 1 pene 15 e horoa mai e e tatarahia te reira i roto i to mua ˈtu tumu parau.