1, 2. Кыӵе паймымон осконзы вань Иеговалэн ужась-тыршисьёсызлэн?

 ОСКОН котькуд адямилэн улоназ бадӟым инты басьтэ. Кин ке но оске, солэн кузпалэныз юн кусыпъёсыз луозы шуыса, кин ке но — нылпиосыз тазалыкоесь будозы шуыса, нош кин ке но — секыт висёнзэ вормыны быгатоз шуыса. Зэм но, сыӵе осконмы милям но вань. Нош ми христианъёс луиськомы бере, милям мукет осконмы но вань: ми оскиськомы пырак улыны но адӟиськыны матысь адямиосынымы, кудъёсыз кулӥзы.

² Апостол Павел шуиз: «Инмарлы оскисько: Со шонер улэмъёсты но, шонер улымтэосты но кулэмысь улӟытыса султытоз» (Ап. уж. 24:15). Улӟытонлы оскон сярысь Павел гинэ ӧз вера. Со сярысь вераз вал ини Иов. Со оскиз, Инмар сое тодаз ваёз но улӟытоз шуыса (Иов 14:7—10, 12—15).

3. Маин милемлы юрттыны быгатоз Коринфъёслы нырысетӥ гожтэтысь 15-тӥ люкет?

³ Кулэмъёсты улӟытон сярысь дышетон «Христослэн дышетонэзлэн кутсконэз» пӧлы пыре; со христиан осконлэн инъетэзлэн оглюкетэз луэ (Евр. 6:1, 2). Коринфъёслы нырысетӥ гожтэтаз 15-тӥ люкетын Павел вера улӟытон сярысь. Солэн кылъёсыз нырысетӥ даурысь христианъёсты юнматӥзы, луоз. Соос милемыз но юнматыны быгатозы. Солэн кылъёсыз милесьтым осконмес эшшо но юнматозы, ми улӟытонлы трос аръёс оскиськомы ини ке но.

4. Малы ми оскиськомы, матысь адямиосмы улӟозы шуыса?

⁴ Иисус ӧй улӟысал ке, соку матысь адямиосмы улӟозы шуыса осконмы ӧй луысал. Иисус Христосэз улӟытон — со ӟеч иворлэн оглюкетэз, кудзэ Павел Коринфын улӥсьёслы  вераз (1 Кор. 15:1, 2). Павеллэн гожтэмезъя, христиан мурт малпа ке, Христос ӧз улӟы шуыса, соку солэн осконэз юнме луэ (1 Кор. 15:17). Иисуслэн улӟемезлы оскон христиан осконмылэн инъетэз луэ.

5, 6. Кыӵе оскон сёто милемлы куинь зэмлыкъёс, кудъёсыз гожтэмын 1 Коринфъёслы 15:3, 4?

⁵ Улӟытон сярысь вераськонзэ кутскыкуз, Павел куинь зэмлыкъёс сярысь вера: 1) Христос асьмелэн сьӧлыкъёсмы понна кулӥз, 2) со ватэмын вал но, 3) азьпалзэ ивортонъёсын гожтэмъя, куинетӥ нуналаз улӟыса султӥз. (Лыдӟе 1 Коринфъёслы 15:3, 4.)

⁶ Мае возьмато та зэмлыкъёс ми понна? Исаия пророк азьло ик вераз, Мессия «улэпъёслэн музъем вылысьтызы палэнтэмын» луоз но «йырвандӥсьёсын огазе солы шайгу» дасялозы шуыса. Озьы ик Исаия гожтӥз, Мессия «Ас вылаз тросэзлэсь сьӧлыксэс» басьтоз шуыса. Та кылъёс быдэсмизы, куке Иисус аслэсьтыз улонзэ курбонлы сётӥз, милемыз мозмытон понна (Ис. 53:8, 9, 12; Матф. 20:28; Рим. 5:8). Озьыен, Иисуслэн кулэмез, сое ватэмзы но солэн улӟыса султэмез милесьтым осконмес юнматэ, ми сьӧлыклэсь но кулонлэсь мозмытэмын луомы шуыса но матысь адямиосынымы пумиськомы шуыса, кудъёсыз кулэмын ини.

7, 8. Малы христианъёс оскыны быгато, Иисус улӟиз шуыса?

⁷ Кызьы ми адӟимы, улӟытонлы осконмы юн герӟаськемын Христослэн улӟеменыз. Соин ик милемлы осконо, Иегова зэмзэ ик Иисусэз улӟытӥз шуыса. Малы ми талы оскыны быгатӥськомы?

⁸ Улӟем Иисусэз трос адямиос адӟизы (1 Кор. 15:5—7). Нырысь Павел вера Кифа, яке апостол Пётр, сярысь. Пётр улӟем Иисусэз адӟиз шуыса, кӧня мукет дышетскисьёс но веразы (Лука 24:33, 34). Собере Павел гожтэ, улӟем Иисус «дас кыкназылы», яке вань апостолъёслы, возьматскиз шуыса. Берлогес, Павеллэн верамезъя, Христос «вить сюлэсь трос агай-вынъёслы ваньзылы ӵош возьматскиз». Павел вераз, луоз, Галилеяын шумпотон вайись пумиськон сярысь, кудӥз сярысь гожтэмын Матфейлэсь 28:16—20. Озьы ик Иисус «возьматскиз Иаковлы». Татын Павел вера, вылды, Иисуслэн выныз сярысь. Азьло Иаков ӧз оскы, солэн агаез — Мессия шуыса, нош улӟем Иисусэз адӟыса, со талы оскыны кутскиз (Иоанн 7:5). Тунсыко, Павел аслэсьтыз гожтэтсэ гожтӥз асьме вакытысь 55-тӥ ар котырын. Соку тросэз соос пӧлысь, кинъёс улӟем Иисусэз адӟизы, улэпесь на вал. Соин ик Иисуслэн улӟемезлы кин ке уг оскы вал ке, та адямиослэсь юаны быгатэ вал.

9. Апостолъёслэн ужъёсазы 9:3—5 гожтэмъя, мар эшшо вераны быгатӥз на Павел Иисуслэн улӟемез сярысь?

⁹ Берлогес Иисус Павеллы но возьматскиз (1 Кор. 15:8). Павел, кудӥз соку Савл шуыса тодмо вал, Дамаске мынэ вал. Соку со улӟем Иисуслэсь куаразэ кылӥз но сое инмысь адӟиз. (Лыдӟе Апостолъёслэсь ужъёссэс 9:3—5.) Павелэн луэм учыр но возьматӥз, Иисус зэмзэ ик улӟиз шуыса (Ап. уж. 26:12—15).

10. Мар карыны кутскиз Павел Иисуслэн улӟемезлы оскыны кутскемез бере?

¹⁰ Павеллэн верамез тунсыко вал, малы ке шуоно со азьвыл христианъёсты уйылӥз-улляз. Иисус улӟиз шуыса валам бераз, Павел вань кужымзэ поныса, мукетъёслы но та сярысь вераны кутскиз. Инмар Иисусэз улӟытӥз шуыса тодытыкуз, Павелэз жугылӥзы, пытсэтъёсы пуктылӥзы, озьы ик со кӧня ке пол корабль куашкан-выёнэ учыралляз  (1 Кор. 15:9—11; 2 Кор. 11:23—27). Павел туж юн оскиз Иисуслэн улӟемезлы, соин ик со, кулонлэсь кышкатэк, со сярысь вералляз. Нырысетӥ даурысь христианъёслэн верамзы тӥледыз уг оскыты-а, Инмар Иисусэз улӟытӥз шуыса? Та уг юнматы-а улӟытонлы оскондэс?

11. Малы Коринфысь куд-ог христианъёслэн улӟытон пумысен шонертэм учконъёссы вал?

¹¹ Грециысь Коринф карын улӥсь куд-ог христианъёслэн улӟытон сярысь шонертэм учконъёссы вал. Куд-огъёсыз соос пӧлысь веразы, «кулэмысь улӟыса султон ӧвӧл» шуыса (1 Кор. 15:12). Малы? Соос вылэ пыӵазы, вылды, Афиныысь философъёслэн учконъёссы, кудъёсыз Иисуслэсь улӟонзэ серем каризы (Ап. уж. 17:18, 31, 32). Мукет христианъёс малпазы, шӧдске, улӟытон зэмзэ ик ӧй вал шуыса. Соослэн малпамзыя, адями сьӧлыкъёсыз понна «кулэмын» вал, нош, христиан мурт луыса, со «улӟе». Шонертэм учконъёслэн кыӵе гинэ мугзы медаз луы, Павеллэн кылъёсызъя, та христианъёслэн осконзы юнме вал. Малы ке шуоно Инмар Иисусэз ӧз улӟыты ке, соку дун тырон сётэмын ӧй вал но одӥг адямилэн но сьӧлыкез куштэмын ӧй вал. Соин ик соослэн, кинъёс улӟытонлы ӧз оске, зэмос осконзы ӧй вал (1 Кор. 15:13—19; Евр. 9:12, 14).

12. Маин пӧртэм луэ Иисуслэн улӟемез азьвыл улӟытонъёслэсь, 1 Пётрлэн 3:18, 22 лыдэ басьтыса?

¹² Павел ас синъёсыныз адӟиз, «Христос кулэмысь улӟыса султӥз» шуыса. Азьло дыръёсы Инмар трос пол адямиосты улӟытъяз ке но, берлогес ваньзы соос кулӥзы. Нош Иисуслэн улӟонэз чылкак мукет вал. Павел Иисус сярысь вераз: «Кулэмъёс пӧлысь Со нырысетӥез, Кин улӟыса султӥз». Кызьы валано, Иисус нырысетӥез шуыса? Со вал нырысетӥез, кин духовной, яке синмын адӟыны луонтэм, мугорын улӟиз но инме ӝутскиз (1 Кор. 15:20; Ап. уж. 26:23; лыдӟе 1 Пётрлэсь 3:18, 22).

13. Кызьы Павел валэктӥз Адам но Иисус вискысь пӧртэмлыксэ?

¹³ Кызьы одӥг адямилэн кулэмез трос миллион адямиослы улон кузьманы быгатэ? Павел валамон валэктӥз, маин пӧртэм луэ со, мае вайиз адямиослы Адам, но со, мае вайыны быгатӥз Христослэн курбонэз. Адам сярысь малпаса, Павел гожтӥз: «Кулон адями пыр лыктӥз». Адамлэн сьӧлыкез солы аслыз но кулон вайиз, озьы ик солэн нылпиосызлы но. Солэн кылзӥськымтэезлэсь урод бервылъёссэ ми али но шӧдӥськомы на. Нош Инмар, аслэсьтыз Пизэ улӟытыса, милемлы вуоноезлы туж умой оскон сётӥз! Павел йылпумъян лэсьтӥз: «Кулэмъёслэн улӟыса султонзы но адями пыр [Иисус пыр] лыктӥз. Адам пыр ваньмыз кулылӥзы, нош Христос пыр ваньмыз улӟыса султозы» (1 Кор. 15:21, 22).

14. Улӟытоз-а Инмар Адамез? Валэктэ.

¹⁴ Мае возьмато Павеллэн кылъёсыз: «Адам пыр ваньмыз кулылӥзы»? Павел вераз Адамлэн нылпиосыз сярысь, кудъёсыз куло, малы ке шуоно соослы Адамлэсь сьӧлык но тырбыдэстэм улон выжиз (Рим. 5:12). Улӟытэмъёс пӧлын Адам уз луы. Иисуслэн мозмытӥсь курбонэз солы уз юртты, малы ке шуоно со тырбыдэс адями вал но Инмарлэсь юри ӧз кылзӥськы. Адамез возьма со ик, мар возьма соосты, кинъёсты «Адями Пи» судъялоз кечъёсты кадь. Соос пыраклы быдтэмын луозы. (Матф. 25:31—33, 46, ВД; Евр. 5:9).

15. Мар верамын 1 Коринфъёслы 15:22 улӟытон сярысь?

 ¹⁵ Висъялэ саклыктэс: Павел гожтӥз, «Христос пыр ваньмыз улӟыса султозы» шуыса (1 Кор. 15:22). Павел та гожтэтэз гожтӥз Коринфысь зырӟем христианъёслы, кудъёсыз инмын улон понна улӟыны кулэ вал. Павел соосты «Иисус Христос пыр дун-чылкыт луэмъёс» но «вӧсяськисьёс радэ ӧтемъёс» шуыса нима. Со сяна, со вера «Христослы оскыса кулэмъёс» сярысь но (1 Кор. 1:2; 15:18; 2 Кор. 5:17). Мукет гожтэтаз Павел гожтӥз: «Солэн кулонэзлы укшась кулонэн кулӥмы но озьы Соин герӟаськимы ке, соку Со выллем ик кулонысь улӟыса султомы» (Рим. 6:3—5). Иисус духовной мугорын улӟиз но инме ӝутскиз. Озьы ик луоз ваньмыныз «Христос пыр дун-чылкыт луэмъёсын» но, яке зырӟем христианъёсын.

16. Мар сярысь вераз Павел, Иисусэз «нырысетӥез» шуыса нимакуз?

¹⁶ Павел Иисус сярысь гожтэ: «Кулэмъёс пӧлысь Со нырысетӥез, Кин улӟыса султӥз». Висъялэ саклыктэс, соос, кинъёс Иисуслэсь азьлогес улӟизы (кылсярысь, Лазарь), музъем вылын улыны улӟизы, нош Иисус вал нырысетӥез, кинэ Иегова духовной мугорын улӟытӥз, инмын пырак улон понна. Павел Иисусэз «нырысетӥез» шуыса нимаз, озьы со возьматӥз, Иисус сяна, мукетъёс но инмын улон понна улӟыны кулэ вал шуыса. Апостолъёс но мукет зырӟем христианъёс ас дыраз озьы ик улӟыны кулэ вал.

17. Ку «Христос пыр дун-чылкыт луэмъёс» инмын улон понна улӟытэмын луыны кулэ вал?

¹⁷ Куке Павел Коринфын улӥсьёслы гожтэтсэ гожъяз, «Христос пыр дун-чылкыт луэмъёс» ӧз улӟе на вал. Павел вераз, со вуонояз луыны кулэ шуыса: «Нырысь ик Христос улӟыса султӥз, собере, Христос лыктэм бере [«Христос эксэй луон дыръя», ВД], Солэн адямиосыз но улӟыса султозы» (1 Кор. 15:23; 1 Фес. 4:15, 16). «Христос эксэй луон дыръя» — со вакыт, кудаз ми али улӥськомы. Соин ик, Христос кивалтыны кутскытозь, апостолъёс но мукет зырӟем христианъёс ӧз быгатэ инмын улыны но Иисусэн герӟаськыны, «Со выллем ик кулонысь улӟыса».

18. а) Малы вераны луоз, инмын улон понна улӟытон сяна, мукет улӟытон но луоз на шуыса? б) Кызьы 1 Коринфъёслы 15:24—26 гожтэм кылъёс валаны юртто, мар луоз инмын?

¹⁸ Библиын верамын, Павел но мукет христианъёс, кудъёсызлэн инмын улыны  осконзы вань, «нырысетӥяз улӟыса султонэ» пырыны кулэ шуыса (Усьт. 20:6). Озьыен, мукет улӟытон но луыны кулэ на. Со тупа соин, мар вераз азьпал улонэз сярысь Иов (Иов 14:15). Зырӟем христианъёс Иисусэн ӵош инмын луозы, куке со котькыӵе кузёяськонэз-кивалтонэз, котькыӵе властез но кужымез быдтоз. Со сяна, «Вань тушмонъёс пӧлысь самой пумаз быдтэмын луоз кулон». Соос, кинъёс инмын улыны улӟозы, ноку но уз кулэ ни. Нош мар луоз Инмарлы оскымон мукет христианъёсын, кудъёсызлэн инмын улыны осконзы ӧвӧл? (Лыдӟе 1 Коринфъёслы 15:24—26.)

19. Мае возьмало соос, кинъёс музъем вылын улыны оско?

¹⁹ Соослэсь, кинъёс оско музъем вылын пырак улыны, осконзэс юнмато Павеллэн кылъёсыз: «Инмарлы оскисько: Со шонер улэмъёсты но, шонер улымтэосты но кулэмысь улӟытыса султытоз» (Ап. уж. 24:15). Валамон, шонер улымтэос инмын улыны уг быгато шуыса. Озьыен, Павел вераз улӟытон сярысь, кудӥз вуонояз луоз музъем вылын.

20. Кызьы та статья улӟытонлы оскондэс юнматӥз?

²⁰ Ми юн оскиськомы, улӟытон луоз шуыса! Соос, кинъёсты Инмар улӟытоз музъем вылын улыны, пырак улыны быгатозы. Та кылсётонлы оскыны луэ. Улӟытонлы оскон капчиятыны быгатэ вӧсь луонэз, кудзэ вае матысь адямиослэн кулэмзы. Инмар соосты улӟытоз со дыре, куке Иисус но соин ӵош кивалтӥсьёс «сюрс ар ӵоже эксэй радын улозы» (Усьт. 20:6). Со сяна, ми юн оскыны быгатӥськомы, Христослэн сюрс ар ӵоже кивалтонэзлэсь азьло кулӥмы ке, ми но улӟытэмын луомы шуыса. Та «оскиськон возьытэ уг вутты» (Рим. 5:5). Иеговалы ужан-тыршонын со милемлы кужым но шумпотон сётэ. Кызьы ми тодомы вуоно статьяысь, Коринфъёслы нырысетӥ гожтэтысь 15-тӥ люкетын вань на мукет кулэ луись малпанъёс но.