1, 2. ¿Xi esperanza galán napa ca xpinni Jehová?

LU XQUENDANABÁNINU nabé risaca gápanu esperanza ne cuézanu guizaaca xiixa cosa galán. Guzéʼtenu caadxi ejemplu, nuu guendaxheelaʼ racalaʼdxiʼ guibani nayecheʼ, guiniisi ca xiiñiʼ nazaaca ne nuu tu laa racalaʼdxiʼ guianda de ti guendahuará malu. Laanu, ca xpinni Cristu, laaca racaláʼdxinu guibáninu casi bizéʼtenu riʼ. Peru nuu xiixa ni jma racaláʼdxinu: guibáninu para siempre ne guidúʼyanu ca familia stiʼ ni maʼ guti sti biaje.

² Apóstol Pablo guníʼ: «Cabezaʼ gusibani Dios ca ni maʼ guti, ca ni biʼniʼ ni jneza ne ca ni qué ñuni ni jneza» (Hech. 24:15). Peru ante guiníʼ Pablo ca diidxaʼ riʼ, Job guníʼ nanna dxichi zietenalaʼdxiʼ Dios de laa ne zusibánibe laa (Job 14:7-10, 12-15).

3. Ra guidúʼndanu capítulo 15 stiʼ 1 Corintios, ¿ximodo zacaneni laanu?

³ Biblia ná «zabani ca ni maʼ guti» ne laani nga tobi de ca cosa ni «maʼ bizíʼdinu» o ni runi crenu laanu ca xpinni Cristu (Heb. 6:1, 2). Bisiene chaahuiʼ Pablo de tema riʼ lu capítulo 15 stiʼ 1 Corintios. Nanna dxíchinu ni bisiénebe de tema riʼ guluuni gana ca xpinni Cristu ni bibani lu primé siglu, ne laaca zanda uguuni gana laanu tiempu riʼ neca maʼ xadxí de nápanu esperanza riʼ.

4. ¿Xi zacané laanu guni crenu ziasa ca familia stinu ni maʼ guti?

⁴ Ra biasa Jesús de lade gueʼtuʼ, rucaani laanu guni crenu ziasa ca familia stinu ni maʼ guti. Laani nga tobi de «ca noticia galán» ni bidii Pablo ca xpinni Cristu de Corinto (1 Cor. 15:1, 2). Ne gúdxibe laacaʼ pa qué guni crecaʼ biasa Jesús de lade gueʼtuʼ, qué zasaca fe sticaʼ (1 Cor. 15:17).  Guni crenu biasa Jesús de lade gueʼtuʼ zeeda gácani ti pilar ni naaze dxiichiʼ esperanza stinu.

5, 6. ¿Xiñee nabé risaca ca diidxaʼ ni zeeda lu 1 Corintios 15:3, 4 para laanu?

⁵ Bizeeteʼ Pablo chonna cosa ora bizulú guníʼ de tema riʼ, guniʼbe «guti Cristu pur ca pecadu stinu», «bicaachicabe laabe» ne «bibánibe ra guionna gubidxa casi cá lu Stiidxaʼ Dios» (biindaʼ 1 Corintios 15:3, 4).

⁶ ¿Xi raca significar para laanu guendaguti stiʼ Jesús, dxi bigaachiʼ ne dxi biasa de lade gueʼtuʼ? Profeta Isaías guníʼ zuuticabe Mesías de «lu guidxilayú ra nabani binni» ne zudiicabe laa «ti baʼ cueʼ binni malu». Ne laaca guniʼbe zuáʼ Mesías pecadu stiʼ stale binni. Guca cumplir ca diidxaʼ riʼ luguiáʼ Jesús dxi bidii xquendanabani pur binni (Is. 53:8, 9, 12; Mat. 20:28; Rom. 5:8). Nga runi, guendaguti stiʼ Jesús, dxi bigaachiʼ ne dxi biasa de lade gueʼtuʼ racaneni laanu guni crenu zaxéguenu de lu náʼ pecadu ne guendaguti, ne zadúʼyanu ca familia stinu ni maʼ guti sti biaje.

7, 8. ¿Xi rucaa laanu guni crenu dxandíʼ biasa Jesús de la gueʼtuʼ?

⁷ Para guni crenu zusibani Dios ca ni maʼ guti, primeru caquiiñeʼ chuʼnu seguru biasa Jesús de lade gueʼtuʼ. ¿Ximodo nánnanu gundisaʼ Jehová laabe de lade gueʼtuʼ yaʼ?

⁸ Stale binni biiyaʼ Jesús dxi biasa de lade gueʼtuʼ (1 Cor. 15:5-7). Apóstol Pablo guníʼ primé binni biʼyaʼ laabe nga Cefas, o apóstol Pedro. Caadxi discípulo laaca guniʼcaʼ biiyaʼ Pedro Jesús despué de biasa de lade gueʼtuʼ (Luc. 24:33, 34). Laaca biiyaʼ «ca Doce» o ca apóstol laabe. Despué «bihuínnibe nezalú jma de 500 hermanu ti lugar si», zándaca gúcani Galilea ne riete ni lu Mateo 28:16-20. Laaca «bihuínnibe nezalú Santiago», mediu hermanu stibe, para tiempu que, caʼruʼ guni crebe pa Jesús nga Mesías (Juan 7:5). Peru despué de biiyaʼ Santiago maʼ biasa Jesús de lade gueʼtuʼ, biʼniʼ cré. Para dxi bicaa Pablo carta riʼ —biaʼ lu iza 55—, nabániruʼ stale de ca binni ni biʼyaʼ Jesús despué de biasa de lade gueʼtuʼ. Ngue runi, ca binni ni cadi cayuni cré pa dxandíʼ biasa Jesús de lade gueʼtuʼ zanda guinabadiidxacaʼ ca hermanu riʼ.

9. Casi ná Hechos 9:3-5, ¿xi sti prueba bidii Pablo ni rusihuinni dxandíʼ biasa Jesús de lade gueʼtuʼ?

⁹ Ti tiempu despué bihuínnibe nezalú Pablo (1 Cor. 15:8). Ti dxi, laga zeʼ Pablo, ni runibiáʼcabe casi Saulo, Damasco, binadiágabe stidxi Jesús ne biiyabe laa lu ti visión guibáʼ (biindaʼ Hechos 9:3-5). Ni bizaaca Pablo rusihuínnini dxandíʼ biasa Jesús de lade gueʼtuʼ (Hech. 26:12-15).

10. ¿Xi guyuu Pablo dispuestu guni dxi guyuu seguru biasa Jesús de lade gueʼtuʼ?

¹⁰ Despué de biiyaʼ Pablo Jesús, nabé bidxagayaa stale binni ni guniʼbe purtiʼ dxiqué guzanándabe ca xpinni Cristu. Peru dxi guyuube seguru biasa Jesús de lade gueʼtuʼ, bíʼnibe stipa gacanebe xcaadxi guni crecaʼ ni. Biaʼ tiempu guniʼbe biasa Jesús de lade gueʼtuʼ, biʼniʼ huantarbe dxi guluucabe palu laabe, biteguyoocabe laabe ne bilahuaabe (1 Cor. 15:9-11; 2 Cor. 11:23-27). Gúnnabe dxandíʼ biasa Jesús de lade gueʼtuʼ dede guyuube dispuestu gátibe para guni defenderbe ni runi crebe. ¿Cadi dxandíʼ laaca rucaa ca prueba riʼ laanu guni crenu biasa  Jesús de lade gueʼtuʼ la? ¿Cadi dxandíʼ laaca rucaacani laanu guni crenu zusibani Dios ca ni maʼ guti la?

11. ¿Xiñee cadi jneza modo biene caadxi xpinni Cristu de Corinto ni rusiidiʼ Biblia de dxi guiasa ca gueʼtuʼ?

¹¹ Caadxi hermanu de Corinto cadi jneza modo biénecaʼ ni rusiidiʼ Biblia de dxi guiasa ca gueʼtuʼ, ne dede guyuu tu laa guníʼ cadi dxandíʼ ni (1 Cor. 15:12). ¿Ximodo nánnanu ni yaʼ? Ndaaniʼ guidxi Atenas, guyuu caadxi filósofo ni guníʼ cadi dxandíʼ biasa Jesús de lade gueʼtuʼ, ne zándaca pur nga zaqueca guníʼ ique caadxi xpinni Cristu de Corinto (Hech. 17:18, 31, 32). Ne nuu tu laa guníʼ ique qué ñasa binni de lade gueʼtuʼ, sínuque biiyacabe ni casi xiixa simbólico. Guníʼ íquecabe, ante gácacabe xpinni Cristu, pecador laacabe ne casi ñaca maʼ gúticabe; peru ra gúcacabe xpinni Cristu, guca perdonar ca pecadu stícabe ne casi ñaca biásacabe de lade gueʼtuʼ. Modo tiica si guiníʼ íquecabe, pa qué guni crécabe ziasa binni de lade gueʼtuʼ, qué zasaca fe stícabe. Pa ñaca qué nindisaʼ Dios Jesús de lade gueʼtuʼ la? qué nudii Jesús xpida pur binni ne qué ñaca perdonar ca pecadu stícabe. Nga runi, ca ni qué ñuni cré ziasa binni de lade gueʼtuʼ qué ñápacaʼ nin ti esperanza (1 Cor. 15:13-19; Heb. 9:12, 14).

12. Casi ná 1 Pedro 3:18, 22, ¿xiñee maʼ gadxé modo biasa Jesús de lade gueʼtuʼ que xcaadxi binni ni biasa ante que laa?

¹² Biiyaʼ Pablo Jesús maʼ «biasa lade ca ni maʼ guti». Jma galán nga modo biasa Jesús de lade gueʼtuʼ que ca xcaadxi binni ni biasa ante que laabe, purtiʼ laacaʼ gúticaʼ sti biaje. Pablo guníʼ Jesús nga «primé» ni «biasa lade ca ni maʼ guti». ¿Xiñee Jesús nga «primé» yaʼ? Purtiʼ laabe nga primé binni ni biasa de lade gueʼtuʼ casi ti espíritu ne laa nga primé ni guyé guibáʼ (1 Cor. 15:20; Hech. 26:23; biindaʼ 1 Pedro 3:18, 22).

13. ¿Ximodo bisiene Pablo maʼ gadxé ni biʼniʼ Adán de ni biʼniʼ Jesús?

¹³ ¿Ximodo nga pur ti hombre si nga zanda guibani millón de binni? Nabé galán modo bisiene Pablo ni. Bizeetebe xi bizaaca pur bichee Adán ne xi zanda cueendú binni pur guti Cristu. Ora guniʼbe de Adán, bizeetebe «pur ti hombre biuu guendaguti». Bichee Adán ne pur ngue zati ne laaca zati ca ni zá de laa. Tiempu riʼ laaca cayuni sufrirnu purtiʼ qué nuzuubabe diidxaʼ. Peru nápanu ti esperanza galán purtiʼ gundisaʼ Dios Xiiñiʼ de lade gueʼtuʼ. Pablo guníʼ: «Pur ti hombre [Jesús] zabani ca ni maʼ guti. Cásica rati guiráʼ binni pur Adán, zaqueca zabani guiráʼ binni pur Cristu» (1 Cor. 15:21, 22).

14. ¿Xiñee nánnanu qué ziasa Adán de lade gueʼtuʼ?

¹⁴ ¿Tudé caníʼ Pablo ora guníʼ «rati guiráʼ binni pur Adán»? Caniʼbe de ca ni zá de Adán, ca ni gulené donda ne pecadu, ne pur nga záticaʼ (Rom. 5:12). Cadi nuu diʼ Adán lade ca binni ni «zabani». Qué zanda cueendube ni galán pur guendaguti stiʼ Cristu, purtiʼ gúcabe perfectu ne qué nuzuubabe stiidxaʼ Dios neca nánnabe naquiiñeʼ gúnibe ni. Zuni juzgar «Xiiñiʼ Hombre» laabe casi «chiva» o ca binni «ni chiguinitilú» (Mat. 25:31-33, 46; Heb. 5:9).

15. ¿Tu «guiráʼ» nga zabani pur Cristu»?

 ¹⁵ Pablo guníʼ «zabani guiráʼ binni pur Cristu» (1 Cor. 15:22). Bicaabe ti carta para ca hermanu de Corinto, ca ni naca ungidu ne ni napa esperanza guiasa de lade gueʼtuʼ para cheʼ guibáʼ. «Ca ni maʼ guleechú Dios para chuʼ tobi si né Cristu Jesús», ne «maʼ gulibe» laacaʼ para gácacaʼ xpínnibe. Laaca bizeeteʼ Pablo de «ca xpinni Cristu ni nisiaasiʼ lu guendaguti» ni nuu «tobi si né Cristu» (1 Cor. 1:2; 15:18; 2 Cor. 5:17). Ne lu sti carta ni bicaabe guniʼbe: «Pa maʼ gúcanu tobi si né laabe ra gútibe la? laaca zácanu tobi si né laabe ra guiásanu de lade gueʼtuʼ cásica biásabe» (Rom. 6:3-5). Biasa Jesús casi espíritu ne guyé guibáʼ. Ngaca nga ni cabeza guiráʼ ca ni nuu «tobi si né Cristu» o ca ungidu.

16. ¿Xi nuu Pablo guiníʼ ora bizeeteʼ Jesús nga «primé»?

¹⁶ Pablo guníʼ Cristu nga «primé» ni «biasa lade ca ni maʼ guti». Cadi guiaandaʼ laanu guyuu caadxi binni ni biasa de lade gueʼtuʼ ne bibánicaʼ lu Guidxilayú riʼ sti biaje casi Lázaro, peru Jesús nga «primé» ni biasa casi espíritu ne gucuaa ti guendanabani sin gatiʼ guibáʼ. Zaqué beeda gácabe casi ca primé cuananaxhi ni riasa lu cosecha ni bidii ca israelita que Dios. Ora guníʼ Pablo Jesús nga «primé» caniʼbe ziuuruʼ jma binni ni ziasa de lade gueʼtuʼ para cheʼ guibáʼ. Ne ra tidiʼ tiempu guiráʼ ca ni nuu «tobi si né Cristu» —ládecabe nuu ca apóstol— ziásacaʼ de lade gueʼtuʼ para checaʼ guibáʼ, cásica Jesús.

17. ¿Padxí zié ca ni nuu «tobi si né Cristu» guibáʼ?

¹⁷ Dxi bicaa Pablo carta para ca hermanu de Corinto, caʼruʼ diʼ guzulú guiasa ca ni nuu «tobi si né Cristu» para checaʼ guibáʼ. Ne guniʼbe zácani lu ca dxi ni zeeda ca. Sicaríʼ guniʼbe: «Peru maca nexheʼ chaahuiʼ modo gaca ni: zabani Cristu primé, despué zabani ca xpinni Cristu lu presencia stiʼ» (1 Cor. 15:23; 1 Tes. 4:15, 16). Ndiʼ rusihuinni naquiiñeʼ cueza ca apóstol ne xcaadxi ungidu presencia stiʼ Cristu para checaʼ guibáʼ ne gácacaʼ «tobi si né laabe» ra guiásacaʼ «de lade gueʼtuʼ cásica biásabe». Ne yanna riʼ nga nabáninu «lu presencia» stiʼ Cristu.

18. a) ¿Xiñee nánnanu despué de guiasa caadxi xpinni Cristu para cheʼ guibáʼ ziasa xcaadxi de lade gueʼtuʼ? b) Casi ná 1 Corintios 15:24-26, ¿xi zazaaca guibáʼ?

¹⁸ ¿Xi zazaaca ca xpinni Cristu ni  qué gapa esperanza para guni mandarné Cristu guibáʼ? Laaca cabézacabe guiásacabe de lade gueʼtuʼ. Nánnanu ni purtiʼ Biblia ná Pablo ne xcaadxi xpinni Cristu nga «de ca primé binni ni guibani» de lade gueʼtuʼ (Filip. 3:11). ¿Cadi dxandíʼ rusihuinni ca diidxaʼ riʼ zabani xcaadxi binni de lade gueʼtuʼ despué la? Ndiʼ rusihuinni biaʼsi ni guníʼ Job ni chiguni Dios pur laa despué (Job 14:15). Ca «xpinni Cristu» o ca ungidu, maʼ nuucaʼ guibáʼ ora gunduuxeʼ Jesús «guiráʼ gobiernu ne guiráʼ autoridad ne poder». Óraque laaca zunduuxebe guendaguti, «últimu enemigu». Rihuinni dxichi guiráʼ ca ni guiasa de lade gueʼtuʼ para cheʼ guibáʼ qué ziuu dxi gáticaʼ. Yanna, ¿xi zazaaca né ca binni ni napa esperanza de guibani ndaaniʼ Guidxilayú riʼ yaʼ? (Biindaʼ 1 Corintios 15:24-26).

19. ¿Xi esperanza napa ca ni racalaʼdxiʼ guibani lu Guidxilayú?

¹⁹ Guiráʼ ni cabeza guibani lu Guidxilayú zanda guiniʼcaʼ casi guníʼ Pablo: «Cabezaʼ gusibani Dios ca ni maʼ guti, ca ni biʼniʼ ni jneza ne ca ni qué ñuni ni jneza» (Hech. 24:15). Cumu Biblia ná qué zanda cheʼ ca ni qué ñuni ni jneza guibáʼ la? ndiʼ rusihuinni ziasa binni de lade gueʼtuʼ para guibani lu Guidxilayú riʼ.

20. ¿Ximodo huayacané artículo riʼ lii gaca esperanza stiluʼ jma naguidxi?

²⁰ Nanna dxíchinu zusibani «Dios ca ni maʼ guti». Ca binni ni guiasa de lade gueʼtuʼ para guibani lu Guidxilayú riʼ zabánicaʼ para siempre. Zanda guni crenu promesa riʼ. Pa maʼ guti ti familia stinu, ratadxí ladxidoʼno gánnanu ziásacaʼ de lade gueʼtuʼ ora guni mandar Cristu ne ca ungidu lu «1,000 iza» (Apoc. 20:6). Laaca zanda gápanu esperanza, pa gátinu ante guzulú guni mandar Cristu lu ti mil iza, zandísabe laanu de lade gueʼtuʼ. «Ne cadi pur gana si nga nápanu esperanza» riʼ, purtiʼ racaneni laanu yanna para gúninu ni ná Dios né stale guendanayecheʼ (Rom. 5:5). Lu sti artículo ca, zadúʼyanu xiruʼ zanda guizíʼdinu de capítulo 15 stiʼ 1 Corintios.