1-2. Ga Yekova amoyambu na gini wene maabangirise?

MAABANGIRISE na nyanyakipaha gbe. Gu kura aboro namaabangiriyo nga i nika du na gu rogatise du na ngbarago, i nika sonosa agu agude nika du na wene kpoto yo, watadu i nika u be kere kaza. Ani nga aKristano ima rengba kaa maabangirani tipa kina gu bangisa apai re a. Ono gu maabangirise ani abihe na nyanyakipaha gbe ima susa gure; si nakodapa gu maabangirise nga ga raka nyeanye kindi kumbatayo gbiati gu maabangirise du tipa gu gaani aboro naima kpiko.

² Gu mokedi nangia Pauro aya: “Ni maa bangire koyo du Mbori ni ya ruru aboro azinga be kpio na iraira yo a.” (Amo. 24:15) Anga Pauro nangia gu bambata boro nafura tipa gu maabangirise nga ga zingabekpio te. Gu bakumba nangia Eyobo aima fura tipaha a. Ko aima du na kido nga Mbori nika tingidapa ko atingida na ki zingisi ko ku rogo unga berewe.—Eyo. 14:7-10, 12-15.

3. Ya mo 1 AKorindo kapita 15 rengbe ka undo rani?

³ “Zingabekpio” nga papara ‘mburu’ watadu ‘bambata tonatona agu apai’ dunduko aKristano naidi kutini. (Eb. 6:1, 2) Ga Pauro sakapai tipa zingabekpio gu du ni kekehe rogo 1 AKorindo kapita 15. Si nawira gupai nga gupai ko akehe aima ngarasa agu aKristano naadu ti gako regbo. Ka si vura du nga mo aima du na idapase kuti zingabekpio tipa gbanga regbo, 1 AKorindo kapita 15 nika ngarasa ro na ki nyakasi gamo maabangirise nga zingabekpio du wa ka si mangi.

4. Tipagine rengbe ani kadu na gu kido ti ni nga gu gaani aboro kpiki nika zinga azinga be kpio?

⁴ Gu zingabekpio nga ga Yesu Kristo nasa gupai nga ani du na gu kido nga ka si du nga gaani aboro kpi, zingabekpio nika manga amanga. Gu zingabekpio nga ga Yesu Kristo nangia papara “gu wene pangbanga” Pauro atakipandehe fu aKorindo. (1 Kor.  15:1, 2) Ko ape gupai nga ka Kristano aidanga kuti zingabekpio ya, gani idapase du gbua. (1 Kor. 15:17) Pa ida ani kuti gupai nga Yesu aima zingabekpio nga ndu gupai nika sa rani ani idi kuti gupai nga, i nika zingisa kura aboro azingisa be kpio.

5-6. Ginipai agu afugo du rogo 1 AKorindo 15:3, 4 ayugoho furani?

⁵ Ho Pauro atona kepai ni tipa zingabekpio, ko agumbapa arengo biata. Agu arengo re nga (1) “Kristo akpi tipa gaani ingaapai.” (2) I “akpisidi ko.” (3) I “azingisi ko ti biata uru ku sangba Ziazia Kekeapai yo.”—Oni gedi 1 AKorindo 15:3, 4.

⁶ Ginipai pakpio Yesu, pa kpisido yo ko, na pa zingisayo ko be kpio ayugoho furani? Gu nebi nangia Yesaya agumba gupai kumbatayo tipa Masiya nga “i aba ko ku sa yo ti ringara unga aboro” na ‘i akoda murãko na ga gbegberẽ aboro.’ Ono si adu a nga gu kurapai berewe nika manga amanga. Yesaya ape gupai a nga Masiya nika tinda “gu ingaapai nga ga dungu yo.” Yesu amangi gipai re ho ko afu gako raka ni ni motumo. (Yes. 53:8, 9, 12; Mt. 20:28; Rom. 5:8) Sidu, pakpio Yesu, pa kpisido yo ko, na pa zingisa yo ko be kpio nafu wene nduapai furani tipa ani du na maabangirise nga ani ima rengba ka bata be ingaapai na kpio na ki koditirani na gu gaani aboro naima kpiko.

7-8. Ginipai naundo aKristano i du na gu kido nga Yesu aima zinga be kpio?

⁷ Tipa gupai nga ani idi kuti gupai nga zingabekpio nika manga amanga, si naida ani idi mbata kuti gupai nga Yesu aima zingabekpio. Tipagine rengbe ani kadu ti ni na gu kido nga Yekova aima zingisa Yesu be kpio?

⁸ Badungu aboro nabi Yesu tifuo zingako be kpio na i aima pe gipai re fu kura aboro. (1 Kor. 15:5-7) Gu bambata dezire Pauro afura tipa ni angia Petero (Kefa). Badona nga ga abawiriki aima ida kuti gupai nga Petero aima bi Yesu fuo zingako be kpio. (Rk. 24:33, 34) Kurii gure, agu amokedi naanidu “bawe na ue,” aima bi Yesu fuo zinga ko be kpio. Berewe a, Kristo ‘ayugu tiko fu agu awirina nasusi 500 ni ba sa,’ isoke ti regbo gu dunguratise naadu Gariraya yo nga gu du paha rogo Matayo 28:16-20. Yesu aima ‘yugo tiko a fu Yakoba,’ nga guko si awiraha nga ko angia gu wirina Yesu naaidanga mbata kutiko ni Masiya ya. (Yo. 7:5) Fuo Yakoba bi Yesu tifuo zingisa yo ko be kpio, ko kini idi kuti ko. Gu kura nyanyakipa pai berewe nga, bara rogo gu garã nangia 55 Fuo Batikayo Kristo, ho Pauro aake gako waraga ni, badungu agu aboro nabi Yesu fuo ko zingi be kpio adu kindi ti kina unga, sidu, ai gu boro naanidu na kapa nga Yesu aima zinga be kpio aima rengba ka fura na yo.

9. Ginipai Amokedi 9:3-5 apehe nga gu nayugo gupai nga Pauro aima rengba ka fu kura ndupai nga Yesu aima zinga be kpio?

⁹ Kusa, Yesu ayugu tiko fu kina boro Pauro nitiko. (1 Kor. 15:8) Pauro (Saura) adu ngbagene naandu ku Damaseke yo ho ko agi fuko Yesu ni naima zingabekpio na ki bi ko rogo yuguyugupai ngbangbaturũ yo. (Oni gedi Amokedi 9:3-5.) Gupai namangi fu Pauro re angia gu kura bakere gopai naayugoho nga Yesu aima zinga nzunzu be kpio.—Amo. 26:12-15.

10. Ginipai Pauro amangihe mbiko gupai nga ko aidi kuti gupai nga Yesu aima zinga be kpio?

¹⁰ Gupai Pauro agumbaha aima rengba ka ngba gbe ti kura aboro mbiko Pauro aima rungosi aKristano mbata fu Yesu yugu tiko fu ko. Fuo Pauro idi kuti gupai nzunzu nga Yesu aima zinga be kpio, ko amangisunge nyanyaki tipa ka sa kura aboro i idi kuti gu rengo re. Ko aima hi amandoro kpata, abambukiso, gbiati gberã bakurungba ho ko aatungusapa gu rengo ni nga, Yesu aima kpi ono ko kidu ni ungako berewe. (1 Kor. 15:9-11; 2 Kor. 11:23-27) Pauro aima du na gu kido nga Yesu aima zinga be kpio na ko aima du na nyemu ka kpi mbiko tungusa ko pai  tipa gu ida ko adu na ni. Ya mo gi dezirepai naadu mbata kusayo re afunga gu kido foro nga Yesu aima zinga be kpio te? Na ya mo si anyakasanga gamo ida kuti zingabekpio te?

11. Ginipai narengbe ka sa kura aboro Korinda yo i du na iraira abipai tipa zingabekpio?

¹¹ Bete kura aboro naadu rogo gu ga aGiriki gbata nangia Korinda adu na iraira abipai tipa zingabekpio. Zavura agu akurayo aya, “zingabekpio dagba kangba aboro ho te.” Tipagine? (1 Kor. 15:12) Abawisigipai dudunguroo tipa raka rogo gu kura ga aGiriki gbata nangia Atenai, asawia gupai asawia nga Yesu aima zinga be kpio. Si nawira gupai nga ngbatunga gu berãpai re aima du na maapai kurii bete kura aboro Korinda yo. (Amo. 17:18, 31, 32) Agu akurayo aima rengba ka berã gupai nga zingabekpio naru kuba kurapai nga, ho du boro ni rogo ingaapai, ni ni “kangba ni,” ono ho ni ada ni ni Kristano, ni kini da ni “unga” ni. Ka si vura du nga kina gini ndupai du naasa agi aboro re ka i idinga kuti zingabekpio ya, pa ká yo gupai nga ga zingabekpio aayugo gupai nga gayo idapase adu gbua. Ka si du nga Mbori aazingisanga Yesu be kpio te, gure nga motumo tumorii ho i afuhe te na aboro dunduko adu kindi nga aboro ingaapai. Sidu, agu aboro naká gupai nga ga zingabekpio aadunga na ndikidi maabangirise te.—1 Kor. 15:13-19; Eb. 9:12, 14.

12. Ringbisihe kuti 1 Petero 3:18, 22, tipagine ga Yesu zingabekpio adu ti ni kia ti agu namangi mbata?

¹² Pauro nitiko aima ino gupai nga “i [aima zingisa] Kristo dagba kangba aboro.” Gu zingabekpio re nangba gbe kisusi agu azingabekpio namangi mbata, mbiko agu aboro i azingisiyo be kpio aima kpi berewe kusa. Pauro ape gupai nga Yesu nangia bambata ‘makawa agu yo nara ara rogo kpio yo.’ Ngba gini gene Yesu adu ni bambata makawa? Ko nangia gu bambata boro i azingisi ni ku rogo unga yo ni toro na ni gu bambata boro i azingisi ni ku ngbangbaturũ yo.—1 Kor. 15:20; Amo. 26:23; oni gedi 1 Petero 3:18, 22.

13. Gini kparakparapai Pauro apehe du dagba Adamu na Yesu?

¹³ Waigu kpio bangisa boro sa arengbe ka ye na raka fu amirioni aboro? Pauro aima karagapai ziazia kuti gu sanahe re. Ko asakipai tipa gu kparakparapai du dagba gupai namangi fu aboro mbiko gupai Adamu amangihe na gupai ani nika gbiaha mbiko ga Kristo motumo tumorii. Nibipa gupai Adamu amangihe, Pauro akepai ki ya: “Kpio aye be boro.” Ho Adamu amangi ingapai ni, ko aye na kpio kuriko na kurii atitako. Ani nandu kindi kumbatayo kaa mbu be kere asangbana gako basasangba. Ono ani na rengba kadu na wene raka kumbatayo mbiko gupai nga Mbori azingisi Wiriko be kpio! “Zinga kangba aboro be kpio aye be boro,” gu boro re nga Yesu. Pauro akepai ki ya, “Bambiko wa aboro nakpi akpi dunduko rogo Adama yo, a wo rogo Kristo yo i adu adu ni ungayo dunduko.”—1 Kor. 15:21, 22.

14. Ya mo i azingisa Adamu be kpio? Oni sakingo rogoyo.

¹⁴ Ginipai Pauro aaida ka pehe ho ko aya ni, ‘aboro nakpi akpi dunduko rogo Adama yo’? Pauro aafura tipa agu aboro dunduko nadi ingapai na zangarengba be Adamu na i kini ru kaa kpiko mbiko gipai re. (Rom. 5:12) Adamu dagba agu aboro yo nika du “ni ungayo” te. Adamu agbianga undo ti ga Kristo motumo tumorii te. Si wo mbiko ko angia rengberengbe kumba nga guko nadiberã ka basasangba Mbori. Gupai namangi Adamu re wa sa na gupai nika manga tipa agu aboro “Wiri boro” nika sapangbanga yo ni “ameme,” nga gu nayugopa “nyenye [gbarasahe].”—Mt. 25:31-33, 46; Eb. 5:9.

15. Ada du dagba agu aboro yo ‘dunduko’ i nika sayo “ni ungayo”?

¹⁵ Oni bingo gupai nga Pauro ape gupai  nga, ‘rogo Kristo yo i adu adu ni ungayo.’ (1 Kor. 15:22) Pauro ake gako waraga fu gu mbedimbedi aKristano naadu Korinda yo, nga aguyo si adu nga i nika zingisa yo be kpio ku ngbangbaturũ yo. Agu aKristano re “i asa yo ni ziazia yo rogo Kristo Yesu yo, i ayambu yo i du ni ga Mbori aboro.” Na Pauro agumbapa ‘agu yo natiwi ni rame rogo kpio yo rogo Kristo yo.’ (1 Kor. 1:2; 15:18; 2 Kor. 5:17) Rogo gu kura waraga yo Pauro akehe, ko ake gupai yo nga aguyo nadu “na [Yesu] sa mbiko wira kpioko” nika du “a mbiko wira zingako.” (Rom. 6:3-5) I azingisi Yesu be kpio ni toro na ko ki ga ku ngbangbaturũ yo. Kina gu bangisapai re nika manga tipa agu aboro dunduko du “rogo Kristo yo,” du nga mbedimbedi aKristano dunduko.

16. Ginipai pa yamba Pauro Yesu nga bambata “makawa” aayugoho?

¹⁶ Pauro akepai nga, i azingisi Kristo be kpio ni bambata ‘makawa agu yo nara ara rogo kpio yo.’ Oni tingidi gupai nga, i aima zingisa kura aboro wa Razaro be kpio ku auru kpotosende ane, ono Yesu nangia gu bambata boro i azingisi ko be kpio ni toro na ko ki gbia nyenye unga. Ani rengbe ka ringbisa ko kuti gu bambata makawa keke ahe aYisaraere anaafuhe fu Mbori. Na pa yamba Pauro Yesu nga ko nga bambata “makawa,” aayugo gupai nga i nika zingisa gu kura aboro azingisa be kpio fuo Yesu tipa i raki ngbangbaturũ yo. Si adu nga amokedi gbiati kura aboro du “rogo Kristo yo” nika pekafuo Yesu. Si adu nga tifuo bete regbo, i nika zinga be kpio kina wai Yesu azingi be kpio.

17. Ti gini regbo si adu nga agu aboro du “rogo Kristo yo” nika gbia gayo mosoro nga ga ngbangbaturũ?

¹⁷ I aatonanga zingisa agu aboro du “rogo Kristo yo” ku ngbangbaturũ yo ti gu regbo Pauro ake gako waraga fu aKorindo te. Kuba gure, Pauro ayugu gupai nga si nika manga amanga kumbatayo, ko aya: ‘I adu ti kina ragoyo ni ba sa sa: Kristo nga makawa; fuo gure agu yo nga ga Kristo yo, rago ye ko.’ (1 Kor. 15:23; 1 Tesa. 4:15, 16) Areme, ani naraka ti regbo gu “ye” nga ga Kristo i aima gumbapaha kumbatayo. Ni rengo, si adu nga amokedi gbiati gu kura mbedimbedi aKristano nakpiki sungudi regbo ye Kristo si da mbata i kini ru ka gbia gayo mosoro nga ga ngbangbaturũ na i kidu ni kodikodi yo na Yesu rogo “wira zingako” be kpio, naida ka ya, rogo gu gene yo ko azingi be kpio.

18. (a) Tipagine rengbe ani kada kuti gu digisopai ti ni nga kura zingabekpio nika manga amanga fuo gu nga ga agu aboro nika ga ku ngbangbaturũ yo? (b) Ginipai ani awirikaha rogo 1 AKorindo 15:24-26 nibipa gupai nika manga ngbangbaturũ yo?

¹⁸ Ginipai tigaha nika manga tipa gu ruru aKristano adunga na gu maabangirise nga ga  raka ngbangbaturũ yo na Kristo ya? I a na kina gu maabangirise nga ga zingabekpio. Ziazia Kekeapai nafura tipa Pauro gbiati gu kura aboro naga ku ngbangbaturũ yo ki ya, i nga agu boro i azingisa yo be kpio ti regbo “bambata zingabekpio dagba akangba.” (Frp. 3:11, NW) Ya mo gipai re ayugongo gupai nga gu kura zingabekpio nika ngbe angbe tifuo gure te? Gipai re na ngbanya dagbaha na gupai Eyobo apehe tipa gako raka kumbatayo. (Eyo. 14:15) “Agu yo nga ga Kristo yo, rago ye ko” nika du kina ngbangbaturũ yo na Yesu ho ko nikaa gbarasa azogarago ni dunduko na apagbia na ome. Zavura gu “yangara vura . . . nga kpio,” i nika gbarasaha agbarasa. Nirengo, agu aboro dunduko i nika zingisayo ku ngbangbaturũ yo akpingo berewe te. Ono ginipai nika manga tie tipa kura aboro?—Oni gedi 1 AKorindo 15:24-26.

19. Ginipai rengbe agu aboro du na gu maabangirise nga ga raka auru kpotosende ka maabangiriyo tipaha?

¹⁹ Ginipai rengbe agu aboro du na gu maabangirise nga ga raka auru kpotosende ka maabangiriyo tipaha? I rengbe kadu na maabangirise riimburu gupai Pauro apehe, ko aya: “Ni maa bangire koyo du Mbori ni ya ruru aboro azinga be kpio na iraira yo a.” (Amo. 24:15) Si tie ziazia nga, iraira boro ho rengbe ka ndu ku ngbangbaturũ yo te, agu afugo re nayugopa zingabekpio nga gu nika manga auru kpotosende ane kumbatayo.

20. Waigu gu maabangirise du mo na ni nga zingabekpio nika manga amanga nanyaki?

²⁰ Zanga wiri kapa, ‘aboro azinga azinga be kpio’! Agu aboro i nika zingisayo be kpio ku auru kpotosende nika du na gu mabangirise nga ga raka ane nyeanye kindi. Mo ima rengba kadu na kido nga gi kidohe re nika digiso tihe adigiso. Gu maabangirise re ima rengba kafu wasa foro nibipa gu gamo aboro kpiki. I ima rengba ka zingisa yo be kpio ti gu regbo Kristo gbiati gu kura aboro “nikaa zóga rago na ko ni abakindo . . . tipa agarã 1,000.” (Yugo. 20:6, NW) Mo ima rengba kadu na gu kido a nga ka mo kpi mbata fu Kristo tona zogarago tipa agarã 1,000, i nika zingisa ro azingisa be kpio. Gi ‘maabangirise re afunga rani sa zee te.’ (Rom. 5:5) Si ima rengba ka nyakasa ro awere na ki kiisi gamo ngbarago rogo iriso Mbori yo. Ono dungu apai duho rengbe ani ka wirikaha rogo 1 AKorindo kapita 15, a wa gu kekeapai ngbefuo gere nika yugoho.