1-2. Eeghe kụ iḍighi kụ oomo aKristẹn kotuughạ bọ ni ilọ oḅetenhu esi aḍuugh abuphẹ kokeel bọ k’akẹ?

OGBOGH opol awe dị rokumu aZihova nyiidiphọ oḍuomolhoghi orọl isiẹn ade phọ k’agee-pọ. Kuolọ ebạm egu aKristẹn dị osagharạn uwaloor iigbia phọ omoọgh oḍuomolhoghi ogheel k’akẹ. Abuẹn osagharạn bọ uwaloor iigbia phọ okạr ri rowạ olhegheri ipẹ aghuḍum katọl bọ epẹ k’akẹ phọ, kụ kokaạph aani ika ilọ abuẹn kotọl bọ siẹn ade phọ? Yira komiịn ni siẹn phọ mọ oḅerion esi aḍuugh abuphẹ kokeel bọ k’akẹ phọ kesighẹ ḍisẹph kirokirọ kụ etuom buẹn kotọl bọ siẹn ade phọ bịn k’agee-pọ. Esi iduọn phọ, mughumọ yira kokeel k’akẹ obobọ kotọl siẹn ade phọ, omhoọgh ḍiḅeraạn oghị esi oghaạph oḅetenhu esi aḍuugh abuphẹ kokeel bọ k’akẹ phọ.

² Enhaạn iphum ni buniin abutelhedom aZizọs siphẹ oḅẹl okuron asiạ phọ ogẹ ilọ oḍuomolhoghi abuphẹ kokeel bọ k’akẹ phọ. Otelhedom mọ aJọn agẹ mọ: “Nyiidiphọ yira anmụny Enaạn, kụ olọ k”emite eganana odọ awe lọ yira kotu. Iphẹn kụ idị yira molegheri mọ mem mọ aKraist kamite bọ aganana yira komoọgh aani ni roozọ phọ odị.” (1 Jọn 3:2) Kụ iḍighi kụ, aKristẹn phọ abuphẹ osagharạn bọ uwaloor phọ u/legheri okạr ipẹ bidị kotọl bọ mem dị oḅerion bidị osighẹ oghị epe k’akẹ phọ. Toroboiperolbọ, bidị kosighẹ riḍien abidị kụ omiinhọm aZihova mem dị oonmo bidị ruunmo phọ abidị. ABaibul phọ o/ghaạph oomo ilọ oḅetenhu esi aḍuugh abuphẹ kokeel bọ k’akẹ phọ, kuolọ otelhedom mọ aPọl aghaạph ni akaram ilọ ipẹ phọ. Abuphẹ osagharạn bọ uwaloor phọ kotọl li r’aKraist mem dị odị kapiemhi bọ “oomo abulọ omoọgh iikpọ odaaghiọm aruwaloor r’awe.” Iphẹn phọ eḅaramaạm ni ‘ḍuugh, onyọ amulhọgh ḍien phọ asughanham bọ omhạn.’ Eekunha phọ, aZizọs—r’abuẹn r’odị kotooghị bọ—kosooromhi ni siloor  abidị ongọ aZihova. (1 Kọr. 15:24-28) P’eeghe imạ amem! *

3. Odaphạn 1 Korịnt 15:30-32, omheeraam oḅetenhu esi aḍuugh phọ alhoghonhaạn ḍighaạgh Pọl oḍighi eeghe?

³ Omheeraam oḅetenhu esi aḍuugh phọ alhoghonhaạn ni ḍighaạgh Pọl okparạm imhinhimhiịn kirokirọ. (Bạl 1 Korịnt 15:30-32.) APọl aḅenhị buọ aKorịnt phọ mọ: “Mị rasoman ghan ḍuugh ḍio etum ḍio.” Kụ odị aḅilhẹ kẹn agẹ mọ: Mị eenan ni “iIhom inạm mọ ephẹn Efesọs.” Eeni aPọl aghaạph ghan ilọ ekạr elhephiri dị odị ee r’elhom enhạm esi otu ephegh epẹ Efesọs. (2 Kọr. 1:8; 4:10; 11:23) Obobọ eeni odị aghaạph ghan ilọ igbagarạ asidọl phọ odị asoman ghan bọ raghaạgh abuọ aJu phọ r’abunhọn dị orọl idiphọ “iIhom inạm.” (Iiḍighi 19:26-34; 1 Kọr. 16:9) Toroboiperolbọ, aPọl asoman ni ootor’osooromineen kirokirọ, kuolọ odị aphogh ghan aghiọm ghisigh r’oḅaạl olhoghi.—2 Kọr. 4:16-18.

4. Ika kụ idị oḍuomolhoghi oḅetenhu esi aḍuugh phọ makparamhị Kristẹn ḍio arodon? (Miịn afoto oḅẹl opoḍi phọ.)

⁴ Yira odi simem iiḅaghamhị. Osiphi ni iilhogh buniin abumor ayira. Abunhọn otughogh rikpisi dị reeghi ghan raaghạm, kụ u/kạr umoọgh oghoph. Abuniin u/moọgh eereẹgh kụ olọgh ghuḍum abidị esi ootor’osooromineen rokumuom ghan aZihova rikpisi dị osophoghom oḍighi iphelhegbeel phọ. Ghalhamọ r’iduọn phọ ni, oomo abumor phọ abuẹn phọ okiọm ni ghisigh rokumu aZihova, bidị oḍighi imạ areḍeenhaan kụ ungọ iyira. Bidị u/moọgh oghiilhaan loor esi dị bidị olegheri ni mọ ghalhamọ bidị umhugh ni nyiidiphọ, aZihova aguanhaan ni bidị imạ epẹ ghisigh.

5. Eghẹn odọ ekarạph ephoghom kụ ketue edughe omheeraam oḅetenhu esi aḍuugh phọ ayira?

⁵ APọl aphụr ri rurụ bumor phọ odị ilọ ekarạph ephoghom dị buniin omhoọgh oghị esi aghuḍum, dị roḅẹm ghan mọ: “Oḅerion esi aḍuugh i/lo ghan, . . . ‘oIe ghan bịn ophughọl, iini iḍueneen yira komuughu!’” Abuniin awe umhoọgh ni ephoghom mọ epẹ kụ egbi eteẹny mem mọ aPọl. Eeni odị aghaạph ghan aghol Isaiah 22:13, eghaạph bọ ilọ araagharạ abuọ Izrạl phọ. Kparipẹ r’oḍuraan otuman Enhaạn, bidị uphorogh ghan dọl aghuḍum oghelhọm aloor bịn. Okạr oghaạph, eegharạ awe Izrạl phọ iḍeenhaan mọ bidị uḅẹm ghan mọ “olhe oghelhọm rodon, iḍue yira komuughu ni,” ephoghom dị ibadị omhoọgh ni ghalhamọ k’aḍio arodon. Toroboiperolbọ, ogẹ ni siphẹ aBaibul phọ ipẹ emitenhaan bọ we phọ Izrạl loor eegharạ phọ abidị ephẹn phọ.—2 Chron. 36:15-20.

6. Ika kụ idị oḍuomolhoghi oḅetenhu esi aḍuugh phọ katir budọ arighirị phọ yira kosaḅạr ghan bọ?

⁶ Eegholhaan ni mọ mem dị yira olhegheri mọ aZihova kaḅerion ni buphẹ momhuughu bọ, kilhoghonhaạn iyira ḍighaạgh osaḅạr igey arighirị. Iwạ ni dị abumor phọ epẹ Korịnt kobilhẹ ooḍikuan ghan abuphẹ oḅẹm bọ mọ oḅetenhu esi aḍuugh o/lho ghan. Ephẹn phọ ephigh iyaạr ituughạ ni ḍio arodon: Igey ke/tue eḍuạ emite esi ogbor ghan orelhean awe dị u/moọgh ogbolhomaam ilọ aghisigh phọ ḅilhẹ roḅem ghan bọ mọ olhe ophughọl, iḍue yira komuughu ni. Orelhean ghan odọ awe phọ abuẹn phọ ketue ni epiemhi ephoghom mọ r’eten aghuḍum ogey onyọ aKristẹn. Ketue kẹn ni etorori nyodị elọgh orọl adọl aghuḍum dị Enhaạn aghel—r’oḍighi yogh ikarạph. Kụ iḍighi kụ, aPọl apụr ri rurụ akpaariọm mọ: “Isereghian ewiIẹ ikarạph areten phọ anyina.”—1 Kọr. 15:33, 34.

7. Odaphạn 1 Korịnt 15:35-38, eeghe aḍipuru kụ edị abuniin awe ropuru ghan ilọ oḅetenhu esi aḍuugh phọ?

⁷ Bạl 1 Korịnt 15:35-38. Oye dị rawạ ogilaạm oḍuomolhoghi oḅetenhu esi aḍuugh  phọ atue ni apuru mọ: “Koḅerion bọ ika buphẹ momuughu bọ?” Enighẹ ni dị yira kooḅeghiọn ophagharanhaạn dị aPọl angọ, loor esi dị ibadị awe ḍio arodon omoọgh ni remheeraam dị egbaranhaạn idị egbolhomaam dọl abuphẹ momhuughu bọ. Kuolọ aBaibul phọ akaạph aani ika?

8. Oghẹn oghaạph omaaniọm kụ kulhoghonhaạn iyira ḍighaạgh onhaghanhạn oḅerion esi aḍuugh abuphẹ kokeel bọ k’akẹ phọ?

⁸ Mem dị oye amhugh, aloor phọ reḅọr ghan ni. Kuolọ Opọ alhẹm bọ aḅirinhi phọ mem dị r’iyaạr i/tọl katue ni aḅeton oye phọ aḅilhẹ angọ nyodị loor dị ekasiạn. (Gen. 1:1; 2:7) APọl aḍighinhom oghaạph omaaniọm dị aḍeenhaan mọ oḅilhẹ oḅeton oye dị mamhugh ke/moghi dị Enhaạn ketuụgh ḍigbaany aloor phọ bịn kụ angọ oye phọ. Tuutughiạn ilọ “oopho ekpo” dị ozụph, iini “ekpọ obiakpạ,” mem dị ozụph ekpo phọ kụ emhiigh osi, reḍighi ghan omhoom oreeny. Omhoom oreeny phọ ragbatanhaạn ghan ni ebạm ekpo phọ ozụph bọ. APọl aḍighinhom oghaạph omaaniọm mọ ophọn phọ oḍeenhaan mọ Olemiạ phọ ayira kụ kangọ “ḍizu lọ eḅeraạn nyodị.”

9. 1 Korịnt 15:39-41 ekaạph eeghe ilọ asiloor?

⁹ Bạl 1 Korịnt 15:39-41. APọl amạ amiteom mọ Enhaạn o/lhẹm iphulhupul oomo araraạr phọ emhoọgh bọ ghuḍum mọ eniin eten. Esi omaạm, iphulhupul inhạm, r’iphulhupul inhụn, ḅilhẹ r’iphulhupul ina, ki/niin. Odị aḅilhẹ aḅẹm mọ epẹ oku aḍio phọ, ogbaranhaạn odi ni igbo erumuḍio phọ r’unwanyụ phọ. Odị amạ ni amiteom mọ siphẹ araanhaạn phọ kẹn ni bịn “enighẹ elọ eenaạn r’eenaạn.” Kụ okạr idiphọ, ghalhamọ r’iduọn yira ko/mhiinhọm ghan bọ ni riḍien ayira, asanyẹns oḅẹm mọ iniin araanhaạn igbogh, iniin ibạm, iniin itotọgh, iniin iphalhaḅaạl, ḅilhẹ iniin ekelhelhe iduọn erumuḍio phọ. APọl aḅẹm kẹn mọ ‘araraạr [ilọ k’akẹ] edi ni; iniin [ilọ] isiẹn ade phọ.’ Iduọn phọ odị raḅẹm ghan mọ eeghe? Odị raḅẹm ghan mọ siẹn ade phọ asiloor iphulhupul kụ edi ghan, kuolọ epẹ k’akẹ phọ aruwaloor kụ edi ghan, idiphọ aruukpaạny phọ.

10. Ḍighẹn odọ aḍizu kụ edị abuphẹ oḅerion bọ orọl epẹ k’akẹ phọ komoọgh bọ?

 ¹⁰ Lọgh elhegh mọ aPọl aḅilhẹ aghaạph mọ: “Iduọn kụ idị ketọl mem mọ koḅerion bọ buphẹ momuughu bọ. Aḍizu phọ aḍiẹn yira odimom bọ kemugh ni epe, kụ mem oḅerion phọ, aḍuugh i/loonaan mun.” Iikia i/lo, mem dị oye amhugh, aḍizu phọ reḅọr ghan ni keḅulha siphẹ iisaạr phọ. (Gen. 3:19) Kụ iphẹn aPọl aghaạph bọ mọ, “kụ mem oḅerion phọ, aḍuugh i/loonaan mun” phọ remạ ghan eeghe? APọl siẹn phọ o/ghaạph ghan ilọ awe dị oḅerion kụ ongọ ghuḍum siẹn ade phọ, idiphọ abuphẹ Ilaija, Ilaisa, ḅilhẹ r’aZizọs oḅerion bọ. APọl aghaạph ghan ilọ awe dị oḅerion r’aḍizu orolhọm k’akẹ, aḍiphẹ phọ pọ, “aḍizu aruwaloor.”—1 Kọr. 15:42-44.

11-12. Eeghe onmia kụ amitenhaan Zizọs mem mọ oḅeton bọ nyodị siphẹ aḍuugh phọ, kụ ika kụ idị abuphẹ osagharạn bọ konmia aani?

¹¹ Mem mọ aZizọs arọl bọ siẹn ade phọ, odị amhoọgh ḍizu iphulhupul, kuolọ mem mọ oḅeton bọ nyodị, bịn odị aḍighi “uwaloor dị rangọ ghan ghuḍum,” bịn aḅulha epẹ k’akẹ phọ. Iniin phọ kẹn kụ edị koḅerion aani Kristẹn phọ abuphẹ osagharạn bọ uwaloor phọ r’aruzu aruwaloor. APọl aḅẹm mọ: “Idiphọ oghighemị bọ ḍizu phọ ayira nyopọ osighẹ bọ oposọ phọ kụ oIẹm kụ idị kughighemị ni iyira nyopọ aḍuạ bọ k’akẹ phọ kụ aru.”—1 Kọr. 15:45-49.

¹² Eḍighi ni ootughianhạm ayira mọ u/ḅeton Zizọs r’aḍizu iphulhupul. Mem mọ oghaạph oḅetenhu esi aḍuugh phọ aPọl rasi bọ eekunha, odị agbạ ni emhụ ikpo onhụ phọ odị iphẹn odị aḅẹm bọ mọ: “Iphulupul r’iḅaạl ke/tue epin aani bin omạr phọ k’Enaạn” epẹ k’akẹ phọ. (1 Kọr. 15:50) Ko/ḅerion butelhedom mọ r’abueriphọ abuphẹ osagharạn aani bọ uwaloor iigbia phọ osighẹ okị epẹ k’akẹ phọ r’aruzu iphulhupul r’ibaạl dị remugh ghan. Pụr amem kụ edị koḅerion bọ bidị? APọl aḅẹm mọ koḅerion bidị epẹ ghisigh; ka/mem mem mọ bidị omhugh bọ. Mem mọ aPọl agẹ bọ ḍinyạ 1 Korịnt phọ, “buniin momuughu ni,” esi omaạm, otelhedom mọ Jems. (Iiḍighi 12:1, 2) Abuniin abutelhedom mọ r’abunhọn dị osagharạn aani uwaloor iigbia phọ ko/mhuughu aani.—1 Kọr. 15:6.

13. Eeghe kụ edị kosighẹ olegheriom mem mọ aZizọs katu bọ?

¹³ AZizọs r’aPọl umạ ni oghiọm ghisigh ilọ amem dị egbatanhaạn—amem mọ aKraist katu bọ. Kosighẹ raaghạm, oḅomhoghian aside, reezẹgh r’inhọn ikarạph araraạr dị kemiteghu oomo isiẹn aḅirinhi phọ, kụ olegheriom mem mọ odị katu bọ. Yira momhiịn ni dị imiịn aBaibul phọ iphẹn phọ remunughan emhiigh k’alhạ phọ 1914. Enhọn ephigh apakirị eḍeenhaan eekunha phọ edi ni. AZizọs aḅẹm mọ iiḅi iinhaghạn phọ eḅẹm bọ mọ Omhạr phọ Enhaạn mamhiigh otooghị, kokaạph ni “oleenye oomo aḅirini phọ, ogbạ oIeenyemi oomo aramạ, kụ eekuna phọ egbi oteẹny.” (Mat. 24:3, 7-14) APọl amạ ni amiteom mọ amem mọ “Omoọgh-we phọ katu bọ,” kụ edị koḅerion bọ Kristẹn phọ abuphẹ osagharạn bọ uwaloor iigbia phọ, buphẹ “momuughu bọ.”—1 Tẹs. 4:14-16; 1 Kọr. 15:23.

14. Eeghe kụ kemitenhaan onyọ abuẹn osagharạn bọ uwaloor iigbia phọ, lọ amhugh siẹn aKraist maru bọ?

¹⁴ Onyọ abuẹn osagharạn bọ uwaloor iigbia phọ dị amhugh nyiidiphọ, roḅeton mem mem mọ bịn konme osighẹ oghị epẹ k’akẹ. Iphẹn kụ emhụ ikpo onhụ phọ aPọl ogẹ bọ siphẹ 1 Korịnt 15:51, 52, eḅẹm bọ mọ: “Oomo phọ ayira kụ ko/naanị ralhạ aḍuugh. Nmananam bịn onyam-oḅatạn, ekureriom eḅaạm okuodụ phọ, kụ oomo phọ ayira onmeeghian yogh.” Ikpo onhụ phọ aPọl iphẹn phọ remunhughan nyiidiphọ! Abumor phọ aKraist abuẹn phọ, komoọgh ni iboom ibo mem dị oḅerion bidị, loor esi dị bidị “kotolạn Omoọgh-we phọ k’agee-pọ.”—1 Tẹs. 4:17.

15. Eeghe oḍighi kụ odianhaan buphẹ konmia bọ esi “onyam-oḅatạn”?

¹⁵ ABaibul phọ uḅenhị ni iyira oḍighi dị buphẹ onmia bọ esi “onyam-oḅatạn” phọ koḍighi epẹ k’akẹ phọ. AZizọs aḅenhị bidị mọ: “Buphẹ kokpạr bọ opu kụ oḍighi ghan ipẹ mị  rawạ bọ osi eekuna phọ, mị kangọ ni igina phọ iikpọ phọ mị aạr bọ Odẹ phọ amị. Mị kangọ ni ḅidị iikpọ ophoghom areelhe phọ, osighẹ ikparạ okuron kụ odaạm abidị, ḅilẹ r’ogurọgh abidị oḅomoghi idiphọ inyokị.”(Ogan. 2:26, 27) Bidị koḍighan Odaạm mọ abidị, esi oḍighi phọ odị aphạm bọ—oḍighi osighẹ ikparạ okuron kụ ophoghom areelhe phọ.—Ogan. 19:11-15.

16. Ika awe kokpạr bọ opu ḍuugh?

¹⁶ Eegholhaan ni mọ abuẹn osagharạn bọ uwaloor iigbia phọ kokpạr ri opu ḍuugh. (1 Kọr. 15:54-57) Oḅetenhu esi aḍuugh phọ abidị kangọ bidị eepoogh ophinhom aani bin, olhoghonhaạn aḍighaạgh oḅeer ikarạph osighẹ oomo isiẹn ade phọ, mem eghạm mọ Amagedọn. Irubal aKristẹn, lhephiri r’anmariịr, kokpetenhaan ni igbogh iiḅaghamhị phọ oḍigh siphẹ omhoom aḅirinhi phọ. (Ogan. 7:14) Buphẹ kokpetenhaan bọ siẹn ade phọ, komiịn ni onhọn okpạr opu aḍuugh—mem mọ koḅerion bọ riisi eelạ awe dị omhuughu iḍiodi phọ. Gbiom olhoghi ibo phọ ketọl bọ mem dị iikiạ phọ iphẹn phọ emiteghu! (Iiḍighi 24:15) Oomo abuphẹ oḅạr bọ aZihova k’epẹ eekunha phọ kokpạr ri opu ghalhamọ r’aḍuugh phọ bidị olhe bọ erua ḍighaạgh Adạm. Bidị kotọl bịn k’agee-pọ.

17. 1 Korịnt 15:58 iromha iyira oḍighi eeghe nyiidiphọ?

¹⁷ Esi iduọn phọ, oomo aKristẹn phọ odi bọ ḍio arodon osereghiạn ni ikpo onhụ iidereghị oḅetenhu esi aḍuugh phọ aPọl agẹ bọ aghiọm buọ aKorịnt phọ. Yira omoọgh ni riphigh otuạn odaphạn aani oroma phọ aPọl aḅẹm bọ mọ, isighẹ “oomo inyaạm mọ anyina eḍighinom engọ Omoọgh-we phọ.” (Bạl 1 Korịnt 15:58.) Eḍighi maạr dị yira oḍighi aani oomo ipẹ yira kotue bọ siẹn oḍighi Omoọgh-we phọ, pọ yira kopogh ni okiọm ghisigh phọ r’ibo. Amem mọ amuphẹ keḍighi mem oghelhọm dị yira ko/mhiịn ghan. Kekạr kụ eḍeenhaan mọ arukumuan phọ yira oghol bọ Omoọgh-we phọ okumuan, i/pe oopho.