1, 2. Нениҥ учун Иегованыҥ ончо ишчилери теҥеридеги тирилишле јилбиркеп јат?

ИЕГОВАНЫҤ кӧп саба ишчилери ӱргӱлјиге јерде јадар, а теҥериге јӱк майлаткан христиандар барат. Ол майлаткандар теҥериде јӱрӱми кандый болорын јетире билбей јадылар. Јерде јӱретен ижемјилӱ улус мыны билерге база кӱӱнзеп јат, нениҥ учун дезе майлаткандардыҥ тирилгени јерде јӱретен улуска кӧп алкыштар экелер. Оныҥ да учун майлаткандардыҥ ла јерде јадатан улустыҥ ижемјизи башка да болзо, бис ончобыс теҥериге болуп турган тирилишле јилбиркеп јадыбыс.

² Иисустыҥ баштапкы ӱренчиктериниҥ кезиги агару тынныҥ болужыла тирилиш керегинде бичиген. Темдектезе, Иоанн мынайып айдат: «Бис эмди Кудайдыҥ балдары. Је кандый болорыс эм тура ачылгалак. Христос ачылза, ого тӱҥей болорысты билерис» (1 Иоанн 3:2). Бу сӧстӧрдӧҥ кӧргӧнисле, майлаткандар теҥеридеги јӱрӱми кандый болорын јетире билбей јат. Је Иегованы олор бойыныҥ кӧзиле кӧрӧр. Агару Бичикте бу јанынаҥ кӧп неме айдылбаган. Је апостол Павелдиҥ сӧстӧринеҥ майлаткандардыҥ теҥеридеги јӱрӱми керегинде база бир эмеш билип аладыс. Оныҥ бичиген сӧстӧриле болзо, олор Иисусла кожо «кандый ла башта ҥыны [башкаруларды], кандый ла ӧрӧги јаҥды ла кӱчти», анайда ок «калганчы ӧштӱни — ӧлӱмди» јоголтып салар. Кийнинде Иисус майлаткандарла кожо ӱзе немени Иегованыҥ колына берип ийер (1 Кор. 15:24—28). Кандый јакшы ӧй болор! *

3. 1 Коринфтегилерге 15:30—32-ле болзо, тирилишке бӱткени Павелге канайып болушкан?

³ Павел тирилишке бӱткен. Бу ого кӱчтерди ӧдӧргӧ болушкан. (1 Коринфтегилерге 15:30—32 кычырыгар.) Павел бойы керегинде мынайда айдат: «Мен кӱнӱҥ сайын ӧлӱп јадым»,— анайда ок — «Ефесте аҥдарла... тартышкам». Ол чын ла Эфестеги амфитеатрда јерлик тындуларла тартышкан ба? (2 Кор. 1:8; 4:10; 11:23). Эмезе јерлик аҥдарла тӱҥдештирилген иудейлерле тартышкан ба? (Ап. ижи 19:26—34; 1 Кор. 16:9). Бу сурактардыҥ каруузын јарт билбезис. Је кандый да кӱчтер болгон болзо, Павел чын кӧрӱмдӱ арткан (2 Кор. 4:16—18).

4. Тирилишке иженгенис биске канайып болужат? (Кадарындагы јурукты кӧрӱгер.)

⁴ Бис чочыдылу ӧйдӧ јададыс. Кем де коркышту криминальный јерлерде јадат. А кем де јуу-согуш болуп турган јерде јадат. Кезик ака-эјелер бистиҥ ижисти токтодып турган эмезе чек токтодып салган ороондордо јадат. Андый да болзо, бу ака-эјелер Иеговага оноҥ ло ары бажырып јат. Олор биске тем болот. Бу ака-эјелер кандый бир јеткердеҥ божоп то калза, келер ӧйдӧ Иегова олорды тиргизип алар деп бӱткилейт.

5. Бис кандый кӧрӱмнеҥ улам тирилишке бӱтпей барардаҥ айабазыс?

⁵ Павел христиандарды телекейдиҥ: «Ӧлгӧндӧр тирилбей турган болзо, јийли, ичели, нениҥ учун дезе эртен ӧлӱп каларыс!» — деп јастыра кӧрӱмин алынбазын деп кӱӱнзеген. Ол бу сӧстӧрди Исаия 22:13-теҥ алып айткан болор. Мындый јастыра кӧрӱм Иегованыҥ ишчилеринде Павелдеҥ де озо болгон. Ол ӧйдӧ израильтяндар Иеговага бажырардыҥ ордына бойлорыныҥ ла кӱӱнин бӱдӱрип јӱрген. Олор: «Эртен-соҥзын ӧлӧр болзоос, ойноп-јыргап не јӱрбес?» — деп санаалу јӱрген. Андый кӧрӱм бӱгӱнги де кӱнде бар. Је израильтяндар мындый кӧрӱмнеҥ улам јаан тӱбекке тӱшкӱлеген (2 Лет. 36:15—20).

6. Тирилишке бӱдӱп турган болзоос, кандый улусла најылашпазыс?

⁶ Павел Коринфтеги христиандарды тирилишке бӱтпей турган улусла најылашпазын деп айткан. Андый улусла биске де најылашпас керек, нениҥ учун дезе андый улус Иеговага бӱдӱмјибисти ӱреердеҥ айабас. Олор келер ӧйди бир де сананбай, бӱгӱнги ле кӱнле јӱрӱп јат. А бис андый улусла најылажып турзаас, олор ло чылап сананып баштаарыс. Ол эмезе кинчекке кирердеҥ айабазыс. Оныҥ да учун Павел христиандарга мындый јакару берген: «Санаа алыныгар, кинчек этпегер» (1 Кор. 15:33, 34).

7. 1 Коринфтегилерге 15:35—38-те бичилгениле, улус тирилиш керегинде кандый сурак берердеҥ айабас?

⁷ 1 Коринфтегилерге 15:35—38 кычырыгар. Кем де бистеҥ тирилишке  алаҥзый берзин деп, мынайда сураардаҥ айабас: «Ӧлгӧндӧр канайып тирилер?» Бу суракка каруу берерге Павелдиҥ сӧстӧрин кӧрӧр керек, нениҥ учун дезе бу сурак јанынаҥ улустыҥ кӧрӱми башка-башка. А Агару Бичик неге ӱредет?

8. Теҥериге тирилиш канайып болуп турганын оҥдоорго биске кандый тем болужат?

⁸ Павел майлаткандарды теҥериге канайып тирилип турганын јартаарга, ӱрен керегинде тем тузаланган. Ӱренди отургыскан кийнинде ол ӱреннеҥ јаҥы ӧзӱм чыгат. Је ӱрен бойы јерде јоголып калат. Анайып ла кижи божоп калза, оныҥ эди-каны чирип, јерге јоголып калат. Је Иегова јок немедеҥ тирӱ неме јайап ийер аргалу (Баш. 1:1; 2:7). Оныҥ учун кижини тирилтип ийерге ого оныҥ чирип калган эски эди-каны керек јок, ол оны јаҥы бӱдӱмдӱ тирилтер.

9. 1 Коринфтегилерге 15:39—41-ле болзо, Иегованыҥ јайаандары кандый бӱдӱмдерлӱ?

⁹ 1 Коринфтегилерге 15:39—41 кычырыгар. Иегованыҥ јайаандарыныҥ кажызыныҥ ла бӱдӱми башка. Агару Бичикте бичилгениле: «Кижиниҥ эди-каны тындулардыҥ эди-канынаҥ аҥыланат, куштардыйы — балыктардыйынаҥ. База теҥериниҥ бӱдӱмдери ле јердиҥ бӱдӱмдери бар. Је теҥериниҥ бӱдӱмдеринде бойыныҥ јаркыны, јердийинде — бойыныҥ. Кӱнде бойыныҥ јаркыны, айда — бойыныҥ, јылдыстарда — бойыныҥ. Јылдыс јылдыстаҥ база јаркыныла аҥыланат». Темдектезе, ученыйлардыҥ айтканыла болзо, јылдыстар база башка-башка болот. Кезиги јаан, кезиги кичинек, кезигиниҥ ӧҥи кызыл, кезиги ак, кезиги дезе бистиҥ кӱн ошкош сары. Је апостол Павел бого ло коштой «теҥериниҥ бӱдӱмдери ле јердиҥ бӱдӱмдери бар» деп айдат.  «Јердиҥ бӱдӱмдери» дегени ол эт-каннаҥ турган јайаандар, а «теҥериниҥ бӱдӱмдери» дегени ол кӧскӧ кӧрӱнбей турган ангелдер ошкош тындар.

10. Майлаткан христиандар кандый бӱдӱмдӱ тирилер?

¹⁰ Павелдиҥ «чирип калары ӱренделет, чирибези туруп келет» деп айтканын ајаруга алдаар ба? Је Агару Бичикте айдылганыла, кижи божозо, ойто тобрак болуп калат деп айдылып турган эмес пе? (Баш. 3:19). Оныҥ учун тиргизилген эт-кан канайып чирибейтен? Је мында Павел јерде тирилетен улус керегинде айтпай јат. Темдектезе, ол Ильяныҥ, Елисейдиҥ ле Иисустыҥ тирилткен улустары керегинде эмес, а теҥериге тын эдип тирилетен майлаткандар керегинде айдат (1 Кор. 15:42—44).

11, 12. Иисустыҥ эди-каны тирилген кийнинде кандый болуп калган, а майлаткандардыҥ эди-каны канайып солынып калат?

¹¹ Иисус јерге келерде, ого эт-кан берилген. А тирилерде, «јӱрӱм јайаачы Тын боло берген». Анайып ла майлаткандар тирилген кийнинде тын болуп калат. Апостол Павел бу керегинде мынайып јартаган: «Тобрактаҥ кижиниҥ сӱр-кеберин алып јӱргенис чилеп, теҥеридеҥ кижиниҥ сӱр-кеберин алып јӱрерис» (1 Кор. 15:45—49).

¹² Иисус теҥериге эт-кан болуп эмес, тын болуп барган. Нениҥ учун ого тын болуп тирилер керек болгонын апостол Павел мындый сӧстӧрлӧ јартаган: «Кижиниҥ эди ле каны ӧлӱмдӱ, ол Кудайдыҥ Каандыгын энчиленип болбос» (1 Кор. 15:50). Оныҥ учун апостолдорго до, ӧскӧ дӧ майлаткандарга эт-кан болуп эмес, тын болуп тирилер керек болгон. Олор качаннаҥ ала  тирилип баштаган? Апостол Павелдиҥ айтканыла болзо, олор божой ло берзе эмес, је келер ӧйдӧ тирилер. Коринфтегилерге самара бичилген тушта майлаткан ӱренчиктердиҥ кезиги «јада калган», темдектезе, апостол Иаков (Ап. ижи 12:1, 2; 1 Кор. 15:6). А арткан майлаткандар божоголок болгон.

13. Иисустыҥ каан болуп отурганынаҥ ала кандый судур бӱдӱп баштаган?

¹³ Иисус та, Павел де келер ӧйдӧ аҥылу ӧй болор деп бичиген — Иисустыҥ каан болуп отурар ӧйи керегинде. Бу ӧйдӧ јуу-согуш, оору-јобол, ар-бӱткенниҥ тӱбеги, оноҥ до ӧскӧ јаман немелер болор деп бичилген. Бу судур 1914 јылдаҥ ала бӱдӱп баштаган. Анайда ок Иисустыҥ каан болуп отурар ӧйинде Кудайдыҥ Каандыгы керегинде сӱӱнчилӱ јар јарлалар керек болгон. Судурда айдылганыла, «ончо калыктарга кере болзын деп, Каандык керегинде Сӱӱнчилӱ Јар јер-ӱстине јарлалар. Ол тушта чак тӱгенер» (Матф. 24:3, 7—14). Анайда ок Павелдиҥ айтканыла, бу ӧйдӧ теҥериге майлаткандар тирилип баштаар (1 Фес. 4:14—16; 1 Кор. 15:23).

14. Иисустыҥ каан болуп отурган ӧйинде божогон майлаткандар качан тирилет?

¹⁴ Эмдиги майлаткандар божогон ло кийнинеҥ тын болуп тирилет. Мыны бис 1 Коринфтегилерге 15:51, 52-де бичилген Павелдиҥ сӧстӧринеҥ кӧрӧдис. Анда мынайып айдылат: «Ончобыс ӧлбӧзис, је ончобыс кубуларыс — кенетийин, бир элесте, калганчы амыргы ӱндензе». Бу сӧстӧр эмди ле бӱдӱп јат. Христостыҥ карындаштары  тирилген кийнинде јаан сӱӱнчи алат. Олор јаантайын «Кайраканла кожо болор» (1 Фес. 4:17).

15. «Бир элесте» кубулган майлаткандар теҥериге барза, нени эдер?

¹⁵ «Бир элесте» кубулган майлаткандар теҥериге барза, нени эдер? Бу керегинде Иисус мынайып айткан: «Јеҥип, Мениҥ керектеримди учына јетире бӱдӱрип турган кижиге калыктардыҥ бажын билер јаҥ берерим. Ол калыктарды темир тайакла кабырар, той балкаштаҥ эткен јыракыларды чылап оодор. Мен де Адамнаҥ јаҥ алганым чылап» (Ачыл. 2:26, 27). Айдарда, майлаткандар албатыларды ол эмезе калју улусты Иисусла кожо темир тайакла кабырар (Ачыл. 19:11—15).

16. Улус ӧлӱмди канайып јеҥип алар?

¹⁶ Майлаткандар ӧлӱмди јеҥип алар! (1 Кор. 15:54—57). Олор тирилзе, Иисусла кожо јерди јаманнаҥ арутаар. Ол ӧйдӧ Иегованыҥ канча миллион улузы улу тӱбекти ӧдӱп чыгар. Олор јердиҥ ӱстинде канча миллиард албаты тирилгенин кӧрӧр (Ачыл. 7:14). Ол ӧйдӧ сӱреен јаан сӱӱнчи болор! (Ап. ижи 24:15). Иегованыҥ чындык ишчилери ӧлӱмди јеҥип алза, ӧлӱм јажын-чакка јоголып калар.

17. 1 Коринфтегилерге 15:58 бисти неге кӱӱнзедет?

¹⁷ Павелдиҥ Коринфтегилерге бичиген самаразы Кудайга кӧптӧдӧ иштеерге болужат. Агару ишке канча кире аргабыс бар, кӧп турушсаас, келер ӧйгӧ ижемјибис бек болор. (1 Коринфтегилерге 15:58 кычырыгар.) Келер ӧйдӧ Иегова биске кандый алкыштар белетеп койгонын бис јетире билбей де јадыс. Кудайга эткен ижигер калас болбос!