1-2. Pirang’o pire tie tek nia wan ceke wang’ei lembe iwi cer mi kwo mi polo?

JURUTIC ma dupa pa Yehova tin gitie ku genogen mi kwo rondo ku rondo iwi ng’om. Ento dong’ Jukristu ma juwiro ku tipo m’udong’, gitie ku genogen mi cikwo i polo. Dhanu maeno gitie kud ava lee mi ng’eyo kite ma kwo migi bibedo ko i nindo m’ubino. Kadong’ dhanu mange ma gitie ku genogen mi kwo iwi ng’om e ke? Calu ma wabineno, cer mi kwo mi polo bimio mugisa bende ni dhanu ma gitie ku genogen mi kwo rondo ku rondo iwi ng’om. Kadok watie ku genogen mi cikwo i polo kunoke mi kwo iwi ng’om de, re wan ceke watie ku yeny mi ng’eyo lembe iwi cer ma pi kwo mi polo.

² Mungu utelo wi jumoko m’i kind julub pa Yesu i rundi ma kwong’a, pi nikiewo lembe iwi cer mi kwo mi polo. Jakwenda Yohana ukoro kumae: “Kawono wa nyithindho pa Mungu, endre fodi enyuthre ngo nia wabibedo ni ang’o. Wang’eyo nia, tek ebinyuthre, wabibedo calkude.” (1 Yoh. 3:2) Eno ubenyutho nia Jukristu ma juwiro ku tipo fodi ging’eyo ngo kite ma gibibedo ko kinde ma gibicer ku kum mi tipo. Re gin ma ging’eyo utie nia, kinde ma gibinwang’u sukulia migi, gibineno Yehova Mungu ku wang’gi. Biblia ukoro ngo lembe ceke iwi cer mi kwo mi polo, ento jakwenda Paulo ukoro lembene moko nyanok. Jukristu ma juwiro ku tipo gibidikiri karacelo ku Kristu kinde m’ebekabu “bimobim ceke ku ng’ol ceke man  tego.” Eno uketho i ie bende nyoth m’ebinyotho ko “Jakwor macen ma . . . en e tho.” I ng’eye, Yesu karacelo ku ju m’ebibimo kugi, gibijwigiri gin gigi ni Yehova man gibidwoko piny ceke wor ire. (1 Kor. 15:24-28) Eno bibedo nindo maber mi tuko ngo! *

3. Calu m’ugorere i 1 Jukorinto 15:30-32, yioyic ma Paulo ubino ko iwi cer ukonye nitimo ang’o?

³ Yioyic ma Paulo ubino ko iwi cer, ukonye niciro ragedo ma tung’ tung’ dupa. (Som 1 Jukorinto 15:30-32.) Ewacu ni Jukorinto kumae: “Atho ku ba rupiny.” Ewacu bende nia ‘enyego ku yedi i Efeso.’ Saa moko nyo ebino weco pir anyego mandha m’enyego ko ku lei i Efeso. (2 Kor. 1:8; 4:10; 11:23) Kunoke nyo ebino weco pi jai mi Juyahudi, ku mi jumange ma timo migi ubino ve pa “yedi.” (Tic. 19:26-34; 1 Kor. 16:9) Kadok ebed kumeno kunoke ngo de, re gin ma wang’eyo utie nia enwang’ere ku peko dupa, man emedere asu nibedo ku genogen pi nindo m’ubino.​—2 Kor. 4:16-18.

4. Genogen mi cer ubetielo cwiny umego ku nyimego mwa nenedi tin? (Nen cal m’i ng’eye.)

⁴ Tin wan de wabekwo i nindo ma rac. Umego ku nyimego mwa moko jubesendogi ku rac. Jumoko gibekwo i kabedo ma lwiny n’i ie, ma saa ceke gitie ku lworo. Jumange ke gibekwo i ng’om ma jucero ie tic mwa, kunoke ma jukwero tije akwera zoo i ie, uketho gibetimo ni Yehova kud i kind ariti kunoke m’umbe bed’agonya. Re kadok kumeno de, cirocir ma gibemediri ko nitimo ni Yehova utie iwa lapor ma ber m’ukwayu walubi. Gibedo ma cwinygi tek, kum ging’eyo nia kadok githo de, Yehova ukanu igi piny ma pire tek m’ebimio igi i nindo m’ubino.

5. Paru ma kani ma rac ma copo nyotho yioyic ma watie ko iwi cer?

⁵ Paulo ucimo wang’ umego pare i kum paru ma rac ma dhanu moko ubino ko iwi cer, ma giwacu ko nia “tek ju m’utho cer ungo, wek wacam wamadhi, kum urwo watho.” Dhanu moko ular ubino ku paru ma kumeno kadok i wang’ rundi pa Paulo de. Saa moko nyo Paulo ubino weco pi lembe ma nwang’ere i Isaya 22:13, m’ukoro pi pidoic ma nyithindho mir Israel gibino ko. Kakare niketho mer migi ku Mungu udok ma tek, gimaru migi nitimo anyong’a ma hakine mbe. Jucopo wacu nia gibino ku paru ma nia “m’unen nang’ unen, mir urwo wang’eyo ngo.” Kit paru ma kumeno unyai kadok tin bende. Biblia unyutho adwogi ma rac ma nyithindho mir Israel ginwang’u nikum pidoic ma kumeno.​—2 Kei. 36:15-20.

6. Genogen ma watie ko iwi cer, copo konyowa nenedi ning’io jurimbwa?

⁶ Genogen ma watie ko iwi cer copo konyowa ning’io jurimbwa ku riekowang’. Ugam ukwayere nia umego mi Korinto gibed ku wang’gi i kum dhanu ma gikwero nia cer umbe. Lembuno ubemio iwa ponji tin bende. Wacopo nwang’u adwogi ma rac tek watie ku jurimo ma kwo migi zoo ucungo iwi timo anyong’a. Bedo ku kit dhanu ma kumeno copo nyotho pidoic mwa man bende timo mwa. Gicopo cwaluwa nicaku timo lembe ma rac ma Mungu dagu. Paulo ukwayuwa pi lembuno kumae: “Wucew man wutim lembe m’atira ento dubo re ngo.”​—1 Kor. 15:33, 34, NWT.

7. Calu ma junyutho i giragora mi 1 Jukorinto 15:35-38, dhanu moko copo penjowa ku penji ma nenedi iwi cer?

⁷ Som 1 Jukorinto 15:35-38. Ng’atu m’umito royo jiji i iwa pi cer, copo penjowa kumae: ‘Ju m’utho bicer nenedi?’ Wakewec iwi dwokowang’ lembe pa Paulo iwi penji maeno, pilembe dhanu ma pol tin, ng’atuman utie ku paru pare iwi kite ma judoko ko ka jutho. Biblia ke uponjo ang’o?

8. Lapor ma kani ma copo konyowa ninyang’ i kum cer mi kwo mi polo?

⁸ Ka ng’atini utho, kume top. Ento Mungu ma Jacwic m’ucwio polo ku ng’om, m’ecwiogi ngo niai kud i piny moko, copo cero ng’atu m’utho man emio ire kit kum ma ber m’uromo kude. (Tha. 1:1; 2:7) Paulo utio ku lapor m’unyutho nia Mungu umbe ku yeny mi dwoko kum marom ma ng’atini ular ubino ko i wang’ tho pare. Kepar pi nying’ kodhi! Ka jupidhe, etwi man ewodho ithe ma nyen. Kan edaru twi edoko ni uboko, ekoc kud ayi m’elar ebino ko i wang’e ma fodi jupidhe ngo. Paulo utio ku lapor maeno pi ninyutho nia Jacwic mwa copo mio iwa “kum . . . calu [ma] ie yenyo.”

9. Buku mi 1 Jukorinto 15:39-41 uweco iwi kit kum ma tung’ tung’ ma kani?

⁹ Som 1 Jukorinto 15:39-41. Paulo unyutho nia Mungu ucwio kit piny ma tung’ tung’ dupa. Ku lapor, ecwio dhiang’, winyo, man rec ceke ku kum m’ukoc. Emedo nia i kor polo de waneno tung’ tung’ maeno, calu ve tung’ tung’ m’utie i kind ceng’ ku dwi. Bende, enyutho nia “dwong’ mi cero acel . . . tung’ ku [dwong’ mi] cero mange.” Kadok saa moko wacopo neno tung’ tung’ne ngo ku wang’wa de, re cero moko nuti ma jururieko gilwong’o nia cero ma kwar, cero ma tar man mi rangi mi banana, calu ve ceng’ ma wabed waneno i kor polo. Paulo ukoro bende nia “kum m’i polo bende  nuti, man kum m’i ng’om [de nuti].” Eno emito yero ang’o? I ng’om, watie ku kum mi ring’kum; ento kum m’i polo utie kum mi tipo, calu mi jumalaika.

10. Dhanu ma gibicer pi nicikwo i polo, gibicer ku kit kum ma nenedi?

¹⁰ Paulo udok uyero kumae i ng’eye: “E cer mi ju m’utho bende bedo kumeno. Jucoye i nyoth; ecer umbe nyoth.” Wang’eyo nia tek ng’atini tho, kume top man edoko ni utur. (Tha. 3:19) Ka kumeno, kum copo ‘cer m’umbe nyoth’ nenedi? Paulo ubino weco ngo pi dhanu ma bicer pi nikwo iwi ng’om, calu ve dhanu m’Eliya, Elica, man Yesu gigam gicero. Paulo ubino weco pi dhanu ma bicer ku kum ma gicopo kwo ko i polo, niwacu “kum mi tipo.”​—1 Kor. 15:42-44.

11-12. (a) Kinde ma Yesu cer, edoko ku kum ma nenedi? (b) Jukristu ma juwiro ku tipo ke ginwang’u aloka loka ma kani i ng’ei cer migi?

¹¹ Kinde ma Yesu ubino kwo iwi ng’om, ebino ku kum mi ring’kum. Ento kinde m’ecer, ‘edoko ni tipo ma mio kwo’ man eidho i polo. Jukristu ma juwiro ku tipo bende gibicer ku kum mi tipo ma copo ketho gikwo i polo. Paulo ukoro kumae: “Calu wan wadaru bedo kud ayi maeni mi ng’om, e wabibedo kud ayi maeni mi polo bende.”​—1 Kor. 15:45-49.

¹² Pire tie tek ning’eyo nia Yesu ucer ungo ku kum mi dhanu. Paulo ukoro lembene kinde m’ebino daru wec pare iwi cer. Ewacu kumae: “Ring’kum ku rimo copo camu pacu mi Ker pa Mungu ngo.” (1 Kor. 15:50) Pi nicikwo i polo, jukwenda ku Jukristu mange ma juwiro ku tipo, gibicer ungo ku kum mi ring’kum ku rimo ma copo nyothere. Gibicer awene? Saa maeca nwang’u fodi cerne ubebino abina i wang’gi, ento ungo ndhundhu i ng’ei tho migi. Kinde ma Paulo ubino kiewo waraga mi Jukorinto mi kwong’o, nwang’u dong’ julub moko gidaru ‘nindo [i tho],’ calu ve jakwenda Yakobo. (Tic. 12:1, 2) I ng’eye, jakwenda  Paulo ku ju mange ma juwiro ku tipo de ‘gidok ginindo [i tho].’​—1 Kor. 15:6.

13. Ang’o ma bitimere i nindo mi bedo nuti pa Yesu?

¹³ Yesu ku Paulo ceke giewo pi nindo ma segi ma nwang’u fodi ubebino abina, niwacu bedo nuti pa Kristu. Pi bedo nutine bing’eyere nikum lwiny, digidi, thong’om man peko mange ma bitimere iwi ng’om. Lembila maeno ucaku pong’o niai i oro 1914. Ento giranyutha mange ma pire tek de bibedo nuti. Yesu wacu nia lembanyong’a mi Ker ma dong’ tin ubebimo, birweyere “i ng’om ngung’ ni lembatuca ni thek ceke; e kajik bilund wok.” (Mat. 24:3, 7-14) Paulo unyutho bende nia nindo mi “[bedo nuti] pa Rwoth” bibedo nindo ma Jukristu ma juwiro ku tipo ma “ginindo [i tho] bicer i ie.”​—1 Tes. 4:14-16; 1 Kor. 15:23.

14. Ang’o ma timere ni Jukristu ma juwiro ku tipo ma gibetho i nindo mi bedo nuti pa Kristu?

¹⁴ Jukristu ma juwiro ku tipo ma gibetho i nindo ma tin, gicer ndhundhu i ng’ei tho migi pi nicidho i polo. Lembe ma Paulo ukiewo i 1 Jukorinto 15:51, 52 unyutho lembuno kamaleng’. Ekiewo kumae: “Kawa ceke wabinindo ngo, ento jubilokowa kawa ceke, nyapil calu goyowang’, kinde ma [agwara ma tokcen biywak].” Tin lembe maeno ma Paulo uyero ubepong’o! I saa mi cer, umego pa Kristu gibinwang’u anyong’a ma yawe mbe, kum gibibedo “nja ku Rwoth.”​—1 Tes. 4:17.

15. Tic ma kani m’ubekuro ju ma jubilokogi “nyapil calu goyowang’”?

¹⁵ Biblia unyutho tic ma ju ma julokogi  “nyapil calu goyowang’” gibitimo i polo. Yesu wacu igi kumae: “ng’atu m’uloyo, ku ng’atu m’ukuro tic para de cil i kajikne, abimie ng’ol wi thek, man ebibimogi ku dul mi nyunyu, [e gibing’eny] calu agulu pa jacwiagulu ng’eny nziki nziki; calu [ma] an bende ajolo ba Vwa.” (Nyu. 2:26, 27) Gibilubo tok Yesu man gibitelo wi thek kud uluth mi nyunyu, niwacu uluth mi cuma.​—Nyu. 19:11-15.

16. Dhanu dupa binwang’u aloci ma kani iwi tho?

¹⁶ M’umbe jiji, Jukristu ma juwiro ku tipo gibinwang’u aloci iwi tho kinde ma gibicer. (1 Kor. 15:54-57) Cer migine bimio igi kaka ma gibidikiri ko i tic mi kabu lembe ceke ma reco ku wi ng’om i saa mi lwiny mi Armagedon. Jukristu mange milioni dupa, gibiboth ‘kud i masendi ma dit,’ pi nikwo i ng’om ma nyen. (Nyu. 7:14) Dhanu maeno ma giboth, gibineno ku wang’gi aloci mange iwi tho, saa ma dhanu milioni dupa m’utho bicer. Kepar pir anyong’a ma dit ma bibedo nuti saa maeno! (Tic. 24:15) Dhanu ceke ma gigwoko bedoleng’ migi ni Yehova, gibinwang’u aloci iwi tho ma walagu i bang’ Adamu. Man gibinwang’u bende kaka mi kwo rondo ku rondo.

17. Giragora mi 1 Jukorinto 15:58, ubecwaluwa nitim’ang’o?

¹⁷ Wan ceke wacikara nibedo ku foyofoc pi wec mi jukocwiny ma jakwenda Paul uyero ni Jukorinto iwi cer. Lembe m’eyerone bicwaluwa nitimo “tic pa Rwoth” ku kero mwa ceke. (Som 1 Jukorinto 15:58.) Tek wabetimo tic maeno kud amora man ku gwoko bedoleng’, e wabinwang’u anyong’a m’i nindo m’ubino. Nindo maeno bibedo ber nisagu lembe ceke ma ber ma wabed waparu. Wabineno kamaleng’ nia tic pa Rwoth ma wabed watimo ubino ngo mi mananu.