1, 2. ¿Kunatsa alajjpachar sarañatak jaktayatäpkani uka toqet yatiñ taqe cristianonakajj munañasa?

 JICHHA tiempon Jehová Diosar servirinakat jilapartejja, aka oraqen jakañwa suytʼasipki. Ukampis ajllit cristianonakat aka oraqen jiltʼapki ukanakajja, alajjpachar sarañatak jaktañ utjki uka toqet wal yatiñ munapjje. Aka oraqen jakañ suytʼasipki ukanakas uka toqet yatiñ munapjjarakiwa. ¿Kunatsa? Kunjamtï yatjjatkañänejja, alajjpachar sarañatak jaktayatäpkani uka laykuw walja bendicionanak katoqapjjani. Ukhamajja, alajjpachar sarañataki ajllitästan janisa, taqeniw uka toqet wal yatiñ munañasa.

² Diosajja, alajjpachar sarañatak jaktayatäpkani uka toqet qellqapjjañapatakiw Jesusan nayrïr discipulonakapat mä qhawqhanirojj amuytʼayäna. Apóstol Juanajj akham sänwa: “Jichhajj Diosan wawanakapätanwa, jutïrin kunjamänis jakäwisajj uka toqetjja janïraw qhanañchapkistuti. Ukampis jiwasanakajj yattanwa, jupajj uñachtʼayaskani ukhajja, [...] jupjamäjjañäniwa” sasa (1 Juan 3:2). Ukhamajja, ajllitanakajj kunjamas alajjpachan jakañajja, espíritu cuerponi jaktayatäñas kunjamasa uk janiw yatipkiti. Ukampis uka premio katoqapkani ukhajja, Jehová Diosarojj uñjapjjaniwa. Kunjamas alajjpachar sarañatak jaktayatäpjjani uk Bibliajj janiw taq qhanañchkiti. Ukampis Pablojja, uka toqet mä jukʼa qhanañchänwa. Ajllit cristianonakajja, ‘kunapachatï taqe gobiernonakasa, taqe munañaninakasa, chʼamaninakasa qʼal tukjatäjjani’ ukapachajja Cristomp chikaw alajjpachankjjapjjani. Ukapachasti “jiwañasa, mä arunjja qhepïri enemigosa janiw utj-jjaniti” sasaw säna. Uka qhepatsti, Jesusasa jupamp chika apnaqapkani ukanakasa, Jehová Diosaruw  katuyasjjapjjani taqe kunsa Juparuw katuyjjapjjarakini (1 Cor. 15:24-28). Ukajj wali kusiskañäniwa. *

3. Kuntï 1 Corintios 15:30-32 texton siski ukarjamajja, ¿kun lurañatakis Pablorojj jiwatat jaktañ utjatapar creyiñajj yanaptʼäna?

³ Pablorojja, jiwatat jaktañ utjki ukar creyitapaw jan waltʼäwinak aguantañatakejj yanaptʼäna (1 Corintios 15:30-32 liytʼañataki). “Nayajj sapüruw jiwañar saykatta” sasaw Corintonkir cristianonakarojj säna. “Salvaje animalanakampi[w] Éfeso markan nuwasstjja” sasaw qellqarakïna. Inas Pablojj Éfeso markankir mä estadion jaqenakajj salvaje animalanakampi nuwasipjjerïkäna ukat parlaskchïna (2 Cor. 1:8; 4:10; 11:23). Jan ukajj inas uñisiri judionakat parlaskchïna, yaqhepajj “salvaje animalanakampi” sasipjjänwa (Hech. 19:26-34; 1 Cor. 16:9). Kunatjjay parlaskchïna, ukampis Pablojj kusisit chuymampiw jan waltʼäwinakar saykatirïna (2 Cor. 4:16-18).

4. ¿Kunjamsa jiwatat jaktañ utjatapajj jichha tiempon jakir cristianonakarojj chʼamañchtʼi? (Nayrïr paginankir foto uñjjattʼäta).

⁴ Jiwasajj ukham jan wali tiemponwa jakaraktanjja. Yaqhep jilat kullakanakajja, jiwayataw uñjasiwayapjje. Yaqhepasti guerra utjipan ajjsarayasiñjamäki, uka cheqanakanwa jakasipjje. Yaqhepajja, kawkjantï Diosar serviñajj wali jarkʼatäki ukawjanwa jakäwip aptʼasirjama Diosar servisipki. Ukhamanakansa uñjasipkchejja, Jehová Diosar jan jitheqtas servisipkakiwa, jiwasatakejj wali yateqaskayäpjjewa. Jiwayatas uñjasipjjchinejja, jutïrin jukʼamp sum jakasiñwa Jehová Diosajj jupanakar churani, uk yatisaw jan ajjsarayasipkiti.

5. ¿Kunjam amuyasas jiwatat jaktañ utjatapar jan confiyjjsna?

⁵ Yaqhep jilatanakajja jaktañ toqet janiw kunatï cheqäki ukham amuyapkänti, ukatwa Pablojj jan ukham amuyapjjañapatakejj jupanakar akham säna: “Jiwatanakatejj jan jaktanipkchini ukhajja, mayni jaqenakjamarakiy sapjjañäni: ‘Manqtʼasiñäni, umtʼasiñäni, qharürojj jiwjjchiñänejjaya’ sasa”. Ukham amuyir jaqenakajja, Pablojj jakkäna uka tiempots nayraw utj-jjäna. Inas Pablojj Isaías 22:13 textot aytchïna, ukanjja kuntï israelitanakajj lurapkäna ukanakatwa parli. Jupanakajj Diosar jukʼamp jakʼachasiñat sipansa, kusistʼañakwa thaqapjjäna. “Jichhaw kusistʼañasa, qharürojj jiwjjchiñänejjaya” sasaw israelitanakajj amuyapjjerïna, jichha tiemponjja jaqenakajj ukhamwa amuyapjjaraki. Israelitanakajj kuna jan walinakansa ukham lurapjjatapat uñjasipjjäna ukajj Biblian qellqatawa (2 Crón. 36:15-20).

6. Jiwatanakajj jaktanipkani ukar creyiñajj ¿kunjamsa khitinakampis chikachasiñäni uk ajlliñatak yanaptʼistu?

⁶ Cheqapuniw Jehová Diosajj jiwatanakar jaktayani, ukat janiw pächasktanti, ukhamajja kuna kasta amigonaksa ajllisktan ukat amuyasiñasawa. Corintonkir jilatanakajja, khitinakatï jaktañajj janiw utjkiti sasin amuyapkäna ukanakat jitheqtapjjañapänwa. ¿Kunsa ukat yateqsna? Khitinakatï jutïrit jan llakisipki kusistʼañak thaqapki ukanakat jitheqtañasawa, jupanakajj jan waliruw purtʼasiyistaspa. Mä cristianotï jupanakamp chikachasispa ukhajja, tiempompejj jupanakjamaw amuyjjaspa lurjjarakispa. Diosajj kuntï uñiski ukanakwa lurjjaspa. Ukatwa Pablojj akham sasin ewjjtʼistu: “Kunatï cheqäki uk wali amuyumpi lurapjjam, jan juchanak lurapjjamti” sasa (1 Cor. 15:33, 34).

7. 1 Corintios 15:35-38 textorjamajja, ¿kunsa yaqhepajj pächasiyañatakejj jisktʼapjjaspa?

⁷ (1 Corintios 15:35-38 liytʼañataki). Jiwatat jaktañajj janiw utjkiti sasin pächasiyañ munir mä jaqejja, inas akham maynir jisktʼchispa: “¿Kunjamsa jiwatanakajj jaktanipjjani, kuna kasta cuerponis jaktanipjjani?” sasa. Kunjamsa Pablojj uka toqet qhanañchäna uk amuytʼañaw wakisispa. Jichha tiemponjja, jiwatanakampejj kunas pasi uka toqet kunaymanwa jaqenakajj amuyapjje. Ukampis ¿kunsa Bibliajj yatichistu?

8. Kunjamas alajjpachar saririnakajj jaktayatäpjjani uk amuyañatakejj ¿kuna uñachtʼäwis yanaptʼistaspa?

⁸ Maynejj jiwjje ukhajja, cuerpopajj ñusantjjewa. Ukampis alajjpachampi oraqempi ina chʼusat lurir Diosaw jiwatanakarojj jaktayaspa, kunjam cuerponïñapatï wakiski ukhamwa Jupajj jaktayaspa (Gén. 1:1; 2:7). Pablojja, Diosajj maynir jiwatat jaktaykani ukhajja janiw pachpa cuerpopampejj jaktaykaniti sasaw qhanañchäna. Uk amuytʼayañatakejj Pablojj mä jiskʼa ‘jathatwa’ parläna. Oraqer uchtan ukhajja, uka jathat mä machaq aliw mistunjje. Uka alejj janiw mä jiskʼa jathakëjjeti. Pablojja uka uñachtʼäwimpiw kunjamsa Diosajj ‘munañaparjam’ mä cuerpo luraspa uk amuytʼayäna.

9. ¿Kunayman kasta cuerponak utjatapat kamsis 1 Corintios 15:39-41 textojja?

⁹ (1 Corintios 15:39-41 liytʼañataki). Pablojja, Diosajj janiw taqe cuerponak mä kikpaki lurawaykiti sasaw qhanañchäna. Sañäni, uywanakasa, jamachʼinakasa, chawllanakasa janiw mä pachpa cuerponïpkiti. Alajjpachansa phajjsimpi intimpejj janiw mä igualakïpkiti, “sapa warawaran kʼajatapaw mayjajja” sasaw Pablojj sarakïna. Cientificonakajja yaqhep warawaranakajj jachʼäpjjewa, yaqhepasti jiskʼakïpjjewa, yaqhepasti wila, janqʼo, qʼellu ukham coloranakäpjjewa sasaw sapjje, intis qʼellu color warawarawa. Ukampis jiwasajj inas nayrasampikejj ukanak jan amuykstanti.  Ukhamarakiw “alajjpachankiri cuerponakasa aka oraqenkir cuerponakasa” utji sasaw Pablojj sarakïna. ¿Ukampejj kamsañsa munäna? Aka oraqen jakirinakajja, jañchi cuerponïtanwa, alajjpachansti espíritu cuerponïpjjarakiwa. Sañäni angelanakajj espíritu cuerponïpjjewa.

10. Alajjpachar sarapjjañapatak jaktayaskani ukanakajj ¿kuna kasta cuerponïpjjanisa?

¹⁰ Pablojj uka toqet akham saskakïnwa: “Jiwatat jaktañampejj ukhamarakiwa. Tukusir cuerpow imantasi, jan tukusir cuerpow sartaniraki” sasa. Maynejj jiwjje ukhajja, cuerpopajj ñusantjjewa laqʼaruw tukjjaraki (Gén. 3:19). Ukhamajj ¿kunjamsa ‘jan tukusir cuerponi sartanirakispa’? Pablojj janiw aka oraqen jaktayatäpkäna ukanakat parlkänti, sañäni Elías, Eliseo, Jesús jupanakajj jiwatanakar jaktayapjjänwa, ukampis Pablojj janiw ukat parlkänti. Jan ukasti, ‘espíritu cuerponi’ alajjpachar sarañataki jaktañatwa parlaskäna (1 Cor. 15:42-44).

11, 12. ¿Jesusajj kuna kasta cuerponis jaktayatäna, ajllitanakajj kunjam jaktayatäpjjarakinisa?

¹¹ Jesusajj aka oraqenkkäna ukhajja, jañchi cuerponïnwa. Ukampis jaktayatäjjasajj “jakañ churir espirituruw tukurakïna”. Ukhamarakiw ajllitanakajj alajjpachan jakañataki jaktayatäpjjani. Pablojj akham qhanañchäna: “Kunjamatï jiwasajj laqʼat luratäki ukar uñtasitäktanjja, ukhamarakiw jiwasajj alajjpachankirïki ukar uñtasitäñäni” sasa (1 Cor. 15:45-49).

¹² Jesusajj janiw jañchi cuerponi jaktayatäkänti, uk janiw armañasäkiti. Pablojj jaktañ toqet parlañ tukuykasajja, kunatsa Jesusajj ukham jaktayatäna uk akham sasaw qhanañchäna: “Jañchimpi wilampejj janiw [alajjpachan] Diosan Reinop katoqkaspati” sasa (1 Cor. 15:50). Apostolonakasa yaqha ajllitanakasa, alajjpachar sarapjjañapatakejj janiw jañchini chʼakhani, ukham tukusir cuerponi jaktayatäpkaspati. Ukampis ¿kunapachas jaktapjjañapäna? Pablojj jutïr tiemponwa  jaktayatäpjjani sasaw qhanañchäna. Janiw jiwasin uka ratpacha uk katoqapkaspati. Pablojj 1 Corintios libro qellqkäna ukhajja, yaqhep discipulonakajj ‘jiwañanwa iktʼjjapjjäna’. Sañäni apóstol Santiagojj jiwatäjjänwa (Hech. 12:1, 2). Uka qhepatjja, yaqha apostolonakasa ajllitanakat yaqhepasa jiwjjapjjarakïnwa (1 Cor. 15:6).

13. Jesusajj kuttʼanjjani uka tiempon ¿kunas pasañapäna?

¹³ Jesusasa Pablos jutïr urunakatakiw profecianak arsupjjäna, mä arunjja Cristojj ‘kuttʼankani uka tiempotwa’ parlasipkäna. Uka tiemponjja, guerranaka, terremotonaka, usunaka ukat yaqha ukham jan walinakaw aka oraqpachan utjañapäna. Uka profeciajj 1914 marat aksaruw phoqasiski. Ukampis yaqha wakiskiriw pasañaparakïna. Jesusajj akham sänwa: “Reinon aka suma yatiyäwinakapajja aka oraqpachanwa yatiyasini, ukhamat taqe markanakan yatipjjañapataki. Ukjjaruw akapachan tukusiñapajj jutani” sasa (Mat. 24:3, 7-14). Pablojja, “Tatitojj kuttʼanjjani uka tiempon” kawkïr ajllit cristianonakatï “jiwañan iktʼasipki” ukanakajj alajjpachan jakañatak jaktayatäpjjaniwa sasaw sarakïna (1 Tes. 4:14-16; 1 Cor. 15:23).

14. ¿Kunas jichha tiempon jiwapki uka ajllit cristianonakampejj pasi?

¹⁴ Ajllit cristianonakat jichha tiempon jiwapkani ukanakajja, uka ratpachaw alajjpachar sarañatak jaktayatäpjje. Pablojj 1 Corintios 15:51, 52 texton kuntï qhanañchki ukaw uk amuyayistu. Jupajj akham sänwa: “Janiw taqenejj jiwañan iktʼkañäniti, taqeniw cambiatäñäni, qhep qhepa trompetajj tuktʼaskani uka tiemponwa, mayaki, mä chʼipjjtanaki taqenis cambiatäñäni” sasa. Pablon uka arunakapajj  jichha tiemponwa phoqasiski. Ajllit cristianonakajja, jiwatat jaktasajj cheqpach kusisitäpjjaniwa, ‘Tatitumpejj wiñayatakiw chikäjjapjjani’ (1 Tes. 4:17).

15. ¿Kunsa “mä chʼipjjtanaki” cambiatäpkani ukanakajj lurapjjani?

¹⁵ Khitinakatï “mä chʼipjjtanaki” cambiatäpkani ukanakajj kunsa alajjpachan lurapjjani uk Bibliaw qhanañchistu. Jesusajj jupanakar akham siwa: “Khititejj atipjkani, luräwinakajsa tukuykam phoqarakini ukarojja, akapachankir jaqenakjjaruw munañanïña churäjja, hierrot lurat varampiw jupajj jaqenakar awatini, ukhamatwa jupanakajj ñeqʼet lurat vasonakjam qʼala tʼunjatäpjjani, kunjamtï nayajj Awkijat munañanïñ katoqkta ukhama” sasa (Apoc. 2:26, 27). Jupanakajja, Jesusamp chikaw hierrot lurat varampi markanakar awatipjjani (Apoc. 19:11-15).

16. ¿Kunjamsa walja millón jaqenakajj jiwañar atipjapjjani?

¹⁶ Ajllit cristianonakajja, jiwañarojj atipjapjjaniwa (1 Cor. 15:54-57). Jupanakajja, jaktayatäsajj Jesusamp chikaw taqe jan waltʼäwinak Armagedón guerran tukjapjjani. Walja millón jilat kullakanakaw ‘wali tʼaqesiñ’ tiempo jakkirpach pasasajj machaq mundon jakasipjjani (Apoc. 7:14). Jupanakajja, kunjamsa jiwañarojj atipjasini ukwa uñjapjjani, mä arunjja walja millón jiwatanakar jaktanirwa uñjapjjani. Uk uñjañajj wali kusiskañapunïniwa (Hech. 24:15). Jehová Diosar jan jitheqtasa servipkani ukanakajja, Adanat jiwaña katoqawayapki ukarojj atipjapjjaniwa. Wiñayatakiw jakasjjapjjani.

17. 1 Corintios 15:58 textorjamajja, ¿kunsa jichha tiempon lurañasa?

¹⁷ Pablojj Corintonkir cristianonakar carta qellqatapat wal yuspärtanjja. Jupajja, jiwatat jaktañ toqet chʼamañchkir arunakwa qellqäna. “Tatitur serviñansa walpun trabajipjjam” sasin Pablojj ewjjtʼkistu ukarus taqe chuymaw istʼañ munaraktanjja (1 Corintios 15:58 liytʼañataki). Jiwasatï ukham trabajiñäni ukhajja, jutïrin kusisitaw jakasiñäni. Kunja kusisitas uka tiempon jakasiñäni uk janiw jichhajj amuyksnati. Tatitur servitasajj jan inamayakïtapwa qhan amuyañäni.