1-2. Inyuki bikristen gwobisôna bi nlama yi lelaa bitugne bi bet ba nke niñ i ngii bi ga bôña?

LIBIM li bôt li li ngwélél Yéhôva i len ini, li gwé botñem i niñ i boga ni boga hana ’isi. Ndi minhook mi bikristen mi mi ngi yii hana ’isi, mi gwé botñem i niñ i ngii i mbus bitugne gwap. I ndék minhook i, i nyamnda ni ngôñ i yi lelaa niñ yap y’a ba nyoo i ngii. Ndi baa yak i bés ba di gwé botñem i niñ hana ’isi di gwé ngôñ i yi jam li? Ñ! Inyule kiki di ga ke i tehe, bitugne bi bet b’a ke niñ i ngii bi ga lona i bet ba ga niñ hana ’isi i boga ni boga ngandak bisai. Jon too di gwé botñem i niñ i ngii tole hana ’isi, di nlama yéñ yi lelaa bitugne bi bôt b’a kee niñ i ngii bi ga bôña.

² Djob a bi gwélél mbuu mpubi wé inyu hôla banigil ba Yésu bahogi i hiai hi bisu i tila inyu i bet ba ga tuge inyu ke niñ i ngii. Ñôma Yôhanes a tila le: “Nano di yé bon ba Nyambe, ndi i yom di ga ba i yé ngi yeelana. Di nyi le ngéda a’ nene, di ga ba kiki nye.” (1 Yôhanes 3:2) Hala a nkobla le minhook mi bikristen mi nyi bé loñge loñge lelaa b’a ba nyoo i ngii, ngéda ba ga tuge kiki bihégél bi mbuu. Ndi i yom ba nyi i yé le ba ga tehe yaga Yéhôva ngéda ba ga kôs bom yap. Bibel i nyelel bé mam momasôna inyu bitugne bi bet b’a niñ i ngii i mbus bitugne gwap. Ndi ñôma Paul a bi ti ndék biniigana mu i jam li.  Minhook mi ga ba ntôñ ni Kristô ngéda a ga lo i “tjé biaane gwobisôna, ni kunde yosôna ni lipémba jolisôna.” Yak “ñoo nu sôk le nyemb a’ tjiba.” I mbus hala, Yésu ni solôñ yé b’a suhus bomede, ba suhus ki mam momasôna isi Yéhôva. (1 Korintô 15:24-28) Kinje niñ ilam y’a ba ha ngéda i! *

3. Kiki kaat 1 Korintô 15:30-32 i nkal, i botñem Paul a bééna inyu bitugne i bi hôla nye i boñ kii?

³ Botñem Paul a bééna inyu bitugne, i bi hôla nye i hônba ngandak mandutu. (Añ 1 Korintô 15:30-32.) A kal bôt ba Korintô le: “Hiki kel, nyemb i téé me bisu.” Paul a tila ki le: “Me bi jo lôñni binuga bi bikai i Éfésô.” Bebek a bé sômbôl kal le a bi jo toi ni binuga bahoma bakeñi i het bôt ba bé kodba inyu béñge mintuk Éfésô. (2 Korintô 1:8; 4:10; 11:23) Tole i nene le a bé pôdôl Lôk Yuda ni bôt bape ba ba bé kolba nye kiki “bunuga bi bikai.” (Minson mi baôma 19:26-34; 1 Korintô 16:9) To kii i leñek, Paul a bé boma mandutu ma bé le ma boñ le a nimis niñ yé, ndi a bi hôya bé bisai bi bé bem nye.​—2 Korintô 4:16-18.

4. Lelaa botñem i bitugne i nlédés hémle i bikristen i len ini? (Béñge titii i lipep li bisu.)

⁴ Di niñil mangéda mabe kiyaga. Bilôk bikéé gwés bihogi bi nkôs bikuu. Bape ba niñ i homa gwét bi yé nayak, kayéle ba yé le ba nimis niñ yap. Bape ba niñ biloñ i het ngomin a ntéé bés minwaa inyu nson wés tole i het ba nsôña nga nson wés tjada. Ndi hala a nsôña bé bo le ba kee ni bisu i gwélél Yéhôva, to ibale i mpam le ba kee i mok tole ba nimis niñ yap. Bilôk bikéé bi bôlôm ni bi bôda bi gwobisôna bi nwaa bé gwélél Yéhôva tolakii bi mboma mandutu. Ni njel i, ba yéne bés ndémbél ilam. Ba nkon bé woñi inyule ba nyi le to ibale i mpam le ba nimis yap i len ini, Yéhôva a mbôn bo mam malam dilo di nlo.

5. Limbe litehge libe li yé le li tômbôs hémle i bikristen inyu bitugne?

⁵ Paul a bi behe lôk kéé yé inyu litehge libe li bôt bahogi ba bééna. A kal le: “Ibale bawoga ba nlama bé tuge, ‘wee di jek, di nyok inyule yani d’a wo.’” I ngéda Paul bé nyen bôt ba bôdôl bana litehge li. Hala a bôdôl yaga behee. I nene le Paul a bé sima i yom Bibel i nkal i kaat Yésaya 22:13, i het ba bé pôdôl libak bon ba Israel ba bééna. Iloole ba kôôge Djob bebee, ba bé tuk niñ. A bé wengoñle i bon ba Israel bana ba bé kal le, “ba niñ bé ngélé iba” kiki ngandak bôt i mpot len. Ndi Bibel i nkal le Yéhôva a bi kogse bo inyu libak jap libe.​—2 Miñañ 36:15-20.

6. Mambe maada ma yé ipôla botñem yés i bitugne ni mawanda di mpohol?

⁶ I yi le Yéhôva a ga lona bawoga bitugne i nlama tinde bés i tibil pohol mawanda més. Lôk kéé i Korintô i bé lama bé bana maada ni bôt ba bé pééna le bitugne bi yé. Biniigana di ñôt bi yé le, di nlama bé bana maada ni bôt ba ba nhémle bé le bisai bi mbem bés dilo di nlo, jap li yé ndik le ba tuk niñ. I ba ni nya bôt i, i nla ôbôs libak jés li kristen ni bilem gwés bilam. I nya mawanda i, i nla tinde kristen i boñ mam Djob a ñoo. Jon ñôma Paul a bi yigye le: “Ngo ni hek pék inyu boñ mam ma téé sép, ni bana bañ lem i boñ béba.”​—1 Korintô 15:33, 34.

7. Kiki kaat 1 Korintô 15:35-38 i ñunda, imbe mbadga bôt bahogi ba yé le ba bat inyu bitugne?

⁷ Añ 1 Korintô 15:35-38. I mut a bé le a bana ngôñ i ha pééna miñem mi bôt inyu bitugne a bé le a bat le: “Lelaa bawoga ba nlama tuge?” I yé bés loñge i wan ndimbhe i Paul mu mbadga i. Inyule ngandak bôt i len ini, i gwé map mahoñol inyu niñ i mbus nyemb. Ndi kii Bibel i niiga?

8. Himbe hihéga hi nhôla bés i nok i jam i mbôña ngéda mut a ntuge inyu niñ i ngii?

⁸ I ngéda mut a nwo, nyuu yé i mbol. Ndi i Nwet a bi hek ngiinda yosô i ngéda yom yo ki yo i bé bé, a nla lona i nya mut i bitugne, a ti ki nye loñge nyuu. (Bibôdle 1:1; 2:7) Paul a bi gwélél hihéga hiada inyu unda le Nyambe a ta bé nyégsaga i témbna mut a bi wo i niñ ni nlélém nyuu a bi wona. Hoñol ‘nso jis li blé’ tole ‘mbôô’ ipe. I mbôô ba mbel i ño, i yila bebela, i bebela i mondo ini i mpôna ha bé i mbôô ba bi bel. Paul a bi gwélél hihéga hi inyu unda le Nyambe nu a bi hek, a nla ti bo “nyuu kiki i nlémél nye.”

9. Kii kaat 1 Korintô 15:39-41 i nkal inyu maselna ma yé ipôla mintén mi manyuu?

⁹ Añ 1 Korintô 15:39-41. Paul a bi kal le Nyambe a bi hek bihégél mintén mintén. Kiki hihéga, minsôn mi yé mintén mintén, nyaga i gwé wé ntén, dinuni wap ntén, tjobi wap ntén, hala ni hala. A bi kal le ngéda di mpaa mis i ngii, di ntehe maselna ipôla hiañgaa ni sôñ. A kal ki “lipém li hiôdôt hiada li ta bé nlélém ni lipém li hiôdôt hipe.” Hala a yé mbale to ibale di ntehe bé maselna ma ni mis. Bôt ba njoñ yi ba nkal le tjôdôt di yé mintén mintén, dihogi di yé dikeñi, dini dipe di bak disii, dipe di mpôp; dipe di kôibak, dipe ki di nen-ge maôô maôô kiki hiañgaa. Paul a kônde ki le “gwom bi ngii bi yé, yak gwom bi hisi bi bak.” Kii hala a nkobla?  Le bihégél bi yé hana ’isi bi gwé nyuu minsôn, ndi bi bi yé i ngii, nyuu mbuu, kiki bo biañgel.

10. I bet ba ga tuge inyu niñ i ngii, b’a tuge ni imbe ntén nyuu?

¹⁰ Yimbe i yom Paul a nke kal hanano: “Hala nyen i yé ni bitugne bi bawoga. Nyuu i i mbol yon i njuba; ndi nyuu i i nla bé bol, yon i ntuge.” Di nyi loñge loñge le i ngéda mut binam a nwo, nyuu yé i mbol i témb i yila biték. (Bibôdle 3:19) Lelaa hala a nla ni bôña le, nyuu i i nla bé mbol “yon i ntuge”? Paul a bé pôdôl bé bôt ba binam ba ba bi tuge inyu niñ hana ’isi kiki i bet Éliya, Élisa bo Yésu ba bi lona bitugne. Ndi a bé pôdôl i mut a ntuge inyu niñ i ngii ni “nyuu mbuu.”​—1 Korintô 15:42-44.

11-12. Ni imbe nyuu Yésu a bi tuge, lelaa nlélém jam y’a bôña inyu minhook?

¹¹ I ngéda Yésu a bé hana ’isi, a bééna nyuu minsôn, ndi i ngéda a bi lo bitugne, a bi yila “mbuu u u nti niñ,” a témb i ngii. Yak minhook mi nlama tuge ni nyuu mbuu. Paul a toñol le: “Kiki di bi pôna nu a bi héga ni biték, hala ki nyen d’a pôna nu a nlôl i ngii.”​—1 Korintô 15:45-49.

¹² Di hôya bañ le, Yésu a bi tuge bé ni nyuu minsôn a bééna ilole nwo. I ngéda Paul a bi pam mamélél mé ma nkwel, a bi toñol inyuki hala a bé bé le a bôña. A kal le: “Minsôn ni matjél bi nla bé kôdôl Ane Nyambe.” (1 Korintô 15:50) Baôma ni mini minhook mimpe, ba bé bé le ba tuge inyu niñ i ngii ni nyuu minsôn ni i matjél i i mbol. Imbe ngéda ba bé lama tuge? Paul a yigye le bitugne bini bi bé lama lo i mbus ngéda; ba bé lama bé tuge kunda yada i mbus nyemb yap. I ngéda Paul a bi tila kaat 1 Korintô, banigil bahogi ‘ba bé ba ma wo,’ kiki bo ñôma Yakôbô. (Minson mi baôma 12:1, 2) Baôma bape ni minhook ba bé lama “wo” i mbus ngéda.​—1 Korintô 15:6.

13. Kii i bé lama ba yimbne le Yésu a yé ha?

¹³ Yésu bo Paul ba bi pôdôl ngim ngéda i tôbôtôbô i i bé lama lo: Ngéda Kristô a bé lama ba ha. Ha ngéda i, gwét, nyeñg disi, dimala ni mam mabe mape ma bé lama bôña ni nkoñ ’isi wonsôna. I mbañ Bibel ini i nyon i mis més ibôdôl i nwii 1914. U héya i mam mabe di nsima, yak mam malam ma bé lama bôña mu ngéda i. Yésu a bi kal le, ñañ nlam u Ane u bé lama añlana ni “nkoñ ’isi wonsôna, i ba biloñ gwobisôna mbôgi, ndi to le lisuk li nlo.” (Matéô 24:3, 7-14) Paul a bi kal le, bitugne bi minhook mi mi “bi ke ’ilo ikété nyemb” inyu niñ i ngii bi bé lama bôña “ngéda Nwet a mba ha.” ​—1 Tésalônika 4:14-16; 1 Korintô 15:23.

14. Mam ma yé lelaa inyu minhook mi mi nwo ngéda Kristô a yé ha?

¹⁴ Minhook mi nwo len, mi ntuge kunda yada inyu ke niñ i ngii. Bibuk bi Paul di nléba i kaat 1 Korintô 15:51, 52 bi ñunda hala. A kal le: “Bésbobasôna d’a wo bé, ndi bésbobasôna d’a heñla kunda yada, i likéébana li jis, ngéda sép y’a hem inyu ngélé i nsôk.” Bibuk bi Paul bini bi nyon i len ini! Ngéda b’a tuge, lôk kéé i Kristô i ga ba maséé kiyaga, inyule b’a “ba lôñni Nwet ngéda yosôna.”​—1 Tésalônika 4:17.

15. Umbe nson i bet b’a tuge kiki likéébana li jis ba nke boñ nyoo i ngii?

¹⁵ Bibel i nkal bés i nson i bet b’a tuge kiki likéébana li jis b’a boñ i ngéda b’a ke nyoo i ngii. Yésu a kal bo le: “I mut a nyémbél, a gwelek minson  nwem letee ni lisuk, m’a ti nye kunde i ngii biloñ, a’ ane bôt ni ntoñgo kei kayéle a nyugut bo wengoñle biébél bi ték lima, ndik kiki me bi kôhna kunde yak Tata.”(Masoola 2:26, 27) Kiki Ñane wap, ba ga ane biloñ ni ntoñgo kei.​—Masoola 19:11-15.

16. Lelaa ngandak bôt ba binam b’a yémbél nyemb?

¹⁶ Ñ, minhook mi ga yémbél nyemb. (1 Korintô 15:54-57) Kiki b’a tuge inyu niñ i ngii, ba ga yoñ ngaba i mélés béba hana ’isi ngéda gwét bi Armagédôn gw’a bôô. Didun di bikristen di bôda ni di bôlôm dipe di di ga “lôl i njiiha ikeñi,” di ga pei i gwét bi, di jôp i mbok yondo. (Masoola 7:14) I bôt ba ga pei i gwét bi, ba ga tehe didun di bôt di di bi wo behee, di nlo bitugne. Hala a ga ba yimbne ipe le ba nyémbél toi nyemb. Kinje maséé i tehe didun di bôt di nlo bitugne! (Minson mi baôma 24:15) I bôt bobasôna b’a téñbe ni Yéhôva, ba ga unda le ba nyémbél nyemb. Ba ga niñ i mba ni mba.

17. Inoñnaga ni 1 Korintô 15:58, kii di nlama boñ ibôdôl nano?

¹⁷ Hiki kristen i len ini, i nlama ba nyonok ni mayéga inyu bibañga Paul a tilna bôt ba Korintô inyu bitugne. Di kôli noñ mana maéba ma Paul le di bana ngandak mam i boñ “ikété nson u Nwet” ibôdôl nano. (Añ 1 Korintô 15:58.) Ibale di ntéñbe i yoñ ngaba mu nson u i nya i yôni, di ga bana botñem i bana niñ i maséé i mbok yondo. Bisai bi, bi nlôôha bilam iloo mam momasôna di yé le di hégda nano. Hala a ga unda yaga le ndumb-ba yés inyu Nwet i mba bé yañga.