1-2. Taano ta dapat na magin interesado an gabos na Kristiyano sa pagkabuhay liwat sa langit?

AN PAGLAOM kan kadaklan na lingkod ni Jehova ngunyan iyo na mabuhay nin daing katapusan digdi sa daga. Pero an paglaom kan natatadang linahidan na mga Kristiyano iyo an buhayon liwat para mag-istar sa langit. An mga linahidan na ini interesadong marhay sa magigin buhay ninda sa maabot na panahon, pero kumusta man an mga may daganon na paglaom? Arog kan mahihiling ta, an pagkabuhay liwat sa langit magdadara man nin mga bendisyon sa mga may paglaom na mabuhay nin daing katapusan sa daga. Sa langit man o sa daga an satong paglaom, dapat na magin interesado kita sa pagkabuhay liwat sa langit.

² Pinasabngan nin Diyos an pira sa mga disipulo ni Jesus kan inot na siglo na magsurat manungod sa langitnon na paglaom. Sinabi ni apostol Juan: “Kita ngunyan mga aki na nin Diyos, alagad ta dai pa ihinahayag kun magigin ano kita. Aram niyato na pag ihinayag na siya, kita magigin arog sa saiya.” (1 Juan 3:2) Kaya dai aram kan linahidan na mga Kristiyano kun ano an magigin buhay ninda pag binuhay na liwat sinda sa langit na may espiritung hawak. Dawa arog kaiyan, literal nindang mahihiling si Jehova pag inako na ninda an balos. Dai sinasabi kan Bibliya an gabos na detalye manungod sa pagkabuhay liwat sa langit. Pero nagtao si apostol Pablo nin nagkapirang impormasyon manungod  diyan. Makakaibanan kan mga linahidan si Cristo sa “[pagpara] niya kan gabos na gobyerno asin gabos na awtoridad saka kapangyarihan.” Kaiba diyan “an ultimong kaiwal, an kagadanan.” Sa katapos-tapusi, si Jesus—kaiba an saiyang kairibang mga tagapamahala—ipapasairarom an saiyang sadiri asin an gabos na bagay ki Jehova. (1 Cor. 15:24-28) Nakakaugma nanggad na panahon iyan! *

3. Arog kan ipinaparisa sa 1 Corinto 15:30-32, an pagtubod ni Pablo sa pagkabuhay liwat nakatabang sa saiya na magibo an ano?

³ An pagtubod ni Pablo sa pagkabuhay liwat nakatabang sa saiya na matagalan an manlain-lain na pagbalo. (Basahon an 1 Corinto 15:30-32.) Sinabi niya sa mga taga Corinto: “Aroaldaw akong napapaatubang sa kagadanan.” Sinabi pa ni Pablo: “Nakipaglaban man ako sa mababangis na hayop sa Efeso.” Tibaad an sinasabi ni Pablo iyo an pakikipaglaban niya sa literal na mga hayop sa sarong arena sa Efeso. (2 Cor. 1:8; 4:10; 11:23) O tibaad an sinasabi niya iyo an anggot na mga Judio asin an iba pa na garo “mababangis na hayop.” (Gibo 19:26-34; 1 Cor. 16:9) Arin man diyan, napaatubang si Pablo sa grabeng mga peligro. Pero, positibo pa man giraray an pagmansay niya sa puturo.—2 Cor. 4:16-18.

4. Paano napapakusog kan paglaom na pagkabuhay liwat an mga Kristiyano ngunyan? (Hilingon an ritrato sa cover.)

⁴ Nabubuhay kita sa delikadong mga panahon. May mga tugang na nagin biktima nin krimen. An iba nakaistar sa mga lugar na may giyera kaya pagmati ninda bako sindang ligtas. An iba man naglilingkod ki Jehova dawa mameligro an buhay o mapreso sa mga lugar na may restriksiyon sa gibuhon na paghuhulit o ipinagbabawal pa ngani iyan. Sa ibong kaiyan, an gabos na tugang na ini padagos na nagsasamba ki Jehova, asin marahay na halimbawa sinda para sa sato. Dai sinda natatakot dahil dawa magadan sinda ngunyan, aram nindang may itinatagama si Jehova sainda na mas magayon na puturo.

5. Anong peligrosong kaisipan an puwedeng makapaluya sa pagtubod ta sa pagkabuhay liwat?

⁵ Pinatanidan ni Pablo an saiyang mga tugang manungod sa peligrosong kaisipan kan iba: “Kun an mga gadan dai ibabangon, ‘magkarakan kita asin mag-irinom ta sa aga magagadan na kita.’” Sa katunayan, arog na kaiyan an kaisipan kan nagkapira bago pa kan panahon ni Pablo. Posibleng kinokotar niya an Isaias 22:13 na nagtataram manungod sa kaisipan kan mga Israelita. Imbes na rumani sa Diyos, mas ininot ninda an pagpasiram-siram sa buhay. An kaisipan kan mga Israelitang idto iyo na “yaon ngunyan, sa aga mayo na,” sarong pagmansay na lakop dawa ngunyan. Pero, ipinapahiling kan rekord sa Bibliya na nagkaigwa nin maraot na epekto sa nasyon nin Israel an salang kaisipan na iyan.—2 Cron. 36:15-20.

6. Paano dapat makaapekto sa pagpili ta nin amigo an paglaom na pagkabuhay liwat?

⁶ Aram ta na bubuhayon ni Jehova an mga gadan. Kaya dapat na magkaigwa iyan nin epekto sa pagpili ta nin mga amigo. Kaipuhan kan mga tugang sa Corinto na likayan na makiiba-iba sa mga tawong dai nagtutubod sa pagkabuhay liwat. Ano an manunudan ta digdi? May maraot na epekto sato kun pirmi kitang makikiiba-iba sa mga tawong mayong pakiaram sa mangyayari sa maabot. An pakikiiba-iba sa mga tawong arog kaiyan puwedeng makaraot sa kaisipan asin pamumuhay nin sarong tunay na Kristiyano. Sa katunayan, dahil sa mga tawong iyan, puwede siyang makagibo kan ikinakaanggot nin Diyos—an kasalan. Kaya nagtao si Pablo nin mapuwersang sadol: “Magbalik kamo sa tultol na pag-iisip kauyon nin katanusan asin dai kamo magsagibo nin kasalan.”—1 Cor. 15:33, 34.

7. Siring kan ipinapahiling sa 1 Corinto 15:35-38, ano an tibaad maihapot nin nagkapira manungod sa pagkabuhay liwat?

⁷ Basahon an 1 Corinto 15:35-38. An saro na kinukuwestiyon an pagkabuhay liwat puwedeng maghapot: “Paano ibabangon an mga gadan?” Marahay na pag-isipan ta an simbag ni Pablo huling iba-iba an paniniwala kan dakul ngunyan sa nangyayari sa tawo pagkagadan. Pero ano an itinutukdo kan Bibliya?

8. Anong ilustrasyon an makakatabang sa sato para masabutan an pagkabuhay liwat pasiring sa langit?

⁸ Pag an sarong tawo magadan, nalalapa an saiyang hawak. Pero an tawong iyan kayang buhayon kan Saro na naglalang kan uniberso hali sa mayo, asin tawan siya kan klase nin hawak na kaipuhan niya. (Gen. 1:1; 2:7) Kun manungod sa pagkabuhay liwat sa langit, naggamit si Pablo nin sarong ilustrasyon para ipahiling na dai kaipuhan nin Diyos na ibalik an iyo man sanang klase nin hawak kan tawong iyan. Isipon an “banhi” nin sarong tinanom. Pag an banhing iyan itinanom, nagtatalubo iyan asin nagigin bagong tinanom. An nagtalubong tinanom ibang-iba an itsura sa sadit na banhi. Ginamit ni Pablo an pagkumparar na ini para ipahiling na kaya kan satong Kaglalang na magtao kan “hawak na gusto niya.”

9. Ano an sinasabi kan 1 Corinto 15:39-41 manungod sa manlain-lain na hawak?

⁹ Basahon an 1 Corinto 15:39-41. Sinambit ni Pablo na manlain-lain na klase nin hawak an linalang nin Diyos. Halimbawa, magkakalain an hawak kan mga hayop arog kan baka, mga gamgam, saka sira. Sinabi niya na sa kalangitan, may mga pagkakaiba an aldaw asin an bulan. Asin sinabi niya pa na “magkakaiba an liwanag kan kada saro sa mga bituon.” Iyo tibaad dai ta mahiling an pagkakaiba ninda kun mata ta sana an gagamiton. Pero may inaapod an mga siyentista na red giant stars, white dwarfs, asin yellow stars, arog kan satong saldang. Sinambit man ni Pablo na may mga langitnon na hawak asin mga daganon na hawak. Ano an buot niyang sabihon? Buweno, sa daga igwa kita nin mga hawak na laman, pero sa langit  igwa nin mga hawak na espiritu, arog kan sa mga anghel.

10. Anong klaseng hawak an itatao sa mga bubuhayon liwat pasiring sa langit?

¹⁰ Risahon an sunod na sinabi ni Pablo: “Arog man kaiyan sa pagkabuhay liwat nin mga gadan. An hawak garo sarong banhi na isinasabwag pasiring sa pagkalapa, alagad ibinabangon pasiring sa pagkadaing kalapaan.” Siyempre pag an tawo magadan, an hawak niya nalalapa asin nagigin alpog giraray. (Gen. 3:19) Kaya paano an sarong hawak “ibinabangon pasiring sa pagkadaing kalapaan”? An sinasabi digdi ni Pablo bako idtong tawong binuhay liwat digdi sa daga, arog kaidtong mga binuhay ni Elias, Eliseo, asin ni Jesus. An sinasabi digdi ni Pablo iyo an saro na binuhay na may langitnon na hawak, an buot sabihon, “hawak na espirituwal.”—1 Cor. 15:42-44.

11-12. Anong pagbabago an naeksperyensiyahan ni Jesus kan siya buhayon liwat, asin ano an kaagid na naeeksperyensiyahan kan mga linahidan?

¹¹ Kan si Jesus yaon sa daga, igwa siyang hawak na laman. Pero kan siya buhayon liwat, siya “nagin espiritu na nagtatao nin buhay” asin nagbalik sa langit. Sa kaagid na paagi, an linahidan na mga Kristiyano tatawan nin hawak na espiritu pag binuhay na sinda liwat. Ipinaliwanag ni Pablo: “Kun paanong kita nagin kabaing kan ladawan kan saro na ginibo hali sa alpog, kita magigin kabaing man kan ladawan kan saro na naggikan sa langit.”—1 Cor. 15:45-49.

¹² Madali nang matapos si Pablo sa pagtukar manungod sa pagkabuhay liwat. Mahalagang girumdumon na si Jesus dai binuhay liwat na may pisikal na hawak. Ipinaliwanag ni Pablo kun taano: “An laman asin dugo dai puwedeng magmana kan Kahadian nin Diyos” sa langit. (1 Cor. 15:50) An mga apostol asin an iba pang mga linahidan dai bubuhayon pasiring sa langit na may hawak na laman asin dugo na nalalapa. Nuarin sinda bubuhayon liwat? Idinuon ni Pablo na sa maabot na panahon pa an pagkabuhay liwat na ini. Dai iyan mangyayari ora mismo pagkagadan ninda. Kan panahon na isurat ni Pablo an 1 Corinto, may mga disipulo na “nagturog na sa kagadanan,” arog ni apostol Santiago. (Gibo 12: 1, 2) Mantang an iba pang mga apostol asin linahidan dai pa ‘nagtuturog sa kagadanan.’—1 Cor. 15:6.

13. Ano an magigin tanda kan presensiya ni Jesus?

¹³ Si Jesus asin si Pablo nagpropesiya manungod sa sarong mahalagang panahon sa kasaysayan—an presensiya ni Cristo. Durante kan presensiyang iyan, magkakaigwa nin mga giyera, linog, epidemya, asin iba pang maraot na mga pangyayari sa bilog na kinaban. Nahiling ta an kautuban kan propesiyang iyan sa Bibliya puon pa kan 1914. Igwa pa nin mahalagang kabtang an tandang iyan. Sinabi ni Jesus na an maugmang bareta kan naestablisar nang Kahadian nin Diyos ihuhulit “sa bilog na kinaban bilang patotoo sa gabos na nasyon, dangan maabot an katapusan.” (Mat. 24:3, 7-14) Sinabi ni Pablo na sa panahon man kan “presensiya kan Kagurangnan,” bubuhayon liwat an linahidan na mga Kristiyano na “nagturog sa kagadanan.”—1 Tes. 4:14-16; 1 Cor. 15:23.

14. Ano an mangyayari sa mga linahidan kun magadan sinda durante kan presensiya ni Cristo?

¹⁴ Sa panahon ta, an mga linahidan tulos-tulos na binubuhay pasiring sa langit pagkagadan ninda. Kinumpirmar ini kan sinabi ni Pablo na nasa 1 Corinto 15:51, 52: “Bako gabos satuya maturog sa kagadanan alagad gabos kita magkakabarago, sa sarong kimat, sa pagpirok nin mata, sa panahon kan huring trumpeta.” Nauutob na ngunyan an mga tataramon na ini ni Pablo! Sa saindang pagkabuhay liwat, an mga tugang na ini ni Cristo magkakaigwa nin lubos na kaugmahan; “danay [nindang] makakaibanan an Kagurangnan.”—1 Tes. 4:17.

15. Ano an magigin trabaho kaidtong mga babaguhon “sa pagpirok nin mata”?

¹⁵ Sinasabi sa sato kan Bibliya kun ano an magigin trabaho sa langit kan mga binago “sa  pagpirok nin mata.” Sinabi ni Jesus sa sainda: “Sa saro na makakadaog asin na sinusunod an mga gibo ko sagkod sa katapusan, tatawan ko siya nin awtoridad na mamahala sa mga nasyon arog kan itinao sa sako kan sakuyang Ama, asin papasturan niya an mga tawo paagi sa sugkod na lansang tanganing magkaparasa sinda siring sa mga lalagan na dalipay.” (Kap. 2:26, 27) Susunudon ninda an saindang Komandante sa gibuhon na pagpastor sa mga nasyon paagi sa sugkod na lansang.—Kap. 19:11-15.

16. Paano an dakul na tawo magigin mapanggana laban sa kagadanan?

¹⁶ Malinaw na an mga linahidan manggagana laban sa kagadanan. (1 Cor. 15:54-57) Huli sa pagkabuhay liwat ninda, magkakaigwa sinda nin kabtang sa paghali sa gabos na karatan sa maabot na giyera nin Armagedon. Minilyon na iba pang Kristiyanong lalaki asin babayi an ‘makakabalyo hali sa nag-aging grabeng kasakitan’ pasiring sa bagong kinaban. (Kap. 7:14) Mahihiling mismo kan mga makakaligtas na iyan sa daga an saro pang kapangganahan laban sa kagadanan—an pagbuhay liwat sa bilyon-bilyon na tawo na nagadan kaidto. Imahinara na sana an kaugmahan ta pag nautob na an makangangalas na pangyayaring iyan! (Gibo 24:15) Asin an gabos na lubos na maimbod ki Jehova manggagana man laban sa minanang kagadanan. Mabubuhay sinda nin daing sagkod.

17. Dinadagka kita kan 1 Corinto 15:58 na gibuhon an ano ngunyan?

¹⁷ An lambang buhay na Kristiyano ngunyan dapat na ipagpasalamat an nakakarangang mga tataramon manungod sa pagkabuhay liwat na isinurat ni Pablo para sa mga taga Corinto. Dakul an dahilan ta na sunudon an sadol ni Pablo na magin sibot nanggad ngunyan “sa gibuhon kan Kagurangnan.” (Basahon an 1 Corinto 15:58.) Kun pirmi tang gigibuhon an satong pinakamakakaya sa gibuhon na iyan, makakaasa kita sa sarong maugmang marhay na buhay sa puturo. An puturong iyan magigin mas magayon nanggad kisa sa ano man na maiimahinar ta. Papatunayan kaiyan na an satong pagpapagal sa paglilingkod sa Kagurangnan bakong sayang.