1-2. Mase ganup halak Kristen maningon marlajar pasal parpuhoon na hu surga?

BAHATAN do juakjuak ni Naibata sonari on marpangarapan manggoluh sadokah ni dokahni i tanoh on. Tapi anggo halak na iminaki marpangarapan hu surga do sidea. Tontu sihol tumang uhur ni sidea mambotoh sonaha do holi hagoluhan ni sidea dob hu surga. Tapi porlu do homa iparlajari hita pasal ai. Mase? Halani marhitei sidea do holi jolma i tanoh on mandapot pasu-pasu. Halani ai, lang soal huja pangarapanta, i surga do atap i tanoh on, porlu tumang do iparlajari hita pasal parpuhoon na hu surga ai.

² Itogu-togu Naibata ma piga-piga susian ni Jesus laho manuratkon pasal parpuhoon na hu surga ai. Apostel Johannes mangkatahon, “Anak ni Naibata do hita nuan, anjaha seng talar ope, barang na gabe aha do hita, tapi ibotoh hita do, anggo dob talar ia, usih ma hita songonsi, ai idahonta ma ia, sonaha ia sasintongni.” (1 Joh. 3:2) Jadi, lape ibotoh halak Kristen na iminaki ai sonaha do holi rupa ni sidea dobkonsi ipapuho hu surga. Janah lang ipatugah Bibel ganup pasal ai. Tapi boi do holi ididah sidea Jahowa sanggah ijalo sidea upahni. Hassi pe sonai, dong do piga-piga hatorangan na ibere apostel Paulus. Rap pakon Jesus do holi ganup halak na iminaki sanggah “iparontihon sagala pamarentahan, kuasa ampa hagogohon”, sonai “munsuh na parpudi” ai ma hamatean. Ujungni, dobkonsi tunduk haganup hubani Jahowa, ipatunduk Jesus ampa ganup halak na iminaki ai ma dirini bani Jahowa. (1 Kor. 15:24-28) Tontu malas tumang uhurta paima-imahon ai! *

3. Domu bani 1 Korint 15:30-32, aha do gunani bani si Paulus halani porsaya ia bani pangarapan parpuhoon?

 ³ Halani porsaya bani pangarapan parpuhoon, ai do na mangurupi si Paulus boi totap martahan sanggah dong sitarononni. (Basa 1 Korint 15:30-32.) Nini do bani halak i Korint, “Narus-narus matei do ahu ganup ari.” Nini use, “Maringor ahu ampa binatang panoroh i Epesus.” Ra do binatang na imaksud si Paulus ai ma binatang na dong i ianan panontonan i Epesus. (2 Kor. 1:8; 4:10; 11:23) Atap, ra do na imaksud ia halak Jahudi atap halak na legan na isarupahon songon “binatang panoroh” na sihol manlawansi. (Lah. 19:26-34; 1 Kor. 16:9) Atap na ija pe maksudni ai, totap do ia martahan halani porsaya lambin dear do goluhni bani ari simagira.​—2 Kor. 4:16-18.

4. Sonaha do pangarapan parpuhoon boi mangurupi halak Kristen sonari on? (Tonggor ma gambar sampul.)

⁴ Bani panorang hasunsahan sonari on, bahat do sanina botounta na marsitaronon. Dong halak na mambahen na jahat bani sidea. Dong homa na bahat parporangan i ianan ni sidea tading. Anjaha dong piga-piga sanina botounta na lang bebas be martumpu atap pe marbarita halani ilarang pamarentah. Tapi totap do sidea setia hubani Jahowa hassi pe halani ai gabe ipenjarahon do sidea atap ibunuh. Porini pe maningon matei sidea, ibotoh sidea tongtong do idingat Jahowa sidea. Gabe siusihan ma sidea ai hubanta.

5. Pingkiran na sonaha do na boi mambahen lang toguh haporsayaonta bani parpuhoon?

⁵ Bani abad na parlobei bahat do halak na lang porsaya bani parpuhoon. Halani ai, ipasingat si Paulus ma sanina botou ijia, “Anggo seng puho na matei, ‘mangan minum ma lah hita, ai matei do hita patar.’” Bani panorang ni si Jesaya pe domma bahat halak Israel na marpingkir sisonai. Halani ai, ra do na ihatahon si Paulus ai ibuat humbani Jesaya 22:13. Sanggah ai, rahanan do iahap halak Israel marsonang-sonang marimbangkon paorotkon parhasomanan ni sidea pakon Naibata. Ronsi sonari pe sonai do homa pangahap ni buei halak. Tapi, humbani Bibel ibotoh hita do aha na masa bani halak Israel halani sonai pambahenan ni sidea.​—2 Kron. 36:15-20.

6. Mase maningon pangkei hita mamilih hasoman?

⁶ Jadi, maningon pangkei do halak i Korint mamilih hasoman. Lang boi sidea marsaor pakon halak na lang porsaya bani parpuhoon. Aha ma parlajaranni hubanta? Halani ibotoh hita pangarapan parpuhoon, maningon pangkei do homa hita mamilih hasoman. Ulang ma ra hita marsaor pakon halak na sihol marsonang-sonang dassa ibagas goluhni. Anggo ihasomani hita halak sisonai, gabe songon sidea ma holi pambahenanta. Ujungni gabe ihorjahon hita ma aha na ihagigihon Jahowa. Halani ai do tangkas ipasingat si Paulus, “Sadar ma nasiam, horjahon ma na sintong, janah ulang be mardousa.”​—1 Kor. 15:33, 34, Terjemahan Dunia Baru.

7. Songon na ipatugah bani 1 Korint 15:35-38, aha do ra na isungkun halak pasal parpuhoon?

⁷ Basa 1 Korint 15:35-38. Bahat do halak na lang porsaya bani parpuhoon sihol mambahen ase halak na legan lang  porsaya bani parpuhoon ai. Halani ai ra do isungkun sidea sonon, “Sonaha ma parpuho ni na dob matei?” Sonari pe, marmasam do homa pandapot ni halak pasal aha na masa bani halak na matei. Halani ai, dear do anggo irimangi hita sonaha si Paulus mambalosi sungkun-sungkun ai.

8. Limbaga aha do na igunahon si Paulus laho patorangkon pasal parpuhoon na hu surga?

⁸ Dob matei sasahalak, gabe busuk ma badanni. Tapi boi do ipapuho Naibata ia janah ibere ma hu bani angkula na baru. (1 Mus. 1:1; 2:7) Laho patorangkon pasal ai igunahon si Paulus ma limbaga pasal “sangkamata gandum” atap “bonih”. Sanggah bonih isuan, lang lalab gabe bonih ia, tapi tubuh do ia anjaha gabe legan do rupani usengan. Igunahon si Paulus do limbaga ai laho patuduhkon boi do ipapuho Naibata halak na matei janah ibere hu bani angkula “domu hubani rosuh ni uhur-Ni”.

9. Sonaha 1 Korint 15:39-41 patorangkon palegan-legan do daging ni ganup tompaon i tanoh on?

⁹ Basa 1 Korint 15:39-41. Ihatahon si Paulus do lang sarupa daging ni ganup tompaon na dong i tanoh on. Umpamani, lang sarupa binatang pakon manuk-manuk ampa dengke. Anjaha ihatahon ia do homa legan do ganup bintang na dong i langit. Umpamani, lang sarupa mata ni ari pakon bulan. Anjaha nini use “bintang pe palegan-legan do sinondangni”. Tongon, anggo ididah hita hun tanoh on, lang ibotoh hita aha do bedani ganup bintang ai. Tapi ilmuwan mangkatahon dong do bintang na banggal, na etek, sigerger, sibontar, atap sigorsing. Dob ai ihatahon si Paulus homa, “Adong do badan parnagori atas anjaha adong do badan parnagori tongah on.” Aha ma artini ai? Anggo jolma i tanoh on daging do angkulani. Tapi anggo malekat i surga tonduy do sidea.

10. Ibagas angkula na sonaha do holi halak ipapuho hu surga?

 ¹⁰ Pardiateihon ma aha na ihatahon si Paulus dobkonsi ai. Nini do, “Sonai do homa bani parpuhoon ni na dob matei. Isaburhon do na ra maseda, tapi ipapuho [ibagas daging] na so ra maseda.” Sonaha do halak na matei boi ipapuho hubagas daging “na so ra maseda”? Hape dob matei sada jolma gabe busuk do dagingni janah mulak use gabe orbuk. (1 Mus. 3:19) Sasintongni, na imaksud si Paulus ai sedo halak na ipapuho i tanoh on, songon na ibahen si Elias, si Elisa, pakon Jesus. Tapi na imaksud ai ma halak na laho ipapuho hu surga. “Gabe tonduy” do holi sidea songon malekat.​—1 Kor. 15:42-44.

11-12. Ibagas angkula na sonaha do Jesus ipapuho, anjaha sonaha parpuhoon ni halak na iminaki sarupa pakonsi?

¹¹ Sanggah Jesus i tanoh on, humbani daging do angkulani. Tapi dobkonsi ipapuho, “gabe tonduy na pagoluhkon” ma ia janah mulak ma use ia hu surga. Sonai ma homa halak na iminaki dobkonsi ipapuho sidea. Gabe tonduy ma homa sidea. Si Paulus mangkatahon, “Songon na dob ipakei hita rumang tanoh on, sonai do pakeionta rumang na hun nagori atas.”​—1 Kor. 15:45-49.

¹² Songon na dob ihatahon nongkan ai, sedo ibagas angkula ni jolma Jesus ipapuho. Ipatorang si Paulus ma alasanni. Nini do, “Seng tarbahen daging ampa daroh manean Harajaon ni Naibata” i surga. (1 Kor. 15:50) Jadi sedo ibagas angkula ni jolma ganup apostel ampa halak na iminaki ai ipapuho. Tapi, attigan ma sidea ipapuho? Sanggah si Paulus mangulas pasal parpuhoon ai, lape masa ai. Buktini sanggah ia manulis 1 Korint, ihatahon ia do adong piga-piga susian ni Jesus na “dob modom” atap matei. Umpamani, apostel Jakobus. (1 Kor. 15:6; Lah. 12:1, 2) Anjaha apostel na legan pe  pakon halak na iminaki na manggoluh bani panorang ai ujungni matei do homa holi. Jadi bani ari simagira do parpuhoon ai masa.

13. Aha ma na gabe tanda parroh ni Kristus?

¹³ Ipatugah Jesus pakon si Paulus do aha na gabe tanda bani parroh ni Kristus. Masa do holi porang, gempa, ampa panahit. Songon na ididah hita domma saud panjahaion ai humbani tahun 1914. Anjaha dong ope tanda na legan. Jesus mangkatahon, ibaritahon do holi ambilan na madear pasal Harajaon na dob jongjong “laho manaksihon bani haganup bangsa, dob ai pe ase roh ujungni”. (Mat. 24:3, 7-14) Nini si Paulus use, bani “parroh ni Tuhan” ma ganup halak na iminaki na dob matei ipapuho hu surga.​—1 Tes. 4:14-16; 1 Kor. 15:23.

14. Aha do na masa bani halak na iminaki na matei sadokah parroh ni Kristus?

¹⁴ Jadi, anggo adong halak na iminaki na matei sonari on, mintor ipapuho do ia hu surga. Ai do homa na ihatahon si Paulus bani 1 Korint 15:51, 52, “Seng haganup hita matei, tapi haganup do hita paubahon. Sompong ibagas sangkidop mata, bani parsora ni tarompit na parpudi ai.” Sonari domma saud ai. Tontu marmalas ni uhur ma ganup halak na iminaki na domma ipapuho ai halani “tongtong ma [sidea] rap pakon Tuhan in”.​—1 Tes. 4:17.

15. Aha do na laho ihorjahon halak na ipapuho hu surga?

¹⁵ Bani Bibel ipatugah do aha na laho ihorjahon sidea na ipapuho hu surga. Nini Jesus do bani sidea, “Bani na monang in pakon bani na mangkorjahon horjangku das hu ujung, bereonku do  kuasa bani, manrajai bangsa parbegu. Parmahanonni ma sidea marhitei tungkot bosi anjaha rosakonni do sidea songon hudon tanoh, songon ahu na dob manjalo kuasa in humbani Bapangku.” (Pangk. 2:26, 27) Jadi tangkas ma iihutkon sidea do holi parentah ni Jesus, janah iparmahani sidea do haganup bangsa marhitei tungkot bosi.​—Pangk. 19:11-15.

16. Sonaha marjuta halak boi monang humbani hamatean?

¹⁶ Jadi monang do holi ganup halak na iminaki humbani hamatean sanggah sidea ipapuho. (1 Kor. 15:54-57) Dob ai, iripaskon sidea ma ganup parjahat sadokah porang Harmagedon. Anjaha dong holi marjuta halak Kristen na “roh humbani hamarsikon banggal” janah masuk hu dunia na baru. (Pangk. 7:14) Itonggor sidea ma holi sonaha hamatean italuhon halani dong marjuta halak na matei na ipapuho i dunia na baru. Tontu malas tumang ma uhur ni ganup halak na mangidah hamonangan ai! (Lah. 24:15) Anjaha sidea na totap setia bani Jahowa boi maluah humbani hamatean. Gabe boi ma sidea manggoluh sadokah ni dokahni.

17. Domu bani 1 Korint 15:58, aha ma na porlu ibahen hita humbani sonari on?

¹⁷ Tontu malas tumang ma uhurta dobkonsi mangarusi pasal parpuhoon na iulas si Paulus hubani halak i Korint. Halani ai, sihol ma hita mandalankon podah ni si Paulus ase totap hita mambere na sidearan “ibagas horja ni Tuhan in”. (Basa 1 Korint 15:58.) Anggo totap hita ringgas ibagas pangidangion, iahapkon hita ma holi malas ni uhur na banggal bani ari simagira. Anjaha anggo domma saud pangarapan ai, tontu lang tarbayangkon hita sonaha holi megah ni uhurta ijai. Halani ai, pos ma uhurta lang soya ganup na ihorjahon hita bani Tuhan in.