1-2. Engkai maka kerina kalak Kristen merhat meteh kerna arapen kekeken ku surga?

TEREMEN kalak si ngelayani Jahwe gundari erpengarapen nggeluh si rasa lalap i doni. Tapi, piga-piga kalak Kristen si ipilih Jahwe erpengarapen guna ipekeke ku surga. Kalak si erpengarapen ku surga enda merhat meteh uga nge kari kegeluhenna bas surga. Tapi, kalak si erpengarapen nggeluh bas doni pe merhat ka meteh kerna si e. Engkai? Bagi si nandangi sibahas, kekeken ku surga mereken pasu-pasu man kalak si erpengarapen nggeluh si rasa lalap bas doni. Emaka, la soal arapenta ku surga ntah ku doni, merhat kita mpelajari kerna kekeken ku surga.

² Itegu-tegu Dibata piga-piga murid Jesus bas abad pertama guna nulisken kerna arapen ku surga. Salah sadana eme Rasul Johanes, nina, “Gundari kita anak-anak Dibata kap. Tapi, lenga siteh uga kita pagi. Tapi siteh maka sanga icidahken Dibata pagi diriNa, bali me kita bagi Ia.” (1 Joh. 3:2) La ieteh kalak Kristen si erpengarapen ku surga uga pagi keadan kalak e sanga ipekeke ku surga. Tapi, si ieteh kalak e banci kari tuhu-tuhu idahna Jahwe. La ituriken Pustaka kerina kerna kekeken ku surga, tapi ibereken Rasul Paulus piga-piga keterangen kerna si e. Ikataken Paulus maka kalak si erpengarapen ku surga radu pagi ras Kristus ‘engkernepken kerina pemerentahen ras kerina si erkuasa,’ termasuk “musuh terakhir” eme “kematen.” Dungna, Jesus ras kerina kalak si radu merentah ras ia, kerinana patuh man Jahwe. (1 Kor. 15:24-28) Luar biasa kel pagi e! *

3. Menurut 1 Korinti 15:30-32, kai pengaruh arapen kekeken man Paulus?

 ³ Perban tek Paulus man arapen kekeken, megenggeng ia ngadapi tentangen kai pe. (Baca 1 Korinti 15:30-32.) Nina Paulus man kalak Kristen si lit bas Korinti, “Tiap wari menam aku mate.” Nina Paulus ka, “Kulawan binatang-binatang si seh kel rawana i Epesus.” Banci saja e maksudna sanga ertarung ia ngelawan binatang-binatang buas bas Epesus. (2 Kor. 1:8; 4:10; 11:23) Ntah banci saja maksudna sanga iadapina tentangen arah kalak Jahudi bage pe kalak si deban si bali bagi “binatang-binatang si seh kel rawana.” (Perb. 19:26-34; 1 Kor. 16:9) La soal uga beratna tentangen si iadapi Paulus, tek ia maka pasti idatna keriahen ukur i bas wari si pepagi.​—2 Kor. 4:16-18.

4. Uga arapen kekeken mpengaruhi kalak Kristen gundari? (Nen gambar sampul.)

⁴ Gundari kita nggeluh i bas masa-masa si sulit. Piga-piga turang seninata jadi korban kejahaten. Piga-piga la aman iakapna perban tading bas daerah perang. Selain si e, bas piga-piga negri turang seninata la bebas erberita perban ilarang pemerentah. Perban terus erberita banci jadi kalak e ipenjaraken ntah pe ibunuh. Tapi kerina turang seninata enda la mbiar janah terus ngelayani Jahwe. Engkai maka kalak e la mbiar? Perban iteh kalak e aminna pe mate kalak e gundari, pasti nge ipekeke Jahwe janah iberekenNa kegeluhen si terulin i bas wari si pepagi. Tuhu-tuhu usihen si luar biasa kel!

5. Cara rukur si uga si banci erban lemah kinitekenta nandangi kekeken?

⁵ Bas jaman Paulus lit bagenda cara rukur kalak: “Adi tuhu kin kalak mate labo ipekeke, ‘man minem sajalah kita sebap pagi mate me kita.’” Ipersingeti Paulus turang seninana gelah ula kalak e terpengaruh cara rukur si salah e. Situhuna, ope jaman Paulus pe enggo lit cara rukur si bage. Banci saja ikutip Paulus Jesaya 22:13, si nuriken kerna perbahanen kalak Israel. La iusahaken kalak e rembak ras Dibata, tapi lalap ermeriah-riah saja ngenca atena. Ikataken kalak e maka la siteh uga geluhta pagi, emaka uga siakap meriah bagelah siban. Cara rukur si bage enggo biasa kel gundari. Tapi bas Pustaka ikataken maka cara rukur si bage erban kalak Israel ngenanami akibat si la mehuli.​—2 Kro. 36:15-20.

6. Uga arapenta kerna kekeken mpengaruhi keputusenta sanga milih teman?

⁶ Tek kita maka ipekeke Jahwe pagi kalak si enggo mate. Arusna kinitekenta e mpengaruhi keputusenta sanga milih teman. Turang senina i Korinti, iingetken gelah la erteman ras kalak si la tek man kekeken. Kai pelajarenna? Adi sipekeri melala waktuta ras teman si la ermediate man wari si pepagi janah meriah-riah saja ngenca atena, la mehuli pengaruhna man banta. Teman si bage banci ncedai carata rukur bage pe kebiasanta si mehuli. Janah banci ka ibanna kita ngelakoken kai si segat ate Dibata. Emaka, inasehati Paulus kita, “Sadarlah kena, lakokenlah kai si benar, janah ula nai ban dosa.”​—1 Kor. 15:33, 34.

7. Bagi si ikataken bas 1 Korinti 15:35-38, penungkunen kai si banci saja isungkun piga-piga kalak kerna kekeken?

⁷ Baca 1 Korinti 15:35-38. Kalak si atena erban kalak si deban sangsi man arapen kekeken, banci saja bagenda  penungkunenna, “Uga kalak mate ipekeke?” Enterem kalak la seri pendapatna kerna kai si terjadi kenca kita mate. Tapi, kai si iajarken Pustaka? Mari sipereksa penjelasen kai si ibereken Paulus.

8. Perumpaman kai si banci nampati kita ngangkai kerna kekeken ku surga?

⁸ Sanga mate sekalak jelma, macik me dagingna. Tapi Dibata Jahwe si nciptaken alam semesta banci mpekeke kalak e janah iberekenNa bentuk si mbaru man kalak si ipekeke e sue ras arapenna, la soal arapenna ku surga ntah pe ku doni. (Kej. 1:1; 2:7) Sanga ncakapken kerna kekeken ku surga, igunaken Paulus sada perumpaman guna ncidahken maka la perlu ipekeke Dibata sekalak jelma alu bentuk si seri. Enda igambarken Paulus alu sada “benih.” Sada benih si isuan turah jadi bentuk si mbaru eme jadi sinuan-sinuan. Sinuan-sinuan e beda kel adi ibandingken ras benih si kitik ndai. Igunaken Paulus perbandingen enda guna ncidahken maka banci ibereken Penciptata ‘bentuk si mbaru man sekalak jelma sue ras peratenNa.’

9. Menurut 1 Korinti 15:39-41, kai si ikataken Paulus kerna ciptan Jahwe si la seri bentukna?

⁹ Baca 1 Korinti 15:39-41. Ijelasken Paulus maka erbage-bage kerina ciptan Jahwe. Misalna, bentuk asuh-asuhen, bentuk perik, ras bentuk ikan pe beda sada ras si debanna. Selain si e, ikataken Paulus maka bas langit pe beda-beda ka ciptan Jahwe, bagi matawari ras bulan. Ikatakenna ka maka “tiap bintang lit kemulianna sendiri.” Ikataken ilmuwan-ilmuwan maka jenis bintang-bintang beda-beda kerinana, aminna pe la banci idah matata. Misalna, lit si galang janah lit ka si kitik, lit ka si warnana megara, mbentar, ntah pe megersing bagi matawari. Kenca si e, bagenda ka nina Paulus, “Si tading i surga la seri bentukna ras si tading i doni.” Kai maksudna? Mahluk hidup si lit i doni, bagi manusia bentukna  daging, tapi si tading i surga bagi malekat-malekat bentukna roh.

10. Uga nge bentuk kalak si ipekeke ku surga?

¹⁰ Perdiateken kai si ikataken Paulus seterusna: “Bage ka pe kerna kalak mate si ipekeke. Ikuburken i bas keadan si banci masap, janah ipekeke i bas keadan si la banci masap.” Sanga mate sekalak jelma, dagingna macik, janah mulihken ia ku abu. (Kej. 3:19) Adi bage, uga maka daging sekalak jelma banci “ipekeke i bas keadan si la banci masap”? Si ijelasken Paulus i jenda labo kerna kalak si ipekeke guna nggeluh i doni, bagi si ipekeke Elia, Elisa, ras Jesus. Tapi si sangana icakapken Paulus eme kerna kalak si ipekeke alu bentuk si banci nggeluh i surga eme “bentuk roh.”​—1 Kor. 15:42-44.

11-12. Sanga Jesus ras kalak Kristen si erpengarapen ku surga ipekeke, uga nge bentuk kalak e?

¹¹ Sanga Jesus i doni, bentukna labo roh tapi bentuk daging. Tapi kenca ipekeke, ia jadi “mahluk roh si mereken kegeluhen” janah mulihken ku surga. Bagi Jesus, sanga kalak Kristen si erpengarapen ku surga ipekeke, ibereken man kalak e bentuk si banci nggeluh i surga. Ijelasken Paulus, “Bali bagi kita si seri ras ia si iban i bas abu nari, pagi pe kita seri ras ia si rehna i bas surga nari.”​—1 Kor. 15:45-49.

¹² Ingetlah maka sanga Jesus ipekeke, la ia ipekeke i bas bentuk daging. Engkai? Ijelasken Paulus alasenna i bas akhir pembahasenna kerna kekeken ku surga, nina, “Dareh ras daging la banci ngewarisi kerajan Dibata,” si lit i surga. (1 Kor. 15:50) Sanga rasul-rasul ras kalak Kristen si erpengarapen ku surga si debanna ipekeke guna nggeluh i surga, kalak e la ipekeke bagi bentuk si sebelumna, eme bentuk dareh ras daging si banci macik. Sanga itulis Paulus 1 Korinti, piga-piga murid Jesus enggo “medem i bas kematen,” misalna Rasul Jakup. (Perb. 12:1, 2) Bas pudi wari rasul-rasul si nggeluh denga  ras kalak Kristen si erpengarapen ku surga pe “medem i bas kematen.” (1 Kor. 15:6) Ndigan kalak e ipekeke? La kalak e mis ipekeke kenca kalak e mate. Ikataken Paulus e terjadi bas wari si pepagi.

13. Kai kari si terjadi sanga kerehen Jesus?

¹³ Inubuatken Jesus ras Paulus kerna sada waktu si penting, eme kerna kerehen Kristus. Sanga masa kerehen Kristus e, terjadi kari perang, gempa bumi, pinakit, ras kejadin si la mehuli si debanna i belang-belang doni. Nubuat-nubuat enda enggo terjadi mulai tahun 1914. Selain si e, lit ka kari terjadi kejadin si penting. Kai e? Ikataken Jesus maka berita si meriah kerna Kerajan Dibata si enggo merentah, iberitaken “man manusia i belang-belang doni guna kesaksin man kerina bangsa, kenca si e reh me kedungen e.” (Mat. 24:3, 7-14) Ikataken Paulus maka sanga “kerehen Tuan” kalak si erpengarapen ku surga si “medem i bas kematen” ipekeke pagi guna nggeluh i surga.​—1 Tes. 4:14-16; 1 Kor. 15:23.

14. Kai si terjadi man kalak Kristen si erpengarapen ku surga si mate sanga kerehen Kristus?

¹⁴ Kalak Kristen si erpengarapen ku surga si mate gundari, mis kari ipekeke guna nggeluh i surga. Enda sue ras kata-kata Paulus si icatat bas 1 Korinti 15:51, 52, “Labo pagi kerina kita medem i bas kematen, tapi kerina pagi kita iubah i bas waktu si seh kel kentisikna, eme i bas sengkemirep mata, sedekah trompet si terakhir ersora.” Kata-kata Paulus enda sangana terjadi gundari. Kenca ipekeke, meriah kel kari ukur senina-senina Kristus perban ‘tetap kari kalak e ersada ras Tuan.’​—1 Tes. 4:17.

15. Kai kari si ilakoken kalak si iubah “i bas sengkemirep mata” bas surga?

 ¹⁵ Ikataken Pustaka kai kari si ilakoken kalak e i surga kenca kalak e iubah “i bas sengkemirep mata.” Ikataken Jesus man kalak e, “Man kalak si menang ras kalak si ndalanken perentahku seh ku kedungenna, kubereken pagi bana kuasa guna merentah bangsa-bangsa, bali bagi kuasa si nggo kualoken i bas Bapakku nari. Ipermakanina pagi bangsa-bangsa alu tongkat besi. Alu bage kalak e pagi bali bagi kudin taneh si iperperken.” (Ket. 2:26, 27) Iikutken kalak e Jesus i bas ndalanken tugasna eme mpermakani bangsa-bangsa alu tongkat besi.​—Ket. 19:11-15.

16. Uga enterem kalak banci menang nandangi kematen?

¹⁶ Jelas me, sanga kalak si erpengarapen nggeluh bas surga ipekeke, enggo menang kalak e nandangi kematen. (1 Kor. 15:54-57) Kenca si e, banci kalak e ikut ras Kristus guna engkernepken kejahaten i belang-belang doni sanga perang Harmagedon. Jutan kalak Kristen si debanna banci “selamat ngelewati kiniseran si mbelin” janah masuk ku doni si mbaru. (Ket. 7:14) Kalak si selamat e banci kari ngidah kemenangen si debanna eme sanga miliaren kalak si mate mbarenda ipekeke. Bayangken uga riahna adi terjadi pagi kejadin si luar biasa e! (Perb. 24:15) Janah, kerina kalak situhu-tuhu setia man Jahwe banci ka menang nandangi kematen si iwarisken Adam. Banci kalak e nggeluh si rasa lalap.

17. Menurut 1 Korinti 15:58, kai si arus silakoken gundari?

¹⁷ Kerina kalak Kristen si nggeluh gundari pasti terapuli sanga ibacana kerna arapen kekeken, si itulis Paulus bas suratna man kalak Korinti. Erkiteken si e me maka siikutken ateta nasehat Paulus guna ndahiken “dahin Tuhan” asa ngasupta. (Baca 1 Korinti 15:58.) Adi siusahaken asa ngasupta ngelakoken dahin e, banci sidat kegeluhen si ermeriah ukur i bas wari si pepagi. Kai si terjadi pagi ndauh kel ulin asangken kai pe si banci sibayangken. Pasu-pasu si banci sigejapken bas wari si pepagi mbuktiken maka kerja kerasta i bas ndahiken dahin Tuhan la sia-sia.